1 ဒေါ အန် တီ အာဆန်ဘာလာတ် ဘော အာတောဖီယာ ဘော အာဂေဆိမ် အီ မုး ဒူအီ အာမျုဝ် အာရာပ် ဘော ရန်ဆူ ယေ ဘောကာဂ့လျီတ်၊ ဂေ ဘော ယိုဝ် လွင် ဟဲ့ ဟွတ့် ဝီ မ့ပြာယ် ယေ ရဲင် မိူင်။ အာဝ် ဟူ မိုဝ်း ကာဒဝ် ဒူင် လှုး ခေါ အီ စဲက်။ မာလဲ၊ ယီ ညှမ် ပွိုန် ဒီ ဟပ် ဘ့လ မာလုဝ်း။ 2 ဂေ ဟဲ့ ယိုဝ် လွင် အန် တီ၊ အာဆန်ဘာလာတ် ဂါယ် အာဂေဆိမ် ဝီ တး ကာလာင် ဂြုဝ်း ဒီ အုဝ် တဝ်း၊ “တး တဲး အေ လာယ် ကာတုန့် ဒီ ရဝ် အူ ပ့လုဝ့် အူ ပ့လုဝ့် ခဲင် ဂ့လင် အောနော တွိုန်။” ဂါယ် ယီ ဟဲ့ ခြာမ် ဒီ ဘူင် နာ တူ မွှိုမ် ဒီ အုဝ်။

3 အုဝ် မိူဝ် ဝီ စ်ု အီ ဟာဝ် ကာလာင် ဒီ ဂါယ် တဝ်း၊ “အုဝ် မိုဝ်း ဂါန် ကိူန် ကာဆဝ်။ အုဝ် တူ ပွိုန် ဘ့လေး အုန် ဂါန် အုဝ် တီ။ ကူပ် မာဆေ အုဝ် ကော လုဝ် တဲး ဂါန် အုဝ် ဂိူတ် ကွယ် ပါယ် တီ တဲး အုဝ် ဝီ ဟာဝ် ဒူင် ကွယ် ဘာယ်။း” 4 ဂါယ် ပီ ဝီ ဒမ် တး ဂြုဝ်း ပါယ် တီ ဒီ အုဝ်၊ န့ ကော နုဝ့် ဖွုန် ဇေန့်။ အုဝ် ပီ ဝီ ကာလာင် ဟာဝ် ပီ ပီ ကာလာင် အုဝ် ခါ အာတ့် တွိုန်။

5 ဟဲ့ ဟွတ့်၊ ပေါ အူ ဇေန့် အာဆန်ဘာလာတ် ဘော စ်ု ဒဲစေန့် အန် တး ပီ ခါ အာတ့် တွိုန်။ ခါ နီ၊ ဒဲစေန့် အန် ဟဲ့ ဂူင့် ဘော ပဲ့ အီ တူ ဒွက် ဇိုမ်။ 6 ဂြုဝ်း ပီ ဒဲမ် ခဲင် ပဲ့ တီ၊ န့ ဘော တဝ်း၊ “အုဝ် ဟဲ့ ယိုဝ် ဂေ ဒူအီ အာမျုဝ် ဟဝ် ဒွန် မျုဝ် ဟဲ့ ကာလာင် ဂြုဝ်း လွင် မဲ။ ဘော အာဂေဆိမ် ဟဲ့ တဝ်း၊ ဂြုဝ်း ဂေ တီ ဟဲ့ မှာန်။ ဂေ တဝ်း၊ ဘော မဲ ဘော ဂေ ဒူအီ အာယူဒါ၊ ဘေ ဟဲ့ ခြာမ် ဒီ ဘူင် ကာဘး ဒီ ယေ။ ခုဝ်၊ ဘေ ဟဲ့ ဝီ မ့ပြာယ် ရဲင် မိူင်။ ဂေ ဘော တဝ်း၊ မဲ ခြာမ် ဒီ ဘဲန် ဘော ခုန်ဒီခမ် အီ အိုပ် ဂေ။ 7 ဂေ မိူဝ် တဝ်း၊ မဲ ဟဲ့ ဒါင် တဲး န့ မိုဝ်း ဒူအီ အီ ဘျာန် ဂြုဝ်း ဇဝ်ဖြာ၊ တဲး ဂေ ဝိန် ဒီ ကာလာင် ခဲင် မိူင် ယေရူဆာလဲမ် တဝ်း၊ ‘န့ ဟဲ့ မိုဝ်း ခုန်ဒီခမ် ခဲင် အိူင် ယူဒါ။’ ဒေါ တီ နီ၊ အုဝ် ဒီ ဝီ ကာလာင် လွင် အန် တီ ဒီ ခုန်ဒီခမ် တာင်။ ခုဝ်၊ တဲး မဲ တး ကာမွုန် ဒီ အုဝ်။”

8 ဟဲ့ ဟွတ့် ပါယ် တီ အုဝ် မိူဝ် ဝီ စ်ု ဒူအီ အုဝ် ဟာဝ် ကာလာင် ဒီ အန် တဝ်း၊ “ဂြုဝ်း ပီ ကာလာင် မဲ အာဝ် မိုဝ်း အီ မုး အီ မှာန် ခေါ အူ ဒဲ။ မဲ ဖုက်ဖာမ် ရာင် မဲ။”

9 ဒူအီ ဂေ တီ၊ ဂေ ထေဝ် ဒီ ကာဘျုဝ် ယေ။ ဂေ ထာင်၊ ယေ တူ မိုဝ်း ပ့လူမ် ဂေ ဟဲန့်၊ တူ ပွိုန် ဘူင် တဲး ဂါန် ယေ ဟွတ့်။ အုဝ် ဘော ဝီ ဆာခိုဝ် တဝ်း၊ “အိုယ် မဲ ဇဝ်ဖြာ၊ အုဝ် မှာန့်၊ တဲး အုဝ် ဝီ မိုဝ်း ပ့လူမ် ဂေ ဟဲန့် တဲး အုဝ် ပွိုန် ဒီ ဘူင် ဂါန် အုဝ် တီ။”

10 အူ ဆီငဲ အုဝ် ဘော ဝီ ဟာဝ် လဲ ဒီ ကာင် အာဆေမာယာ အီ မုး ဂွန် အာဒေလာယာ ဘော လှာန် အာမာဟေတာဘာလာ။ အန် ဘော ကွယ် ချြီင် ခဲင် ကာင် အန်။ အန် ဝီ တဝ်း ဒီ အုဝ်၊ “တဲး အာယ် ဟာဝ် ချြီင် ခဲင် ဟုဝ် ဇဝ်ဖြာ၊ ဝီ ကာဘိတ် မာလုဝ်း။ ခုဝ်၊ ဂေ ဒီ ဘော တး ဟြေတ့် ဒီ ငဝ်း ယမ် မဲ ခဲင် မှိုဝ်။”

11 အုဝ် မိူဝ် ဝီ တဝ်း၊ “အုဝ် တူ မုး ဒူအီ ဟာယ် အီ ဒီ လုဝ် ဝိန် ဒီ ချြီင် ပါယ် တီ။ မဲ ထာင် အုဝ် ဒီ ဟာဝ် ချြီင် ခဲင် ဟုဝ် ဇဝ်ဖြာ၊ တဲး အုဝ် လွတ် ယမ်။း အုဝ် တူ ဘူင် ပါယ် တီ ဒေါ မှဝ်။” 12 အုဝ် ဟဲ့ ဟွတ့် နပ်၊ ဇဝ်ဖြာ တူ မိုဝ်း ဒီ ကာလာင် ဒီ အာဆေမာယာ။ အန် ဘော မုး ဂိုက် အာတောဖီယာ ဂါယ် အာဆန်ဘာလာတ်။ ဂါယ် ဟဲ့ ဇာင် အန်၊ တဲး အန် ကာလာင် ဂြုဝ်း တူ မွှိုမ် ဒီ အုဝ်။ 13 ဂါယ် ဇာင် အန် ပါယ် တီ တဲး အုဝ် ယုဝ်၊ တဲး အုဝ် ဘူင် ဒူပ် အာကျာမ် အာငျာန် အန် တီ၊ တဲး အုဝ် ကာလိုပ် ဒီ ဘူင် မှာပ်၊ တဲး ဂါယ် ပွိုန် နဲန အုဝ် ဘော ကာလာင် နာ တူ မွှိုမ် လွင် အုဝ်။

14 အုဝ် မိူဝ် ဝီ ဆာခိုဝ် တဝ်း၊ “အိုယ် မဲ ဇဝ်ဖြာ၊ အုဝ် မှာန့် တဲး မဲ ဇဝ် နုဝ် ပဲ့ ဟဲ့ ဘူင် အာတောဖီယာ ဂါယ် အာဆန်ဘာလာတ်၊ တဲး မဲ ဇဝ် ဝီ ဒမ် မှာပ် ဒူပ် ခဲ့ ပီ ဘူင် ဂါယ် တီ။ တဲး မဲ ဇဝ် နုဝ် ဘော ပီ ဘူင် နာင် နောတီ အီ မုး အီဘိုန့် အီ ဘျာန် ဂြုဝ်း ဇဝ်ဖြာ ဘော ဂေ အီ ဟဝ် အီ ဘျာန် ဂြုဝ်း ဇဝ်ဖြာ အီ ဟဲ့ ဆီ ကာဘျုဝ် အုဝ်။”

15 ဂါန် ပီ မ့ပြာယ် ယေ ရဲင် မိူင် တွိုန်၊ ယေ ဘူင် အာဒါ ဖန် ဂိုဝ် ဒီ အာ ဆီငဲ။ န့ ဘော ဟွတ့် ဒေါ ဇမ် ဆီငဲ အာ ဂိုဝ် ဒီ မ့ဖန်၊ မာဂျီန် အေတူလာ။ 16 ဂေ ရန်ဆူ ယေ ဘော ဂေ ဒူအီ အာမျုဝ် ဟဝ် အီ ကွယ် ခူပ် ယေ၊ ဂေ ဘော ယိုဝ် လွင် အန် တီ၊ န့ ဘော ဘဲန် နဝ်း လိုဝ် နဝ်း ဒီတဲတ် ဒီ ဂေ။ ဂေ ဟဲ့ နပ်၊ ပဲ့ ဟဲ့ ဘူင် ယေ တီ၊ န့ ကော ဟွတ့် ကူပ် ဟဲ့ စွယ် ဇဝ်ဖြာ ဒီ ယေ။

17 ဒေါ အန် တီ ဂေ အာမူ အာမာတ် အီ ကွယ် ခဲင် အိူင် ယူဒါ၊ ဂေ ဘော တိုယ် ပဲ့ ဘဲန် ဖိူန် ဘဲန် ဖိူန် ဒီ အာတောဖီယာ။ အန် မိူဝ် ဟဲ့ တိုယ် ကိူန် ပဲ့ ဒီ ဂေ။ 18 ဒူအီ အာယူဒါ မိူဝ် ဟဲ့ ကိူန် အီ ဟဲ့ ဒွါ ကာဒိက် ဆတ်ဇာ ဒီ အာတောဖီယာ ကူပ် ဟဲ့ ဘဲန် အန် အျီ့ အာဆေခါနီ အီ မုး ဂွန် အာရာဟာ တွိုန်။ ဂွန် ကာညူမ် အန် အီ စိူဝ် အာယေဟုဝ်နန် တွိုန်၊ အန် ဟဲ့ ဝီ ခတ် ဒိုဝ်း ဂွန် ဒီဘျာ အီ မုး ဂွန် အာမေဆူလမ် အီ မုး ဂွန် အာဘေရေက်။ 19 ဒူအီ ဂေ တီ ဂေ ဘော အွန် ဒီ တး ကာလာင် နှဲ ဒီ အုဝ် လွင် နာ ဘွတ် နာ မွှိုမ် ပီ ဘူင် အာတောဖီယာ ဒီ ဂေ။ ဂေ ပီ ဝီ ဒိုဝ်း ဂြုဝ်း ပီ ကာလာင် အုဝ် ဒီ ဂေ၊ ပီ ဝီ ဟာဝ် ကာလာင် ဒီ အန်။ အန် မိူဝ် အွန် ဒီ ဒဲမ် တး ပဲ့၊ ကာဘျုဝ် တဲး အုဝ် ယုဝ်။