1 ဒေါ မုတ် ဂိုပ် အာအေဆာရာ ဒီ အာတ့် ဟုဝ် ဇဝ်ဖြာ ဘော ယာမ် ဘော ဆာခိုဝ် ကာလာင် မှာပ် ဂေ တွိုန်၊ န့ ဘော မိုဝ်း ဖိုင် ဂေ ဒူအီ အီဆာရေလ၊ ဂေ ကိူန် ဘော တး ကာဇု ကွယ် ရူပ် အန်။ န့ မုး ဘော အီဘိုန့် ဘော အီမာယ် ဘော ဂွန်၊ ဂေ မိူဝ် ယာမ် တာင် ကူပ် ဟဲ့ ဆွင့် တိူက် ဘော ဒီ နဝ်း ဂေ။ 2 ဒေါ အန် တီ အာဆေခါနီ အီ မုး ဂွန် အာယေဟီလာ အီ မုး လှုက်လှာန် အာအေလမ်၊ အန် ဘော ကာလာင် ဒီ အာအေဆာရာ တဝ်း၊ “အေ နီ၊ အေ ဟဲ့ လုတ့် ဇဝ်ဖြာ ပီ ကြိုပ် အေ ကူပ် ဟဲ့ ခတ် ဒိုဝ်း အေ အီဘိုန့် အီ မုး ဒူအီ အာမျုဝ် ဟဝ်။ ပီ ဘော ဟဲ့ ပါယ် တီ မိူဝ်၊ ဒူအီ အီဆာရေလ ယီ ဆီ မိုဝ်း ပီ နှဝ့် န့ဒဝ့်။ 3 ဒေါ တီ နီ၊ တဲး အေ လာယ် ကာဆဲန့် ဒီ ဇဝ်ဖြာ လွင် ဒီ ဝဲန် အေ အီဘိုန့် အေ ဂေ ဂွန် အေ ဘောကာဂ့လျီတ်၊ တဲး န့ ဝီ ဒူပ် အာကျာမ် အာငျာန် မဲ အီ မုး ဒါ ကာညာ အေ ဘော အာကျာမ် အာငျာန် ဂေ အီ ယုဝ် အီ ရုဝ်ဆေ ဒါရာ ဇဝ်ဖြာ၊ တဲး န့ ဝီ ဒူပ် ဒါရာ။ 4 န့ ယီ မုး မဲ အီ လုဝ် ဘူင်။ ယေ ဒီ ကွယ် ဘ့လာက် မဲ၊ တဲး မဲ မိုဝ်း နဝ်း ယ၊ တဲး မဲ ဘူင်။”

5 ပါယ် တီ အာအေဆာရာ ဘော စ်ု ဂေ ဒါ တာင် အီ လှူ ဒီ ဇဝ်ဖြာ ဘော ဂေ ဒူအီ ခြိုဝ် အာလေဝီ ဘော ဂေ ဒူအီ အီဆာရေလ ဘောကာဂ့လျီတ်၊ တဲး ဂေ ဒိူင်၊ တဲး ဂေ ခမ် ကာဒိက် ဆတ်ဇာ ဒီ ဒူပ် အာကျာမ် အာငျာန် ပီ ကာလာင် အာဆေခါနီ တွိုန်။ ဂေ မိူဝ် ဒိူင် ခမ် အူ ဇေန့်။ 6 ပန် တီ အာအေဆာရာ ဘော ဝီ ယိတ့် ဒူင် ကွယ် အန် ဒီ အာတ့် ဟုဝ် ဇဝ်ဖြာ တွိုန်၊ ဝီ ဟာဝ် လိုပ် ခဲင် ဒူင် အိတ် အာယေဟုဝ်နန် အီ မုး ဂွန် အာအေလာဆေပ်။ ကူပ် မှာပ် ပဲ့ ဟဲ့ ဘူင် ဂေ ဒူအီ အီ ဟဲ့ ဝီ တး ဇမ် ခဲင် မိူင် ဂေ၊ အန် ဘော က့လိုဝ် ဘော ငှဝ် ဒေါ ကွယ် အန် ဒီ တီ။ အန် မိူဝ် တူ ဟူမ် တူ ဒျီင် မာဆေ။

7 ဂေ ဘော ကာလာင် တဲး ဒွန် အီ အီ ကွယ် ခဲင် မိူင် ယူဒါ ဘော ခဲင် မိူင် ယေရူဆာလဲမ် ဘော ပွိုန် ဒီ ထူမ်၊ တဲး ဂေ နပ်၊ တဲး ဂေ ဒူအီ အီ ဟဲ့ ဝီ တး ဇမ် ခဲင် မိူင် ဂေ၊ ဝီ တး ကာဇု တူတ့် ဒီ မိူင် ယေရူဆာလဲမ်။ 8 ဆေ န့ ဘော မိုဝ်း အီ လုတ် အီ တူ တး ကာန်ု အူယ် ဆီငဲ၊ ဆေ အန် တူ ဒူပ် ပီ ဆုင်ဖျာတ် ဂေ ဒါ တာင် ဘော ဂေ ဒါ ကာညာ အီ အိုပ် မိူင်၊ န့ လုဝ် ဒိုဝ်း တူတ့် ခဲ့ ကွယ် ကြုဝ်ကြာမ် အန်၊ ဝဲန် ဘော အန်၊ ကွဲ့ ဟူ တဲး အန် ကွယ် ခဲင် ဖိုင် ဂေ ဒူအီ အီဆာရေလ။

9 ဝါယ် အူယ် ဆီငဲ တီ၊ ဒူအီ အီ ကွယ် ခဲင် မိူင် ယူဒါ ဘော ခဲင် မိူင် အာဘေန်ယာမ်၊ ဂေ ဘောကာဂ့လျီတ် ဟဲ့ တး ကာဇု ဒီ မိူင် ယေရူဆာလဲမ်။ ဒေါ မုး မာဂျီန် န့ဒိမ်၊ ဆီငဲ အာ ဂိုဝ်၊ ဂေ တး ကာဇု ဒီ ဂ့လင် အီ ကွယ် ဒီ အာတ့် ဟုဝ် ဇဝ်ဖြာ။ ဒူအီ ဒွန် အီ ဘော ယုဝ် ကာဆဝ် ကူပ် ဇိုဝ် တီ ဟဲ့ မိုဝ်း ဒီ လွင် ဒီ ဒါင်။ ဂ့လာယ် မိူဝ် ဟဲ့ စုဝ်း ဟဲန့် ကာဆဝ်၊ တူ တဲး ဂေ ကွယ် ဒါခိုယ်။ 10 ဒါ အီ လှူ ဒီ ဇဝ်ဖြာ အီ စိူဝ် အာအေဆာရာ ဘော ယိတ့် ကာလာင် ဒီ ဂေ တဝ်း၊ “ဘေ နီ ဘေ ဟဲ့ ဟွတ့် လုတ့်။ ဘေ ဟဲ့ ဒိုဝ်း အီဘိုန့် အီ မုး ဒူအီ အာမျုဝ် ဟဝ်၊ တဲး မှာပ် အေ ဒူအီ အီဆာရေလ ဝဲ ကိူန်။ 11 ပါယ် တီ တဲး ဘေ ဝီ ဆာခိုဝ် ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဂုန့် ဒင် ဘေ၊ တဲး ဘေ ဝီ ကာလာင် မှာပ် ဘေ၊ တဲး ဘေ ဝီ ဘူင် ဒူပ် ပီ အိုင် အန် ဇဝ်။ တဲး ဘေ လာယ် ကာယဝ်း ဒီ ဒူအီ အီ ကွယ် ခဲင် မိူင် နီ၊ ဝဲန် ဘော အီဘိုန့် ဘေ အီ မုး ဒူအီ အာမျုဝ် ဟဝ် တီ။”

12 ခဲ့ ကွယ် ဒူအီ ဂေ တွိုန်၊ ဂေ ဘောကာဂ့လျီတ် ဘော ဝီ ကာဖြူမ် ဒီ ကာလာင် တဲး န့ မုး အူ မျုဝ်။ ဂေ တဝ်း၊ “အိုဝ်၊ ဂြုဝ်း မဲ ဟဲ့ မုး ဟဲ့ မှာန်။ ယေ လုဝ် ဘူင် ခဲ့ ပီ တဝ်း မဲ တီ။” 13 မာလဲ၊ ဖိုင် အေ ဟဲ့ ဘဲန် ဒူအီ ကိူန် ကာဆဝ်။ ဂ့လာယ် မိူဝ် ဟဲ့ စုဝ်း တာင် ကာဆဝ်။ ယေ အာဝ် ဟူ ခမ် ဒီ စွင့် ခဲင် ဂ့လင်ဂ့လဲန့် နီ။ ယေ မိူဝ် ဟဲ့ ကိူန် အီ ဟဲ့ ဘူင် လုတ့် လွင် အန် တီ။ ယေ မိူဝ် တူ ပွိုန် ဘူင် တဲး န့ ဟွတ့် အူ ဆီငဲ အာ ဆီငဲ။ မှာပ် ယေ ဟဲ့ ကိူန် လွင် ဒါင် အန် တီ။ 14 မှာန့်၊ တဲး ဂေ ဒါ ကာညာ အီ အိုပ် အေ ဘူင် အာမူ တီ ဒါင် အေ ခဲင် မိူင် အေ။ ဆေ န့ မိုဝ်း ဒူအီ အီ ဟဲ့ ဒိုဝ်း အီဘိုန့် အာမျုဝ် ဟဝ်၊ တဲး ဂေ ဒါ တာင် အီ အိုပ် မိူင် ဘော ဂေ ဒါ တာင် အီ ဆုင်ဖျာတ် ဒါရာ ဝီ ဒဲ့ ဒူအီ ဇိုဝ် တီ၊ ဆုင်ဖျာတ် အာမူ ဂေ ဘဲန် ဝီ ဘဲန် ဝီ၊ တဲး နဝ်း ရူ ဇဝ်ဖြာ ဘော ကြဲ ဒီ ယူမ်၊ တဲး အာရေ အန် တီ ကော ဟွတ့်၊ တဲး န့ ကော ဝီ ယေန် ဒွန် မျုဝ်။” 15 ဂေ ဒွန် အီ ဟဲ့ ဖြူမ် လွင် အန် တီ။ န့ မိုဝ်း မီ အာယုဝ်နာထာန် အီ မုး ဂွန် အာဆာဟေလ ဘော အာယဟာစီ အီ မုး ဂွန် အာတီကာဝါ ဘော အာမေဆူလမ် ဘော အာဆာပါဆေ အီ မုး ဒူအီ ခြိုဝ် အာလေဝီ၊ ဂေ ဟဲ့ ခတ် ခဲန့် လွင် အန် တီ။

16 ခဲ့ ကွယ် ဂေ ဒူအီ အီ ဟဲ့ ဝီ တး ဇမ် ခဲင် မိူင် ဂေ၊ ဂေ ဘော ထူမ် လွင် အန် တီ။ ဒါ အီ လှူ ဒီ ဇဝ်ဖြာ အာအေဆာရာ ဘော ရဝ်း ဂေ အီ မုး ဂိန့် န့ဟူမ် အာဒါ န့ကြိုဝ်း န့ကြာတ့် အူ မျုဝ် အူ ဝီ။ အန် ဘော ဒဲမ် အုန် စိူဝ် ဂေ။ ဒေါ ဟဲ့ ဇမ် မာဂျီန် ဂိုဝ်၊ ဆီငဲ ဟာလှေး ဂေ ဟဲ့ စုး ဒီ ဆုင်ဖျာတ် အာမူ ဂေ တီ။ 17 ဂေ ဒီ ဘော ဆုင်ဖျာတ် တဲး န့ ကော ဟွတ့် အာမူ ဂေ ဒူအီ အီ ဒိုဝ်း အီဘိုန့် အာမျုဝ် ဟဝ်။ ဒေါ ဇမ် မာဂျီန် ဒေါ ဂုဝ်၊ ဆီငဲ ဒေါ ဂုဝ်၊ ဂေ ဟဲ့ ဘူင် တဲး န့ ဟွတ့် တူတ့် ဒွန် မျုဝ်။

18 န့ မိုဝ်း လှုက်လှာန် ဂေ ဒါ အီ လှူ ဒီ ဇဝ်ဖြာ၊ ဂေ အီ ဒိုဝ်း အီဘိုန့် ဒူအီ အာမျုဝ် ဟဝ်။ ဇာရာင် ဂေ ဒူအီ ဂေ တီ၊ န့ ပါယ် နီ။

ခဲင် လှုက်လှာန် အာယောဆူ ဘော လှုက်လှာန် ဝါ အန် အီ မုး ဂွန် အာယောဇာဒက်၊ န့ ဘော မုး အာမာအာဆေယာ၊ အာအေလီအေဇာ၊ အာယာရိပ် ဘော အာကေတာလီ။

19 ဂေ မိူဝ် ဟဲ့ ခမ် ကာဒိက် ဆတ်ဇာ ဒီ ဝဲန် အီဘိုန့် ဂေ။ ဂေ ဘော ဒိုဝ်း မာဘူ အာလူင့်၊ ဝီ လှူ တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ် ဂေ။

20 ခဲင် လှုက်လှာန် အာအီမေရာ န့ ဘော မုး အာဟာနာနီ ဘော အာဇေဘာဒီ။

21 ခဲင် လှုက်လှာန် အာဟာရိမ် န့ ဘော မုး အာမာအာဆေယာ၊ အာအေလီယာ၊ အာဆေမာယာ၊ အာယေဟီလာ ဘော အာအူဇီယာ။

22 ခဲင် လှုက်လှာန် အာဘာဆူရာ န့ ဘော မုး အာအေလီအောနေ၊ အာမာအာဆာယာ၊ အာဆာမာန်၊ အာနေထာနေလာ၊ အာယောစာဘာတ် ဘော အာအေလာဆာ။

23 ခဲင် ခြိုဝ် အာလေဝီ န့ ဘော မုး အာယောစာဘာတ်၊ အာဆီမီ ဘော အာမေလာယာ အီ ဘော စိူဝ် အာဝေ၊ အာဘေဆာဟီ၊ အာယူဒါ ဘော အာအေလီအေဇာ။

24 ခဲင် ဂေ ဒူအီ အီ နပ် ဒီ တဝ်း မှုဝ်၊ န့ ဘော မုး အာအေလာဆေပ်။

ခဲင် ဖိုင် အီ ဘ်ု မာလုဝ်း ဟုဝ် ဇဝ်ဖြာ န့ ဘော မုး အာဆာလူမ်၊ အာဒေလိမ် ဘော အာအူရီ။

25 ဇာရာင် ဂေ ဒူအီ အီဆာရေလ ဝီ ဟဝ်၊ န့ ပါယ် နီ။

ခဲင် လှုက်လှာန် အာဘာရူတ်၊ န့ ဘော မုး အာရာမီ၊ အာယေစီမာ၊ အာမာလာခီယာ၊ အာမီယာမိန်၊ အာလေအာဆာ၊ အာမာလာခီယာ ဘော အာဘီနာယာ။

26 ခဲင် လှုက်လှာန် အာအေလမ်၊ န့ ဘော မုး အာမာထာနီ၊ အာဆာခါရာ၊ အာယေဟီလာ၊ အာဖာဒီ၊ အာယေရေမူတ် ဘော အာအေလီယာ။

27 ခဲင် လှုက်လှာန် အာစာတု၊ န့ ဘော မုး အာအေလီအောနေ၊ အာအေလာဆေပ်၊ အာမာထာနီ၊ အာယေရေမူတ်၊ အာဇာဘာတ် ဘော အာစီစာ။

28 ခဲင် လှုက်လှာန် အာဘေဘေ၊ န့ ဘော မုး အာယေဟုဝ်နန်၊ အာဟာနာနီယာ၊ အာစာဘေ ဘော အာထာလေ။

29 ခဲင် လှုက်လှာန် အာဘာနီ၊ န့ ဘော မုး အာမေဆူလီအမ်၊ အာမာလုက်၊ အာတာယာ၊ အာယာဆူပ်၊ အာဆာလာ ဘော အာယေရေမူတ်။

30 ခဲင် လှုက်လှာန် အာဘာဟာတ်မုဝ်အာပ်၊ န့ ဘော မုး အာအာတ်နာ၊ အာခ့လဝ်ယာ၊ အာဘီနာယာ၊ အာမာအာဆေယာ၊ အာမာထာနီ၊ အာဘေဇာလေန်၊ အာဘီနူအီ ဘော အာမာနာဆေ။

31 ခဲင် လှုက်လှာန် အာဟာရိမ် န့ ဘော မုး အာအေလီအေဇာ၊ အာအီဆာယ၊ အာမာလာခီယာ၊ အာဆေမာရီ၊ အာဆီမေအူန်၊ 32 အာဘေန်ယာမ်၊ အာမာလုက် ဘော အာဆေမာရီ။

33 ခဲင် လှုက်လှာန် အာဟာဆူမ် န့ ဘော မုး အာမာတာနေ၊ အာမာတထာ၊ အာဇာဘာတ်၊ အာအေလီဖေလေတ်၊ အာယေရာမေ၊ အာမာနာဆေ ဘော အာဆီမီ။

34 ခဲင် လှုက်လှာန် အာဘာနီ န့ ဘော မုး အာမာဒေအာ၊ အာမာရမ်၊ အာအူအေန်၊

35 အာဘီနာယာ၊ အာဘေဒီယာ၊ အာခေလူဟီ၊

36 အာဟီဝါ၊ အာမေရေမုတ်၊ အာအေလာဆေပ်၊

37 အာမာထာနီ၊ အာမာတာနေ ဘော အာယာဆော။

38 ခဲင် လှုက်လှာန် အာဘီနူအီ န့ ဘော မုး အာဆီမီ၊

39 အာဆေလာမီ၊ အာနာထာန်၊ အာတာယာ၊

40 အာမာခါနာ၊ အာစာဘာတ်၊ အာဆေဆာရာ၊

41 အာစာရေန်၊ အာဆေလာမီ၊ အာဆေမာရီ၊

42 အာဆာလူမ်၊ အာမာရီယာ ဘော အာယုဝ်။

43 ခဲင် လှုက်လှာန် အာနေပေါ န့ ဘော မိုဝ်း အာယေယီလာ၊ အာမာဒီဆီ၊ အာဇာဘာတ်၊ အာစေဘီနာ၊ အာယာဒါယာ၊ အာယုဝ်အေလ ဘော အာဘီနာယာ။

44 ဒူအီ ဂေ တီ ဘောကာဂ့လျီတ်၊ ဂေ ဟဲ့ ဒိုဝ်း တူတ့် အီဘိုန့် အီ မုး ဒူအီ အာမျုဝ် ဟဝ်။ ဂေ ဘော ဝဲန် အီဘိုန့် ဂေ တီ။ မင် အီ မိူဝ် ဟဲ့ မိုဝ်း ဂွန် ဒီ ရိုမ် ဒူပ် အီဘိုန့် ဂေ တီ။ ဘော ဂွန် ဂေ တီ လုဝ် ဟာဝ် ဒူပ် မာ ဂေ။