1 န့ ဘော ဇမ် မာဂျီန် ဂိုဝ် ဒီ ဟာအာ အီ စိူဝ် မာဂျီန် အာတာ။ ဒေါ ဇမ် ဆီငဲ ဂိုဝ် ဒီ ဟာအူယ်၊ ဟဲ့ မုး ဆီငဲ ပီ တဝ်း ခုန်ဒီခမ်၊ ဒေါ ဒွါ အန် အာမိင် လွင် ဒူအီ အာယူဒါ။ ဂေ အီ မုး ရန်ဆူ ဒူအီ အာယူဒါ ဂေ ဟဲ့ ထာင် ဂေ ဒီ ပဲ ဒူအီ အာယူဒါ ဆီငဲ အန် တီ။ ဟဲ့ ဟွတ့်၊ န့ ဘော ဝီ ကာပ့လု။ ဂေ ဒူအီ အာယူဒါ ဘော ဝီ ပွိုန် ဒီ ပဲ ဒူအီ အီ ဇွင့် ဂေ။ 2 ဂေ ဒူအီ အာယူဒါ ဒွန် မိူင် ဒွန် ပ့လုဝ့် ဂေ ဘော တး ကာဇု၊ ဘ်ု ဒီ ကာဂုဝ်း ဒီ ဂေ အီ ဆီ ငဝ်း ဂေ။ ပါယ် တီ ဒူအီ ဒွန် မာန် ဒွန် မိူင် ဘော ယုဝ် ဂေ ဒူအီ အာယူဒါ။ အာဝ် ဟူ မိုဝ်း အီ ယ တဝ်း ဒီ ကာဂုဝ်း ဒီ ဂေ။ 3 ပန် တီ ခဲ့ ကွယ် ဒါ တာင် ဒွန် မာန် ဒွန် မိူင် ဘော ဂေ ဒါ ကာညာ အီ အိုပ် မိူင် ဘော ဂေ အာမူ အာမာတ် အီ ကွယ် ရိုမ် ဒူပ် ခုန်ဒီခမ်၊ ဂေ ဒွန် အီ ဘော စွယ် ဒူအီ အာယူဒါ ကူပ် ယုဝ် ဂေ အာမုဝ်တာကေ တွိုန်။ 4 အာမုဝ်တာကေ ဘော မိုဝ်း ပွုန် ခဲင် ဟုဝ် ခုန်ဒီခမ်။ ဒူအီ ဒွန် မာန် ဒွန် မိူင် ဘော ကာလာင် လွင် အာမုဝ်တာကေ ဟဲ့ ကျ ဟဲ့ မုး။ ပွုန် အန် ဘော ကြဲ ဒီ တာင် ကာဆဝ်။

5 ဂေ ဒူအီ အာယူဒါ ဘော တာ မာပွါ့ လာင် ဂေ၊ ငဝ်း ယမ် ဘောကာဂ့လျီတ် ရန်ဆူ ဂေ။ ဂေ ဘော ဘူင် ခဲ့ ပီ ဆီ ဘူင် ဂေ ဒီ ဒူအီ အီ ဇွင့် ဂေ။ 6 ဂေ ဘော ငဝ်း ယမ် ဒူအီ ဖန် မာယဝ်း ဝီ ဒီ မိူင် ဆူဆာန် တွိုန်။ 7-10 ဂေ ဘော ငဝ်း ဘော ဂွန် အာဟာမာန် အီ မုး ရန်ဆူ ဒူအီ အာယူဒါ တွိုန်။ ဂွန် အီမာယ် အန် မိုဝ်း ဂိုဝ် ဝီ အီ စိူဝ် အာဘာဆန်တာလ၊ အာတာလဖူန်၊ အာဆာဘာဆာ၊ အာပေါရာဆာ၊ အာတာလီ၊ အာရီတာဆ၊ အာဘာမာတာဆ၊ အာရီဆဲ၊ အာလီထဲ ဘော အာဝါဇာဆာ။ ဂေ ငဝ်း ယမ် ပါယ် တီ၊ ယီ တူ ဒိုဝ်း ကြုဝ်ကြာမ် ဂေ။

11 ဆီငဲ အန် တီ မင် အီ ဘော ဝီ ကာလာင် ဒီ ခုန်ဒီခမ် ခဲ့ ဟဲ့ ငဝ်း ဂေ ဒူအီ ခဲင် မိူင် ဆူဆာန် တွိုန်။ 12 ခုန်ဒီခမ် ဝီ တဝ်း ဒီ နာင် ဟောခမ် အေဆာထာ၊ “ဂေ ဒူအီ အာယူဒါ ဟဲ့ ငဝ်း ယမ် ဒူအီ ဖန် မာယဝ်း ဝီ။ ဘော ဂွန် အာဟာမာန် ဂိုဝ် ဝီ တွိုန် ဂေ ဟဲ့ ငဝ်း ဝဲန် ခဲင် မိူင် ဆူဆာန်။ ခဲင် မာန် မိူင် အုဝ် ဒွန် ပ့လုဝ့်၊ တူ နပ် ပီ ဘော ဘူင် ဂေ။ မဲ နာင်၊ မဲ ဘော လုဝ် မာဆေ၊ ဒဲင် တီ မဲ ဆီ မှာန့် မာဆေ၊ အုဝ် ဒီ ဒွါ ဒီ မဲ။”

13 နာင် အေဆာထာ ဝီ တဝ်း၊ “အုဝ် မှာန့်၊ တဲး မဲ ခုန်ဒီခမ် ဝီ ခ့ဝါင် ဂေ ဒူအီ အာယူဒါ အီ ကွယ် ခဲင် မိူင် ဆူဆာန် နီ။ ခဲညှာ တဲး ဂေ ဝီ ဘူင် ပီ ပီ ဘူင် ဂေ အာတိုဝ် နီ၊ တဲး ဂေ ဝီ ဒိုဝ်း ဂွန် အာဟာမာန် ဂိုဝ် ဝီ တီ၊ ပက် ဟွယ် မဲင် ဂေ ဒီ ရွင့် စာ။”

14 ခုန်ဒီခမ် ဘော ဝီ ဒွါ အာမိင်၊ စ်ု ဂေ အီ ကွယ် ဒီ မိူင် ဆူဆာန် တဲး ဂေ ဘူင် ပါယ် တီ။ ဟဲ့ ဟွတ့်၊ ဂေ ဘော ဒိုဝ်း ဂွန် အာဟာမာန် ဂိုဝ် ဝီ၊ ပက် ဟွယ် မဲင် ဂေ ဒီ ရွင့် စာ။ 15 ပါယ် တီ ဒေါ မုး မာဂျီန် အာတာ၊ ဆီငဲ ဂိုဝ် ဒီ မ့ဖွုန်၊ ဒူအီ အာယူဒါ အီ ကွယ် ခဲင် မိူင် ဆူဆာန် တွိုန် ဝီ တး ကာဇု၊ ပီ ဝီ ငဝ်း ဒူအီ အီ ကွယ် ခဲင် မိူင် ဂေ ပေါ အူယ် မာယဝ်း ဝီ။ ဂေ ယီ တူ ဒိုဝ်း ကြုဝ်ကြာမ် ဂေ။

16 ဒေါ အန် တီ ဂေ ဒူအီ အာယူဒါ အီ ကွယ် ဘဲန် ပ့လုဝ့် ဘဲန် ပ့လုဝ့် ခဲင် မိူင် ပီ အိုပ် ခုန်ဒီခမ် တွိုန်၊ ဂေ ဘော တး ကာဇု ရဲ ဒုဝ် ဂေ၊ တဲး ဂေ ကွယ် ဒါခိုယ်၊ ကွဲ့ တဲး ရန်ဆူ ဂေ ပွိုန် ဒီ ပျာတ့် ဂေ။ ဂေ ဘော ငဝ်း ယမ် ဒူအီ အီ ဇွင့် ဂေ အာဒါ ဘူ မှိုန့် ဒီ ဖန် ဟြဲန့် ဝီ။ ဂေ ယီ တူ ဒိုဝ်း ကြုဝ်ကြာမ် ဂေ မာဆေ။ 17 ဂေ ဘူင် ပါယ် တီ ဒေါ မုး မာဂျီန် အာတာ ဒေါ ဇမ် ဆီငဲ ဂိုဝ် ဒီ ဟာအူယ်။ ဘော ဝီ ဇမ် ဆီငဲ ဂိုဝ် ဒီ မ့ဖွုန်၊ ဂေ ဘော ဒီလှဝ် ဘော ကွယ် ဒါခိုယ် ဘူင် ဘ့လွယ်။ ဟဲ့ မုး ဆီငဲ ဘျုဝ် ဒါခိုယ် ဂေ။

18 ဂေ ဒူအီ အာယူဒါ အီ ကွယ် ခဲင် မိူင် ဆူဆာန် တွိုန်၊ ဂေ ဘော တး ကာဇု ဒေါ မုး မာဂျီန် အာတာ၊ ဆီငဲ ဂိုဝ် ဒီ ဟာအူယ် ဘော ဂိုဝ် ဒီ မ့ဖွုန်။ ဘော ဇမ် ဆီငဲ ဂိုဝ် ဒီ မ့ဖန်၊ ဂေ ဘော ကွယ် ဒါခိုယ် ဘူင် ဘ့လွယ်၊ တဲး ဂေ ဘျုဝ် ဒွန် အီ။

19 ခုဝ် အန် တီ၊ အီ မုး ဂေ ဒူအီ အာယူဒါ အီ ကွယ် ခဲင် ရဝ် နာ ရေတ့် မိူင်၊ ဒွန် ဆီနမ် ဂေ ဘော ဘူင် ဘ့လွယ် ဒေါ မုး မာဂျီန် အာတာ၊ ဆီငဲ ဂိုဝ် ဒီ မ့ဖွုန်။ ဂေ ဘော ဘျုဝ် ဒါခိုယ် ဒွန် အီ။ ဂေ ဘော လာယ် တိုယ် ခေါဆွင် ဆီငဲ တီ။

20 အာမုဝ်တာကေ ဘော ဒဲမ် ပဲ့ တိုယ် ဒီ ဂေ ဒူအီ အာယူဒါ ဘော အီ ကွယ် တူင့် ဘော အီ ကွယ် ကာတတ်၊ ဒွန် မိူင် ဒွန် ပ့လုဝ့် ခဲင် မိူင် ပီ အိုပ် ခုန်ဒီခမ် အာဟာဆေရူ တွိုန်။ 21 ဒွန် ဆီနမ် ဟီ ဇမ် မာဂျီန် အာတာ၊ ဆီငဲ ဂိုဝ် ဒီ မ့ဖွုန် ဘော ဆီငဲ ဂိုဝ် ဒီ မ့ဖန်၊ အန် တဲး ဂေ ဘူင် ဘ့လွယ် တီ။ 22 ခုဝ်၊ ဆီငဲ တီ ဟဲ့ မုး ဆီငဲ ဟဲ့ လွတ် ဂေ ဒူအီ အာယူဒါ ဒီ ရန်ဆူ ဂေ။ န့ မုး မာဂျီန် ဒေါ ဟဲ့ ဝီ ဘျွင် ဒုက် ဂေ၊ ဘဲန် အီ ဘျုဝ် ဒါခိုယ်။ ဒေါ က့လိုဝ် နဝ်း ဂေ၊ ဟဲ့ ဝီ ဘဲန် ခူယ်၊ ဘူင် ဘ့လွယ်။ အာမုဝ်တာကေ ဒဲမ် ပဲ့ တီ၊ တဲး ဂေ ဘောကာဂ့လျီတ် ဘူင် ဘ့လွယ် ဒါခိုယ်၊ လာယ် ဒွါ ခေါဆွင် ဘော ကာဆာင် ကြုဝ်ကြာမ် ဒီ ဒူအီ ဂိန်။

23 ဂေ ဒူအီ အာယူဒါ ဘော ဘူင် ပီ ပီ ဒွိုမ် ဘူင် ဂေ ဆိန့် ဒေါ ဂုဝ် အန်။ ဂေ ဘူင် ဒူပ် ပီ ခဲ ပီ ဒဲမ် တိုယ် အာမုဝ်တာကေ တွိုန်။ 24 န့ မုး အာဟာမာန် အီ မုး ဂွန် အာဟာမဲတာဆ အီ မုး ခြိုဝ် အာကာတ်၊ အန် ဟဲ့ ဘဲန် ရန်ဆူ ဒူအီ အာယူဒါ ဘောကာဂ့လျီတ်။ အန် ဟဲ့ ခြာမ် ဒီ ငဝ်း ဒူအီ အာယူဒါ၊ ကာတာမ် တဲး အန် နပ် ဆီငဲ မှဝ် အန် ဒီ ငဝ်း ဝဲန် ဂေ။ 25 ခုန်ဒီခမ် ဘော နပ် လွင် အန် တီ၊ အန် ဘော ဝီ ဘူင် အာမိင်၊ တဲး အာဟာမာန် ဝီ ခမ် ပီ ခြာမ် အန် ဒီ ဘူင် ဒီ ဒူအီ အာယူဒါ၊ တဲး ဘော အန် ဘော ဂွန် အန် ဝီ ခမ် အီ ပက် ဟွယ် မဲင် ဂေ ဒီ ရွင့် စာ တွိုန်။ 26 ခုဝ်၊ ဂေ တဝ်း ဆီငဲ ပီ ဘူင် ဂေ ဘ့လွယ် တီ အန် စိူဝ် “ဘူရိမ်။” ဂြုဝ်း “ဘူရိမ်” တီ၊ န့ လေး “ကာတာမ်။” ဂေ ဘူင် ဒွန် မျုဝ်၊ တဲး န့ ဒူပ် ပီ ဒဲမ် အုန် ခဲင် ပဲ့ တွိုန် ဘော ကူပ် အာမူ ဒွန် မျုဝ် ပဲ့ ဟဲ့ ကာတုန့် ဂေ ဒူအီ အာယူဒါ။ 27 ဂေ တဲး န့ ဘဲန် ထုင်ဂျာမ် ဂေ၊ တဲး ဘော စုဝ် ဂေ ဘော စုဝ် လှုက်လှာန် ဂေ ဘော ဂေ ဒွန် အီ အီ ဒူပ် ဂေ ဘူင် ဘ့လွယ် ဘူရိမ် တီ ဒွန် ဆီနမ်၊ ဟီ ဇမ် ဆီငဲ တီ။ ဂေ ဘော နုဝ် ဆီချာ အာခြာဝ် တီ၊ တူ တဲး ဂေ လုတ်၊ ဂေ ဘ့လိူင် ဘ့လွယ် တီ။ 28 ဂေ တဲး အီ လှုဝ်း ဆီငဲ တီ၊ ကော ဇမ် စုဝ် ဘာန် ဂွန် ဂေ ဒွန် စုဝ်၊ ကွဲ့ တဲး ဒွန် ခြိုဝ် ဒွန် မိူင် ဒွန် ရဝ် ပိဝ် ဆီငဲ ဘူရိမ် တီ၊ ကွဲ့ တဲး န့ ဟြာယ် ကာတဲ ဂေ ဒူအီ အာယူဒါ၊ တဲး ဂေ လှုဝ်း ဆီငဲ တီ၊ တဲး ကော ဇမ် ဒွန် စုဝ် ဒွန် ဇာတ်။

29 ပါယ် တီ နာင် အေဆာထာ အီ မုး ဂွန် အာဖီဟေလာ ဘော အာမုဝ်တာကေ အီ မုး ဒူအီ အာယူဒါ တွိုန် ဂါယ် ဟဲ့ ဒဲမ် ပဲ့ လွင် ဆီငဲ ဘူရိမ် တီ၊ တဲး ဒွန် အီ ထူမ် ဒူပ် ပီ စ်ု ဂါယ်။ 30 ဂါယ် ဘော တိုယ် ပဲ့ တီ ဒီ ဒူအီ အာယူဒါ ဘောကာဂ့လျီတ်၊ အီ ကွယ် ခဲင် မိူင် ပီ အိုပ် ခုန်ဒီခမ် အာဟာဆေရူ အီ မုး အူ မာယဝ်း ဒီ အာ ဂိုဝ် ဒီ ဘူ မိူင်၊ တဲး န့ ဘဲန် ဂြုဝ်း မွင့်ကာရာ ဘော ဂြုဝ်း အီ တဲး နဝ်း ဂေ ဒါခိုယ်။ 31 ပဲ့ ပီ ဒဲမ် ဂါယ် တီ၊ တဲး ဂေ ဒူပ် ဆီချာ ဆီငဲ ဘူရိမ် တီ၊ တဲး န့ ပီ ဘ့လွယ် ပီ ဘူင် ဂေ ဘဲန် မျုဝ် ဘဲန် မျုဝ် အီ မုး ဘ့လွယ် ယိူန် ပီ ဒီ ဟူမ် ဘော ဘ့လွယ် ဆာခိုဝ် ဇဝ်ဖြာ။ 32 အာမိင် ပီ ဒဲမ် နာင် အေဆာထာ ဘော လွင် ဆီငဲ ဘူရိမ် တွိုန်၊ ဂေ ဘော ဒဲမ် အုန် ဆီချာ ခဲင် ဘပ်၊ ကွဲ့ တဲး အန် လိုဝ် ဒေါ မှဝ်။