1 ဒေါ ဝီ ဇမ် မာဂျီန် မ့ဘူ ဂေ ဒူအီ အီဆာရေလ မိူဝ် ဟဲ့ ပွိုန် ဒီ ကွယ် ဒါခိုယ်၊ ကွယ် ဆီချာ ဒူင် ကွယ် ဂေ။ ဆီငဲ ဒေါ ဂုဝ် ဒေါ မုး မာဂျီန် မ့ဘူ တီ၊ ခဲ့ ကွယ် ဂေ ဘောကာဂ့လျီတ် ဘော တး ကာဇု ကာတဲ ဂ့လ နာ အာတ့် မာလုဝ်း ရဲင် မိူင် အီ စိူဝ် မာလုဝ်း အိုမ်။ ဂေ ဘော မှာန့် ဒီ ဒါ စာရေ အီ စိူဝ် အာအေဆာရာ၊ တဲး အန် ဒိုဝ်း ဘပ် ဒါရာ ပီ ဒဲမ် အုန် အာမုဝ်ဆဲ တွိုန် အီ မုး ပဲ့ ဟဲ့ ကာလာင် ဇဝ်ဖြာ ဒီ ဂေ ဒူအီ အီဆာရေလ။

2 အာအေဆာရာ ဘော ဒိုဝ်း တး ဘပ် ဒါရာ၊ ဘော တိး တဲး ဂေ ဒူအီ ကိူန် ထူမ်။ န့ ဘော မိုဝ်း ဘော အီဘိုန့် ဘော အီမာယ် ဘော ဒွန် အီ အီ နပ် ဒီ ထူမ် တဲး န့ ကာလှုး ဒီ နဝ်း။ 3 အန် ဘော တိး ဘပ် ဒါရာ တီ၊ စုး ဆိန့် ဆိန့်ဝး ကော ဝီ ဇမ် ကာတဲ ဆီငဲ။ ဒေါ အန် တီ ဂေ ကွယ် ဒီ ဂ့လ နာ အာတ့် မာလုဝ်း တွိုန်။ ခဲ့ ကွယ် ဂေ ဒူအီ ဘောကာဂ့လျီတ်၊ ဂေ ဘော ဆီတွင့် ထူမ် ဒွန် အီ။

4 ဆီငဲ တီ ဂေ ဟဲ့ ဒိုဝ်း ဟေ၊ ဘူင် ကာစှူင့်၊ တဲး ဒါ စာရေ အာအေဆာရာ ကွယ် နာ ဒဲင်။ ဂေ အီ စွင့် ဘ့လာက် အာအး အန် ဘော မုး အာမာဒီဆီ၊ အာဆေမာ၊ အာနာယာ၊ အာအူရီယာ၊ အာဟီလာခီ ဘော အာမာအာဆေယာ။ ဂေ အီ စွင့် ဘ့လာက် အာဂ အန် ဘော မုး အာဘေတာယာ၊ အာမီဆာအေန်၊ အာမာလာခီယာ၊ အာဟာဆူမ်၊ အာဟာဆဘာတာနာ၊ အာဆာခါရာ ဘော အာမေဆူလမ်။

5 အာအေဆာရာ ဟဲ့ စွင့် ဒဲင် ကာစှူင့်၊ တဲး အန် စာ လွှိုမ် ဂေ ဒူအီ ကိူန်၊ တဲး ဂေ ပွိုန် ဒီ ယိုဝ် အန်။ အန် မိူဝ် ဝိုဝ်း ဘပ်။ ဒေါ အန် တီ ဂေ ဒူအီ ဘောကာဂ့လျီတ် မိူဝ် ယိတ့် စွင့် အူ ဇေန့်။ 6 အာအေဆာရာ ဝီ တဝ်း၊ “တဲး အေ အိူပ် ဇဝ်ဖြာ အီ မုး ဇဝ်ဖြာ အီ ဘွတ် ကာဆဝ်။” ဂေ ဒူအီ ဘောကာဂ့လျီတ် ဘော စုဝ့် ဒဲ ဂေ၊ ကြိုပ် ဘော တဝ်း၊ “တဲး န့ ဘဲန် ပါယ် တီ။” ဟဲ့ ဟွတ့်၊ ဂေ ပီ ဝီ မုတ် ဂိုပ် ဒီ ကာဒါယ်၊ ဝီ ကြိုပ် ဇဝ်ဖြာ။

7 ဟဲ့ ဟွတ့်၊ ဂေ ဘော ဝီ ယိတ့် စွင့်၊ ဝီ ထူမ် ဂြုဝ်း အန်။ ဂေ ဒူအီ ခဲင် ခြိုဝ် အာလေဝီ ဘော ကာလာင် ဆီဖဝ် ဒါရာ တီ။ ဒူအီ အာလေဝီ ဂေ တီ၊ ဘော မုး အာယောဆူ၊ အာဘာနီ၊ အာဆေရာဖီ၊ အာယာမိန်၊ အာအေခူပ်၊ အာဆာပါဆေ၊ အာဟုဝ်ခီယာ၊ အာမာအာဆေယာ၊ အာ​​​ဂေလီတာ၊ အာဇာရီယာ၊ အာယောစာဘာတ်၊ အာဟာနန် ဘော အာဘ့လဝ်ယာ။ 8 ဂေ မိူဝ် တိး ခဲင် ဘပ် ဇဝ်ဖြာ၊ ဝီ ကာလာင် ဘော ပီ ပါယ် ဆီဖဝ် အန်၊ တဲး ဂေ ဒူအီ ကိူန် နပ် ဒီ ထူမ်၊ တဲး န့ ကာလှုး ဒီ နဝ်း ဂေ။

9 ဒေါ ယိုဝ် ဂေ ဒူအီ ကိူန် ပီ ကာလာင် ဒါရာ တီ၊ န့ ဘော ဒိုဝ် နဝ်း ဂေ၊ တဲး ဂေ ဘော ယာမ်။ ပန် တီ ဒါ ကာညာ အာနေဟာမီ ဘော ဒါ အီ လှူ ဒီ ဇဝ်ဖြာ အီ စိူဝ် အာအေဆာရာ အီ မုး ဘော ဒါ စာရေ တွိုန် ဘော ဂေ ဒူအီ ခြိုဝ် အာလေဝီ၊ ဂေ ဘော ဝီ မာနုဝ် ဂေ ဒူအီ ကိူန် ဘော တဝ်း၊ “ဆီငဲ အာတိုဝ် နီ န့ မုး ဆီငဲ ဘွတ် ဒီ အာတ့် ဇဝ်ဖြာ ပီ ကြိုပ် ဘေ၊ အာဝ် လုဝ် ယာမ် အာဝ် လုဝ် က့လိုဝ်။”

10 အာနေဟာမီ ဝီ တဝ်း၊ “ဒေါ တီ နီ တဲး ဘေ ဝီ ဝေန့် ဘူင် ဘ့လွယ် ဘော ဟူမ် ပီ ဒီ ဟူမ် ဆီငဲး။ တဲး ဘေ ဝီ ဒိုဝ်း ပီ ဒီ ဟူမ် ဘော အိုမ် မာငုန်၊ ဟျီင် ဂေ အီ တူ မိုဝ်း မာဆေ။ အာတိုဝ် နီ ဘော မုး ဆီငဲ ဘွတ် ဒီ အာတ့် ဇဝ်ဖြာ ပီ ကြိုပ် အေ။ အာဝ် လုဝ် က့လိုဝ်၊ အာဝ် လုဝ် ယာမ်။ ခုဝ်၊ ဇဝ်ဖြာ ဟဲ့ တဲး နဝ်း ဒါခိုယ်၊ တဲး အေ မိုဝ်း ပ့လူမ် မိုဝ်း ဟဲန့်။”

11 ဂေ ဒူအီ ခြိုဝ် အာလေဝီ ဘော ဟာဝ် ကာလာင် ဒီ ဂေ ဒူအီ ကိူန် လွင် တူ ကာအာပ် ဂေ က့လိုဝ်။ ဂေ တဝ်း၊ “ဆီငဲ ဘွတ် တီ တဲး ဘေ ဘောကာဂ့လျီတ် ကွယ် နှိမ် နှိမ် ယေန် ယေန်။”

12 ပန် တီ ဂေ ဒူအီ ကိူန် ဘော ဝီ ဝေန့် ဟူမ် ပီ ဒီ ဟူမ် ဘျုဝ် ဘျုဝ် ကျဝ် ကျဝ်။ ဂေ ဘော ဝီ ဒိုဝ်း ခဲ့ ပီ မိုဝ်း ဂေ၊ ဒွါ ဒီ အီ ဟဝ် ကူပ် ဟဲ့ ထူမ် ဂေ ပီ ကာလာင် ဘပ် ဒါရာ တွိုန်။

13 န့ ဘော ဝီ ဇမ် ပန် ခဲညှာ၊ ဂေ အီ မုး ဒါ တာင် အီ အိုပ် ခြိုဝ် မှဝ် ခြိုဝ် အန် ဘော ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ ခြိုဝ် အာလေဝီ၊ ဂေ ဘော ဝီ တး ဒူင် ကွယ် အာအေဆာရာ အီ မုး ဒါ စာရေ တွိုန်၊ တဲး ဂေ ပွိုန် ဒီ ဝီ ဟေန် ဒါရာ တီ၊ တဲး န့ ဇေ့ ဇေ့ဇုင် ဇုင်။ 14 ဂေ ဘော ဝီ ယိုဝ် ဘပ် ဒါရာ ပီ ဒဲမ် အုန် အာမုဝ်ဆဲ အီ မုး ပဲ့ ဟဲ့ ကာလာင် ဇဝ်ဖြာ ဒီ ဂေ ဒူအီ အီဆာရေလ။ န့ တဝ်း လွင် ဂေ ဒူအီ အီဆာရေလ၊ တဲး ဂေ ဘူင် ဘ့လွယ် လုဝ် ကွယ် ခဲင် ထိုပ် ဒေါ ဇမ် မာဂျီန် မ့ဘူ။ 15 ပါယ် တီ ဂေ ဘော လုဝ် ဘ့လေး အာမိင် ဘော ကာလာင် ခဲင် မိူင် ယေရူဆာလဲမ် ဘော ခဲင် ရဝ် ခဲင် မိူင် ဒွန် ပ့လုဝ့် တဝ်း၊ “တဲး ဒွန် အီ ဟုဝ့် ဒီ နွန် ဒိုဝ်း တး ရာ ဟေ န့ကေ ဘော ရာ ဟေ နာမန် ဘော ရာ ဟေ နာမန် ပြဲ၊ ရာ ဟေ မူရာတူ ဘော ရာ ဟေ အီ မိုဝ်း ကာပ့လုယ် အီ ဂ့လမ် ဆီချာ၊ ဝီ ဒိုဝ်း တး ဘူင် ထိုပ်၊ တဲး န့ ဘော ဒူပ် ခဲ့ ပီ ဒဲမ် အုန် ခဲင် ဘပ် ဒါရာ တွိုန်။”

16 ပန် တီ ဂေ မိူဝ် ဟာဝ် ဒိုဝ်း ရာ ဟေ တး၊ ဘူင် ထိုပ်။ ဂေ ဘော ဘူင် ဒဲင် ကာတု ကာင် ဂေ၊ ခဲင် ဝဲင် ကာင် ဂေ၊ ခဲင် ဝဲင် ဟုဝ် ဇဝ်ဖြာ၊ ခဲင် ဂ့လင် ခူပ် မာလုဝ်း မိူင် အီ စိူဝ် မာလုဝ်း အိုမ်၊ ဘော ဒီ ဘာင် မာလုဝ်း အီ စိူဝ် မာလုဝ်း အာအေဖာရိမ်။ 17 ဂေ ဒူအီ ဘောကာဂ့လျီတ် အီ ဟဲ့ ဝီ တး ဇမ် မိူင် ဂေ၊ ဂေ ဘော ကာဖြူမ် ဒီ ဘူင် ထိုပ် ဂေ တီ။ ဂေ ဘော ကွယ် ခဲင် ထိုပ် ဂေ တီ။ ဆိန့် ဒေါ မုး စုဝ် ဘာန် အာယုဝ်ဆူအာ အီ မုး ဂွန် အာနုန် တွိုန်၊ ကော ဝီ ဇမ် ဆီငဲ တီ၊ ဂေ ဒူအီ အီဆာရေလ အာဝ် ဟူ ဒွိုမ် ဘူင် ဘ့လွယ် တီ ခေါ အူ ဇေန့်။ ခုဝ်၊ ဂေ မိူဝ် ခူယ် ဒါခိုယ် ကာဆဝ်။

18 ဆိန့် ဆီငဲ ကာစုး ဂေ ဒီ ဘူင် ဘ့လွယ် တီ၊ ကော ဝီ ဇမ် ဆီငဲ ပန် ဒီ ဟွတ့် ဂေ၊ ဂေ ဘော တိး ဘပ် ဒါရာ ဇဝ်ဖြာ တွိုန် ဒွန် ဆီငဲ ဒွန် ဆီငဲ။ ဂေ မိူဝ် ဘူင် ဘ့လွယ် တီ အာဒါ ဘူ ဆီငဲ။ ဒေါ ဟဲ့ ဝီ ဇမ် ဆီငဲ န့ဒါ၊ ဂေ ဘော ဝီ တး ကာဇု၊ တဲး န့ ပီ ပီ ဒမ် ဒါရာ ဂေ ဘူင်။