1 အာယုဝ်ဆီယာ ဟဲ့ ဘဲန် ခုန်ဒီခမ် ဒေါ ဟဲ့ နုဝ့် အာဆာက် အန် ဒါ ဆီနမ်။ အန် ဘော အိုပ် မာန် မိူင်၊ ကွယ် ခဲင် မိူင် ယေရူဆာလဲမ် အာဒါ အူယ် ဂိုဝ် ဒီ အူ ဆီနမ်။ 2 အန် ဘော ဘူင် နာ ဘွတ် နာ မွှိုမ် ပီ အိုင် ဇဝ်ဖြာ။ အန် ဘူင် ဒူပ် ပီ ဒါ ဒါ အန် အီ စိူဝ် အာဒါဝိတ်။ အန် မိူဝ် ဒူပ် ဆီချာ၊ တူ ဝး တူ ဘ့လိူင် မာဆေ။

3 အာယုဝ်ဆီယာ ဟဲ့ ဘဲန် ခုန်ဒီခမ် အာဒါ ဒါ ဆီနမ်၊ ဒေါ ဆီ နှိုမ် အန်၊ အန် စုး ဒီ ဟြေတ့် ဒီ ဘိုင် ဆီချာ ဇဝ်ဖြာ အီ မုး ဇဝ်ဖြာ ပီ ကြိုပ် ဒါ ဒါ အန် အီ စိူဝ် အာဒါဝိတ်။ ဒေါ ဘဲန် အန် ခုန်ဒီခမ် အာဒါ ဂိုဝ် ဒီ အာ ဆီနမ်၊ အန် ဝီ စုး ဒီ ပျာတ့် ဝဲန် ဒူင် စာ အီ ကွယ် ခဲင် ကာဒါယ် မိူင် ယူဒါ ဘော ခဲင် မိူင် ယေရူဆာလဲမ် ဒွန် ပ့လုဝ့်။ အန် ပျာတ့် ဝဲန် ဘော ရွင့် နာင် ကာနမ် အေဆူရာ၊ ဘော အာရိုပ် ရာင် ပီ ဘ့လုဝ်း ပီ လှုဝ် ဂေ။ 4 အန် စ်ု ဂေ ပျာတ့် ဝဲန် ဘော ကာစှူင့် လှူ ဒီ ဇဝ် ဘာလ။ အန် မိူဝ် ယဲတ့် ဂေ ပျာတ့် ဝဲန် ဘော အာရိုပ် ရာင် အီ ကွယ် ဒူင် စာ။ ဂေ မး ကာလာတ့် ကာမုန် တူတ့် ဘော ရွင့် အာရိုပ် ပီ ကြိုပ် ဂေ ဘော အာရိုပ် ရာင် ပီ ဘ့လုဝ်း ပီ လှုဝ် ဂေ။ ဂေ ဝီ ဘြတ် ဝီ ဇဝ်း ဒဲင် အွုန် ဂေ ဒူအီ အီ ဟဲ့ ကြိုပ်၊ ဟဲ့ လှူ ဒီ အာရိုပ် ရာင် ဂေ တီ။ 5 အန် ဝီ ဒိုဝ်း ကာအာင် ဂေ ဒါ အီ လှူ ဒီ ဇဝ် ပီ ကြိုပ် ဒူအီ အာမျုဝ် ဟဝ် တွိုန်၊ ဝီ ဒုဝ့် ခဲင် ငဝ် ဒဲင် ကာစှူင့် လှူ။ အန် ဘူင် တဲး မိူင် ယူဒါ ဘော မိူင် ယေရူဆာလဲမ် ဝီ ဆီငါ။ 6 အန် ဘူင် ပါယ် တီ ခဲင် မိူင် ဒွန် မိူင်၊ ဘော မုး ခဲင် ကာဒါယ် မိူင် အာမာနာဆေ၊ အာအေဖာရိမ်၊ အာဆီမေအူန် ကော ဝီ ဇမ် ခဲင် ကာဒါယ် အာနာပ်ထာလီ။ အန် ဘူင် ပါယ် တီ ဘော ဒူင် ဟဲ့ ရာမ် အီ ကွယ် နာ ရေတ့် မိူင် ဂေ တီ။ 7 ဂေ ကာဘက် ဝဲန် ဘော ကာစှူင့် လှူ၊ ဒိုဝ်း ဝဲန် ဘော ရွင့် နာင် ကာနမ် အေဆူရာ၊ ဘော အာရိုပ် ရာင် ပီ ဘ့လုဝ်း ပီ ဘူင် ဂေ။ အန် တဲး ဂေ ဝီ ဒွယ် ဝီ မး တဲး န့ ကာမွတ့် တူတ့်။ ဂေ ဂ်ု ဝဲန် ဘော ကာစှူင့် လှူ ဆီနမ် အုး ငှုန် ဒွန် ပ့လုဝ့် အီ ကွယ် ခဲင် မိူင် အီဆာရေလ။ ဟဲ့ ဟွတ့်၊ အန် မိူဝ် ဝီ ဝေန့် ဒီ မိူင် ယေရူဆာလဲမ်။

8 အာယုဝ်ဆီယာ ဟဲ့ ဘဲန် ခုန်ဒီခမ် အာဒါ ဂိုဝ် ဒီ ဒါ ဆီနမ်။ ဒေါ အန် တီ အန် ဝီ ဘူင် တဲး မာန် မိူင် အန် ဘော ဟုဝ် ဇဝ်ဖြာ ဝီ ဆီငါ ဘွတ်။ အန် ဝီ စ်ု အာဆာဖာန် အီ မုး ဂွန် အာစာစီ ဘော အာမာအာဆေယာ အီ မုး ဒါ ကာညာ အိုပ် မိူင်၊ ဘော ဒါ စာရေ အီ စိူဝ် အာယုဝ်အာ အီ မုး ဂွန် အာယုဝ်အာဟာတ်၊ တဲး ဂေ ဝီ မ့ပြာယ် ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် အန်။

9 ဒူအီ ဂေ တီ မိူဝ် ဟာဝ် ဒူင် ကွယ် ဒါ တာင် အီ လှူ ဒီ ဇဝ်ဖြာ အီ စိူဝ် အာဟီလာခီ။ ဂေ မိူဝ် ဒိုဝ်း ရွိုန် ပဲ့ ဟဲ့ လှူ ဂေ ဒူအီ ကိူန် ခဲင် ဟုဝ် ဇဝ်ဖြာ၊ ဝီ ဒွါ ဒီ အန်။ ဒါ အီ ဘ်ု မာလုဝ်း အီ မုး ဒူအီ အာမျုဝ် အာလေဝီ ဟဲ့ ဂဲပ် အုန် ရွိုန် တီ။ ဂေ ဟဲ့ ဂဲပ် ရွိုန် တီ ဒီ ဒူအီ ခြိုဝ် အာမာနာဆေ၊ ဒူအီ ခြိုဝ် အာအေဖာရိမ်၊ ဒူအီ အာမျုဝ် အီဆာရေလ အီ ဆီ ဂိတ် ဆီ ကွယ် ဘော ဂေ ဒူအီ ခြိုဝ် အာယူဒါ၊ ခြိုဝ် အာဘေန်ယာမ် ဘော ဂေ ဒူအီ အီ ကွယ် ခဲင် မိူင် ယေရူဆာလဲမ် ဘောကာဂ့လျီတ်။ 10 ဂေ မိူဝ် အာပ် ဒွါ ဒီ ဂေ အီ အိုပ် အီ ယွတ် မဲန် ဟုဝ် ဇဝ်ဖြာ။ ဒူအီ ဂေ တီ ပီ ဝီ ကာဆာင် ဒွါ ဒီ ဂေ အီ ဘူင် ဂါန် အီ မ့ပြာယ် ဟုဝ် ဇဝ်ဖြာ။ 11 ဂေ အီ အိုပ် ခဲင် ဟုဝ် ဇဝ်ဖြာ မိူဝ် အာပ် ဒွါ ဒီ ဒါလာက် အီ နပ် ဒီ လိုဝ် ဟေ၊ ဒွါ ဘော ဒီ ဂေ အီ နပ် ဒီ ဂုဝ် မာဝ်၊ တဲး ဂေ စိုဝ်း မာဝ် ပဲ့ ဟဲ့ ဟွတ့် ဒဝ်း အီ၊ စိုဝ်း ဘော မာနက် ဘော ဘြာင် ဘော နွန် ဘော ဒီအုဝ်၊ တဲး ဂေ ဝီ မ့ပြာယ် ဟုဝ် ဇဝ်ဖြာ ပဲ့ ဟဲ့ ဘ့လေး ဝဲန် ဂေ ခုန်ဒီခမ် ယူဒါ၊ တဲး န့ လိုဝ် ရာမ်။

12 ဂေ ဒူအီ အီ မ့ပြာယ် တီ၊ ဂေ မိူဝ် မိုဝ်း နဝ်း ဆိူဝ် နဝ်း မှာန် ဒီ ဘူင်။ ဂေ အီ အိုပ် အီ ယွတ် မဲန် ဂါန် ပီ ဘူင် ဂေ တီ၊ ဘော မုး ဒူအီ အာမျုဝ် အာလေဝီ အီ စိူဝ် အာယာဟာတ် ဘော အာအောဘာဒီ အီ မုး လှုက်လှာန် အာမေန်ရာရီ။ န့ ဘော မိုဝ်း ဘော အာဆာခါရာ ဘော အာမေဆူလမ် အီ မုး လှုက်လှာန် အာခုဝ်ဟာတ်။ ဒူအီ ဂေ တီ ဂေ ဘော ဘဲန် ဒူအီ အီ အိုပ် အီ ယဲတ့် ဂေ အီ ဘူင် ဂါန်။ ဂေ ဒူအီ အာမျုဝ် အာလေဝီ တီ ဂေ မုး ဒူအီ အီ ကျ အီ လှဲဝ် ဒီ ဘုတ် ဒီ ဘး မျုဝ် အီ ဟမ် ဒါခိုယ်။ 13 ဂေ ဒူအီ အာမျုဝ် အာလေဝီ တီ ဂေ ဘော ဘဲန် ဒါ အီ အိုပ် ဒူအီ အီ လုဝ် ဂွတ် လုဝ် ပး ဘော ယဲတ့် ဂေ ဘူင် ဘဲန် မျုဝ် ဘဲန် မျုဝ်။ ဒူအီ အာလေဝီ မင် အီ ဘော ဘဲန် ဒါ စာရေ ဘော ဒါ အီ စွယ် ဒါ စာရေ ဘော ဒါ တာင် အီ ဘ်ု မာလုဝ်း။

14 ဒေါ ဒိုဝ်း လေး ဂေ ရွိုန် ခဲင် ဟုဝ် ဇဝ်ဖြာ တွိုန်၊ ဒါ တာင် အီ လှူ ဒီ ဇဝ်ဖြာ အီ စိူဝ် အာဟီလာခီ၊ အန် ဝီ ကာဒုး ဘော ဘပ် ဒါရာ ဇဝ်ဖြာ ပဲ့ ဟဲ့ ဒွိုမ် ဒွါ အာမုဝ်ဆဲ ဒီ ဂေ ဒူအီ အီဆာရေလ။ 15 အာဟီလာခီ တွိုန် ဘော ဝီ ကာလာင် လွင် ဟဲ့ ကာဒုး အန် ဘပ် ဒါရာ တီ ဒီ အာဆာဖာန် အီ မုး ဒါ စာရေ ခုန်ဒီခမ်။ အန် တဝ်း၊ “အုဝ် ဟဲ့ ကာဒုး ဘပ် ဒါရာ ဇဝ်ဖြာ ခဲင် ဟုဝ် ဇဝ်ဖြာ နီ။” အန် ဟဲ့ ဟွတ့် တဝ်း ပါယ် တီ အန် ဝီ ဒိုဝ်း ဘပ် တီ၊ ဝီ အာပ် ဒွါ ဒီ အာဆာဖာန်။

16 အာဆာဖာန် မိူဝ် ဝီ ဒိုဝ်း ဘပ် တီ၊ ဝီ ဟာဝ် ဒူင် ကွယ် ခုန်ဒီခမ် ဘော တဝ်း၊ “ခဲ့ ပီ စ်ု မဲ ခုန်ဒီခမ် ဒီ ဂေ ဒဲစေန့် မဲ တွိုန်၊ ဂေ မိူဝ် ဟဲ့ ဘူင် ဒေါ တီ နီ။ 17 ဂေ ဟဲ့ ဒိုဝ်း လေး ရွိုန် ခဲ့ မိုဝ်း ခဲင် ဟုဝ် ဇဝ်ဖြာ၊ ဝီ အာပ် ဒွါ ဒီ ဂေ အီ ယဲတ့် ဒူအီ အီ ရန့် ဂါန်။” 18 ဒါ စာရေ အာဆာဖာန် ဟဲ့ ဟွတ့် ကာလာင် ပါယ် တီ အန် ပီ ဝီ တဝ်း ဒီ ခုန်ဒီခမ်၊ “ဒါ အီ လှူ ဒီ ဇဝ်ဖြာ အီ စိူဝ် အာဟီလာခီ၊ အန် ဝီ ဒွါ ဘော ဘပ် နီ ဒီ အုဝ်။” အန် မိူဝ် တိး တဲး ခုန်ဒီခမ် ထူမ်။

19 ခုန်ဒီခမ် ဘော ယိုဝ် ဂြုဝ်း ဒါရာ ဇဝ်ဖြာ တီ၊ အန် ဘော ကာယာတ့် ခြိုင် တာ အန် ကူပ် ဟဲ့ က့လိုဝ် အန်။ 20 အန် ဝီ ဒွါ အာမိင် ဒီ ဂေ ဒါ အီ လှူ ဒီ ဇဝ်ဖြာ အီ မုး အာဟီလာခီ၊ အာဟီကမ် အီ မုး ဂွန် အာဆာဖာန်၊ အာဘာတူန် အီ မုး ဂွန် အာမီခါ၊ အာဆာဖာန် အီ မုး ဒါ စာရေ အန် တွိုန် ဘော အာဆာယာ အီ မုး ဒဲစေန့် ခုန်ဒီခမ်။ 21 အန် တဝ်း ဒီ ဂေ၊ “တဲး ဘေ ဟာဝ် ဒီမွှတ် ဇဝ်ဖြာ လွင် ဂြုဝ်း ခဲင် ဘပ် ပီ ကာဒုး ဘေ ဒေါ တီ နီ၊ တဲး ဘော အုဝ် ဘော ဂေ အီ ကွယ် ခဲင် မိူင် အီဆာရေလ ဘော ဂေ ဒူအီ အီ ကွယ် ခဲင် မိူင် ယူဒါ ဘောကာဂ့လျီတ် ကော နပ် လွင် အန် တီ။ ဂေ ဂုန့် ဒင် အေ တူ ထူမ် ဂြုဝ်း ပီ ကာလာင် ဇဝ်ဖြာ။ ဂေ မိူဝ် တူ ဘူင် ဒူပ် ပီ ဒဲမ် အုန် ခဲင် ဘပ် တီ။ ခုဝ်၊ ဇဝ်ဖြာ ဝီ တဲး အေ ခမ် ကာဆဝ် ပီ ရူ အန် ဒီ အေ။”

22 ပန် တီ အာဟီလာခီ ဘော ဒူအီ ပီ စ်ု ခုန်ဒီခမ် ဟာဝ်၊ ဂေ ဝီ ဟာဝ် ကာလာင် လွင် အန် တီ ဘော ဒီ ဒူအီ အီ ဘျာန် ဂြုဝ်း ဇဝ်ဖြာ အီ မုး အီဘိုန့် အီ စိူဝ် နာင် ဟုဝ်လာတာ။ အန် ဘော မုး အီဘိုန့် အာဆာလူမ် အီ မုး ဂွန် အာတုဝ်ခါတ် ဘော လှာန် အာဟာရာတ်။ အာဆာလူမ် ဘော မုး ဒူအီ အီ ဘ်ု အီ ယွတ် လိုမ်လာ ခြိုင် တာ ခုန်ဒီခမ်။ နာင် တီ ကွယ် ခဲင် မိူင် ယေရူဆာလဲမ် ထာပ် ရေတ့်။

23 အီဘိုန့် တီ မိူဝ် ဝီ တဝ်း ဒီ အန်၊ “ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ ဟဲ့ ကာလာင်၊ တဲး မဲ ဝီ ဝေန့် ဒူင် ကွယ် ဒူအီ အီ ဟဲ့ စ်ု မဲ တး ဒူင် ကွယ် အုဝ်၊ တဲး မဲ ကာလာင် ဒီ အန် ပါယ် နီ။ 24 ဇဝ်ဖြာ ဟဲ့ တဝ်း၊ ‘ဘ်ု ဘေ ယွတ်၊ အုဝ် ဒီ တဲး န့ မိုဝ်း ဒုက် တာင် ကာဆိူဝ် နီ ဘော ဒီ ဂေ ဒူအီ အီ ကွယ် ခဲင် မိူင် နီ။ တဲး န့ ဘော ဒူပ် ဂြုဝ်း ဒိူင် ပဲ့ ဟဲ့ ဒဲမ် အုန် ခဲင် ဘပ် ဒါရာ ပဲ့ ဟဲ့ ဟွတ့် တိး ဘေ၊ တဲး ခုန်ဒီခမ် ယူဒါ ထူမ်။ 25 ခုဝ်၊ ဂေ ဟဲ့ ဝး ဟဲ့ ဝဲန် အုဝ်၊ ဟဲ့ ဝီ ဒုဝ့် လှူ ဆီနမ် အုး ငှုန် ဒီ ဇဝ် ပီ ကြိုပ် အီ ဟဝ်။ အာရိုပ် ရာင် ပီ ဘူင် ဂေ တာ ဒဲ ဂေ မိူဝ်၊ န့ တဲး အုဝ် ရူ ဒီ ဂေ။ ဂေ အီ ကွယ် ဒူင် တီ ဘော လုဝ် ခမ် နဝ်း ရူ အုဝ် အီ ပီ ငဝ် အီ တူ ပွိုန် ဘျတ် ဒေါ မှဝ်။’ 26 မာလဲ၊ ဘေ လုဝ် ဝီ ကာလာင် ဒီ ခုန်ဒီခမ် ယူဒါ အီ ဟဲ့ စ်ု ဘေ တး ဒီမွှတ် အုဝ်။ တဲး ဘေ ကာလာင် ဒီ အန် တဝ်း၊ ‘ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ အီ ဟဲ့ ကာလာင် လွင် ဂြုဝ်း ပီ ဒဲမ် ခဲင် ဘပ် ဒါရာ ပဲ့ ဟဲ့ ဟွတ့် ထူမ် မဲ တွိုန်။ 27 အန် တဝ်း၊ မဲ ဟဲ့ ဝီ မိုဝ်း နဝ်း ဂူမ် နဝ်း တျီမ် ဒီ အာတ့် အုဝ် ဒေါ ဟဲ့ ထူမ် မဲ ဂြုဝ်း အုဝ် အီ တူ မွှိုမ် လွင် ကာဆိူဝ် နီ ဘော ဂေ ဒူအီ အီ ကွယ် ဒီ နီ၊ မဲ မိူဝ် ဟဲ့ ဝီ ကာယာတ့် ခြိုင် တာ မဲ ကူပ် က့လိုဝ် မဲ ဘော ယာမ် နာ အာတ့် အုဝ်။ ခုဝ်၊ အုဝ် ဟဲ့ ဝီ ထူမ် ဂြုဝ်း မဲ။ 28 မာလဲ၊ အုဝ် ယီ ဒီ တိုယ် တဲး မဲ ဟာဝ် ဒူင် ကွယ် ဂေ ဂုန့် ဒင် မဲ။ မဲ ဒီ ပွိုန် ဒီ ယမ် ဒါခိုယ် ဒါခိုယ်။ မဲ မိူဝ် တူ ကာဒုး ဒီ ယိုဝ် ဒုက် တာင် ပီ ဒီ ဘူင် အုဝ် ကာဆိူဝ် နီ ဘော ဒီ ဂေ ဒူအီ အီ ကွယ် ဒီ နီ။’” ဒူအီ ဂေ တွိုန် မိူဝ် ဒိုဝ်း ဂြုဝ်း ဇဝ်ဖြာ တီ၊ ဝီ ဝေန့် ကာလာင် ဒီ ခုန်ဒီခမ်။

29 ဒေါ အန် တီ ခုန်ဒီခမ် ဝီ စ်ု ဂေ ဒဲ့ ဒါ တာင် ခဲင် ကာဒါယ် မိူင် ယူဒါ ဘော ခဲင် မိူင် ယေရူဆာလဲမ်၊ တဲး ဂေ ဘောကာဂ့လျီတ် တး ကာဇု။ 30 အန် ဘော ဟုဝ့် ခဲင် ဟုဝ် ဇဝ်ဖြာ၊ ဒဲ့ ဘော ဂေ ဒူအီ အာယူဒါ ဘောကာဂ့လျီတ် ဘော ဒူအီ ခဲင် မိူင် ယေရူဆာလဲမ် ဘောကာဂ့လျီတ် ဘော ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ ခြိုဝ် အာလေဝီ ဘော ဒူအီ အီ တျီ့ အီ တာင်၊ တဲး ဂေ ဘောကာဂ့လျီတ် ဒူပ် အန်။ အန် ဘော ဒိုဝ်း ဘော ဘပ် ပီ ကာဒုး ဂေ ခဲင် ဟုဝ် ဇဝ်ဖြာ တွိုန်၊ တိး တဲး ဂေ ဒွန် အီ ပွိုန် ဒီ ထူမ်။ 31 ခုန်ဒီခမ် မိူဝ် ယိတ့် စွင့် ခူပ် ရွင့် အန် ဘော ကာဆဲန့် တဲး ဇဝ်ဖြာ ထူမ် လွင် ဒီ ခမ် ဒီ ဘူင် ဒူပ် အန် ပီ တဝ်း ဇဝ်ဖြာ။ အန် ခမ် ကာဒိက် ဆတ်ဇာ လွင် ဒီ ဘူင် ဒူပ် အန် ဒါရာ အန် ဇဝ် ဘော ထူမ် ပီ စ်ု ဇဝ်ဖြာ အီ ဘူင်။ အန် ဒီ တဲး ဘော နဝ်း ဘော ဖွိုမ် အန် ခမ် ဒီ ဒူပ် တူတ့် ခဲ့ ပီ ဒဲမ် အုန် ခဲင် ဘပ် ပဲ့ တီ။

32 အန် ဝီ စ်ု ဘော ဂေ ဒူအီ အီ ကွယ် ခဲင် မိူင် ယေရူဆာလဲမ်၊ ဘော ဂေ အီ ကွယ် ခဲင် ကာဒါယ် မိူင် အာဘေန်ယာမ်၊ တဲး ဘော ဂေ ခမ် ပါယ် တီ ပီ အန်။ ဟဲ့ ဟွတ့်၊ ဂေ ဒူအီ အီ ကွယ် ခဲင် မိူင် ယေရူဆာလဲမ် မိူဝ် ဖြူမ် ဒီ ဘူင် ဒူပ် ပီ ကာဆဲန့် ဇဝ်ဖြာ အီ မုး ဇဝ်ဖြာ ပီ ကြိုပ် ဒါ ဒါ ဂေ။

33 အာယုဝ်ဆီယာ မိူဝ် ဒိုဝ်း ဝဲန် အာရိုပ် ရာင် ဘော ဒွန် မျုဝ် အီ မွှိုမ် ကာအိး အီ ကွယ် ဒူင် ကွယ် ဒူအီ အီဆာရေလ ဒွန် ပ့လုဝ့်။ အန် မိူဝ် ဆုင်ဖျာတ်၊ တဲး ဂေ ဒူအီ အီ ကွယ် ခဲင် မိူင် အီဆာရေလ ဘောကာဂ့လျီတ် ကြိုပ် မီ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ။ ဒေါ မုး စုဝ် အန် တီ၊ ဂေ မိူဝ် ဒူပ် ဆီချာ ဘော တူ ဝး ဇဝ်ဖြာ အီ မုး ဇဝ်ဖြာ ပီ ကြိုပ် ဒါ ဒါ ဂေ။