1 ခုန်ဒီခမ် အာဟေစကီ ဟဲ့ ဟွတ့် ဘူင် ဇိုဝ် တွိုန် ဒွန် မျုဝ်။ ဝါယ် အန် တီ ခုန်ဒီခမ် အာဆာခါရိပ် အီ အိုပ် မိူင် အာဆူရာ၊ အန် ဘော ယဲတ့် ဒါ ဆိုက် အန် တး ကာဂုဝ်း ဒီ မိူင် အီ မိုဝ်း ရဲင် ဒွန် မိူင် အီ ကွယ် ခဲင် ကာဒါယ် မိူင် ယူဒါ။ အန် ဘော စ်ု ဂေ ဒါ ဆိုက် အန်၊ တဲး ဂေ ပျာတ့် ရဲင် မိူင် ဂေ တီ၊ တဲး ဂေ ပွိုန် ဒီ လိုပ်။ 2 ခုန်ဒီခမ် အာဟေစကီ ဘော ယိုဝ် လွင် ခုန်ဒီခမ် အာဆာခါရိပ် ဟဲ့ တး၊ ဟဲ့ ခြာမ် ဒီ ကာဂုဝ်း ဒီ မိူင် ယေရူဆာလဲမ်။ 3 အန် ဘော ဝီ ကာမွုန် ဆင်ချာင် ဒီ ဂေ အာမူ အာမာတ် အန် ဘော ဂေ ဒါ တာင် အီ အိုပ် ဒါ ဆိုက်၊ တဲး ဂေ ဟာဝ် ပုန် ဟာဝ် ကာဘိတ် တုဝ်း အိုမ် အီ ကွယ် နာ ရေတ့် မိူင်။ ဂေ မိူဝ် ကာဖြူမ် ဒီ စွယ် အန်။ 4 ပါယ် တီ ဘော မိုဝ်း ဒူအီ ကိူန် ကာဆဝ် ဟာဝ် ပုန်၊ ဟာဝ် ကာဘိတ် ခဲ့ ကွယ် တုဝ်း အိုမ် ဘော အိုမ် အီ လှဲ ဟာဝ် ကာတဲ ကာဒါယ် မိူင်။ ခုဝ်၊ ဂေ တူ တဲး ဂေ ဒူအီ အာဆူရာ ယိုဝ် အိုမ် ကိူန် ဒေါ တး ဇမ် ကာတတ် ဂေ မိူင် ယေရူဆာလဲမ်။ 5 အာဟေစကီ ဝီ ဘူင် ဘော အီ ဂွင့် အီ ရဲ မိူင်၊ တဲး န့ ဝဲ ပ့လူမ်။ အန် မိူဝ် ဝီ မ့ပြာယ် ရဲင် မိူင် ဒူင် ဟဲ့ ကေး ဟဲ့ ဒီဂ့လဝ်း၊ အန် ဘော ဆမ် ဟုဝ် စာ ဒူင် ဒီ ဘ်ု ဒါ ဆိုက် ဒဲင် ရဲင် မိူင်။ အန် ပီ ဝီ ဘူင် တဲး န့ မိုဝ်း ရဲင် ပေါ အူ ထာပ် နာ ရေတ့် ရဲင် ဘြိမ်။ ဒဲင် တီ အန် ဝီ မ့ပြာယ် န့ဂုဝ် ဒီ ရဲင် မိူင် ဒူင် ဟဲ့ မ့ပုန် ကာဒါယ် အီ ကွယ် ဒီ မိူင် အာဒါဝိတ်။ အန် ဝီ ဘူင် ဘော ခြိုင် ကာဂုဝ်း ဘော မင် ဂွင့် အီ ကိူန် ကာဆဝ်။

6 အန် ဝီ ခါန် ဘ့လေး ဒါ တာင် အီ အိုပ် ဒါ ဆိုက်၊ တဲး ဂေ ယဲတ့် ဒူအီ ကိူန်။ အန် ဝီ စ်ု တဲး ဂေ တး ကွယ် ကာဇု ခဲင် ဂ့လင် ဒီ ဘာင် မာလုဝ်း မိူင်။ အန် ဘော ကာလာင် ဂြုဝ်း အီ ဒီ တဲး ပ့လူမ် တဲး ဟဲန့် ဒီ နဝ်း ဂေ။ 7 အန် တဝ်း၊ “တဲး ဘေ ပီယ ပီကျ ဘေ၊ ကွဲ့ တဲး ဘေ ယုဝ် ခုန်ဒီခမ် အီ အိုပ် မိူင် အာဆူရာ ဘော ဂေ ဒါ ဆိုက် ပီ ယဲတ့် တး အန်။ အီ ကွယ် ဘ့လာက် အေ ဟဲ့ မိုဝ်း ပ့လူမ် ဂေ ဟဲန့် လွှိုမ် အီ ကွယ် ဘ့လာက် အန်။ 8 ဘ့လာက် အန် မိုဝ်း မီ ပ့လူမ် ဟဲန့် ဒူအီ။ အီ မုး အေ၊ ဇဝ်ဖြာ အီ မုး ဇဝ်ဖြာ ပီ ကြိုပ် အေ ယီ ကွယ် ရိုမ် ဒူပ် အေ။ အန် ဒီ စွယ် ယေ ဘော ကာဂုဝ်း ဒါင် ယေ။” ဒူအီ ကိူန် ဂေ တီ ဘော မိုဝ်း ပ့လူမ် မိုဝ်း ဟဲန့် ကူပ် ဂြုဝ်း ပီ ကာလာင် ခုန်ဒီခမ် တီ။

9 ဝါယ် အန် တီ အာဝ် ဘော လှေန့်၊ အာဆာခါရိပ် ဂေ ဒါ ဆိုက် အန် ဘော ဝဲင် ရူပ် မိူင် လာခိတ်။ ဒေါ အန် တီ အန် ဝီ တိုယ် အာမူ အာမာတ် အန် ဟာဝ် ဒူင် ကွယ် အာဟေစကီ ခဲင် မိူင် ယေရူဆာလဲမ်။ ဂေ ဘော ကာလာင် ဂြုဝ်း တဲး အာဟေစကီ ဘော ဂေ ဒူအီ အာယူဒါ ဘောကာဂ့လျီတ် ထူမ်။

10 ဂေ တဝ်း၊ “အာဆာခါရိပ် အီ မုး ခုန်ဒီခမ် တာင် အီ အိုပ် မိူင် အာဆူရာ ဟဲ့ ကာလာင် ပါယ် နီ။ မာဆေ ပီ ဒီ ဘိုင် ဘေ၊ ဆေ အီ ဟဝ် တး ဝဲင် ရူပ် ဘေ ခဲင် မိူင် ယေရူဆာလဲမ် တီ။း 11 အာဟေစကီ နပ် ဒီ တဝ်း၊ တဲး ဘေ ဘိုင် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ တဲး အန် ချွတ် ဘေ၊ တဲး ဘေ လွတ် ဒီ ခုန်ဒီခမ် အီ အိုပ် မိူင် အာဆူရာ။ မာလဲ၊ အန် ယီ ဒီ ဘ့လေး ဝဲန် ဘေ၊ တဲး ဘေ ယမ် ဒီ အေတ့် အိုမ် ဂေ ဘူမ်။ 12 အာဟေစကီ ယီ ဟဲ့ ပျာတ့် ဝဲန် ဒူင် စာ ဒူင် ဒီ ကြိုပ် ဇဝ်ဖြာ ဘော ကာစှူင့် လှူ ဒီ ဇဝ်ဖြာ။ အန် ဟဲ့ ယဲတ့် ဒူအီ ခဲင် ကာဒါယ် မိူင် ယူဒါ ဘော ခဲင် မိူင် ယေရူဆာလဲမ်၊ တဲး ဂေ ကြိုပ် ဇဝ်ဖြာ ဘော တဲး ဂေ ဒုဝ့် ဆီနမ် အုး ငှုန် မီ ဒဲင် ကာစှူင့် လှူ အူ ဘူင့်။

13 ဘေ တူ နပ် လွင် ပဲ့ ဟဲ့ ဒွိုမ် ဘူင် အုဝ် ဘော ဂေ ဂုန့် ဒင် အုဝ် ဒီ ဂေ ဒူအီ မိူင် တေတ့် မိူင် တ။ ဇဝ် ဘဲန် မျုဝ် ဘဲန် မျုဝ် ပီ ကြိုပ် ဂေ ဒူအီ ခဲင် မိူင် တီ တူ ပွိုန် ချွတ် တဲး ဂေ လွတ် ဒီ ခုန်ဒီခမ် အာဆူရီယာ။ 14 ခဲင် မိူင် ဒွန် မိူင် ပဲ့ ဟဲ့ ပျာတ့် ဝဲန် ဂေ ဂုန့် ဒင် အုဝ်၊ အာဝ် ဒွိုမ် မိုဝ်း ဇဝ် ကာဒင် မှဝ် အီ ပွိုန် ချွတ် တဲး ဂေ လွတ် ဒီ အုဝ်။ မှဝ် န့ ပါယ် ပီ ထာင် ဘေ ဇဝ်ဖြာ ပီ ကြိုပ် ဘေ ဒီ ဘော ပွိုန် ချွတ် တဲး ဘေ လွတ် ဒီ အုဝ်။း 15 ခုဝ် အန် တီ၊ ကွဲ့ တဲး အာဟေစကီ ကာလုဝ် ဘေ ဘော ယဲတ့် ဘေ ဇမ် ဒုက်။ ကွဲ့ တဲး ဘေ ညှိုမ် ဂြုဝ်း အန်။ ခုဝ်၊ ကာတဲ ဇဝ် ပီ ကြိုပ် ဒူအီ အာမျုဝ် ဟဝ် ဘော ဂေ ဒူအီ မိူင် ဟဝ်၊ အာဝ် ဒွိုမ် မိုဝ်း ခေါ အူ ကာဒင် အီ ပွိုန် ချွတ် ဒူအီ ဂေ၊ တဲး ဂေ လွတ် ဒီ အုဝ် ဘော ဒီ ဂေ ဂုန့် ဒင် အုဝ်။ ဇဝ်ဖြာ ဘေ တီ ဟဲ့ ဝဲ တူ ပွိုန် ချွတ် တဲး ဘေ လွတ် တ အုဝ်။”

16 အာမူ အာမာတ် ခုန်ဒီခမ် မိူင် အာဆူရီယာ ဂေ ဘော ဝဲ ကာလာင် ဂြုဝ်း တူ မွှိုမ် လွင် ဇဝ်ဖြာ ဘော လွင် အာဟေစကီ အီ မုး ဒဲစေန့် ဇဝ်ဖြာ။ 17 ဒဲင် တီ၊ အာဆာခါရိပ် ဝီ ဒဲမ် ဘော ပဲ့ အီ နဲန အီ ဖျာက် ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ။ အန် တဝ်း၊ “ကာတဲ ဇဝ် ပီ ကြိုပ် ဒူအီ ဒွန် မျုဝ် ဒွန် မာန် ဒွန် မိူင်၊ ဒွန် နာ ဒွန် ပ့လုဝ့် အာဝ် မိုဝ်း အီ ပွိုန် ချွတ် ဒူအီ အီ ကြိုပ် ဂေ၊ တဲး ဂေ လွတ် တ အုဝ်။ ပါယ် တီ ဘော ဇဝ်ဖြာ ပီ ကြိုပ် အာဟေစကီ မိူဝ်၊ အာဝ် ပွိုန် ချွတ် တဲး ဒူအီ ပီ အိုပ် အန် လွတ် တ အုဝ်။” 18 အာမူ အာမာတ် ခုန်ဒီခမ် အာဆူရီယာ မိူဝ် ကာလာင် ဂြုဝ်း ဟဲဘြဲ ဘော ဒတ် ဒဲ့ ဂြုဝ်း တာင်၊ တဲး န့ ကာဘျုဝ် ဒူအီ ခဲင် မိူင် ယေရူဆာလဲမ် အီ ကွယ် ဒဲင် ရဲင် မိူင်။ န့ တဲး နဝ်း ဂေ လိုဝ်၊ တဲး ဒူအီ အာဆူရီယာ ပွိုန် ဒီ လိုပ် တိုက် မိူင် တီ ငှိုယ် ငှိုယ်။ 19 ဂေ ဘော ကာလာင် လွင် ဇဝ်ဖြာ အီ အိုပ် မိူင် ယေရူဆာလဲမ်၊ တဲး န့ ပီ ပီ ကာလာင် ဂေ လွင် ဇဝ် ပီ ကြိုပ် ဒူအီ ဘဲန် မျုဝ် ဘဲန် မျုဝ် ဒဲင် ကာဒါယ် နီ၊ အီ မုး ဇဝ် အာရိုပ် ရာင် ပီ ဘူင် ဂေ ဒူအီ။

20 ဒေါ အန် တီ ခုန်ဒီခမ် အာဟေစကီ ဘော ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာအီဆာယ အီ မုး ဂွန် အာမူတ်၊ ဂါယ် ဝီ ဆာခိုဝ် ဒီ ဇဝ်ဖြာ ဘော ဒတ် ဒဲ့ မှာန့်၊ တဲး အန် ဇဝ် စွယ်။ 21 ဇဝ်ဖြာ မိူဝ် စ်ု အာမူ အာမာတ် အန် အူ ကာဒင်၊ တဲး အန် ဟာဝ် ငဝ်း ယမ် ဒါ ဆိုက် ဘောကာဂ့လျီတ် ဘော ဂေ ဒါ တာင် အီ အိုပ် ဒါ ဆိုက် အာဆူရာ။ ပါယ် တီ ခုန်ဒီခမ် ဂေ ဟဲ့ စှိုမ် ဆာရေ ဘော ဝီ ဝေန့် ခဲင် မိူင် အာဆူရီယာ။ အာဒါ အူ ဆီငဲ ဒေါ ကွယ် အန် ခဲင် ဟုဝ် ဇဝ် ပီ ကြိုပ် အန်၊ ဂွန် အီမာယ် အန် မင် အီ ဘော ဝီ ငဝ်း ယမ် အန် တာ မာပွါ့ လာင်။

22 ပါယ် တီ ဇဝ်ဖြာ ဟဲ့ ချွတ် ခုန်ဒီခမ် အာဟေစကီ ဘော ဂေ ဒူအီ ခဲင် မိူင် ယေရူဆာလဲမ်၊ တဲး ဂေ လွတ် ဒီ အာဆာခါရိပ် အီ မုး ခုန်ဒီခမ် အီ အိုပ် မိူင် အာဆူရာ။ အန် တဲး ဂေ လွတ် ဘော ဒီ ရန်ဆူ အီ ကွယ် ဒွန် နာ ဒွန် ပ့လုဝ့်။ အန် ဇဝ် မိူဝ် ယွတ် မဲန် ဂေ၊ တဲး ဂေ ကွယ် ဒါခိုယ်၊ ကွယ် ဂျာမ်ဆာ ဒွန် နာ ဒွန် ပ့လုဝ့်။ 23 ဂေ ဒူအီ ကိူန် ဘော ဒိုဝ်း တး ပီ ဒီ လှူ ဂေ၊ လှူ ဒီ ဇဝ်ဖြာ ခဲင် မိူင် ယေရူဆာလဲမ် တွိုန်။ ဂေ မိူဝ် ဒိုဝ်း ခေါဆွင် အီ မိုဝ်း ဒီငဝ်း ဒီခန်၊ ဒွါ ဒီ ခုန်ဒီခမ် အာဟေစကီ။ စုး ဆိန့် ဒေါ အန် တီ ခုန်ဒီခမ် အာဟေစကီ မိူဝ် မိုဝ်း ပွုန် မိုဝ်း အာဖုင် ဒင်ခုဝ်၊ တဲး ဒူအီ ဟဝ် ဒွန် ဇိုဝ် ဒွန် မျုဝ် ရုဝ်ဆေ အန်။

24 ဝါယ် အန် တီ အာဟေစကီ ဟဲ့ မိုဝ်း ဆဝ် ကော ရိန် ဒီ ယမ်။ အန် ဘော ဝီ ဆာခိုဝ် မှာန့် ဒီ ဇဝ်ဖြာ။ ဇဝ်ဖြာ မိူဝ် ဘျ အီ မွှိုမ် အာမ် ကာဆဝ် ဒီ အန်။ 25 မာလဲ၊ အာဟေစကီ ဝီ မိုဝ်း နဝ်း ပီခိုက်၊ အာဝ် ဟူ ဝီ လှုဝ်း ပဲ့ ဟဲ့ ဂေဇူ ဇဝ်ဖြာ ဒီ အန်။ ခုဝ်၊ ဇဝ်ဖြာ ဝီ ရူ ဒီ အန် ဘော ဒီ ဂေ ဒူအီ အာယူဒါ ဘော ဒူအီ မိူင် ယေရူဆာလဲမ် ဘောကာဂ့လျီတ်။ 26 မာလဲ၊ အာဟေစကီ ယီ ဝီ လှုဝ်း လွင် ဟဲ့ ပီခိုက် အန် နဝ်း အန် တီ။ ပါယ် တီ ဘော အန် ဘော ဂေ ဒူအီ ခဲင် မိူင် ယေရူဆာလဲမ် ဘောကာဂ့လျီတ်၊ ဂေ ဘော ဝီ ပီတျီမ် နဝ်း ဂေ။ ဇဝ်ဖြာ မိူဝ် အာဝ် ဟူ ဝီ ဒမ် မှာပ် ဒီ ဂေ ဒေါ ဆီ ကွယ် အာဟေစကီ။

27 ခုန်ဒီခမ် အာဟေစကီ ဘော မိုဝ်း ကြုဝ်ကြာမ် ဘော အာဖုင် ဆာရေ ကိူန် ကာဆဝ်။ အန် ဝီ စုး ဒီ ဘူင် ဟူင် ဒူင် ဒီ ဂဲပ် အုန် ရွိုန် ခြိဝ်၊ ဆဲန့် ဘွတ်၊ ဆီနမ် အုး ငှုန်၊ မင် ဂွင့် ဘော ခြိုင် တာ အာမျုဝ် ဟဝ် အီ ဘွတ် အီ မွှိုမ်။ 28 ဒဲင် တီ၊ အန် ဝီ ဘူင် ဘော ဂြွာ၊ ဒူင် ဒီ ဂဲပ် အုန် ငှုဝ်၊ အိုမ် မာငုန်၊ နာမန် ဘော ဟူင် ဒူင် ဒီ ခြွင့် အုန် မာမက် ဘဲန် မျုဝ် ဘဲန် မျုဝ် ဘော ကာပိုမ် မာဘူ။ 29 အန် ဝီ ဒဲ ရဝ် ဘဲန် ပ့လုဝ့် ဘဲန် ပ့လုဝ့်၊ ဘော ပွိုန် ဖိုင် မာဘူ မာပဲ ကိူန် ကာဆဝ်။ ခုဝ်၊ ဇဝ်ဖြာ ဟဲ့ တဲး အန် မိုဝ်း ကြုဝ်ကြာမ် ကိူန် ကာဆဝ်။

30 အာဟေစကီ ဟဲ့ ဒွိုမ် ကာဘိတ် တုဝ်း အိုမ် အီ ကွယ် နာ ကွာ တုဝ်း အိုမ် ဂီဟူန်။ အန် ဝီ ဂိုဝ်း ရူင်၊ တဲး အိုမ် ဝီ လှဲ ဟာဝ် ဘ့လာက် နာ ဂေတ့် ဆီငဲ မိူင် အာဒါဝိတ်။ ပါယ် တီ ခဲ့ ပီ ခြာမ် အာဟေစကီ ဒီ ဘူင် မိူဝ်၊ န့ အွင်။ 31 ခုန်ဒီခမ် မိူင် ဘာဘဲ ဟဲ့ စ်ု ဒါလာမ် အန်၊ တဲး ဂေ တး ဒီမွှတ် အာဟေစကီ လွင် အီ မွှိုမ် အာမ် အီ ဟဲ့ ဘုဝ် ဘဲန် ခဲင် မိူင် အန်။ ဒေါ အန် တီ ဇဝ်ဖြာ ဘ့လေး အာဟေစကီ၊ တဲး အန် ဘူင် ဒူပ် ပီ အိုင် အန်။ ပါယ် တီ အန် ဇဝ် ဟဲ့ ထေဝ် နဝ်း အန်၊ တဲး အန် နပ် တူတ့် ဒွန် မျုဝ် အီ ကွယ် ခဲင် နဝ်း အာဟေစကီ။

32 လွင် ပဲ့ ဟဲ့ ဘူင် အာဟေစကီ ဒေါ ဟဲ့ အိုပ် အန် မာန် မိူင် ဘော လွင် ခဲ့ ပီ ဘိုင် အန် ဇဝ်ဖြာ၊ န့ ဘော ဟဲ့ ဒဲမ် အုန် ခဲင် ဘပ် ပီ ဒဲမ် ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာအီဆာယ အီ မုး ဂွန် အာမူတ်။ န့ ဟဲ့ ဒဲမ် အုန် ဘော ခဲင် ဘပ် ဘိူန် ခုန်ဒီခမ် မိူင် ယူဒါ ဘော ခုန်ဒီခမ် မိူင် အီဆာရေလ။ 33 အာဟေစကီ ဘော ယမ် ဟာဝ် ဒူပ် ဒါ ဒါ အန်။ ဂေ ဘော ဒိပ် ဒုဝ် ဘူင့် အန် ဒဲင် ဘိုပ် အီ မုး ဘာရေဝ် လှာန် အာဒါဝိတ်။ ဒေါ ယမ် အန်၊ ဂေ ဒူအီ ခဲင် ကာဒါယ် မိူင် ယူဒါ ဘော ဂေ ဒူအီ ခဲင် မိူင် ယေရူဆာလဲမ်၊ ဂေ ဘောကာဂ့လျီတ် ကာဖြူမ် ဒီ အိူပ် မျုက် အာဟေစကီ၊ တဲး န့ ဒူပ် ဆာရေ ဘော အာဖုင် ဒင်ခုဝ် အန်။ ဂွန် အီမာယ် အန် အီ စိူဝ် အာမာနာဆေ ဘော ဝီ ဘဲန် ခုန်ဒီခမ် ပ့လု အန်။