1 ဝါယ် ဟဲ့ ဟွတ့် ဘူင် တူတ့် ဒွန် မျုဝ် လွင် ဇိုဝ် တီ၊ ဂေ ဒါ တာင် အီ အိုပ် အီ ယဲတ့် ဂေ ဒူအီ အီဆာရေလ၊ ဂေ ဘော ဝီ တး ဒူင် ကွယ် အုဝ် ဘော ကာလာင် တဝ်း၊ “ခဲ့ ကွယ် ဂေ ဒူအီ အီဆာရေလ၊ ဂေ ဒါ အီ လှူ ဒီ ဇဝ်ဖြာ ဘော ဒူအီ ခြိုဝ် အာလေဝီ၊ ဂေ တူ ကာဂဝ်း ဒီ ဂေ ဒူအီ အာမျုဝ် ဟဝ် အီ ကွယ် ရိုမ် ဒူပ် အေ ခဲင် မိူင် နီ။ ဂေ ဝီ ဘူင် အီ မွှိုမ် ကာအိး အီ ပီ ပီ ဘူင် ဂေ ဒူအီ အာမျုဝ် ကာနန့် ဘော ဂေ ဒူအီ ဟေထိတ်၊ ဂေ ဒူအီ ဖေရေဆိတ်၊ ဂေ ဒူအီ ယေဘူဆိတ်၊ ဂေ ဒူအီ အမ်မူန်၊ ဂေ ဒူအီ မုဝ်အာပ်၊ ဂေ ဒူအီ အဲဂိုပ် ဘော ဂေ ဒူအီ အာမုဝ်ရိတ်။ ဂေ ဒူအီ အီဆာရေလ ဝီ ဘူင် ညိုင် ဂေ တီ။ 2 ဂေ အီမာယ် ဟဲ့ ဝီ ခတ် ဒိုဝ်း ဂွန် အီဘိုန့် ဒူအီ ဂေ တီ၊ တဲး ဂေ ဘဲန် အီဘိုန့် ဂေ ဘော အီဘိုန့် ဂွန် ဂေ။ အေ မုး ဒူအီ အီ ဆီငါ ဘွတ် ပီ အိုပ် ဇဝ်ဖြာ။ ဂေ ယီ ဟဲ့ ဘူင် တဲး ဒူအီ အာမျုဝ် အေ ဝီ ကာဆူ ကာဝ်ု ဒီ အီ ဟဝ်။ ဂေ ဒါ တာင် အီ အိုပ် အီ ယဲတ့် ဂေ ဘော ဂေ ဒါ ကာညာ အီ အိုပ် မိူင်၊ ဂေ ဟဲ့ ဝဲ ဘူင် အီ တူ မွှိုမ် လွှိုမ် အီ ဟဝ်။”

3 ဒေါ ယိုဝ် အုဝ် ဂြုဝ်း တီ၊ အုဝ် ဘော ကာယာတ့် ခြိုင် အုဝ်၊ ရိုတ့် ဘော ဟိုက် ဂိန့် အုဝ် ဘော ဒီမုဝ်း ဒီ ကုင်ကာပ် အုဝ်၊ ဘော ဘဲန် ငှဝ်၊ ဘဲန် ကာဖာ ဂ့၀ွင် ဒီ အုဝ်။ 4 အုဝ် ဘော ရိုဝ် ပါယ် တီ တဲး န့ ကော ဇမ် အာခြာဝ် ဒီ ဝီ လုဝ် လှူ ပီ ဒီ လှူ ဘာ ဒီ အပ်။ ဂေ ဒူအီ အီ ယုဝ် အီ ရုဝ်ဆေ ဂြုဝ်း ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ ဂေ ဘော တး ဒူင် ကွယ် အုဝ် ကူပ် မှာပ် ပဲ့ ဟဲ့ လုတ့် ဂေ ဒူအီ အီ ဟဲ့ ဝီ တး ဇမ် ခဲင် မိူင် ဘြိမ် ဂေ။ 5 န့ ဘော ဇမ် အာခြာဝ် ဒီ လုဝ် လှူ ပီ ဒီ လှူ ဘာ ဒီ အပ် တွိုန်၊ အုဝ် ဘော ဝီ ယိတ့် ဒူင် ဟဲ့ ငှဝ် ဟဲ့ က့လိုဝ် အုဝ် တွိုန်။ အုဝ် ယီ ဆီ တာ ခြိုင် ကာပျာတ့် အုဝ် တွိုန်။ အုဝ် ဘော ဝီ ခြိုပ်ခြဝ်၊ စုဝ့် ဒဲ အုဝ်၊ ဆာခိုဝ် ဒီ ဇဝ်ဖြာ ပီ ကြိုပ် အုဝ်။ 6 အုဝ် ဘော ဝီ ဆာခိုဝ် တဝ်း၊ “အိုယ် မဲ ဇဝ်ဖြာ၊ အုဝ် ဟဲ့ ဆာယ် ကာဆဝ်။ အုဝ် အာဝ် ယ ဆာကိုဝ်း ယွတ် မဲ ဇဝ်။ ခုဝ်၊ အီ တူ မွှိုမ် ပဲ့ ဟဲ့ ဘူင် ယေ ဟဲ့ တာင် ဟဲ့ ဘြဲ။ န့ ပီ အိုမ် ဟဲ့ မ့ပုန် ဂိန့် ယေ။ မှာပ် ပဲ့ ဟဲ့ ဘူင် ယေ၊ န့ ပီ န့ ဟဲ့ ဒုး ဂါင်ဟြာဝ်။ 7 အူ ဆိန့် ဒေါ မုး စုဝ် ဒါ ဒါ ယေ ကော ဝီ ဇမ် အာတိုဝ် နီ၊ ယေ ဟဲ့ ကာလိုပ် ဟဲ့ ကာလုတ့် ကိူန် ကာဆဝ်။ ကူပ် မှာပ် ပဲ့ ဟဲ့ ဘူင် ယေ တီ၊ ခဲ့ ကွယ် ယေ ဘောကာဂ့လျီတ်၊ ဘော ခုန်ဒီခမ် ဘော ဒါ အီ လှူ ဒီ ဇဝ်ဖြာ၊ ယေ ဘော လုဝ် ဝီ ခမ် ပီ အိုပ် ခုန်ဒီခမ် အီ အိုပ် မိူင် ဟဝ်။ ယေ ဘော ကာဒုး ဒီ ယမ် ဒီ ဘ့လာ ပွါ့ ဂေ ဘ့လာ လျီး၊ ဘော ကာဒုး အီ ဇူန် အီ ခါနှာပ် ယေ၊ တဲး ယေ ဘဲန် မှာယ် အီ ဟဝ်။ ယေ ဘော စှိုမ် ဆာရေ ပီ ပီ ပါယ် ယေ ဒေါ တီ နီ။

8 ဒေါ တီ နီ အာဒါ အူ ကာစန်၊ ဇဝ်ဖြာ ပီ ကြိုပ် ယေ ဟဲ့ ဝီ ဂေဇူ ယေ၊ ဝီ ကာဝေ ယေ။ အန် ဟဲ့ ဝီ တဲး ယေ မင် အီ မိုဝ်း ဒီ ဂိူတ်၊ ဝီ လွတ် ဘဲန် မှာယ် အီ ဟဝ်။ အန် ဟဲ့ ဝီ တဲး ယေ ပွိုန် ဒီ ကွယ် ဆီချာ၊ ကွယ် ထင်ဟာင် ခဲင် မိူင် အန် ဇဝ် အီ ဟဲ့ ဆီငါ ဘွတ် နီ။ ပါယ် တီ အန် ဟဲ့ တဲး နဝ်း ယေ ဝီ ဒါခိုယ်။ 9 ယေ ပီ ဘော ဟဲ့ ကာဒုး ဒီ ဘဲန် မှာယ် အီ ဟဝ် မိူဝ်၊ အန် ဇဝ် ယီ တူ ဘ့လေး ဝဲန် ယေ ဒေါ ဟဲ့ ဘဲန် ယေ မှာယ် အီ ဟဝ် တီ။ အန် ဇဝ် ဟဲ့ တဲး ယေ ဝီ ဘဲန် အီ လဝ့် နဝ်း ခုန်ဒီခမ် အီ အိုပ် မိူင် ဘီရာဆီ။ န့ ဟဲ့ ဝီ တဲး ယေ မိုဝ်း ပ့လူမ် မိုဝ်း ဟဲန့်၊ တဲး ယေ ပွိုန် ဘော ဒီ ဝီ ဆမ် ဟုဝ် ဇဝ်ဖြာ ဘော ရဲင် မိူင် အီ ဟဲ့ လိုဝ် ဟဲ့ ကာပျာတ့်။ န့ ဟဲ့ တဲး ယေ ပွိုန် ဒီ ဝီ ကွယ် ဆီချာ ခဲင် မိူင် ယေရူဆာလဲမ် ဘော ခဲင် မိူင် ယူဒါ။

10 အိုယ် မဲ ဇဝ်ဖြာ၊ ဒေါ တီ နီ ယေ အာဝ် ဟူ နပ် ပီ ဒီ ပါယ် ဒီ ဆာခိုဝ်။ မဲ မုး ဇဝ်ဖြာ ပီ ကြိုပ် ယေ။ ယေ ယီ ဟဲ့ ဟွတ့် ဝဲန် ဒါရာ မဲ ဇဝ်ဖြာ။ 11 မဲ ဇဝ်ဖြာ ဟဲ့ တဲး ဂေ ဒါ အီ ဘျာန် ဂြုဝ်း ဇဝ်ဖြာ ကာလာင် ဒါရာ မဲ ဒီ ယေ။ ဂေ မိူဝ် ဟဲ့ ကာလာင် လွင် မိူင် ပီ ဟာဝ် ကွယ် ယေ တီ၊ န့ မုး မိူင် အီ မွှိုမ် ကာအိး မွှိုမ် ကာဒါတ့်။ ခုဝ်၊ ဂေ ဒူအီ အီ ကွယ် ဘြိမ် ခဲင် မိူင် တီ၊ ဂေ ဘူင် မီ အီ မွှိုမ် ကာအိး။ န့ ပီ အီ မွှိုမ် ကာအိး ဟဲ့ နုဝ့် ခဲင် မိူင် ဘော မိူင်၊ န့ ဘော စုး အူ ဘ့လာက် ကော ဝီ ဇမ် ပေါ ဘ့လာက်။ 12 ခုဝ်၊ ဂေ ဒါ အီ ဘျာန် ဂြုဝ်း ဇဝ်ဖြာ ဟဲ့ ကာလာင် ဒီ ယေ တဝ်း၊ ‘ကွဲ့ တဲး ဂွန် အီဘိုန့် ဘေ ခတ် ဒိုဝ်း ဂွန် အီမာယ် ဂေ ဒူအီ ခဲင် မိူင် တီ။ ဘော ကွဲ့ တဲး ဂွန် အီမာယ် ဘေ ခတ် ဒိုဝ်း ဂွန် အီဘိုန့် ဂေ။ ကွဲ့ လာယ် ကာဆဲန့် ဒီ ဘဲန် ဂိုက် ဂေ ဒေါ မှဝ်။ ဆေ ဘေ ဘူင် ပါယ် တီ န့ ဒီ တဲး ဘေ ဝီ မိုဝ်း ပ့လူမ် မိုဝ်း ဟဲန့်၊ တဲး ဘေ ပွိုန် ဒီ ဟူမ် အီ ဘွတ် အီ မွှိုမ် ခဲင် မိူင် တီ။ ကာဒါယ် မိူင် တီ မိူဝ်၊ န့ ဒီ ဘဲန် ခါဂုန် လှုက်လှာန် ဘေ ဆေဆေ။’

13 မဲ ဇဝ်ဖြာ ပီ ကြိုပ် ယေ၊ မဲ ပီ ဘော ဟဲ့ ဒမ် မှာပ် ဒီ ယေ မိူဝ်၊ န့ ယီ ပြေတ့် လွှိုမ် မှာပ် ပီ ကာအာပ် ယေ ခမ်။ ယေ ဟဲ့ ဘူင် အီ တူ မွှိုမ် အီ ဟာယ် အီ မိူက် ကာဆဝ်။ မဲ ဇဝ် ယီ တူ ပျာတ့် ဝဲန် တူတ့် ယေ။ မဲ ဟဲ့ တဲး န့ ဆီ ဂိူတ် ဖိုင် ဒီတဲတ် အီ မုး အာမျုဝ် ယေ။ 14 ပါယ် တီ အာဝ် ကာအာပ် ယေ ဝဲန် ဒါရာ မဲ ဇဝ်ဖြာ။ အာဝ် ကာအာပ် ယေ ဝီ ခတ် ဒိုဝ်း ဒူအီ အီ ဘူင် မွှိုမ် ကာအိး မွှိုမ် ဇွင့် တီ။ ကူပ် ဟဲ့ ဘူင် ယေ ပါယ် တီ ဟဲ့ မှာန်၊ ဆေ မဲ ဇဝ် ရူ ကာဆဝ် ဒီ ယေ ဘော ဘူင် တဲး ယေ လိုဝ် စှိုမ် တူတ့်၊ ကွဲ့ တဲး ယေ ဆီ ဂိူတ် ခေါ အူ ဝီ။ 15 အိုယ် မဲ ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ မဲ မိုဝ်း နဝ်း ဆိူဝ် နဝ်း မှာန်။ ယေ ယီ မုး ဒူအီ အီ ဆီ ဂိူတ် ဆီ ကွယ်။ ယေ ဟဲ့ ဘူင် မှာပ်။ ခုဝ်၊ ယေ အာဝ် ဟူ ကာအာပ် တး ကွယ် ဒီ အာတ့် မဲ ဇဝ် ကူပ် မှာပ် ပဲ့ ဟဲ့ ဘူင် ယေ။ ပီ ဘော ဟဲ့ ပါယ် တီ မိူဝ်၊ ယေ ယီ ဟဲ့ ဝီ တး ကွယ် ဒီ အာတ့် မဲ ဇဝ်ဖြာ။”