1 ဝါယ် အန် တီ ဂေ ဒူအီ ကိူန် ဘော အီမာယ် ဘော အီဘိုန့် ဂေ၊ ဂေ ဘော ပိုန့် ဘော ကာလာင် နာ တူ မွှိုမ် လွင် ဂေ ဒူအီ အာယူဒါ၊ ဂေ အီ မုး အူ ဘီနွင် ဝေါဝဲ။ 2 မင် အီ ဘော တဝ်း၊ “ဒူအီ ခဲင် န့ဟူမ် ယေ ဟဲ့ ကိူန် ကာဆဝ်၊ တဲး ယေ ဟာဝ် ဒိုဝ်း ငှုဝ်၊ တဲး ယေ ပွိုန် ဒီ ဟူမ်၊ ကွဲ့ တဲး ယေ ယမ်။”

3 မင် အီ ဘော တဝ်း၊ “ကူပ် ဟဲ့ မိုဝ်း အာခြာဝ် အေတ့် ဘူမ်၊ ယေ ဟဲ့ ဒိုဝ်း ဒူင် နာ ယေ ဘော မာန် မာငုန် ယေ ဘော ကာင် ယေ၊ ဟဲ့ ငါမ် ဒီ အီ ဟဝ်၊ တဲး ယေ ပွိုန် ငှုဝ် ဂေ ဒီဂါဝ်။”

4 မင် အီ ဘော တဝ်း၊ “ယေ ဟဲ့ ကာရဝ်း ရွိုန် အီ ဟဝ်၊ တဲး ယေ ဟပ် ခွန် မာန်၊ ခွန် ဒူင် နာ ဘော ခွန် မာန် မာငုန် ယေ ခဲ့ ပီ မှာန့် ခုန်ဒီခမ်။ 5 ယေ မိူဝ် မုး န့ကြိုဝ်း န့ကြာတ့် အေ ဒူအီ အာယူဒါ။ ဂွန် ယေ မိူဝ် မုး ဂွန် မွှိုမ် ပီ ဂွန် ဂေ ဒါ ကာညာ အေ။ မာလဲ၊ ယေ ယီ ဝီ ကာဒုး ဒီ ဝီ ယွင့် ဂွန် အီမာယ် ဘော ဂွန် အီဘိုန့် ယေ ဘဲန် မှာယ် အီ ဟဝ်။ ဂွန် အီဘိုန့် ယေ မင် အီ ဟဲ့ ဟွတ့် ဘဲန် မှာယ် အီ ဟဝ်။ ယေ မိူဝ် အာဝ် ပဲ ဒီ ဝီ ထုတ် ဝိဝ်။ ခုဝ်၊ မာန် ယေ ဂေ ဒူင် နာ ယေ ဘော မာန် မာငုန် ယေ ဟဲ့ ဟွတ့် စုဝ်း ဒီ အီ ဟဝ်။”

6 ဒေါ ယိုဝ် အုဝ် ဂြုဝ်း တူ မွှိုမ် ပီ ပိုန့် ပီ ကာလာင် ဂေ တီ၊ အုဝ် ဘော ရူ ကာဆဝ်။ 7 အုဝ် ဘော ကာဖာ ပီ ဒီ ပါယ် လွင် အန် တီ၊ အုဝ် ဘော ဝီ မာနုဝ် ဂေ အီ မုး အာမူ အာမာတ် ဘော ဂေ ဒါ တာင် အီ အိုပ် မိူင်။ အုဝ် မိူဝ် တဝ်း ဒီ ဂေ၊ “ဘေ နီ၊ ဘေ ဘော နပ် ဒီ ဝီ ဒိုဝ်း ဒီ ဟူမ် အျီင် ရွိုန် အျီင် ငှုဝ် ဒီ ဘီနွင် ဝေါဝဲ ဘေ။” အုဝ် မိူဝ် ဒဲ့ ခဲ့ ကွယ် ဒူအီ ကိူန်၊ တဲး ဂေ ဘောကာဂ့လျီတ် တး ကာဇု၊ တဲး န့ ပွိုန် ဒီ ဝီ မ့ပြာယ် လွင် အန် တီ။ 8 အုဝ် မိူဝ် ကာလာင် ဒီ ဂေ တဝ်း၊ “ခဲ့ ပီ ပွိုန် အေ ဘူင်၊ အေ ဟဲ့ ဟွတ့် ဘူင်။ အေ ဟဲ့ ဟွတ့် ထုတ် ဝိဝ်၊ စိုဝ်း ဝိဝ် ဒူအီ အာယူဒါ အီ ဟဲ့ ဘဲန် မှာယ် ဒူအီ အာမျုဝ် ဟဝ်။ ဒေါ တီ နီ၊ ဘေ ပီ ဝီ ခါနှာပ် ဘီနွင် ဘေ၊ တဲး ဂေ ဝီ ယွင့် ဒုဝ် ဂေ ဒီ ဘေ။” ဂေ ဒါ တာင် တွိုန် မိူဝ် ထူမ်၊ အာဝ် မိုဝ်း အီ ဂြုဝ်း ခေါ အူ ဝီ။ ခုဝ်၊ ဂေ အာဝ် ဟူ နပ် ပီ ဒီ တဝ်း ဂေ။

9 ဝါယ် အန် တီ အုဝ် ပီ ဝီ တဝ်း၊ “လွင် ပီ ဘူင် ဘေ နီ၊ န့ တူ မွှိုမ်။ ဘေ လုဝ် ယုဝ် ဇဝ်ဖြာ၊ လုဝ် ဘူင် ဆိူဝ် ဆိူဝ် မှာန် မှာန်၊ ကွဲ့ တဲး ဒူအီ အာမျုဝ် ဟဝ် အီ မုး ရန်ဆူ အေ ပွိုန် ဒီ နဲန အေ။ 10 ဘော အုဝ် ဘော ဂေ ဘီနွင် အုဝ် ဘော ဂေ ဒူအီ အီ စွယ် အုဝ်၊ ယေ ဟဲ့ ဒွါ ဂေ ကာရဝ်း ရွိုန် ဂေ ငှုဝ် ဒီဂါဝ်။ ကွဲ့ တဲး အေ ယီ လှယ့် ဒီ ဟူမ် အျီင် အန် ပီ တူ ပွိုန် ဒိုဝ်း အေ ဒီ ဂေ။ 11 အာတိုဝ် နီ၊ တဲး ဘေ ဝီ ဒွါ ဝိဝ် တူတ့် ကြုဝ် ပဲ့ ဟဲ့ ဒွိုမ် ငါမ် အီ ဟဝ် ဒီ ဘေ။ ဘော မုး မာန် ဂေ ဒူင် နာ ဂေ၊ ဘော မုး မာန် မာငုန် ဂေ၊ ဘော ကာပိုမ် ဟေ နာမန် ဂေ ဘော ကာင် ဂေ၊ တဲး ဘေ ဝီ ဒွါ ဝိဝ် တူတ့် ဒီ ဂေ။ တဲး ဘေ ဝီ ဒွါ ဝိဝ် ဘော အျီင် ဒွန် မျုဝ် ပဲ့ ဟဲ့ မှာန့် ဘေ။ ဘော မုး ရွိုန်၊ ဘော မုး ငှုဝ်၊ အိုမ် မာငုန် ဘော နာမန်၊ တဲး ဘေ ဝီ တဲး ဝိဝ် တူတ့်။”

12 ဒါ တာင် ဂေ တွိုန် ဟဲ့ ဟွတ့် ထူမ်၊ ဂေ ဝီ တဝ်း၊ “အိုဝ်၊ ယေ ဒီ ဝီ ဒွါ ဝိဝ် ဒီ ဂေ။ ယေ မိူဝ် အာဝ် ဟူ မှာန့် နီ တီ ဒီ ဂေ။ ယေ ဒီ ထူမ် ဂြုဝ်း မဲ။” ဒေါ အန် တီ အုဝ် ဘော ဝီ ဒဲ့ ဂေ ဒါ အီ လှူ ဒီ ဇဝ်ဖြာ၊ ဝီ စ်ု ဂေ ဒါ တာင် တွိုန်၊ တဲး ဂေ ခမ် ကာဒိက် ဆတ်ဇာ။ တဲး ဂေ ဘော ဘူင် ဒူပ် ကာဒိက် ဆတ်ဇာ ပဲ့ ဟဲ့ ခမ် ဂေ နာ အာတ့် ဂေ ဒါ အီ လှူ ဒီ ဇဝ်ဖြာ။ 13 ဒေါ အန် တီ အုဝ် မိူဝ် ဝီ ဒီယိုဝ်း ကာဆိူဝ် ကာဟြူ ဒီ ဆီတုဝ် အုဝ် တဝ်း၊ “တဲး ဇဝ်ဖြာ ဝီ ဘူင် ပါယ် တီ ဒီ ဂေ အီ တူ ဘူင် ဒူပ် ကာဒိက် ဆတ်ဇာ ပဲ့ ဟဲ့ ဒွါ ဂေ အာတိုဝ် နီ။ တဲး အန် ဇဝ် ဒီယိုဝ်း လေး ဂေ ဒီ ကာင် ဒူင် ကွယ် အန်။ ကွဲ့ ဟူ တဲး ဂေ ဘဲန် ဒူအီ ပီ ယွတ် မဲန် အန် ဇဝ်။ တဲး ဂေ ကာဒုး ဒီ လေး ဟာဝ်၊ ကွဲ့ တဲး ဂေ မိုဝ်း မာဆေ။” ဂေ ဒူအီ ကိူန် မိူဝ် ထူမ်။ ဂေ ဝီ တဝ်း၊ “တဲး န့ မုး န့ မှာန် တဲး န့ ဘဲန် ပါယ် တီ။” ဟဲ့ ဟွတ့်၊ ဂေ မိူဝ် ဝီ အိူပ် ဇဝ်ဖြာ။ ဒါ တာင် ဂေ တွိုန် မိူဝ် ဘူင် ဒူပ် ကာဒိက် ဆတ်ဇာ ဂေ တီ။

14 ဒဲင် တီ၊ ဘော အုဝ် ဘော ဘီနွင် အုဝ်၊ ယေ တူ ဒွိုမ် ဒိုဝ်း ပီ ဒီ ဟူမ် အီ မုး ရုး ယေ။ ဒေါ အိုပ် ခုန်ဒီခမ် အာတာစေရိတ် ဒီ မာန် မိူင် အန် အာဒါ အာ ဂိုဝ် ဆီနမ်၊ အန် ဟဲ့ တဲး အုဝ် ဘဲန် ဒါ ကာညာ အီ အိုပ် မိူင် ယူဒါ။ ဆိန့် ဒေါ အန် တီ န့ ကော ဝီ ဇမ် ဒေါ ဟဲ့ အိုပ် ခုန်ဒီခမ် ဒီ မာန် မိူင် အန် အာဒါ အူယ် ဂိုဝ် ဒီ အာ ဆီနမ်၊ န့ ဟဲ့ ဘဲန် ဂိုဝ် ဒီ အာ ဆီနမ်။ ဒေါ အန် တီ အုဝ် တူ ဒိုဝ်း မာဆေ ပဲ့ ဟဲ့ ပွိုန် အုဝ် ဒိုဝ်း။ 15 အီ မုး ဂေ ဒါ ကာညာ အီ အိုပ် မိူင် အာတ့် နီ၊ ဂေ ဟဲ့ ဂဲပ် ကိူန် ဒီ ဒူအီ ရဝ် ဒူအီ ကာင်။ ဂေ မှာန့် ဒီ ဟူမ် ဒွန် ဆီငဲ ဒွန် ဆီငဲ ဘော ခါမုန် ဘော အိုမ် မာငုန် ဘော ရွိုန် ဖွုန် ဂိုဝ် ကျာပ်။ ဒဲစေန့် ဂေ ဘော နပ် ဒီ ခါနှာပ် ဒူအီ ရဝ် ဒူအီ ကာင်။ အုဝ် ယီ တူ ဘူင် ပါယ် တီ ကူပ် ရုဝ်ဆေ အုဝ် ဇဝ်ဖြာ။ 16 အုဝ် ဘော ဘူင် ခဲ့ ပီ ပွိုန် အုဝ် ဘူင်၊ တဲး ရဲင် မိူင် စေဝ် ဟွတ့်။ ဂေ အီ ဘူင် ရိုမ် ဂါန် ဒူပ် အုဝ် ဘောကာဂ့လျီတ်၊ ဂေ ဘော ကာဖြူမ် ဒီ စွယ် ဘူင် မီ ရဲင် မိူင် တီ။ ယေ မိူဝ် တူ စိုဝ်း မာန် ဂေ ဒူင် နာ။

17 ဘော မုး ဒူအီ အာယူဒါ၊ ဘော မုး ဒါ တာင် အီ အိုပ် မိူင်၊ ဂေ အီ ဟူမ် ရိုမ် ခဲင် ကာင် အုဝ် ဆေဆေ၊ ဂေ ကွယ် အူ မာယဝ်း ဒီ ဖန် ဂိုဝ် ဝီ။ ဒဲင် ဂေ တီ၊ အုဝ် ပီ ဝီ ယွတ် မဲန် ဘော ခဲတ့် အီ မုး ဒူအီ အာမျုဝ် ဟဝ် အီ တး ဒူင် ကွယ် အုဝ်။ 18 ဂေ ဒဲစေန့် အုဝ် ဘော လုဝ် ရဲန် ပီ ဒီ ဟူမ် အာဒါ ဂေ တီ။ အူ ဆီငဲ အူ ဆီငဲ ဘော လုဝ် ငဝ်း မက် အူ ဒုဝ်၊ မာဘူ အီ ဂ့လန့် ဆီချာ ဒဝ် ဒုဝ် ဘော မာအျီန် ဂေ မာဘေပ် မင် ဒုဝ်။ ဒဲင် တီ၊ ဂိုဝ် ဆီငဲ အူ ဇေန့်၊ အုဝ် ပီ ဝီ ဘ့လေး ဂေ ဒျီင် အိုမ် မာငုန် ဘဲန် မျုဝ် ဘဲန် မျုဝ် အီ ကိူန် ကာဆဝ်။ ပီ ဘော ဟဲ့ တူတ့် ကိူန် ခဲ့ တီ မိူဝ်၊ အုဝ် ယီ တူ မှာန့် ပဲ့ ဟဲ့ ပွိုန် ဒိုဝ်း အုဝ် ကူပ် မုး အုဝ် ဒါ ကာညာ အီ အိုပ် မိူင်။ ခုဝ်၊ ဂါန် ပီ လုဝ် စွယ် ဂေ ဒူအီ ရဝ် ဒူအီ ကာင်၊ န့ ဟဲ့ ဟွတ့် စန်။ 19 အိုယ် မဲ ဇဝ်ဖြာ၊ အုဝ် ဆာခိုဝ် ဒီ မဲ အီ မုး ဇဝ်ဖြာ အီ အိုပ် အုဝ်။ အုဝ် မှာန့်၊ တဲး မဲ လှုဝ်း ပဲ့ ဟဲ့ ဘူင် အုဝ် အာဒါ ဒူအီ ဂေ နီ၊ တဲး မဲ ဇဝ် ဝီ ဂေဇူ အုဝ်။