1 ဂေ အီ မုး ဒါ တာင် အီ အိုပ် အီ ယဲတ့် ဂေ ဒူအီ အီဆာရေလ ဂေ ဘော ဟာဝ် ကွယ် ခဲင် မိူင် ယေရူဆာလဲမ်။ ဂေ ဘော ကာတာမ် တဲး ဂေ ဒူအီ ကိူန် ဂိုဝ် န့ဟူမ် အူ န့ဟူမ် ဟာဝ် ကွယ် ခဲင် မိူင် ယေရူဆာလဲမ် အီ မုး မိူင် အီ ဆီငါ ဘွတ်။ ဂေ အီ ဆီ ဂိတ် တွိုန်၊ ဂေ ဘော ဝီ ဟာဝ် ကွယ် ခဲင် ရဝ် ခဲင် မိူင် အီ မုး ဒူင် ဘြိမ် ဂေ။ 2 ခဲ့ ကွယ် ဂေ ဒူအီ ကိူန် ဘော ကာဖြူမ် ဒီ အိူပ် ဂေ ဒူအီ အီ မိုဝ်း နဝ်း ဆီ ကွယ် ခဲင် မိူင် ယေရူဆာလဲမ် တွိုန်။

3 ဇာရာင် ဂေ ဒူအီ အီ ဟဲ့ ဟာဝ် ကွယ် ခဲင် ရဝ် ခဲင် မိူင် အီ ကွယ် ခဲင် ကာဒါယ် မိူင် ယူဒါ န့ ပါယ် နီ။ န့ မုး ဒါ အီ လှူ ဒီ ဇဝ်ဖြာ၊ ဒူအီ ခဲင် ခြိုဝ် အာလေဝီ၊ ဒူအီ အီ ဘူင် ဂါန် ခဲင် ဟုဝ် ဇဝ်ဖြာ ဘော လှုက်လှာန် ဂေ အီ ဟဲ့ ဒွိုမ် ဘဲန် မှာယ် ခုန်ဒီခမ် အာဆာလုဝ်မုဝ် တွိုန်။ ဂေ ဘော ကွယ် ဒဲင် ကာဒါယ် ဂေ၊ ရာင် အာဆေ ရာင် အန်။ 4 ဂေ အီ ယီ တး ကွယ် ခဲင် မိူင် ယေရူဆာလဲမ် ဘော မုး ဒူအီ ခဲင် ခြိုဝ် အာယူဒါ ဘော ခဲင် ခြိုဝ် အာဘေန်ယာမ်။ ဂေ ဒူအီ အီ အိုပ် ခဲင် ခြိုဝ် အာယူဒါ အီ ဟဲ့ တး ကွယ် ခဲင် မိူင် ယေရူဆာလဲမ်၊ န့ မုး အာထာယာ အီ မုး ဂွန် အာအူဇီယာ။ အန် ဘော မုး လှာန် အာဆာခါရာ။ အာဆာခါရာ ဘော မုး ဂွန် အာမာရီယာ။ အာမာရီယာ ဝီ မုး ဂွန် အာဆေဖာဒီ။ အာဆေဖာဒီ ဝီ မုး ဂွန် အာမာဟာလာလေန်။ အာမာဟာလာလေန် ဘော မုး ဂွန် အာဖေရေတ်။ 5 န့ မုး ဘော အာမာအာဆေယာ အီ မုး ဂွန် အာဘာရက်။ အန် ဘော မုး လှာန် အာကောလာဟာစာ။ အာကောလာဟာစာ ဘော မုး ဂွန် အာဟာစာယာ။ အာဟာစာယာ ဘော မုး ဂွန် အာတာယာ။ အာတာယာ ဘော မုး ဂွန် အာယောယာရိမ်။ အာယောယာရိမ် ဘော မုး ဂွန် အာဆာခါရာ။ အာဆာခါရာ ဘော မုး ဂွန် အာဆေလာ။ 6 န့ ဘော မုး ဘော ဂေ လှုက်လှာန် အာဖေရေတ် အီ ကွယ် ခဲင် မိူင် ယေရူဆာလဲမ် တီ။ ဂေ အီမာယ် ကွယ် ဖွုန် မာယဝ်း ဒီ ဒဝ် ဂိုဝ် ဒီ ဒါ ဝီ။ ဂေ ဘောကာဂ့လျီတ် ဟဲ့ ဘဲန် ဒါ ဆိုက်။

7 ဂေ လှုက်လှာန် အာဘေန်ယာမ် ဘော မုး အာဆာလာအူ အီ မုး ဂွန် အာမေဆူလမ် ဘော လှာန် အာယောတ။ အာယောတ ဘော မုး ဂွန် အာဘေတာယာ။ အာဘေတာယာ ဘော မုး ဂွန် အာကောလာယာ။ အာကောလာယာ ဘော မုး ဂွန် အာမာအာဆေယာ။ အာမာအာဆေယာ ဘော မုး ဂွန် အာယာကဲ။ အာယာကဲ ဘော မုး ဂွန် အာယေဆာယာ။ 8 န့ ဘော မုး ဘော အာကာဘေ ဘော အာဆာလာယ် အီ မုး ဘီနွင် အီ ဒူပ် အာဆာလာအူ အီ ကွယ် ခဲင် မိူင် ယေရူဆာလဲမ် တွိုန်။ ဂေ ဘောကာဂ့လျီတ် ကွယ် ဒိမ် မာယဝ်း ဒီ အာ ဂိုဝ် ဒီ ဒါ ဝီ။ 9 န့ ဘော မုး ဘော အာယုဝ်အေလ အီ မုး ဂွန် အာဇီခါရီ၊ အီ ဟဲ့ ဘဲန် ဒါ တာင် အီ အိုပ် ဂေ။ ဘော အာယူဒါ အီ မုး ဂွန် အာဟာဆေနုဝ်။ အန် ဟဲ့ ဘဲန် ဒါ အီ ဒါမ် အာယုဝ်အေလ အိုပ် မိူင် တီ။

10 ဂေ ဒါ အီ လှူ ဒီ ဇဝ်ဖြာ အီ ကွယ် ခဲင် မိူင် ယေရူဆာလဲမ် ဘော မုး အာယီတာယာ ဘော ဂွန် အာယောယာရိမ် အူ ဝီ ဘော အာယာခိန်၊ 11 အာဆေရာယာ အီ မုး ဂွန် အာဟီလာခီ၊ အီ မုး ဘော လှာန် အာမေဆူလမ်။ အာမေဆူလမ် ဘော မုး ဂွန် အာဇာဒူက်။ အာဇာဒူက် ဘော မုး ဂွန် အာမာရာယုတ်။ အာမာရာယုတ် ဘော မုး ဂွန် အာဟီတူပ် အီ ဟဲ့ ဘဲန် ဒါ တာင် အီ အိုပ် ခဲင် ဟုဝ် ဇဝ်ဖြာ။ 12 န့ မိုဝ်း ဘော ဂေ ဘီနွင် ဂေ ဒူအီ တီ အီ ဘူင် ဂါန် ခဲင် ဟုဝ် ဇဝ်ဖြာ။ အီ မုး ဒါ ဆိုက်၊ ဂေ ဘောကာဂ့လျီတ် ကွယ် ဒါ မာယဝ်း ဒီ အာ ဂိုဝ် ဒီ အာ ဝီ။ န့ မုး ဘော အာတာယာ အီ မုး ဂွန် အာယေရုဝ်ဟမ်။ အာယေရုဝ်ဟမ် ဘော မုး ဂွန် အာဘ့လဝ်လီယာ။ အာဘ့လဝ်လီယာ ဘော မုး ဂွန် အာအမ်ဇီ။ အာအမ်ဇီ ဘော မုး ဂွန် အာဆာခါရာ။ အာဆာခါရာ ဘော မုး ဂွန် အာဘာဆူရာ။ အာဘာဆူရာ ဘော မုး ဂွန် အာမာလာခီယာ။ 13 န့ ဘော မုး ဘော ဘီနွင် အာတာယ အီ မုး ဂိန့် န့ဟူမ်၊ ဂေ ဘောကာဂ့လျီတ် ကွယ် အာ မာယဝ်း ဒီ ဖွုန် ဂိုဝ် ဒီ အာ ဝီ။ န့ ဘော မုး အာမာဆာ အီ မုး ဂွန် အာစာရေလာ။ အာစာရေလာ ဘော မုး ဂွန် အာဟာဆေ။ အာဟာဆေ ဘော မုး ဂွန် အာမေဆီလာမုတ်။ အာမေဆီလာမုတ် ဘော မုး ဂွန် အာအီမေရာ။ 14 န့ မုး ဘော အီကတ် ဘော ဝါ အာမာဆာ အီ ဟဲ့ ဘဲန် ဒါ ဆိုက် အီ မိုဝ်း ပ့လူမ် တာင်။ ဂေ ဘောကာဂ့လျီတ် ကွယ် အူ မာယဝ်း ဒီ အာ ဂိုဝ် ဒီ ဒါ ဝီ။ အာစာဘာဒေလ အီ မုး ဂွန် အာဟာကာတောလိမ် ဘော ဘဲန် ဒါ တာင် အီ အိုပ် ဂေ။

15 ဂေ ဒူအီ ခဲင် ခြိုဝ် အာလေဝီ အီ ကွယ် ခဲင် မိူင် ယေရူဆာလဲမ် ဘော မုး အာဆေမာယာ အီ မုး ဂွန် အာဟာဆုပ်။ အာဟာဆုပ် ဘော မုး ဂွန် အာဇာရီကမ်။ အာဇာရီကမ် ဘော မုး ဂွန် အာဟာဆာဘီ။ အာဟာဆာဘီ ဘော မုး ဂွန် အာဘူနီ။ 16 န့ ပီ ဝီ မိုဝ်း ဘော အာဆာပါဆေ ဘော အာယောစာဘာတ် အီ ဘဲန် ဒါ တာင် ခဲင် ခြိုဝ် အာလေဝီ။ ဂေ ဘူင် ဂါန် နာ ရေတ့် ဟုဝ် ဇဝ်ဖြာ။ 17 န့ ဘော မုး ဘော အာမာထာနီ အီ မုး ဂွန် အာမီဂါ ဘော မုး လှာန် အာဇာဘာဒီ။ အာစာဘာဒီ ဘော မုး ဂွန် အာဆာပ်။ အာဆာပ် တီ မုး ဒူအီ အီ ယဲတ့် ဂေ ဒါ အီ အီ တဝ်း မှုဝ်၊ ယဲတ့် ဘော ဒေါ ဆာခိုဝ် ဂေ ဘော ဒါင် ဂုင် ဂေဇူ ဒီ ဇဝ်ဖြာ။ န့ ဘော မုး အာဘာကာပူကီ အီ မုး ဒါ အီ ဒါမ် အာမာထာနီ ခဲင် ဖိုင် ဘီနွင် အန်။ န့ ဘော မုး အာဘာတ အီ မုး ဂွန် အာဆာမူအာ။ အန် ဘော မုး လှာန် အာကာလာန်။ အာကာလာန် ဘော မုး ဂွန် အာယေဒူထုန်။ 18 ဂေ ဒူအီ ခဲင် ခြိုဝ် အာလေဝီ ဘောကာဂ့လျီတ် ကွယ် အာ မာယဝ်း ဒီ ဒါ ဂိုဝ် ဒီ ဖွုန် ဝီ။ ဘော ဂေ ဘောကာဂ့လျီတ် ကွယ် ခဲင် မိူင် ယေရူဆာလဲမ်။

19 န့ ဘော မုး ဘော အာအေခူပ် ဘော အာတာလာမူန် ဘော ဂေ ဘီနွင် ဝေါဝဲ အန်၊ ဂေ ကွယ် အူ မာယဝ်း ဒီ ဘူ ဂိုဝ် ဒီ အာ ဝီ။ ဂေ မုး ဒူအီ အီ ဘ်ု မာလုဝ်း မိူင်။

20 ဂေ အီ ဟဝ် အီ မုး ဒူအီ အီဆာရေလ ဘော ဒါ အီ လှူ ဒီ ဇဝ်ဖြာ ဘော ဒူအီ ခြိုဝ် အာလေဝီ၊ ဂေ ဘော ကွယ် ခဲင် ကာဒါယ် ဒူအီ အာယူဒါ ဒွန် နာ ဒွန် ပ့လုဝ့် အီ မုး ခါဂုန် ပဲ့ ဟဲ့ အာပ် ဂုန့် ဒင် ဂေ ဒီ ဂေ။

21 ဂေ ဒူအီ အီ ဘူင် ဂါန် ခဲင် ဟုဝ် ဇဝ်ဖြာ၊ ဂေ ဘော ကွယ် ဒူင် အီ စိူဝ် အောဖီလာ။ ဘော အာဇီဟာ ဘော အာဂီဆာဘာ၊ ဂါယ် ဘော ဘဲန် ဒါ တာင် အီ အိုပ် ဂေ။

22 ဒါ တာင် အီ အိုပ် ဒူအီ ခြိုဝ် အာလေဝီ အီ ကွယ် ခဲင် မိူင် ယေရူဆာလဲမ် ဘော မုး အာအောစီ အီ မုး ဂွန် အာဘာနီ။ အန် ဘော မုး လှာန် အာဟာဆာဘီ။ အာဟာဆာဘီ ဘော မုး ဂွန် အာမာထာနီ။ အာမာထာနီ ဘော မုး ဂွန် အာမီဂါ။ အာအောစီ တီ ဘော မုး လှုက်လှာန် အာဆာပ် အူ ဝီ။ ဂေ ဒူအီ တီ ဘော ဘဲန် ဒါ အီ တဝ်း မှုဝ် ဒေါ ကြိုပ် ဂေ ဇဝ်ဖြာ ခဲင် ဟုဝ် ဇဝ်ဖြာ။ 23 ခုန်ဒီခမ် ဟဲ့ ဒွိုမ် ဒွါ အာမိင် လွင် ဂေ ဒါ အီ တဝ်း မှုဝ် တီ၊ တဲး ဂေ နပ် ပီ လုဝ် ဘူင် ဂေ ဒွန် ဆီငဲ ဒွန် ဆီငဲ။

24 န့ ဘော မုး အာဘေဆာဟီ အီ မုး ဂွန် အာမေစာဘေန်။ အန် မုး လှုက်လှာန် အာဇေန်ရာ ခဲင် ခြိုဝ် အာယူဒါ။ အန် ဘော ဘဲန် ဒါ အီ စွယ် ခုန်ဒီခမ် လွင် အာရေ ဂေ ဒူအီ အီဆာရေလ ဒွန် မျုဝ်။

25 ဂေ ဒူအီ ကိူန် အီ ကွယ် ခဲင် ရဝ် ခဲင် မိူင် အီ ကွယ် ချြီ့ မာန် ဂေ ဒူင် နာ ဂေ ဘော မုး ဒူအီ အာယူဒါ မင် အီ၊ ဂေ ဘော ကွယ် ခဲင် မိူင် ကီရီယာတ်အာဘာ၊ ဘော ခဲင် မိူင် ဒီဖူန်၊ ခဲင် မိူင် ယေကာတ်အေလာ ဘော ခဲင် ရဝ် အီ ကွယ် နာ ရေတ့် မိူင် ဂေ တီ။ 26 မင် အီ ဂေ ဘော ဟာဝ် ကွယ် ဘော ခဲင် မိူင် ယောဆူ၊ မိူင် မောလာဒါ၊ မိူင် ဘေတ်ဘ့လေိတ်၊ 27 မိူင် ဟာဇာဆူအာန်၊ မိူင် ဘီရာဆေဘာ ဘော ခဲင် ရဝ် အီ ကွယ် ခူပ် မိူင် ဂေ တီ။ 28 မင် အီ ကွယ် ဘော ခဲင် မိူင် ဇီကာလာတ် ဘော ခဲင် မိူင် မေကောနာ ဘော ခဲင် ရဝ် အီ ကွယ် နာ ရေတ့် မိူင် ဂေ တီ။ 29 ဂေ ကွယ် ဘော ခဲင် မိူင် အေန်ရိမ်မူန်၊ ခဲင် မိူင် ဇုဝ်ရာ၊ မိူင် ယာမူတ်၊ 30 ဘော ခဲင် မိူင် စာနော၊ မိူင် အာတူလမ် ဘော ခဲင် ရဝ် အီ ကွယ် နာ ရေတ့် မိူင် ဂေ တီ။ ဂေ ကွယ် ဘော ခဲင် မိူင် လာခိတ် ဘော ခဲင် ဒူင် နာ အီ ကွယ် ကာတတ် မိူင် တီ။ ဂေ ကွယ် ဘော ခဲင် မိူင် အာစေကာ ဘော ခဲင် ရဝ် နာ ရေတ့် မိူင် တီ။ ဒူင် ကွယ် ဂေ ဒူအီ အာယူဒါ တီ၊ န့ စုး ဒီ မိူင် ဘီရာဆေဘာ ကော ဝီ ဇမ် ဒီ ဒီလယ့် ဟိန်နုမ်။

31 ဂေ ဒူအီ အာဘေန်ယာမ် ဘော ကွယ် ခဲင် မိူင် ဂီဘာ၊ မိူင် မိက်မာတ်၊ မိူင် အာယာ ဘော မိူင် ဘေဒါအေန် ဘော ခဲင် ရဝ် နာ ရေတ့် မိူင် ဂေ တီ။ 32 ဂေ ကွယ် ဘော ခဲင် မိူင် အာနာထူတ်၊ မိူင် နုဝ်ဘ၊ မိူင် အာယာ၊ 33 မိူင် ဟာစော၊ မိူင် ရာမာ၊ မိူင် ကိတ်ဒိမ်၊ 34 မိူင် ဟာဒိတ်၊ မိူင် စေဘုဝ်ယိမ်၊ မိူင် နေပါလာတ်။ 35 ဂေ ကွယ် ဘော ခဲင် မိူင် လောတာ ဂေ မိူင် အောနော ဘော ခဲင် ဒီလယ့် အီ စိူဝ် ဒူင် ကွယ် လက်ဆာမာ။

36 ဂေ ဒူအီ ခဲင် ခြိုဝ် အာလေဝီ မင် အီ အီ ဟဲ့ ကွယ် ကာတဲ ဂေ ဒူအီ အာယူဒါ ဘော ဝီ ဟာဝ် ကွယ် ကာတဲ ဂေ ဒူအီ အာဘေန်ယာမ်။