1 ဒေါ အန် တီ ဂေ တိး ဘပ် ဒါရာ ဇဝ်ဖြာ ပီ ဒဲမ် အာမုဝ်ဆဲ တွိုန်၊ တဲး ဂေ ဒူအီ ကိူန် ထူမ်။ ဂေ ဘော ယိုဝ် အာဒါ အူ ပ့လုဝ့် အီ ကာလာင် လွင် အာမျုဝ် ဒူအီ အမ်မူန် ဘော ဒူအီ အာမျုဝ် မုဝ်အာပ် တူ ပွိုန် လိုပ် ခဲင် ဖိုင် ဒူအီ ပီ အိုပ် ဇဝ်ဖြာ ဒေါ မှဝ်။ 2 ခုဝ်၊ ဒေါ လေး ဂေ ဒူအီ အီဆာရေလ ခဲင် မိူင် အဲဂိုပ် တွိုန် ဒူအီ အမ်မူန် ဘော ဒူအီ မုဝ်အာပ် ဂေ တီ တူ ရွုး၊ တူ ဒွါ ပီ ဒီ ဟူမ် ပီ ဒီ ဒျီင် ဒီ ဒူအီ အီဆာရေလ။ ဂေ ယီ ဝီ ဇာင် အာဘာလာအမ်၊ တဲး အန် ဒိူင် ဒူအီ အီဆာရေလ။ မာလဲ၊ ဇဝ်ဖြာ ဟဲ့ ဝီ ဘျွင် ဂြုဝ်း ဒိူင်၊ ဂြုဝ်း အေး တီ၊ တဲး န့ ဝီ ဘဲန် ဂြုဝ်း ဘွတ်၊ ဂြုဝ်း မွင့်ကာရာ။ 3 ဒေါ ယိုဝ် ဂေ ဒူအီ အီဆာရေလ ပီ တဝ်း ဒါရာ တီ၊ ဂေ ဘော တဲး ဒူအီ အာမျုဝ် ဟဝ် ဘောကာဂ့လျီတ် ကာယဝ်း လေး ဒီ ဒူအီ အီဆာရေလ။

4 အာတ့် နီ ဒါ အီ လှူ ဒီ ဇဝ်ဖြာ အီ စိူဝ် အာအေလာဆေပ် ဟဲ့ ဘဲန် ဒါ အီ အိုပ် ကြုဝ်ကြာမ် အီ ကွယ် ခဲင် ဟုဝ် ဇဝ်ဖြာ။ အန် ယီ လာယ် ကာလဝ့် လာယ် ဒွိုမ် ဒီ အာတောဖီယာ တွိုန်။ 5 အန် ဟဲ့ မ့ပြာယ် ခဲင် ဟူင် တာင် အီ မုး ဒူင် ဒွိုမ် အုန် ဂေ ကြုဝ် ပီ လှူ ဒူအီ ဒီ ဇဝ်ဖြာ။ န့ ဘော မုး ငှုဝ်၊ န့ကြိုဝ်း ဆီနမ် အုး ငှုန် ဘော ခြိုင် တာ ဘဲန် မျုဝ် ဘဲန် မျုဝ် ပီ လုဝ် တာ ဂေ ဒါ အီ လှူ ဒီ ဇဝ်ဖြာ။ ဘော မုး ပီ လှူ အီ မုး ဂိုဝ် ဘုန် အူ ဘုန်၊ အီ မုး ဘော ငှုဝ် ဂေ ဒီဂါဝ် ဘော အိုမ် မာငုန် ဘော နာမန်၊ အန် ဟဲ့ ဒိုဝ်း လေး တူတ့်။ ကြုဝ် ဂေ တီ ဘော မုး ပီ ဒီ တာ ဂေ ဒူအီ ခြိုဝ် အာလေဝီ၊ ဂေ ဒူအီ အီ တဝ်း မှုဝ် ဘော ဂေ ဒူအီ အီ ဘ်ု ဟုဝ် ဇဝ်ဖြာ။ အာအေလာဆေပ် ဟဲ့ ဝီ ဘူင် တဲး န့ ဘဲန် ဟူင် ကွယ် အာတောဖီယာ။

6 ဒေါ ဘူင် အန် ပါယ် တီ အုဝ် ယီ တူ ကွယ် ခဲင် မိူင် ယေရူဆာလဲမ်။ ဒေါ ဟဲ့ အိုပ် ခုန်ဒီခမ် အာတာစေရိတ် မိူင် ဘာဘဲ အာဒါ အူယ် ဂိုဝ် ဒီ အာ ဆီနမ်၊ အုဝ် ဟဲ့ ဝီ ဝိဝ် ဒူင် ကွယ် ခုန်ဒီခမ်။ ဝါယ် ဟဲ့ ကွယ် အုဝ် ဘဲန် ဆီငဲ ဘဲန် ဆီငဲ၊ 7 အန် မိူဝ် ဟဲ့ ခ့ဝါင် တဲး အုဝ် ဝီ ဝေန့် ဒီ မိူင် ယေရူဆာလဲမ်။ ဒေါ တး ဇမ် အုဝ်၊ အုဝ် ဘော ယိုဝ် မှာပ် ပဲ့ ဟဲ့ ဘူင် အာအေလာဆေပ် အီ ဟဲ့ ဝီ ဘူင် ဝီ မ့ပြာယ် ဒူင် ကွယ် အာတောဖီယာ ခဲင် ဝဲင် ဟုဝ် ဇဝ်ဖြာ တွိုန်။ 8 န့ တူ လဝ့် နဝ်း အုဝ် ခေါ အီ စဲက်။ အုဝ် မိူဝ် ဒိုဝ်း တူတ့် ကြုဝ်ကြာမ် အာတောဖီယာ၊ ဝဲန် နာ ရေတ့် ဟူင် တီ။ 9 အုဝ် မိူဝ် ဒွါ အာမိင်၊ တဲး ဂေ ဝီ ဘူင် တဲး ဟူင် တီ ဝီ ဆီငါ၊ တဲး ဂေ ဝီ ဒိုဝ်း တး ကြုဝ် ပီ တာ ဂေ ခဲင် ဟုဝ် ဇဝ်ဖြာ တွိုန်။ ဘော ငှုဝ် ပဲ့ ဟဲ့ လှူ အီ ဘော ဆီနမ် အုး ငှုန် ပီ ဒီ ဒုဝ့် ဂေ ခဲင် ငဝ်၊ တဲး ဂေ ဝီ တး အုန် ခဲင် ဟူင် တီ ပီ ဘြိမ်။

10 အုဝ် ဘော ဝီ နပ် ဘော လွင် ဂေ ဒူအီ အီ တဝ်း မှုဝ် ဘော လွင် ဂေ ဒူအီ ခြိုဝ် အာလေဝီ အီ ဘူင် ဂါန် ခဲင် ဟုဝ် ဇဝ်ဖြာ၊ ဂေ တူ ပွိုန် ပီ ဒီ ဟူမ် ဂေ။ ခုဝ်၊ ဂေ ဟဲ့ ဝီ ဟာဝ် ကွယ် ဒီ မာန် ဂေ ဘော ဒီ ဒူင် နာ ဂေ၊ ရာင် အာဆေ ရာင် အန်။ 11 အုဝ် မိူဝ် အေး ဂေ ဒါ တာင် အီ အိုပ် မိူင်။ အုဝ် တဝ်း ဒီ ဂေ၊ “မှဝ် န့ ပါယ် ပီ ဘ့လေး ဝဲန် ဘေ ဟုဝ် ဇဝ်ဖြာ။း” အုဝ် ဝီ ဒဲ့ တး ဒူအီ ခြိုဝ် အာလေဝီ ဘော ဒူအီ အီ တဝ်း မှုဝ်၊ ဝီ တဲး ဂေ ဘူင် ဂါန် ဂေ။

12 ပန် တီ ဂေ ဒူအီ အာယူဒါ ဘော ဝီ ကာဖြူမ် ဒီ လှူ ပီ ဒီ လှူ ဂိုဝ် ဘုန် အူ ဘုန်။ ဘော မုး ငှုဝ် ဒီဂါဝ်၊ ဘော မုး အိုမ် မာငုန် ဘော နာမန်၊ ဂေ တး ဟပ် တူတ့် ခဲင် ဟုဝ် ဇဝ်ဖြာ။ 13 အုဝ် ဘော ဒါင် တဲး န့ မိုဝ်း ဒူအီ အီ ပါ ရွိုန်၊ တဲး ဂေ အိုပ် ကြုဝ်ကြာမ် ခဲင် ဟုဝ် ဇဝ်ဖြာ တီ။ န့ မုး အာဆေလာမီ အီ မုး ဒါ အီ လှူ ဒီ ဇဝ်ဖြာ ဘော အာဇာဒူက် အီ မုး ဒါ စာရေ ဘော အာဘေတာယာ အီ မုး ဒူအီ ခြိုဝ် အာလေဝီ။ အာဟာနန် အီ မုး ဂွန် အာဇာကူရာ အီ မုး ဘော လှာန် အာမာထာနီ ဘော ဘဲန် အီ စွယ် ဂေ။ ဂေ မုး ဒူအီ အီ မိုဝ်း နဝ်း ဆိူဝ် နဝ်း မှာန်။ ဂေ ဘော လုဝ် ကာယဝ်း ကာဆာင် ပီ ဒီ ဟူမ် ဒီ ဘီနွင် ဝေါဝဲ ဂေ အီ ဘူင် ရိုမ် ဂါန် ခဲင် ဟုဝ် ဇဝ်ဖြာ။

14 အိုယ် မဲ ဇဝ်ဖြာ အီ မုး ဇဝ်ဖြာ ပီ ကြိုပ် အုဝ်၊ အုဝ် မှာန့်၊ တဲး မဲ ဇဝ် လှုဝ်း အုဝ် ဆေဆေ။ ကွဲ့ တဲး မဲ ဇဝ် ဘျတ် ဝဲန် လွင် နာ မွှိုမ် ပဲ့ ဟဲ့ ဘူင် အုဝ် ဆေဆေ အာဒါ ဟုဝ် မဲ ဇဝ်ဖြာ ဘော အာဒါ ဂါန် ပီ ဒီ လုဝ် ဘူင် အီ ခဲင် ဟုဝ် မဲ နီ။

15 ဒေါ အန် တီ အုဝ် ဝီ ယိုဝ် ဂေ ဒူအီ အာယူဒါ မင် အီ၊ ဂေ ဝီ ကြိတ် ဘ့လေ မာငုန် ဒေါ မုး ဆီငဲ ဒီလှဝ်။ မင် အီ ဂေ ဘော ဒိုဝ်း မာလာ ဂေ၊ ဟာဝ် ဒါင် ငှုဝ် ဂေ ဒီဂါဝ်၊ ဒါင် အိုမ် မာငုန် ဘော ဘ့လေ မာငုန် ဂေ ဘ့လေ ဒီပူ ဘော ကြုဝ်ကြာမ် ဂေ ဘဲန် မျုဝ် ဘဲန် မျုဝ်။ ဂေ ဘော ဝီ လိုပ် တး ခဲင် မိူင် ယေရူဆာလဲမ် ဒေါ မုး ဆီငဲ ဒီလှဝ် တီ။ အုဝ် မိူဝ် ဒမ် ဆာဒိက် ဒီ ဂေ၊ ကွဲ့ တဲး ဂေ ယွင့် မာဆေ ဒေါ မုး ဆီငဲ ဒီလှဝ်။ 16 ဂေ ဒူအီ အီ တး ခဲင် မိူင် ထူရုဝ် အီ ကွယ် ခဲင် မိူင် ယေရူဆာလဲမ် တီ၊ ဂေ ဘော နပ် ဒီ တး ယွင့် မာဂါ၊ ယွင့် ကြုဝ်ကြာမ် ဘဲန် မျုဝ် ဘဲန် မျုဝ် ဒီ ဂေ ဒူအီ အာမျုဝ် အာယူဒါ ဒေါ မုး ဆီငဲ ဒီလှဝ်။ 17 ဒေါ အန် တီ အုဝ် ဝီ အေး ဂေ ဒါ တာင် အီ အိုပ် ဒူအီ အာယူဒါ။ အုဝ် တဝ်း၊ “တဲး ဘေ ဝီ လှုဝ်း မှာပ် ပဲ့ ဟဲ့ ဘူင် ဘေ။ ဘေ ဟဲ့ ဘူင် တဲး ဆီငဲ ဒီလှဝ် အာဝ် ဟူ မုး ဆီငဲ အီ ဆီငါ ဘွတ်။ 18 ပဲ့ ဟဲ့ ဘူင် ဘေ တီ ဟဲ့ ပီ ပဲ့ ဟဲ့ ဘူင် ဂုန့် ဒင် ဘေ။ ခုဝ်၊ ဇဝ်ဖြာ ဟဲ့ တဲး အေ ဘော မိူင် ခမ် ဒုက် တီ ဒေါ တီ နီ။ ဘေ မိူဝ် ဟဲ့ ဝီ ပျာတ့် ဆီငဲ ဒီလှဝ်၊ ဘူင် တဲး ဇဝ်ဖြာ ဝဲ ရူ ကာဆဝ် ဒီ အေ ဒူအီ အီဆာရေလ။”

19 အုဝ် မိူဝ် စ်ု ဂေ၊ တဲး ဂေ ကာဘိတ် တူတ့် မာလုဝ်း မိူင် ဒေါ ဘာ ဒီ အပ် အာတ့် စုး ဆီငဲ ဒီလှဝ်။ ဆေ ညှမ် ဝီ ဇမ် ဝါယ် ဆီငဲ ဒီလှဝ်၊ ဂေ တူ ပွိုန် ဝိုဝ်း ဒေါ မှဝ်။ အုဝ် မိူဝ် စ်ု ဂေ ဒဲစေန့် အုဝ် မင် အီ၊ တဲး ဂေ ဘ်ု မာလုဝ်း မိူင် ဒွန် ပ့လုဝ့်၊ ကွဲ့ တဲး န့ မိုဝ်း အီ ဒိုဝ်း လိုပ် ခေါ အူ မျုဝ် ခဲင် မိူင် ဒေါ မုး ဆီငဲ ဒီလှဝ်။ 20 ဝါယ် အန် တီ ဂေ ဒူအီ အီ ယွင့် ကြုဝ် ဘဲန် မျုဝ် ဘဲန် မျုဝ်၊ ဂေ ဘော ဝီ လုဝ် တမ် နာ ရေတ့် မိူင် ယေရူဆာလဲမ် အူ ဇေန့် အာ ဇေန့်။ 21 အုဝ် ဝီ ဒမ် ဆာဒိက် ဒီ ဂေ တဝ်း၊ “မှဝ် န့ ပါယ် ပီ တး တမ် ဘေ ခူပ် ရဲင် မိူင် ပါယ် နီ။း ဝါယ် နီ၊ ဆေ ဘေ ဝီ ဘူင် ပါယ် တီ အုဝ် ဒီ မှေတ့် ဘေ။” ဆိန့် ဒေါ အန် တီ ဂေ မိူဝ် အာဝ် ဟူ ယ တး ဆီငဲ ဒီလှဝ် ဒေါ မှဝ်။ 22 အုဝ် မိူဝ် ကာလာင် ဒီ ဂေ ဒူအီ ခြိုဝ် အာလေဝီ၊ တဲး ဂေ ဘူင် တဲး ဒုဝ် ဂေ ဆီငါ ဘွတ်၊ တဲး န့ ဒူပ် ပီ ဒမ် ဒါရာ ဂေ ဘူင်၊ တဲး ဂေ တး ဘ်ု မာလုဝ်း မိူင်၊ တဲး ဆီငဲ ဒီလှဝ် ဝီ ဘဲန် ဆီငဲ အီ ဆီငါ ဘွတ်။

အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် လှုဝ်း ပဲ့ ဟဲ့ ဘူင် အုဝ် နီ။ တဲး မဲ ဇဝ် ကာဝေ အုဝ် ဘော ချွတ် အုဝ်။ ခုဝ်၊ နဝ်း ရွက့် ကာဝေ မဲ ဇဝ် ဟဲ့ တာင် ကာဆဝ်။

23 ဘာန် ဒေါ အန် တီ အုဝ် ဝီ ယိုဝ် ဂေ အီမာယ် ဒူအီ အာယူဒါ အီ ဟဲ့ ဝီ ဒိုဝ်း အီဘိုန့် အီ မုး ဒူအီ အာမျုဝ် အာစုတ်၊ ဒူအီ အာမျုဝ် အမ်မူန် ဘော ဒူအီ အာမျုဝ် မုဝ်အာပ်။ 24 ဂွန် ဂေ အာဒါ အူ ကာတဲ၊ ဘော ဝီ နပ် ဒီ ကာလာင် မီ ဂြုဝ်း အာစုတ် ဘော ဂြုဝ်း မာ ဂေ၊ အာဝ် ဟူ ဝီ နပ် ဒီ ကာလာင် ဂြုဝ်း ဒူအီ အာယူဒါ။ 25 အုဝ် ဒမ် မှာပ် ဒီ အီမာယ် ဂေ တီ။ ဒိူင် အေး ဂေ ဘော မး ဂေ၊ ရိုတ့် ဟိုက် ဂိန့် ဂေ။ အုဝ် မိူဝ် တဲး ဂေ ဒိူင် တဲး ဇဝ်ဖြာ ထူမ်။ အုဝ် မိူဝ် တဝ်း၊ “ဘေ အာဝ် ဟူ ပွိုန် ဒွါ ဂွန် ဒီဘျာ ဘေ၊ တဲး ဂေ ဒိုဝ်း ဒူအီ အာမျုဝ် ဟဝ်။ ဘေ မိူဝ် အာဝ် ဟူ ပွိုန် တဲး ဂွန် အီမာယ် ဘေ ဒိုဝ်း ဒူအီ အာမျုဝ် ဟဝ် ဒေါ မှဝ်။ 26 န့ မုး အီဘိုန့် ဒူအီ အာမျုဝ် ဟဝ် ဂေ တီ၊ ဂေ ဟဲ့ ဘူင် တဲး ခုန်ဒီခမ် အာဆာလုဝ်မုဝ် ကာလိုပ်။ အန် ဟဲ့ မုး ခုန်ဒီခမ် အီ ဟဲ့ တာင် လွှိုမ် ခုန်ဒီခမ် ဂေ ဒူအီ အာမျုဝ် ဟဝ်။ ဇဝ်ဖြာ မိူဝ် ဟဲ့ ရွက့် အန် ဘော အိုင် ဒီ တဲး အန် ဘဲန် ခုန်ဒီခမ် အီ အိုပ် ဒူအီ အီဆာရေလ ဘောကာဂ့လျီတ်။ ပီ ဘော ဟဲ့ ပါယ် တီ မိူဝ်၊ န့ ယီ မုး အီဘိုန့် ဒူအီ အာမျုဝ် ဟဝ် ဂေ တီ အီ တဲး အန် ကာလိုပ်။ 27 ဒေါ တီ နီ အုဝ် ယီ ယိုဝ်၊ ဘော ဘေ ဘောကာဂ့လျီတ် ဟဲ့ ဘူင် အီ ဟာယ် ကာဆဝ် ဇိုဝ် တီ။ ဘေ ဟဲ့ ဝး ဇဝ်ဖြာ ဘော ဒိုဝ်း အီဘိုန့် ဒူအီ အာမျုဝ် ဟဝ်။ အာဝ် ကာအာပ် ဘေ ဘူင် ပါယ် တီ။”

28 န့ ဘော မိုဝ်း အာယောယာတာ အီ မုး ဂွန် ဒါ တာင် အီ လှူ ဒီ ဇဝ်ဖြာ အီ စိူဝ် အာအေလာဆေပ်။ ဂွန် အာယောယာတာ တီ အူ ဝီ၊ အန် ဘဲန် အျီ့ အာဆန်ဘာလာတ် အီ မုး ဒူအီ အာမျုဝ် ဘေတ်ဟုဝ်ရူန် တွိုန်။ အုဝ် ဘော ဟုဝ် လေး အန် ခဲင် မိူင် ယေရူဆာလဲမ်။

29 အိုယ် မဲ ဇဝ်ဖြာ အီ မုး ဇဝ်ဖြာ ပီ ကြိုပ် အုဝ်၊ တဲး မဲ ဇဝ် လှုဝ်း ပဲ့ ဟဲ့ ဘူင် ဂေ ဒူအီ တီ။ ဂေ ဟဲ့ ဘူင် တဲး ဂါန် ပီ ဘူင် ဂေ ဒါ အီ လှူ ဒီ ဇဝ်ဖြာ အာဝ် ဟူ မွှိုမ် ရုဝ်ဆေ။ ဘော ပဲ့ ဟဲ့ ကာဆဲန့် ဇဝ်ဖြာ ဒီ ဂေ ဒါ အီ လှူ ဒီ ဇဝ်ဖြာ၊ ဘော ဂေ ဒူအီ ခြိုဝ် အာလေဝီ၊ ဂေ အာဝ် ဟူ ရုဝ်ဆေ။

30 ပန် တီ အုဝ် တဲး ဂေ ဒူအီ အီ လှူ ဒီ ဇဝ်ဖြာ ဘော ဂေ ဒူအီ ခြိုဝ် အာလေဝီ ဝီ ကာယဝ်း ဒီ ဒွန် အီ အီ မုး ဒူအီ အာမျုဝ် ဟဝ်။ ဟဲ့ ဟွတ့်၊ အုဝ် ဝီ တဲး ဂေ မိုဝ်း ဂါန် ပီ လုဝ် ဘူင် ဂေ၊ ရာင် အာဆေ ရာင် အန်။ 31 အုဝ် ဘော ရဲန် တူတ့် ဒွန် မျုဝ်၊ တဲး ဂေ ဒူအီ တး လှူ ဘ့လေ ဒင်၊ လှူ ဟေ ပီ ဒီ လုဝ် ဂေ ဒေါ လှူ ဂေ ပီ ဒီ လှူ အီ ဒုဝ့် ခဲင် ငဝ်၊ တဲး ဒွန် အီ နပ် အာခြာဝ် ဒီ လုဝ် လှူ အန်၊ တဲး န့ မိုဝ်း ဆေဆေ၊ ကွဲ့ တဲး န့ လုတ် ဒေါ မှဝ်။

အိုယ် မဲ ဇဝ်ဖြာ ပီ ကြိုပ် အုဝ်၊ တဲး မဲ ဇဝ် လှုဝ်း လွင် အန် တီ၊ တဲး မဲ မွင့်ကာရာ ဒွါ နာ မွှိုမ် ဒီ အုဝ်။