1 ဒေါ ဟဲ့ ဇမ် ဆီငဲ အာ ဂိုဝ် ဒီ မ့ဖွုန် ခဲင် မာဂျီန် တွိုန်၊ ဂေ ဒူအီ အီဆာရေလ ဘော ယိူန် ပီ ဒီ ဟူမ် ဘော စှိုပ် ခြိုင် စာန်၊ ဝီ ဒိုဝ်း ကာပုး ဟပ် ဒဲင် ဂိန့် ဂေ ကူပ် လှုဝ်း ဂေ မှာပ် ဂေ။ 2 ဒေါ အန် တီ ဂေ ဘော ကာယဝ်း ဒီ ဒူအီ အာမျုဝ် ဟဝ်။ ဂေ မိူဝ် စွင့် ဒီ အာတ့် ဇဝ်ဖြာ၊ ကာလာင် မှာပ် ဂေ ဘော မှာပ် ဂုန့် ဂေ ဒါ ဂေ။ 3 အာဒါ အူယ် နာရီ ဂေ စွင့် ဘော ထူမ် ဂေ တိး ဘပ် ဒါရာ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ။ ဟဲ့ ဟွတ့် ဂေ ဘော ကာလာင် မှာပ် ဂေ၊ ပီ ဝီ ကြိုပ် ဇဝ်ဖြာ အာဒါ ပေါ အူယ် နာရီ။ 4 ဂေ ဒူအီ ခဲင် ခြိုဝ် အာလေဝီ၊ ဂေ အီ ယဲတ့် ဒူအီ ကိူန်၊ ဂေ မိူဝ် စွင့် ဒဲင် ကာစှူင့်၊ ဒတ် တာင် ကာဆဝ် ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ။ ဒူအီ ဂေ တီ ဘော မုး အာယောဆူ၊ အာဘာနီ၊ အာကာတာမေလာ၊ အာဆေဘာနီ၊ အာပူနာနီ၊ အာဆေရာဖီ၊ အာဘာနီ ပေါ အူ ဝီ ဘော အာခေနာနီ။ 5 န့ ဘော မုး အာယောဆူ၊ အာကာတာမေလာ၊ အာဘာနီ၊ အာဟာဆာဘာနီ၊ အာဆေရာဖီ၊ အာဟုဝ်ခီယာ၊ အာဆေဘာနီ ဘော အာဘေဆာဟီ။ ဂေ ဒူအီ ခြိုဝ် အာလေဝီ တီ၊ ဂေ ဝီ တဝ်း၊ “တဲး ဘေ ယိတ့် စွင့်၊ အိူပ် ဇဝ်ဖြာ အီ မုး ဇဝ်ဖြာ အီ အိုပ် ဘေ၊” တဲး ဘေ ဘော ကာလာင် ဒီ အန် ဇဝ် တဝ်း၊ “ယေ ဒီ အိူပ် မဲ ဇဝ် ဆေဆေ ဒွန် စုဝ် ဒွန် ဘာန်။ မဲ မိုဝ်း အာဖုင် ဒင်ခုဝ် တာင် ကာဆဝ်။ မဲ ဟဲ့ တာင် လွှိုမ် ဒွန် မျုဝ်။ မဲ ဘော တာင် လွှိုမ် ခဲ့ ပီ နပ် ယေ ဒီ အိူပ်။ 6 န့ ဘော မုး မီ မဲ ဇဝ် အူ ကာဒင် အီ မုး ဇဝ်ဖြာ။ မဲ ဇဝ် ဟဲ့ ဘူင် တဲး န့ မိုဝ်း ဘော ဂါင်ဟြာဝ် ဘော ဘ့လေန့် အီ ဟဲ့ စာ၊ ဟဲ့ ကာဝဝ်း။ မဲ ဟဲ့ ဘူင် ဘော ဆီမန့် အီ ဟဲ့ ကိူန် ကာဆဝ်။ မဲ ဟဲ့ ဘူင် ဘော ကာဒါယ် ဘော တူတ့် ဒွန် မျုဝ် အီ ကွယ် ဒဲင် ကာဒါယ်။ မဲ ဟဲ့ ဘူင် ဘော အိုမ် နမ်မုက်ဆာရာ ဘော အာမျုဝ် အီ ကွယ် ခဲင် အိုမ် တီ ဒွန် မျုဝ်။ ခဲ့ ကွယ် အာမျုဝ် အီ မိုဝ်း အာဆာက်၊ မဲ ဟဲ့ တဲး ဂေ အိမ်။ ဘော ဒွန် မျုဝ် အီ ကွယ် ခဲင် ဂါင်ဟြာဝ်၊ ဂေ ဒီ ဂိုပ် ကြိုပ် မဲ ဇဝ်။

7 မဲ ဇဝ် ဘော မုး ဇဝ်ဖြာ အီ ဟဲ့ ရဝ်း အာဘြာမ် တွိုန်၊ ဟဲ့ တဲး အန် လေး ခဲင် မိူင် အူရ အီ မုး ဒူင် ကွယ် ဂေ ဒူအီ အာမျုဝ် ခါလာဒေ။ မဲ ဝီ တဲး ဘော စိူဝ် ကာမာယ် ဒီ အန်၊ တဲး အန် ဝီ စိူဝ် အာဘြာဟမ်။ 8 မဲ ဇဝ် မိူဝ် ဟဲ့ ယိုဝ်၊ အန် ဟဲ့ မိုဝ်း နဝ်း ဆီ ဒူပ် ဆီချာ မဲ ဇဝ်။ မဲ ဇဝ် မိူဝ် ဒွါ ကာဒိက် ဆတ်ဇာ ဒီ အန်။ မဲ ဟဲ့ ကာဆဲန့် တဝ်း ဒီ ဒိုဝ်း မိူင် ဒူအီ ကာနန့်၊ မိူင် ဒူအီ ဟေထိတ်၊ မိူင် ဒူအီ အာမုဝ်ရိတ်၊ မိူင် ဒူအီ ဖေရေဆိတ်၊ မိူင် ဒူအီ ယေဘူဆိတ် ဘော မိူင် ဂီဂါဆိတ်၊ တဲး မိူင် ဂေ တီ ဝီ ဘဲန် မိူင် လှုက်လှာန် အန်။ မဲ ဇဝ် မိူဝ် ဟဲ့ ဘူင် ဒူပ် ကာဒိက် ဆတ်ဇာ မဲ တီ ကူပ် မိုဝ်း မဲ ဇဝ် နဝ်း ဆိူဝ် နဝ်း မှာန်။

9 မဲ ဇဝ် မိူဝ် ဟဲ့ ယိုဝ်၊ ဂေ ဂုန့် ဒင် ယေ ဟဲ့ ခမ် ပီ ခါနှာပ် အီ ဟဝ် ဒေါ ကွယ် ဂေ ခဲင် မိူင် အဲဂိုပ်။ မဲ ဇဝ် မိူဝ် ဟဲ့ ယိုဝ် ဂြုဝ်း ပီ ဆာခိုဝ် ဂေ ဒေါ ကွယ် ဂေ ခူပ် အိုမ် ဒီနှူင် ရေန့်။ 10 မဲ ဇဝ် မိူဝ် ဟဲ့ ဘူင် ဘျ အီ မွှိုမ် အာမ် ကာဆဝ် ဒီ ခုန်ဒီခမ် ဖာရုဝ် ဘော ဒီ ဂေ အာမူ အာမာတ် အန် ဘော ဒီ ဂေ ဒူအီ ခဲင် မာန် မိူင် အန်။ ခုဝ်၊ မဲ ဇဝ် ဟဲ့ နပ်၊ ဂေ ဟဲ့ ပီဖုင် ဂေ ဘော ခါနှာပ် ဂေ ဒူအီ ပီ အိုပ် မဲ ဇဝ်။ ကော ဇမ် ဒေါ တီ နီ ဂေ ဒူအီ ဒွန် မာန် ဒွန် မိူင် ဟဲ့ ယိုဝ် လွင် အန် တီ ဘော နပ် ခဲ့ တာင် ပွုန် မဲ ဇဝ်။ 11 မဲ ဇဝ် ဟဲ့ ဘူင် တဲး အိုမ် ဒီ နှူင် ရေန့် လာယ် ကာယဝ်း၊ တဲး န့ ဘဲန် န့တေန့် ဒီ ဂေ ဂုန့် ဒင် ယေ၊ တဲး ဂေ ဝီ ပွိုန် ဒီ ဟာဝ် ဒဲင် ကာဒါယ် ဟေန့်။ ဂေ အီ ဝီ ခုင်ခြး ဒူပ် ဂေ တွိုန်၊ ဂေ ဟဲ့ ဝီ စေတ့် ယမ် တူတ့် ခဲင် အိုမ် လိုက်။ န့ ဘော ပီ မဲ ဟဲ့ ဒိုဝ်း မာဝ် ဘျွာ လူင် ခဲင် အိုမ် လိုက်။ 12 ဒေါ ကာတဲ ဆီငဲ၊ မဲ ဇဝ် ဟဲ့ တဲး န့အု ယဲတ့် ဂေ။ န့အု တီ ဟဲ့ ပီ ရွင့်။ ခဲင် မှိုဝ် မဲ ပီ ဝီ တဲး န့ မိုဝ်း ဘ့လာင် ငဝ် အီ ပီ ရွင့်၊ တဲး ဂေ ပွိုန် ဒီ ယိုဝ် ဒေါ ဟာဝ် ဂေ ဒူပ် န့တေန့်။

13 မဲ ဇဝ် ဘော တး ခဲင် ဂါင်ဟြာဝ်၊ လူင် ဒီ နွန် ဆီနာယ် ဘော ကာလာင် ဂြုဝ်း ဒီ ဂေ ဒူအီ ပီ အိုပ် မဲ ဇဝ်။ ဟဲ့ ဟွတ့် မဲ ဇဝ် ဘော ဒွါ ဒါရာ အီ မုး အီ မှာန် ဒီ ဂေ။ မဲ ဒွါ ဘော အာမိင် ဘဲန် မျုဝ် ဘဲန် မျုဝ် အီ မွှိုမ် ဒီ ဂေ။ 14 မဲ ဇဝ် ဘော မာနုဝ် တဲး ဂေ ကမ် ဆီငဲ ဘွတ် အီ မုး ဆီငဲ ဒီလှဝ်။ မဲ ဇဝ် ဟဲ့ ကာလာင် ဒီ အာမုဝ်ဆဲ အီ မုး ဒဲစေန့် မဲ၊ ဟဲ့ တဲး အန် ကာလာင် ဒီ ဂေ ဒူအီ ကိူန် လွင် ဒါရာ ဘော အာမိင် ဘော ပီ စ်ု မဲ ဘဲန် မျုဝ် ဘဲန် မျုဝ်။ 15 ဒေါ ကာပြာန့် ဂေ ပီ ဒီ ဟူမ် မဲ ဇဝ် ဘော တဲး ဂေ ဟူမ် ခါမုန် အီ လေး လူင် ခဲင် ဂါင်ဟြာဝ်။ ဒေါ ဆီ ဒျီင် ဂေ အိုမ်၊ မဲ ဇဝ် ဟဲ့ တဲး အိုမ် လေး ခဲင် ဒး မာဝ်၊ တဲး ဂေ ပွိုန် ဒီ ဒျီင်။ မဲ ဇဝ် မိူဝ် ကာလာင် တဲး ဂေ ဟာဝ် လိုပ် ရိုပ် မိူင် ပဲ့ ဟဲ့ ကာဆဲန့် မဲ ဇဝ် ဒီ ဒွါ ဒီ ဂေ။ ဒေါ အန် တီ မဲ ဇဝ် ဟဲ့ စုဝ့် ဒဲ မဲ ဘော ဒိူင် လွင် အန် တီ။ 16 မာလဲ၊ ဂေ ဂုန့် ဒင် ယေ၊ ဂေ ယီ ဝီ ပီခိုက် နဝ်း ဂေ ဘော ဒိူဝ် ကာဆဝ်၊ အာဝ် ဟူ ဝီ ဒူပ် ဒါရာ မဲ ဇဝ်။ 17 ဂေ ဝီ ဝဲန် ဝီ ပိဝ် အီ မွှိုမ် အာမ် ကာဆဝ် ပဲ့ ဟဲ့ ဘူင် မဲ ဇဝ်။ ဂေ မိူဝ် အာဝ် ဟူ ဝီ လှုဝ်း နာ ဘွတ် နာ မွှိုမ် ပဲ့ ဟဲ့ ဘူင် မဲ။ ဂေ ဝီ ကာဘး ဒီ မဲ ဇဝ် ဘော စုဝ့် ဒါင် ဒူအီ အူ ဝီ၊ တဲး အန် ဝီ ယဲတ့် ဝေန့် ဂေ ခဲင် မိူင် အဲဂိုပ်၊ ဝီ ဘဲန် မှာယ် အီ။ မာလဲ၊ မဲ ဇဝ်၊ မဲ မုး ဇဝ်ဖြာ အီ နပ် ဒီ ဂေဇူ အီ။ မဲ မိူဝ် မိုဝ်း နဝ်း ကာဝေ ဂေ။ မဲ တူ ငှိုယ် ရူ ဘော ရွက့် ကာဆဝ် ဂေ။ ခုဝ်၊ မဲ တူ ဝဲန် ဂေ။ 18 ဂေ ဟဲ့ ဝီ လှုဝ် အာရိုပ် မာမက် ဘော တဝ်း န့ မုး ဇဝ်ဖြာ အီ ဟဲ့ တဲး ဂေ လေး ခဲင် မိူင် အဲဂိုပ်။ ဂေ ပီ ဘော ဟဲ့ ဘူင် ပါယ် တီ ဘော ဟဲ့ ဘူင် လုတ့် ဘဲန် မျုဝ် ဘဲန် မျုဝ် မိူဝ်၊ မဲ ယီ တူ ဝဲန် ဂေ။

19 ကူပ် မိုဝ်း မဲ ဇဝ် နဝ်း ရွက့် ကာဝေ၊ မဲ တူ ဝဲန် ဂေ ခဲင် ပြဲ ကာဟဝ်း။ ဘော န့အု အီ ပီ ရွင့် အီ ယဲတ့် ဂေ ဟာဝ် ဒူပ် န့တေန့် ဒေါ ကာတဲ ဆီငဲ၊ မဲ ဇဝ် တူ ဒိုဝ်း ဝဲန်။ ဘော ငဝ် အီ ပီ ရွင့် အီ တဲး န့ ဘ့လာင် ခဲင် မှိုဝ် မဲ ဇဝ် တူ တဲး န့ ယတ်။ မဲ တဲး ဂေ ပွိုန် ဒီ ယိုဝ် ဒူင် ဒီ ဟာဝ် ဂေ ဆေဆေ။ 20 မဲ ဇဝ် ဘော ဝီ ဒွါ နဝ်း ဖွိုမ် မဲ၊ တဲး မဲ မာနုဝ် ဂေ။ မဲ ဇဝ် မိူဝ် တူ စူ ဒွါ ခါမုန် မာနာ တဲး ဂေ ဟူမ်။ မဲ ဘော ဒွါ အိုမ် ဒီ ဂေ တဲး န့ ဟျီင် ဂေ ဆေဆေ။ 21 စုဝ် ကွယ် ဂေ ခဲင် ပြဲ ကာဟဝ်း အာဒါ ဖွုန် ဂိုဝ် ဆီနမ်၊ မဲ ဇဝ် ဘော ဒွါ ခဲ့ ပီ လုဝ် ဂေ ဒွန် မျုဝ်။ ခြိုင် ပီ တာ ဂေ မိူဝ် တူ ဘြိမ် တူ ရာမ်။ ပ့လဝ် ဂေ မိူဝ် တူ ဆဝ် တူ အဝ်း။

22 မဲ ဇဝ် ဝီ တဲး ဂေ ပဲ အွင် ခုန်ဒီခမ် ဒူအီ အာမျုဝ် ဟဝ်၊ တဲး ဂေ ပွိုန် ဘော မာန် မိူင် ဘော ကာဒါယ် ဒူင် ကွယ် ဂေ တီ၊ တဲး ဂေ မိုဝ်း ဘဲန် ပ့လုဝ့် ဘဲန် ပ့လုဝ့်။ ဂေ ဟဲ့ ကာဂုဝ်း ပွိုန် မိူင် အာဆီဟူန် အီ မုး မိူင် ပီ အိုပ် ခုန်ဒီခမ် ဟေဆာဖူန် ဘော မိူင် ဘာဆန် အီ မုး မိူင် ပီ အိုပ် ခုန်ဒီခမ် အာအောခ တွိုန်။ 23 မဲ ဇဝ် ဟဲ့ တဲး လှုက်လှာန် ဂေ ဘြဲ ကိူန်၊ တဲး န့ ကော ပီ ဆီမန့် ခဲင် ဘ့လေန့်။ မဲ ဟဲ့ တဲး ဂွန် ဂေ ပွိုန် ဒီ လိုပ် ရိုပ် မိူင် ပဲ့ ဟဲ့ ကာဆဲန့် မဲ ဒီ ဒွါ ဒီ ဂုန့် ဂေ။ 24 ဂေ မိူဝ် ဟဲ့ ကာဂုဝ်း ပဲ ဒူအီ ခဲင် မိူင် ကာနန့်။ မဲ ဇဝ် ဟဲ့ ခါနှာပ် ဒူအီ ခဲင် မိူင် တီ၊ ဝီ တဲး ဂေ ဒူအီ ပီ အိုပ် မဲ မိုဝ်း ပွုန် လွှိုမ် ဂေ ဒူအီ ခဲင် မိူင် တီ၊ တဲး ဂေ ပွိုန် ဒီ ဘူင် ခဲ့ ပီ အိုင် ဂေ ဘော ဒီ ခုန်ဒီခမ် ဂေ ဘော ဒီ ဒူအီ ခဲင် မိူင် တီ။ 25 ဂေ ဒူအီ ပီ အိုပ် မဲ ဇဝ် ဟဲ့ ဝီ ပွိုန် ဒီ ရိုပ် မိူင် အီ မိုဝ်း ရဲင် အီ မန် ဆီချာ။ ဂေ ဘော ရိုပ် ဘော ကာဒါယ် အီ မုး ကာဒါယ် ဘွတ် ကာဒါယ် မွှိုမ်။ ခဲင် ကာင် ဂေ တီ မိူဝ်၊ ဟဲ့ မိုဝ်း ကြုဝ်ကြာမ် အီ ဘွတ် အီ မွှိုမ် ကော နုဝ့်။ ဂေ ဟဲ့ ပွိုန် ဘော အိုမ် ခိုမ် အီ ဟဲ့ ဟွတ့် ဂိုဝ်း။ ဘော မာန် မာငုန် ဘော ကာပိုမ် ဟေ နာမန် ဘော ဟေ အီ မိုဝ်း ဘ့လေ ဘဲန် မျုဝ် ဘဲန် မျုဝ်၊ ဂေ ဟဲ့ ပွိုန် တူတ့်။ ဂေ မိူဝ် ဟဲ့ ပွိုန် ဒီ ဟူမ် ခဲ့ ပီ မွက့် ဂေ။ ဂေ မိူဝ် ဟဲ့ ပွိုန် ဒီ ကွယ် ဒါခိုယ်၊ ကွယ် ဂျာမ်ဆာ ဘျုဝ် ဘျုဝ် ကျဝ် ကျဝ်။ ပါယ် တီ မဲ ဇဝ် ဟဲ့ ဂေဇူ ကိူန် ကာဆဝ် ဂေ။

26 မာလဲ၊ ဒူအီ ပီ အိုပ် မဲ ဇဝ် ဂေ တီ၊ ဂေ ဝီ ကာဘး ဒီ မဲ၊ တူ ဝီ ထူမ် ဂြုဝ်း မဲ ဇဝ် ဘော ဝီ ဝဲန် ဒါရာ မဲ။ ဂေ ဘော ဝီ ငဝ်း ယမ် ဒါ အီ ဘျာန် ဂြုဝ်း ဇဝ်ဖြာ အီ ဒွါ ဆာဒိက်၊ တဲး ဂေ ဝီ တး ကြိုပ် မဲ ဇဝ်။ ဂေ ဟဲ့ ခဲန့် ကာဆဝ် မဲ ဇဝ်။ 27 မဲ ဇဝ် မိူဝ် ဝီ တဲး ရန်ဆူ ဂေ ပဲ ဂေ ဘော ဝီ အိုပ် ဝီ ခါနှာပ် ဂေ။ ဒေါ ဟဲ့ ဇမ် ဂေ ဒုက် တာင် တီ၊ ဂေ ဘော ဝီ ဒတ် ကာလာင် တဲး မဲ ဇဝ် ထူမ်။ မဲ ဇဝ် အီ ကွယ် ဂါင်ဟြာဝ်၊ မဲ မိူဝ် ထူမ် ဂြုဝ်း ဂေ။ မဲ ဇဝ် မိူဝ် ဝီ ကာဝေ ဂေ ဘော တဲး ဂေ မိုဝ်း ဒါ တာင် အီ နပ် ဒီ စွယ် ဂေ၊ တဲး ဂေ ပွိုန် ဒီ လွတ် ဒီ ရန်ဆူ ဂေ တီ။

28 ဒေါ ဟဲ့ ဟွတ့် ပွိုန် ဂေ ဒီ ဝီ ကွယ် ဒါခိုယ်၊ အာဝ် ဟူ မိုဝ်း အာဖေ အာရေ၊ ဂေ ပီ ဝီ ဘူင် အီ တူ မွှိုမ်။ ဟဲ့ ပါယ် တီ မဲ ဇဝ် ပီ ဝီ တဲး ရန်ဆူ ဂေ ဝီ ပဲ ဂေ။ ပီ ဘော ဟဲ့ ပါယ် တီ မိူဝ်၊ ဒေါ ဝီ လှုဝ်း ဂေ မှာပ် ဂေ၊ ဒေါ ဝီ ဒတ် ဂေ ဒီ မဲ ဇဝ်၊ မဲ ဇဝ် အီ ကွယ် ဂါင်ဟြာဝ်၊ မဲ ဘော ထူမ် ဂြုဝ်း ဂေ ဘော ဝီ ချွတ် ဂေ။ ကူပ် မိုဝ်း မဲ နဝ်း ရွက့် နဝ်း ကာဝေ အီ ဟဲ့ တာင် ကာဆဝ်၊ မဲ ဇဝ် ဟဲ့ စွယ် ဂေ ဘဲန် ဇေန့် ဘဲန် ဇေန့်။

29 မဲ ဇဝ် ပီ ဘော ဟဲ့ ဒွါ ဆာဒိက်၊ တဲး ဂေ ဘူင် ဒူပ် ဒါရာ မဲ မိူဝ်၊ ကူပ် မိုဝ်း ဂေ နဝ်း ပီခိုက်၊ ဂေ ဝီ ဝဲန် ဒါရာ အီ မုး ဒါရာ အီ ပွိုန် ဒွါ အာဆာက် ဒီ ဂေ ဒွန် အီ အီ ဘူင် ဒူပ်။ ဂေ ယီ ဟဲ့ ဒိူဝ်၊ ဟဲ့ နှူက် ကာဆဝ်၊ တူ ထူမ် ဂြုဝ်း မဲ ဇဝ်။ 30 မဲ ဇဝ် ဘော ခမ် ပီ ဘူင် ဂေ တီ၊ ဘဲန် ဆီနမ် ဘဲန် ဆီနမ်။ မဲ ဇဝ် ပီ ဘော ဟဲ့ တဲး နဝ်း ဖွိုမ် မဲ မာနုဝ် ဂေ၊ ဒေါ ကာလာင် ဒါ အီ ဘျာန် ဂြုဝ်း ဇဝ်ဖြာ ဒီ ဂေ၊ ဂေ မိူဝ် တူ ဒိုဝ်း ဒီ ထူမ်။ ပါယ် တီ မဲ ဇဝ် ဘော တဲး ဒူအီ အာမျုဝ် ဟဝ် တး ပဲ ဂေ။ 31 ပီ ဘော ဟဲ့ ပါယ် တီ ကူပ် မိုဝ်း မဲ ဇဝ် နဝ်း ကာဝေ ဘော ရွက့် ကာဆဝ်၊ မဲ ဇဝ် တူ ဘ့လေး တူ ဝဲန်၊ တူ ပျာတ့် ဂေ။ မဲ ဇဝ် ဘော မုး ဇဝ်ဖြာ အီ နပ် ဒီ ကာဝေ၊ နပ် ဒီ ဂေဇူ အီ။

32 အိုယ် မဲ ဇဝ်ဖြာ၊ မဲ ဇဝ် ဘော မုး ဇဝ်ဖြာ အီ တာင် ကာဆဝ်။ မဲ ဘော မုး ဇဝ်ဖြာ အီ အိုပ် ယေ။ မဲ ဇဝ် ဘော မိုဝ်း အာဖုင် ဒင်ခုဝ် အီ တာင်၊ အီ မွှိုမ် ယုဝ် ကာဆဝ်။ မဲ ဇဝ် ဟဲ့ ဒွိုမ် ကာဆဲန့် ဒီ ရွက့် ယေ။ မဲ မိူဝ် ဘူင် ဒူပ် ကာဒိက် ဆတ်ဇာ ပဲ့ ဟဲ့ ဒွါ မဲ တီ။ ဆိန့် ဒေါ မုး စုဝ် ဘာန် ခုန်ဒီခမ် အီ အိုပ် မိူင် အာဆူရာ ဂေ ဟဲ့ ခါနှာပ် ယေ။ ကော ဝီ ဇမ် အာတိုဝ် နီ၊ ယေ ဟဲ့ ခမ် ဒုက် တာင် ကာဆဝ်။ ဂေ အီ မုး ဒူအီ ပီ အိုပ် မဲ ဇဝ် ဘော မုး ခုန်ဒီခမ် ဘော အာမူ အာမာတ် အန်၊ ဘော ဒါ အီ လှူ ဒီ ဇဝ်ဖြာ၊ ဒါ အီ ဘျာန် ဂြုဝ်း ဇဝ်ဖြာ ဘော ဂေ ဂုန့် ဒင် ယေ၊ ဂေ ဘောကာဂ့လျီတ် ဟဲ့ ကာဒုး တူတ့် ဒီ ခမ် ဒုက် တာင် တီ။ တဲး မဲ ဇဝ် နုဝ် ဒုက် တာင် ပဲ့ ဟဲ့ ခမ် ဂေ တီ။ ကွဲ့ တဲး မဲ ထာင် န့ တူ ဘော ခိုက်ခမ် ဘော လိုက်။ 33 ပဲ့ ဟဲ့ ဒမ် မဲ ဇဝ် မှာပ် ဒီ ယေ၊ ဟဲ့ ဆိူဝ် ဟဲ့ မှာန်။ ယေ ဟဲ့ ဘူင် အီ တူ မွှိုမ်။ အီ မုး မဲ ဇဝ်၊ မဲ ယီ ဘူင် ဆိူဝ် ဆိူဝ် မှာန် မှာန်။ 34 ယေ ဘောကာဂ့လျီတ် ဘော မုး ခုန်ဒီခမ်၊ ဘော မုး အာမူ အာမာတ် အန်၊ ဘော မုး ဒါ အီ လှူ ဒီ ဇဝ်ဖြာ၊ ဘော မုး ဂေ ဂုန့် ဒင် ယေ၊ အာဝ် မိုဝ်း အီ ဘူင် ဒူပ် ဒါရာ မဲ ဇဝ်။ ဂေ မိူဝ် တူ ထူမ် ဂြုဝ်း ပီ ဒမ် အုန် မဲ ဇဝ် ဘော ဂြုဝ်း ပီ ဒမ် မဲ ဆာဒိက် ဒီ ဂေ။ 35 ဒေါ ကွယ် ဂေ ခဲင် မိူင် ဂေ၊ ဂေ တူ ကြိုပ် မဲ ဇဝ်။ ကူပ် ဟဲ့ ကိူန် ပီ ဂေဇူ မဲ ဇဝ် ဒီ ဂေ၊ ဂေ ဘော ပွိုန် ဒီ ကွယ် ဒါခိုယ် ခဲင် မာန် မိူင် ဂေ အီ ဟဲ့ ကာဝဝ်း၊ အီ မုး ကာဒါယ် ဘွတ် ကာဒါယ် မွှိုမ် ပဲ့ ဟဲ့ ဒွါ မဲ ဒီ ဂေ။ ဂေ ယီ တူ ဘျွင် နဝ်း၊ တူ ဝဲန် အီ တူ မွှိုမ် ပီ ဘူင် ဂေ။

36 ဒေါ တီ နီ ယေ ဟဲ့ ဝီ ကာဒုး ဒီ ဘဲန် မှာယ် အီ ဟဝ် ဒေါ ကွယ် ယေ ခဲင် မိူင် ပဲ့ ဟဲ့ ဒွါ မဲ ဇဝ် ဒီ ဂေ ဂုန့် ဒင် ယေ။ မဲ ဟဲ့ ဆီ တဲး ဂေ ဝီ ပွိုန် ဒီ ဟူမ် ဘော ဘ့လေ ဘဲန် မျုဝ် ဘဲန် မျုဝ် အီ ဘွတ် အီ မွှိုမ် ခဲင် မိူင် တီ။ 37 န့ ယီ မုး ကူပ် မှာပ် တာင် ပဲ့ ဟဲ့ ဘူင် ယေ တီ၊ ခဲ့ ဘော မိုဝ်း အီ ဟဲ့ ဘြဲ အီ ဟဲ့ ကျ ခဲင် မိူင် တီ၊ ဟဲ့ ဝီ ဘဲန် တူတ့် ကြုဝ် ခုန်ဒီခမ် ပဲ့ ဟဲ့ တဲး မဲ ဇဝ် အိုပ် ယေ။ ဂေ မိူဝ် ဟဲ့ အိုပ် ယေ၊ တဲး ဂေ ဘော ဘူင် ပီ ဆီ ဘူင် ဂေ ဒီ ယေ ဘော ဒီ ဒုဝ် ဆတ်ဒါဝါ ယေ။ ယေ မိူဝ် ဟဲ့ ခမ် ဒုက် ခမ် ညှာပ် ကာဆဝ်။

38 ကူပ် န့ ပါယ် တီ ခဲ့ ကွယ် ယေ ဒူအီ အီဆာရေလ၊ ယေ ဟဲ့ လာယ် ဖြူမ် ဒီ ဒွါ ကာဒိက် ဆတ်ဇာ အီ မန် ဆီချာ ဘော ဒဲမ် အုန် ခဲင် ပဲ့ လွင် အန် တီ။ ဘော မုး ဒါ ကာညာ အီ အိုပ် ယေ၊ ဘော မုး ဒူအီ ခဲင် ခြိုဝ် အာလေဝီ၊ ဘော မုး ဒါ အီ လှူ ဒီ ဇဝ်ဖြာ ယေ၊ ဂေ မိူဝ် ဒွက် ဇိုမ် ဒီ ပဲ့ တီ။”