1 ပါယ် တီ ခုန်ဒီခမ် တာင် အာတာရိတ် ဘော ဝီ စ်ု ဂေ ဝီ ဟြေတ့် ပဲ့ ဖိူန် ပီ ဒဲမ် အုန် ဂေ ခဲင် မိူင် ဘာဘဲ တွိုန်။ 2 ဂေ ဘော ဝီ ယိုဝ် ဘပ် အူ ဖိူန် ခဲင် ဒူင် အီ စိူဝ် အက်ဘာထာ အီ ကွယ် ခဲင် မိူင် မေဒီ။ ဂြုဝ်း ပီ ဒဲမ် ခဲင် ဘပ် တီ၊ န့ တဝ်း၊ “တဲး အီ နုဝ် ဆေဆေ။

3 ခုန်ဒီခမ် တာင် အာဆာယ်ရတ် ဟဲ့ အိုပ် မိူင် အာဒါ အူ ဆီနမ်။ ဒေါ အန် တီ အန် ဟဲ့ ဒွါ အာမိင် လွင် ဟုဝ် ဇဝ်ဖြာ အီ ကွယ် ခဲင် မိူင် ယေရူဆာလဲမ်။ န့ တဝ်း၊ တဲး ဂေ ဝီ ဆမ် ဟုဝ် ဇဝ်ဖြာ၊ တဲး ဂေ ဒူအီ ဝီ ပွိုန် ဒီ ဝီ လှူ မျုဝ် ပီ ဒီ လုဝ် လှူ ဂေ ဘော ပီ ဒီ လှူ အီ ဒုဝ့် ဒီ ငဝ်။ တဲး ဂေ ဝီ ဆမ် စေန့် ရွင့်။ တဲး ဂေ ဘူင် နာ စာ ဟုဝ် ဇဝ်ဖြာ တီ ဒဝ် ဂိုဝ် ကာနိး၊ နာ တာင် အန် ဒဝ် ဂိုဝ် ကာနိး။ 4 တဲး ဘေ ဒိုဝ်း မာဝ် တာင် အာဒါ အူယ် ထာပ်။ ဟဲ့ ဟွတ့်၊ တဲး ဂေ ဂုဝ် အူ ထာပ် တာ ဟေ။ ငဝ်း စာရိ စာခ တဲး ဘေ ဒိုဝ်း ခဲင် ဇီဒိူက် ခုန်ဒီခမ်။ 5 န့ ဘော မုး ခြိုင် ရွိုန် ဂေ ခြိုင် ခြိဝ် အီ ဟဲ့ ဒွိုမ် ကွယ် ခဲင် ဟုဝ် ဇဝ်ဖြာ ဒီ မိူင် ယေရူဆာလဲမ် တီ ပဲ့ ဟဲ့ ဒိုဝ်း ဟာဝ် ခုန်ဒီခမ် အာနေဘူခတ်နေစာ ဒီ မိူင် ဘာဘဲ၊ ဝီ တး အုန် ခဲင် ဟုဝ် ဇဝ် ပီ ကြိုပ် ဂေ ခဲင် မိူင် ဘာဘဲ။ တဲး ဘေ ဝီ ဒိုဝ်း ဝေန့် ခြိုင် ဂေ တီ၊ ဝီ ဘ့လေး အုန် ခဲင် ဟုဝ် ဇဝ်ဖြာ ခဲင် မိူင် ယေရူဆာလဲမ်။”

6 ကူပ် န့ ပါယ် တီ ခုန်ဒီခမ် အာတာရိတ် ဝီ ဒဲမ် ပဲ့ တဝ်း၊ “အုဝ် တိုယ် ပဲ့ အာမိင် ဒီ မဲ ဒါ ကာညာ အာတာတနေ အီ အိုပ် မိူင် ဘ့လာက် နာ ဂေတ့် ဆီငဲ အိုမ် ဘ့လဲင် အူဖာရာတ်၊ ဘော ဒီ မဲ အာဆေဆာပေါစာနေ ဘော ဒီ ဘေ အီ ဘူင် ရိုမ် ဂါန် ဒူပ် ဘာယ်။ လွင် ဒီ ဝီ ဆမ် ဟုဝ် ဇဝ်ဖြာ တီ၊ န့ တူ မုး အာရေ ဘေ။ 7 အာဝ် လုဝ် ပျာတ့်၊ အာဝ် လုဝ် ခြဲ ဂါန် ဂေ တီ။ တဲး ဂေ ဒါ ကာညာ အီ အိုပ် ဒူအီ အာယူဒါ ဘော ဒါ တာင် ဂေ ဒူအီ အာယူဒါ ဝီ ဒဲ ဝီ ဆမ် ဟုဝ် ဇဝ်ဖြာ ဒဲင် ဒူင် ကွယ် ဘြိမ် အန်။

8 ဒဲင် တီ၊ အုဝ် ဝီ ဒွါ အာမိင် ဒီ ဘေ၊ တဲး ဘော ဘေ စွယ် ဂေ ဘူင်။ ဘေ ဟဲ့ ဂဲပ် ရွိုန် စိုင် ဂေ ခွန် ခဲင် မိူင် အီ ကွယ် ဘ့လာက် နာ ဂေတ့် ဆီငဲ အိုမ် ဘ့လဲင် အူဖာရာတ် တီ။ ဘေ လုဝ် ဒိုဝ်း ခဲင် ရွိုန် တီ၊ ဝီ ဒွါ ဒီ ဂေ ဒူအီ အီ ဆမ် ဟုဝ် ဇဝ်ဖြာ တီ၊ တဲး န့ ဘဲန် စာရိ စာခ ဘော ရုး ရန့် ဂေ၊ ကွဲ့ တဲး ဂါန် တီ ဂိူတ်၊ တဲး န့ စေဝ် ဟွတ့်။ 9 ဆေ ဂေ ဘော မိုဝ်း ပီ ဒီ လုဝ် ခြိုင် တာ ဒွန် မျုဝ်၊ ဘော မုး မက် အာလူင့်၊ မာဘူ အာလူင့်၊ ဘော မုး ဂွန် မာဘူ ဘော ဂွန် မက် အာဒါ ပီ ဒီ လုဝ် ဒုဝ့် ခဲင် ငဝ် ဘော လှူ ဒီ ဇဝ်ဖြာ အီ အိုပ် ဂါင်ဟြာဝ်၊ ဘော မုး ဒီဂါဝ်၊ ဆယ့်၊ အိုမ် မာငုန် ဘော နာမန်၊ တဲး ဘေ ဒွါ ဒွန် ဆီငဲ ခဲ့ ပီ လုဝ် ဂေ ဒါ အီ လှူ ဒီ ဇဝ်ဖြာ အီ ကွယ် ခဲင် မိူင် ယေရူဆာလဲမ် တီ။ ကွဲ့ တဲး ဘေ လုတ်။ 10 ပါယ် တီ ဂေ ဒူအီ အီ လှူ ဒီ ဇဝ်ဖြာ၊ ဂေ လုဝ် လှူ အီ လဝ့် နဝ်း ဇဝ်ဖြာ အီ အိုပ် ဂါင်ဟြာဝ်။ ဂေ ဘော လုဝ် ဆာခိုဝ် မှာန့်၊ တဲး အန် ဇဝ် မွင့်ကာရာ ဒွါ နာ ဘွတ် နာ မွှိုမ် ဘော ဒီ အုဝ် ဘော ဒီ ဂေ ဂွန် အုဝ် ဘောကာဂ့လျီတ်။

11 အုဝ် ပီ ဝီ ဒွါ အာမိင် ပေါ အူ မျုဝ်။ ဆေ န့ မိုဝ်း ဒူအီ အီ တူ ထူမ် အာမိင် အုဝ် နီ၊ တဲး ဘေ ဒိုဝ်း လေး မာနက် ကာင် အန်၊ ဝီ ဆမ်၊ တဲး န့ ဘဲန် ဒူင် ဒီ ပက် ဟွယ် မဲင် အန်။ ကာင် အန် မိူဝ်၊ တဲး ဘေ ပျာတ့် ဝဲန် တူတ့်။ 12 ဆေ န့ မိုဝ်း ဒူအီ အီ ကာဘး ဒီ အာမိင် အုဝ် တီ၊ ဘော မုး ခုန်ဒီခမ်၊ ဘော မုး ဒူအီ ဟဝ်၊ ဆေ ဂေ ဘော ခြာမ် ဒီ ဘူင် တဲး ဟုဝ် ဇဝ်ဖြာ တီ လိုဝ်၊ အုဝ် မှာန့် တဲး ဇဝ်ဖြာ ဝဲန် ဒူအီ ဇိုဝ် တီ။ ဇဝ်ဖြာ ဟဲ့ ရဝ်း ဒူင် တီ၊ တဲး န့ ဘဲန် ဒူင် ကွယ် အန်။ အုဝ် အီ မုး ခုန်ဒီခမ် အာတာရိတ်၊ အုဝ် ဟဲ့ ဒွါ အာမိင် ဂေ တီ၊ တဲး ဘေ အွန် ဒီ ဘူင် ဒူပ် ဆီချာ။” ခဲ့ တီ ပဲ့ ပီ ဒဲမ် ခုန်ဒီခမ် အာတာရိတ်။

13 ဝါယ် အန် တီ ဒါ ကာညာ တာင် အီ စိူဝ် အာတာတနေ ဘော အာဆေဆာပေါစာနေ ဘော ဂေ ဒါ တာင် အီ ဘူင် ရိုမ် ဂါန် ဒူပ် ဂါယ်၊ ဂေ ဘော အွန် ဒီ ဘူင် ဒူပ် အာမိင် ပီ ဒွါ ခုန်ဒီခမ် တာင် ဂေ တီ။ 14 ဂေ အီ မုး ဒါ တာင် အီ အိုပ် အီ ယဲတ့် ဂေ ဒူအီ အာယူဒါ မိူဝ်၊ ဂေ ဘူင် တဲး ဟုဝ် ဇဝ်ဖြာ တီ ကော ဟွတ့်။ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဟက်ကာယ် ဂါယ် အာဆာခါရာ အီ မုး ဂွန် အာအီတော၊ ဂါယ် ဘော မာနုဝ် ဂေ ဒူအီ အီဆာရေလ၊ တဲး ဂေ မိုဝ်း ပ့လူမ် မိုဝ်း ဟဲန့်။ ဂေ မိူဝ် ဘူင် တဲး န့ ကော ဟွတ့်၊ တဲး န့ ဘော ဒူပ် ခဲ့ ပီ ကာလာင် ဇဝ်ဖြာ ပီ ကြိုပ် ဒူအီ အီဆာရေလ၊ တဲး န့ ဘော ဒူပ် ခဲ့ ပီ ဒမ် အုန် ခုန်ဒီခမ် တာင် အီ စိူဝ် အာဆာယ်ရတ် ဘော ခဲ့ ပီ ဒမ် အုန် ခုန်ဒီခမ် အာတာရိတ် ဂါယ် ခုန်ဒီခမ် အာဒါစေရိတ် အီ အိုပ် မိူင် ဘီရာဆီ။ 15 ဒေါ ဟဲ့ အိုပ် ခုန်ဒီခမ် အာတာရိတ် မိူင် အန် အာဒါ ဒဝ် ဆီနမ်၊ ဒေါ ဇမ် မာဂျီန် အတ်တာ၊ ဆီငဲ ဟာအူယ်၊ ဂေ မိူဝ် ဟဲ့ ဟွတ့် ဘူင် ဟုဝ် ဇဝ်ဖြာ တီ။

16 ပန် တီ ခဲ့ ကွယ် ဂေ ဒူအီ အီဆာရေလ ဘော မုး ဒါ အီ လှူ ဒီ ဇဝ်ဖြာ၊ ဘော မုး ဒူအီ ခဲင် ခြိုဝ် အာလေဝီ၊ ဂေ ဒူအီ အီ ဟဲ့ ဝီ တး ဇမ် မိူင် ယေရူဆာလဲမ်၊ ဂေ ဘော ဝီ ဘူင် ဘ့လွယ် လှူ ဟုဝ် ဇဝ်ဖြာ တီ။ ဂေ မိူဝ် ခူယ် ကာဆဝ်။ 17 ဘ့လွယ် လှူ ဂေ ဒီ ဟုဝ် ဇဝ်ဖြာ တီ၊ ဂေ ဘော ဒိုဝ်း လှူ မက် အာလူင့် အူ မာယဝ်း ဒုဝ်၊ မာဘူ အာလူင့် အာ မာယဝ်း ဒုဝ်၊ ဘော ဂွန် မာဘူ ဖွုန် မာယဝ်း ဒုဝ်။ ဂေ ဘော ဒိုဝ်း ဘော မာပဲ ဂိုဝ် ဒီ အာ ဒုဝ်၊ တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ် ဂေ ဒူအီ အီဆာရေလ ဂိုဝ် ဒီ အာ ခြိုဝ်၊ ဂေ လှူ အူ ခြိုဝ် အူ ဒုဝ်။ 18 ဂေ ဘော ဝီ ဒါင် ဒါ အီ လှူ ဒီ ဇဝ်ဖြာ တဲး ဒွန် အီ ကွယ် ခဲင် ဖိုင် အန်။ ဂေ ဒူအီ ခဲင် ခြိုဝ် အာလေဝီ မိူဝ် ဘော ကွယ် ဒွန် အီ ခဲင် ဖိုင် အန်၊ တဲး ဂေ ဘူင် ဂါန် ဇဝ်ဖြာ ခဲင် မိူင် ယေရူဆာလဲမ် တီ၊ တဲး န့ ဘော ဒူပ် ပီ ဒဲမ် အုန် အာမုဝ်ဆဲ ခဲင် ဘပ် ဇဝ်ဖြာ။

19 ဒေါ ဇမ် မာဂျီန် ဒေါ ဂုဝ်၊ ဆီငဲ ဂိုဝ် ဒီ မ့ဖွုန်၊ ဂေ ဒူအီ အီ ဟဲ့ ဝီ တး ခဲင် မိူင် ဂေ၊ ဂေ ဘော ဘူင် ဘ့လွယ် လှုဝ်း ဂေ ဇဝ်ဖြာ ဒေါ ကာလုဝ်း အန် ကာင် ဂေ။ 20 ဂေ ဒါ အီ လှူ ဒီ ဇဝ်ဖြာ ဘော ဒူအီ ခဲင် ခြိုဝ် အာလေဝီ၊ ဂေ မိူဝ် ဘူင် တဲး ဂေ ဆီငါ ဒွန် အီ၊ တဲး န့ ဒူပ် ပီ ဒမ် ဒါရာ။ ဂေ ဒူအီ ခဲင် ခြိုဝ် အာလေဝီ တွိုန်၊ ဂေ ဘော ငဝ်း ဂွန် မာဘူ အာဒါ ဂေ ဒူအီ အီ ဟဲ့ ဝီ တး ဇမ် ခဲင် မိူင် ဂေ ဘော အာဒါ ဂေ ဒါ အီ လှူ ဒီ ဇဝ်ဖြာ ဘော အာဒါ ဒုဝ် ဘြိမ် ဂေ။ 21 ခဲ့ ကွယ် ဂေ ဒူအီ အီဆာရေလ အီ ဟဲ့ ဝီ တး၊ ဘော ဂေ အီ ဟဲ့ ဝဲန် အီ တူ မွှိုမ် ပဲ့ ဟဲ့ ဘူင် ဂေ ဒူပ် ဒူအီ အာမျုဝ် ဟဝ် အီ ကွယ် ခဲင် မိူင် ဂေ တီ၊ ဂေ ဘောကာဂ့လျီတ် ဟဲ့ ဝီ တး ကြိုပ် တူတ့် ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။ 22 ဂေ မိူဝ် ဘူင် ဘ့လွယ် ဟူမ် ခါမုန် အီ တူ ဟပ် ဆီနမ် ဘြး အာဒါ ဘူ ဆီငဲ။ ဂေ မိူဝ် ဟဲ့ ခူယ် ဒါခိုယ် ကာဆဝ်။ ဂေ ခူယ် ဒါခိုယ် ကူပ် ဟဲ့ ဘူင် ဇဝ်ဖြာ တဲး ခုန်ဒီခမ် တာင် အီ အိုပ် မိူင် အာဆူရာ ဖြူမ် ဘ့လာက် ဂေ ဘော စွယ် တဲး ဂေ ပွိုန် ဒီ ဆမ် ဟွတ့် ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။