1 ဝါယ် အန် တီ အာဝ် ဘော လှေန့် ခုန်ဒီခမ် အာနာဟာဆာ အီ အိုပ် ဒူအီ အမ်မူန် ဘော ယမ်။ ဂွန် အီမာယ် အန် အီ စိူဝ် အာဟာနုန် ဘော ဝီ ပ့လု ဂုန့် အန်။ 2 ခုန်ဒီခမ် အာဒါဝိတ် တဝ်း၊ “အုဝ် ဒီ ဘျ လွင် လာယ် ဘဲန် ဂိုက် ဒီ အာဟာနုန်၊ တဲး န့ ပီ ဂုန့် အန် အီ စိူဝ် အာနာဟာဆာ ဟဲ့ ဒွိုမ် လာယ် ဘဲန် ဂိုက် ဒီ အုဝ်။” အာဒါဝိတ် မိူဝ် စ်ု ဂေ ဒါလာမ် အန်၊ တဲး ဂေ ဟာဝ် လှဝ် နဝ်း အန်၊ ဘူင် တဲး နဝ်း အန် ဝီ နှိမ် ဝီ ယေန် ဝါယ် ဟဲ့ ယမ် ဂုန့် အန် တွိုန်။

3 ဂေ အာမူ အာမာတ် ခဲင် မိူင် အမ်မူန် တွိုန် ဂေ ဝီ ကာလာင် ဒီ ခုန်ဒီခမ် အာဟာနုန် တဝ်း၊ “မဲ ထာင် ဟဲ့ မှာန် လွင် အာဒါဝိတ် တဲး ဒါလာမ် အန် တး လှဝ် နဝ်း မဲ။း မဲ ထာင် န့ မုး ကူပ် ရုဝ်ဆေ အန် ဂုန့် မဲ တွိုန်။း အာဝ် မုး ပါယ် တီ။ အာဒါဝိတ် စ်ု ဂေ တး ဒီ မဲ၊ တဲး ဂေ ပွိုန် ဒီ ချွင် ဒီ ယွတ် ခဲင် မိူင် အေ၊ တဲး ဂေ ပွိုန် ဒီ ပျာတ့် ဝဲန် မိူင် အေ နီ။” 4 ဟဲ့ ဟွတ့်၊ အာဟာနုန် ဘော မှေတ့် ဒါလာမ် အာဒါဝိတ်။ အန် ဘော ဂါ့ ဝဲန် ဒီမုဝ်း ဒီ ကုင်ကာပ် ဂေ ဘော ကာဆွာ့ ဘော ခြိုင် ပီ တာ ဂေ အူ ကာတဲ၊ တဲး န့ ဇမ် ဒီ ဆီပူင့် ဂေ။ ဟဲ့ ဟွတ့် အန် ဝီ ဘ့လေး ဟာဝ် ဂေ။

5 ဒေါ ဝီ တး ကာလာင် အီ ဟဝ် လွင် အန် တီ ဒီ အာဒါဝိတ်၊ အန် ဘော စ်ု တဲး ဂေ ဟာဝ် ဘ်ု ဒီ ရွုး ဂေ ဒူပ် န့တေန့်။ ကူပ် ဟဲ့ မွှိုမ် ဆာယ် ကာဆဝ် ဂေ၊ အန် ကာလာင် ဒီ ဂေ တဝ်း၊ “တဲး ဘေ ကွယ် ဂိူတ် ဒီ မိူင် ယေရီခုဝ်၊ ဘ်ု တဲး ဒီမုဝ်း ဒီ ကုင်ကာပ် ဘေ ကော ဝီ ဒီ တူင့်။ ဝါယ် နီ ဘေ ဘော ဝီ တး။”

6 ခုန်ဒီခမ် အာဟာနုန် ဘော ဂေ ဒူအီ အမ်မူန် ဘော ဝီ ယိုဝ် လွင် အာဒါဝိတ် ဟဲ့ ဝီ ကာအိး ဂေ၊ ဂေ ဝီ ဒိုဝ်း ရွိုန် အူ ဟြဲန့် ထာလေန်၊^a တဲး ဂေ ဝီ ဇာင် လက်လဝ် ဘော ဒါ ဆိုက် အီ ပဝ့် လက်လဝ် အီ ကွယ် ခဲင် ကာဒါယ် မိူင် အာရာမ်နာရာဟမ်။ မိူင် တီ ဘော ကွယ် နာ ကွာ မိူင် အာရာမ် အီ ကွယ် ခဲင် ကာဒါယ် မိူင် မာခါ ဘော ခဲင် ကာဒါယ် မိူင် စောဖ တွိုန်။ 7 လက်လဝ် ဘော ဒါ ဆိုက် အီ ပဝ့် လက်လဝ် ပီ ဇာင် ဂေ တီ မိုဝ်း အူယ် မှိုန့် ဒီ အာ ဟြဲန့် လှာင်။ ဒါ ဆိုက် ခုန်ဒီခမ် အီ အိုပ် မိူင် မာခါ ဘော ဂေ ဒူအီ အန် မိူဝ် ဟဲ့ တး ချ ခူပ် မိူင် မေဒေဖာ။ ခဲ့ ကွယ် ဒူအီ အမ်မူန် မိူဝ်၊ ဟဲ့ ရဲန် ဆိုက်၊ ဟဲ့ လေး တး ဒွန် မာန် ဒွန် မိူင်။

8 အာဒါဝိတ် ဘော ယိုဝ် လွင် အန် တီ၊ အန် ဝီ စ်ု အာယောဖ ဘော ဒါ ဆိုက် အန် ဘောကာဂ့လျီတ်၊ တဲး ဂေ ဟာဝ် ဒူင် ချ ဂေ။ 9 ဒူအီ အမ်မူန် ဂေ မိူဝ် လေး တ မိူင် ဂေ၊ ဘ်ု ဒီ ကာဂုဝ်း ဒီ ဘာင် မာလုဝ်း မိူင် ဂေ။ ဂေ ခုန်ဒီခမ် အီ ဟဲ့ တး စွယ် ဂေ ကာဂုဝ်း၊ ဂေ ယီ ကွယ် ခဲင် ဂ့လင် ရာင် အာဆေ ရာင် အန်။

10 အာယောဖ ဘော ယိုဝ် လွင် ဒါ ဆိုက် ဂေ တီ ဟဲ့ တး ကွယ် အာ ဘ့လာက်၊ ဘော နာ ပန် နာ အာတ့်။ အန် ဘော ရဝ်း ဒူအီ အီ ပ့လူမ် အီ ခြန် ခဲင် ဒူအီ အီဆာရေလ၊ တဲး ဂေ ဘဲန် အီ ဘ်ု အီ ရဲ ဒူအီ အာရာမ် ဂေ တီ။ 11 ဂေ အီ ဆီ ကွယ် အန် ဘော တဲး အာဖီဆေ အီ မုး ဝါ အန် ယဲတ့် ဂေ၊ တဲး ဂေ ကွယ် ဘ်ု ဒူအီ အမ်မူန် ဂေ တွိုန်။ 12 အာယောဖ ဝီ တဝ်း၊ “ဆေ ဒူအီ အာရာမ် ဘော ပဲ အုဝ်၊ တဲး မဲ တး စွယ် အုဝ်။ ဆေ ဒူအီ အမ်မူန် ဘော ပဲ မဲ၊ အုဝ် ဒီ ဟာဝ် စွယ် မဲ။ 13 တဲး အေ မိုဝ်း နဝ်း ပ့လူမ်၊ တဲး အေ ယ ကာဂုဝ်း အာဒါ ဒူအီ အာမျုဝ် အေ ဘော အာဒါ မာန် မိူင် ပီ အိုပ် ဇဝ်ဖြာ ပီ ကြိုပ် အေ။ ဇဝ်ဖြာ ဒီ ဘူင် တဲး န့ ဘဲန် ပီ အိုင် အန်။”

14 ပန် တီ အာယောဖ ဘော ဂေ ဒူအီ အီ ဒူပ် အန်၊ ဂေ ဘော ဟာဝ် ကာတတ် ဒူအီ အာရာမ်၊ တဲး ဂေ ပွိုန် ဒီ ကာဂုဝ်း ဒီ ဂေ။ ဒူအီ အာရာမ် မိူဝ် တဝ် ဂေ။ 15 ဂေ ဒူအီ အမ်မူန် ဘော ယိုဝ် လွင် ဂေ ဒူအီ အာရာမ် ဟဲ့ တဝ်၊ ဂေ မိူဝ် ဝီ ကာဖြူမ် ဒီ တဝ် ဒီ အာဖီဆေ အီ မုး ဝါ အာယောဖ၊ ဝီ ဝေန့် လိုပ် ခဲင် မိူင် ဂေ။ အာယောဖ ဘော လေး ဒူင် ကွယ် ဂေ၊ ဝီ ဝေန့် ခဲင် မိူင် ယေရူဆာလဲမ်။

16 ဒူအီ အာရာမ် ဘော နပ်၊ ဂေ ဟဲ့ စှိုမ် ဒီ ဒူအီ အီဆာရေလ။ ဂေ ဘော ဝီ တး ကာဇု ပေါ အူ ဇေန့်။ ခုန်ဒီခမ် အာဟာဒေစာ အီ အိုပ် မိူင် စောဖ ဘော စ်ု ဒါလာမ် အန် ဟာဝ် ဒဲ့ ဒါ ဆိုက် အာရာမ် အီ ကွယ် ဘ့လာက် နာ တ အိုမ် ဘ့လဲင် အူဖာရာတ်။ ခုန်ဒီခမ် အာဟာဒေစာ ဝီ တဲး အာဆောဘာက် အိုပ် ဒါ ဆိုက် ဂေ တီ၊ တဲး အန် ယဲတ့် ဂေ။

17 အာဒါဝိတ် ဘော ယိုဝ် လွင် အန် တီ၊ အန် ဘော တဲး ဒူအီ အီဆာရေလ တး ကာဇု၊ တဲး ဂေ ဝီ ဟာဝ် ကာလုဝ်း ဘ့လဲင် အိုမ် ယောဒါန် တွိုန်၊ ဝီ ဟာဝ် ဒူင် ကွယ် ဒူအီ အာရာမ် ဂေ တီ။ ဂေ မိူဝ် လာယ် ကာဂုဝ်း ဒူင် တီ။ 18 ဂေ ဒူအီ အီဆာရေလ ဘော ခုင်ခြး ဒူအီ အာရာမ်။ အာဒါဝိတ် ဂေ ဒူအီ အီ ဒူပ် အန် ဘော ငဝ်း ယမ် ဒါ ဆိုက် အာရာမ် အီ ပဝ့် လက်လဝ် အာဒါ ဘူ ဟြဲန့် ဝီ။ အန် ငဝ်း ဘော ဒါ ဆိုက် အီ ဟာဝ် ဒီ ပ့လဝ် ဖွုန် မှိုန့် ဝီ။ အာဆောဘာက် အီ မုး ဒါ တာင် အီ အိုပ် ဒါ ဆိုက် ဂေ တီ မိူဝ်၊ ဂေ ဟဲ့ ဟွတ့် ငဝ်း ယမ်။

19 ဂေ ခုန်ဒီခမ် ပီ အိုပ် အာဟာဒေစာ တွိုန်၊ ဂေ ဘော ယိုဝ် လွင် ဟဲ့ စှိုမ် ဂေ ဒီ ဒူအီ အီဆာရေလ၊ ဂေ ဘော ဝီ ကာဖြူမ် ဒီ ဘဲန် အူ ဂိုက် ဒီ အာဒါဝိတ်။ ဂေ ဘော ခမ် ဒီ ဘဲန် မှာယ် အာဒါဝိတ်။ ဝါယ် တီ ဒူအီ အာရာမ် အာဝ် ဟူ ယ စွယ် ဒူအီ အမ်မူန် ကာဂုဝ်း ဒီ အီ။