1 ဝါယ် ဟဲ့ ဟွတ့် ဘူင် ဂေ ဘ့လွယ် တီ၊ ဂေ ဒူအီ အီဆာရေလ အီ ဟဲ့ တး လိုပ် ဘ့လွယ် တီ၊ ဂေ ဝီ ဟာဝ် ခဲင် ကာဒါယ် မိူင် ယူဒါ၊ ဝီ ကာဘက် ဝဲန် ရွင့် ပီ ကြိုပ် ဂေ၊ ဂ်ု ကေး ရွင့် အာရိုပ် နာင် ကာနမ် အီ စိူဝ် အေဆူရာ။ ဂေ ပျာတ့် ဝဲန် ကာစှူင့် လှူ ဘော ဒူင် ဒီ ကြိုပ် ဂေ ဇဝ် ပီ ကြိုပ် အီ ဟဝ်။ ဂေ ဘူင် ပါယ် တီ ခဲင် ကာဒါယ် မိူင် ယူဒါ ဒွန် နာ ဒွန် ပ့လုဝ့် ဘော ခဲင် ကာဒါယ် မိူင် အာဘေန်ယာမ်၊ အာအေဖာရိမ် ဘော အာမာနာဆေ။ ဂေ ဒူအီ အီဆာရေလ ဟဲ့ ဟွတ့် ပျာတ့် ဝဲန် တူတ့် ဒွန် နာ ဒွန် ပ့လုဝ့်၊ ဂေ ဘော ဝီ တး မိူင် ဒူင် ကွယ် ဂေ ရာင် အာဆေ ရာင် အန်။

2 ခုန်ဒီခမ် အာဟေစကီ ဘော ဝီ ဒါင် တဲး န့ မိုဝ်း ဖိုင် ဂေ ဒါ အီ လှူ ဒီ ဇဝ်ဖြာ ဘော ဖိုင် ဂေ ဒူအီ အာမျုဝ် အာလေဝီ၊ တဲး ဂေ ဝီ နပ် ဂါန် ပီ လုဝ် ဘူင် ဂေ ရာင် အာဆေ ရာင် အန်။ ဂါန် ပီ လုဝ် ဘူင် ဂေ တီ ဘော မုး လွင် လုဝ် လှူ ပီ ဒီ လှူ အီ ဒုဝ့် ဒီ ငဝ်၊ လှူ အီ ကွယ် ကာဇု ဟူမ် ရိုမ် ဘော တဝ်း မှုဝ် အီ အိူပ် မျုက် ဇဝ်ဖြာ ဒီ မာလုဝ်း ဒူင် ကွယ် ဇဝ်ဖြာ။ 3 ခုန်ဒီခမ် အာဟေစကီ ဘော လှူ ဖိုင် မာဘူ ဂေ ဖိုင် မာမက် အီ မုး ကြုဝ် အန်၊ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ် ဆိန့်ဝး ဘော ဘာ ဒီ အပ် ဘော ဒေါ မုး ဆီငဲ ဒီလှဝ် ဘော ဆီငဲ လိူန်မူန်။ အန် ဘော လှူ ပီ ဒီ လှူ ဘော ဆီငဲ ဘူင် ဘ့လွယ်၊ တဲး န့ ဘော ဒူပ် ဒါရာ ခဲ့ ပီ ဒဲမ် အုန် ခဲင် ဘပ် ဇဝ်ဖြာ။ 4 ဒဲင် တီ ခုန်ဒီခမ် ဝီ စ်ု ဂေ ဒူအီ အီ ကွယ် ခဲင် မိူင် ယေရူဆာလဲမ်၊ တဲး ဂေ ဒွါ ခဲ့ ပီ လုဝ် ဂေ ဒွါ ဒီ ဒါ အီ လှူ ဒီ ဇဝ်ဖြာ ဘော ဂေ ဒူအီ အာမျုဝ် အာလေဝီ၊ တဲး ဂေ ဘော ပွိုန် ဒီ ဒူပ် ဘူင် ဆီချာ ဒါရာ ဇဝ်ဖြာ။ 5 ဒေါ ဟဲ့ ဟွတ့် ကာလတ့် ပီ စ်ု ခုန်ဒီခမ် တီ၊ ဂေ ဒူအီ အီဆာရေလ မိူဝ် ကာဖြူမ် ဒီ ဒိုဝ်း တး ကြုဝ် ပီ ဒီ လှူ ဂေ အီ မုး ဘ့လေ ဒင် ဒွန် မျုဝ်။ န့ ဘော မိုဝ်း ဘော ငှုဝ်၊ အိုမ် မာငုန်၊ နာမန်၊ ငါမ် မာဖျီန် ဘော ဘ့လေ ပီ ပိတ် ပီ ဆမ် ဂေ အီ လေး ခဲင် မာန် ဂေ။ ဘော ကြုဝ်ကြာမ် အာမျုဝ် ဟဝ် အီ ကိူန် ကာဆဝ်၊ ဂေ ဝီ ဒိုဝ်း ဂိုဝ် ဘုန် အူ ဘုန်၊ ဝီ ဒွါ ဒီ ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ ခြိုဝ် အာလေဝီ။ 6 ပါယ် တီ ဂေ ဒူအီ အီဆာရေလ ဘော ဂေ ဒူအီ အာယူဒါ အီ ကွယ် ခဲင် ကာဒါယ် မိူင် ယူဒါ၊ ဂေ မိူဝ် ဒိုဝ်း ဂိုဝ် ဘုန် အူ ဘုန် ခဲင် ဖိုင် မာမက်၊ ဖိုင် မာဘူ မာပဲ ဂေ ဘော ကြုဝ်ကြာမ် ဂေ ဘဲန် မျုဝ် ဘဲန် မျုဝ် အီ ကိူန် ကာဆဝ်၊ လှူ ဒီ ဇဝ်ဖြာ။ ကြုဝ် ပီ လှူ ဂေ တီ၊ ဂေ မိူဝ် ဂဲပ် ကာဇု အုန် ဘဲန် မ့ပိုမ် မ့ပိုမ်။ 7 ဂေ စုး ဒီ ဂဲပ် အုန် ကြုဝ် တီ ဆိန့် မာဂျီန် ဟာအူယ်၊ ဘော ဝီ ဟွတ့် မာဂျီန် မ့ဘူ။ 8 ခုန်ဒီခမ် အာဟေစကီ ဘော ဂေ အာမူ အာမာတ် အန်၊ ဒေါ ဝီ တး ယိုဝ် ဂေ ကြုဝ် ပီ လှူ ဂေ တီ၊ ဂေ ဝီ အိူပ် မျုက် ဇဝ်ဖြာ ဘော မွင့်ကာရာ ဒွါ ဒီ ဂေ ဒူအီ အီဆာရေလ။

9 ခုန်ဒီခမ် ဘော ဒီမွှတ် ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ အာလေဝီ လွင် ကြုဝ် လှူ တီ။ 10 ဒါ တာင် အီ လှူ ဒီ ဇဝ်ဖြာ အီ စိူဝ် အာဇာရီယာ၊ အီ မုး အာမျုဝ် အာဇာဒူက် ဘော ဝီ တဝ်း၊ “ဆိန့် ဒေါ ကာစုး ဂေ ဒူအီ ကိူန် ဒီ တး လှူ ခဲင် ဟုဝ် ဇဝ်ဖြာ နီ၊ အာဝ် ဟူ ဝန် ဒီ ဂ့လိုမ် ဟူမ် ဂ့လိုမ် တာ ယေ။ န့ ကော ဟဲ့ ဝီ ကာလူယ် ကိူန် ကာဆဝ်။ ဇဝ်ဖြာ ဟဲ့ မွင့်ကာရာ ဒွါ ဒီ ဂေ ဒူအီ ပီ အိုပ် အန်။ ခုဝ်၊ ယေ ဟဲ့ ပွိုန် ကိူန် ပါယ် တီ။”

11 ဟဲ့ ဟွတ့်၊ ခုန်ဒီခမ် အာဟေစကီ ဝီ ကာလာင် ဒီ ဂေ၊ တဲး ဂေ ဝီ ဘူင်၊ ဝီ မ့ပြာယ် ဟူင် ဒူင် ဒီ ဂဲပ် အုန် ကြုဝ်ကြာမ် ခဲင် ဟုဝ် ဇဝ်ဖြာ တွိုန်။ ဂေ မိူဝ် ဘူင် ဒူပ် အူ ဇေန့်။ 12 ပါယ် တီ ဂေ ဒူအီ အာယူဒါ ဘော ဂေ ဒူအီ အီဆာရေလ မိူဝ် ဘူင် ဒူပ် နဝ်း ဆိူဝ် နဝ်း မှာန် ဂေ။ ဂေ ဝီ ဒိုဝ်း ကြုဝ် လှူ ဂေ တွိုန် ဂိုဝ် ဘုန် အူ ဘုန်၊ ဝီ ဂဲပ် အုန် ခဲင် ဟူင် တီ။ ဒါ တာင် အီ အိုပ် အီ ယွတ် မဲန် ကြုဝ် လှူ ဂေ တီ ဘော မုး အာကောနာနီ အီ မုး ဒူအီ ခြိုဝ် အာလေဝီ။ ဘော ဝါ အန် အီ စိူဝ် အာဆီမီ ဘဲန် အီ ဒါမ် အန်။ 13 ဂေ ဒူအီ အာမျုဝ် အာလေဝီ အီ စွယ် အီ ဒါမ် ဂါယ် တီ ဘော မုး အာယေဟီလာ၊ အာဇာဇီယာ၊ အာနာဟတ်၊ အာဆာဟေလ၊ အာယေရီမုတ်၊ အာယောစာဘာတ်၊ အာအေလီအေန်၊ အာအီဆာမာခီယာ၊ အာမာဟာတ် ဘော အာဘီနာယာ။ ဒူအီ ဂေ တီ ခုန်ဒီခမ် အာဟေစကီ ဘော အာဇာရီယာ အီ မုး ဒါ တာင် အီ အိုပ် တူတ့် ခဲင် ဟုဝ် ဇဝ်ဖြာ၊ ဂါယ် ဟဲ့ ဒါင် တဲး ဂေ ဘူင် ဂါန် တီ။

14 အာခုဝ်ရေ အီ မုး ဂွန် အာအီမာနာဟာ ဘော ဒူအီ ခြိုဝ် အာလေဝီ၊ အီ ဘ်ု မာလုဝ်း ဘ့လာက် နာ လေး ဆီငဲ၊ အန် ဘော ဘဲန် ဒါ အီ အိုပ် အီ ယွတ် မဲန် ကြုဝ် ပဲ့ ဟဲ့ လှူ အီ ဒီ ဇဝ်ဖြာ၊ ဘဲန် ဘော ဒါ အီ ကာယဝ်း ကာဆာင် ကြုဝ် တီ။ 15 ခဲင် မာန် မိူင် ဒူင် ကွယ် ဂေ ဒါ အီ လှူ ဒီ ဇဝ်ဖြာ န့ ဘော မိုဝ်း အာအေဒေန်၊ အာမီနီယာမိန်၊ အာယောဆူ၊ အာဆေမာယာ၊ အာမာရီယာ ဘော အာဆေခါနီ။ ဒူအီ ဂေ တီ ဂေ ဘော မိုဝ်း နဝ်း ဆိူဝ် နဝ်း မှာန် ဒီ ဘူင် ဂါန် ဘဲန် အီ ဒါမ် အာခုဝ်ရေ။ ဂေ ဘော ကာဆာင် ပီ ဒီ ဟူမ် ဒီ ဘီနွင် ဂေ အီ မုး ဒူအီ ခြိုဝ် အာလေဝီ၊ တဲး န့ ဘော ကာရမ် ဒွန် အီ ဒူပ် ဂါန် ပီ ဘူင် ဂေ ဝီ မှဝ် ဝီ အန်။

16 ဒဲင် တီ ဂေ မိူဝ် ကာဆာင် ဒွါ ဒီ အီမာယ် အာဆာက် အီ ဟဲ့ ပွိုန် အူယ် ဆီနမ် ဟုဝ့် နာ ဒဲင်။ ဒူအီ ဂေ တီ ဟဲ့ ဟွတ့် မိုဝ်း စိူဝ် ဂေ ခဲင် ဇာရာင် ဒူအီ အီ ဒီ ပွိုန် လိုပ် ခဲင် ဟုဝ် ဇဝ်ဖြာ ဘော ဘူင် ဂါန် ဇဝ်ဖြာ ဒွန် ဆီငဲ ဒွန် ဆီငဲ ဒူပ် ဖိုင် ဂေ ရာင် အာဆေ ရာင် အန်။ 17 ဂေ ဝီ ကာဆာင် ဒွါ ဘော ဒါ အီ လှူ ဒီ ဇဝ်ဖြာ အီ ဟဲ့ မိုဝ်း စိူဝ် ခဲင် ဇာရာင် န့ဟူမ် ဂေ ဒွန် န့ဟူမ်။ ဂေ ကာဆာင် ဘော ဒီ ဂေ ဒူအီ ခြိုဝ် အာလေဝီ အာဆာက် အီ ဟဲ့ ပွိုန် အာ ဂိုဝ် ဆီနမ်၊ ဘော အာ ဂိုဝ် ဟုဝ့် နာ ဒဲင်၊ အီ လုဝ် ဘူင် ဂါန် ဒူပ် ဖိုင် ဂေ ရာင် အာဆေ ရာင် အန်။ 18 ဂေ ဘော ကာဆာင် ဒွါ ဒီ ဒွန် အီ ဘော ဒီ အီဘိုန့် ဂေ ဘော ဒီ ဂွန် ဒီတဲတ်၊ ဘော မုး ဂွန် အီဘိုန့် ဂွန် အီမာယ် ဘော ဒွန် အီ အီ ဟဲ့ မိုဝ်း စိူဝ် ခဲင် ဇာရာင်။ ခုဝ်၊ ဂေ ဘောကာဂ့လျီတ် ဟဲ့ မိုဝ်း နဝ်း ဆိူဝ် နဝ်း မှာန် ဒီ တဲး ဒုဝ် ဂေ ဆီငါ ဘွတ်။ 19 အာဒါ ဂေ လှုက်လှာန် ခြိုဝ် အာရူန် အီ မုး ဒါ အီ လှူ ဒီ ဇဝ်ဖြာ အီ ကွယ် ခဲင် မိူင် ဂေ၊ ဘော ခဲင် မာန် မိူင် အီ ကွယ် ရူပ် မိူင် တီ ဘော ဒွန် မိူင်၊ ဂေ ရဝ်း အီမာယ် မင် အီ၊ တဲး ဂေ ကာဆာင် ဒွါ ပီ ဒီ ဟူမ် ဒီ ဂေ အီမာယ် ဘော ဒွန် အီ အီ မိုဝ်း စိူဝ် ခဲင် ဇာရာင် ဂေ ဒူအီ အာမျုဝ် အာလေဝီ။

20 ခုန်ဒီခမ် အာဟေစကီ ဘူင် ပါယ် တီ တဲး န့ ကော ကာလတ့် ခဲင် ကာဒါယ် မိူင် ယူဒါ။ အန် မိူဝ် ဘူင် နာ ဆိူဝ် နာ မှာန်၊ တဲး န့ ဒူပ် ပီ အိုင် ဇဝ်ဖြာ အီ မုး ဇဝ်ဖြာ ပီ ကြိုပ် အန်။ 21 ခဲ့ ပီ ဘူင် အန် မိူဝ် ဟဲ့ အွင်။ ခုဝ်၊ ဘော မုး လွင် ပီ ဘူင် အန် ခဲင် ဟုဝ် ဇဝ်ဖြာ၊ ဘော မုး လွင် ဘူင် ဒူပ် အန် ဒါရာ ဇဝ်ဖြာ၊ အန် တဲး ဘော နဝ်း ဘော ဖွိုမ် အန် ဂျုဝ်ဂျာ ဒီ ဘူင် ပီ အိုင် ဇဝ်ဖြာ အီ မုး ဇဝ်ဖြာ ပီ ကြိုပ် အန်။