1 ဝါယ် တီ အာဒါဝိတ် ဘော ကာဂုဝ်း ဒီ ဒူအီ ဖီလီထီ။ အန် ဘော ပဲ ဂေ။ အန် ဘော ပွိုန် မိူင် ဂါထ ဘော ရဝ် အီ ကွယ် ရူပ် မိူင် တီ အီ မုး မိူင် ပီ အိုပ် ဂေ ဒူအီ ဖီလီထီ။

2 အာဒါဝိတ် ဝီ ကာဂုဝ်း ပဲ ဘော ဒူအီ အာမျုဝ် မုဝ်အာပ်။ ဒူအီ ဂေ တီ ကာဒုး ဒီ ဘဲန် ဒူအီ ပီ အိုပ် အန် ဘော လုဝ် ဟပ် စိုင် ဒီ အန်။

3 ဒဲင် တီ အာဒါဝိတ် ဟဲ့ ကာဂုဝ်း ဘော ဒီ ခုန်ဒီခမ် အာဟာဒေစာ အီ အိုပ် မိူင် စောဖ ကော ဇမ် မိူင် ဟာမာတ်။ အာဟာဒေစာ တး ဒူင် တီ ဒေါ ဟာဝ် အန် ဘော ခြာမ် ဒီ ကာဂုဝ်း တဲး အန် ပွိုန် ကာဒါယ် အီ ဇမ် ခူပ် အိုမ် ဘ့လဲင် အူဖာရာတ် တွိုန်။ 4 အာဒါဝိတ် ဘော ဒိုဝ်း လက်လဝ် အာဟာဒေစာ အူ ဟြဲန့် လှာင် ဘော ဒါ ဆိုက် အီ ပဝ့် လက်လဝ် တီ ဘူ ဟြဲန့် ဝီ၊ ဒါ ဆိုက် အီ ဟာဝ် ဒီ ပ့လဝ် အာ မှိုန့် ဝီ။ အန် ဘော ဒိုဝ်း အုန် မင်ပြွင့် အာဒါ အူ မာယဝ်း ဒုဝ်။ အီ ကွယ် ဒဲင် တီ၊ အန် ဘော ဒဲပ် တူတ့် ဆီန ပ့လဝ် ဂေ။

5 ဂေ ဒူအီ အာမျုဝ် အာရာမ် အီ ကွယ် ခဲင် မိူင် ဒါမာခူ တွိုန် ဂေ ဘော တး တဝ်း ဒီ စွယ် ဒါ ဆိုက် အာဟာဒေစာ အီ မုး ခုန်ဒီခမ် အီ အိုပ် မိူင် စောဖ တွိုန်။ အာဒါဝိတ် ဘော ငဝ်း ယမ် ဒူအီ အာရာမ် အာ မှိုန့် ဒီ အာ ဟြဲန့် ဝီ။ 6 အန် ဘော အုန် ဒါ ဆိုက် အန် ခဲင် မိူင် ဒါမာခူ အီ ကွယ် ခဲင် ကာဒါယ် အာမျုဝ် ဒူအီ အာရာမ် တွိုန်။ ဒူအီ အာရာမ် ဂေ တီ ဘော ကာဒုး ဒီ ဘဲန် မှာယ် အာဒါဝိတ်၊ ဟပ် ရွိုန် စိုင် ဒီ အန်။ အာဒါဝိတ် ဘော ဟာဝ် နာ မှဝ်၊ ဇဝ်ဖြာ မိူဝ် စွယ် အန်၊ တဲး အန် ပဲ ရန်ဆူ အန်။

7 အာဒါဝိတ် ဘော ဒိုဝ်း မင် ဂွင့် ခြိဝ် ပီ ဂူင့် ဒါ တာင် အာဟာဒေစာ အီ အိုပ် ဒါ ဆိုက် အန်၊ ဝီ ဟာဝ် ဒီ မိူင် ယေရူဆာလဲမ်။ 8 အန် ဘော ဒိုဝ်း ဘွင့် ဒေန့် ကိူန် ကာဆဝ် ခဲင် မိူင် ထေဘာ ဂါယ် မိူင် ခူန အီ မုး မိူင် ပီ အိုပ် အာဟာဒေစာ တွိုန်။ ဘွင့် ဒေန့် တီ အာဆာလုဝ်မုဝ် ဟဲ့ ဝီ ဒိုဝ်း ဘူင် အိုမ် ဒိုင် ဘွင့် ဂေ ရွင့် ခဲင် ဟုဝ် ဇဝ်ဖြာ။

9 ခုန်ဒီခမ် အာဒေါအိတ် အီ အိုပ် မိူင် ဟာမာတ် အန် ဘော ယိုဝ် လွင် အာဒါဝိတ် ဟဲ့ ကာဂုဝ်း ဟဲ့ ပဲ ဒါ ဆိုက် အာဟာဒေစာ တွိုန် အီ အိုပ် မိူင် စောဖ၊ 10 အန် ဘော စ်ု ဂွန် အီမာယ် အန် အီ စိူဝ် အာဟာဒူမ်၊ တဲး အန် ဟာဝ် ဒူင် ကွယ် ခုန်ဒီခမ် အာဒါဝိတ်၊ တဲး အန် ကာလာင် ဂြုဝ်း ဒါခိုယ် ဒီ အန်၊ ဘော အိူပ် အန် ကူပ် ဟဲ့ ကာဂုဝ်း ပဲ အန် အာဟာဒေစာ တွိုန်။ အန် ဘူင် ပါယ် တီ ခုဝ်၊ ဘော အန် ဟဲ့ ဒွိုမ် ကာဂုဝ်း ဒီ အာဟာဒေစာ။ အာဟာဒူမ် ဘော ဒိုဝ်း ဒီ ဂူင့် ဆီလယ့် ဘဲန် မျုဝ် ဘဲန် မျုဝ် အီ မုး ရွိုန် ဂေ ခြိဝ် ဘော ဘွင့် ဒေန့်၊ ဝီ ဒွါ ဒီ အာဒါဝိတ်။

11 ခုန်ဒီခမ် အာဒါဝိတ် ဘော ဒိုဝ်း ကြုဝ် ဂေ တီ၊ ဝီ လှူ ဒီ ဇဝ်ဖြာ။ ဒေါ ဒိုဝ်း အန် ကြုဝ် အီ မုး ရွိုန် ဘော ခြိဝ် ဒီ ဒူအီ မိူင် အေဒူမ်၊ မိူင် မုဝ်အာပ်၊ မိူင် အမ်မူန်၊ မိူင် ဖီလီထီ၊ ဘော မိူင် အာမာလေက် ပဲ့ ဟဲ့ ကာဂုဝ်း ပဲ အန်၊ အန် မိူဝ် ဟဲ့ လှူ ပါယ် တီ။

12 အာဖီဆေ အီ မုး ဂွန် နာင် စေရူယာ တွိုန် ဟဲ့ ကာဂုဝ်း ပဲ ဒူအီ အာမျုဝ် အေဒူမ် ဒီ ဒူင် စိူဝ် ဒီလယ့် ဆယ့်။ အန် မိူဝ် ဟဲ့ ငဝ်း ယမ် ဒူအီ ဂေ တီ အာဒါ အူ မှိုန့် ဒီ ဒါ ဟြဲန့် ဝီ။ 13 အန် မိူဝ် အုန် ဒါ ဆိုက် အန် ခဲင် ကာဒါယ် မိူင် အေဒူမ် ဒွန် နာ ဒွန် ပ့လုဝ့်။ ခဲ့ ကွယ် ဒူအီ မိူင် အေဒူမ် ဂေ ဘော ကာဒုး ဒီ ဘဲန် မှာယ် အာဒါဝိတ်။ ဇဝ်ဖြာ မိူဝ် တဲး အာဒါဝိတ် အွင် ဒွန် ပ့လုဝ့် ဒူင် ဟာဝ် ကာဂုဝ်း အန်။

14 ပန် တီ အာဒါဝိတ် ဘော အိုပ် မိူင် အီဆာရေလ ဘော မိူင်။ အန် မိူဝ် ဘူင် ဆိူဝ် ဆိူဝ် မှာန် မှာန် ဒွန် မျုဝ် ဒီ ဂေ ဒူအီ ပီ အိုပ် အန်။ 15 အာယောဖ အီ မုး ဂွန် နာင် စေရူယာ တွိုန်၊ အန် ဘော ဘဲန် ဒါ ဘုဝ် အီ အိုပ် ဒါ ဆိုက် ဘောကာဂ့လျီတ်။ အာယောဆာဖာတ် အီ မုး ဂွန် အာဟီလုတ် ဘော ဘဲန် ဒါ စာရေ။ 16 အာဇာဒူက် အီ မုး ဂွန် အာဟီတူပ် ဘော အာဟီမာလေက် အီ မုး ဂွန် အာဘာထာ ဂါယ် ဘော ဘဲန် ဒါ အီ လှူ ဒီ ဇဝ်ဖြာ။ အာဆာဝါဆာ ဘော ဘဲန် ဒါ အီ စွယ် ဒါ စာရေ ဒဲမ် ပဲ့။ 17 အာဘီနာယာ အီ မုး ဂွန် အာယေဟောယာဒါ ဘဲန် ဒါ အီ အိုပ် ဂေ ဒါ ဆိုက် အီ ဘ်ု အာဒါဝိတ်။ ဂေ ဂွန် အီမာယ် ခုန်ဒီခမ် အာဒါဝိတ် ဒွန် အီ မိူဝ် ဟဲ့ ဘဲန် ဒါ ကာညာ အီ ကွယ် ခူပ် ခုန်ဒီခမ် ဘော စွယ် အန် အိုပ် မိူင်။