1 အာဟေစကီ ဝီ ဘဲန် ခုန်ဒီခမ် အီ အိုပ် မိူင် ယူဒါ ဒေါ နုဝ့် အာဆာက် အန် အာ ဂိုဝ် ဒီ ဖန် ဆီနမ်။ အန် ဘော အိုပ် ကွယ် ခဲင် မိူင် ယေရူဆာလဲမ် အာဒါ အာ ဂိုဝ် ဒီ ဒိမ် ဆီနမ်။ မာ အန် စိူဝ် နာင် အေဖီယ အီ မုး ဂွန် အာဆာခါရာ။ 2 အန် ဘော ဘူင် နာ ဘွတ် နာ မွှိုမ် ပီ အိုင် ဇဝ်ဖြာ။ အန် ဒူပ် ပီ ပါယ် ဒါ ဒါ အန် အီ မုး ခုန်ဒီခမ် အာဒါဝိတ် တွိုန်။

3 ဒေါ မုး ဆီနမ် ဒေါ ဂုဝ်၊ မာဂျီန် ဒေါ ဂုဝ် ဒေါ ဘဲန် အာဟေစကီ ခုန်ဒီခမ် တီ အန် ဝီ ဝိုဝ်း မာလုဝ်း ဟုဝ် ဇဝ်ဖြာ အူ ဇေန့် ဘော ဝီ ဘူင် ဝီ မ့ပြာယ် ဒွန် ပ့လုဝ့်။ 4 အန် ဝီ ကာလာင် ဒီ ဂေ ဒါ အီ လှူ ဒီ ဇဝ်ဖြာ ဘော ဒီ ဂေ ဒူအီ ခြိုဝ် အာလေဝီ၊ တဲး ဂေ တး ကာဇု ခဲင် ဝဲင် ဟုဝ် ဇဝ်ဖြာ ဘ့လာက် နာ လေး ဆီငဲ။ 5 အန် ဝီ တဝ်း ဒီ ဂေ၊ “အိုယ် ဘေ ဒူအီ အာမျုဝ် အာလေဝီ၊ တဲး ဘေ ထူမ်၊ တဲး ဘေ ဘူင် တဲး ဒုဝ် ဘူင့် ဘေ ဆီငါ ဘွတ်။ ဟဲ့ ဟွတ့်၊ ဝီ ဘူင် တဲး ဘော ဟုဝ် ဇဝ်ဖြာ ဆီငါ ဘွတ်။ န့ မုး ဇဝ်ဖြာ ပီ ကြိုပ် ဂုန့် ဒင် ဘေ တဲး ဘေ ဒိုဝ်း ဝဲန် တူတ့် အီ မွှိုမ် ကာအိး၊ အီ ကွယ် ခဲင် ဒူင် ဆီငါ ဘွတ်။ 6 ဂေ ဂုန့် အေ တူ မိုဝ်း နဝ်း ဆိူဝ် နဝ်း မှာန် ဒီ ဇဝ်ဖြာ အီ မုး ဇဝ်ဖြာ ပီ ကြိုပ် အေ။ ဂေ ဟဲ့ ဘူင် အီ တူ လဝ့် နဝ်း အန် ဇဝ်။ ဂေ ဟဲ့ ဝး အန် ဇဝ်၊ အာဝ် ဟူ ယွတ် ဒူင် ကွယ် အန် ဇဝ်။ 7 ဂေ ဟဲ့ ကာဘိတ် မာလုဝ်း ဟုဝ် ဇဝ်ဖြာ၊ ဟဲ့ ဘျတ် ဝဲန် ဘော ငဝ် အွမ် ဘောကာဂ့လျီတ်။ ဂေ မိူဝ် အာဝ် ဟူ ဒုဝ့် ဆီနမ် အုး ငှုန်၊ အာဝ် ဟူ လှူ ပီ ဒီ လှူ အီ ဒုဝ့် ဒီ ငဝ် ခဲင် ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ။ 8 ကူပ် ဘူင် ဂေ ပါယ် တီ ဇဝ်ဖြာ မိူဝ် ရူ ကာဆဝ် ဒီ ဂေ ဒူအီ အာယူဒါ ဘော ဒီ ဂေ ဒူအီ ခဲင် မိူင် ယေရူဆာလဲမ်။ ဘေ မိူဝ် ဟဲ့ ဟွတ့် နပ် ဆီချာ ခဲ့ ပဲ့ ဟဲ့ ဘူင် အန် ဇဝ် ဒီ ဂေ ဟဲ့ မွှိုမ် ယုဝ် မွှိုမ် ကာဟိဝ် ဒီ ဒူအီ ဒွန် အီ။ 9 ဒါ အေ ဘော ဂုန့် အေ ဟဲ့ ကာဒုး ဒီ ယမ် ဒူင် ကာဂုဝ်း ဂေ။ ဂွန် အေ ဂေ အီဘိုန့် အေ ဟဲ့ ဝီ ကာဒုး ဒီ ခမ် အီ ဟဝ် မှေတ့် ဟာဝ် ဂေ။ 10 ဒေါ တီ နီ အုဝ် ဟဲ့ ခတ် နဝ်း၊ တဝ်း ဒီ ဒွါ ကာဒိက် ဆတ်ဇာ ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ တဲး နဝ်း ရူ အန် ဟြာယ်။ 11 အိုယ် ဘေ ဂွန် အုဝ်၊ ဘေ ကွဲ့ ကြဲ ကွဲ့ ထိူင် ဒီ ဘူင်။ ခုဝ်၊ ဇဝ်ဖြာ ဟဲ့ ရဝ်း ဘေ၊ တဲး ဘေ ဘဲန် အီ ဘူင် ဂါန် အန်၊ အီ ကွယ် ဒီ အာတ့် အန် ဇဝ် ဘော ဒုဝ့် ဆီနမ် အုး ငှုန် ဘော ယဲတ့် ဂေ ဒူအီ ကိူန် ကြိုပ် အန်။”

12 ပါယ် တီ ဂေ ဒူအီ ခြိုဝ် အာလေဝီ မိူဝ် တး အူ ဇေန့်။ ဒူအီ ဂေ တီ ဘော မုး အာမာဟာတ် အီ မုး ဂွန် အာမာဆေ ဘော အာယုဝ်အေလ အီ မုး ဂွန် အာဇာရီယာ။ ဂါယ် ဘော မုး ဒူအီ အာမျုဝ် အာခုဝ်ဟာတ်။ န့ ဘော မုး အာကီဆာ အီ မုး ဂွန် အာဖာဒီ ဘော အာဇာရီယာ အီ မုး ဂွန် အာယေဟာလာလေန်။ ဂါယ် မုး ဒူအီ အာမျုဝ် အာမေန်ရာရီ။ န့ မုး ဘော အာယုဝ်အာ အီ မုး ဂွန် အာဇီမာ ဘော အာအေဒေန် အီ မုး ဂွန် အာယုဝ်အာ။ ဂါယ် ဘော မုး ဒူအီ အာမျုဝ် အာဂေန်ရာဆူန်။ 13 န့ ဘော မုး အာဆီမာရီ ဘော အာယေယီလာ အီ မုး ဒူအီ အာမျုဝ် အာအေလီဇာဖာန်၊ အာဆာခါရာ ဘော အာမာထာနီ အီ မုး ဒူအီ အာမျုဝ် အာဆာပ်၊ 14 အာယေဟီလာ ဘော အာဆီမီ အီ မုး ဒူအီ အာမျုဝ် အာဟေမာန်၊ အာဆေမာယာ ဘော အာအူဆီအေန် အီ မုး ဒူအီ အာမျုဝ် အာယေဒူထုန်။

15 ဂေ မိူဝ် ဒဲ့ တး ကာဇု တူတ့် ခဲ့ ကွယ် ဒူအီ ခြိုဝ် အာလေဝီ ဘော ဘူင် တဲး ဒုဝ် ဂေ ဆီငါ။ ဟဲ့ ဟွတ့်၊ ဂေ မိူဝ် ဘူင် ဒူပ် ပီ စ်ု ခုန်ဒီခမ် ဂေ ဘူင်။ ဂေ ဝီ ဘူင် တဲး ဘော ဟုဝ် ဇဝ်ဖြာ ဆီငါ၊ တဲး န့ ဘော ဒူပ် ပီ ကာလာင် အုန် ဇဝ်ဖြာ။ 16 ဂေ ဒါ အီ လှူ ဒီ ဇဝ်ဖြာ မိူဝ် တး လိုပ် ခဲင် ဟုဝ် ဇဝ်ဖြာ ဘော ဘူင် တဲး ဟုဝ် ဇဝ်ဖြာ ဆီငါ ဘွတ်။ ဂေ ဘော တုဝ် လေး ကာအး အီ တူ ဆီငါ ဘွတ် ဒွန် မျုဝ် အီ ကွယ် ခဲင် ဟုဝ် ဇဝ်ဖြာ တွိုန်၊ ဝီ ဟာဝ် ဟုး ဒီ ဒီဂ့လ ဝဲင် ဟုဝ် ဇဝ်ဖြာ။ ဂေ ဒူအီ ခြိုဝ် အာလေဝီ ပီ ဝီ ဒိုဝ်း ဒီ တီ၊ ဝီ ဟာဝ် ဟုး နာ ရေတ့် မိူင် ခဲင် ဒီလယ့် ဘ့လဲင် ခီဒါရူန်။ 17 ဒေါ ဇမ် မာဂျီန် ဒေါ ဂုဝ်၊ ဆီငဲ ဒေါ ဂုဝ်၊ ဂေ မိူဝ် ကာစုး ဒီ ဘူင်။ ကော ဇမ် ဆီငဲ န့ဒါ ဂေ ဟဲ့ ဟွတ့် ဘူင် တဲး န့ ဆီချာ တူတ့် ဒွန် ပ့လုဝ့်၊ ကော ဇမ် ဘော ခဲင် ဟုဝ် တာင် အီ ကွယ် ဒီ အာတ့် မာလုဝ်း ဟုဝ် ဇဝ်ဖြာ။ ဒေါ ဝီ ဇမ် မာဂျီန် ဒေါ ဂုဝ်၊ ဆီငဲ ဂိုဝ် ဒီ န့ဒဝ်၊ ဂေ မိူဝ် ဟဲ့ ဟွတ့် ဟွတ့် တူတ့်။

18 ဂေ ဒူအီ ခြိုဝ် အာလေဝီ ဘော ဝီ တး ဇမ် ဒူင် ကွယ် ခုန်ဒီခမ် အာဟေစကီ ဘော တဝ်း ဒီ အန်၊ “ယေ ဟဲ့ ဟွတ့် ဘူင် တဲး ဟုဝ် ဇဝ်ဖြာ ဆီငါ ဘွတ် တူတ့် ဒွန် ပ့လုဝ့်။ ယေ ဟဲ့ ဘူင် တဲး န့ ဇေ့ဇုင် တူတ့် ဒွန် မျုဝ်။ ဘော မုး ကာစှူင့် ဒူင် လှူ ပီ လှူ အီ ဒုဝ့် ဒီ ငဝ်၊ ကာစှူင့် ဒူင် ဘ့လေး ခါမုန် အီ ဆီငါ ဘွတ် ဘော ကြုဝ် ပီ လုဝ် စ်ု လုဝ် တာ ဒွန် မျုဝ် မိူဝ်၊ ဟဲ့ ဟွတ့် ဆီငါ ဘွတ် တူတ့် ဒွန် မျုဝ်။ 19 ခြိုင် တာ ပဲ့ ဟဲ့ ဒိုဝ်း လေး ခုန်ဒီခမ် အာခါတ် ဒေါ ဟဲ့ ဘူင် ကာဘး အန် ဒီ ဇဝ်ဖြာ မိူဝ်၊ ယေ ဟဲ့ ဟွတ့် ဝီ ဘူင် ဝီ မ့ပြာယ်၊ တဲး န့ ဆီငါ ဘွတ် တူတ့် ဒွန် မျုဝ်။ ကြုဝ် ဂေ တီ ဟဲ့ ကွယ် တူတ့် ဒီ အာတ့် ကာစှူင့် လှူ ဒီ ဇဝ်ဖြာ။”

20 ပါ ခဲညှာ အာဟေစကီ မိူဝ် ယိတ့် ဆိန့် ဆိန့်ဝး စေဝ်၊ ဒဲ့ တး ကာဇု ခဲ့ ကွယ် ဂေ အာမူ အာမာတ် အန်၊ တဲး ဂေ ဝီ ဟုဝ့် လိုပ် ခဲင် ဟုဝ် ဇဝ်ဖြာ။ 21 အန် မိူဝ် ဒိုဝ်း မက် အာလူင့် ဘူ ဒုဝ်၊ မာဘူ အာလူင့် ဘူ ဒုဝ်၊ ဂွန် မာဘူ အာလူင့် ဘူ ဒုဝ် ဘော မာပဲ အာလူင့် ဘူ ဒုဝ်၊ တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ် ဂေ ဒူအီ အီ ကွယ် ခဲင် ဟုဝ် အန် ဘော ဂေ ဒူအီ ဘော ရဝ် ဘော ကာင် ခဲင် ကာဒါယ် မိူင် ယူဒါ ဘောကာဂ့လျီတ်၊ တဲး ဘော ဟုဝ် ဇဝ်ဖြာ ဆီငါ ဘွတ်။ အန် မိူဝ် စ်ု ဂေ ဒါ အီ လှူ ဒီ ဇဝ်ဖြာ အီ မုး လှုက်လှာန် အာရူန်၊ တဲး ဂေ ဒိုဝ်း ဒုဝ် ဆတ်ဒါဝါ ဂေ တီ၊ လှူ ဒဲင် ကာစှူင့် လှူ။ 22 ဂေ ဒါ အီ လှူ ဒီ ဇဝ်ဖြာ မိူဝ် ငဝ်း မက် အာလူင့်၊ ဝီ ဒိုဝ်း နှာမ် ဒုဝ် ဂေ တီ၊ ခြဝ်း ဒီ ကာစှူင့် လှူ။ ဟဲ့ ဟွတ့်၊ ဂေ ဝီ ငဝ်း မာဘူ အာလူင့်၊ ဝီ ဒိုဝ်း နှာမ် ဒုဝ် ဂေ တီ၊ ခြဝ်း ဒီ ကာစှူင့် လှူ။ ပီ ဝီ ငဝ်း ဘော ဂွန် မာဘူ အာလူင့်၊ ပီ ဝီ ဒိုဝ်း နှာမ် ဒုဝ် ဂေ တီ၊ ဝီ ခြဝ်း ဒီ ကာစှူင့် လှူ။ 23 ဂေ ဝီ ဒိုဝ်း မာပဲ အာလူင့် အာဒါ ပီ ဒီ လှူ ဒီ ဂဝ်း ဝဲန် မှာပ်၊ ဝီ ဟာဝ် ဘ့လေး ဒီ အာတ့် ခုန်ဒီခမ် ဘော ဒီ အာတ့် ဂေ ဒူအီ ကိူန်၊ တဲး ဂေ ဒွန် အီ ဒါင် ဒဲ ဂေ ဒဲင် ဂိန့် မာပဲ ဂေ တီ။ 24 ဝါယ် အန် တီ၊ ဂေ ဒါ အီ လှူ ဒီ ဇဝ်ဖြာ ဘော ငဝ်း မာပဲ အာလူင့် တီ၊ ဝီ ဒိုဝ်း နှာမ် ဝီ လှုဝ် ဒဲင် ကာစှူင့် လှူ၊ တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ် ဒူအီ ဘောကာဂ့လျီတ်။ ခုဝ်၊ ခုန်ဒီခမ် ဟဲ့ စ်ု ဂေ လှူ ပီ ဒီ လှူ အီ ဒုဝ့် ဒီ ငဝ် ဘော ပီ ဒီ လှူ အီ ဂဝ်း ဝဲန် မှာပ် ဂေ ဒူအီ အီဆာရေလ ဘောကာဂ့လျီတ်။

25 ခုန်ဒီခမ် အာဟေစကီ မိူဝ် ဘူင် ဒူပ် ဂြုဝ်း ဇဝ်ဖြာ ပဲ့ ဟဲ့ ကာလာင် အန် ဇဝ် ဒီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဂတ် ဂါယ် အာနာထာန်၊ တဲး ဂါယ် ဝီ ကာလာင် ဒီ ခုန်ဒီခမ် အာဒါဝိတ်။ အန် မိူဝ် စ်ု ဂေ ဒူအီ အာလေဝီ ဂူင့် စှဲန့်၊ ဒိင် ဘော ဒိင် ဒီရဝ်၊ ကွယ် ခဲင် ဟုဝ် ဇဝ်ဖြာ။ 26 ကြုဝ် ပီ ဒွယ် ပီ ဘး ဂေ တီ၊ န့ ဘော မုး ကြုဝ် ပီ ဒွိုမ် ဒွါ ခုန်ဒီခမ် အာဒါဝိတ်၊ တဲး ဂေ ဒူအီ အာလေဝီ စ်ု။ ပါယ် တီ ဂေ ဒူအီ အာလေဝီ မိူဝ် စွင့် ဂူင့် မျုဝ် ပီ ဒွယ် ပီ ဘး တီ။ ဂေ ဒါ အီ လှူ ဒီ ဇဝ်ဖြာ ဘော ဘ်ု ဒီ ဘုတ် ဝဝ်။

27 အာဟေစကီ မိူဝ် ကာလာင် တဲး ဂေ လှူ ပီ ဒီ လှူ အီ ဒုဝ့် ဒီ ငဝ်။ ဒေါ ကာစုး ဂေ ဒီ လှူ တီ၊ ဂေ မိူဝ် တဝ်း မှုဝ် အီ အိူပ် မျုက် ဇဝ်ဖြာ။ ဂေ ဘော ဘုတ် ဝဝ် ဘော ဒွယ် ဘော ဘး ဘဲန် မျုဝ် ဘဲန် မျုဝ် အီ ဟမ် ဒါခိုယ်။ 28 ခဲ့ ကွယ် ဒူအီ ကိူန်၊ ဂေ မိူဝ် မုတ် ဂိုပ် ကြိုပ် ဇဝ်ဖြာ။ ဂေ အီ လုဝ် တဝ်း မှုဝ်၊ ဂေ မိူဝ် တဝ်း မှုဝ်။ ဂေ အီ လုဝ် ဘုတ် ဝဝ် မိူဝ် ဘုတ် ဝဝ်။ ဂေ ဘူင် ပါယ် တီ တဲး ကော ဇမ် ပန် ဒီ ဟွတ့် ဂေ လှူ ပီ ဒီ လှူ အီ ဒုဝ့် ဒီ ငဝ်။

29 ဒေါ ဟဲ့ ဟွတ့် ဂေ လှူ တီ၊ ခုန်ဒီခမ် အာဟေစကီ ဘော ဂေ ဒူအီ ကိူန် ဘောကာဂ့လျီတ် ဝီ ကာဖြူမ် ဒီ ခြိုပ်ခြဝ် ကြိုပ်။ 30 ခုန်ဒီခမ် ဂေ အာမူ အာမာတ် အန် မိူဝ် စ်ု ဂေ ဒူအီ ခြိုဝ် အာလေဝီ၊ တဲး ဂေ တဝ်း မှုဝ် အီ အိူပ် ဇဝ်ဖြာ အီ မုး မှုဝ် ပီ ဒဲမ် အာဒါဝိတ် ဘော အာဆာပ် အီ မုး ဒူအီ အီ နပ် ဒီ ယိုဝ်။ ပါယ် တီ ဂေ မိူဝ် ခူယ် ဒါခိုယ် ဘော မုတ် ကြိုပ်။

31 ဝါယ် အန် တီ အာဟေစကီ ပီ ဝီ ကာလာင် ဒီ ဂေ ဒူအီ ကိူန် တဝ်း၊ “ဒေါ တီ နီ ဘေ ဟဲ့ ဟွတ့် တဲး ဒုဝ် ဘူင့် ဘေ ဆီငါ။ ခုဝ်၊ တဲး ဘေ ဒိုဝ်း ဒုဝ် ဆတ် ပီ ဆီ လှူ ဘေ ဘော ပီ ဒီ လှူ အီ ဒါင် ဂုင် ဂေဇူ ဒီ ဇဝ်ဖြာ၊ တဲး ဘေ လှူ ဒေါ တီ နီ။” ဂေ မိူဝ် ထူမ် ဂြုဝ်း ခုန်ဒီခမ် တီ။ ဂေ အီ မိုဝ်း နဝ်း ဇွန်ဇူမ် ဆီ လှူ၊ ဂေ မိူဝ် ဒိုဝ်း တး ဒုဝ် ဆတ်ဒါဝါ၊ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ် ဘော ပီ ဒီ လှူ အီ ဒါင် ဂုင် ဂေဇူ ဒီ ဇဝ်ဖြာ။

32 ပီ ဒီ လှူ ဂေ ဘော ဒွန် မျုဝ် ဘော မုး မက် အာလူင့် ဘူ ဂိုဝ် ဒုဝ်၊ မာဘူ အာလူင့် အူ မာယဝ်း ဒုဝ်၊ ဂွန် မာဘူ အာလူင့် အာ မာယဝ်း ဒုဝ်။ ဘောကာဂ့လျီတ် ဂေ တဲး န့ ဘဲန် ပီ ဒီ လှူ ဒီ ဇဝ်ဖြာ အီ ဒုဝ့် ဒီ ငဝ်။ 33 ဒဲင် တီ ဂေ ပီ ဝီ လှူ ဘော မက် အာလူင့် ပေါ ဒဝ် မာယဝ်း ဒုဝ် ဘော မာဘူ အာလူင့် အူယ် ဟြဲန့် ဒုဝ်။ 34 ဂေ ဒါ အီ လှူ ဒီ ဇဝ်ဖြာ ဟဲ့ ပြေတ့် ကာဆဝ်။ ခုဝ်၊ ဂေ အာဝ် ဟူ နပ် ဒီ လျီ့ လေး ဟုန် ဒုဝ် ဆတ် ဂေ တီ။ ဂေ ဒူအီ ခြိုဝ် အာလေဝီ ဘော ကာဒုး ဒီ စွယ် ဂေ၊ တဲး န့ ကော ဇမ် ပန် ဒီ ဟွတ့် ဂေ ဒါ အီ လှူ ဒီ ဇဝ်ဖြာ ပေါ မ့ပွါ ဘူင် တဲး ဒုဝ် ဘူင့် ဂေ ဆီငါ ဘွတ်။ ဂေ ဒူအီ ခြိုဝ် အာလေဝီ ဂေ ဟဲ့ ဆာဒိက် ကာဆဝ်၊ ဘူင် တဲး ဒုဝ် ဘူင့် ဂေ ဆီငါ ဘွတ် လွှိုမ် ဂေ ဒါ အီ လှူ ဒီ ဇဝ်ဖြာ။ 35 ဒုဝ် ပီ လှူ အီ ဒုဝ့် ဒီ ငဝ် ဘော ဘျြီင် အီ လေး ဒီ ပီ ဒီ လှူ အီ ကွယ် ကာဇု ဟူမ် ရိုမ်၊ ဘော ပီ ဒီ ဒျီင် အီ ဒူပ် ပီ ဒီ လှူ အီ ဒုဝ့် ခဲင် ငဝ်၊ န့ ဟဲ့ ကိူန် ကာဆဝ်။ ပါယ် တီ ဂေ ဝီ စုး ဒီ ကြိုပ် ဇဝ်ဖြာ ဘော လှူ ပီ ဒီ လှူ ခဲင် ဟုဝ် ဇဝ်ဖြာ တွိုန်။

36 ခုန်ဒီခမ် အာဟေစကီ ဘော ဂေ ဒူအီ ကိူန်၊ ဂေ မိူဝ် ခူယ် ဒါခိုယ် ကာဆဝ် ကူပ် ဟဲ့ စွယ် ဇဝ်ဖြာ၊ တဲး ဂါန် ပီ လုဝ် ဘူင် ဂေ စေဝ် ဟွတ့်၊ တဲး ဂေ ပွိုန် ဒီ လှူ ခြန် ခြန်။