1 ခုန်ဒီခမ် အာဟေစကီ စ်ု ဒါလာမ် အန် ဟာဝ် ဒဲ့ ဒူအီ အီဆာရေလ ဘော ဒူအီ အာယူဒါ၊ တဲး ဂေ တး ဒီ ဟုဝ် ဇဝ်ဖြာ အီ ကွယ် ခဲင် မိူင် ယေရူဆာလဲမ်၊ တဲး ဂေ ဘူင် ဘ့လွယ် လှုဝ်း ဂေ ဇဝ်ဖြာ ဒေါ ကာလုဝ်း အန် ကာင် ဂေ ဒေါ ကွယ် ဂေ ခဲင် မိူင် အဲဂိုပ် တွိုန်။ အန် ဘော တိုယ် ပဲ့ ဘာင် ဘော ခြိုဝ် အာအေဖာရိမ် ဘော ခြိုဝ် အာမာနာဆေ။ 2 ခုဝ် အန် တီ၊ ခုန်ဒီခမ် ဘော ဝီ လာယ် ဆင်ချာင် ဒီ ဂေ အာမူ အာမာတ် အန် ဘော ဂေ ဒူအီ ခဲင် မိူင် ယေရူဆာလဲမ်၊ တဲး ဂေ ဝီ ဘူင် ဘ့လွယ် တီ ဒေါ မုး မာဂျီန် ဟာအာ။ 3 ဂေ ဒူအီ ကိူန် တူ ဒန် ဘူင် ဘ့လွယ် တီ ဒူပ် အာခြာဝ် အန် ဒေါ မုး မာဂျီန် ဒေါ ဂုဝ်။ ခုဝ်၊ ဂေ ဒါ အီ လှူ ဒီ ဇဝ်ဖြာ အီ ဟဲ့ ဟွတ့် ဘူင် တဲး ဒုဝ် ဘူင့် ဂေ ဆီငါ ဘွတ်၊ ဂေ တူ ဂ့လိုမ်။ ဘော ဂေ ဒူအီ ဘောကာဂ့လျီတ် ညှမ် တး ကာဇု ခဲင် မိူင် ယေရူဆာလဲမ်။ 4 လွင် အန် တီ၊ ဟဲ့ လဝ့် နဝ်း ခုန်ဒီခမ် ဘော ဂေ ဒူအီ ကိူန်။ 5 ဂေ မိူဝ် ဒဲမ် ပဲ့၊ ဘာင် ခဲ့ ကွယ် ဒူအီ အီဆာရေလ ဘောကာဂ့လျီတ်၊ စုး ဒီ မိူင် ဘီရာဆေဘာ ကော ဝီ ဇမ် ခဲင် ကာဒါယ် မိူင် ဒါန်၊ တဲး ဂေ တး ကာဇု ခဲင် မိူင် ယေရူဆာလဲမ်၊ ဘူင် ဘ့လွယ် လှုဝ်း ဂေ ဇဝ်ဖြာ ဒေါ ကာလုဝ်း အန် ကာင် ဂေ။ ဟဲ့ လှေန့် ကာဆဝ် ဂေ ဒူအီ ကိူန် တူ ဘူင် ဘ့လွယ် တီ၊ တဲး န့ ဒူပ် ပီ ဒမ် အုန် ဒါရာ။

6 ပါယ် တီ ဂေ ဒါလာမ် ဘော ဒိုဝ်း ပဲ့ တီ၊ ဟာဝ် ခဲင် ကာဒါယ် မိူင် ယူဒါ ဘော ခဲင် ကာဒါယ် မိူင် အီဆာရေလ ဒွန် ပ့လုဝ့်၊ တဲး န့ ဒူပ် ခဲ့ ပီ ကာလာင် ခုန်ဒီခမ် ဘော ဂေ အာမူ အာမာတ် အန်။ ဂြုဝ်း ပီ ဒဲမ် ခဲင် ပဲ့ တီ ဟဲ့ တဝ်း၊ “အိုယ် ဘေ ဒူအီ အီဆာရေလ၊ တဲး ဘေ ဝီ တး ကြိုပ် ဇဝ်ဖြာ အီ မုး ဇဝ်ဖြာ ပီ ကြိုပ် အာဘြာဟမ် ဘော အာဆဲက် ဘော အာကူပ်။ ပါယ် တီ အန် ဇဝ် မိူဝ် ဒီ ဝီ တး ဒူင် ကွယ် ဘေ အီ ဆီ ဂိတ် ဆီ ကွယ်၊ အီ ဟဲ့ လွတ် ဒီ ခုန်ဒီခမ် အာဆူရာ။ 7 ကွဲ့ တဲး ဘေ ဘူင် ပီ ပီ ဘူင် ဂုန့် ဘေ ဘော အီကတ် ဝါ ဘေ အီ မုး ဒူအီ အီဆာရေလ၊ အီ တူ မိုဝ်း နဝ်း ဆိူဝ် နဝ်း မှာန် ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ။ ဘေ မိူဝ် ဟဲ့ ဟွတ့် ယိုဝ် လွင် ဇဝ်ဖြာ ဟဲ့ တဲး အာဘြဲတ် အီ မွှိုမ် ယုဝ် ကာဆဝ် ဒီ ဂေ။ 8 ကွဲ့ တဲး ဘေ ဒိူဝ် ပီ ဂုန့် ဒင် ဘေ။ တဲး ဘေ ဂူမ် ဒီ အာတ့် ဇဝ်ဖြာ။ တဲး ဘေ တး လိုပ် ခဲင် ဟုဝ် ဇဝ်ဖြာ အီ ဟဲ့ ဘဲန် ဒူင် ဆီငါ ဘွတ် ဆေဆေ။ တဲး ဘေ ဘူင် ပီ အိုင် ဇဝ်ဖြာ၊ ကွဲ့ တဲး အန် ဇဝ် ဆီ ရူ ဒီ ဘေ။ 9 ဆေ ဘေ ဝီ တး ဒူပ် ဇဝ်ဖြာ၊ ဂေ ရန်ဆူ ဘေ အီ ဟဲ့ မှေတ့် ဟာဝ် ဘီနွင် ဘေ ဘော ဂွန် ဘေ ဒီ ဝီ ကာဝေ ဂေ၊ ဝီ ဘ့လေး ဂေ၊ တဲး ဂေ ဝီ တး ခဲင် မိူင် နီ။ ခုဝ်၊ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် ဘော မိုဝ်း နဝ်း ရွက့် ဘော နဝ်း ဆီ ဂေဇူ အီ။ ဆေ ဂေ ဝီ ဒူပ် အန်၊ အန် ဇဝ် မိူဝ် တူ ဘ့လေး ဝဲန် ဂေ။” ခဲ့ တီ ပဲ့ ပီ ဒဲမ် ခုန်ဒီခမ် ဂေ အာမူ အာမာတ် အန်။

10 ဒါလာမ် အီ တိုယ် ပဲ့ ဂေ တွိုန် မိူဝ် ဟာဝ် ဒွန် မိူင် အီ ကွယ် ခဲင် ကာဒါယ် ဒူအီ အာအေဖာရိမ် ဘော ဒူအီ အာမာနာဆေ၊ ကော ဝီ ဇမ် ဘော ခဲင် ကာဒါယ် မိူင် ဒူအီ အာဇေဘူလူန်။ မာလဲ၊ ဒူအီ ဂေ တီ ဘော ဝီ နဲန ဒါလာမ် ဂေ တီ၊ ဘော ဝီ ပီ ဝါညာက် ကာညး ဂေ။ 11 ပီ ဘော ဟဲ့ ပါယ် တီ မိူဝ်၊ ယီ မိုဝ်း ဂေ ဒူအီ မင် အီ အီ မုး ဒူအီ ခြိုဝ် အာဆေန်၊ ဒူအီ ခြိုဝ် အာမာနာဆေ ဘော ခြိုဝ် အာဇေဘူလူန်၊ ဂေ မိုဝ်း နဝ်း ဂူမ်၊ နဝ်း တျီမ် ဘော ဟာဝ် ဒီ မိူင် ယေရူဆာလဲမ်။ 12 ဇဝ်ဖြာ မိူဝ် စွယ် ဂေ ဒူအီ အာယူဒါ၊ တဲး ဂေ ဘဲန် အူ နဝ်း အူ ဖွိုမ်၊ တဲး ဂေ လာယ် ဖြူမ် ဒီ ဘူင် အီ လဝ့် နဝ်း အန် ဇဝ် ဒူပ် ပီ ကာလာင် ပီ ခြာမ် ခုန်ဒီခမ် ဘော ဂေ အာမူ အာမာတ် အန်။ 13 န့ ဘော မိုဝ်း ဒူအီ ကိူန် ကာဆဝ် တး ကာဇု ခဲင် မိူင် ယေရူဆာလဲမ်၊ တဲး ဂေ ဘူင် ဘ့လွယ် ဟူမ် ခါမုန် တူ ဟပ် ဆီနမ် ဘြး ဒေါ မုး မာဂျီန် ဟာအာ။ 14 ဒူအီ ဂေ တီ မိူဝ် ဒိုဝ်း ကာစှူင့် လှူ ဒူင် ဒုဝ့် ဂေ ပီ ဒီ လှူ ဘော ဒူင် ဒုဝ့် ဂေ ဆီနမ် အုး ငှုန် ဒီ အာရိုပ် ရာင် အီ ကွယ် ခဲင် မိူင် ယေရူဆာလဲမ်။ ဂေ ဝီ ပျာတ့်၊ ဝီ ဟာဝ် ဝဲန် ခဲင် ဒီလယ့် ဘ့လဲင် ခီဒါရူန်။

15 ဘော ဇမ် မာဂျီန် ဟာအာ၊ ဆီငဲ ဂိုဝ် ဒီ မ့ဖွုန်၊ ဂေ ဘော ငဝ်း ဂွန် မာဘူ အီ တဲး ဂေ လှုဝ်း ဒေါ ကာလုဝ်း ဇဝ်ဖြာ ကာင် ဂေ။ ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ အာမျုဝ် အာလေဝီ၊ ဂေ အီ တူ ဆီငါ၊ ဂေ ဘော ဆာယ် အီ။ ဂေ ဘော ဝီ ဘူင် တဲး ဂေ ဆီငါ ဘွတ်။ ဟဲ့ ဟွတ့်၊ ဂေ ဘော ဝီ ပွိုန် ဒီ လှူ ပီ ဒီ လှူ အီ ဒုဝ့် ဒီ ငဝ် ခဲင် ဟုဝ် ဇဝ်ဖြာ။ 16 ဂေ ဝီ ပွိုန် ဒီ ဘူင် ဂါန် ဂေ ရာင် အာဆေ ရာင် အန် ဒူပ် ပီ ကာလာင် အုန် အာမုဝ်ဆဲ အီ မုး ဒဲစေန့် ဇဝ်ဖြာ။ ဂေ ဒါ အီ လှူ ဒီ ဇဝ်ဖြာ ဂေ ဝီ ဒိုဝ်း နှာမ် ဒီ ဂေ ဒူအီ အာလေဝီ၊ ဝီ ခြဝ်း ဒဲင် ကာစှူင့် လှူ။ 17 ကူပ် ညှမ် ဆီငါ ဂေ ဒူအီ ကိူန်၊ ဂေ တူ ပွိုန် လှူ ဂွန် မာဘူ အာဒါ ဘ့လွယ် တီ။ ဂေ ဒူအီ အာမျုဝ် အာလေဝီ ဘော ကာဒုး ဒီ ငဝ်း ဂွန် မာဘူ အာဒါ ဂေ အီ တူ ဆီငါ ဘွတ်၊ အီ တူ ပွိုန် လှူ ဒီ ဇဝ်ဖြာ။ 18 န့ ယီ ဆီ မိုဝ်း ဒူအီ ကိူန် အီ ညှမ် တဲး ဒုဝ် ဘူင့် ဂေ ဆီငါ ဘွတ်။ ဒူအီ ဂေ တီ ဘော မုး ခြိုဝ် အာအေဖာရိမ်၊ ခြိုဝ် အာမာနာဆေ၊ ခြိုဝ် အာအီဆာခါ ဘော ခြိုဝ် အာဇေဘူလူန်။ ဂေ ယီ ဟူမ် ဘ့လွယ် တီ၊ ကွဲ့ တဲး န့ ဒူပ် ပီ ဒမ် အုန် ဒါရာ။ မာလဲ၊ ခုန်ဒီခမ် အာဟေစကီ ဘော ဝီ ဆာခိုဝ် ဒါင် ဂေ။ 19 အန် တဝ်း၊ “အိုယ် မဲ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဂုန့် ဒင် ဒူအီ ဂေ တီ။ ဂေ တူ ဆီငါ အီ ဒူပ် ပီ ဒမ် အုန် ဒါရာ။ မဲ ယီ မုး ဇဝ်ဖြာ အီ မိုဝ်း နဝ်း မွှိုမ်။ အုဝ် မှာန့်၊ တဲး မဲ ဇဝ် ဂဝ်း ဝဲန် မှာပ် ဂေ ဒူအီ အီ ဟဲ့ ဒိုဝ်း ဘော နဝ်း ဘော ဖွိုမ် ဂေ၊ တး ကြိုပ် မဲ ဇဝ်ဖြာ။” 20 ဇဝ်ဖြာ မိူဝ် ထူမ် ဂြုဝ်း ပီ ဆာခိုဝ် အာဟေစကီ ဘော ဝီ တဲး ဂေ ခ ဂျာမ်ဆာ။

21 ခဲ့ ကွယ် ဒူအီ အီဆာရေလ အီ ဟဲ့ တး ကာဇု ခဲင် မိူင် ယေရူဆာလဲမ် တွိုန်၊ ဂေ မိူဝ် ဘျုဝ် ဒါခိုယ် ကာဆဝ် ဘော ဘူင် ဘ့လွယ် ဟူမ် ခါမုန် အီ တူ ဟပ် ဆီနမ် ဘြး အာဒါ ဘူ ဆီငဲ။ ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ ခြိုဝ် အာလေဝီ၊ ဂေ မိူဝ် တဝ်း မှုဝ်၊ အိူပ် ဇဝ်ဖြာ ဘော ဘုတ် ဘော ဘး မျုဝ် အီ ဟမ် ဒါခိုယ် ဘဲန် ဆီငဲ ဘဲန် ဆီငဲ။

22 အာဟေစကီ မိူဝ် ကာလာင် ဂြုဝ်း အီ ဒီ တဲး ပ့လူမ် တဲး ဟဲန့် ဒီ နဝ်း ဂေ ဒူအီ ခြိုဝ် အာလေဝီ၊ ဂေ အီ နပ် ဒီ ယဲတ့် အီ ဟဝ် ကြိုပ် ဇဝ်ဖြာ။ ဂေ ဟဲ့ ဘူင် ဘ့လွယ် တီ အာဒါ ဘူ ဆီငဲ။ ဒေါ အန် တီ ဂေ မိူဝ် ဟူမ် ပီ ဒွါ ဇဝ်ဖြာ ဂေ ဟူမ်။ ဂေ မိူဝ် လှူ ပီ ဒီ လှူ အီ ကွယ် ကာဇု ဟူမ် ရိုမ် ဘော အိူပ် မျုက် ဇဝ်ဖြာ အီ မုး ဇဝ်ဖြာ ပီ ကြိုပ် ဂုန့် ဒင် ဂေ။

23 ဂေ ဘောကာဂ့လျီတ် ဝီ လာယ် ဖြူမ် ဒီ ဘူင် ဟာဝ် ဘ့လွယ် တီ ပေါ ဘူ ဆီငဲ။ ဂေ မိူဝ် ဘူင် တဲး န့ ကော ဘျုဝ် ဘျုဝ် ကျဝ် ကျဝ် အာဒါ ပေါ ဘူ ဆီငဲ တီ။ 24 ခုန်ဒီခမ် အာဟေစကီ အီ အိုပ် မိူင် ယူဒါ မိူဝ် လှူ မက် အာလူင့် အူ ဟြဲန့် ဒုဝ် ဘော မာဘူ မာပဲ ဘူ ဟြဲန့် ဒုဝ်။ အန် လှူ တဲး န့ ဘဲန် အာဒါ ပီ ဒီ ဟူမ် ဂေ ဒူအီ ကိူန်။ ဂေ အာမူ အာမာတ် အန် ပီ ဝီ လှူ မက် အာလူင့် အူ ဟြဲန့် ဒုဝ် ဘော မာဘူ မာပဲ အူ မှိုန့် ဒုဝ် အာဒါ ဒူအီ ကိူန် ဂေ တီ။ န့ ဘော မိုဝ်း ဂေ ဒါ အီ လှူ ဒီ ဇဝ်ဖြာ ကိူန် ကာဆဝ် အီ ဘူင် တဲး ဒုဝ် ဘူင့် ဂေ ဆီငါ ဘွတ်။ 25 ခဲ့ ကွယ် ဂေ ဒူအီ ကိူန် ဘော မုး ဒူအီ အာယူဒါ၊ ဘော မုး ဒါ အီ လှူ ဒီ ဇဝ်ဖြာ ဘော ဒူအီ ခြိုဝ် အာလေဝီ၊ ဘော မုး ဒူအီ အီ တး မိူင် အီဆာရေလ ဘော ဂေ ဒူအီ အာမျုဝ် ဟဝ် အီ တး ကွယ် ခဲင် မိူင် အီဆာရေလ ဘော ခဲင် မိူင် ယူဒါ၊ ဂေ ဘောကာဂ့လျီတ် ဘော ကာဖြူမ် ဒီ ခူယ် ဒါခိုယ် ကာဆဝ်။ 26 ခဲင် မိူင် ယေရူဆာလဲမ် တီ၊ ဂေ မိူဝ် ဟဲ့ ဘျုဝ် ဟဲ့ ကျဝ် ဒါခိုယ် ကာဆဝ်။ ခုဝ်၊ ဆိန့် ဒေါ မုး စုဝ် ဘာန် ခုန်ဒီခမ် အာဆာလုဝ်မုဝ် အီ မုး ဂွန် အာဒါဝိတ် ဘော အိုပ် မိူင် အီဆာရေလ၊ တူ ဒွိုမ် မိုဝ်း ဒေါ ဘျုဝ် ဒေါ ကျဝ် ခဲ့ တီ။ 27 ပါယ် တီ ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ ခြိုဝ် အာလေဝီ၊ ဂေ မိူဝ် ဆာခိုဝ် မှာန့်၊ တဲး ဇဝ်ဖြာ မွင့်ကာရာ ဒွါ ဒီ ဂေ ဒူအီ ကိူန်။ ဂြုဝ်း ပီ ဆာခိုဝ် ဂေ တီ၊ ဇဝ်ဖြာ မိူဝ် ဟဲ့ ထူမ်။ ခုဝ်၊ န့ ဟဲ့ လိုဝ်း ဇမ် ခဲင် ဂါင်ဟြာဝ် အီ မုး ဒူင် ဆီငါ ဘွတ်၊ ဒူင် ကွယ် အန် ဇဝ်။