1 ဘုဝ် ကာနမ် အီ စိူဝ် ဆာတာန်၊ အန် ဆီ ပျာတ့် ဂေ ဒူအီ အီဆာရေလ။ အန် ဘော ကာဆုး နဝ်း အာဒါဝိတ်၊ တဲး အန် တိး ဇာရာင် ဂေ ဒူအီ ပီ အိုပ် အန် ဘောကာဂ့လျီတ်။ 2 အာဒါဝိတ် မိူဝ် ကာလာင် ဒီ အာယောဖ ဘော ဂေ ဒါ ဘုဝ် အီ ကွယ် ဒူပ် အန် တဝ်း၊ “တဲး ဘေ ဟာဝ် ခဲင် မိူင် အီဆာရေလ နီ ဒွန် ပ့လုဝ့်၊ စုး ဒီ မိူင် ဘီရာဆေဘာ၊ တဲး န့ ကော ဝီ ဇမ် ဒီ မိူင် ဒါန်၊ တဲး ဘေ တိး တူတ့် ခဲ့ ကွယ် ဒူအီ။ အုဝ် ဆီ နပ်၊ ဒူအီ ဟဲ့ ကိူန် ခဲ့ မှဝ်။”

3 အာယောဖ ဝီ တဝ်း၊ “မှာန့် တဲး ဇဝ်ဖြာ ဘူင်၊ တဲး ဒူအီ အီဆာရေလ ဝီ ကိူန် လွှိုမ် ခဲ့ ဟဲ့ မိုဝ်း ဒေါ တီ နီ အာဒါ အူ မာယဝ်း ဘုန်။ မဲ ခုန်ဒီခမ် တာင်၊ ဒူအီ ဂေ တီ ဘော မုး ဒဲစေန့် မဲ ဘောကာဂ့လျီတ်။ မှဝ် န့ ပါယ် ပီ ဆီ ဘူင် မဲ ဇိုဝ် တီ၊ တဲး ဒူအီ အီဆာရေလ လုဝ် ခမ် မှာပ်။း”

4 မာလဲ၊ ခုန်ဒီခမ် နဲ့ စ်ု အာယောဖ ထူမ် ဂြုဝ်း အန်။ ပါယ် တီ အာယောဖ မိူဝ် လေး ဒူင် ကွယ် အန် တီ၊ ဝီ ဟာဝ် ခဲင် မိူင် အီဆာရေလ ဘော မိူင်။ ဟဲ့ ဟွတ့်၊ အန် မိူဝ် ဝီ တး ဒီ မိူင် ယေရူဆာလဲမ်။ 5 အာယောဖ မိူဝ် ဟာဝ် ဒိုဝ်း ဇာရာင် ဒူအီ ဂေ တွိုန်၊ ဝီ တး အာပ် ဒီ အာဒါဝိတ်။ ဒူအီ အီဆာရေလ အီ ဟဲ့ ပွိုန် ကာဂုဝ်း တာ ခြိုင် ကာဂုဝ်း၊ ဂေ ကွယ် အူ လာန် ဒီ အူ ဆဲန် ဝီ။ ဘော ဒူအီ အာယူဒါ ဟဲ့ ကွယ် ဖွုန် ဆဲန် ဒီ ဘူ မှိုန့် ဝီ။

6 မာလဲ၊ ဂြုဝ်း ပီ ကာလာင် ခုန်ဒီခမ် တွိုန်၊ အာဝ် လဝ့် နဝ်း အာယောဖ။ ခုဝ်၊ အန် မိူဝ် တူ တိး ဒူအီ ခဲင် ခြိုဝ် အာလေဝီ ဘော ဒူအီ ခဲင် ခြိုဝ် အာဘေန်ယာမ်။ 7 ဇဝ်ဖြာ မိူဝ် တူ အိုင် လွင် စ်ု အာဒါဝိတ် ဟာဝ် တိး ဇာရာင် ဂေ ဒူအီ။ အန် ဇဝ် မိူဝ် ဝီ ဒမ် မှာပ် ဒီ ဂေ ဒူအီ အီဆာရေလ။

8 အာဒါဝိတ် ဝီ ကာလာင် ဒီ ဇဝ်ဖြာ တဝ်း၊ “အုဝ် ဟဲ့ ဘူင် ကာလိုပ်၊ တဲး မှာပ် အုဝ် ကိူန် ကာဆဝ်။ ဒေါ တီ နီ အုဝ် မှာန့်၊ တဲး မဲ ဇဝ် ဂဝ်း ဝဲန် မှာပ် အုဝ် တီ။ အုဝ် ဟဲ့ ဘူင် အီ ဟာယ် အီ မိူက်။”

9 ပန် တီ ဇဝ်ဖြာ ဝီ ကာလာင် ဂြုဝ်း ဒီ အာဂတ် အီ မုး ဒူအီ အီ ဒီမွှတ် ဇဝ်ဖြာ^a အာဒါ အာဒါဝိတ် တဝ်း၊ 10 “တဲး မဲ ဝီ ဟာဝ် ကာလာင် ဒီ အာဒါဝိတ် တဝ်း၊ ‘ဇဝ်ဖြာ ဟဲ့ တဝ်း၊ အန် ကာလာင် အူယ် မျုဝ် ဒီ မဲ၊ တဲး မဲ ရဝ်း အာဒါ အူ မျုဝ် ပီ ဆီ တဲး မဲ အန် ဘူင် ဒီ မဲ။’”

11 အာဂတ် မိူဝ် ဟာဝ် ကာလာင် ဒီ အာဒါဝိတ် တဝ်း၊ “မဲ လုဝ် ရဝ်း ပီ ဒီ ဘူင် ဇဝ်ဖြာ ဒီ မဲ။ 12 အန် ဒီ တဲး ဘေ အေတ့် ပီ ဒီ ဟူမ် ခဲင် မိူင် နီ အာဒါ အူယ် ဆီနမ်။ ဆေ အာဝ် ပါယ် တီ၊ မဲ လုဝ် တဝ် ရန်ဆူ မဲ အာဒါ အူယ် မာဂျီန်။ ဆေ အာဝ် ပါယ် တီ၊ အန် ဒီ တဲး ဘေ မိုဝ်း ဆဝ် ရောဂါ၊ တဲး အာမူ အာမာတ် ဇဝ်ဖြာ ငဝ်း ယမ် ဒူအီ အီဆာရေလ ဒွန် နာ ဒွန် ပ့လုဝ့် အာဒါ အူယ် ဆီငဲ ဒေါ ဆီ မိုဝ်း ဂေ ရောဂါ အီ ဟာယ် ကာဆဝ်။ အူယ် မျုဝ် တီ၊ တဲး မဲ ရဝ်း အာဒါ အူ မျုဝ်၊ တဲး အုဝ် ဝီ ပွိုန် ဒီ ကာလာင် ဒီ ဇဝ်ဖြာ။”

13 အာဒါဝိတ် ဝီ တဝ်း ဒီ အာဂတ်၊ “အုဝ် ဟဲ့ ဇမ် ဒုက် တာင် ကာဆဝ်။ မှာန့်၊ တဲး ဇဝ်ဖြာ ဘူင် ဒီ အုဝ် ခဲ့ ပီ အိုင် အန်။ ခုဝ်၊ အန် နပ် ဒီ ကာဝေ ကာဆဝ်။ ကွဲ့ တဲး ဒူအီ ဘူင် ဒီ အုဝ် ခဲ့ ပီ အိုင် ဂေ။”

14 ပန် တီ ဇဝ်ဖြာ ဘော တဲး ဒူအီ အီဆာရေလ မိုဝ်း ဆဝ် ရောဂါ။ ဒူအီ ဂေ ဘော ယမ် အာဒါ ဘူ မှိုန့် ဝီ။ 15 အန် ဇဝ် ဝီ စ်ု အာမူ အာမာတ် အန် ပျာတ့် ဘော မိူင် ယေရူဆာလဲမ်။ အာမူ အာမာတ် ဟဲ့ ငှာ ဒီ ပျာတ့် တီ၊ ဇဝ်ဖြာ ဘော ဝီ ယိုဝ်၊ ဘော ဝီ ဘဲန် နဝ်း က့လိုဝ်။ အန် ဝီ နမ်လှုဝ်း ဒုက် တာင် ပီ ဒီ လုဝ် ခမ် ဂေ။ ခုဝ်၊ အန် ဝီ ကာလာင် ဒီ အာမူ အာမာတ် အန် တီ တဝ်း၊ “စူ ခဲ့ တီ။ ကွဲ့ ဟူ ဘူင် ပွါ။” ဒေါ အန် တီ အာမူ အာမာတ် ဇဝ်ဖြာ ကွယ် ခူပ် ကင်နဝ်း အာရောနာ အီ မုး ဒူအီ ယေဘူဆိတ်။

16 အာဒါဝိတ် ဝီ ဆာကိုဝ်း ယွတ်၊ ဝီ ယိုဝ် အာမူ အာမာတ် ဇဝ်ဖြာ ဟဲ့ စွင့် ဒီ ကာတဲ ဘ့လေန့် ဂါယ် ကာဒါယ်၊ ဂူင့် မာပွါ့ လာင် ဝီ ငှာ ဒီ မိူင် ယေရူဆာလဲမ်။ အာဒါဝိတ် ဘော ဂေ အီ မုး ဒူအီ အီ အိုပ် အီ ယဲတ့် ဂေ ဒူအီ အီဆာရေလ၊ ဂေ ဝီ စှိုပ် ဒီ တာ ခြိုင် စာန်၊ ဝီ မုတ် ဂိုပ် ဒီ ကာဒါယ်။

17 အာဒါဝိတ် ဝီ ဆာခိုဝ် ဒီ ဇဝ်ဖြာ တဝ်း၊ “အိုယ် မဲ ဇဝ်ဖြာ၊ န့ မုး အုဝ် အီ ဟဲ့ ဘူင် လုတ့်။ န့ မုး အုဝ် အီ ဟဲ့ စ်ု ဂေ ဟာဝ် ဂဲပ် ဇာရာင် ဒါ ဆိုက် အုဝ်။ ဒူအီ ဂေ တီ၊ ဂေ ပီ မာဘူ၊ တူ ဘူင် မှာပ် မာဆေ။ အိုယ် မဲ ဇဝ်ဖြာ အီ မုး ဇဝ်ဖြာ ပီ ကြိုပ် အုဝ်။ တဲး မဲ ဒမ် မှာပ် မီ ဒီ အုဝ် ဘော ဒီ ဂေ ဒူအီ အာမျုဝ် အုဝ်။ အုဝ် မှာန့်၊ ကွဲ့ တဲး ဂေ ဒူအီ ပီ အိုပ် မဲ ဇဝ် လုဝ် ခမ် ဒုက် တာင် တီ။”

18 ပါယ် တီ အာမူ အာမာတ် ဇဝ်ဖြာ တွိုန် ဘော ဝီ ကာလာင် ဒီ အာဂတ်၊ တဲး အန် ဝီ ဟာဝ် ဒီ အာဒါဝိတ်၊ တဲး အာဒါဝိတ် ဘူင် ကာစှူင့် လှူ အာဒါ ဇဝ်ဖြာ ဒီ အူင့် ကင်နဝ်း အာရောနာ တွိုန် အီ မုး ဒူအီ ယေဘူဆိတ်။ 19 အာဒါဝိတ် မိူဝ် ဟာဝ် ဘူင် ခဲ့ ပီ ကာလာင် ဇဝ်ဖြာ ဒီ အာဂတ် တီ။

20 ဘော အာရောနာ ဘော ဂွန် အီမာယ် အန် ဖွုန် ဝီ၊ ဂေ ကွယ် ဒီ အူင့် ကင်နဝ်း တီ မး ငှုဝ်။ ဒေါ ယိုဝ် ဂေ ဂွန် အီမာယ် အာရောနာ ဒီ အာမူ အာမာတ် ဇဝ်ဖြာ တွိုန်၊ ဂေ ဘော ကာဘ့လဲပ် တဝ် ဟာဝ် ချြီင် ဂေ။ 21 ပန် တီ အာဒါဝိတ် ဘော တး။ အာရောနာ ဘော ယိုဝ် အာဒါဝိတ်၊ အန် ဘော လေး ဟာဝ် မုတ် ဂိုပ် ဒီ ကာဒါယ် ဒီ အာတ့် အာဒါဝိတ်။

22 အာဒါဝိတ် ဝီ တဝ်း ဒီ အန်၊ “ယွင့် ဒွါ အူင့် ကင်နဝ်း မဲ ဒီ အုဝ်၊ တဲး အုဝ် ပွိုန် ဒီ ဆမ် ကာစှူင့် လှူ ဒီ ဇဝ်ဖြာ၊ တဲး အန် ဒိုဝ်း ဝဲန် ဆဝ် ရောဂါ ဒီ ဒူအီ၊ တဲး ဂေ ဝီ ကဲန်။ အုဝ် မိူဝ် ဒီ ဒွါ ဒီ မဲ ခဲ့ ကာဒါန် ငဝ်း အန်။”

23 အာရောနာ ဝီ တဝ်း ဒီ အာဒါဝိတ်၊ “တဲး မဲ ဒါ ကာညာ အုဝ် ဒိုဝ်း လှူ ခဲ့ ပီ အိုင် မဲ။ ဒီ နီ အုဝ် ဟဲ့ မိုဝ်း ဘော မက် အီ ပွိုန် လှူ။ ဘော ခြိုင် မး ငှုဝ် ဂေ နီ၊ ပွိုန် ဘဲန် ဟေ အီ ဒုဝ့် ဒီ ငဝ်။ ဘော ခဝ်ချုင် နီ၊ တဲး န့ ဘဲန် ပီ ဒီ လှူ ဒီဂါဝ် ဘဲန် မျုဝ် ဘဲန် မျုဝ်။ အုဝ် ဒီ ဒွါ ဒီ မဲ။”

24 ခုန်ဒီခမ် မိူဝ် ဝီ တဝ်း၊ “အာဝ် မုး ပါယ် တီ။ အုဝ် ဒီ ဒွါ ငဝ်း အန် ဒီ မဲ။ အုဝ် တူ ဒိုဝ်း ဒီလူယ် ဒီလာယ် ကြုဝ် မဲ။ ဆေ အုဝ် တူ တူတ့် ရွိုန်၊ အာဝ် ပွိုန် လှူ ဒီ ဇဝ်ဖြာ အီ မုး ဇဝ်ဖြာ ပီ ကြိုပ် အုဝ်။”

25 အာဒါဝိတ် မိူဝ် ဝီ ဆ ခြိဝ် အာဒါ ဒဝ် မာယဝ်း ဆေခေန် ဒွါ ဒီ အာရောနာ၊ တဲး န့ ဘဲန် ငဝ်း အူင့် ကင်နဝ်း အန် တီ။ 26 အာဒါဝိတ် မိူဝ် ဘူင် ကာစှူင့် လှူ ဒီ ဇဝ်ဖြာ ဘော လှူ ပီ ဒီ လှူ အီ ဒုဝ့် ဒီ ငဝ် ဘော ပီ လှူ အီ ကွယ် ကာဇု ဟူမ် ရိုမ်။ အန် မိူဝ် ဆာခိုဝ် ဒီ ဇဝ်ဖြာ။ ဇဝ်ဖြာ မိူဝ် ထူမ် ပီ ဆာခိုဝ် အန် ဘော ဘူင် တဲး ငဝ် လေး ခဲင် ဂါင်ဟြာဝ်၊ စုဝ်း ဒဲင် ကာစှူင့် လှူ အန် တွိုန်။

27 ဒေါ အန် တီ ဇဝ်ဖြာ မိူဝ် ဝီ ကာလာင် ဒီ အာမူ အာမာတ် ဇဝ်ဖြာ၊ တဲး အန် ဝီ စျှီပ် အုန် မာပွါ့ လာင် ခဲင် ဘြာမ် အန်။ အာမူ အာမာတ် ဇဝ်ဖြာ တီ မိူဝ် ဘူင် ပီ ကာလာင် ဇဝ်ဖြာ ဒီ အန်။ 28 ဟဲ့ ဟွတ့် ပါယ် တီ အာဒါဝိတ် မိူဝ် ဟဲ့ နပ် ဇဝ်ဖြာ ဟဲ့ ထူမ် ဂြုဝ်း ပီ ဆာခိုဝ် အန်၊ အန် မိူဝ် ဝီ လှူ ပီ ဒီ လှူ ဒဲင် ကာစှူင့် လှူ အီ ကွယ် ဒီ အူင့် ကင်နဝ်း အာရောနာ တီ။ 29 အန် လှူ ဒီ ဇဝ်ဖြာ ဒူင် တီ ခုဝ်၊ အာခြာဝ် ဒေါ အန် တီ ထိုပ် ဘိက် ဘွတ် ပီ ဘူင် အာမုဝ်ဆဲ ခဲင် ပြဲ ကာဟဝ်း တွိုန်၊ ဘော ကာစှူင့် ဒူင် လှူ ဂေ ပီ ဒီ လှူ၊ န့ ဆီ ကွယ် ဒီ ဒူင် စာ ခဲင် မိူင် ကီပွင်။ 30 မာလဲ၊ အာဒါဝိတ် ယီ တူ ယ ဟာဝ် ဒီမွှတ် ဇဝ်ဖြာ ဒီ တီ ကူပ် ယုဝ် အန် မာပွါ့ လာင် အာမူ အာမာတ် ဇဝ်ဖြာ။