1 အာဒါဝိတ် ဟဲ့ ဟွတ့် ဘဲန် ခုန်ဒီခမ်။ ဝါယ် အန် တီ အာဟီရမ် အီ မုး ခုန်ဒီခမ် အီ အိုပ် မိူင် ထူရုဝ် ဘော စ်ု ဒါလာမ် အန် ဟာဝ် ဒူင် ကွယ် အာဒါဝိတ်၊ တဲး ဂေ ဒိုဝ်း တး ဘော ဟေ အာရိတ်၊ တဲး ဘော လက်ဆာမာ ဂေ အီ နပ် ဒီ ဂုဝ် မာအုတ် ဘူင် တိုက် ဟာဝ် ဒူပ် ဂေ၊ တဲး ဂေ ဘူင် ဟုဝ် ဒူင် ကွယ် အာဒါဝိတ်။ 2 ပါယ် တီ အာဒါဝိတ် မိူဝ် ဟဲ့ နပ်၊ ဇဝ်ဖြာ ဟဲ့ တဲး အန် ဘဲန် ခုန်ဒီခမ် အီ အိုပ် ဆီချာ ဒူအီ အီဆာရေလ။ အန် ဇဝ် မိူဝ် ဟဲ့ တဲး မာန် မိူင် အန် မန် ဆီချာ ကူပ် မုး ဂေ ဒူအီ အီဆာရေလ ဒူအီ ပီ အိုပ် အန်။

3 ခဲင် မိူင် ယေရူဆာလဲမ် တီ အာဒါဝိတ် ဝီ ဒိုဝ်း အီဘိုန့် ပေါ မ့ပွါ၊ တဲး အန် ဝီ မိုဝ်း ဘော ဂွန် အီဘိုန့် ဘော ဂွန် အီမာယ်။ 4 ဂွန် အန် အီ ဂွိုတ် ခဲင် မိူင် ယေရူဆာလဲမ် တီ ဂေ ဘော စိူဝ် အာဆာမူအာ၊ အာဆောဘာပ်၊ အာနာထာန်၊ အာဆာလုဝ်မုဝ်၊ 5 အာအီဘာရာ၊ အာအေလီဆူအာ၊ အာအေဘေလေတ်၊ 6 အာနောကာ၊ အာနေဖေက်၊ အာယာဖာ၊ 7 အာအေလီဆာမာ၊ အာဘေလေတ ဘော အာအေလီဖေလေတ်။

8 ဒေါ ယိုဝ် ဂေ ဒူအီ ဖီလီထီ လွင် အာဒါဝိတ် ဟဲ့ ခမ် ဒီ ဖဝ်း နာမန် ဒီ ဂိန့် အန်၊ ဘဲန် ခုန်ဒီခမ် အီ အိုပ် ဒူအီ အီဆာရေလ၊ ဂေ ဘော ရဲန် ဆိုက် ဘော ဟာဝ် ကာဂုဝ်း ဒီ အန်။ အာဒါဝိတ် မိူဝ် ဟာဝ် ညိူဝ် ဂေ။ 9 ဂေ ဒူအီ ဖီလီထီ ဟဲ့ ဟွတ့် တး လိုပ် ခဲင် ဒီလယ့် အီ စိူဝ် ရေဖိမ်။ 10 အာဒါဝိတ် မိူဝ် ဒီမွှတ် ဇဝ်ဖြာ တဝ်း၊ “မဲ တဲး အုဝ် ဟာဝ် ကာဂုဝ်း ဒီ ဒူအီ ဖီလီထီ ဂေ တီ။း မဲ ဇဝ် ဒီ တဲး အုဝ် အွင် အုဝ် ပဲ ဂေ။း” ဇဝ်ဖြာ ဝီ တဝ်း ဒီ အန်၊ “တဲး မဲ ဟာဝ် ကာဂုဝ်း ဒီ ဂေ။ အုဝ် ဒီ တဲး မဲ အွင်။”

11 အာဒါဝိတ် ဘော ဟာဝ် ဒီ မိူင် ဘာလဘေရာဆိမ်။ အန် ဘော ကာဂုဝ်း ဘော ပဲ ဂေ။ အန် တဝ်း၊ “ဇဝ်ဖြာ ဟဲ့ ယဲတ့် ဒီ အာတ့် အုဝ်၊ ဟဲ့ ပျာတ့် ရန်ဆူ အုဝ်၊ တဲး န့ ပီ အိုမ် တာင် ဟဲ့ တး ဘူင် တဲး န့ဂုဝ် ဆီဂ့လုး။” ပါယ် တီ ဂေ ဘော တဲး ဒူင် တီ စိူဝ် ဘာလဘေရာဆိမ်။^a 12 ဒေါ တဝ် ဒူအီ ဖီလီထီ ဂေ တီ၊ ဂေ ဘော ဝဲန် ဘော အာရိုပ် ရာင် ပီ ကြိုပ် ဂေ။ အာဒါဝိတ် ဝီ စ်ု ဂေ ဒူအီ အီ ဒူပ် အန်၊ တဲး ဂေ ဝီ ဒိုဝ်း ဒုဝ့် ဝဲန် တူတ့် ခဲင် ငဝ်။

13 အာဝ် ဘော လှေန့် ဒူအီ ဖီလီထီ ဟဲ့ ဝီ တး လိုပ် ခဲင် ဒီလယ့် ရေဖိမ် တွိုန်။ 14 အာဒါဝိတ် ပီ ဝီ ဒီမွှတ် ဇဝ်ဖြာ ပေါ အူ ဇေန့်။ ဇဝ်ဖြာ ဝီ တဝ်း ဒီ အန်၊ “မဲ ကွဲ့ ဟာဝ် ဆိူဝ် ဒူင် ချ ဂေ။ မဲ လုဝ် လဲပ် တး နာ ပန် ဂေ။ မဲ လုဝ် ဟာဝ် နာ ကွယ် ဟေ ကာပျြီး တွိုန်၊ တး ညိူဝ် ဂေ ဒီ တီ။ 15 မဲ ဟီ ယိုဝ် ဂြန့် ဒါ ဆိုက် ဒီ ကာဒဲ့ ဟေ ကာပျြီး တီ၊ တဲး မဲ ဟာဝ် ကာဂုဝ်း အူ ဇေန့်၊ န့ တဲး မဲ နပ်၊ အုဝ် ဟဲ့ ယဲတ့် မဲ၊ တဲး မဲ ပွိုန် ဒီ ကာဂုဝ်း ပဲ ဒါ ဆိုက် ဒူအီ ဖီလီထီ တီ။” 16 အာဒါဝိတ် မိူဝ် ဘူင် ဒူပ် ပီ ကာလာင် ဇဝ်ဖြာ ဒီ အန်။ အန် ဘော ခုင်ခြး ဒူအီ ဖီလီထီ၊ စုး ဒီ မိူင် ကီပွင် ကော ဝီ ဟာဝ် ဇမ် ဒီ မိူင် ကေစာ။ 17 လွင် ပီ ဘူင် အာဒါဝိတ် တီ၊ န့ ဘော လိုဝ်း ဟာဝ် ဒွန် နာ ဒွန် ပ့လုဝ့်။ ဇဝ်ဖြာ ဘူင် တဲး ဒူအီ ဒွန် မျုဝ် ယုဝ် အန်။