1 ဒေါ တဝ် ဝး အာဒါဝိတ် ဒီ အာဆောလူ၊ ဝီ ဟာဝ် ကွယ် ခဲင် မိူင် ဇီကာလာတ် တွိုန်၊ ဂေ ဒါ ဆိုက် မင် အီ ဝီ တး ကွယ် ဒူပ် အာဒါဝိတ် ဘော စွယ် အန်။ 2 ဒူအီ ဂေ တီ ဘော မုး ဒူအီ ခြိုဝ် အာဘေန်ယာမ် အီ မုး ဘီနွင် ခြိုဝ် အာဆောလူ တွိုန်။ ဂေ ဘော မုး ဒူအီ အီ ဟဲ့ လှဲဝ် ဒီ ဘန့် အ ဘော အာပိူ့၊ တာ ဒဲ ဂေ ဘော ဘ့လာက် အာဂ ဘ့လာက် အာအး။

3 ဒါ ဘုဝ် အီ အိုပ် ဂေ ဘော မုး အာဟေစာ ဘော အာယုဝ်အာတ် အီ မုး ဂွန် အာဆေမာအာ။ ဂါယ် တီ ဘော မုး ဒူအီ အာမျုဝ် ဂီဘီယာ။ န့ မုး ဘော အာယေဆီအေန် ဂါယ် အာဘေလိတ် အီ မုး ဂွန် အာဇာမာဝိတ်၊ အာဘီရာခါ ဘော အာယေဟူ အီ မုး အာမျုဝ် အာနာထူတ်။ 4 န့ မုး ဘော အာအီဆာမာယာ အီ တး မိူင် ကီပွင်၊ အန် ဘော မုး ဒါ ဆိုက် အီ ဘာ့ ခဲင် အူယ် ဂိုဝ် ဝီ တွိုန်။ အန် ဘော အိုပ် ဂေ အူယ် ဂိုဝ် ဝီ တွိုန်။ န့ မုး ဘော အာယေရေမီ၊ အာယာဟာဇေလာ၊ အာယောဟာနန် ဘော အာယောစာဘာတ် အီ တး မိူင် ကေတာရာ။ 5 န့ မုး ဘော အာအေလူစေ၊ အာယေရီမုတ်၊ အာဘေလာန်၊ အာဆေမာရီ ဘော အာဆေဖာဒီ အီ မုး အာမျုဝ် ဟာရူဖိတ်၊ 6 ဘော အာအေန်ခါနာ၊ အာအီဆီယာ၊ အာစာရေန်၊ အာယောစာ ဘော အာယာဆုဝ်ဘာမ်၊ ဂေ မုး ဒူအီ အာမျုဝ် အာခုဝ်ရာ။ 7 အာယုဝ်လာ ဘော အာဇေဘာဒီ အီ မုး ဂွန် အာယေရုဝ်ဟမ် အီ တး မိူင် ကေတော တွိုန်။

8 ဘော ဂေ ဒူအီ ခဲင် ခြိုဝ် အာဂတ် မင် အီ၊ ဂေ ဟဲ့ ဝီ တး ဖြူမ် ရိုမ် ဒူပ် အာဒါဝိတ် ဒေါ ကွယ် အန် ခဲင် ဒူင် ချြီင် ခဲင် ပြဲ ကာဟဝ်း။ ဒူအီ ဂေ တီ၊ ဂေ တူ ယုဝ် ဘော ဖြူမ် ဒီ ကာဂုဝ်း ဆေဆေ။ ဂေ မိူဝ် ကျ ဒီ တာ မင် ဂွင့် ဘော ဘ့လာ လျီး။ နာ ဂေ ဘော ပီ မာခြင်ဆီ။ ဂေ ဘော ခြန် ပီ မာဇ အီ ကွယ် ဒီ နွန်။

9 ဂေ အီ ဘဲန် ဂိန့် ဆိုက် တာင်၊ ဂေ ဟဲ့ လာယ် ဒါမ် ဒူပ် အာယာ ဂေ ပါယ် နီ။ အီ ယဲတ့် ဂေ ဝီ ဒေါ ဂုဝ် ဘော မုး အာအေဇေန်။ အာအောဘာဒီ ဘော မုး ဝီ ဟာအာ။ အာအေလီအာပ် ဘော မုး ဝီ ဟာအူယ်။

10 အာမီဆာမာန် ဘော မုး ဝီ မ့ဖွုန်။ အာယေရေမီ ဘော မုး ဝီ မ့ဖန်။

11 အာထယ် ဘော မုး ဝီ န့ဒဝ်။ အာအေလီအေန် ဝီ မ့ဘူ။

12 အာယောဟာနန် ဝီ န့ဒါ။ အာအေစာဘာတ် ဝီ န့ဒိမ်။

13 အာယေရေမီ ဘော မုး ဝီ ဂိုဝ် ဘော အာမာခါဘာန် ဝီ ဂိုဝ် ဒီ လှေး။

14 ဒူအီ ဂေ နီ၊ ဂေ မုး တူတ့် ဒူအီ ခဲင် ခြိုဝ် အာဂတ် အီ အိုပ် ဒါ ဆိုက်။ ဝီ အီ တာင် ဆိူတ် ဒေါ ဂုဝ်၊ အန် နပ် ဒီ ပဲ ဒါ ဆိုက် အူ ဟြဲန့် ဝီ။ ဝီ ဒီ ကာဒဲ့ ဆိူတ် ဘော နပ် ဒီ ပဲ အူ မာယဝ်း ဝီ။ 15 န့ မုး ဒူအီ ဂေ တီ အီ ကာလုဝ်း ဘ့လဲင် ယောဒါန် ဒေါ မုး မာဂျီန် ဒေါ ဂုဝ်။ န့ မုး အာခြာဝ် ဒေါ တာင် အိုမ် ပြဲ့ ခဲင် ဘ့လဲင် ယောဒါန်။ ဒေါ အန် တီ အိုမ် ဟဲ့ မ့ပုန် ဘာင် ဘ့လဲင် တီ ဘောကာဂ့လျီတ်။ ဒူအီ ဂေ တီ မိူဝ် ဟဲ့ ဟာဝ် ညွန် တဝ် ဂေ ဒူအီ အီ ကွယ် ခဲင် ဒီလယ့် ဘာင် ဘ့လဲင် တီ၊ တဲး ဂေ အီ ကွယ် နာ လေး ဆီငဲ ဘော နာ ဂေတ့် ဆီငဲ ကာစှူတ့် တဝ် ဟာဝ်။

16 ဘော ဂေ ဒူအီ ခဲင် ခြိုဝ် အာဘေန်ယာမ် မင် အီ ဘော ဒူအီ ခဲင် ခြိုဝ် အာယူဒါ မင် အီ၊ ဂေ တး ဒူင် ချြီင် အာဒါဝိတ်။ 17 အာဒါဝိတ် မိူဝ် လေး ရွုး ဂေ ဘော ကာလာင် ဒီ ဂေ တဝ်း၊ “ဆေ ဘေ တး ပီ ဂိုက်၊ တး စွယ် တး ဂမ် အုဝ်၊ အုဝ် မိူဝ် ဒီ ရွုး ဘေ။ တး၊ တဲး ဘေ ဖြူမ် ဘ့လာက် အုဝ်။ မာလဲ၊ ဆေ ဘေ ယီ တး ဟြေတ့် ပီ ဒီ ပါယ် ဒီ ဒိုဝ်း အာပ် အုဝ် ဒီ ရန်ဆူ အုဝ် ဒေါ တူ မိုဝ်း အုဝ် ဒီ ဘူင် မှာပ်၊ တဲး ဇဝ်ဖြာ ပီ ကြိုပ် ဂေ ဂုန့် ဒင် အေ ယိုဝ် လွင် အန် တီ ဘော ဒမ် မှာပ် ဒီ ဘေ။”

18 နဝ်း ဖွိုမ် ဇဝ်ဖြာ ဘော တး လိုပ် ခဲင် နဝ်း အာမာဆေ ဝီ အီ မုး ဒါ တာင် ဂေ ဒူအီ အူယ် ဂိုဝ် ဝီ တွိုန်။ အန် ဝီ တဝ်း၊ “အိုယ် အာဒါဝိတ်၊ ယေ ဘော မုး ဒူအီ ပီ အိုပ် မဲ။ အိုယ် မဲ ဂွန် အာယေဆေ၊ ယေ ဟဲ့ တး ကွယ် ရိုမ် ဒူပ် မဲ။ တဲး မဲ ဒါခိုယ် ဂျာမ်ဆာ။ ဘော ဂေ အီ ကွယ် ရိုမ် ဒူပ် မဲ ဘော ဂေ အီ စွယ် မဲ၊ တဲး ဂေ ဒါခိုယ် ဂျာမ်ဆာ ပါယ် တီ။ ခုဝ်၊ ဇဝ်ဖြာ ဒီ စွယ် မဲ။” ဟဲ့ ဟွတ့်၊ အာဒါဝိတ် မိူဝ် ဝီ ရွုး ဂေ။ အန် မိူဝ် တဲး ဂေ ဘဲန် ဂိန့် ဆိုက် ခဲင် ဖိုင် ဒါ ဆိုက် အန်။

19 ဒူအီ ခဲင် ခြိုဝ် အာမာနာဆေ မင် အီ ဘော တဝ် တး လိုပ် အာဒါဝိတ် ဒေါ ရဲန် အန် ဆိုက်၊ တဝ်း ဒီ ကာဂုဝ်း ဒူပ် ဂေ ဒူအီ ဖီလီထီ ဟာဝ် ကာဂုဝ်း ဒီ အာဆောလူ။ မာလဲ၊ အာဒါဝိတ် တူ ဝီ ကာဒုး ဒီ စွယ် ဒူအီ ဖီလီထီ ဂေ တီ။ ခုဝ်၊ ခုန်ဒီခမ် ဒူအီ ဖီလီထီ ဂေ တီ ယုဝ် အာဒါဝိတ် ဝီ ဟာဝ် အာပ် ဘော ဂေ ဒီ အာဆောလူ အီ မုး ဒါ ကာညာ အန်။ 20 ဒါ ဆိုက် ဂေ ဒူအီ အာမာနာဆေ အီ ဟာဝ် ကွယ် ဘ့လာက် အာဒါဝိတ် ဒေါ ဝီ ဝေန့် အန် ဒီ မိူင် ဇီကာလာတ်၊ န့ ဘော မုး အာတာနာဟာ၊ အာယောစာဘာတ်၊ အာယီတာယေန်၊ အာမီခီလာ၊ အာယောစာဘာတ်၊ အာအေလီဟူ ဘော အာဇီလာဆေ။ ဂေ ဒါ ဆိုက် တီ ဒွန် ဝီ ဟဲ့ အိုပ် ဒါ ဆိုက် အာမာနာဆေ အာဒါ အူ ဟြဲန့် ဝီ။ 21 ဂေ ဘော စွယ် အာဒါဝိတ် ကာဂုဝ်း ဒီ ဒါ ဇူန်။ ခုဝ်၊ ဂေ ဘောကာဂ့လျီတ် မုး ဒါ ဆိုက် အီ ယ ဒီ ကာဂုဝ်း ဘော ဘဲန် ဒါ ဘုဝ် တာင် အီ အိုပ် ဒါ ဆိုက် အာဒါဝိတ်။ 22 ဒွန် ဆီငဲ ဒွန် ဆီငဲ၊ န့ ဘော မိုဝ်း ဒူအီ တး လိုပ် အာဒါဝိတ်။ န့ ဘော တဲး ဒါ ဆိုက် အန် ကြဲ ဒီ ကိူန် ကာဆဝ် ပီ ဒါ ဆိုက် ပီ အိုပ် ဇဝ်ဖြာ။

23 ဒေါ ကွယ် အာဒါဝိတ် ခဲင် မိူင် ဟေဘြုဝ် တွိုန်၊ န့ ဘော မိုဝ်း ဒါ ဆိုက် ကိူန် ကာဆဝ် အီ ဟဲ့ ဖြူမ် ဒီ ကာဂုဝ်း။ ဂေ ဟဲ့ တး ကွယ် ဒူပ် အာဒါဝိတ်၊ တဲး ဂေ ပွိုန် ဒီ စွယ် အန်၊ တဲး အန် ပွိုန် ဒီ ဝီ ပ့လု အာဆောလူ။ ပါယ် တီ န့ ဘော ဒူပ် ကာဒိက် ဆတ်ဇာ ပီ ဒွိုမ် ကာလာင် အုန် ဇဝ်ဖြာ။ ဇာရာင် ဒူအီ ဂေ တီ ဘော ပါယ် နီ။

24 ဒူအီ ခဲင် ခြိုဝ် ယူဒါ အီ ဟဲ့ ပွိုန် ဂူင့် မင် ဂွင့် ဘော ဘ့လာ လျီး ဘော တာ ခြိုင် ကာဂုဝ်း၊ ဂေ ကွယ် ဒဝ် ဟြဲန့် ဒီ ဒါ မာယဝ်း ဝီ။

25 ဒါ ဆိုက် ခဲင် ခြိုဝ် အာဆီမေအူန် အီ ဟဲ့ ဖြူမ် ဒီ ကာဂုဝ်း၊ ဂေ ကွယ် ဘူ ဟြဲန့် ဒီ အူ မာယဝ်း ဝီ။

26 ဒူအီ ခဲင် ခြိုဝ် အာလေဝီ မိုဝ်း ဖွုန် ဟြဲန့် ဒီ ဒဝ် မာယဝ်း ဝီ။ 27 န့ ဘော ဘာ့ အာယေဟောယာဒါ အီ မုး ဒါ တာင် ခဲင် အာမျုဝ် အာရူန်။ အန် ဘော မိုဝ်း အီ ဒူပ် အန် အာဒါ အူယ် ဟြဲန့် ဒီ ဘူ မာယဝ်း ဝီ။ 28 န့ မုး ဘော အာဇာဒူက် ဂေ ဒါ ဆိုက် အီ ကျ ဒီ ကာဂုဝ်း၊ အီ မုး ဒါ အီ ယဲတ့် အီ ဟဝ် ခဲင် န့ကြိုဝ်း ဂေ၊ ဂေ ကွယ် အာ ဂိုဝ် ဒီ အာ ဝီ။

29 ဒူအီ ခဲင် ခြိုဝ် အာဘေန်ယာမ် အီ မုး န့ကြိုဝ်း အာဆောလူ တွိုန်၊ ဂေ ကွယ် အူယ် ဟြဲန့် ဝီ။ မာလဲ၊ ဂေ ကိူန် ဟဲ့ ကွယ် ဘ့လာက် အာဆောလူ။

30 ဒူအီ ခဲင် ခြိုဝ် အာအေဖာရိမ် အီ မိုဝ်း ဆာရေ တာင် ခဲင် ခြိုဝ် ဂေ၊ ဂေ မိုဝ်း အာ မှိုန့် ဒီ ဒါ မာယဝ်း ဝီ။

31 ဂေ ဒူအီ ခဲင် ခြိုဝ် အာမာနာဆေ အူ ကာတဲ၊ အီ မုး ဒူအီ ပီ ရဝ်း လေး ဂေ၊ တဲး ဂေ ဟာဝ် စုဝ့် အာဒါဝိတ် ဘဲန် ခုန်ဒီခမ် ဂေ၊ ဂေ ကွယ် အူ မှိုန့် ဒီ ဒါ ဟြဲန့် ဝီ။

32 ဂေ ဒူအီ ခဲင် ခြိုဝ် အာအီဆာခါ၊ ဂေ အီ မုး ဒါ တာင် အီ နပ် လွင် အာခြာဝ် ဒေါ အန် တီ၊ နပ် ဘော လွင် ဒူအီ အီဆာရေလ ဟဲ့ ကာအာပ် ဘူင် မာဆေ၊ ဂေ ကွယ် အာ မာယဝ်း ဝီ။ ဘော ဘီနွင် ဝေါဝဲ ပီ အိုပ် ဂေ ဟဲ့ ဒူပ် ဂေ။

33 ဂေ ဒူအီ ခဲင် ခြိုဝ် အာဇေဘူလူန် အီ ဟဲ့ လှဲဝ် ဒီ ကာဂုဝ်း ဘော အီ ဟဲ့ ဖြူမ် ဒီ ကာဂုဝ်း ဘော မိုဝ်း နဝ်း ဆိူဝ် နဝ်း မှာန် ဒီ စွယ် အာဒါဝိတ်၊ ဂေ ကွယ် ဖန် မှိုန့် ဝီ။

34 ဂေ ဒူအီ ခဲင် ခြိုဝ် အာနာပ်ထာလီ၊ အီ ဟဲ့ ဖြူမ် ဒီ ကာဂုဝ်း၊ ဂေ ကွယ် အူ ဟြဲန့် ဝီ။ န့ ဘော မိုဝ်း ဘော ဂေ ဒါ ဆိုက် အီ ဂူင့် မင် ဂွင့် ဂေ ဘ့လာ လျီး၊ ဂေ ကွယ် အူယ် မှိုန့် ဒီ ဘူ ဟြဲန့် ဝီ။

35 ဂေ ဒူအီ ခဲင် ခြိုဝ် အာဒါန်၊ အီ ဟဲ့ ဖြူမ် ဒီ ကာဂုဝ်း၊ ဂေ ကွယ် အာ မှိုန့် ဒီ ဒါ ဟြဲန့် ဒီ ဒဝ် မာယဝ်း ဝီ။

36 ဂေ ဒူအီ ခဲင် ခြိုဝ် အာဆေန် အီ ဟဲ့ ဟွတ့် ပွိုန် ကာဂုဝ်း၊ ဂေ ကွယ် ဖွုန် မှိုန့် ဝီ။

37 ဂေ ဒူအီ အီ ကွယ် ဘ့လာက် နာ လေး ဆီငဲ အိုမ် ဘ့လဲင် ယောဒါန်၊ အီ မုး ဒူအီ ခြိုဝ် အာရူဘေန်၊ ဒူအီ ခြိုဝ် အာဂတ် ဘော ခြိုဝ် အာမာနာဆေ အူ ကာတဲ၊ ဂေ ကွယ် အူ ဆဲန် ဒီ အာ မှိုန့် ဝီ။ ဒူအီ ဂေ တီ ဟဲ့ ဂူင့် ခြိုင် ကာဂုဝ်း ဒွန် မျုဝ်။

38 ဂေ ဒူအီ ဘောကာဂ့လျီတ် ဘော မိုဝ်း နဝ်း ဆီ စွယ် အာဒါဝိတ်။ ဒေါ တး ဂေ ဒီ မိူင် ဟေဘြုဝ် ဂေ ဟဲ့ ခတ် နဝ်း ဒီ တဲး ဂေ စုဝ့် မျုက် အာဒါဝိတ်၊ တဲး အန် ဘဲန် ခုန်ဒီခမ် အီ အိုပ် ဒူအီ အီဆာရေလ ဘောကာဂ့လျီတ်။ ဂေ ဒူအီ အီဆာရေလ အီ မုး ဒူအီ ရဝ် ဒူအီ ကာင်၊ ဂေ မိူဝ် ဟဲ့ ဘဲန် အူ နဝ်း၊ ဟဲ့ ဖြူမ် ဒီ စုဝ့် မျုက် အာဒါဝိတ် ပါယ် တီ။ 39 ဂေ ဒူအီ အီ ဟဲ့ တး ဒီ အာဒါဝိတ်၊ ဂေ မိူဝ် ကွယ် ဒူင် ကွယ် အာဒါဝိတ် ကော နုဝ့် အူယ် ဆီငဲ။ ဂေ မိူဝ် ဟူမ် ရိုမ် ဒျီင် ရိုမ်။ ခုဝ်၊ ဘီနွင် န့ကြိုဝ်း ဂေ ဟဲ့ ဟွတ့် ရဲန် ဒွါ ဒီ ဂေ။ 40 ဘော ဂေ အီ ကွယ် တူင့် အီ မုး ဒူအီ ခြိုဝ် အာအီဆာခါ၊ အာဇေဘူလူန် ဘော အာနာပ်ထာလီ၊ ဂေ မိူဝ် ဟဲ့ ဒါင် မာလာ၊ ဒါင် မင်ပြွင့် ကာဟာတ့်၊ ဒါင် မာလုဝ် ဂေ မာမက်၊ တဲး ဂေ တိုယ် ပီ ဒီ ဟူမ် ပီ ဒီ ဟာပ် ဒွန် မျုဝ်။ န့ ဘော မုး ခဝ်ချုင်၊ ဒီခ့လဲပ် ဘ့လေ ဒီပူ ဘော ဘ့လေ မာငုန်၊ အိုမ် မာငုန် ဘော နာမန်၊ ဘော မာမက် ဂေ မာဘူ။ ပါယ် တီ ဂေ မိုဝ်း ကိူန် ပီ ဒီ ဟူမ် ပီ ဒီ ဟာပ်။ ခုဝ်၊ ဂေ ဒူအီ အီဆာရေလ ဘော မာန် ဘော မိူင် ဟဲ့ မိုဝ်း နဝ်း အီ ဘျုဝ် ဒါခိုယ်။