ဂေ မိူဝ် ဒိုဝ်း ဟာဝ် ဇီဒိူက် ဇဝ်ဖြာ ဒူင် ကွယ် ထိုပ် ပဲ့ ဟဲ့ ဘူင် အုန် အာဒါဝိတ် အာဒါ ဇီဒိူက် ဇဝ်ဖြာ တီ။ ဂေ မိူဝ် ဘ့လေး အုန် ခဲင် ထိုပ် တီ။ ဟဲ့ ဟွတ့်၊ ဂေ မိူဝ် ဝီ လှူ ပီ ဒီ လှူ အီ ဒုဝ့် ဒီ ငဝ်၊ လှူ ပီ ဒီ လှူ အီ ကွယ် ကာဇု ဟူမ် ရိုမ်။ 2 ဝါယ် ဟဲ့ ဟွတ့် အာဒါဝိတ် လှူ ပီ ဒီ လှူ တီ၊ အန် ဝီ ဂါဝ် ပွုန် ဇဝ်ဖြာ၊ ဝီ မွင့်ကာရာ ဒွါ ဒီ ဒူအီ ဂေ ဘောကာဂ့လျီတ်။ 3 အန် မိူဝ် ကာဆာင် ပီ ဒီ ဟူမ် ဒီ ဂေ ဒူအီ အီဆာရေလ ဘောကာဂ့လျီတ်။ ဘော အီဘိုန့် ဘော အီမာယ် ဒွန် အီ ဟဲ့ ပွိုန် ခါမုန် အူ ဝီ အူ ဘူင့်၊ ယင် အူ ကာဆိ ဘော ဘ့လေ မာငုန် ကာဟဝ်း အူ ဒီခ့လဲပ်။

4 အာဒါဝိတ် ဝီ စ်ု ဒူအီ အာလေဝီ မင် အီ၊ တဲး ဂေ အိူပ် ဇဝ်ဖြာ ပီ ကြိုပ် ဂေ ဒူအီ အီဆာရေလ။ အန် တဲး ဂေ ဘဲန် အီ ယဲတ့် ဒီ အာတ့် ဇီဒိူက် ဇဝ်ဖြာ၊ ဆာခိုဝ် ဘော ကာလာင် ဂုင် ဂေဇူ ဒီ ဇဝ်ဖြာ၊ တဝ်း ဘော မှုဝ် အီ အိူပ် မျုက် ဇဝ်ဖြာ။ 5 အာဆာပ် ဘော ဘဲန် ဒါ အီ ယဲတ့် ဂေ။ အာဆာခါရာ ဘော ဘဲန် ဒါ အီ စွယ် အန်။ ဒဲင် တီ ဘော မုး အာယေဟီလာ၊ အာဆေမီရာမူတ်၊ အာယေအီလာ၊ အာမာဒီဆီ၊ အာအေလီအာပ်၊ အာဘီနာယာ၊ အာအုဝ်ဘေန်အေဒူမ် ဘော အာယေယီလာ။ ဂေ တီ ဘော ဘဲန် အီ ဘး ဒိင်။ အာဆာပ် ဘော စှုဝ်း စှဲန့်။ 6 ဒါ အီ လှူ ဒီ ဇဝ်ဖြာ အာ ဝီ အီ စိူဝ် အာဘီနာယာ ဂါယ် အာယာဟာဇေလာ၊ ဂါယ် ဘဲန် အီ ဘုတ် ဝဝ် ဆေဆေ ဒေါ ကွယ် ဂေ ဒီ အာတ့် ဇီဒိူက် ဇဝ်ဖြာ။

7 အာဒါဝိတ် ဟဲ့ ဒဲမ် မှုဝ် အီ အိူပ် ဂုင် ဂေဇူ ဇဝ်ဖြာ နီ။ အန် ဘော အာပ် ဒွါ မှုဝ် တီ ဒီ အာဆာပ် ဂေ ဘီနွင် အန် အီ မုး ဒူအီ အာမျုဝ် အာလေဝီ၊ တဲး ဂေ ယဲတ့် ဒူအီ အီ တဝ်း မှုဝ်။ အန် ဘော တဝ်း၊

8 တဲး အေ ဒါင် ဂုင် ဂေဇူ ဒီ ဇဝ်ဖြာ။ တဲး အေ ဆာခိုဝ် ဒီ အန် ဇဝ်။ တဲး အေ ဘော ကာလာင် ဘျ ဒီ အီ ဟဝ် လွင် ပဲ့ ဟဲ့ ဘူင် အန် ဇဝ်၊ တဲး ဒူအီ ဘောကာဂ့လျီတ် ကော နပ် လွင် အန် တီ။

9 တဲး အေ တဝ်း မှုဝ် အီ အိူပ် ဇဝ်ဖြာ။ တဲး အေ ကာလာင် ဒီ အီ ဒွန် မျုဝ် အီ မွှိုမ် အာမ် ပဲ့ ဟဲ့ ဘူင် အန် ဇဝ်။

10 ကူပ် မုး အေ ဒူအီ ပီ အိုပ် အန် ဇဝ်၊ တဲး အေ ဘော ခူယ်။ တဲး ဂေ အီ ကြိုပ် အန် ဇဝ် ဘော ဘျုဝ် ဒါခိုယ်။

11 တဲး အေ ဘော ဘိုင် ဇဝ်ဖြာ၊ တဲး အေ ဘိုင် ပွုန် အန် အီ တာင် ကာဆဝ်။ တဲး အေ ဘော ကြိုပ် ဆာခိုဝ် ဒီ အန် ဆေဆေ။

12 တဲး အေ လှုဝ်း အီ မွှိုမ် အာမ် ကာဆဝ် ပဲ့ ဟဲ့ ဘူင် အန် ဇဝ်။ တဲး အေ လှုဝ်း ဘော ပဲ့ ဟဲ့ ဒမ် အန် ဇဝ် ဒီ အီ။

13 အိုယ် ဘေ အီ မုး လှုက်လှာန် အာကူပ် အီ မုး ဒဲစေန့် ဇဝ်ဖြာ၊ ဘေ အီ မုး လှုက်လှာန် အာအီဆာရေလ၊ တဲး ဘေ ဘူင် ပါယ် တီ။

14 အန် ဇဝ် ဘော မုး ဇဝ်ဖြာ ပီ ကြိုပ် အေ။ ပီ ဆုင်ဖျာတ် အန် ဇဝ် ဟဲ့ ကာလတ့် ဒဲင် ကာဒါယ်၊ တဲး ဂေ ဒူအီ ဘောကာဂ့လျီတ် ကော နပ်။

15 တဲး အေ မိူဝ် လှုဝ်း ဆေဆေ ပဲ့ ဟဲ့ ကာဆဲန့် အန် ဒီ အေ။ ကွဲ့ တဲး အေ ပိဝ် ဒါရာ ပီ ဒမ် အုန် အန် ကော ဇမ် အူ ဟြဲန့် စုဝ်။

16 ကွဲ့ တဲး အေ ပိဝ် ကာဒိက် ဆတ်ဇာ ပီ ဒွါ အန် ဇဝ် ဒီ အာဘြာဟမ် ဘော ပီ ကာဆဲန့် အန် ဒီ အာဆဲက်။

17 အန် ဝီ ကာလာင် အုန် လွင် အန် တီ ဒီ အာကူပ်၊ တဲး န့ ဘဲန် ပီ ကာဆဲန့် အီ ကွယ် ဆေဆေ ခဲင် မိူင် အီဆာရေလ။

18 အန် ဇဝ် ဟဲ့ တဝ်း၊ “အုဝ် ဒီ ဒိုဝ်း ကာဒါယ် မိူင် ကာနန့် တွိုန်၊ တဲး န့ ဝီ ဘဲန် ခါဂုန် ပီ ဒွါ အုဝ် ဒီ ဘေ၊ တဲး ဘေ လာယ် ပ့လု ဟာဝ် ဆေဆေ။”

19 ဂေ ဒူအီ ပီ အိုပ် ဇဝ်ဖြာ ဒေါ ဆီ ပြေတ့် ကာဆဝ် ဂေ၊ ဂေ ပီ ခဲတ့် တး ကွယ် ခဲင် ကာဒါယ် မိူင် ကာနန့် တီ။

20 ဂေ ဘော လုဝ် ဟာဝ် ဝိဝ် ဟာဝ် ဝေန့်။ ဟဲ့ ဇမ် အူ မိူင်၊ ပီ ဝီ လုဝ် ဟာဝ် ပေါ အူ မိူင်။ ဂေ ဟဲ့ တး ဒီ ဒူအီ အူ မျုဝ်၊ ပီ ဝီ လုဝ် ဟာဝ် ဒီ ဒူအီ ပေါ အူ မျုဝ်။

21 မာလဲ၊ ဇဝ်ဖြာ တူ တဲး အီ ဟဝ် ခါနှာပ် ဂေ။ အန် ဇဝ် ဘော မာနုဝ် ခုန်ဒီခမ် ဘဲန် ကာဒင် ဘဲန် ကာဒင် တဝ်း၊

22 “အာဝ် ပွိုန် ဘ့လတ့်၊ အာဝ် ပွိုန် ပျာတ့် အီ မုး ဒူအီ ပီ ရဝ်း အုဝ်။ အာဝ် ပွိုန် ဘူင် နာ စီစိဝ် ဒီ ဂေ ဒူအီ အီ ဘျာန် ဂြုဝ်း အုဝ်။”

23 အိုယ် ဘေ အာမျုဝ် ဒူအီ အီ ကွယ် ဒဲင် ကာဒါယ် ဘောကာဂ့လျီတ်၊ တဲး ဘေ တဝ်း မှုဝ် ဒီ ဇဝ်ဖြာ။ ဒွန် ဆီငဲ ဒွန် ဆီငဲ၊ တဲး အေ ကာလာင် လွင် ဇဝ်ဖြာ ချွတ် အီ။

24 ကာလာင် တဲး ဒူအီ ဒွန် မျုဝ် နပ် ခဲ့ တာင် အာဖုင် ဒင်ခုဝ် အန် ဇဝ်။ ကာလာင် ဘော အီ မွှိုမ် အာမ် ကာဆဝ် ပဲ့ ဟဲ့ ဘူင် အန် ဇဝ်၊ တဲး ဒူအီ ဒွန် မျုဝ် ကော နပ်။

25 ခုဝ်၊ ဇဝ်ဖြာ ဟဲ့ ဘွတ် မျာတ် ကာဆဝ်၊ ဟဲ့ ကာအာပ် အေ အိူပ် အန် ဇဝ်။ န့ ဟဲ့ ကာအာပ် အေ ယုဝ် ဘော ရုဝ်ဆေ ဇဝ်ဖြာ လွှိုမ် အီ ဟဝ် ရုဝ်ဆေ ဇဝ် ပီ ကြိုပ် ဂေ ဘဲန် ကာဒင် ဘဲန် ကာဒင်။

26 ဇဝ် ပီ ကြိုပ် ဂေ ဒူအီ အာမျုဝ် ဟဝ် ဘောကာဂ့လျီတ်၊ ဂေ မုး မီ အာရိုပ် ရာင်။ အီ မုး ဇဝ်ဖြာ အာခါခ်ု၊ အန် ယီ ဖာန် ဘ့လေး ဘော ဘ့လေန့် ဘော ဂါင်ဟြာဝ်။

27 အန် ဇဝ် ဘော မိုဝ်း ပွုန် ဂေ အာဖုင် တာင် ကာဆဝ်။ ခဲင် ဒူင် ကွယ် အန် ပွုန် အန် ဘော အာရူင် အန် ဟဲ့ တဲး အီ ဘျုဝ် ဒါခိုယ်။

28 အိုယ် ဘေ ဒူအီ အီ ကွယ် ဒဲင် ကာဒါယ် ဘောကာဂ့လျီတ်၊ တဲး အေ အိူပ် ဇဝ်ဖြာ။ တဲး အေ အိူပ် ပွုန် အန် ဘော အာဖုင် ဒင်ခုဝ် အန်။

29 တဲး အေ အိူပ် ဇဝ်ဖြာ၊ တဲး န့ ကာဒါန် ခဲ့ တာင် အာဖုင် ဒင်ခုဝ် အန်။ တဲး အေ ရဲန် ပီ ဒီ လှူ၊ တး လှူ ဒီ ဒူင် ကွယ် အန် ဇဝ်။ တဲး အေ ကြိုပ် အန် ဇဝ် အီ မိုဝ်း အာဖုင် ဒင်ခုဝ်၊ အီ ဆီငါ ဘွတ် ကာဆဝ်။

30 တဲး အေ အီ ကွယ် ဒဲင် ကာဒါယ် ဘော ယုဝ် ဘော ဒီယုး ဒီယေန့် ဒီ အာတ့် အန် ဇဝ်။ ခုဝ်၊ ခဲ့ ကွယ် ဒွန် မျုဝ် ဒဲင် ကာဒါယ်၊ န့ ကွယ် မန် ဆီချာ၊ အာဝ် ဟူ မိုဝ်း အာဆေ အီ ပွိုန် ဘူင် တဲး န့ ရ်ု၊ တဲး န့ ကာပျာတ့်။

31 တဲး ဘော ဂါင်ဟြာဝ် ဘော ကာဒါယ် ခူယ် ဒါခိုယ်။ တဲး န့ ပီ ဂေ ကာလာင် ဒီ ဒူအီ ဒွန် မျုဝ် လွင် ဇဝ်ဖြာ အီ အိုပ် တူတ့် ဒွန် မျုဝ်။

32 အိုယ် အိုမ် နမ်မုက်ဆာရာ ဘော ဒုဝ် ဆတ်ဒါဝါ အီ ကွယ် ခဲင် အိုမ် တီ၊ တဲး ဘေ ဟမ် ဒီငိုန့် တာင် တာင်။ ဘော ဒူင် နာ ဘော အီ ကွယ် ခဲင် ဒူင် နာ ဒွန် မျုဝ်၊ တဲး ဘေ ဘော ခူယ် ဒါခိုယ်။

33 ပန် ဒီ တး ဆုင်ဖျာတ် အန် ဇဝ် အာမူ ဒူအီ ဒဲင် ကာဒါယ် နီ၊ ဘော ဟေ ဂေ ဟြင် အီ ကွယ် ခဲင် ပြဲ၊ ဂေ ဒီ ဘော ဒါခိုယ် ပီ ဒူအီ အီ တဝ်း မှုဝ် ဒါခိုယ် ဘော အိူပ် ဇဝ်ဖြာ။

34 တဲး အေ ဒါင် ဂုင် ဂေဇူ ဒီ ဇဝ်ဖြာ ကူပ် ဟဲ့ မွှိုမ် ကာဆဝ် အန် ဇဝ်။ အန် ဇဝ် ဘော မိုဝ်း နဝ်း ရွက့် ဆေဆေ။

35 တဲး ဘေ ဒဲ့ တဝ်း၊ “အိုယ် မဲ ဇဝ်ဖြာ ပီ ကြိုပ် ယေ၊ ယေ မှာန့်၊ တဲး မဲ ဇဝ် ချွတ် ယေ ဘော ဒိုဝ်း လေး ယေ ခဲင် ဒူအီ အာမျုဝ် ဟဝ်၊ တဲး ယေ ပွိုန် ဒီ ဝီ ဒါင် ဂုင် ဂေဇူ ဒီ မဲ ဇဝ် အီ မိုဝ်း ပွုန် တာင် ကာဆဝ်၊ တဲး ယေ မိုဝ်း နဝ်း ကြွိုမ် ဒေါ အိူပ် မျုက် ယေ ဒီ မဲ ဇဝ်။”

36 တဲး အေ အိူပ် ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ။ အေ ဒီ အိူပ် အန် ဇဝ် ဆိန့် ဒေါ တီ နီ ဟာဝ် နာ အာတ့် ဆေဆေ။

ဂေ ဟဲ့ ဟွတ့် တဝ်း မှုဝ် တီ၊ ဂေ ဒူအီ ဘောကာဂ့လျီတ် တဝ်း၊ “တဲး န့ ဘဲန် ပါယ် တီ။” ဘော “အေ အိူပ် ဇဝ်ဖြာ။”

37 ခုန်ဒီခမ် အာဒါဝိတ် စ်ု အာဆာပ် ဘော ဘီနွင် အန် အီ မုး ဒူအီ အာမျုဝ် အာလေဝီ၊ တဲး ဂေ ဘူင် ဂါန် ဒီ ဒူင် အုန် ဂေ ဇီဒိူက် ဇဝ်ဖြာ တွိုန်၊ တဲး ဂေ ဘူင် ဂါန် တီ ဒွန် ဆီငဲ ဒွန် ဆီငဲ။ 38 အာအုဝ်ဘေန်အေဒူမ် ဘော ဂေ ဒူအီ ဒဝ် ဂိုဝ် ဒီ ဒါ ဝီ အီ ဒူပ် အန်၊ ဂေ ဘော လုဝ် စွယ် အာဆာပ် တွိုန်။ အာဟုဝ်ဆာ ဂါယ် အာအုဝ်ဘေန်အေဒူမ် အီ မုး ဂွန် အာယေဒူထုန်၊ ဂါယ် ဘဲန် ဒါ အီ ဘ်ု မာလုဝ်း ဒီ ဒူင် ကွယ် ဇီဒိူက် ဇဝ်ဖြာ။

39 ဒါ အီ လှူ ဒီ ဇဝ်ဖြာ အီ စိူဝ် အာဇာဒူက် ဘော ဂေ ဘီနွင် အန် အီ မုး ဒါ အီ လှူ ဒီ ဇဝ်ဖြာ၊ အာဒါဝိတ် ဘော စ်ု ဂေ ဘူင် ဂါန် ဒီ ထိုပ် ဘိက် ဘွတ် အီ ကွယ် ဒီ ဒူင် စာ ခဲင် မိူင် ကီပွင်။ 40 ဆိန့်ဝး အူ ဇေန့် ဘော ဘာ ဒီ အပ် အူ ဇေန့်၊ ဂေ မိူဝ် လှူ ပီ ဒီ လှူ အီ ဒုဝ့် ဒီ ငဝ် ဒဲင် ကာစှူင့် လှူ၊ တဲး န့ ဒူပ် ပီ ဒဲမ် အုန် ခဲင် ဘပ် ဒါရာ ဇဝ်ဖြာ ဒီ ဂေ ဒူအီ အီဆာရေလ။ 41 အာဟေမာန် ဂါယ် အာယေဒူထုန် ဘော ကွယ် ရိုမ် ဒူပ် ဂေ အီ ဟဝ် အီ မုး ဒူအီ ပဲ့ ဟဲ့ ရဝ်း ဂေ၊ တဲး ဂေ တဝ်း မှုဝ် အီ အိူပ် မျုက် ဇဝ်ဖြာ။ ဂေ တဝ်း၊ “ဇဝ်ဖြာ မိုဝ်း နဝ်း ရွက့် ကာဝေ ဆေဆေ။” 42 အာဟေမာန် ဂါယ် အာယေဒူထုန် တွိုန်၊ ဂါယ် ဘော လုဝ် ယွတ် လိုမ်လာ ဂေ အီ ဘုတ် ဝဝ် အီ စှုဝ်း စှဲန့် ဘော မျုဝ် ပီ လုဝ် ဒွယ်၊ လုဝ် ဘး ဒေါ တဝ်း ဂေ မှုဝ် အီ အိူပ် မျုက် ဇဝ်ဖြာ။ ဂေ ဂွန် အာယေဒူထုန် ယီ ဘဲန် ဒူအီ အီ ဘ်ု မာလုဝ်း။

43 ဟဲ့ ဟွတ့် ဝါယ် တီ၊ ဂေ ဒူအီ ဘောကာဂ့လျီတ် ဝေန့် ကာင် အာဆေ ကာင် အန်။ အာဒါဝိတ် မိူဝ် ဝီ ဝေန့် ဒီ ဟုဝ် ဒူင် ကွယ် အန် ဘော ကွယ် ဒါခိုယ် ဒူပ် ဂေ ဒူအီ ခဲင် န့ဟူမ် အန်။