1 ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ ခြိုဝ် အာလေဝီ အီ ဟဲ့ ဝီ တး ဒူပ် အာဇေရူဘာဘေန် အီ မုး ဂွန် အာဆေထီအေန် ဘော ဒါ တာင် အီ လှူ ဒီ ဇဝ်ဖြာ အီ စိူဝ် အာယောဆူ၊ ဂေ ဘော မုး အာဆေရာယာ၊ အာယေရေမီ၊ အာအေဆာရာ၊

2 အာမာရီယာ၊ အာမာလုက်၊ အာဟာဒုတ်၊

3 အာဆေခါနီ၊ အာရေဟုမ်၊ အာမေရေမုတ်၊

4 အာအီတော၊ အာခီနေဆူန်၊ အာဖီယ၊

5 အာမီယာမိန်၊ အာမာတာ၊ အာဘီလာဂါ၊

6 အာဆေမာယာ၊ အာယောယာရိမ်၊ အာယီတာယာ၊

7 အာဆာလာအူ၊ အာမွက်၊ အာဟီလာခီ ဘော အာယီတာယာ။ ဒူအီ ဂေ တီ၊ ဂေ မုး ဒါ တာင် ခဲင် ဒါ အီ လှူ ဒီ ဇဝ်ဖြာ ဘော ခဲင် ဘီနွင် ဝေါဝဲ ဂေ ဒေါ မုး စုဝ် ဘာန် အာယောဆူ တွိုန်။

8 ဂေ ဒူအီ ခြိုဝ် အာလေဝီ ဘော မုး အာယောဆူ၊ အာဘီနူအီ၊ အာကာတာမေလာ၊ အာဆေရာဖီ၊ အာယူဒါ ဘော အာမာတ်ထာနီ။ အာမာထာနီ ဘော ဘီနွင် အန် မုး ဒူအီ အီ ယဲတ့် ဂေ ဒူအီ အီ တဝ်း မှုဝ် အီ ဒါင် ဂုင် ဂေဇူ ဒီ ဇဝ်ဖြာ။ 9 န့ ဘော မုး ဘော အာဘာကာပူကီ ဂါယ် အာအူနီ ဘော ဘီနွင် ဝေါဝဲ ဂါယ်။ ဘော ဂေ ဘော ဂေ ဒူအီ အီ တဝ်း မှုဝ် ဒေါ ကြိုပ် ဂေ ဇဝ်ဖြာ ဂေ ကွယ် လာယ် ကာယွတ်။

10 အာယောဆူ ဝီ မိုဝ်း ဂွန် အီ စိူဝ် အာယောအီခိမ်။ အာယောအီခိမ် ဝီ မိုဝ်း ဂွန် အီ စိူဝ် အာအေလာဆေပ်။ အာအေလာဆေပ် ဝီ မိုဝ်း ဂွန် အီ စိူဝ် အာယောယာတာ။ 11 အာယောယာတာ ဝီ မိုဝ်း ဂွန် အီ စိူဝ် အာယုဝ်နာထာန်။ အာယုဝ်နာထာန် ဝီ မိုဝ်း ဂွန် အီ စိူဝ် အာယာဒူအာ။

12 ဒေါ ဘဲန် အာယောအီခိမ် ဒါ တာင် အီ လှူ ဒီ ဇဝ်ဖြာ၊ န့ ဘော မိုဝ်း ဂေ ဒါ အီ လှူ ဒီ ဇဝ်ဖြာ အီ အိုပ် ခဲင် န့ဟူမ် ဂုန့် ဒင် ဂေ။ အာမေရာယာ အိုပ် ခဲင် န့ဟူမ် အာဆေရာယာ၊ အာဟာနာနီယာ အိုပ် ခဲင် န့ဟူမ် အာယေရေမီ။

13 အာမေဆူလမ် အိုပ် ခဲင် န့ဟူမ် အာအေဆာရာ၊ အာယေဟုဝ်နန် အိုပ် ခဲင် န့ဟူမ် အာမာရီယာ။

14 အာယုဝ်နာထာန် အိုပ် ခဲင် န့ဟူမ် အာမာစီခူ၊ အာယုဝ် အိုပ် ခဲင် န့ဟူမ် အာဆေခါနီ၊

15 အာအာတ်နာ အိုပ် ခဲင် န့ဟူမ် အာဟာရိမ်၊ အာဟေလာကေ အိုပ် ခဲင် န့ဟူမ် အာမေရာယုတ်။

16 အာဆာခါရာ အိုပ် ခဲင် န့ဟူမ် အာအီတော၊ အာမေဆူလမ် အိုပ် ခဲင် န့ဟူမ် အာခီနေဆူန်။

17 အာဇီခါရီ အိုပ် ခဲင် န့ဟူမ် အာဖီယ၊ အာဘီလာဒေ အိုပ် ခဲင် န့ဟူမ် အာမာတာ ဘော ခဲင် န့ဟူမ် အာမာဒီယာ။

18 အာဆာမူအာ အိုပ် ခဲင် န့ဟူမ် အာဘီလာဂါ၊ အာယုဝ်နာထာန် အိုပ် ခဲင် န့ဟူမ် အာဆေမာယာ။

19 အာမာတာနေ အိုပ် ခဲင် န့ဟူမ် အာယောယာရိမ်၊ အာအောစီ အိုပ် ခဲင် န့ဟူမ် အာယီတာယာ။

20 အာကာလေ အိုပ် ခဲင် န့ဟူမ် အာဆာလာအူ၊ အာအေဘာ အိုပ် ခဲင် န့ဟူမ် အာမွက်။

21 အာဟာဆာဘီ အိုပ် ခဲင် န့ဟူမ် အာဟီလာခီ ဘော အာနေထာနေလာ အိုပ် ခဲင် န့ဟူမ် အာယီတာယာ။

22 န့ ဘော မိုဝ်း ဂေ ဒူအီ အီ မုး ဒါ တာင် အီ အိုပ် ခဲင် န့ဟူမ် ခြိုဝ် အာလေဝီ အီ ကွယ် ဒေါ မုး စုဝ် ဘာန် ဂေ ဒါ အီ လှူ ဒီ ဇဝ်ဖြာ အီ စိူဝ် အာအေလာဆေပ်၊ အာယောယာတာ၊ အာယောဟာနန် ဘော အာယာဒူအာ။ စိူဝ် ဂေ တီ၊ ဘော စိူဝ် ဂေ ဒါ အီ လှူ ဒီ ဇဝ်ဖြာ၊ ဂေ ဟဲ့ ဒဲမ် အုန် ဒေါ အိုပ် ခုန်ဒီခမ် အာတာရိတ် မိူင် ဘီရာဆီ တွိုန်။ 23 န့ ဘော မိုဝ်း ဂေ ဒါ တာင် အီ မုး ဂိန့် န့ဟူမ် ခြိုဝ် အာလေဝီ အီ ကွယ် ဆိန့် ဒေါ ဂုဝ် အန်၊ ကော ဝီ ဇမ် စုဝ် ဘာန် အာယောဟာနန် အီ မုး ဂွန် အာအေလာဆေပ် တွိုန်။ စိူဝ် ဂေ ဒူအီ တီ၊ ဂေ ဟဲ့ ဒဲမ် အုန် ခဲင် ဘပ် လွင် ဂေ ခုန်ဒီခမ် ခဲင် မိူင် အီဆာရေလ။ 24 ဂေ အီ မုး ဒါ တာင် တီ ဂေ စိူဝ် အာဟာဆာဘီ၊ အာဆေရာဖီ၊ အာယောဆူ အီ မုး ဂွန် အာကာတာမေလာ ဘော ဘီနွင် ဝေါဝဲ ဂေ။ ဂေ ဒူအီ တီ ဟဲ့ ကွယ် ဘဲန် ဖိုင် ဘဲန် ဖိုင် အီ လာယ် ကာယွတ်။ ဂေ လုဝ် တဝ်း မှုဝ် အီ အိူပ် ဇဝ်ဖြာ ဘော ဒါင် ဂုင် ဂေဇူ ဒီ အန် ဇဝ်။ ဂေ တဝ်း လာယ် ဝျီ့ လာယ် ဝျီ့၊ တဲး န့ ဒူပ် ပီ ဒွိုမ် အုန် ခုန်ဒီခမ် အာဒါဝိတ် အီ မုး ဒူအီ ပီ အိုပ် ဇဝ်ဖြာ တွိုန်။

25 ဂေ အီ ဘ်ု မာလုဝ်း ဟုဝ် ဇဝ်ဖြာ ဘော မုး အာမာထာနီ၊ အာဘာကာပူကီ၊ အာအောဘာဒီ၊ အာမေဆူလမ်၊ အာတာလာမူန် ဘော အာအေခူပ်။ ဒူအီ ဂေ တီ ဂေ ဘော ဘ်ု ဟူင် ဒူင် အုန် ဂေ ကြုဝ်ကြာမ် အီ ကွယ် ခူပ် ဘာင် မာလုဝ်း ခဲင် ဟုဝ် ဇဝ်ဖြာ တွိုန်။ 26 ဂေ ဟဲ့ ဘူင် ဂါန် ဇဝ်ဖြာ ဒေါ မုး စုဝ် ဘာန် အာယောအီခိမ် အီ မုး ဂွန် အာယောဆူ ဘော လှာန် အာယောဇာဒက်။ န့ မုး ဘော စုဝ် ဘာန် ဒါ ကာညာ တာင် အီ စိူဝ် အာနေဟာမီ ဘော ဒေါ စုဝ် ဘာန် ဒါ အီ လှူ ဒီ ဇဝ်ဖြာ အီ စိူဝ် အာအေဆာရာ အီ ဘော မုး ဒါ စာရေ။

27 ဒေါ တဝ်း ဂေ ဒီ လှူ ရဲင် မိူင် ယေရူဆာလဲမ် တွိုန်၊ ဂေ ဘော ဒဲ့ တူတ့် ခဲ့ ကွယ် ဂေ ဒူအီ ခြိုဝ် အာလေဝီ တွိုန် အီ ကွယ် ဒွန် ပ့လုဝ့် ဒွန် နာ၊ တဲး ဂေ တး ကာဇု ခဲင် ဘ့လွယ် တီ၊ တဲး ဂေ တဝ်း မှုဝ် ဘော စှုဝ်း စှဲန့်၊ ဘး ဒိင်၊ ကြိတ် ဘော ဒိင် ဒီရဝ်၊ တဲး ဂေ အိူပ် ဇဝ်ဖြာ ဘော ဒါင် ဂုင် ဂေဇူ ဒီ အန် ဇဝ်။ 28 ဂေ ဒူအီ အီ တဝ်း မှုဝ် တီ ဟဲ့ တး ခဲင် ရဝ် အီ ကွယ် နာ ရေတ့် မိူင် ယေရူဆာလဲမ် ဘော ခဲင် မိူင် နေတောဖာ။ 29 ဂေ ဘော တး ခဲင် ရဝ် အီ ကွယ် ကာတတ် မိူင် ဘေတ်ကီလဂါ၊ မိူင် ဂီဘာ ဘော ခဲင် မိူင် အာဇာမာဝိတ်။ ဂေ မိူဝ် ဟဲ့ တး ကာဇု ခဲင် ဘ့လွယ် တီ။ ဂေ ဒူအီ အီ တဝ်း မှုဝ် တီ၊ ဂေ ဟဲ့ ဒွိုမ် ဒဲ ရဝ် ဒဲ ကာင် အီ ကွယ် ရူပ် မိူင် ယေရူဆာလဲမ် တီ။ 30 ပန် တီ ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ ခြိုဝ် အာလေဝီ ဂေ မိူဝ် ဘူင် တဲး ဂေ ဆီငါ ဘွတ် ဒူပ် ပီ ဒမ် ဒါရာ။ ဂေ ဘူင် တဲး ဘော ဒူအီ ကိူန် ဘော မာလုဝ်း ဘော ရဲင် မိူင် ဆီငါ ဘွတ် ပါယ် တီ။

31 ဟဲ့ ဟွတ့်၊ အုဝ် မိူဝ် ဒဲ့ ဂေ အီ မုး ဒါ တာင် အီ အိုပ် ဂေ ဒူအီ အာယူဒါ၊ တဲး ဂေ ဟုဝ့် ဒဲင် ရဲင် မိူင် တွိုန်။ အုဝ် မိူဝ် ကာယဝ်း ဂေ ဒူအီ အီ တဝ်း မှုဝ် တဲး ဂေ ဘဲန် အာ ဖိုင်၊ တဲး ဂေ တဝ်း မှုဝ် အီ အိူပ် ဇဝ်ဖြာ ဒေါ လဲပ် မိူင်။ အာဒါ အူ ဖိုင်၊ တဲး ဂေ ဟာဝ် ဘ့လာက် အာအး၊ ဟာဝ် ဒူပ် ရဲင် မိူင်၊ တဲး ဂေ ကော ဇမ် ဒီ မာလုဝ်း အီ စိူဝ် မာလုဝ်း အျီင် မက်။ 32 ဘော အာဟုဝ်ဆာယာ ဘော ဂေ ဒါ တာင် အီ အိုပ် ဒူအီ အာယူဒါ အာဒါ အူ ကာတဲ၊ ဂေ ဘော ဝီ ဟာဝ် ဒူပ် ဒီ ပန် ဂေ အီ တဝ်း မှုဝ် တီ။ 33 ဘော ဂေ ဒါ အီ လှူ ဒီ ဇဝ်ဖြာ ဟာဝ် ဒူပ်။ န့ ဘော မုး အာဇာရီယာ၊ အာအေဆာရာ၊ အာမေဆူလမ်၊ 34 အာယူဒါ၊ အာဘေန်ယာမ်၊ အာဆေမာယာ ဘော အာယေရေမီ။ 35 န့ ဘော မိုဝ်း ဒါ အီ လှူ ဒီ ဇဝ်ဖြာ မင် အီ အီ ဘုတ် ဝဝ် ဒူပ် ဒီ ပန် ဂေ။ အီ ဝီ ဟာဝ် ဒါမ် ဂေ တီ ဘော မုး အာဆာခါရာ အီ မုး ဂွန် အာယုဝ်နာထာန်။ အန် မုး ဘော လှာန် အာဆေမာယာ။ အာဆေမာယာ ဘော မုး ဂွန် အာမာထာနီ။ အာမာတ်ထာနီ ဘော မုး ဂွန် အာမီဂါယာ။ အာမီဂါယာ ဘော မုး ဂွန် အာဇာကူရာ။ အာဇာကူရာ ဘော မုး ဂွန် အာဆာပ် တွိုန်။ 36 ဝါယ် အန် တီ န့ ဘော ဝီ မိုဝ်း ဂေ ဘီနွင် အန် အီ စိူဝ် အာဆေမာယာ၊ အာစာရေန်၊ အာမီလာလေ၊ အာကီလာလေ၊ အာမာအီနာ၊ အာနေထာနေလာ၊ အာယူဒါ ဘော အာဟာနာနီ။ ဒူအီ ဂေ တီ၊ ဂေ ဘော ဂူင့် န့ကြိုဝ်း ပီ ဒွိုမ် တဝ်း အာဒါဝိတ် ဒီ ဒွယ် ဒီ ဘး။ အာဒါဝိတ် ဘော မုး ဒူအီ ပီ အိုပ် ဇဝ်ဖြာ။ အာအေဆာရာ အီ မုး ဒါ စာရေ တွိုန် အန် ဘော ဘဲန် အီ ယဲတ့် ဟာဝ် ဂေ ဖိုင် တီ။ 37 ဒေါ ဇမ် ဂေ ခူပ် မာလုဝ်း အီ စိူဝ် မာလုဝ်း တုဝ်း အိုမ်၊ ဂေ ပီ ဝီ ဟုဝ့် ဒီ န့တဲင် အီ ဝီ ဟာဝ် ဆိူဝ် ဒီ မိူင် အာဒါဝိတ် တွိုန်။ ဟဲ့ ဟွတ့် ဂေ ဘော ကာလုဝ်း နာ ကွာ ကာင် အာဒါဝိတ် တီ၊ ဘော ဝီ ဟာဝ် ဒူပ် ရဲင် မိူင် ဝီ ဟာဝ် ဇမ် ဒီ မာလုဝ်း အီ စိူဝ် မာလုဝ်း အိုမ်။ မာလုဝ်း တီ ကွယ် ဘ့လာက် နာ လေး ဆီငဲ။

38 ဂေ ဒူအီ အာဒါ ပေါ အူ ဖိုင် အီ တဝ်း မှုဝ် တွိုန်၊ ဂေ ဘော ဝီ လဲပ် ဟာဝ် ဒဲင် ရဲင် မိူင် ဘ့လာက် နာ အာဂ။ ဘော အုဝ် ဘော ဂေ ဒူအီ ကိူန် အာဒါ အူ ကာတဲ၊ ယေ ဘော ဝီ ဟာဝ် ဒူပ် ဂေ။ ယေ ဘော ကာလုဝ်း ဟုဝ် စာ ဒူင် မိုဝ်း ကာဝှါင် ငဝ်၊ ဝီ ဟာဝ် ဒူင် ကွယ် ရဲင် မိူင် အီ စိူဝ် ရဲင် ကာဝဝ်း။ 39 ယေ ဘော ကာလုဝ်း ဒီ တီ၊ ဝီ ဟာဝ် ဒဲင် မာလုဝ်း အီ စိူဝ် မာလုဝ်း အာအေဖာရိမ်၊ မာလုဝ်း ဘြိမ် ဘော မာလုဝ်း ဂါ။ ဘော ကာလုဝ်း ဟုဝ် စာ အီ စိူဝ် ဟုဝ် ဟာနာနေလာ ဘော ဟုဝ် စာ အီ စိူဝ် အူ မာယဝ်း။ ယေ ကော ဝီ ဟာဝ် ဇမ် ဘော ဒီ မာလုဝ်း အီ စိူဝ် မာလုဝ်း မာဘူ။ ယေ ဘော ဟာဝ် တိူက် ဒီ ခူပ် မာလုဝ်း အီ မိုဝ်း ကာပိုမ်။

40 ဝါယ် အန် တီ ဘော အာ ဖိုင် ဘော ဂေ ဖိုင် အီ တဝ်း မှုဝ် တွိုန် ဘော အုဝ် ဘော ဂေ ဒါ တာင် အာဒါ အူ ကာတဲ ယေ တး ဇမ် တူတ့် ဒီ ဂ့လ ခဲင် ဝဲင် ဟုဝ် ဇဝ်ဖြာ။ 41 ခဲင် ဖိုင် အုဝ် တီ န့ ဝီ မိုဝ်း ဘော ဂေ ဒါ အီ လှူ ဒီ ဇဝ်ဖြာ အီ ဘုတ် ဝဝ်။ ဂေ စိူဝ် အာအေယာခိမ်၊ အာမာအာဆေယာ၊ အာမီနီယာမိန်၊ အာမီဂါယာ၊ အာအေလီအောနေ၊ အာဆာခါရာ ဘော အာဟာနာနီယာ။ 42 န့ ဘော ဝီ မိုဝ်း ဘော အာမာအာဆေယာ၊ အာဆေမာယာ၊ အာလေအာဆာ၊ အာအောစီ၊ အာယေဟုဝ်နန်၊ အာမာလာခီယာ၊ အာအေလမ် ဘော အာအေဇေန်။ ဂေ အီ တဝ်း မှုဝ် တွိုန် ဂေ ဘော တဝ်း ဒူပ် ဒါ ဆာရာ ဂေ အီ စိူဝ် အာယေစာရာဟီ။ 43 ဆီငဲ တီ ဂေ ဘော လှူ ပီ ဒီ လှူ ကိူန် ကာဆဝ်။ ဂေ ဒူအီ ကိူန် မိူဝ် ဘျုဝ် ဘျုဝ် ကျဝ် ကျဝ် ခုဝ်၊ ဇဝ်ဖြာ ဟဲ့ တဲး ဂေ ဘျုဝ် တဲး ဂေ ကျဝ်။ အီဘိုန့် ဂေ ဂွန် ဂေ မိူဝ် တး လိုပ် ဘ့လွယ် အီ ဟဲ့ ဘျုဝ် ဟဲ့ ဒါခိုယ် တီ။ ဟမ် ဂေ အီ ဟဲ့ ဘျုဝ် ဟဲ့ ကျဝ် ခဲင် မိူင် ယေရူဆာလဲမ် တီ၊ န့ ကော လိုဝ်း ဟာဝ် တူင့် ကာဆဝ်။

44 ဒေါ အန် တီ ဂေ ဘော ဒါင် တဲး န့ မိုဝ်း ဒါ အီ အီ အိုပ် ဟူင် ဒူင် အုန် ဂေ ကြုဝ်ကြာမ် ပီ လှူ ဂေ ခဲင် ဟုဝ် ဇဝ်ဖြာ။ န့ မုး ပီ လှူ ဘဲန် မျုဝ် ဘဲန် မျုဝ် ဘော ပီ လှူ ဘ့လေ ဒင် ဘော ပီ လှူ ဂိုဝ် ဘုန် အူ ဘုန်။ ဒူအီ ဂေ တီ ဘော ဘဲန် အီ ဂဲပ် အုန် ပီ လုဝ် တး ဟပ် ဂေ ဒူအီ ရဝ် ဒူအီ ကာင်၊ တဲး န့ ဘဲန် ပီ ဒီ ဟူမ် ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ ခြိုဝ် အာလေဝီ၊ တဲး န့ ဒူပ် ပီ ဒမ် အုန် ဒါရာ ဒီ ဂေ။ ဂေ ဒူအီ အာယူဒါ မိူဝ် ဟဲ့ ဘျုဝ် ဒါခိုယ် ဘော အိုင် ပီ ဘူင် ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ ခြိုဝ် အာလေဝီ ဂေ တွိုန်။ 45 ဂေ ဟဲ့ ခမ် ဒီ ဘူင် ဂါန် ဇဝ်ဖြာ၊ ဟဲ့ ဘူင် တဲး ဘော ဒုဝ် ဂေ ဆီငါ၊ တဲး န့ ဒူပ် ပီ ဒမ် ဒါရာ။ ဘော ဂေ အီ တဝ်း မှုဝ် ခဲင် ဟုဝ် ဇဝ်ဖြာ ဘော ဂေ အီ ဘ်ု ဟုဝ် ဇဝ်ဖြာ၊ ဂေ မိူဝ် ဘူင် ဒူပ် ခဲ့ ပီ ဒမ် အုန် ခုန်ဒီခမ် အာဒါဝိတ် ဂါယ် ဂွန် အန် အီ စိူဝ် အာဆာလုဝ်မုဝ် တွိုန်။ 46 ဆိန့် ဒေါ မုး စုဝ် ဘာန် ခုန်ဒီခမ် အာဒါဝိတ် ဘော စုဝ် ဘာန် ဒါ ဆာရာ အီ နပ် မှုဝ်၊ အီ စိူဝ် အာဆာပ် တွိုန်၊ န့ ဟဲ့ မိုဝ်း ဒူအီ အီ ယဲတ့် ဂေ ဒူအီ တဝ်း မှုဝ်။ ဂေ တဝ်း မှုဝ် အီ အိူပ် ဇဝ်ဖြာ ဘော မှုဝ် အီ ဒါင် ဂုင် ဂေဇူ ဒီ အန် ဇဝ်။ 47 ပါယ် တီ ဒေါ မုး စုဝ် ဘာန် အာဇေရူဘာဘေန် ဂါယ် အာနေဟာမီ မိူဝ်၊ ဂေ ဒူအီ အီဆာရေလ ဘောကာဂ့လျီတ်၊ ဂေ ဘော လှူ ဒွါ ဒီ ဂေ ဒူအီ အီ တဝ်း မှုဝ် ဘော ဒီ ဂေ ဒူအီ အီ ဘ်ု ဟုဝ် ဇဝ်ဖြာ။ ဂေ ဘော ဒွါ ခဲ့ ပီ လုဝ် ဂေ ဒွန် ဆီငဲ ဒွန် ဆီငဲ။ ဂေ ဒူအီ ကိူန် ဟဲ့ ဟွတ့် လှူ ပီ ဒီ လှူ ဂေ ဒီ ဒူအီ ခြိုဝ် အာလေဝီ၊ ဂေ ဒူအီ ခြိုဝ် အာလေဝီ ဘော ဝီ ကာယဝ်း ဒွါ ဒီ ဂေ ဒါ အီ လှူ ဒီ ဇဝ်ဖြာ အီ မုး လှုက်လှာန် အာရူန် ခဲ့ တဲး ဂေ မိုဝ်း ခဲ့ ပီ လုဝ် ဂေ။