1 ဝါယ် အန် တီ အာဒါဝိတ် ဝီ ဆမ် ဟုဝ် အာဒါ အန် ခဲင် မိူင် ဒူင် စိူဝ် မိူင် အာဒါဝိတ် တွိုန်။ အန် ဝီ ဆမ် ထိုပ် ဘိက် တဲး န့ ဘဲန် ဒူင် ဒီ အုန် ဇီဒိူက် ဇဝ်ဖြာ။ 2 ဒေါ အန် တီ အာဒါဝိတ် ဝီ တဝ်း၊ “မီ ဂေ ဒူအီ ခြိုဝ် အာလေဝီ ပွိုန် ကာဂွတ် ဇီဒိူက် ဇဝ်ဖြာ။ ခုဝ်၊ ဇဝ်ဖြာ ဟဲ့ ရဝ်း ဂေ၊ တဲး ဂေ ကာဂွတ် ဇီဒိူက် ဇဝ်ဖြာ ဘော ဘူင် ဂါန် အန် ဇဝ် ဆေဆေ။”

3 ဝါယ် အန် တီ အာဒါဝိတ် ဝီ ဒဲ့ ခဲ့ ကွယ် ဒူအီ အီဆာရေလ ဘောကာဂ့လျီတ်၊ တဲး ဂေ တး ကာဇု ခဲင် မိူင် ယေရူဆာလဲမ်၊ တဲး ဂေ ပွိုန် ဒီ ဟာဝ် ဒိုဝ်း တး ဇီဒိူက် ဇဝ်ဖြာ၊ ဝီ ဘ့လေး အုန် ဒီ ဒူင် ပဲ့ ဟဲ့ ရဲန် အုန် အန်။ 4 ဟဲ့ ဟွတ့်၊ အန် ဝီ ဒဲ့ ဘော ဂေ လှုက်လှာန် အာရူန် ဘော ဒူအီ အာလေဝီ၊ တဲး ဂေ တး ကာဇု။

5 ခဲင် ဒူအီ အာလေဝီ အီ မုး လှုက်လှာန် အာခုဝ်ဟာတ် အီ ဘဲန် ဒါ တာင် ဘော မုး အာအူရေအေန်။ န့ မိုဝ်း ဘော ဂေ ဘီနွင် ဝေါဝဲ အန် အာဒါ အူ မာယဝ်း ဒီ အာ ဂိုဝ် ဝီ။

6 ခဲင် လှုက်လှာန် အာမေန်ရာရီ အီ ဘဲန် ဒါ တာင် ဘော မုး အာဆာယာ။ န့ မိုဝ်း ဘော ဂေ ဘီနွင် ဝေါဝဲ အန် အာဒါ အူ မာယဝ်း ဒီ အာ ဂိုဝ် ဝီ။

7 ခဲင် လှုက်လှာန် အာဂေန်ရာဆူန် အီ ဘဲန် ဒါ တာင် ဘော မုး အာယုဝ်အေလ။ န့ မိုဝ်း ဘော ဂေ ဘီနွင် ဝေါဝဲ အန် အာဒါ အူ မာယဝ်း ဒီ အူယ် ဂိုဝ် ဝီ။

8 ခဲင် လှုက်လှာန် အာအေလီဇာဖာန် အီ ဘဲန် ဒါ တာင် ဘော မုး အာဆေမာယာ။ န့ မိုဝ်း ဘော ဂေ ဘီနွင် ဝေါဝဲ အန် အာဒါ အူ မာယဝ်း ဝီ။

9 ခဲင် လှုက်လှာန် အာဟေဘြုဝ် အီ ဘဲန် ဒါ တာင် ဘော မုး အာအေလီအေန်။ န့ မိုဝ်း ဘော ဂေ ဘီနွင် ဝေါဝဲ အန် အာဒါ ဒါ ဂိုဝ် ဝီ။

10 ခဲင် လှုက်လှာန် အာအူဆီအေန် အီ ဘဲန် ဒါ တာင် ဘော မုး အာမီနာဒါပ်။ န့ မိုဝ်း ဘော ဂေ ဘီနွင် ဝေါဝဲ အန် အာဒါ အူ မာယဝ်း ဒီ ဂိုဝ် ဒီ အာ ဝီ။

11 ဟဲ့ ဟွတ့်၊ အာဒါဝိတ် ဝီ ဒဲ့ ဒါ အီ လှူ ဒီ ဇဝ်ဖြာ အီ စိူဝ် အာဇာဒူက် ဂါယ် အာဘာထာ။ အန် ဒဲ့ ဘော ဂေ ဒူအီ အာလေဝီ အီ စိူဝ် အာအူရေအေန်၊ အာဆာယာ၊ အာယုဝ်အေလ၊ အာဆေမာယာ၊ အာအေလီအေန် ဘော အာမီနာဒါပ်။ 12 အန် ဘော ကာလာင် ဒီ ဂေ တဝ်း၊ “ဘေ ဟဲ့ ဘဲန် ဒါ တာင် အီ အိုပ် အီ ယဲတ့် ဒူအီ ခဲင် ခြိုဝ် ဘေ။ တဲး ဘေ ဘူင် တဲး ဒုဝ် ဘူင့် ဘေ ဆီငါ ဘွတ်၊ တဲး န့ ဒူပ် ဒါရာ။ ခုဝ်၊ အေ လုဝ် ဘူင် ဂါန် ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ။ အေ လုဝ် ဟာဝ် ဒိုဝ်း တး ဇီဒိူက် ဇဝ်ဖြာ၊ ဝီ တး အုန် ဒူင် ပဲ့ ဟဲ့ ဟွတ့် ဆမ် အုန် အုဝ် အာဒါ ဇီဒိူက် တီ။ 13 ခါ အာတ့် နူ၊ ဘေ ဒူအီ အာလေဝီ တူ ကာဂွတ် ဇီဒိူက် ဇဝ်ဖြာ။ ခုဝ်၊ ဇဝ်ဖြာ ပီ ကြိုပ် အေ ဝီ ဒမ် မှာပ် ဒီ အေ။ အေ မိူဝ် တူ ဘူင် ဒူပ် ခဲ့ ပီ ဒမ် အုန် အန် ဇဝ်။” 14 ပန် တီ ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ အာလေဝီ ဂေ မိူဝ် ဘူင် တဲး ဒုဝ် ဘူင့် ဂေ ဆီငါ ဘွတ်၊ တဲး ဂေ ပွိုန် ဒီ ဟာဝ် ကာဂွတ် တး ဇီဒိူက် ဇဝ်ဖြာ။ အန် ဇဝ် မုး ဇဝ်ဖြာ ပီ ကြိုပ် ဒူအီ အီဆာရေလ။ 15 ဂေ ဒူအီ အာလေဝီ ဘော ဒိုဝ်း မင် ဂွတ်၊ ပ့လွတ် ဒီ ဇီဒိူက် ဇဝ်ဖြာ၊ ဝီ ဂွတ် ဒဲင် ယ ဂေ ဘော ကာဂွတ် ဟာဝ်၊ တဲး န့ ဒူပ် ခဲ့ ပီ ကာလာင် အုန် ဇဝ်ဖြာ ဒီ အာမုဝ်ဆဲ တွိုန်။

16 အာဒါဝိတ် မိူဝ် ကာလာင် ဒီ ဂေ အီ ယဲတ့် ဂေ ဒူအီ အာလေဝီ၊ တဲး ဂေ စ်ု ဘီနွင် ဝေါဝဲ ဂေ တဝ်း မှုဝ် ဒါခိုယ်၊ က်ု ဘော မျုဝ် အီ ဟမ် ဒါခိုယ် ဘး ဘော ဒိင်၊ ဒိင် ဒီရဝ် ဘော စှုဝ်း စှဲန့်၊ တဲး န့ ဒါခိုယ်။

17 ဂေ ဒူအီ အာလေဝီ မိူဝ် ဝီ ဒဲ့ အာဟေမာန် အီ မုး ဂွန် အာယုဝ်အေလ။ ဘော ခဲင် ဂေ ဘီနွင် အန် အန် ဒဲ့ အီ စိူဝ် အာဆာပ် အီ မုး ဂွန် အာဘေရေက်။ ခဲင် ဘီနွင် အာမျုဝ် အာမေန်ရာရီ အန် ဘော ဒဲ့ အာအေထာန် အီ မုး ဂွန် အာကူဆာယာ။ 18 ပန် တီ ဂေ ဝီ ဒဲ့ ဘီနွင် ဂေ ပေါ အူ ဖိုင်၊ တဲး ဂေ ဘဲန် ဖိုင် ဟာအာ။ ဒူအီ ဂေ တီ ဘော မုး အာဆာခါရာ၊ အာယာဇေလ၊ အာဆေမီရာမူတ်၊ အာယေဟီလာ၊ အာအူနီ၊ အာအေလီအာပ်၊ အာဘီနာယာ၊ အာမာအာဆေယာ၊ အာမာဒီဆီ၊ အာအေလီဖာလေတ်၊ အာမေနေယာ ဘော အာအုဝ်ဘေန်အေဒူမ် ဂါယ် အာယေဟေလာ အီ မုး ဒူအီ အီ ဘ်ု မာလုဝ်း။

19 အာဟေမာန်၊ အာဆာပ် ဘော အာအေထာန်၊ ဂေ ဘော ဘဲန် ဒါ အီ စှုဝ်း စှဲန့် ဘွင့် ဒေန့်။ 20 အာဆာခါရာ၊ အာဇီအေလာ၊ အာဆေမီရာမူတ်၊ အာယေ အာယေဟီလာ၊ အာအူနီ၊ အာအေလီအာပ်၊ အာမာအာဆေယာ ဘော အာဘီနာယာ၊ ဂေ ဘော ဘဲန် အီ ကြိတ် ဒိင် ဒီရဝ်၊ တဲး န့ လေး ဟမ် အီ စိူဝ် အာလာမူတ်။ 21 အာမာဒီဆီ၊ အာအေလီဖာလေတ်၊ အာမေနေယာ၊ အာအုဝ်ဘေန်အေဒူမ်၊ အာယေဟီလာ၊ အာဇာဇီယာ၊ ဂေ ဘော ဘဲန် အီ ယဲတ့် အီ ဘး ဒိင်။ ဂေ ဘော ယဲတ့် အီ ဟဝ် တဲး န့ လေး ဟမ် အီ စိူဝ် ဆေမီနိတ်။ 22 အာခေနာနီယာ၊ ကူပ် လှဲဝ် အန် ဒီ က်ု ဒီ ဘး ဒွန် မျုဝ်၊ ဂေ ဘော တဲး အန် ဘဲန် ဒါ အီ အိုပ် ဂေ တဝ်း မှုဝ် ဘောကာဂ့လျီတ်။

23 အာဘေရေက် ဘော အာအေန်ခါနာ ဂါယ် ဘဲန် ဒါ အီ ဘ်ု ဇီဒိူက် ဇဝ်ဖြာ။ 24 ဂေ ဒါ အီ လှူ ဒီ ဇဝ်ဖြာ ဘော မုး အာဆေဘာနီ၊ အာယုဝ်ဆာဖတ်၊ အာနေထာနေလာ၊ အာမာဆေ၊ အာဆာခါရာ၊ အာဘီနာယာ ဘော အာအေလီအေဇာ၊ ဂေ တီ ဘော ဘဲန် ဒါ အီ ဘုတ် ဝဝ် ဒေါ ဟာဝ် ဂေ နာ အာတ့် ဇီဒိူက် ဇဝ်ဖြာ။ အာအုဝ်ဘေန်အေဒူမ် ဘော အာဟီယာ၊ ဂါယ် ဘော လုဝ် ဘ်ု မာလုဝ်း ဒူင် ကွယ် ဇီဒိူက် ဇဝ်ဖြာ။

25 ပါယ် တီ ခုန်ဒီခမ် အာဒါဝိတ် ဘော ဂေ ဒူအီ အီ မုး ဒါ တာင် အီ အိုပ် အီ ယဲတ့် ဂေ ဒူအီ အီဆာရေလ ဘော ဂေ ဒါ တာင် အီ အိုပ် ဖိုင် ဒါ ဆိုက် အူ ဟြဲန့်၊ ဂေ ဘောကာဂ့လျီတ် ဘော ဟာဝ် ဒီ ကာင် အာအုဝ်ဘေန်အေဒူမ်၊ တဲး ဂေ ပွိုန် ဒီ ဟာဝ် ဒိုဝ်း တး ဇီဒိူက် ဇဝ်ဖြာ။ ဂေ မိူဝ် ဟဲ့ ခူယ်၊ ဟဲ့ ဒါခိုယ် ကာဆဝ်။ 26 ဇဝ်ဖြာ ဟဲ့ စွယ်၊ ဟဲ့ ကာဝေ ဂေ ဒူအီ အာမျုဝ် အာလေဝီ အီ ဟဲ့ ကာဂွတ် ဇီဒိူက် ဇဝ်ဖြာ တီ။ ခုဝ်၊ ဒူအီ ဂေ တီ မိူဝ် ဒိုဝ်း မာဘူ အာလူင့် ဂေ မက် အာလူင့် အူ မျုဝ် ဘူ ဒုဝ်၊ လှူ တဲး န့ ဘဲန် ပီ ဒီ လှူ ဂေ။ 27 အာဒါဝိတ် ဘော ဂေ ဒါ တာင် အီ တဝ်း မှုဝ် ဘော အာခေနာနီယာ အီ မုး ဒါ အီ အိုပ် ဂေ အီ တဝ်း မှုဝ် တီ၊ ဘော ဂေ ဒူအီ အာလေဝီ အီ ကာဂွတ် ဇီဒိူက် ဇဝ်ဖြာ တွိုန်၊ ဂေ ဘောကာဂ့လျီတ် ဟဲ့ စှိုပ် ဒီ တာ ခြိုင် ဘိက် ကာတမ် လုယ်။ အီ မုး အာဒါဝိတ်၊ အန် ဟဲ့ ဝီ စှိုပ် ဘော ဆီတုဝ် အေဖူတ် အီ မုး ဘိက် ကာတမ် လုယ်။ 28 ပါယ် တီ ခဲ့ ကွယ် ဂေ ဒူအီ အီဆာရေလ ဘောကာဂ့လျီတ်၊ ဂေ ဘော ခူယ် ဒါခိုယ် ဘော တဝ်း မှုဝ် တာင် တာင်။ ဂေ ဘော ဘုတ် နိုင် ပဲ၊ ဘုတ် ဝဝ်၊ စှုဝ်း စှဲန့်၊ ဘး ဒိင်၊ ကြိတ် ဘော ဒိင် ဒီရဝ် ဟာဝ် ဒူပ် ဇီဒိူက် ဇဝ်ဖြာ တွိုန်၊ ဝီ တး ဒီ မိူင် ယေရူဆာလဲမ်။

29 ဒေါ တး လိုပ် ဂေ ခဲင် မိူင် အာဒါဝိတ်၊ နာင် မီခါလ အီ မုး ဂွန် အာဆောလူ တွိုန်၊ အန် ဝီ ကွယ် ဒီ ဘာင် ကာဒဝ် ပါတဲင်၊ ဝီ ယိုဝ် ခုန်ဒီခမ် အာဒါဝိတ် ဟဲ့ ဂါ ဟဲ့ ခူယ် ကာဆဝ် ပါယ် တီ။ ခဲင် နဝ်း အန်၊ အန် ထာင် ပီ ဘူင် ခုန်ဒီခမ် ဟဲ့ မွှိုမ် ကာအိး။