1 အာဒါဝိတ် ဘော ကာမွုန် ဆင်ချာင် ဒီ ဂေ ဒါ ဘုဝ် အန် အီ အိုပ် ဒါ ဆိုက် ဘဲန် ဟြဲန့် ဘဲန် မာယဝ်း။ 2 ဟဲ့ ဟွတ့် အန် မိူဝ် ကာလာင် ဒီ ဂေ ဒူအီ အီဆာရေလ ဘောကာဂ့လျီတ် တဝ်း၊ “ဆေ ဘေ ဖြူမ်၊ ဆေ ဇဝ်ဖြာ အီ မုး ဇဝ်ဖြာ ပီ ကြိုပ် အေ ဘော အိုင်၊ တဲး အေ စ်ု ဒါလာမ် ဟာဝ် ကာလာင် ဒီ ဂေ ဘီနွင် အေ အီ ကွယ် ဒွန် နာ ဒွန် ပ့လုဝ့် ခဲင် မိူင် အီဆာရေလ၊ ကာလာင် ဘော ဒီ ဂေ ဒါ အီ လှူ ဒီ ဇဝ်ဖြာ ဘော ဒီ ဂေ ဒူအီ ခြိုဝ် အာလေဝီ အီ ကွယ် ခဲင် ရဝ် ခဲင် မိူင် ဒူပ် ဂေ ဒူအီ တီ၊ တဲး ဂေ ဘောကာဂ့လျီတ် တး ကာဇု ကာဒိုမ် ဒူပ် အေ။ 3 ဟဲ့ ဟွတ့် တဲး အေ ဝီ ဟာဝ် ဒိုဝ်း တး ဇီဒိူက် ဇဝ်ဖြာ ဒူင် ကွယ် အေ နီ။ ခုဝ်၊ ဒေါ မုး စုဝ် ဘာန် ခုန်ဒီခမ် အာဆောလူ တွိုန်၊ အာဝ် မိုဝ်း အာဆေ အီ ညိုင်ရာင် ယိုဝ် လွင် အန် တီ။” 4 ပါယ် တီ ခဲ့ ကွယ် ဂေ ဒူအီ ဘောကာဂ့လျီတ် ဘော ခူယ် ဒါခိုယ် ကာဆဝ် ဒေါ ယိုဝ် ဂေ ဂြုဝ်း တီ။ ခုဝ်၊ ဂေ ထာင် ဟဲ့ မုး ဟဲ့ မှာန်။

5 စုး ဒီ အိုမ် ဘ့လဲင် ဆီဟုဝ်ရာ အီ ကွယ် ဒီ ကာအုန် ကာဒါယ် မိူင် အဲဂိုပ် ကော ဝီ ဟုဝ့် ဇမ် ဒီ မိူင် လေဘုဝ်ဟာမာတ် အာဒါဝိတ် မိူဝ် တဲး ဒူအီ အီဆာရေလ ဘောကာဂ့လျီတ် တး ကာဇု၊ တဲး ဂေ ဟာဝ် ဒိုဝ်း ဇီဒိူက် ဇဝ်ဖြာ အီ ကွယ် ဒီ မိူင် ကီရီယာတ်ယာရိမ်၊ တဲး အန် ဝီ တး ဒီ မိူင် ယေရူဆာလဲမ်။ 6 အာဒါဝိတ် ဘော ဂေ ဒူအီ အီဆာရေလ ဘောကာဂ့လျီတ် ဂေ ဘော ဟာဝ် ဒီ မိူင် ဘာအာလာ အီ စိူဝ် ဘော မိူင် ကီရီယာတ်ယာရိမ် အီ ကွယ် ခဲင် ကာဒါယ် မိူင် ယူဒါ။ ဂေ တဝ်း ဒီ ဟာဝ် ဒိုဝ်း ဇီဒိူက် ဇဝ်ဖြာ။ န့ မုး ဇဝ်ဖြာ အီ ဟဲ့ တဲး အီ နပ် စိူဝ် အန်၊ အီ ကွယ် ဒီ ကာတဲ အာရိုပ် အာမူ အာမာတ် အန် ဇဝ် အီ စိူဝ် ခေရုပ်။

7 ဂေ မိူဝ် ဒိုဝ်း လေး ဇီဒိူက် ဇဝ်ဖြာ တီ ခဲင် ကာင် အာဖီနာဒါပ်၊ ဝီ ဒါင် ဒဲင် လက်လဝ် ကာမာယ်။ အာအူဇာဟာ ဂါယ် အာဟီအော ဘော ဘဲန် အီ ဝဲတ် လက်လဝ် တီ။ 8 အာဒါဝိတ် ဂေ ဒူအီ အီဆာရေလ ဘောကာဂ့လျီတ် မိူဝ် ဂါ ခဲ့ ဆီ နပ် ဂေ ဒီ ဂါ ဘော တဝ်း မှုဝ် အီ အိူပ် မျုက် ဇဝ်ဖြာ။ ဂေ ဘော က်ု မျုဝ် အီ ဟမ် ကျဝ် ဘဲန် မျုဝ် ဘဲန် မျုဝ် အီ မုး ဒိင်၊ ဒိင် ဒီရဝ်၊ ဂြိုင်၊ စှဲန့် ဘော ဝဝ်။

9 ဒေါ တး ဇမ် ဂေ ဒီ အူင့် ကာင်နဝ်း အီ စိူဝ် ခီဒူန်၊ မာမက် ဘော ဒီပ့လာတ်။ အာအူဇာဟာ တွိုန် ဘော တာ ပါ ဇီဒိူက် ဇဝ်ဖြာ တီ။ 10 ပန် တီ ဇဝ်ဖြာ ဘော ရူ ဒီ အာအူဇာဟာ တွိုန်။ ဇဝ်ဖြာ ဘော ဒမ် မှာပ် ဒီ အန် ကူပ် ဟဲ့ ပါ အန် ဇီဒိူက် ဇဝ်ဖြာ။ အန် ဘော ယမ် ဒီ တီ အူ ဇေန့်။

11 ပါယ် တီ ဂေ ဘော တဲး ဒူင် တီ စိူဝ် ဖေရေတ်အာအူဇာဟာ ကော ဇမ် အာတိုဝ် နီ။ အာဒါဝိတ် မိူဝ် အာဝ် ဟူ ဒါခိုယ် ကူပ် ဟဲ့ တဲး ဇဝ်ဖြာ အာအူဇာဟာ ယမ်။

12 ဆီငဲ တီ အာဒါဝိတ် ဘော ယုဝ် ဇဝ်ဖြာ တဝ်း၊ “မှဝ် အုဝ် ဒီ ပါယ် ဒီ ဒိုဝ်း တး ဇီဒိူက် ဇဝ်ဖြာ ဒူင် ကွယ် အုဝ်။း” 13 ပါယ် တီ အာဒါဝိတ် အာဝ် ဟူ ဝီ ဒိုဝ်း တး ဇီဒိူက် ဇဝ်ဖြာ ဒူင် ကွယ် အန် ဒီ မိူင် ယေရူဆာလဲမ်။ အန် ဘော ဝီ ဝး ဟာဝ် ဒီ ကာင် အာအုဝ်ဘေန်အေဒူမ် အီ မုး ဒူအီ အာမျုဝ် ကိတ်တီ။ 14 ဂေ ဘော အုန် ဇီဒိူက် ဇဝ်ဖြာ ဒီ တီ အာဒါ အူယ် မာဂျီန်။ ဇဝ်ဖြာ ဘော ဝီ မွင့်ကာရာ ဒွါ ဒီ န့ဟူမ် အာအုဝ်ဘေန်အေဒူမ် ဘော ခဲ့ မိုဝ်း အန် ဒွန် မျုဝ်။