1 ဝါယ် အန် တီ ဒေါ ဟဲ့ အိုပ် ခုန်ဒီခမ် အာတာစေရိတ် ဒီ မိူင် ဘီရာဆီ၊ န့ ဘော မိုဝ်း ဒါ အီ လှူ ဒီ ဇဝ်ဖြာ အူ ဝီ၊ အန် စိူဝ် အာဇာရီယာ။ ဂုန့် ဒင် အန် ဘော မုး ဒါ အီ လှူ ဒီ ဇဝ်ဖြာ အီ စိူဝ် အာရူန် တွိုန်။ အာအေဆာရာ ဘော မုး ဂွန် အာဆေရာယာ။ အာဆေရာယာ ဘော မုး ဂွန် အာဇာရီယာ။ အာဇာရီယာ ဘော မုး ဂွန် အာဟီလာခီ။ 2 အာဟီလာခီ ဘော မုး ဂွန် အာဆာလူမ်။ အာဆာလူမ် ဘော မုး ဂွန် အာဇာဒူက်။ 3 အာဇာဒူက် ဘော မုး ဂွန် အာဟီတူပ်။ အာဟီတူပ် ဘော မုး ဂွန် အာမာရီယာ။ အာမာရီယာ ဘော မုး ဂွန် အာဇာရီယာ ပေါ အူ ဝီ။ အာဇာရီယာ တီ ဘော မုး ဂွန် အာမာရာယုတ်။ 4 အာမာရာယုတ် ဘော မုး ဂွန် အာစေရာဟီ။ အာစေရာဟီ ဘော မုး ဂွန် အာအောစီ။ အာအောစီ ဘော မုး ဂွန် အာဘူကီ။ 5 အာဘူကီ ဘော မုး ဂွန် အာဖီဆူ။ အာဖီဆူ ဘော မုး ဂွန် အာဖီနေဟာတ်၊ အာဖီနေဟာတ် ဘော မုး ဂွန် အာလေအာဆာ။ အာလေအာဆာ ဘော မုး ဂွန် ဒါ တာင် အီ လှူ ဒီ ဇဝ်ဖြာ အီ စိူဝ် အာရူန်။ 6 အာအေဆာရာ တီ ဟဲ့ လေး ခဲင် မိူင် ဘာဘဲ၊ တး ဇမ် မိူင် ယေရူဆာလဲမ်။ အန် ဘော မုး ဒါ ဆာရာ အီ နပ် ဆီချာ ဒါရာ ပီ ဒမ် အုန် ဇဝ်ဖြာ ဒီ ဂေ ဒူအီ အီဆာရေလ။ န့ မုး ဒါရာ ပီ ဒဲမ် အုန် အာမုဝ်ဆဲ တွိုန်။ ဇဝ်ဖြာ ပီ ကြိုပ် အာအေဆာရာ မိူဝ် ကွယ် ရိုမ် ဒူပ် အန် ဆေဆေ။ ခုဝ်၊ ခဲ့ ပီ မှာန့် အန် ဒီ ခုန်ဒီခမ်၊ ခုန်ဒီခမ် ဟဲ့ ဒွါ တူတ့် ဒွန် မျုဝ်။ 7 ဒေါ ဟဲ့ အိုပ် ခုန်ဒီခမ် အာတာစေရိတ် မာန် မိူင် အန် အာဒါ ဘူ ဆီနမ်၊ န့ ဘော မိုဝ်း ဂေ ဒူအီ အီဆာရေလ အူ ဖိုင် အီ မုး ဒါ အီ လှူ ဒီ ဇဝ်ဖြာ ဘော ဒူအီ အာမျုဝ် အာလေဝီ၊ ဂေ အီ နပ် ဒီ တဝ်း မှုဝ်၊ ဂေ ဒူအီ အီ ဘ်ု မာလုဝ်း ဒီ ဟုဝ် ဇဝ်ဖြာ ဘော ဂေ အီ ဘူင် ဂါန် ခဲင် ဟုဝ် ဇဝ်ဖြာ၊ ဂေ ဘောကာဂ့လျီတ် ဟဲ့ ဒူပ် အာအေဆာရာ လေး ခဲင် မိူင် ဘာဘဲ၊ ဝီ ဟာဝ် ဒီ မိူင် ယေရူဆာလဲမ်။

8 ဒေါ လေး ဂေ ခဲင် မိူင် ဘာဘဲ တွိုန်၊ န့ မုး မာဂျီန် ဒေါ ဂုဝ်၊ ဆီငဲ ဒေါ ဂုဝ်။ 9 ဂေ ဘော ဝီ တး ဇမ် ဒီ မိူင် ယေရူဆာလဲမ် ဒေါ ဇမ် မာဂျီန် မ့ဖန်၊ ဆီငဲ လှေး။ ဇဝ်ဖြာ ဟဲ့ စွယ် ဂေ။ ခုဝ်၊ ဂေ ဟဲ့ ဇမ် ဆီချာ။ 10 အာအေဆာရာ တီ ဘော မုး ဒူအီ အီ ဟဲ့ အွန် ဒီ ဟေန်၊ တဲး အန် နပ် ဆီချာ ဒါရာ ဇဝ်ဖြာ ဘော တဲး အန် ဝီ ပွိုန် ဒီ ဒူပ်။ အန် ဘော အွန် ဒီ ဒိုဝ်း ဒါရာ တီ ဘော ပီ ဒမ် အုန် ဇဝ်ဖြာ ဘဲန် မျုဝ် ဘဲန် မျုဝ်၊ ဝီ မာနုဝ် ဂေ ဒူအီ အီဆာရေလ။

11 ဒေါ လေး အာအေဆာရာ ခဲင် မိူင် ဘာဘဲ တွိုန်၊ ခုန်ဒီခမ် အာတာစေရိတ် ဟဲ့ ဒွါ ပဲ့ ဒီ အာအေဆာရာ အီ မုး ဒါ အီ လှူ ဒီ ဇဝ်ဖြာ အီ နပ် ဆီချာ ဘော ဒါရာ ဇဝ်ဖြာ ဘော ပီ ဒမ် အုန် ဇဝ်ဖြာ ဒီ ဂေ ဒူအီ အီဆာရေလ ဘဲန် မျုဝ် ဘဲန် မျုဝ်။

12 ပဲ့ ဟဲ့ ဒဲမ် ခုန်ဒီခမ် တီ၊ န့ ဟဲ့ ဝီ ထုတ် လေး ပါယ် နီ။ န့ တဝ်း၊ “အုဝ် အီ မုး ခုန်ဒီခမ် တာင် အာတာစေရိတ်၊ အုဝ် မိုဝ်း ပဲ့ နီ၊ ဒွါ ဒီ မဲ အီ မုး ဒါ အီ လှူ ဒီ ဇဝ်ဖြာ။ မဲ ဘော မုး ဒါ ဆာရာ အီ မာနုဝ် ဒါရာ ဇဝ်ဖြာ အီ မုး ဇဝ်ဖြာ အီ အိုပ် ဂါင်ဟြာဝ်။ တဲး မဲ ဂတ် ယေန် ဂျာမ်ဆာ။

13 အုဝ် ဟဲ့ ဒွါ အာမိင် ပါယ် နီ။ ဂေ ဒူအီ အီဆာရေလ ဘောကာဂ့လျီတ် ဘော ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ အာမျုဝ် အာလေဝီ အီ ကွယ် ခဲင် မာန် မိူင် ပီ အိုပ် အုဝ် နီ၊ ဆေ ဂေ ကော မိုဝ်း နဝ်း ဆီ ဝေန့် ကွယ် ခဲင် မိူင် ယေရူဆာလဲမ်၊ တဲး ဂေ ဝေန့် ဒူပ် မဲ။ 14 ဘော အုဝ် ဘော ဂေ ဘူ ဝီ အီ ဒွါ အာကျာမ် အာငျာန် ဒီ အုဝ်၊ ယေ ဟဲ့ ခ့ဝါင် တဲး မဲ ဝေန့်၊ တဲး မဲ ဝီ ယွတ် ဘော ဂေ ဒူအီ ခဲင် မိူင် ယူဒါ ဘော ဂေ ဒူအီ ခဲင် မိူင် ယေရူဆာလဲမ်၊ ယုဝ် ဂေ ဟဲ့ ဒူပ် တူ ဒူပ် ဒါရာ ဇဝ်ဖြာ အီ မုး ဒါရာ ပဲ့ ဟဲ့ အာပ် အန် ဇဝ် ဒီ မဲ။ 15 ဒဲင် တီ၊ မဲ လုဝ် ဒိုဝ်း ဟာဝ် ဘော ကြုဝ် အီ မုး ခြိုင် ရွိုန် ဂေ ခြိဝ် ပဲ့ ဟဲ့ လှူ အုဝ် ဘော ဂေ အီ ဒွါ အာကျာမ် အာငျာန် ဒီ အုဝ်။ ယေ ဟဲ့ မိုဝ်း နဝ်း ဆီ လှူ ဒီ ဇဝ်ဖြာ ပီ ကြိုပ် ဘေ ဒူအီ အီဆာရေလ၊ အီ မိုဝ်း ဟုဝ် အန် ခဲင် မိူင် ယေရူဆာလဲမ် တီ။ 16 ဘော ကြုဝ် ဘော ရွိုန် ဂေ ခြိဝ် ပဲ့ ဟဲ့ ပွိုန် မဲ ခဲင် မိူင် ဘာဘဲ အီ မုး ပဲ့ ဟဲ့ လှူ ဂေ ဒူအီ အီဆာရေလ ဘော ပဲ့ ဟဲ့ လှူ ဂေ ဒါ အီ လှူ ဒီ ဇဝ်ဖြာ၊ မဲ လုဝ် ဒိုဝ်း ဟာဝ် တူတ့်။ ဂေ ဒူအီ ဇိုဝ် တီ၊ ဂေ မိူဝ် ဟဲ့ မိုဝ်း နဝ်း ဆီ လှူ ဆီ ဒါန်။ တဲး မဲ ဝီ ဒိုဝ်း ဟာဝ် တူတ့် ဒွန် မျုဝ်၊ ဝီ လှူ ဒီ ဟုဝ် ဇဝ်ဖြာ အီ ကွယ် ခဲင် မိူင် ယေရူဆာလဲမ် တီ။ 17 တဲး မဲ ဒိုဝ်း ရွိုန် တီ၊ စိုဝ်း မက် အာလူင့်၊ မာဘူ အာလူင့်၊ ဘော ဂွန် မာဘူ၊ ဘော ငှုဝ် ဂေ ဒီဂါဝ်၊ ဘော အိုမ် မာငုန်၊ တဲး မဲ ဝီ လှူ ဇိုဝ် တီ ဒဲင် ကာစှူင့် လှူ အီ ကွယ် ခဲင် ဟုဝ် ဇဝ်ဖြာ ခဲင် မိူင် ယေရူဆာလဲမ် တီ။ ဇဝ်ဖြာ တီ မုး ဇဝ်ဖြာ ပီ ကြိုပ် မဲ။

18 ဘော မဲ ဘော ဂေ ဘီနွင် အီ မုး ဒူအီ အာမျုဝ် မဲ၊ တဲး ဘေ ယွတ် ရွိုန် အီ ဆီ ဂိတ်။ န့ မွှိုမ် စ်ု ပါယ် မှဝ်၊ တဲး ဘေ စ်ု ပါယ် တီ၊ တဲး န့ ဒူပ် ပီ အိုင် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ 19 ကြုဝ် ပဲ့ ဟဲ့ အာပ် ယေ ဒီ မဲ အာဒါ ပီ ဒီ ကြိုပ် ဇဝ်ဖြာ ခဲင် ဟုဝ် ဇဝ်ဖြာ တီ မိူဝ်၊ တဲး မဲ ဝီ ဒိုဝ်း ဝီ အာပ် ဒွါ ဒီ ဇဝ်ဖြာ အီ အိုပ် မိူင် ယေရူဆာလဲမ်။ 20 ဆေ န့ ဘော ဆီ မိုဝ်း ပီ ဒီ လုဝ် မဲ ခဲင် ဟုဝ် ဇဝ်ဖြာ ဘေ၊ မဲ ဟဲ့ ပွိုန် ဒိုဝ်း ရွိုန် ခဲင် ဇီဒိူက် ခုန်ဒီခမ်။

21 အုဝ် ခုန်ဒီခမ် အာတာစေရိတ် အုဝ် ဝီ ဒွါ အာမိင် ဘော ဒီ ဒါ ကာညာ အီ ဘ်ု ကြုဝ်ကြာမ် အုဝ် ဒွန် ပ့လုဝ့် အီ ကွယ် ဘ့လာက် နာ ဂေတ့် ဆီငဲ ဘ့လဲင် အိုမ် အူဖာရာတ်။ ဆေ န့ ဘော မုး အာအေဆာရာ အီ မုး ဒါ အီ လှူ ဒီ ဇဝ်ဖြာ၊ အီ မုး ဘော ဒါ ဆာရာ အီ နပ် ဆီချာ ပဲ့ ဒါရာ ဇဝ်ဖြာ အီ အိုပ် ဂါင်ဟြာဝ်၊ ဆေ အန် ဘော လုဝ် ဘော မှာန့် မျုဝ် မှဝ်၊ တဲး ဘေ ဒွါ ခဲ့ ပီ မှာန့် အန် တီ။ 22 ဘေ ဟဲ့ ပွိုန် ဒွါ၊ တဲး န့ ကော နုဝ့် ရွိုန် အူ မာယဝ်း ထာလေန်။^a ဒီဂါဝ် အူ မာယဝ်း ကောရ၊^b အိုမ် မာငုန် အူ မာယဝ်း ပါ့^c။ နာမန် အူ မာယဝ်း ပါ့၊ ဘော ဆယ့် ခဲ့ ပီ လုဝ် အန်။ ခဲ့ တီ ဘေ ပွိုန် ဒွါ။ 23 ခဲ့ ပီ ဒမ် အုန် ဇဝ်ဖြာ အီ အိုပ် ဂါင်ဟြာဝ် လွင် ဟုဝ် ဇဝ်ဖြာ တီ၊ တဲး ဘေ ဂျုဝ်ဂျာ ဒီ ဘူင်၊ တဲး န့ ကော ကာငျာ၊ တဲး န့ ကော ဒူပ် တူတ့် ဒွန် မျုဝ်၊ ကွဲ့ တဲး အန် ဇဝ် မိုဝ်း ဒီ ရူ ဒီ အုဝ် ဘော စုဝ် အုဝ် ဘော စုဝ် ဂွန် ဂေ လှုက်လှာန် အုဝ်။ 24 ဘေ ဒါ ကာညာ အီ ဘ်ု ကြုဝ်ကြာမ် အုဝ်၊ အုဝ် ဝီ ကာလာင် ဒီ ဘေ ပေါ န့ ပွါ၊ တဲး မဲ နပ်။ အာဝ် ပွိုန် ဂဲပ် ခွန် ဂေ စိုင် ခေါ အူ မျုဝ် ဒီ ဒါ အီ လှူ ဒီ ဇဝ်ဖြာ ဘော ဒီ ဒူအီ အာမျုဝ် အာလေဝီ၊ ဒီ ဂေ အီ နပ် ဒီ တဝ်း မှုဝ်၊ ဒီ ဂေ ဒါ အီ ဘ်ု ဘာင် မာလုဝ်း ခဲင် ဟုဝ် ဇဝ်ဖြာ ဘော ဒီ ဂေ အီ ဘူင် ဂါန် မျုဝ် ဟဝ် ခဲင် ဟုဝ် ဇဝ်ဖြာ တီ။

25 မဲ အာအေဆာရာ မိူဝ်၊ မဲ လုဝ် ဒိုဝ်း အာငျာန် ပီ ဒွါ ဇဝ်ဖြာ ဒီ မဲ၊ ဝီ ရဝ်း ဝီ ဒါင် ခုန် ရဝ် ဘော ဂေ ဒါ တာင် အီ ဆုင်ဖျာတ် ဒါရာ။ တဲး ဂေ ဆုင်ဖျာတ် ဆိူဝ် ဆိူဝ် မှာန် မှာန် အာရေ ဂေ ဒူအီ အီ ကွယ် ဘ့လာက် နာ ဂေတ့် ဆီငဲ အိုမ် ဘ့လဲင် အူဖာရာတ် တီ။ တဲး ဂေ အိုပ် ဂေ အီ ဒူပ် ဒါရာ ဇဝ်ဖြာ ဘောကာဂ့လျီတ်။ တဲး န့ ဘော မုး ဒူအီ အီ ဟဲ့ နပ် ဒါရာ ဇဝ်ဖြာ ပီ ကြိုပ် ဘေ တီ၊ တဲး ဘေ ဘော ဝီ မာနုဝ် ဂေ ဒူအီ အီ တူ နပ်။ 26 ဆေ န့ ဘော မိုဝ်း ဒူအီ အီ ထဲန့် အီ လှိုဝ် ဒါရာ ဇဝ်ဖြာ ဘော အာမိင် ပီ ဒွါ အုဝ် ခုန်ဒီခမ် နီ၊ ဒူအီ ဝီ တီ လုဝ် ခမ် မှာပ် အန် အာခါခ်ု။ အန် လုဝ် ယမ်။ ဆေ အာဝ် မုး ပါယ် တီ၊ ဘေ လုဝ် ဟုဝ် လေး အန် နာ ရေတ့် မိူင်။ ဆေ အာဝ် မုး ပါယ် တီ မိူဝ်၊ ဒိုဝ်း တူတ့် ခဲ့ ကွယ် ကြုဝ်ကြာမ် အန် ဘော မှေတ့် ခြွင့် အန် ခဲင် ကာပိုမ်။” ခဲ့ တီ ပဲ့ ပီ ဒဲမ် ခုန်ဒီခမ် ဒီ အာအေဆာရာ တွိုန်။

27 ဝါယ် အန် တီ အာအေဆာရာ ဝီ တဝ်း၊ “တဲး အေ အိူပ် ဇဝ်ဖြာ ပီ ကြိုပ် ဂုန့် ဒင် အေ ဂေ တွိုန်။ အန် ဇဝ် ဟဲ့ ဘူင် တဲး ခုန်ဒီခမ် မိုဝ်း နဝ်း ဆီ ဘူင် ဟုဝ် ဇဝ်ဖြာ အီ ကွယ် ဒီ မိူင် ယေရူဆာလဲမ်၊ တဲး န့ စှိတ်၊ တဲး န့ ဆီချာ၊ တဲး န့ မွှိုမ် ရုဝ်ဆေ။ 28 ပီ ဂေဇူ ဇဝ်ဖြာ ဒီ အုဝ်၊ န့ ဟဲ့ မွှိုမ်၊ ဟဲ့ ဘွတ် ကာဆဝ်။ ဘော ခုန်ဒီခမ် ဘော ဂေ အီ ဒွါ အာကျာမ် အာငျာန် ဒီ ခုန်ဒီခမ် ဘော ဂေ အာမူ အာမာတ် ခုန်ဒီခမ် အီ မိုဝ်း ပွုန်၊ အန် ဇဝ် ဟဲ့ ဘူင် တဲး ဂေ ဒွန် အီ အိုင် ပီ ဘူင် အုဝ်။ ဇဝ်ဖြာ ပီ ကြိုပ် အုဝ်၊ အန် ဟဲ့ တဲး ပ့လူမ် တဲး ဟဲန့် ဒီ အုဝ်၊ တဲး အုဝ် ဝီ ပွိုန် ဒီ ဝီ ဒဲ့ ဂေ ဒါ တာင် အီ အိုပ် အီ ယဲတ့် ဂေ ဒူအီ အီဆာရေလ၊ တဲး ဂေ ဝီ တး ဒူပ် အုဝ်။”