1 ဂေ ဒူအီ ရဝ် ဒူအီ ကာင် ဘော ဝီ ကာဖြူမ် ဒီ ဒိုဝ်း ဂွန် အီမာယ် အာယုဝ်ဆီယာ အီ စိူဝ် အာယုဝ်ခတ် ဝီ ဖဝ်း နာမန် ဒီ ဂိန့် အန်၊ တဲး အန် ဝီ ဘဲန် ခုန်ဒီခမ် ပ့လု ဂုန့် အန်။ အန် ဝီ ကွယ် ခဲင် မိူင် ယေရူဆာလဲမ်။

2 အာယုဝ်ခတ် တီ ဒေါ ဘဲန် အန် ခုန်ဒီခမ်၊ အာဆာက် အန် ဟဲ့ နုဝ့် အာ ဂိုဝ် ဒီ အူယ် ဆီနမ်။ အန် ဘော အိုပ် မိူင် ဘော ကွယ် ခဲင် မိူင် ယေရူဆာလဲမ် အာဒါ အူယ် မာဂျီန်။ 3 ခုန်ဒီခမ် အီ အိုပ် မိူင် အဲဂိုပ် ဘော ဘ့လွာ့ စုဝ်း အန်၊ တူ တဲး အန် ပွိုန် ဒီ ဘဲန် ခုန်ဒီခမ် ခဲင် မိူင် ယေရူဆာလဲမ်။ အန် ဘော ဘ့လေး အာမိင် တဲး ဂေ ဒူအီ ခဲင် မိူင် တီ ဟပ် စိုင် ဒီ အန်။ ဂေ လုဝ် ဟပ် ရွိုန် အူ မာယဝ်း ထာလေန် ဘော ခြိဝ် အူ ထာလေန်။ 4 ခုန်ဒီခမ် မိူင် အဲဂိုပ် ဘော ဝီ ဒါင် အာအေလာခိမ် အီ မုး အီကတ် အာယုဝ်ခတ် တွိုန်၊ တဲး အန် ဝီ ဘဲန် ခုန်ဒီခမ် အီ အိုပ် ကာဒါယ် မိူင် ယူဒါ ဘော မိူင် ယေရူဆာလဲမ်။ အန် ဝီ ဒွါ စိူဝ် ကာမာယ် ဒီ အာအေလာခိမ်၊ ဝီ တဝ်း အာယောယာခိမ်။ ဟဲ့ ဟွတ့်၊ ခုန်ဒီခမ် အာနေခေါ အီ အိုပ် မိူင် အဲဂိုပ် ဘော ဒိုဝ်း အာယုဝ်ခတ် အီ မုး ဝါ အာယောယာခိမ်၊ တိုယ် ဟာဝ် အန် ဒီ မိူင် အဲဂိုပ်။

5 အာယောယာခိမ် ဟဲ့ ဘဲန် ခုန်ဒီခမ် ဒေါ အာဆာက် အန် ဟဲ့ ပွိုန် အာ ဂိုဝ် ဒီ ဖန် ဆီနမ်။ အန် ဘော အိုပ် မိူင် ဘော ကွယ် ခဲင် မိူင် ယေရူဆာလဲမ် အာဒါ ဂိုဝ် ဒီ အူ ဆီနမ်။ အန် ယီ ဘူင် အီ တူ မွှိုမ် ပီ တူ အိုင် ဇဝ်ဖြာ။ 6 ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ ဘော ယဲတ့် ဒါ ဆိုက် အန် တး ကာဂုဝ်း ဒီ အာယောယာခိမ်။ ဂေ ဘော ဒိုဝ်း ဝန် ဘွင့် ဒေန့် ပက် ဟာဝ် အာယောယာခိမ် ဒီ မိူင် ဘာဘဲ။ 7 အာနေဘူခတ်နေစာ ဟဲ့ ဒိုဝ်း ခြိုင် တာ အီ ကွယ် ခဲင် ဟုဝ် ဇဝ်ဖြာ၊ ဝီ ဟာဝ် အုန် ခဲင် ဟုဝ် ဇဝ် ပီ ကြိုပ် အန်။

8 လွင် ပဲ့ ဟဲ့ ဘူင် အာယောယာခိမ် အီ ညှမ် ဒွိုမ် ကာလာင်၊ ဘော မုး လွင် အီ မွှိုမ် ကာအိး၊ လွင် အီ တူ မွှိုမ် ပီ ဖျာက် အီ ဟဝ် ဒီ အန် ဒွန် မျုဝ်၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် အီဆာရေလ ဘော ခဲင် ဘပ် ခုန်ဒီခမ် ယူဒါ။ ဂွန် အီမာယ် အန် အီ စိူဝ် အာယေခေါနီ ဘော ဝီ ပ့လု အန် ဝီ အိုပ် ကာဒါယ် မိူင် ယူဒါ။

9 အာယေခေါနီ ဟဲ့ ဘဲန် ခုန်ဒီခမ် ဒေါ အာဆာက် အန် ဟဲ့ ပွိုန် ဂိုဝ် ဒီ ဒါ ဆီနမ်။ အန် ဘော အိုပ် ခဲင် မိူင် ယေရူဆာလဲမ် အာဒါ အူယ် မာဂျီန် ဒီ ဂိုဝ် ဆီငဲ။ အန် ယီ ဘူင် အီ တူ မွှိုမ် ပီ တူ အိုင် ဇဝ်ဖြာ။ 10 ဒေါ ဝီ ဇမ် အာခြာဝ် ဒီယာင်၊ ခုန်ဒီခမ် အာနေဘူခတ်နေစာ ဘော စ်ု အီ တး ဒဲ့ အာယေခေါနီ၊ ဒိုဝ်း ဟာဝ် ဘော ကြုဝ်ကြာမ် ဘော ခြိုင် တာ အီ မိုဝ်း ဒီငဝ်း ဒီခန် အီ ကွယ် ခဲင် ဟုဝ် ဇဝ်ဖြာ၊ ဝီ ဟာဝ် အုန် ခဲင် မိူင် ဘာဘဲ။ အန် ဘော ဝီ ဒါင် ဂုန့် တဲ့ အာယေခေါနီ အီ စိူဝ် အာဇေဒေကီ၊ တဲး အန် ဝီ ဘဲန် ခုန်ဒီခမ် ဝီ အိုပ် ကာဒါယ် မိူင် ယူဒါ ဘော မိူင် ယေရူဆာလဲမ်။

11 အာဇေဒေကီ ဟဲ့ ဘဲန် ခုန်ဒီခမ် ဒေါ အာဆာက် အန် ဟဲ့ နုဝ့် အာ ဂိုဝ် ဒီ အူ ဆီနမ်။ အန် ဘော အိုပ် မိူင် ဘော ကွယ် ခဲင် မိူင် ယေရူဆာလဲမ် အာဒါ ဂိုဝ် ဒီ အူ ဆီနမ်။ 12 အန် ယီ ဘူင် မိူက်၊ ဘူင် ပီ တူ အိုင် ဇဝ်ဖြာ အီ မုး ဇဝ်ဖြာ ပီ ကြိုပ် အန်။ အန် မိူဝ် တူ ခမ် ဒီ ဂူမ် ဒီ ယူမ် ဒီ ဒူအီ အီ ဘျာန် ဂြုဝ်း ဇဝ်ဖြာ အီ စိူဝ် အာယေရေမီ အီ ဟဲ့ ကာလာင် ခဲ့ ပီ စ်ု ဇဝ်ဖြာ အန် ကာလာင်။

13 ဝါယ် အန် တီ အာဇေဒေကီ ဘော ဝီ ကာဘး ဒီ ခုန်ဒီခမ် အာနေဘူခတ်နေစာ အီ ဟဲ့ တဲး အန် ကာဆဲန့် ဒိူင် ဒီ ဇဝ်ဖြာ အီ မုး ဇဝ်ဖြာ ပီ ကြိုပ် အန် တဝ်း၊ အန် ဒီ ဘူင် နာ မုး နာ မှာန်။ အန် ဝီ ပီဒိူဝ် နဝ်း အန်၊ တူ ဝီ ဒူပ် ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ။ 14 ဒဲင် တီ ဘော ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒူအီ ဘော ရဝ် ဘော မိူင် မိူဝ် အာဝ် ဟူ မိုဝ်း နဝ်း ဆိူဝ် နဝ်း မှာန် ဒီ ဇဝ်ဖြာ။ ဂေ ဝီ ဘူင် အီ မွှိုမ် ကာအိး ပီ ဒူအီ အာမျုဝ် ဟဝ်။ ဂေ မိူဝ် ဝီ ဘူင် တဲး ဟုဝ် ဇဝ်ဖြာ ကာဒါတ့်။ ဇဝ်ဖြာ ယီ ဟဲ့ ဘူင် တဲး ဟုဝ် အီ ကွယ် ခဲင် မိူင် ယေရူဆာလဲမ် ဆီငါ ဘွတ်။

15 ဇဝ်ဖြာ အီ မုး ဇဝ်ဖြာ ပီ ကြိုပ် ဂုန့် ဒင် ဂေ ဒူအီ အီဆာရေလ၊ ကူပ် ရွက့် ကာဝေ အန် ဇဝ် ဒီ ဂေ ဒူအီ ပီ အိုပ် အန် ဘော ရွက့် ဒူင် ဆီငါ ဘွတ် အီ မုး ဒူင် ကွယ် အန်၊ အန် ဝီ တိုယ် အာမူ အာမာတ် အန် ဟာဝ် ဒူင် ကွယ် ဂေ ဘဲန် ဇေန့် ဘဲန် ဇေန့်။ 16 မာလဲ၊ ဂေ ယီ ဝီ ပီ ဝါညာက် ဘော ကာညး အာမူ အာမာတ် ဇဝ်ဖြာ ဂေ တီ။ ဂေ ဝီ နဲန ဂြုဝ်း ဇဝ်ဖြာ ဘော အေး ဂေ ဒါ အီ ဘျာန် ဂြုဝ်း ဇဝ်ဖြာ။ ပါယ် တီ ဇဝ်ဖြာ ကော ရူ ကာဆဝ် ဒီ ဂေ ဒူအီ ပီ အိုပ် အန်၊ အာဝ် မိုဝ်း ပီ ဒီ ပါယ် တဲး န့ ယေန်။

17 ခုဝ် အန် တီ ဇဝ်ဖြာ ဝီ တဲး ခုန်ဒီခမ် မိူင် ဘာဘဲ ယဲတ့် ဒါ ဆိုက် အန် တး ဒူင် ကွယ် ဂေ။ ဂေ ဘော တာ မာပွါ့ လာင် ဂေ၊ ငဝ်း ဝဲန် ဂေ အီမာယ် အီ ဆီ နှိုမ် ခဲင် ဒူင် ဆီငါ ဘွတ်။ ဂေ မိူဝ် တူ ကာဝေ အာဆေ၊ ဘော မုး ကာညူမ် ဒီဘျာ၊ ဘော မုး ဒူအီ ကတ်၊ အာဆာက် အီ ဟဲ့ ကိူန် ကာဆဝ်၊ ဇဝ်ဖြာ အာပ် တူတ့် ဂေ ဘောကာဂ့လျီတ် ဒီ ခုန်ဒီခမ် အာနေဘူခတ်နေစာ။ 18 အန် ဒိုဝ်း ဟာဝ် ဘော ခြိုင် တာ အီ ကွယ် ခဲင် ဟုဝ် ဇဝ်ဖြာ ဘော အီ တျီ့ အီ တာင်။ အန် ဒိုဝ်း ဘော ကြုဝ်ကြာမ် အီ မိုဝ်း ဒီငဝ်း ဒီခန် ပဲ့ ဟဲ့ ဂဲပ် ကာဇု အုန် ဂေ ခဲင် ဟုဝ် ဇဝ်ဖြာ ဘော အီ ကွယ် ခဲင် ဟုဝ် ခုန်ဒီခမ် ဘော ခဲင် ကာင် ဂေ အာမူ အာမာတ် အန်၊ အန် ဒိုဝ်း ဟာဝ် တူတ့် ဒီ မိူင် ဘာဘဲ။ 19 ဂေ မိူဝ် ဒုဝ့် ကာဆိုမ် ဟုဝ် ဇဝ်ဖြာ ဘော ပျာတ့် ဝဲန် ရဲင် မိူင် ယေရူဆာလဲမ်။ ခဲ့ ကွယ် ဟုဝ် ခုန်ဒီခမ် ဒွန် ကာတု ဂေ မိူဝ် ဟဲ့ ဟွတ့် ဒုဝ့် ကာဆိုမ် တူတ့်။ ဂေ ပျာတ့် ဝဲန် ဘော ကြုဝ် အီ ဘွတ် အီ မွှိုမ် ဒွန် မျုဝ်။

20 အန် ဝီ မှေတ့် ဒူအီ အီ ဟဲ့ လွတ် ယမ် ဒီ မာပွါ့ လာင်၊ ဝီ တိုယ် ဟာဝ် ဂေ ခဲင် မိူင် ဘာဘဲ။ ဒူအီ ဂေ တီ ဘော ကာဒုး ဒီ ဘဲန် မှာယ် အန် ဘော မှာယ် ဂွန် အန်။ ဂေ ဘော ကွယ် ဒူင် တီ၊ တဲး န့ ကော ဝီ ဇမ် ဒေါ ဝီ အိုပ် ဒူအီ မိူင် ဘီရာဆီ ဒီ မိူင် ဘာဘဲ။ 21 ဂြုဝ်း ဇဝ်ဖြာ ပီ ကာလာင် ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာယေရေမီ ဟဲ့ ဟွတ့် ဇေ့ဇုင် တူတ့်။ အန် ဟဲ့ တဝ်း၊ မာန် မိူင် ဒူအီ အီဆာရေလ ဒီ ကာပျာတ့် လိုဝ် အာဒါ ဘူ ဂိုဝ် ဆီနမ်။ အာခြာဝ် ဒေါ အန် တီ ကာဒါယ် ခဲင် မိူင် တီ အာဝ် မိုဝ်း အီ ရန့် မာဆေ။ န့ တဲး ကာဒါယ် ပွိုန် ဒီ ဒီလှဝ် ပီ ဒူအီ ဒီလှဝ် ဆီငဲ ဒီလှဝ်။

22 ခုန်ဒီခမ် အာဆာယ်ရတ် မုး ခုန်ဒီခမ် အီ အိုပ် မိူင် ဘီရာဆီ။ ဆီနမ် ဒေါ ဂုဝ် ဒေါ ဝီ အိုပ် အန် မိူင် ဘာဘဲ ဂြုဝ်း ဇဝ်ဖြာ ပီ ကာလာင် ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာယေရေမီ ဟဲ့ ဟွတ့် ဇေ့ဇုင် တူတ့်။ ဇဝ်ဖြာ ဝီ ကာဆုး နဝ်း ခုန်ဒီခမ် အာဆာယ်ရတ် မိုဝ်း နဝ်း ဆီ စွယ် ဒူအီ အီဆာရေလ။ အန် ဝီ ဒဲမ် ပဲ့၊ တဲး ဂေ ဒဲ့ ကာလာင် ခဲင် မာန် မိူင် ပီ အိုပ် အန် ဒွန် နာ ဒွန် ပ့လုဝ့်။

23 အန် တဝ်း၊ “အာဆာယ်ရတ် အီ မုး ခုန်ဒီခမ် အီ အိုပ် မိူင် ဘီရာဆီ ဟဲ့ ဘ့လေး အာမိင် တဝ်း၊ ဇဝ်ဖြာ အီ မုး ဇဝ်ဖြာ အီ အိုပ် ဂါင်ဟြာဝ်၊ အန် ဟဲ့ ဒိုဝ်း မာန် မိူင် အီ ကွယ် ဒဲင် ကာဒါယ် နီ ဘောကာဂ့လျီတ်၊ အာပ် ဒွါ ဒီ အုဝ်။ အန် ဇဝ် မိူဝ် ဟဲ့ ကာလာင် အုန် လွင် လုဝ် အုဝ် ဆမ် ဟုဝ် အာဒါ အန် ဇဝ် ခဲင် မိူင် ယေရူဆာလဲမ် အီ ကွယ် ခဲင် ကာဒါယ် မိူင် ယူဒါ။ အာဆေ မုး ဒူအီ ပီ အိုပ် အန် ဇဝ် အီ ကွယ် ကာတဲ ဘေ၊ တဲး ဂေ ဝီ ဝေန့် ခဲင် မိူင် ယေရူဆာလဲမ်၊ တဲး ဇဝ်ဖြာ ပီ ကြိုပ် ဂေ မိူဝ် ကွယ် ရိုမ် ဒူပ် ဂေ။”