1 အာမာနာဆေ ဟဲ့ ဘဲန် ခုန်ဒီခမ် ဒေါ အာဆာက် အန် ဟဲ့ နုဝ့် ဂိုဝ် ဒီ အာ ဆီနမ်။ အန် ဘော အိုပ် မိူင် ဘော ကွယ် ခဲင် မိူင် ယေရူဆာလဲမ် အာဒါ ဖန် ဂိုဝ် ဒီ ဖန် ဆီနမ်။ 2 အန် ဘူင် မိူက်၊ ဘူင် အီ မွှိုမ် ကာအိး ပီ တူ အိုင် ဇဝ်ဖြာ။ အန် ဘူင် ပီ ဂေ ဒူအီ အာမျုဝ် ဟဝ် အီ မုး ဒူအီ ပီ ဟုဝ် လေး ဇဝ်ဖြာ အာတ့် တး လိုပ် ဒူအီ အီဆာရေလ ခဲင် မိူင် ဂေ။ 3 အန် ဝီ မ့ပြာယ် ဒူင် စာ ပဲ့ ဟဲ့ ပျာတ့် ဝဲန် ဂုန့် အန် အီ မုး အာဟေစကီ တွိုန်။ အန် ဘော ဘူင် ကာစှူင့် လှူ ဒီ ဇဝ် ဘာလ၊ ဘူင် ဘော ကန်ထွန် ဒီ ကြိုပ် နာင် ကာနမ် အေဆူရာ။ အန် ဘော ကြိုပ် ဘိုင် ဆီမန့် ဒွန် မျုဝ် အီ ကွယ် ခဲင် ဘ့လေန့်။ 4 ဇဝ်ဖြာ ဟဲ့ ဒွိုမ် တဝ်း လွင် ဟုဝ် ဇဝ်ဖြာ၊ “အုဝ် ဒီ ကွယ် ခဲင် မိူင် ယေရူဆာလဲမ် ဆေဆေ။” ခုန်ဒီခမ် အာမာနာဆေ ယီ ဝီ ဘူင် ကာစှူင့် ဘဲန် မျုဝ် ဘဲန် မျုဝ် ဘ့လေး ခဲင် ဟုဝ် ဇဝ်ဖြာ တီ။ 5 အန် ဘော ဘူင် ကာစှူင့် ဒီ ကြိုပ် ဆီမန့် ဒွန် မျုဝ် ခဲင် ဘ့လေန့်၊ ဘ့လေး ခဲင် ဝဲင် ဟုဝ် ဇဝ်ဖြာ ဘော အာ ပ့လုဝ့်။ 6 အန် ဘော ခမ် ဒီ လှူ ဂွန် အန် ခဲင် ငဝ် ဒီ ဒီလယ့် ဘေန်ဟီနုမ်။ အန် ဘော မဲန် ဘေဒါင် ဘော ဂါဝ် ပွုန် ကာနမ်၊ ဘူင် မျလှယ့်၊ ဘော ဘိုင် ဒါ ဘူ မိူင် ဘော ဒီမွှတ် ယာ ကာနမ်။ အန် ဘော ဘူင် ကိူန် ကာဆဝ် အီ တူ ဘွတ် အီ တူ မွှိုမ် ပီ တူ အိုင် ဇဝ်ဖြာ၊ တဲး ဇဝ်ဖြာ ဝီ ရူ ဒီ အန်။

7 အန် ဝီ ဒိုဝ်း အာရိုပ် ရာင် ပီ ဘူင် အန်၊ ဝီ ဘ့လေး ခဲင် ဟုဝ် ဇဝ်ဖြာ။ မာလဲ၊ ဇဝ်ဖြာ ဟဲ့ ဒွိုမ် ကာလာင် ဒီ အာဒါဝိတ် ဂါယ် အာဆာလုဝ်မုဝ် တဝ်း၊ “အုဝ် ဒီ ကွယ် ခဲင် ဟုဝ် ဇဝ်ဖြာ နီ ဘော ခဲင် မိူင် ယေရူဆာလဲမ် ဆေဆေ။ န့ မုး ဒူင် ပဲ့ ဟဲ့ ရဝ်း အုဝ် ခဲင် မာန် မိူင် ဂေ ဒူအီ အီဆာရေလ ဒွန် ခြိုဝ်၊ တဲး န့ ဘဲန် ဒူင် ဒီ ကွယ် အုဝ် ဆေဆေ။” 8 အန် ဇဝ် မိူဝ် ဟဲ့ တဝ်း၊ “ဆေ ဂေ ဒူအီ အီဆာရေလ ဘော ဘူင် ဒူပ် ဒါရာ ပီ ကာလာင် အုဝ် ဒီ ဒဲစေန့် အုဝ် အီ စိူဝ် အာမုဝ်ဆဲ တွိုန်၊ အုဝ် မိူဝ် တူ တဲး ဂေ ဒူအီ အီဆာရေလ ဝီ လေး ဟာဝ် တ မိူင် ပဲ့ ဟဲ့ အာပ် ဒွါ အုဝ် ဒီ ဂုန့် ဒင် ဂေ တွိုန်။” 9 အာမာနာဆေ ယီ ယဲတ့် ဂေ ဒူအီ အာယူဒါ ဘော ဒူအီ ခဲင် မိူင် ယေရူဆာလဲမ် ဘူင် ကာလိုပ်၊ ဘူင် အီ ဟာယ် အီ မိူက် လွှိုမ် ဂေ ဒူအီ အာမျုဝ် ဟဝ်၊ အီ မုး ဒူအီ ပီ ဟုဝ် ဝဲန် ဇဝ်ဖြာ အာတ့် တး လိုပ် ဂေ ဒူအီ အီဆာရေလ ခဲင် မိူင် တီ။

10 ဇဝ်ဖြာ ဟဲ့ ကာလာင် ဒီ အာမာနာဆေ ဘော ဒီ ဂေ ဒူအီ ပီ အိုပ် အန်။ မာလဲ၊ ဂေ ယီ တူ ထူမ်။ 11 ပါယ် တီ ဇဝ်ဖြာ မိူဝ် တဲး ဒါ ဆိုက် ခုန်ဒီခမ် အာဆူရာ တး ကာဂုဝ်း ဒီ ဂေ ဘော ပဲ ဂေ။ ဂေ ဘော မှေတ့် အာမာနာဆေ၊ ဝီ ဘ့လုး ဂုင်မုး အန် ဟပ် ခ့ဝင် ဟိန်။ ဂေ ဒိုဝ်း ဝန် ဘွင့် ဒေန့်၊ ပက် ပ့လဝ် ဂေ ဒဲ အန်။ ဟဲ့ ဟွတ့်၊ ဂေ ဝီ ဒိုဝ်း ဟာဝ် အန် ဒီ မိူင် ဘာဘဲ။ 12 ဒေါ ဟဲ့ ဇမ် အာမာနာဆေ ဒုက် တာင် ပါယ် တီ အန် ဘော ဝီ ဆာခိုဝ် မှာန့်၊ တဲး ဇဝ်ဖြာ အီ မုး ဇဝ်ဖြာ ပီ ကြိုပ် အန် ဂေဇူ အန်။ အန် ဘော ဝီ ပီတျီမ် ကာဆဝ် ဒုဝ် အန် ဒီ အာတ့် ဇဝ်ဖြာ အီ မုး ဇဝ်ဖြာ ပီ ကြိုပ် ဘော ဂုန့် ဒင် အန်။ 13 ဒေါ ဆာခိုဝ် မှာန့် အန် ဒီ ဇဝ်ဖြာ ပါယ် တီ ဇဝ်ဖြာ မိူဝ် ထူမ် ဂြုဝ်း ပီ ဆာခိုဝ် ပီ မှာန့် အန်၊ ဘော ဝီ ကာဝေ အန်။ ဇဝ်ဖြာ ပီ ဝီ တိုယ် တး အန် ခဲင် မိူင် ယေရူဆာလဲမ် အီ မုး မာန် မိူင် ပီ ဒွိုမ် အိုပ် အန်၊ ဒူင် ကွယ် ဘြိမ် အန်။ ပန် အန် တီ အာမာနာဆေ ကော နပ် လွင် ဇဝ်ဖြာ တီ ဟဲ့ မုး ဇဝ်ဖြာ အာခ်ု မှာန်။

14 ဝါယ် အန် တီ အန် ဘော ဝီ ဘူင် ရဲင် မိူင် ပေါ အူ ထာပ် နာ ရေတ့် ရဲင် ဘြိမ် အီ ကွယ် ဒီ မိူင် အာဒါဝိတ် ဒူပ် ဒီလယ့် ဂီဟူန် ဘ့လာက် နာ ဂေတ့် ဆီငဲ၊ ကော ဝီ ဟာဝ် ဇမ် ဒီ ဘာင် မာလုဝ်း မိူင် အီ စိူဝ် မာလုဝ်း မာဂါ။ အန် မိူဝ် ဘူင် တဲး န့ ကော ရူပ် ဒူင် စိူဝ် အောဖဲလ။ ရဲင် တီ အန် ဘူင် တဲး န့ ကော စာ ကာဆဝ်။ အန် မိူဝ် တဲး ဂေ ဒါ တာင် အီ အိုပ် ဒါ ဆိုက် ကွယ် ခဲင် မိူင် ဒွန် မိူင် အီ မိုဝ်း ရဲင် အီ ကွယ် ခဲင် ကာဒါယ် မိူင် ယူဒါ။

15 အန် မိူဝ် ပျာတ့် ဝဲန် ဇဝ် ပီ ကြိုပ် ဂေ ဒူအီ အာမျုဝ် ဟဝ်။ အာရိုပ် ရာင် ပီ ဘူင် ဘ့လေး အန် ခဲင် ဟုဝ် ဇဝ်ဖြာ ဘော ကာစှူင့် လှူ ပီ အုန် အန် ဒဲင် နွန် ဒူင် ကွယ် ဟုဝ် ဇဝ်ဖြာ ဘော အီ ကွယ် ခဲင် မိူင် ယေရူဆာလဲမ်၊ အန် ဝီ ဒိုဝ်း ဟာဝ် ဝဲန် တူတ့် နာ ရေတ့် မိူင်။ 16 အန် ဝီ မ့ပြာယ် ကာစှူင့် လှူ ဒီ ဇဝ်ဖြာ၊ ဝီ လှူ ပီ ဒီ လှူ အီ ကွယ် ကာဇု ဟူမ် ရိုမ် ဘော ပီ ဒီ လှူ အီ ဒါင် ဂုင် ဂေဇူ ဒီ ဇဝ်ဖြာ။ အန် ဝီ ကာလာင် ဒီ ဂေ ဒူအီ အီဆာရေလ၊ တဲး ဂေ ကြိုပ် မီ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ။ 17 ဂေ ဒူအီ ခဲင် ရဝ် ခဲင် ကာင်၊ ဂေ ပီ ဘော ဆီ လှူ ပီ ဒီ လှူ ဒဲင် နွန် စာ မိူဝ်၊ ဂေ ယီ လှူ မီ ဒီ ဇဝ်ဖြာ။

18 လွင် ပီ ဘူင် အာမာနာဆေ အီ ညှမ် ဒွိုမ် ကာလာင် ဘော လွင် ဟဲ့ ဆာခိုဝ် မှာန့် အန် ဒီ ဇဝ်ဖြာ၊ ဘော လွင် ဂြုဝ်း ပီ ကာလာင် ဂေ ဒူအီ အီ နပ် အီ ယိုဝ် အီ မုး ဂြုဝ်း ပဲ့ ဟဲ့ ကာလာင် ဇဝ်ဖြာ ဒီ ဂေ အီ မုး ဇဝ်ဖြာ ပီ ကြိုပ် ဒူအီ အီဆာရေလ။ န့ ဟဲ့ ဒဲမ် အုန် ခဲင် ဘပ် ခုန်ဒီခမ် မိူင် အီဆာရေလ။ 19 လွင် ပီ ဆာခိုဝ် အန်၊ လွင် ဟဲ့ ထူမ် ဇဝ်ဖြာ ဂြုဝ်း ပီ ဆာခိုဝ် အန်၊ လွင် ပဲ့ ဟဲ့ ကာလိုပ် အန် ဒီ ဘူင် မှာပ် ဘော ဝဲန် ဇဝ်ဖြာ၊ လွင် ဒူင် စာ ပဲ့ ဟဲ့ ဘူင် အန် ဘော လွင် ဟဲ့ ဆမ် အန် ရွင့် နာင် ကာနမ် အေဆူရာ ဘော လွင် အာရိုပ် ရာင် ပီ ဘူင် အန် ဒွန် မျုဝ် အာတ့် ဂူမ် အန် ဒီ ဇဝ်ဖြာ၊ န့ ဟဲ့ ဒဲမ် အုန် ခဲင် ဘပ် ဒူအီ အီ နပ် ဒီ ယိုဝ် တွိုန်။ 20 အာမာနာဆေ ဘော ယမ် ဟာဝ် ဒူပ် ဒါ ဒါ အန်။ ဂေ ဘော ဒိပ် ဒုဝ် ယမ် အန် ခဲင် ကာင် အန်။ ဂွန် အီမာယ် အန် အီ စိူဝ် အာမူန် ဘော ဝီ ဘဲန် ခုန်ဒီခမ် ပ့လု အန်။

21 အာမူန် ဟဲ့ ဘဲန် ခုန်ဒီခမ် ဒေါ အာဆာက် အန် ဟဲ့ နုဝ့် အာ ဂိုဝ် ဒီ အာ ဆီနမ်။ အန် ဘော အိုပ် ကွယ် ခဲင် မိူင် ယေရူဆာလဲမ် အာဒါ အာ ဆီနမ်။ 22 အန် မိူဝ် ဘူင် ပီ တူ အိုင် ဇဝ်ဖြာ ပီ ပီ ဘူင် ဂုန့် အန် အီ စိူဝ် အာမာနာဆေ တွိုန်။ အန် ဝီ ကြိုပ် ဝီ လှူ ပီ ဒီ လှူ ဒီ အာရိုပ် ရာင် ဒွန် မျုဝ် ပဲ့ ဟဲ့ ဘူင် အုန် ဂုန့် အန်။ 23 အန် ယီ တူ ပီတျီမ် နဝ်း အန် ဒီ အာတ့် ဇဝ်ဖြာ ပီ ပီ ဘူင် ဂုန့် အန် အီ စိူဝ် အာမာနာဆေ ဟဲ့ ဝီ ပီတျီမ် နဝ်း အန်။ အာမူန် ဘော ဘူင် ကာလိုပ်၊ တဲး မှာပ် ဝဲ ကိူန် ကာဆဝ်။

24 ဂေ အာမူ အာမာတ် အန် ဘော ဒူအီ ပီ အိုပ် အန်၊ ဂေ ဘော ဝီ ခြာမ် ဒီ ဘ့လွာ့ ဝဲန် အန်။ ဂေ ဘော ဝီ ငဝ်း ယမ် အန် ခဲင် ဟုဝ် ဒူင် ကွယ် အန်။ 25 မာလဲ၊ ဂေ ဒူအီ ခဲင် ကာဒါယ် မိူင် တွိုန် ဘော ဝီ ငဝ်း ဝဲန် ဂေ ဒူအီ အီ ဟဲ့ ခြာမ် ဒီ ဘ့လွာ့ ဝဲန် ခုန်ဒီခမ် အာမူန် တီ။ ဟဲ့ ဟွတ့်၊ ဂေ ဘော ဝီ ဒိုဝ်း ဂွန် အီမာယ် အန် အီ စိူဝ် အာယုဝ်ဆီယာ၊ ဝီ တဲး အန် ဘဲန် ခုန်ဒီခမ် ဝီ ပ့လု ဂုန့် အန်။