1 ဒေါ ဟဲ့ ဝီ ဇမ် အာခြာဝ် ဒီယာင်၊ အီ မုး အာခြာဝ် ဒီ လာယ် ကာဂုဝ်း ဂေ ခုန်ဒီခမ်၊ အာယောဖ ဘော ယဲတ့် ဒါ ဆိုက် အန် ဟာဝ် ရိုပ် ကာဒါယ် မိူင် ဒူအီ အမ်မူန်။ အန် ဘော ဟာဝ် ဝဲင် ရူပ် မိူင် ရာဘာ။ အီ မုး ခုန်ဒီခမ် အာဒါဝိတ်၊ အန် ယီ ကွယ် ခဲင် မိူင် ယေရူဆာလဲမ်။ ဂေ မိူဝ် ကာဂုဝ်း ပျာတ့် ဝဲန် မိူင် ပဲ့ ဟဲ့ ရူပ် ဂေ တီ။ 2 အာဒါဝိတ် မိူဝ် ဘုတ့် မင်ဂိုမ် ဒီ ဂိန့် ခုန်ဒီခမ်။ န့ မုး မင်ဂိုမ် ခြိဝ် အီ စန် အူ ထာလေန်။ န့ မိုဝ်း ဘော ဆဲန့် ဘွတ်။ ဂေ မိူဝ် ဝီ ဒိုဝ်း စှိုပ် ဒီ ဂိန့် အာဒါဝိတ်။ ကြုဝ်ကြာမ် ဂေ ခဲင် မိူင် တီ ပဲ့ ဟဲ့ ဖာတ် ဟဲ့ ဒိုဝ်း ဟာဝ် ဂေ မိူဝ် ဟဲ့ ကိူန် ကာဆဝ်။ 3 ဒူအီ ခဲင် မိူင် တီ မိူဝ် ဟဲ့ ကိူန်။ အာဒါဝိတ် ဟဲ့ ဒိုဝ်း ဟာဝ် ဂေ၊ စ်ု တဲး ဂေ ဘူင် ဂါန် တာ ခြိုင် ဟိန်၊ လေက်လိုဝ်၊ ဟိန် ဂုဝ့် ဘော မိုယ်။ အန် စ်ု ဂေ ဒူအီ အမ်မူန် အီ ကွယ် ဒွန် မိူင် ဘူင် ဂါန် ပါယ် တီ။ ဟဲ့ ဟွတ့်၊ အာဒါဝိတ် ဂေ ဒူအီ အီ ဒူပ် အန် ဘောကာဂ့လျီတ် ဘော ဝီ ဝေန့် ဒီ မိူင် ယေရူဆာလဲမ်။

4 ဝါယ် တီ၊ ဂေ ဝီ ကာဂုဝ်း ဒီ ဒူအီ ဖီလီထီ ဒီ မိူင် ကေစာ ပေါ အူ ဇေန့်။ ဒေါ အန် တီ န့ မုး အာဆီဘေခေ အီ မုး ဒူအီ အာမျုဝ် ဟူဆာ၊ အန် ဘော ငဝ်း ယမ် ဒူအီ အီ ဟဲ့ တာင် ဘော စာ ကာဆဝ်၊ အီ စိူဝ် အာဆီဖာယာ။ ဂေ ဒူအီ ဖီလီထီ ဟဲ့ စှိုမ် ဒီ ဒူအီ အီဆာရေလ။

5 ဂေ ပီ ဝီ လာယ် ကာဂုဝ်း ဒီ ဒူအီ ဖီလီထီ ပေါ အူ ဇေန့်။ ဒေါ အန် တီ အာအေဟာနန် အီ မုး ဂွန် အာယာအီရာ ဘော ငဝ်း အာလာခါမီ အီ မုး ဝါ အာကောလာတ် အီ မုး အာမျုဝ် ကိတ်တီ။ အာကောလာတ် တီ ဟဲ့ ဒွိုမ် ဂူင့် ဘ့လာ လျီး အီ မိုဝ်း ဂ့လွင့် တာင်၊ ကော ဒါန် ကာဘွင့် ဒဝ့် ဂ့လာင်။

6 ဝါယ် တီ၊ ဂေ ပီ ဝီ လာယ် ကာဂုဝ်း ဒီ မိူင် အာဂထ ပေါ အူ ဇေန့်။ န့ မိုဝ်း ဒူအီ အူ ဝီ အီ တာင် စာ။ ဒဲ အန် ဘော ဒွန် ဘ့လာက် မိုဝ်း ဒဝ် ကာနူ။ ဘော ပ့လဝ် အန် ဒွန် ဘ့လာက် မိုဝ်း ဒဝ် ကာနူ။ ဒွန် ဘ့လာက် ကွယ် အာ ဂိုဝ် ဒီ ဖွုန် ကာနူ။ အန် ဘော မုး ဒူအီ ခြိုဝ် အာရေဖိမ် အီ မုး ဒူအီ ဒုဝ် ဒီ တာင် ဒီလူယ်။ 7 အန် ဘော ကာခဲန့် ဒီ ဒူအီ အီဆာရေလ။ န့ ယီ မုး အာယုဝ်နာထာန် အီ မုး ဂွန် အီကတ် အာဒါဝိတ် အီ စိူဝ် အာဆီမာ တွိုန်၊ အန် ဘော ငဝ်း ယမ် ဒူအီ တီ။

8 ဂေ အူယ် ဝီ ပဲ့ ဟဲ့ ငဝ်း ယမ် အာဒါဝိတ် ဂေ ဒူအီ အန်၊ ဂေ ဘော မုး ခြိုဝ် ဒူအီ အီ တာင် စာ အီ စိူဝ် အာရေဖိမ် ဘော ကွယ် ဒီ မိူင် အာဂထ တွိုန်။