1 ဒေါ ယိုဝ် အာဆန်ဘာလာတ် လွင် ဟဲ့ ဝီ ကာစုး ယေ ဒီ ဝီ မ့ပြာယ် ရဲင် မိူင် တီ၊ အန် တူ အိုင် ဘော ရူ ကာဆဝ်။ အန် ဘော လုက်တာယ် ဘော ကာညး ဂေ ဒူအီ အာမျုဝ် အာယူဒါ။ 2 အန် ဘော ကာလာင် ဒီ အာတ့် ဘီနွင် အန် ဘော ဒီ အာတ့် ဂေ ဒါ ဆိုက် ခဲင် မိူင် ဆာမာရီ တဝ်း၊ “ဂေ ဒူအီ အာယူဒါ ဂေ တူ အး တူ ခ်ု မာဆေ။ မာဆေ ပီ ခြာမ် ဂေ ဒီ ဘူင်။း ဂေ ထာင် ဂေ ဒီ ပွိုန် ဒီ ဝီ ဆမ် မိူင် ဂေ။း ဂေ ဆီ ရဲန် ပီ ဒီ လှူ ဂေ။း ဂေ ထာင် ဂေ ဒီ ဘူင် တဲး န့ ဟွတ့် အာဒါ အူ ကာစန်။း မိူင် ဂေ ဟဲ့ ဟွတ့် ကာပျာတ့် လိုဝ် တူတ့်။ ဂေ ဘော ထာင် ဂေ ဒီ ပွိုန် ဒီ ဝီ ဂိုဝ်း လေး မာဝ် အီ ဆီ ကွယ် ခဲင် မ့ပိုမ် ကာဒါယ် ဂေ တီ အီ ဟဲ့ ဟွတ့် ကာဆိုမ် တူတ့်။း”

3 ဒေါ ကာလာင် အန် ဂြုဝ်း တီ၊ န့ ဘော မိုဝ်း အာတောဖီယာ အီ မုး ဒူအီ အာမျုဝ် အမ်မူန်၊ အန် ကွယ် ဒီ တီ ဘော တဝ်း၊ “ဆေ ဂေ ဒီ ဘော ပဲ ဒီ ဘူင် ရဲင် မိူင် မိူဝ်၊ န့ တူ အး မာဆေ။ ဆေ မာဆုဝ် ပြဲ တး ဟုဝ့် နာ ဒဲင် မိူဝ်၊ န့ ဒီ ဝီ ဒီဂ့လဝ်း စုဝ်း တူတ့်။”

4 ပန် တီ အုဝ် ဘော ဝီ ဆာခိုဝ် တဝ်း၊ “အိုယ် ဇဝ်ဖြာ၊ အုဝ် မှာန့်၊ တဲး မဲ ဇဝ် ထူမ် ပီ ဆာခိုဝ် ယေ။ ယေ ဟဲ့ ကာဒုး ဒီ ခမ် ဘဲန် ပီ လုက်တာယ် အီ ဟဝ်။ မှာန့်၊ တဲး ဂေ ဝီ ခမ် ဂြုဝ်း ပီ နဲန ဂေ ဒီ ယေ တီ။ တဲး ဂေ ဝီ ခမ် အီ ဟဝ် မှေတ့် ဟာဝ် ဂေ ဘဲန် မှာယ် ခဲင် မိူင် ဒူအီ အာမျုဝ် ဟဝ်။ တဲး ဂေ စှိုမ် ပါယ် တီ။ 5 ကွဲ့ ဂဝ်း ဝဲန် မှာပ် ပဲ့ ဟဲ့ ဘူင် ဂေ တီ။ ကွဲ့ ပိဝ် မှာပ် ဂေ တီ။ ခုဝ်၊ ဒေါ ဟဲ့ နဲန ဂေ ဒီ ယေ အီ ဘူင် ဂါန် နီ၊ ဂေ ဟဲ့ နဲန ဘော မဲ ဇဝ်။”

6 ပီ ဘော ဟဲ့ ပါယ် တီ မိူဝ်၊ ယေ ဟဲ့ ကာဖြူမ် ဒီ ဘူင် ရဲင် မိူင်။ ယေ ဘော ဘူင် တဲး န့ ဟွတ့် နာ စာ အန် အာဒါ အူ ကာတဲ။ ခုဝ်၊ ဂေ ဒူအီ ဟဲ့ မိုဝ်း နဝ်း ဆီ ဘူင်။

7 အာဆန်ဘာလာတ် ဘော အာတောဖီယာ ဘော ဂေ ဒူအီ အာရာပ်၊ ဒူအီ အမ်မူန် ဘော ဂေ ဒူအီ အာစုတ်၊ ဒေါ ယိုဝ် ဂေ လွင် နဲ့ အီ ဘူင် ဟာဝ် ယေ ရဲင် မိူင် ယေရူဆာလဲမ် ဘော လွင် ဟဲ့ ဝီ ကာဘိတ် ဝီ မ့ပြာယ် ယေ ဒူင် လှုး ဒူင် လိုဝ် ကာပျာတ့် တွိုန်၊ ဂေ ဘော ဝဲ ရူ ကာဆဝ်။ 8 ပါယ် တီ ဂေ ဘော လာယ် ကာမွုန် ဆင်ချာင်၊ တဲး ဂေ ပွိုန် ဒီ တး ကာဂုဝ်း ဒီ မိူင် ယေရူဆာလဲမ်၊ တဲး ဂေ ပွိုန် ဒီ ခြဲ ဂါန် ပီ ဘူင် ယေ။ 9 မာလဲ၊ ယေ ဘော ဝီ ဆာခိုဝ် ဒီ ဇဝ်ဖြာ ဘော တဲး န့ မိုဝ်း ဒူအီ အီ ဘ်ု၊ တဲး ဂေ ဘ်ု မိူင် ဒွင် ဝန် ဒွင် ခိူန် ကူပ် မိုဝ်း ရန်ဆူ ယေ တီ။

10 ဂေ ဒူအီ အာယူဒါ ဘော တဝ်း မှုဝ် အီ ဘျ လွင် ဟဲ့ ညှာပ် ဒီ နဝ်း ဂေ။ ဂေ တဝ်း၊ “ဒူအီ အီ တုဝ် မာဝ် တာင်၊ ဟဲန့် ဂေ ကြဲ ဒီ ယူမ်။ မျုဝ် အီ ကာပျာတ့် လိုဝ်၊ မှဝ် ဒီ ပါယ် ဒီ ဝီ ဆမ်။”

11 ဘော ဂေ ရန်ဆူ ယေ ဝီ တဝ်း၊ “ဂေ တူ ဒီ နပ် တူ ဒီ ယိုဝ် အေ၊ အေ ဒီ ပွိုန် ဒီ လိုပ် ဟာဝ် ကော ဇမ် ကာတဲ ဂေ၊ အေ ဒီ ဘော ပွိုန် ဒီ လိုပ် ဒဲပ် လိုပ် ငဝ်း ယမ် ဂေ၊ ကွဲ့ တဲး ဂေ ပွိုန် ဒီ ဘူင် ဟာဝ် ဂါန် ဂေ၊ တဲး န့ ဂိူတ် ပါယ် တီ။”

12 ဘော ဂေ ဒူအီ အာယူဒါ အီ ကွယ် ကာတဲ ရန်ဆူ ယေ ဂေ တီ ဂေ ဝီ အွန် ဒီ တး ဒွါ ဆာဒိက် ဒီ ယေ ဘဲန် ဇေန့် ဘဲန် ဇေန့်။ ဂေ တဝ်း၊ “ဘေ ဘော ကွယ် ဒီ မှဝ်၊ ဂေ ဒီ တး ကာဂုဝ်း ဒီ ဘေ ဒီ တီ။”

13 ခုဝ် အန် တီ၊ အုဝ် မိူဝ် စ်ု တဲး န့ မိုဝ်း ဒူအီ အီ ဂူင့် ခြိုင် ကာဂုဝ်း၊ တဲး ဂေ ဂူင့် မာပွါ့ လာင် ဂေ ဘ့လာ လျီး ဘော ဘ့လာ အ၊ တဲး ဂေ ဘ်ု ဒူပ် ရဲင် မိူင် ကာဆိူဝ် အီ ညှမ် ပွိုန် ဒီ မ့ပြာယ် ဂေ တွိုန်၊ တဲး ဂေ ဘ်ု ဒူပ် န့ဟူမ် မှဝ် န့ဟူမ် အန်။ 14 အုဝ် ဟဲ့ ဟွတ့် ယွတ် ပီ ပါယ် အာချာက် အန်၊ အုဝ် မိူဝ် ကာလာင် ဒီ ဂေ အာမူ အာမာတ် ဘော ဒီ ဂေ ဒါ ကာညာ အီ အိုပ် မိူင် ဘော ဒီ ဂေ ဒူအီ ကိူန်။ အုဝ် တဝ်း၊ “ကွဲ့ တဲး ဘေ ယုဝ် ရန်ဆူ အေ တီ။ တဲး ဘေ ဝီ လှုဝ်း ဇဝ်ဖြာ ပီ ကြိုပ် အေ၊ ခဲ့ မှဝ် အန် ဟဲ့ တာင် ဟဲ့ မွှိုမ် ယုဝ်။ တဲး ဘေ ကာဂုဝ်း ဒါင် ခြိုဝ် ဘီနွင် ဝေါဝဲ ဘေ၊ ဒါင် လှုက်လှာန် ဘေ ဘော ဒါင် န့ဟူမ်၊ အီဘိုန့် ဂေ ဂွန် ဝါ ဘေ။”

15 ဂေ ရန်ဆူ ယေ တီ ဘော ဝီ နပ်၊ ယေ ဟဲ့ ဟွတ့် နပ် လွင် ပီ ခြာမ် ဂေ ဘော လွင် အာကျာမ် အာငျာန် ဂေ။ ဂေ ဘော ဝီ လှုဝ်း ဒုဝ် ဂေ ဘော ဝီ နပ် ဇဝ်ဖြာ ဟဲ့ ပျာတ့် ဝဲန် ပီ ခြာမ် ဂေ ဒီ ဘူင်။ ဒေါ အန် တီ ယေ ဝီ ကာဖြူမ် ဒီ ဝီ ဟုဝ့် ဂုဝ် ဟုဝ့် ဘူင် ရဲင် မိူင် ကာဆိူဝ် အာဆေ ကာဆိူဝ် အန်။

16 စုး ဆိန့် ဒေါ အန် တီ ဒူအီ အုဝ် အာဒါ အူ ကာတဲ၊ အုဝ် တဲး ဂေ ဘူင် ဂါန်။ အာဒါ ပေါ အူ ကာတဲ၊ အုဝ် တဲး ဂေ ဂူင့် ဘ့လာ လျီး ဂေ မင် ဂွင့် ဘော ဘ့လာ အ၊ တဲး ဂေ စှိုပ် ဘော ဆီတုဝ် ဟိန် ဘော ဘ်ု။ ဂေ ဒါ တာင် ယေ ဘော ကွယ် နာ ပန်၊ ဘ်ု ဒီ စွယ် ဒူအီ အာယူဒါ။ 17 ဂေ အီ ဘူင် ရဲင် မိူင် ဘော ဂေ အီ တုဝ် အီ ဒိုဝ်း တး ခြိုင် ရဲင် မိူင် တီ၊ ခဲင် ဒဲ ဂေ အာဒါ အူ ဘ့လာက်၊ ဂေ ဘော ဂူင့် ခြိုင် ကာဂုဝ်း။ ဒဲ ဂေ အာဒါ ပေါ အူ ဘ့လာက် ဘူင် ဂါန်။ 18 ဂေ ဒူအီ အီ ဘူင် ဂါန် တွိုန် မိူဝ်၊ ဂေ ကာနွင့် မာပွါ့ စှ ဒီ ညွယ် ဂေ ဒွန် အီ။ ဂေ ဒါ အီ ဘ်ု ဒီ ဘုတ် ဝဝ်၊ ဂေ ယီ စွင့် ခူပ် အုဝ်။

19 အုဝ် ဘော ဝီ ကာလာင် ဒီ ဂေ အာမူ အာမာတ် ဘော ဒီ ဂေ ဒါ ကာညာ အီ အိုပ် မိူင် ဘော ဒီ ဂေ ဒူအီ ကိူန် တဝ်း၊ “ဒူင် ဘူင် အေ ဂါန် နီ၊ န့ ဟဲ့ ကာဝဝ်း ကာဆဝ်၊ ဒူအီ အေ အီ ဘူင် ရဲင် မိူင် မိူဝ်၊ ဟဲ့ ကွယ် အူ ဝီ အူ ပ့လုဝ့်၊ န့ ဟဲ့ ရာမ် လာယ် ကာယာန် ကာတူင့် ကာဆဝ်။ 20 ဆေ ဘေ ဟီ ယိုဝ် ဟမ် ဝဝ် နီ ကွယ် ဒီ မှဝ်၊ တဲး ဘေ တး ကာဇု ဒီ တီ။ ဇဝ်ဖြာ ပီ ကြိုပ် အေ ဒီ ကာဂုဝ်း ဒါင် အေ။”

21 ပါယ် တီ ဆိန့် ကာစုး ပြဲ ဒီ ဘ့လာင် ကော ဝီ ဇမ် လေး ဆီမန့်၊ ဒူအီ ယေ အာဒါ အူ ကာတဲ ဘော ဘူင် ရဲင် မိူင်၊ အာဒါ ပေါ အူ ကာတဲ ဂူင့် ခြိုင် ကာဂုဝ်း ဘော ဘ်ု။ 22 ဒေါ အန် တီ အုဝ် ဝီ ကာလာင် ဒီ ဂေ ဒူအီ ကိူန် တဝ်း၊ “တဲး အီမာယ် ဒွန် အီ ဘော ဒဲစေန့် အန် တမ် ခဲင် မိူင်။ ခဲင် မှိုဝ် တဲး ဂေ ဘ်ု မိူင်။ ကာတဲ ဆီငဲ၊ တဲး ဂေ ဘော ဘူင် ဂါန်။” 23 ပါယ် တီ ဘော အုဝ် ဘော ဂေ ဘီနွင် အုဝ် ဘော ဂေ အီ စွယ် အုဝ် ဘော ဒူအီ အီ ဘ်ု မိူင်၊ အာဝ် မိုဝ်း အာဆေ အီ ပွိုန် ဒီ ကာပ့လု လေး ခြိုင် ပီ တာ အန်။ ဒွန် အီ ဘော ဂူင့် ခြိုင် ကာဂုဝ်း ဂေ ဆေဆေ။