1 ဝါယ် အန် တီ န့ ဘော မုး ဒါ တာင် လှူ ဒီ ဇဝ်ဖြာ အီ စိူဝ် အာအေလာဆေပ် ဘော ဂေ ဘီနွင် အန် အီ မုး ဒါ အီ လှူ ဒီ ဇဝ်ဖြာ၊ ဂေ ဝီ စုး ဒီ ဝီ ဂုဝ် ဝီ မ့ပြာယ် မာလုဝ်း ရဲင် မိူင် အီ စိူဝ် မာလုဝ်း မာဘူ။ ဟဲ့ ဟွတ့်၊ ဂေ ဘော လှူ ဘ့လ မာလုဝ်း ဘော ဟပ် ဒီ မာ မာလုဝ်း။ ဂေ ဘော ဝီ ဘူင် ဟာဝ် ရဲင် မိူင်၊ တဲး န့ ကော ဇမ် ဒီ ဟုဝ် စာ အီ စိူဝ် ဟုဝ် စီမေအာ၊ ဝီ ဘူင် ဟာဝ် ဇမ် ဒီ ဟုဝ် စာ အီ စိူဝ် ဟုဝ် စီဟာနာနေလာ။ ဟဲ့ ဟွတ့်၊ ဂေ ဘော လှူ။ 2 ဂေ အီ ဝီ ဆိူပ် ဟာဝ် ဒီ တီ၊ န့ ဘော မုး ဒူအီ အီ တး ခဲင် မိူင် ယေရီခုဝ်။ အီ ဝီ ဆိူပ် ဂေ တီ ဘော ဝီ မုး အာဇာကူရာ အီ မုး ဂွန် အာအီမာရီ။

3 ဂေ လှုက်လှာန် အာဟာဆေနာ ပီ ဝီ မ့ပြာယ် မာလုဝ်း အီ စိူဝ် မာလုဝ်း ဂါ။ ဂေ ဘော ဝီ ဟပ် မာ မာလုဝ်း ဘော ဘ့လ မာလုဝ်း။ ဂေ ဟပ် ဘော ခတ်ဆဝ် ဘော ဆဲ အန်။ 4 အီ ဝီ ဆိူပ် ဟာဝ် ဒါမ် ဒီ တီ၊ ဘော ဝီ မုး အာမေရေမုတ် အီ မုး ဂွန် အာအူရီယာ ဘော လှာန် အာဟာခူတ် တွိုန်။ အီ ဝီ ဆိူပ် ဒါမ် အန် တီ ဘော ဝီ မုး အာမေဆူလမ် အီ မုး ဂွန် အာဘေရေက် ဘော လှာန် အာမေစာဘေန်။ အန် ဘော ဝီ ဂုဝ် ဝီ ဘူင် ဟာဝ်။ အီ ဝီ ဆိူပ် ဒါမ် အန် တီ ဘော ဝီ မုး အာဇာဒူက် အီ မုး ဂွန် အာဘာနာ။ 5 အီ ဝီ ဆိူပ် ဒါမ် ဒီ တီ ဘော ဝီ မုး ဂေ ဒူအီ အီ တး ခဲင် မိူင် ဒေကော။ မာလဲ၊ ဂေ အီ မုး ဒါ တာင် ခဲင် မိူင် တီ၊ ဂေ ယီ တူ ဘူင် တူ စွယ် မာဆေ။ ခုဝ်၊ ဂေ တူ ခမ် ပီ စ်ု ဒါ အီ အိုပ် ဂါန် တီ။

6 အာယေဟောယာဒါ အီ မုး ဂွန် အာဖာဆေယာ ဘော အာမေဆူလမ် အီ မုး ဂွန် အာဘေဆောခီယာ၊ ဂေ ဘော ဝီ မ့ပြာယ် မာလုဝ်း အီ စိူဝ် မာလုဝ်း ဘြိမ် တွိုန်။ ဂေ ဘော ဝီ ဟပ် မာ မာလုဝ်း၊ ဘော ဘ့လ မာလုဝ်း၊ ဟပ် ဘော ခတ်ဆဝ် ဘော ဆဲ အန်။ 7 အာမေလ အီ တး ခဲင် မိူင် ကီပွင် ဘော အာယာဒူန် အီ တး ခဲင် မိူင် မေရောနွတ် ဘော ဂေ ဒူအီ ခဲင် မိူင် ကီပွင် အီ မုး ဒူအီ ပီ အိုပ် ဒါ ကာညာ အီ ကွယ် ဘ့လာက် နာ ဂေတ့် ဆီငဲ အိုမ် ဘ့လဲင် အူဖာရာတ်၊ ဂေ ဘောကာဂ့လျီတ် ဘော ဝီ ဂုဝ် ဝီ ဘူင် ဟာဝ်။ 8 ဒါ အီ နပ် ဒီ စိုမ် ခြိဝ် အီ စိူဝ် အာအူဆီအေန်၊ အီ မုး ဂွန် အာဟဟာယာ၊ အန် ဘော ဝီ ဂုဝ် ဝီ ဆိူပ် ဟာဝ် ဒီ တီ။ ဒါ ဆာရာ အီ နပ် ဒီ ဘူင် နာမန် အုး ငှုန် အီ စိူဝ် အာဟာနာနီယာ၊ အန် ပီ ဘော ဝီ ဆိူပ် ဒီ တီ။ ဂေ ဝီ ဂုဝ် ဘူင် တဲး ရဲင် မိူင် ယေရူဆာလဲမ် ကော ဆီချာ၊ တဲး ကော ဝီ ဇမ် ဒီ ဒူင် အီ စိူဝ် ရဲင် ကာဝဝ်း။ 9 အီ ဝီ ဆိူပ် ဒီ တီ ဘော ဝီ မုး အာရေဖာယာ အီ မုး ဂွန် အာဟူရာ။ အန် မုး ဒါ ကာညာ အီ အိုပ် မိူင် ယေရူဆာလဲမ် အာဒါ အူ ဘ့လာက်။ 10 အာယီတာယာ အီ မုး ဂွန် အာဟာရူမာပ် ဘော ဝီ ဆိူပ် ဒီ တီ၊ ဘော ဝီ ဂုဝ် ဝီ ဘူင် ဟာဝ် ဒူင် ကွယ် ကာဆိူဝ် ကာင် အန် တွိုန်။ အီ ဝီ ဆိူပ် ဒါမ် အန် တီ၊ န့ ဘော ဝီ မုး အာဟာဒုတ် အီ မုး ဂွန် အာဟာဆာဘာနီ။ 11 အာမာလာခီယာ အီ မုး ဂွန် အာဟာရိမ် ဘော အာဟာဆူပ် အီ မုး ဂွန် အာဘာဟာတ်မုဝ်အာပ်၊ ဂါယ် ပီ ဘော ဝီ ဂုဝ် ဝီ ဘူင် ဟာဝ် ဘော မ့ပြာယ် ဟုဝ် စာ အီ ကွယ် ဒူင် မိုဝ်း ကာဝှါင် ငဝ်။ 12 အာဆာလူမ် အီ မုး ဂွန် အာဟာလော အီ မုး ဒါ ကာညာ အီ အိုပ် မိူင် ယေရူဆာလဲမ် အာဒါ ပေါ အူ ဘ့လာက်၊ အန် ဘော ဝီ ဂုဝ် ဝီ ဘူင် ဆိူပ် ဟာဝ် ဒီ တီ။ ဂွန် ဒီဘျာ အန် မိူဝ် စွယ် အန်။

13 အာဟာနုန် ဘော ဂေ ဒူအီ ခဲင် မိူင် စာနော၊ ဂေ ဘော ဝီ ဂုဝ် ဝီ ဘူင် ဘာင် မာလုဝ်း အီ ကွယ် ခူပ် ဒီလယ့်။ ဂေ ဘော ဝီ ဒိုဝ်း မာ မာလုဝ်း ဘော ဘ့လ မာလုဝ်း ဝီ ဟပ်။ ဂေ ဘော ဟပ် ခတ်ဆဝ် ဘော ဆဲ အန်။ ဂေ ဘော ဝီ ဘူင် ဘော ရဲင် မိူင် အီ တူင့် အာဒါ အူ ဟြဲန့် ကာနိး။ န့ ကော ဝီ ဟာဝ် ဇမ် ဒီ မာလုဝ်း အီ စိူဝ် မာလုဝ်း အျီင် မက်။

14 န့ ယီ မုး အာမာလာခီယာ အီ မုး ဂွန် အာရေခါပ်၊ အန် မုး ဒါ ကာညာ အီ အိုပ် ဒူင် စိူဝ် ဘေတ်ဟာခါရိမ်။ အန် ဘော ဝီ ဂုဝ် ဝီ ဘူင် မာလုဝ်း အီ စိူဝ် မာလုဝ်း အျီင် မက် တီ။ အန် ဘော ဝီ ဟပ် ဘော ဘ့လ မာလုဝ်း ဘော ခတ်ဆဝ် ဘော ဆဲ အန်။

15 အာဆာလူမ် အီ မုး ဂွန် အာကောလာဟာစာ အီ မုး ဒါ ကာညာ အီ အိုပ် မိူင် မီဇာဖာ အာဒါ အူ ဘ့လာက်၊ အန် ဘော ဝီ ဂုဝ် ဝီ ဘူင် မာလုဝ်း အီ စိူဝ် မာလုဝ်း တုဝ်း အိုမ်။ အန် ဘော ဝီ တပ် မာလုဝ်း တီ၊ ဘော ဟပ် ဘော မာ မာလုဝ်း ဘော ဘ့လ မာလုဝ်း၊ ဟပ် ဘော ခတ်ဆဝ် ဘော ဆဲ အန်။ ဒီ အိုမ် ဒိုင် အီ စိူဝ် အိုမ် ဒိုင် ဆေလ တွိုန်၊ အန် ဘော မ့ပြာယ် ရဲင် မိူင် အီ ကာဒိုက် ဒီ ကာပိုမ် ခုန်ဒီခမ်။ အန် ဘော ဘူင် ဟာဝ်၊ တဲး န့ ကော ဝီ ဟာဝ် ဇမ် ဒီ န့တဲင် အီ လူင် ဒီ မိူင် အာဒါဝိတ် တွိုန်။ 16 အီ ဝီ ဆိူပ် ဒါမ် ဒီ တီ၊ န့ ဘော မုး အာနေဟာမီ အီ မုး ဂွန် အာစာဘုက်။ အန် ဘော မုး ဒါ ကာညာ အီ အိုပ် မိူင် ဘေတ်ဇူရာ အာဒါ အူ ဘ့လာက်။ အန် ဘော ဝီ ဘူင် ဟာဝ် ကော ဝီ ဇမ် ဒူင် ကာဆိူဝ် ဒီ ဘာရေဝ် အာဒါဝိတ် ဘော အိုမ် ဒိုင် ပီ ဘူင် အုန် ဂေ ဘော ဒူင် ကွယ် ကာင် ဂေ ဒါ ဆိုက်။

17 အီ ဝီ ဆိူပ် ဒါမ် ဒီ တီ ဘော မုး ဒူအီ ခြိုဝ် အာလေဝီ။ န့ ဘော မုး အာရေဟုမ် အီ မုး ဂွန် အာဘာနီ အီ ယဲတ့် ဂေ။ အာဟာဆာဘီ အီ မုး ဒါ ကာညာ အီ အိုပ် မိူင် ဂီလ၊ အန် ပီ ဘော ဝီ ဂုဝ် ဝီ ဘူင် ဟာဝ် ခဲ့ ပီ လုဝ် ဘူင် ဂေ ဒူအီ ခဲင် မိူင် ပီ အိုပ် အန်။ 18 ဂေ ဘီနွင် အီ ကွယ် ခဲင် မိူင် ဂီလ ပေါ ဘ့လာက်၊ ဘော အာဘာဝေ အီ မုး ဂွန် အာဟေနာတ၊ အီ အိုပ် မိူင် ဂီလ အာဒါ ပေါ အူ ဘ့လာက် တွိုန်၊ ဂေ ပီ ဝီ ဂုဝ် ဝီ ဆိူပ် ဟာဝ် ဒီ တီ။ 19 အာအေဇေန် အီ မုး ဂွန် အာယောဆူ၊ အန် မုး ဒါ ကာညာ အီ အိုပ် မိူင် မီဇာဖာ။ အန် ပီ ဝီ ဂုဝ် ဝီ ဆိူပ် ဟာဝ် အာဒါ အူ ပွတ်။ အန် ဘော စုး နာ အာတ့် ဒူင် အုန် ဂေ ခြိုင် ကာဂုဝ်း ကော ဝီ ဇမ် ဒီ ကာတုဝ့် ရဲင် မိူင် တွိုန်။ 20 အာဘာရက် အီ မုး ဂွန် အာစာဘေ၊ အန် ဝီ ဂုဝ် ဝီ ဆိူပ် ဟာဝ်။ အန် ဘော စုး ဒီ ကာတုဝ့် ရဲင် မိူင် တီ၊ ကော ဝီ ဟာဝ် ဇမ် ဒီ ဘာင် မာလုဝ်း ကာင် ဒါ တာင် အီ လှူ ဒီ ဇဝ်ဖြာ အီ စိူဝ် အာအေလာဆေပ်။ 21 အာမေရေမုတ် အီ မုး ဂွန် အာအူရီယာ ဘော လှာန် အာဟာခူတ် တွိုန်၊ အန် ဝီ ဂုဝ် ဝီ ဆိူပ် ဟာဝ်။ အန် ဘော စုး ဒီ ဘာင် မာလုဝ်း ကာင် အာအေလာဆေပ် တွိုန်၊ ကော ဝီ ဟာဝ် ဇမ် ဒီ ကာတုဝ့် ကာင် အန်။

22 ဂေ ဒါ အီ လှူ ဒီ ဇဝ်ဖြာ အီ ကွယ် ခဲင် ဂ့လင်၊ ဂေ ဝီ ဂုဝ် ဝီ ဆိူပ် ဟာဝ် ဒါမ် ဒီ တီ။ 23 အာဘေန်ယာမ် ဘော အာဟာဆူပ် ဝီ ဂုဝ် ဝီ ဆိူပ် ဟာဝ် ကာဆိူဝ် ကာင် ဂါယ်။ အီ ဝီ ဆိူပ် ဒါမ် ဂါယ် တီ၊ ဘော မုး အာဇာရီယာ အီ မုး ဂွန် အာမာအာဆေယာ ဘော လှာန် အာနာနီယာ၊ ဘော အန် ဝီ ဂုဝ် ဝီ ဘူင် ဟာဝ် အီ ကွယ် ခူပ် ကာင် အန်။ 24 အာဘီနူအီ အီ မုး ဂွန် အာဟေနာတ၊ အန် ပီ ဝီ ဂုဝ် ဝီ ဆိူပ် ဟာဝ် စုး ဒီ ကာင် အာဇာရီယာ ကော ဝီ ဟာဝ် ဇမ် ဒီ ကာတုဝ့် ရဲင် မိူင်။ 25 အာဖာလ အီ မုး ဂွန် အာအူစေ ပီ ဘော ဝီ ဂုဝ် ဝီ ဆိူပ် ဟာဝ်။ အန် ဘော စုး ဒီ ကာတုဝ့် ရဲင် မိူင် အီ ကွယ် ကာတတ် ဟုဝ် စာ အီ ချြီ့ ဟုဝ် ခုန်ဒီခမ် ကာတု ကွာ။ န့ ဘော ကွယ် ကာတတ် ဝဲင် ကာပိုမ်။ အာဘေတာယာ အီ မုး ဂွန် အာဘာရူတ် ဝီ ဆိူပ် ဟာဝ် ဒီ တီ။ 26 ဘော ဂေ ဒူအီ အီ ဘူင် ဂါန် ခဲင် ဟုဝ် ဇဝ်ဖြာ၊ ဂေ ဘော ဝီ ဆိူပ် ဟာဝ်။ ဂေ မုး ဒူအီ အီ ကွယ် ဒူင် အီ စိူဝ် အောဖီလာ။ ဂေ ဘော ဘူင် ဟာဝ် ဇမ် မာလုဝ်း အီ စိူဝ် မာလုဝ်း အိုမ်။ ဒူင် တီ၊ န့ ကွယ် ဘ့လာက် နာ လေး ဆီငဲ ဒီ ဟုဝ် စာ အီ ဝီ ပဲန် လေး နာ ရေတ့်။ 27 ဂေ ဒူအီ အီ ကွယ် ခဲင် မိူင် ဒေကော ပီ ဝီ ဂုဝ် ဝီ ဆိူပ် ဟာဝ် အာဒါ အူ ပွတ်။ ဂေ ဘော စုး ဒူင် လာယ် ကာဆိူဝ် ဒီ ဟုဝ် စာ အီ ဝီ ပဲန် လေး နာ ရေတ့် တွိုန်၊ ကော ဝီ ဟာဝ် ဇမ် ဒီ ဒူင် စိူဝ် အောဖီလာ။

28 အီ ဝီ ဆိူပ် ဒါမ် ဒီ တီ၊ န့ ဘော မုး ဖိုင် ဂေ ဒါ အီ လှူ ဒီ ဇဝ်ဖြာ။ ဂေ ဘော ဝီ ဂုဝ် ဝီ ဘူင် စုး ဒီ ဘာင် မာလုဝ်း အီ စိူဝ် မာလုဝ်း မင်ပြွင့် ဝီ ဟုဝ့် ဘ့လာက် နာ ကွာ။ ဒွန် အီ ဘူင် ကာဆိူဝ် ကာင် အာဆေ ကာင် အန်။ 29 အီ ဝီ ဆိူပ် ဒါမ် ဂေ တီ၊ န့ ဘော မုး အာဇာဒူက် အီ မုး ဂွန် အာအီမေရာ။ ဘော အန် ဝီ ဂုဝ် ဝီ ဘူင် ဟာဝ် အာဒါ အူ ပွတ် အီ လာယ် ကာဆိူဝ် ဒီ ကာင် အန်။ အီ ဝီ ဆိူပ် ဒီ တီ ဘော မုး ဒါ တာင် အီ ဘ်ု မာလုဝ်း အီ စိူဝ် မာလုဝ်း နာ လေး ဆီငဲ။ အန် စိူဝ် အာဆေမာယာ အီ မုး ဂွန် အာဆေခါနီ။ 30 အီ ဝီ ဆိူပ် ဒါမ် ဒီ တီ၊ ဘော မုး အာဟာနာနီယာ အီ မုး ဂွန် အာဆေလာမီ ဘော အာဟာနုန် အီ မုး ဂွန် အာဇာလာပ်။ အန် မုး ဂွန် အာဇာလာပ် ဝီ န့ဒဝ်။ ဂါယ် ဘော ဝီ ဂုဝ် ဝီ ဘူင် ဟာဝ် အာဒါ ပေါ အူ ပွတ်။ အာမေဆူလမ် အီ မုး ဂွန် အာဘေရေက်၊ အန် ဝီ ဂုဝ် ဝီ ဘူင် ဟာဝ် အာဒါ အူ ပွတ် အီ ကွယ် နာ အာတ့် ကာင် အန်။ 31 အီ ဝီ ဆိူပ် ဒါမ် ဒီ တီ ဘော မုး အာမာလာခီယာ အီ မုး ဒါ အီ နပ် ဒီ စိုမ် ခြိဝ်။ အန် ဘော ဝီ ဂုဝ် ဝီ ဘူင် ဟာဝ် ကော ဝီ ဇမ် ဒူင် ကွယ် ကာင် ဂေ အီ ဘူင် ဂါန် ခဲင် ဟုဝ် ဇဝ်ဖြာ။ ဂေ ဘော ဝီ ဘူင် ဟာဝ် ဇမ် ဒူင် ကွယ် ဂေ ဒူအီ အီ ယွင့် ကြုဝ် ဒီ ဘာင် မာလုဝ်း အီ မုး မာလုဝ်း ဒူင် ဟပ် ဂေ ဇာရာင် ဒူအီ၊ ဘော ဝီ ဟုဝ့် ဇမ် ဘ့လာက် နာ ကွာ ကာတုဝ့် ရဲင် မိူင်။ 32 ဂေ ဒါ အီ နပ် ဒီ စိုမ် ခြိဝ် ဘော ဂေ ဒါ အီ ယွင့် ကြုဝ်၊ ဂေ ဝီ ဂုဝ် ဝီ ဘူင် ဟာဝ်။ ဂေ ဘော ဝီ စုး ဘ့လာက် နာ ကွာ ကာတုဝ့် ရဲင် မိူင် တွိုန်၊ ဝီ ဘူင် ဟာဝ် တဲး န့ ကော ဝီ ဟာဝ် ဇမ် မာလုဝ်း အီ စိူဝ် မာလုဝ်း မာဘူ အီ မုး ဒူင် ဟဲ့ စုး ဂေ ဒီ မ့ပြာယ် ရဲင် မိူင် တီ။