1 အာယုဝ်ဆီယာ ဝီ ဘူင် ဘ့လွယ် ခဲင် မိူင် ယေရူဆာလဲမ်။ န့ မုး ဘ့လွယ် လှုဝ်း ဂေ ဇဝ်ဖြာ ဒေါ ကာလုဝ်း အန် ကာင် ဂေ ခဲင် မိူင် အဲဂိုပ် တွိုန်။ ဒေါ မုး မာဂျီန် ဒေါ ဂုဝ်၊ ဆီငဲ ဂိုဝ် ဒီ မ့ဖွုန်၊ ဂေ ဘော ငဝ်း ဂွန် မာဘူ အာဒါ ဘ့လွယ် တီ။ 2 အန် မိူဝ် ဒါင် ဂေ ဒါ အီ လှူ ဒီ ဇဝ်ဖြာ ဘော ကာဆုး နဝ်း ဂေ၊ တဲး ဂေ ဘူင် ဆီချာ ဂါန် ဂေ ခဲင် ဟုဝ် ဇဝ်ဖြာ။ 3 အန် မိူဝ် ကာလာင် ဒီ ဂေ ဒူအီ ခြိုဝ် အာလေဝီ အီ မာနုဝ် ဂေ ဒူအီ အီဆာရေလ ဘောကာဂ့လျီတ် အီ ဟဲ့ ဆီငါ။ အန် တဝ်း၊ “တဲး ဘေ ဒိုဝ်း ဇီဒိူက် ဇဝ်ဖြာ အီ ဆီငါ ဘွတ်၊ ဝီ အုန် ခဲင် ဟုဝ် ဇဝ်ဖြာ ပဲ့ ဟဲ့ ဆမ် အုန် အာဆာလုဝ်မုဝ် အီ မုး ဂွန် အာဒါဝိတ် အီ မုး ခုန်ဒီခမ် အီ အိုပ် မိူင် အီဆာရေလ။ ဝါယ် အန် တီ ဘေ မိူဝ် အာဝ် ဟူ လုဝ် ကာဂွတ် ဒဲင် ယ ဘေ။ ဒေါ တီ နီ၊ တဲး ဘေ ဘူင် ဂါန် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ ဘော စွယ် ဂေ ဒူအီ ပီ အိုပ် အန် ဇဝ် အီ မုး ဒူအီ အီဆာရေလ။ 4 တဲး ဘေ ရဲန် ဒုဝ် ဘေ ဒူပ် န့ဟူမ် ဘေ ဖိုင် မှဝ် ဖိုင် အန်။ တဲး န့ ဘော ဒူပ် ပီ ဒဲမ် အုန် အာဒါဝိတ် အီ မုး ခုန်ဒီခမ် ဒူအီ အီဆာရေလ ဘော ပီ ဒဲမ် ဂွန် အန် အီ စိူဝ် အာဆာလုဝ်မုဝ် တွိုန်။

5 တဲး ဘေ စွင့် ဒူင် ဆီငါ ဘွတ် ခဲင် ဖိုင် ဘေ ဒူပ် ပဲ့ ဟဲ့ ကာယဝ်း ဂေ အာမျုဝ် ဂေ ဂုန့် ဒင် ဘေ ခြိုဝ် မှဝ် ခြိုဝ် အန်။ တဲး ဂေ ဒူအီ ခြိုဝ် အာလေဝီ ကွယ် ဒူပ် ဒူအီ ရဝ် ဒူအီ ကာင် ဖိုင် မှဝ် ဖိုင် အန်။ 6 ဟဲ့ ဟွတ့်၊ တဲး ဘေ ဘော ငဝ်း လှူ ဂွန် မာဘူ အာဒါ ဘ့လွယ် လှုဝ်း ဘေ ဇဝ်ဖြာ တီ။ တဲး ဒုဝ် ဘေ ဆီငါ ဘော ရဲန် ဒုဝ် ပီ ဒီ လှူ အာဒါ ဘီနွင် ဘေ အီ မုး ဒူအီ ရဝ် ဒူအီ ကာင်၊ အီ ကွယ် ဒူပ် ဖိုင် ဂေ၊ န့ကြိုဝ်း မှဝ် န့ကြိုဝ်း အန်။ တဲး န့ ဘော ဒူပ် ပဲ့ ဟဲ့ ကာလာင် အုန် ဇဝ်ဖြာ ဒီ အာမုဝ်ဆဲ တွိုန်။”

7 အာယုဝ်ဆီယာ မိူဝ် ဒိုဝ်း မာဘူ ဂေ မာပဲ အာဒါ အူယ် မှိုန့် ဒုဝ် ဘော မက် အူယ် ဟြဲန့် ဒုဝ် အီ မုး ကြုဝ် အာရာင် အန်။ အန် ဝီ အာပ် ဒွါ ဒီ ဂေ ဒူအီ ရဝ် ဒူအီ ကာင် အီ တး ကာဇု၊ တဲး န့ ဘော ဘဲန် ပီ ဒီ လှူ အာဒါ ဘ့လွယ် လှုဝ်း ဂေ ဇဝ်ဖြာ ဒေါ ကာလုဝ်း အန် ကာင် ဂေ။

8 ဂေ အာမူ အာမာတ် အန် မိူဝ် ဝီ မိုဝ်း နဝ်း ဆီ လှူ ဒူပ်။ ဂေ မိူဝ် ဝီ အာပ် ဒွါ ဒီ ဂေ ဒူအီ ရဝ် ဒူအီ ကာင်၊ အာပ် ဒွါ ဘော ဒီ ဂေ ဒါ အီ လှူ ဒီ ဇဝ်ဖြာ ဘော ဒီ ဂေ ဒူအီ ခြိုဝ် အာလေဝီ အီ မုး အာဟီလာခီ၊ အာဆာခါရာ ဘော အာယေဟီလာ အီ မုး ဒါ တာင် အီ အိုပ် ခဲင် ဟုဝ် ဇဝ်ဖြာ။ ဂေ မိူဝ် ဝီ ဒိုဝ်း မာဘူ ဘော မာပဲ အာ ဟြဲန့် ဒီ ဒဝ် မာယဝ်း ဒုဝ်။ ဂေ ဒိုဝ်း ဘော မက် အာလူင့် အူယ် မာယဝ်း ဒုဝ်၊ ဝီ အာပ် ဒွါ ဒီ ဂေ ဒါ အီ လှူ ဒီ ဇဝ်ဖြာ၊ တဲး န့ ဘဲန် ပီ ဒီ လှူ အာဒါ ဘ့လွယ် လှုဝ်း ဂေ ဇဝ်ဖြာ ဒေါ ကာလုဝ်း အန် ကာင် ဂေ။ 9 အာကောနာနီ၊ အာဆေမာယာ ဘော အာနေထာနေလာ အီ မုး ဝါ အာကောနာနီ ဘော အာဟာဆာဘီ၊ အာယေယီလာ၊ အာယောစာဘာတ် အီ မုး ဒါ အီ အိုပ် အီ ယဲတ့် ဒူအီ အာလေဝီ၊ ဂေ မိူဝ် ဒိုဝ်း မာဘူ ဘော မာပဲ ဂေ ဖန် ဟြဲန့် ဒုဝ်၊ မက် အာလူင့် ဖန် မာယဝ်း ဒုဝ်၊ အာပ် ဒွါ ဒီ ဂေ ဒူအီ ခြိုဝ် အာလေဝီ၊ တဲး န့ ဘဲန် ပီ ဒီ လှူ အာဒါ ဘ့လွယ် လှုဝ်း ဂေ ဇဝ်ဖြာ ဒေါ ကာလုဝ်း အန် ကာင် ဂေ။

10 ဂေ ဟဲ့ ဟွတ့် ရဲန် ဘ့လွယ် ဘော တဝ်း ဒီ ကြိုပ် ဇဝ်ဖြာ။ ခဲ့ ကွယ် ဂေ ဒါ အီ လှူ ဒီ ဇဝ်ဖြာ မိူဝ် စွင့် ဒူင် ကွယ် ဂေ။ ဂေ ဒူအီ အာမျုဝ် အာလေဝီ မိူဝ် ကွယ် ဘဲန် ဖိုင် ဘဲန် ဖိုင် ဒူပ် ဂြုဝ်း ပီ ကာလာင် အုန် ခုန်ဒီခမ်။ 11 ဂေ မိူဝ် ငဝ်း ဂွန် မာဘူ အာဒါ ဘ့လွယ် လှုဝ်း ဂေ ဇဝ်ဖြာ တီ။ ဂေ ဒါ အီ လှူ ဒီ ဇဝ်ဖြာ ဝီ ဒိုဝ်း နှာမ် မာဘူ ဒီ ဒဲ ဂေ ဒူအီ အာလေဝီ၊ ဝီ ခြဝ်း။ ဒေါ အန် တီ ဂေ ဒူအီ ခြိုဝ် အာလေဝီ၊ ဂေ မိူဝ် လျီ့ လေး ဟုန် ဒုဝ် ပီ ဒီ လှူ တီ။ 12 ဂေ မိူဝ် ကာယဝ်း လေး ဒုဝ် အာဒါ ပီ ဒီ လှူ အီ ဒုဝ့် ဒီ ငဝ်၊ ကာဆာင် ဒွါ ဒီ ဂေ ဒူအီ ရဝ် ဒူအီ ကာင် ဒူပ် န့ဟူမ် မှဝ် န့ဟူမ် အန်။ န့ တဲး ဂေ ဝီ ပွိုန် ဒီ လှူ ဒီ ဇဝ်ဖြာ ဒူပ် ဒါရာ ပီ ဒဲမ် အုန် အာမုဝ်ဆဲ တွိုန်။ မက် အာလူင့် ဂေ တွိုန် မိူဝ် ဂေ ဘော ကာဆာင် ပါယ် တီ။ 13 ဂေ မိူဝ် ဒိုဝ်း မာဘူ ပီ ဒီ လှူ ဂေ အာဒါ ဘ့လွယ် တီ၊ ဝီ တာ့ ဒီ ငဝ်၊ တဲး န့ ဒူပ် ဒါရာ ဂေ။ ဂေ မိူဝ် ဒိုဝ်း ပီ ဒီ လှူ အီ ဆီငါ ဘွတ်၊ ဝီ ကွင့် ခဲင် ကာလုဝ့်၊ ကာလုဝ့် ဟိန် ဘော ခဲင် မာခါင်။ ဂေ မိူဝ် ကာဆာင် ဒီ ဒူအီ ဘောကာဂ့လျီတ် ဟဲ ဟဲ ခြန် ခြန်။ 14 ဝါယ် တီ၊ ဂေ ဘော ဝီ ရဲန် အာဒါ ဒုဝ် ဘြိမ် ဂေ ဘော အာဒါ ဂေ ဒါ အီ လှူ ဒီ ဇဝ်ဖြာ။ ဂေ ဒါ အီ လှူ ဒီ ဇဝ်ဖြာ အီ မုး လှုက်လှာန် အာရူန် တွိုန် ဂေ လုဝ် လှူ ပီ ဒီ လှူ အီ ဒုဝ့် ဒီ ငဝ် ဘော ဒီက့လွုန် ဘျြီင် ကော ဇမ် ဘာ ဒီ အပ်။

15 ဂေ ဒူအီ အီ တဝ်း မှုဝ် အီ မုး လှုက်လှာန် အာဆာပ် တွိုန်၊ ဂေ မိူဝ် ကွယ် ဒူင် ကွယ် ဂေ ဒူပ် ပီ ကာလာင် အုန် အာဒါဝိတ်။ ဘော အာဆာပ်၊ အာဟေမာန် ဘော အာယေဒူထုန် အီ မုး ဒူအီ အီ နပ် ဒီ ယိုဝ်၊ ဂေ ဟဲ့ ဘူင် ပါယ် တီ ဒူပ် ပီ စ်ု အာဒါဝိတ်။ ဂေ ဒူအီ အီ ဘ်ု ဒီ မာလုဝ်း မိူဝ်၊ ဂေ ကွယ် ဒီ မာလုဝ်း ပီ လုဝ် ဘ်ု ဂေ ရာင် အာဆေ ရာင် အန်။ ဂေ မိူဝ် တူ လုဝ် ဘ့လေး ဝဲန် ဂါန် ဂေ။ ဘီနွင် ဂေ အီ မုး ဒူအီ ခြိုဝ် အာလေဝီ၊ ဂေ ဟဲ့ ဟွတ့် ရဲန် အုန် အာဒါ ဂေ။

16 ဆီငဲ တီ ဂေ မိူဝ် ရဲန် တူတ့် ဒွန် မျုဝ် ဒေါ လိုပ် ဂေ ဘ့လွယ် အီ လှုဝ်း ဇဝ်ဖြာ ဒေါ ကာလုဝ်း အန် ကာင် ဂေ။ ဂေ မိူဝ် လှူ ဒီ ဇဝ်ဖြာ ပီ ဒီ လှူ အီ ဒုဝ့် ဒီ ငဝ် ဒဲင် ကာစှူင့် လှူ၊ တဲး န့ ဘော ဒူပ် ပီ စ်ု ခုန်ဒီခမ် အာယုဝ်ဆီယာ တွိုန်။ 17 ဂေ ဒူအီ အီဆာရေလ အီ တး ကွယ် ကာဇု ဒူင် တွိုန်၊ ဂေ မိူဝ် လိုပ် ဘ့လွယ် လှုဝ်း ဂေ ဇဝ်ဖြာ ဒေါ ကာလုဝ်း အန် ကာင် ဂေ ဘော ဘ့လွယ် ဟူမ် ခါမုန် တူ ဟပ် ဆီနမ် ဘြး အာဒါ ဘူ ဆီငဲ။ 18 စုး ဆိန့် စုဝ် ဘာန် ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဆာမူအေန်၊ အာဝ် ဟူ မိုဝ်း အီ ဘူင် ဘ့လွယ် ပါယ် တီ ကာတဲ ဂေ ဒူအီ အီဆာရေလ။ ခုန်ဒီခမ် အီဆာရေလ မိူဝ်၊ အာဝ် မိုဝ်း ခေါ အူ ကာဒင် အီ ဘူင် ဘ့လွယ် တီ၊ တဲး န့ ပီ ပီ ဘူင် အာယုဝ်ဆီယာ ဘော ဂေ ဒါ အီ လှူ ဒီ ဇဝ်ဖြာ၊ ဒူအီ အာမျုဝ် အာလေဝီ၊ ဒူအီ အာယူဒါ ဂေ ဒူအီ အီဆာရေလ ဘော ဒူအီ ခဲင် မိူင် ယေရူဆာလဲမ် ဘောကာဂ့လျီတ် အီ ဟဲ့ ကွယ် ရိုမ် ဘူင် ဘ့လွယ် တီ။ 19 ဆီနမ် ဘူင် ဂေ ဘ့လွယ် တီ၊ ခုန်ဒီခမ် အာယုဝ်ဆီယာ ဟဲ့ အိုပ် မိူင် အာဒါ ဂိုဝ် ဒီ ဒါ ဆီနမ်။

20 ဝါယ် အန် တီ အာယုဝ်ဆီယာ ဟဲ့ ဟွတ့် ဘူင်၊ ဟဲ့ ဟွတ့် မ့ပြာယ် တူတ့် ဟုဝ် ဇဝ်ဖြာ၊ အာနေခေါ အီ မုး ခုန်ဒီခမ် အီ အိုပ် မိူင် အဲဂိုပ်၊ အန် ဘော ယဲတ့် ဒါ ဆိုက် အန် တး ဒီ မိူင် ခါဆေမိတ် အီ ကွယ် ခူပ် ဘ့လဲင် အိုမ် အူဖာရာတ်။ ခုန်ဒီခမ် အာယုဝ်ဆီယာ ဘော ဒါ ဆိုက် အန် လေး ဟာဝ် ဘ်ု ဒီ ရဲ န့တေန့် အန်။ 21 ခုန်ဒီခမ် အာနေခေါ ဝီ စ်ု ဒါလာမ် အန် ဟာဝ် ကာလာင် ဒီ အာယုဝ်ဆီယာ တဝ်း၊ “အိုယ် မဲ ခုန်ဒီခမ် အီ အိုပ် ကာဒါယ် မိူင် ယူဒါ၊ မာဆေ ပီ လုတ့် အုဝ် ဒီ မဲ။း ခါ နီ အာဝ် မုး အုဝ် ယဲတ့် ဒါ ဆိုက် အုဝ် တး ကာဂုဝ်း ဒီ မဲ။ အုဝ် ယဲတ့် ဒါ ဆိုက် အုဝ် တး ကာဂုဝ်း ဒီ ရန်ဆူ အုဝ်။ ဇဝ်ဖြာ ဟဲ့ ကာလာင် တဲး အုဝ် ဘူင် ဟဲ ဟဲ ခြန် ခြန်။ ကွဲ့ တဲး မဲ ဘူင် ကာဘး ဒီ ဇဝ်ဖြာ အီ ဟဲ့ ကွယ် ဘ့လာက် အုဝ် တီ။ ဆေ အာဝ် ပါယ် တီ ဇဝ်ဖြာ ဒီ ဘော ပျာတ့် ဝဲန် မဲ။”

22 ပီ ဘော ပါယ် မှဝ် မိူဝ်၊ အာယုဝ်ဆီယာ ယီ တူ စူ။ အန် ဘော ကာပ့လု ခြိုင် ပီ တာ အန်၊ ဟာဝ် ကာဂုဝ်း ဒီ အာနေခေါ။ အန် မိူဝ် တူ ထူမ် ဂြုဝ်း ဇဝ်ဖြာ ပီ ကာလာင် အာနေခေါ ဒီ အန်။ ဂေ ဘော လာယ် ကာဂုဝ်း ဒီ ခူပ် မိူင် မီကီတော။

23 ဂေ ဒါ ဆိုက် မိူင် အဲဂိုပ် ဘော ဘန့် အ ဘော လဝ့် ခုန်ဒီခမ် အာယုဝ်ဆီယာ။ ခုန်ဒီခမ် အာယုဝ်ဆီယာ ဘော ဝီ ကာလာင် ဒီ ဂေ ဒဲစေန့် အန် တဝ်း၊ “တဲး ဘေ ဒိုဝ်း ဟာဝ် အုဝ်။ အုဝ် ဟဲ့ ကာဒုး ဆဝ်၊ ဟဲ့ ဆဝ် ကာဆဝ်။” 24 ဂေ ဒဲစေန့် အန် ဘော ဒိုဝ်း လေး အန် ဒဲင် လက်လဝ် မ့ပြွင့် ပီ ပဝ့် အန်၊ ဝီ ဒါင် အန် ဒဲင် လက်လဝ် ပေါ အူ လှာင်။ ဂေ ဝီ ဒိုဝ်း ဝေန့် အန် ဒီ မိူင် ယေရူဆာလဲမ်။ အန် ဘော ယမ် ဒီ တီ။ ဟဲ့ ဟွတ့်၊ ဂေ ဘော ဒိပ် ဒုဝ် အန် ခဲင် ဘာရေဝ် ဒါ ဒါ အန်။ ဂေ ဒူအီ ခဲင် မိူင် ယူဒါ ဘော ဒူအီ ခဲင် မိူင် ယေရူဆာလဲမ် ဂေ ဘော ကာဖြူမ် ဒီ ယာမ် ကူပ် ဟဲ့ ယမ် အာယုဝ်ဆီယာ။

25 အာယေရေမီ မိူဝ် ဒဲမ် မှုဝ် ဂြုဝ်း ကာဘူယ် လွင် က့လိုဝ် ငှဝ် အာဒါ အာယုဝ်ဆီယာ တီ။ ဂေ အီ နပ် ဒီ တဝ်း မှုဝ်၊ ဘော အီဘိုန့် အီမာယ်၊ ဂေ မိူဝ် ကာလာင် လွင် အာယုဝ်ဆီယာ ခဲင် ကာဆမ် မှုဝ် ဂေ တီ၊ တဲး န့ ဘဲန် ထုင်ဂျာမ် ဒီ ဂေ ဒူအီ အီဆာရေလ ကော ဇမ် အာတိုဝ် နီ။ လွင် အန် တီ၊ န့ ဟဲ့ ဒဲမ် အုန် ခဲင် ဘပ် က့လိုဝ် ငှဝ်။

26 လွင် ပီ ဘူင် အာယုဝ်ဆီယာ အီ ညှမ် ဒွိုမ် ကာလာင် ဘော လွင် ပဲ့ ဟဲ့ ဘူင် အန် နာ ဆိူဝ် နာ မှာန်၊ ဟဲ့ ဒဲမ် အုန် ခဲင် ဘပ် ဒါရာ ဇဝ်ဖြာ။

27 ဘော လွင် ဆိန့် ကာစုး အန် ဒီ အိုပ် မာန် မိူင် ကော ဇမ် ကာဒဲ့၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် မိူင် အီဆာရေလ ဘော ခဲင် ဘပ် ခုန်ဒီခမ် မိူင် ယူဒါ။