1 ဒေါ မုး စုဝ် ဘာန် ခုန်ဒီခမ် တာင် အာတာစေရိတ် န့ မိုဝ်း ဒူအီ ကိူန် အီ ဟဲ့ လေး ခဲင် မိူင် ဘာဘဲ၊ ဝီ ဝေန့် ခဲင် မိူင် အီဆာရေလ ဒူပ် အုဝ်။ ဂေ ဂိန့် န့ဟူမ် ဘော ဂေ ဒူအီ အီ ဟပ် စိူဝ် ဂေ ခဲင် ဇာရာင်၊ န့ ပါယ် နီ။

2 ဒူအီ ဂေ တီ ဘော မုး အာဂေဆူမ်။ အန် မုး လှုက်လှာန် အာဖီနေဟာတ်။ အာဒါနေလ မုး လှုက်လှာန် အာအီထာမာ။ အာဟာဒုတ် အီ မုး လှုက်လှာန် အာဒါဝိတ်။

3 အာဒါဝိတ် မုး ဒူအီ န့ကြိုဝ်း အာဆေခါနီ။ အာဆာခါရာ အီ မုး လှုက်လှာန် အာဘာရုတ်။ ဂေ ဒူအီ အီ ဟဲ့ ဟပ် စိူဝ် ဂေ ခဲင် ဇာရာင် ဒူပ် အန် တီ၊ ဂေ အီမာယ် ကွယ် အူ မာယဝ်း ဒီ ဖန် ဂိုဝ် ဝီ။

4 န့ မုး ဘော အာအေလီအွန် အီ မုး ဂွန် အာစေရာဟီ ဘော လှုက်လှာန် အာဘာဟာတ်မုဝ်အာပ်။ န့ မိုဝ်း ဘော အီမာယ် အာ မာယဝ်း ဝီ အီ ဒူပ် အန်။

5 န့ မုး ဘော အာဆေခါနီ အီ မုး ဂွန် အာယာဟာဇေလာ ဘော လှုက်လှာန် အာစာတု။ န့ မိုဝ်း အီမာယ် အူယ် မာယဝ်း ဝီ အီ ဒူပ် အန်။

6 န့ မုး ဘော အာအေဘေတ် အီ မုး ဂွန် အာယုဝ်နာထာန် ဘော လှုက်လှာန် အာတိန်။ န့ မိုဝ်း အီမာယ် ဖန် ဂိုဝ် ဝီ အီ ဒူပ် အန်။

7 န့ မုး ဘော အာယေဆာယာ အီ မုး ဂွန် အာအေထာလီ ဘော လှုက်လှာန် အာအေလမ်။ န့ မိုဝ်း အီမာယ် ဘူ ဂိုဝ် ဝီ အီ ဒူပ် အန်။

8 န့ မုး ဘော အာဇေဖာဒီယာ အီ မုး ဂွန် အာမီခီလာ ဘော လှုက်လှာန် အာဇေဘာဒီ။ န့ မိုဝ်း အီမာယ် ဒါ ဂိုဝ် ဝီ အီ ဒူပ် အန်။

9 န့ မုး ဘော အာအောဘာဒီ အီ မုး ဂွန် အာယေဟီလာ ဘော လှုက်လှာန် အာယောဖ။ န့ မိုဝ်း အီမာယ် အာ မာယဝ်း ဒီ ဂိုဝ် ဒီ ဒါ ဝီ အီ ဒူပ် အန်။

10 န့ မုး ဘော အာဆေလောမိတ် အီ မုး ဂွန် အာယောဆီဖီ ဘော လှုက်လှာန် အာဘာနီ။ န့ မိုဝ်း အီမာယ် အူ မာယဝ်း ဒီ ဒဝ် ဂိုဝ် ဝီ အီ ဒူပ် အန်။

11 န့ မုး ဘော အာဆာခါရာ အီ မုး ဂွန် အာဘေဘေ ဘော လှုက်လှာန် အာဘေဘေ။ န့ မိုဝ်း အီမာယ် အာ ဂိုဝ် ဒီ ဒါ ဝီ အီ ဒူပ် အန်။

12 န့ မုး ဘော အာယောနိပ် အီ မုး ဂွန် အာဟာကာဒါန် ဘော လှုက်လှာန် အာစာကာတ်။ န့ မိုဝ်း အီမာယ် အူ မာယဝ်း ဒီ ဂိုဝ် ဝီ အီ ဒူပ် အန်။

13 ဂေ လှုက်လှာန် အာတောနီကမ် အီ တး ဒီ ပန် ဆိူတ်၊ ဂေ ဘော မုး အာအေလီဖေလေတ်၊ အာယေအူလာ ဘော အာဆေမာယာ။ န့ မိုဝ်း အီမာယ် ဒဝ် ဂိုဝ် ဝီ အီ ဒူပ် ဂေ။

14 ဂေ လှုက်လှာန် အာဘီဂါဝီ ဘော မုး အာအူဆေ ဂါယ် အာဇာကူရာ။ န့ မိုဝ်း အီမာယ် ဘူ ဂိုဝ် ဝီ အီ ဒူပ် ဂါယ်။ ဂေ ဒူအီ တီ ဘောကာဂ့လျီတ် ဟဲ့ ဟာဝ် ဒူပ် အုဝ်။

15 အုဝ် ဟဲ့ တဲး ဒူအီ ဂေ တီ တး ကွယ် ကာဇု ခူပ် ဘ့လဲင် အိုမ် အီ လှဲ ဟာဝ် ဒီ မိူင် အာဟာဝါ။ ယေ မိူဝ် ဟဲ့ ချ ကွယ် ဒီ တီ အာဒါ အူယ် ဆီငဲ။ အုဝ် ဘော ဝီ ဆာခိ ဒီ ယွတ် ဂေ ဒူအီ ကိူန် ဘော ဂေ ဒါ အီ လှူ ဒီ ဇဝ်ဖြာ။ အုဝ် ဘော ဝီ နပ်၊ အာဝ် မိုဝ်း ဒူအီ အာမျုဝ် အာလေဝီ ခေါ အူ ဝီ။ 16 အုဝ် ဘော ဝီ ဒဲ့ ဂေ အီ မုး ဒါ တာင် အီ စိူဝ် အာအေလီအေဇာ၊ အာရေလ၊ အာဆေမာယာ၊ အာအေန်နာထာန်၊ အာယာရိပ်၊ အာအေန်နာထာန် ပေါ အူ ဝီ၊ အာနာထာန်၊ အာဆာခါရာ ဘော အာမေဆူလမ်။ အုဝ် ဘော ဒဲ့ ဘော အာယာရိပ် ဂါယ် အာအေန်နာထာန် အီ မိုဝ်း အာငျာန်။ 17 အုဝ် ဘော ဝီ စ်ု ဂေ ဟာဝ် ဒူင် ကွယ် အာအီတော အီ မုး ဒါ တာင် အီ အိုပ် ဂေ ဒူအီ ခဲင် မိူင် ကာဆီဖီ၊ တဲး ဂေ ဟာဝ် ကာလာင် ဒီ အန် ဘော ဒီ ဂေ ဘီနွင် အန် အီ ဟဲ့ ဒွိုမ် ဘူင် ဂါန် ခဲင် ဟုဝ် ဇဝ်ဖြာ။ အုဝ် ဟဲ့ စ်ု ဂေ ကာလာင် ဒီ အန်၊ မှာန့် တဲး အန် တိုယ် ဒူအီ အီ ဒီ ဘူင် ဂါန် ခဲင် ဟုဝ် ဇဝ်ဖြာ၊ တဲး ဂေ ဟာဝ် ဒူပ် ယေ။ 18 ဇဝ်ဖြာ ဟဲ့ ဂေဇူ ယေ၊ တဲး ဂေ တိုယ် တး အာဆေရာဖီ အီ မုး ဒူအီ အီ နပ် ဒီ ဘူင် ဘဲန် မျုဝ် ဘဲန် မျုဝ်။ အန် ဘော မုး ဒူအီ အီဆာရေလ အီ မုး ခြိုဝ် အာလေဝီ ဘော လှုက်လှာန် အာမာလီ။ ဘော အန် ဘော ဂေ ဘီနွင် အန် ဘောကာဂ့လျီတ်၊ ဂေ ကွယ် ဂိုဝ် ဒီ ဒါ ဝီ။ 19 ဂေ ဘော တိုယ် တး ဘော အာဟာဆာဘီ ဂါယ် အာယေဆာယာ အီ မုး လှုက်လှာန် အာဂြဝ်ရီ။ ဘော ဂါယ် ဘော ဘီနွင် ဝေါဝဲ ဘော ဂွန် ဂါယ်၊ ဂေ အီမာယ် ကွယ် အာ ဂိုဝ် ဝီ။ 20 ဒဲင် တီ၊ ဂေ ဘော တိုယ် တး ဘော ဂေ အီ မုး ဒဲစေန့် အီ ဘူင် ဂါန် ခဲင် ဟုဝ် ဇဝ်ဖြာ။ ခုန်ဒီခမ် အာဒါဝိတ် ဘော ဂေ အာမူ အာမာတ် အန်၊ ဂေ ဟဲ့ ဒွိုမ် ဒါင် ဒဲစေန့် ဂေ တီ၊ တဲး ဂေ စွယ် ဒူအီ အာလေဝီ တွိုန်။ ဇာရာင် ဂေ တီ ဘောကာဂ့လျီတ်၊ ဂေ အီမာယ် ကွယ် အာ မာယဝ်း ဒီ အာ ဂိုဝ် ဝီ။ ဂေ ဒွန် အီ ဟဲ့ ဟပ် စိူဝ် ဂေ ခဲင် ဇာရာင် တီ။

21 ဒေါ အန် တီ ဒေါ ကွယ် ယေ ခူပ် ဘ့လဲင် အာဟာဝါ တွိုန်၊ အုဝ် ဝီ ကာလာင် ဒီ ဂေ၊ တဲး ယေ ဘောကာဂ့လျီတ် ယိူန် ပီ ဒီ ဟူမ်။ တဲး ယေ မိုဝ်း နဝ်း ဂူမ်၊ နဝ်း တျီမ် ဒီ အာတ့် ဇဝ်ဖြာ၊ တဲး ယေ ပွိုန် ဒီ ဆာခိုဝ် မှာန့်၊ တဲး ဇဝ်ဖြာ ယဲတ့် န့တေန့် ယေ၊ တဲး အန် ဇဝ် ဂွင့် ရဲ ဘော ဂွန် ယေ ဘော ကြုဝ်ကြာမ် ယေ ဘောကာဂ့လျီတ်။ 22 အုဝ် ဟဲ့ ဆာယ် ဒီ မှာန့် ဒီ ခုန်ဒီခမ်၊ တဲး အန် ဒွါ ဒါ ဆိုက် အီ ပဝ့် မ့ပြွင့်၊ တဲး ဂေ ယဲတ့် န့တေန့် ယေ၊ တဲး ဂေ စွယ် ယေ ဘဲန် အီ ရဲ အီ ဂွင့် ရန်ဆူ ဒီ ယေ။ ခုဝ်၊ အုဝ် ဟဲ့ ဒွိုမ် ကာလာင် ဒီ ခုန်ဒီခမ် တဝ်း၊ “ဇဝ်ဖြာ ပီ ကြိုပ် ယေ၊ အန် ဒီ ဂေဇူ ဝီ အီ ညှိုမ် ဘိုင် အန်။ ဝီ အီ ဝဲန် အန် ဇဝ်၊ အန် ဇဝ် ယီ တူ အိုင်။ အန် ဒီ ဒမ် မှာပ် ဒီ ဒူအီ ဝီ တီ။” 23 ကူပ် န့ ပါယ် တီ ယေ ဘော ယိူန် ပီ ဒီ ဟူမ် ဘော ဆာခိုဝ် မှာန့် လွင် အန် တီ ဒီ ဇဝ်ဖြာ ပီ ကြိုပ် ယေ။ အန် ဇဝ် မိူဝ် ထူမ် ပီ ဆာခိုဝ် ယေ။

24 ကာတဲ ဂေ အီ မုး ဒါ အီ လှူ ဒီ ဇဝ်ဖြာ၊ အုဝ် ဝီ ရဝ်း ဂေ ဂိုဝ် ဒီ အာ ဝီ။ န့ ဘော မုး အာဆေရာဖီ ဘော အာဟာဆာဘီ ဘော ဂေ အီ မုး ဒါ အီ လှူ ဒီ ဇဝ်ဖြာ ပေါ ဂိုဝ် ဝီ အီ မုး ဘီနွင် ဝေါဝဲ အာဆေရာဖီ ဂါယ် အာဟာဆာဘီ။ 25 အုဝ် မိူဝ် ဆ ရွိုန် ဂေ ခြိဝ် ဘော ခြိုင် တာ အီ မုး ပီ လှူ ခုန်ဒီခမ် ဂေ ဒါ ကာညာ အီ အိုပ် မိူင်။ န့ ဘော မုး ဘော ပီ လှူ ဂေ အာမူ အာမာတ် ခုန်ဒီခမ် ဘော ပီ လှူ ဂေ ဒူအီ အီဆာရေလ အီ ဟဲ့ ကွယ် ဒီ တီ။ အုဝ် ဟဲ့ ဟွတ့် ဆ တူတ့် ဒွန် မျုဝ်၊ အုဝ် ဘော ဝီ အာပ် ဒီ ဂေ၊ တဲး ဂေ ပွိုန် ဒီ စ်ု ခဲင် ဟုဝ် ဇဝ်ဖြာ။ 26 ကြုဝ် ပဲ့ ဟဲ့ အာပ် အုဝ် ဒီ ဂေ တီ၊ န့ ဘော မုး ရွိုန် ဒဝ် မာယဝ်း ဒီ ဖန် ဂိုဝ် ထာလေန်။^a ဘော ခြိုင် ရွိုန် အာဒါ အူ မာယဝ်း ထာလေန်။^b ခြိဝ် အူ မာယဝ်း ထာလေန်။ 27 ဘော ကွက့် ခြိဝ် အာ ဂိုဝ် ဘူင့်။ ငဝ်း အန် န့ ပီ ခြိဝ် အူ ဟြဲန့် တဲင်။ ဘော ကွက့် ဘွင့် ဒေန့် ဇဲတ် အာ ဘူင့် အီ ဟဲ့ ငဝ်း ကာရမ် ခြိဝ်။ 28 အုဝ် ဝီ တဝ်း ဒီ ဂေ၊ “ဘေ ဟဲ့ ဘဲန် ဒူအီ အီ ဆီငါ ဘွတ် ဒီ အာတ့် ဇဝ်ဖြာ။ ကြုဝ်ကြာမ် ရွိုန် ခြိဝ် ဂေ နီ မိူဝ်၊ ဟဲ့ ဘဲန် ပီ ဒီ လှူ အီ ဆီငါ ဘွတ်။ ဂေ အီ မိုဝ်း နဝ်း ဆီ လှူ တွိုန် မိူဝ် ဂေ ဟဲ့ လှူ ဒီ အန် ဇဝ် အီ မုး ဇဝ်ဖြာ ပီ ကြိုပ် ဂုန့် ဒင် အေ။ 29 တဲး ဘေ ဘ်ု ဆီချာ ကြုဝ် ဂေ တီ၊ တဲး န့ ကော ဇမ် ခဲင် မိူင် ယေရူဆာလဲမ်။ ဆေ ဟီ ဇမ် ဒီ တီ၊ တဲး ဘေ ဝီ ဆ ဒီ အာတ့် ဂေ ဒါ တာင် အီ လှူ ဒီ ဇဝ်ဖြာ ဘော ဂေ ဒူအီ အာမျုဝ် အာလေဝီ ဘော ဂေ ဒါ တာင် အီ မုး ဂိန့် န့ဟူမ် ဂေ ဒူအီ အီဆာရေလ။ ဟဲ့ ဟွတ့်၊ တဲး ဘေ ဝီ အုန် ကြုဝ် တီ ခဲင် ဟူင် အီ ကွယ် ဒီ ဟုဝ် ဇဝ်ဖြာ။” 30 ဝါယ် အန် တီ ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ အာမျုဝ် အာလေဝီ ဘော ဒိုဝ်း ကြုဝ်ကြာမ် ဂေ ရွိုန် ခြိဝ် ပဲ့ ဟဲ့ ဆ အုဝ် တီ၊ တဲး ဂေ ဝီ ဒိုဝ်း ဟာဝ် ဒူင် ကွယ် ဟုဝ် ဇဝ်ဖြာ ဒီ မိူင် ယေရူဆာလဲမ် တွိုန်။

31 ဒေါ ဇမ် မာဂျီန် ဒေါ ဂုဝ်၊ ဆီငဲ ဂိုဝ် ဒီ ဟာအာ၊ ယေ ဘော လေး ဒီ အိုမ် ဘ့လဲင် အာဟာဝါ၊ ဝီ ဟာဝ် ဒီ မိူင် ယေရူဆာလဲမ်။ ဇဝ်ဖြာ မိူဝ် ဘော ကွယ် ရိုမ် ဒူပ် ယေ ဘော ဘ်ု ဒီ ဂွင့် ဒီ ရဲ ယေ၊ တဲး ယေ လွတ် ဒီ ရန်ဆူ ယေ ဘော ဒီ ဂေ အီ ဘ်ု ဒီ ဇူန် ယေ ဒူပ် န့တေန့် တီ။ 32 ဒေါ ဟဲ့ ဟွတ့် တး ဇမ် ယေ ခဲင် မိူင် ယေရူဆာလဲမ်၊ ယေ ဘော ဒီလှဝ် အာဒါ အူယ် ဆီငဲ။ 33 န့ ဘော ဝီ ဇမ် ဆီငဲ မ့ဖွုန်၊ ယေ ဘော ဟာဝ် ဒီ ဟုဝ် ဇဝ်ဖြာ ဘော ဆ ဒွါ ရွိုန် ဂေ ခြိဝ် ဘော ကြုဝ် ဂေ တွိုန်၊ ဝီ အာပ် ဒွါ ဒီ ဒါ အီ လှူ ဒီ ဇဝ်ဖြာ အီ စိူဝ် အာမေရေမုတ် အီ မုး ဂွန် အာအူရီယာ ဘော ဒီ အာလေအာဆာ အီ မုး ဂွန် အာဖီနေဟာတ်၊ ဒီ ဂေ ဒူအီ ခြိုဝ် အာလေဝီ အာ ဝီ အီ စိူဝ် အာယောစာဘာတ် အီ မုး ဂွန် အာယောဆူ ဘော ဒီ အာနောတီ အီ မုး ဂွန် အာဘီနူအီ။ ဒူအီ ဂေ တီ၊ ဂေ ဟဲ့ ကွယ် ရိုမ် ဒူပ် အာမေရာမုတ် တွိုန်။ 34 ယေ ဘော ဒိုဝ်း ကြုဝ် ဂေ တီ ဘော ဆ ဒီ ယွတ်၊ ဘော တိး ဝီ ယွတ် ဒွန် မျုဝ်၊ န့ ဟဲ့ ဒူပ် ဇာရာင် အန် ဘောကာဂ့လျီတ်။ ဂေ ဘော ဒဲမ် အုန်၊ တဲး န့ ဟွတ့် တူတ့် ဆီငဲ တီ။

35 ဝါယ် အန် တီ ခဲ့ ကွယ် ဂေ ဒူအီ ပဲ့ ဟဲ့ မှေတ့် ဟာဝ် အီ ဟဝ်၊ ဂေ အီ ဟဲ့ ဝီ တး တွိုန်၊ ဂေ ဘောကာဂ့လျီတ် ဘော ဝီ လှူ ဒီ ဇဝ်ဖြာ ပီ ကြိုပ် ဂေ ဒူအီ အီဆာရေလ။ ဂေ ဘော လှူ အီ ဒုဝ့် ဒီ ငဝ် အာဒါ ဂေ ဒူအီ အီဆာရေလ ဘောကာဂ့လျီတ်။ န့ ဘော မုး မက် အာလူင့် ဂိုဝ် ဒီ အာ ဒုဝ်၊ မာဘူ အာလူင့် ဒိမ် ဂိုဝ် ဒီ ဒဝ် ဒုဝ်၊ ဘော ဂွန် မာဘူ ဘူ ဂိုဝ် ဒီ ဘူ ဒုဝ်။ အာဒါ ပီ ဒီ လှူ အီ ဒီ တဲး န့ ဂဝ်း ဝဲန် မှာပ်၊ ဂေ ဘော ဒိုဝ်း မာပဲ အာလူင့် ဂိုဝ် ဒီ အာ ဒုဝ်။ ပီ လှူ ဂေ ဇိုဝ် တီ ဒွန် မျုဝ်၊ န့ ဘော မုး ပီ ဒီ လှူ ဒီ ဇဝ်ဖြာ အီ ဒုဝ့် ဒီ ငဝ်။ 36 ဂေ မိူဝ် ဒိုဝ်း ဘော ပဲ့ အာမိင် ပဲ့ ဟဲ့ တိုယ် တး ခုန်ဒီခမ် ဒီ ဂေ၊ ဝီ အာပ် ဒွါ ဒီ ဂေ ဒါ ကာညာ အီ အိုပ် မိူင်၊ ဘော ဒီ ဂေ ဒါ တာင် အီ ကွယ် ဘ့လာက် နာ ဂေတ့် ဆီငဲ အိုမ် ဘ့လဲင် အူဖာရာတ်။ ဒူအီ ဂေ တီ မိူဝ်၊ ဝီ စွယ် ဂေ ဒူအီ အီဆာရေလ၊ စွယ် ဘော တဲး ဟုဝ် ဇဝ်ဖြာ စေဝ် ဟွတ့်။