1 ဝါယ် အန် တီ ခုန်ဒီခမ် အာဒါဝိတ် ဟဲ့ ပွိုန် ဒီ ကွယ် ဒါခိုယ် ခဲင် ဟုဝ် အန်။ အန် ဝီ ကာလာင် ဒီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာနာထာန် ဘော တဝ်း၊ “ဒေါ တီ နီ အုဝ် ဟဲ့ ပွိုန် ဒီ ကွယ် ခဲင် ဟုဝ် အီ မုး ဟေ အာရိတ်။ အီ မုး ဇီဒိူက် ဇဝ်ဖြာ ယီ ကွယ် ခဲင် ထိုပ် ဘိက်။”

2 အာနာထာန် ဝီ တဝ်း ဒီ အန်၊ “တဲး မဲ ဘူင် ခဲ့ ပီ အိုင် နဝ်း မဲ။ ခုဝ်၊ ဇဝ်ဖြာ ဟဲ့ ကွယ် ရိုမ် ဒူပ် မဲ။”

3 မာလဲ၊ ခဲင် မှိုဝ် တီ ဇဝ်ဖြာ ဝီ ကာလာင် ဂြုဝ်း ဒီ အာနာထာန် တဝ်း၊

4 “တဲး မဲ ဟာဝ် ကာလာင် ဒီ ဒဲစေန့် အုဝ် အီ မုး အာဒါဝိတ် တဝ်း၊ ‘မဲ တူ မုး အီ ဒီ ဆမ် ကာင် ဒူင် ကွယ် အုဝ်။ 5 ဆိန့် ဒေါ တဲး အုဝ် ဂေ ဒူအီ အီဆာရေလ လေး ခဲင် မိူင် အဲဂိုပ် ကော ဇမ် အာတိုဝ် နီ အုဝ် တူ ဒွိုမ် ကွယ် ခဲင် ကာင်။ အုဝ် ကွယ် မီ ခဲင် ထိုပ် ဘိက် ဘော လုဝ် ကာထုဝ့် ဟာဝ် ဘဲန် ပ့လုဝ့် ဘဲန် ပ့လုဝ့်။ 6 ဒေါ ဟဲ့ ဟာဝ် ရိုမ် အုဝ် ဒူပ် ဂေ ဒူအီ အီဆာရေလ တီ၊ အုဝ် ဟဲ့ စ်ု ဂေ ဒါ တာင် ယွတ် မဲန် ဒူအီ အီ ကြိုပ် အုဝ်။ အုဝ် ယီ တူ ဒွိုမ် စ်ု ဂေ ခေါ အူ ဇေန့် တဝ်း၊ မှဝ် န့ ပါယ် ပီ တူ ဒိုဝ်း ဘေ ဟေ အာရိတ် ဆမ် ကာင် အာဒါ အုဝ်။း’”

7 ခုဝ်၊ ဒေါ တီ နီ တဲး မဲ ဝီ ကာလာင် ဒီ အာဒါဝိတ် တဝ်း၊ “အုဝ် အီ မုး ဇဝ်ဖြာ အီ အိုပ် တူတ့်၊ အုဝ် ဟဲ့ ရဝ်း မဲ အာဒါဝိတ်။ အုဝ် ဟဲ့ တဲး မဲ လေး ခဲင် ကာပိုမ် မာဘူ၊ ကွဲ့ ဟူ တဲး မဲ ဟျီင် မာဘူ တီ။ အုဝ် ဟဲ့ တဲး မဲ ဘဲန် ဒါ ကာညာ အီ အိုပ် ဒူအီ အီဆာရေလ အီ မုး ဒူအီ ပီ အိုပ် အုဝ်။ 8 မဲ ဘော ဟာဝ် နာ မှဝ်၊ အုဝ် ဟဲ့ ဟာဝ် ရိုမ် ဒူပ် မဲ။ အုဝ် ဟဲ့ ဟာဝ် ယဲတ့် ဒီ အာတ့် မဲ၊ ဒိုဝ်း ဝဲန် ရန်ဆူ မဲ ဘောကာဂ့လျီတ်။ အုဝ် ဒီ ဘော ဒွါ အာဖုင် ဒီ မဲ၊ တဲး မဲ ပီ ဂေ အီ မုး ဒါ တာင် ဆိူတ် ဒဲင် ကာဒါယ် နီ။ 9 ဒဲင် တီ ဂေ ဒူအီ ပီ အိုပ် အုဝ် အီ မုး ဒူအီ အီဆာရေလ အုဝ် ဒီ တဲး ဂေ ပွိုန် ဒီ ကွယ် ဆီချာ၊ ကွဲ့ တဲး ဂေ လုဝ် ဝီ ကာထုဝ့် ဝါယ် နီ၊ တဲး ဂေ ကွယ် ဒူင် ကွယ် ဂေ တီ။ ဂေ အီ တူ မွှိုမ် တွိုန်၊ အာဝ် ဟူ ပွိုန် ဒီ ပျာတ့် ဂေ ပီ အာတ့် နီ။ 10 ဆိန့် ဒေါ ရဝ်း အုဝ် ဒါ တာင် အီ အိုပ် ဒူအီ အီဆာရေလ၊ ဂေ ရန်ဆူ မဲ ဟဲ့ ဘူင် နာ တူ မွှိုမ် ဒီ ဘေ။ အုဝ် ယီ ဒီ တဲး ရန်ဆူ မဲ ဟြာယ် တူတ့် ဒွန် မျုဝ်။ ဒဲင် တီ အုဝ် ဇဝ်ဖြာ ဒီ တဲး လှုက်လှာန် မဲ ကွယ် ဆီချာ ဆေဆေ။ 11 ဆေ ဟီ ဇမ် ဆီငဲ နုဝ့် အာဆာက် မဲ၊ မဲ ဟီ ယမ် ပီ ဒါ ဒါ မဲ၊ န့ ဒီ မိုဝ်း လှုက်လှာန် မဲ အူ ဝီ ဒီ ပ့လု မဲ။ အုဝ် ဒီ ဝီ တဲး ဂွန် အာရာင် မဲ ဘဲန် ပီ မဲ၊ တဲး မာန် မိူင် ပီ အိုပ် အန် ကွယ် မန် ဆီချာ ဆေဆေ။ 12 ဂွန် မဲ တီ ဒီ ဆမ် ကာင် အာဒါ အုဝ်။ အုဝ် မိူဝ် ဒီ တဲး မာန် မိူင် ပီ အိုပ် အန် ကွယ် မန် ဆီချာ ဆေဆေ။ 13 အုဝ် ဒီ ဘဲန် ဂုန့် အန်။ အန် မိူဝ် ဒီ ဘဲန် ဂွန် အုဝ်။ အုဝ် မိူဝ် တူ ဝီ ဒိုဝ်း ဝိဝ်၊ တူ ဒိုဝ်း ဝဲန် နဝ်း ရွက့် ကာဝေ အုဝ် ဒီ အန်။ အုဝ် တူ ဘူင် ပီ ပဲ့ ဟဲ့ ဘူင် အုဝ် ဒီ အာဆောလူ အီ ဟဲ့ ကွယ် ဒီ အာတ့် မဲ။ 14 အုဝ် ဒီ အာပ် တဲး အန် အိုပ် ဂေ ဒူအီ ပီ အိုပ် အုဝ်၊ တဲး အန် ဘော အိုပ် မိူင် အုဝ် ဆေဆေ။ မိူင် ပီ အိုပ် အန် တီ ဘော ကွယ် ဆေဆေ တူ ဟြာယ် ဒေါ မှဝ်။”

15 ခဲ့ ပီ ယိုဝ် အန် ဂြုဝ်း တီ၊ အာနာထာန် မိူဝ် ကာလာင် တူတ့် ဒီ အာဒါဝိတ်။

16 ဟဲ့ ဟွတ့်၊ ခုန်ဒီခမ် အာဒါဝိတ် ဘော လိုပ် ဟာဝ် ဒူင် ကွယ် ဇဝ်ဖြာ၊ တဲး အန် ပွိုန် ဒီ ကာလာင် ဂြုဝ်း ဒီ ဇဝ်ဖြာ။ အန် ဘော တဝ်း၊ “အိုယ် မဲ ဇဝ် အီ မုး ဇဝ်ဖြာ ဘွတ်၊ ဘော အုဝ် ဘော ဒူအီ ခဲင် န့ဟူမ် အုဝ် အာဝ် မုး အာမျုဝ် အီ အာရေ တာင်။ မဲ ဇဝ် ယီ ဟဲ့ မျုက် အုဝ် ခဲ့ နီ။

17 ဒဲင် တီ မဲ ဇဝ် ဟဲ့ ဂေဇူ အုဝ် ကိူန် ကာဆဝ်။ မဲ ဇဝ် ဟဲ့ ကာလာင် တဲး အုဝ် နပ် လွင် နာ အာတ့် န့ ဒီ ပါယ် မှဝ် ဒီ ဒူအီ အာမျုဝ် အုဝ်။ အိုယ် မဲ ဇဝ် အီ မုး ဇဝ်ဖြာ ဘွတ်၊ မဲ ဟဲ့ မျုက် အုဝ် လွှိုမ် အီ ဟဝ်။

18 အုဝ် အာဝ် ဟူ နပ် ဒီ ကာလာင် ပေါ န့ ပွါ ကူပ် ဟဲ့ စုဝ့် မျုက် မဲ ဇဝ် ဒီ အုဝ်။ 19 ကူပ် ရွက့် မဲ ဒီ အုဝ် မဲ ဟဲ့ ဘူင် ခဲ့ တီ အီ ဒူပ် ပီ အိုင် မဲ။ မဲ မိူဝ် ဟဲ့ တဲး ယေ နပ် လွင် ကာဒိက် ဆတ်ဇာ တီ။

20 အိုယ် မဲ ဇဝ်ဖြာ၊ အာဝ် မိုဝ်း ဇဝ် ခေါ အူ ကာဒင် အီ ပီ မဲ ဇဝ်။ ယေ ဟဲ့ နပ်၊ ဒဲင် မဲ ဇဝ်ဖြာ အာဝ် မိုဝ်း ဇဝ်ဖြာ ပေါ အူ ကာဒင်။ 21 ဒဲင် ကာဒါယ် နီ န့ မိူဝ် တူ မိုဝ်း ဒူအီ ခေါ အူ မျုဝ် အီ ပီ ဒူအီ အီဆာရေလ ပီ အိုပ် မဲ။ မဲ ဇဝ် ဟဲ့ ကာဒုး ဒီ ထုတ် လေး ဂေ၊ ကွဲ့ တဲး ဂေ ဘဲန် မှာယ် အီ ဟဝ်၊ ဝီ တဲး ဂေ ဘဲန် ဒူအီ ပီ အိုပ် မဲ၊ တဲး အီ ဟဝ် ယိုဝ် ခဲ့ တာင် ပွုန် မဲ။ မဲ ဟဲ့ ဘူင် နာ မွှိုမ် အာမ် ကာဆဝ် ဘော အီ မွှိုမ် ယုဝ် ဒေါ ဆုတ့် မဲ အာမျုဝ် ဒူအီ ဟဝ် ဘော အာရိုပ် ပီ ကြိုပ် ဂေ၊ တဲး ဂေ လေး ခဲင် မိူင် ဂေ အာတ့် တး ဇမ် ဂေ ဒူအီ အီဆာရေလ။ ပါယ် တီ မဲ ဇဝ် ဟဲ့ ဘူင် ဝါယ် ဟဲ့ လေး ဂေ ခဲင် မိူင် အဲဂိုပ် တွိုန်။ 22 မဲ ဇဝ် ဟဲ့ တဲး ဒူအီ အီဆာရေလ ဘဲန် ဒူအီ အာမျုဝ် ပီ အိုပ် မဲ ဘော အိုပ် ဂေ ဆေဆေ။ မဲ မိူဝ် ဟဲ့ ဘဲန် ဇဝ်ဖြာ ပီ ကြိုပ် ဂေ ဆေဆေ။

23 ကာဒိက် ဆတ်ဇာ ပဲ့ ဟဲ့ ဒွါ မဲ ဇဝ်ဖြာ ဒီ အုဝ် ဘော ဒီ ဒူအီ အာမျုဝ် အုဝ် ဒေါ တီ နီ၊ တဲး န့ မှာန် ဆေဆေ။ ဂြုဝ်း ပဲ့ ဟဲ့ တဝ်း မဲ ဇဝ် ဒီ ဘူင်၊ တဲး န့ ဘဲန် တူတ့် ဒွန် ဒဲ။ 24 တဲး မဲ ဘူင် ဒူပ် ကာဒိက် ဆတ်ဇာ ပဲ့ ဟဲ့ ဒွါ မဲ တီ၊ တဲး အီ အိူပ် မဲ ဇဝ်ဖြာ ဆေဆေ။ တဲး ဂေ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် အီ အိုပ် ဒူအီ အီဆာရေလ၊ အန် ဘော မုး ဇဝ်ဖြာ ပီ ကြိုပ် ဒူအီ အီဆာရေလ။’ ပါယ် တီ ဘော အာမျုဝ် အုဝ် အီ မုး ဒဲစေန့် မဲ၊ ဂေ ဒီ ကွယ် မန် ဆီချာ ဘော ကွယ် ဆေဆေ။

25 မဲ ဇဝ် ဟဲ့ ဟွတ့် ဘျ ဒီ အုဝ် လွင် ဒီ တဲး မဲ ဒူအီ အာမျုဝ် အုဝ် ဘဲန် ခုန်ဒီခမ် ဆေဆေ။ ခုဝ်၊ အုဝ် ယ ဆာခိုဝ် ပါယ် တီ။ 26 မဲ ဇဝ် မဲ မုး ဇဝ်ဖြာ။ ဂြုဝ်း မဲ ဇဝ် မိူဝ် မုး ဂြုဝ်း မုး ဂြုဝ်း မှာန်။ ကာဒိက် ဆတ်ဇာ တီ မဲ ဇဝ် မိူဝ် ဟဲ့ ဒွါ ဒီ အုဝ် အီ မုး ဒဲစေန့် မဲ။ 27 မဲ ဟဲ့ အိုင် ဒီ မွင့်ကာရာ ဒွါ ဒီ လှုက်လှာန် အုဝ် တဲး ဂေ ကွယ် ဆေဆေ၊ ဒူပ် မဲ ဇဝ်။ မဲ ဇဝ်ဖြာ အီ အိုပ် တူတ့် ဒွန် မျုဝ်၊ ခဲ့ ပီ ကာလာင် မဲ၊ ခဲ့ ပီ မွင့်ကာရာ ဒွါ မဲ၊ န့ ဒီ တဲး ဂေ လှုက်လှာန် အုဝ် ဂျာမ်ဆာ ဆေဆေ။” ခဲ့ တီ၊ အာဒါဝိတ် ဟဲ့ ဆာခိုဝ် ဒီ ဇဝ်ဖြာ။