1 ပန် တီ ခဲ့ ကွယ် ဒူအီ အီဆာရေလ၊ ဂေ ဘော ကာဖြူမ် ဒီ တး ဒူင် ကွယ် အာဒါဝိတ် ဒီ မိူင် ဟေဘြုဝ် တွိုန်။ ဂေ တဝ်း၊ “ယေ နီ၊ ယေ မုး ဘီနွင် ဝေါဝဲ မဲ။ 2 ဒေါ ဘဲန် အာဆောလူ ခုန်ဒီခမ် အီ အိုပ် ယေ၊ မဲ ယီ ဟဲ့ ယဲတ့် ဒါ ဆိုက် ယေ ဒူအီ အီဆာရေလ ဒေါ ကာဂုဝ်း ယေ ဒီ ရန်ဆူ ယေ။ ဇဝ်ဖြာ မိူဝ် ဟဲ့ တဝ်း ဒီ မဲ၊ ‘မဲ လုဝ် ယွတ် မဲန် ဒူအီ အုဝ် အီ မုး ဒူအီ အာမျုဝ် အီဆာရေလ။ မဲ ဒီ ဘော ဘဲန် ဒါ ကာညာ အီ အိုပ် ဂေ။’”

3 ပန် တီ ဝါယ် ဟဲ့ တး ဇမ် ဂေ ဒါ တာင် ဒူအီ အီဆာရေလ ဒူင် ကွယ် အာဒါဝိတ် ဒီ မိူင် ဟေဘြုဝ် တွိုန်၊ အန် ဘော ကာဆဲန့် ဒီ ဂေ၊ တဲး ဘော ဇဝ်ဖြာ ထူမ်။ ဂေ ဘော ကာဖြူမ် ဒီ ဖဝ်း နာမန် ဒီ ဂိန့် အာဒါဝိတ်၊ တဲး အန် ဘဲန် ခုန်ဒီခမ် အီ အိုပ် ဒူအီ အီဆာရေလ။ ပါယ် တီ န့ ဘော ဘဲန် တူတ့် ဒွန် မျုဝ် ခဲ့ ပီ ဘျ ဇဝ်ဖြာ ဒီ အာဆာမူအေန် တွိုန်။

4 အာဒါဝိတ် ဂေ ဒူအီ အီဆာရေလ ဘောကာဂ့လျီတ် ဘော ရဲန် ဒါ ဆိုက် ဂေ၊ ဟာဝ် ဒီ မိူင် ယေရူဆာလဲမ် အီ ဘော စိူဝ် မိူင် ယေဘုတ်။ န့ ဘော မုး ဒူင် ကွယ် ဘြိမ် ဂေ ဒူအီ ယေဘူဆိတ်။ 5 ဒူအီ ယေဘူဆိတ် တဝ်း ဒီ အာဒါဝိတ်၊ “မဲ တူ ပွိုန် လိုပ် ခဲင် မိူင် နီ။” မာလဲ၊ အာဒါဝိတ် ဘော ကာဂုဝ်း ဘော ပွိုန် ဒူင် ချြီင် ဒါ ဆိုက် ဂေ အီ စိူဝ် ဇီအူန်။ ဂေ ဘော တဲး ဒူင် တီ စိူဝ် မိူင် အာဒါဝိတ်။

6 အာဒါဝိတ် ဟဲ့ တဝ်း၊ “ဝီ အီ ယ ဟာဝ် ကာဂုဝ်း ဒီ ဒူအီ ယေဘူဆိတ် ဒီ အာတ့် အီ ဟဝ်၊ အန် ဒီ ပွိုန် ဒီ အိုပ် ဒါ ဆိုက် အုဝ်။” အာယောဖ အီ မုး ဂွန် နာင် စေရူယာ၊ အန် ဘော ဟာဝ် ဒီ အာတ့် အီ ဟဝ်။ ဟဲ့ ဟွတ့်၊ အန် ဘော ဘဲန် ဒါ အီ အိုပ် ဒါ ဆိုက်။

7 ပန် တီ အာဒါဝိတ် ဘော ဟာဝ် ကွယ် ဒူင် ချြီင် ဂေ ဒါ ဆိုက်။ ခုဝ်၊ ဂေ ဘော တဲး ဒူင် တီ စိူဝ် မိူင် အာဒါဝိတ်။ 8 အန် ဘော ဝီ မ့ပြာယ် မိူင် တီ၊ ဝီ ဘူင် န့ဂုဝ် စုး ဒီ ဘိူန် အန် ဘော ဆမ် ရဲင် မိူင်။ အာယောဖ ဘော ဝီ မ့ပြာယ် ဒူင် ဆီ ဂိတ် ဆီ ကွယ် ခဲင် မိူင် တီ။ 9 ပါယ် တီ ပွုန် ဘော အာဖုင် ဒင်ခုဝ် အာဒါဝိတ် ဘော ကြဲ ဒီ ကိူန်၊ ကြဲ ဒီ တာင်။ ခုဝ်၊ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကွယ် ရိုမ် ဒူပ် အန်။

10 အာနီ ဘော မုး ဇာရာင် ဒါ ဆိုက် အာဒါဝိတ် အီ ယဲတ့် ဂေ အီ ကျ ဒီ ကာဂုဝ်း။ ဘော ဂေ ဘော ဒူအီ အီဆာရေလ ဘောကာဂ့လျီတ် ဟဲ့ လာယ် ဖြူမ် ဒီ စွယ် အာဒါဝိတ်၊ တဲး အန် ဘဲန် ခုန်ဒီခမ် ဂေ အီ အိုပ် မိူင် ဂေ ဒွန် နာ ဒွန် ပ့လုဝ့်၊ တဲး န့ ဒူပ် ကာဒိက် ဆတ်ဇာ ပဲ့ ဟဲ့ ဒွါ ဇဝ်ဖြာ ဒီ ဂေ။ 11 ဂေ ဒါ ဆိုက် အာဒါဝိတ် အီ ကျ ဒီ ကာဂုဝ်း ဘော မုး အာယာဆုဝ်ဘာမ် အီ မုး ဒူအီ အာမျုဝ် အာဟက်မုဝ်နိတ်။ အန် ဘော မုး ဒါ တာင် အီ အိုပ် ဂေ အီ ကျ ဒီ ကာဂုဝ်း။ အန် ဟဲ့ ဒွိုမ် တာ ဘ့လာ လျီး အန်၊ ငဝ်း ယမ် ဒူအီ အူယ် မာယဝ်း ဝီ အူ ဇေန့်။

12 အီ ဒါမ် အန် ဘော မုး အာလေအာဆာ အီ မုး ဂွန် အာဒေါဒါ၊ အီ မုး ဘော အာမျုဝ် အာဟုဝ်ဟိတ်။ အန် ဘော ဘာ ခဲင် ဖိုင် ဂေ အူယ် ဝီ အီ ကျ ဒီ ကာဂုဝ်း။

13 အန် ဟဲ့ ကွယ် ဘ့လာက် အာဒါဝိတ် ဒေါ တး ဂေ ဒူအီ ဖီလီထီ ဒီ ဒူင် စိူဝ် ဘာဆာထာမိမ်။ ဒေါ အန် တီ ဂေ ဒူအီ အီဆာရေလ ဟဲ့ ဟွတ့် တဝ် ဟာဝ် ခဲင် ဒူင် နာ ဒူင် ဆမ် ဂေ ဆီဂူင့်ရာ။ 14 ဘော အန် ဘော ဂေ ဒူအီ အီ ဒူပ် အန်၊ ဂေ ကွယ် ခဲင် ဒူင် နာ တီ၊ ကာဂုဝ်း ဒီ ဂေ ဒူအီ ဖီလီထီ ဒီ တီ။ ဇဝ်ဖြာ မိူဝ် တဲး အန် အွင် ဒါ ဆိုက် ကိူန် ကာဆဝ်။

15 အာဒါ အူ ဆီငဲ၊ ဒါ တာင် အူယ် ဝီ အီ ကွယ် ခဲင် ဖိုင် ဂေ ဒါ တာင် အူယ် ဂိုဝ် ဝီ အီ အိုပ် အီ၊ ဂေ ဘော ဟာဝ် ဒူင် ကွယ် အာဒါဝိတ် ခဲင် ကာဒဝ် မာဝ် အီ စိူဝ် အာတူလမ် အီ ကွယ် ခူပ် မာဝ် တာင်။ ဒေါ အန် တီ ဂေ ဒူအီ ဖီလီထီ အူ ဖိုင် ဟဲ့ ချ ခူပ် ဒီလယ့် ဘ့လဲင် အိုမ် ရေဖိမ်။

16 အာဒါဝိတ် ယီ ကွယ် ခဲင် ဒူင် ချြီင် ဒါ ဆိုက် တွိုန်။ ဂေ ဒူအီ ဖီလီထီ အာဒါ အူ ဖိုင်၊ ဟဲ့ ကွယ် ခဲင် မိူင် ဘေတ်လဲမ်။ 17 အာဒါဝိတ် ယီ ဆီ ဒျီင် အိုမ်။ ခုဝ်၊ အန် တဝ်း၊ “တဲး ယီ နပ် ဒီ မိုဝ်း အီ တဝ့် တး အိုမ် ခဲင် အိုမ် ခိုမ် အီ ကွယ် ခူပ် မာလုဝ်း မိူင် ဘေတ်လဲမ် တွိုန်၊ တဲး အန် တး ဒွါ အုဝ် ဒျီင်။” 18 ပါယ် တီ ဂေ ဒါ ဘုဝ် အူယ် ဝီ တွိုန်၊ ဂေ ဘော ဟာဝ် ကာလုဝ်း ကာတဲ ဂေ ဒါ ဆိုက် ဒူအီ ဖီလီထီ။ ဂေ ဘော ဟာဝ် တဝ့် အိုမ် ခဲင် အိုမ် ခိုမ် ပီ အိုပ် ဒူအီ ဖီလီထီ အီ ကွယ် ခူပ် မာလုဝ်း မိူင် ဘေတ်လဲမ် တွိုန်၊ ဒိုဝ်း တး၊ ဒွါ ဒီ အာဒါဝိတ်။ မာလဲ၊ အာဒါဝိတ် ယီ တူ ဒျီင်။ အန် ဝီ ဟုး ဒဲင် ကာဒါယ် လှူ ဒီ ဇဝ်ဖြာ။ 19 အန် ဝီ တဝ်း၊ “ဇဝ်ဖြာ ဘော နပ်၊ အုဝ် တူ ပွိုန် ဒျီင် အိုမ် နီ ဒေါ မှဝ်။ ဆေ အာဝ် ပါယ် တီ န့ ပီ အုဝ် ဒျီင် နှာမ် ဂေ ဒူအီ အီ တူ လှယ့် အာဆာက် ဒုဝ် ဘြိမ် ဂေ။” ကူပ် န့ ပါယ် တီ အန် တူ ဒျီင်။ ပါယ် တီ ဂေ ဒါ ဘုဝ် အူယ် ဝီ အီ အိုပ် ဒါ ဆိုက် တွိုန်၊ ဂေ ဟဲ့ ပီယ ဂေ ဒီ ဘူင်။

20 အာဖီဆေ အီ မုး ဝါ အာယောဖ မုး ဒါ အီ အိုပ် ဂေ ဒါ ဘုဝ် အူယ် ဝီ တွိုန်။ အန် မိူဝ် ဟဲ့ တာ ဘ့လာ လျီး အန်၊ ကာဂုဝ်း ငဝ်း ယမ် ဒူအီ အူယ် မာယဝ်း ဝီ။ ခုဝ်၊ ဒွန် အီ ဝီ အိူပ် အန် ပီ ဂေ အိူပ် ဂေ အူယ် ဝီ တွိုန်။ 21 ပီ ဆ ဘာ အန် ခဲင် အူယ် ဝီ တွိုန်၊ အန် ဟဲ့ မိုဝ်း ဆာရေ လွှိုမ် ဂေ။ ခုဝ်၊ အန် ဘဲန် ဒူအီ အီ ယဲတ့် ဂေ။

22 အာဘီနာယာ အီ မုး ဂွန် အာယေဟောယာဒါ အီ တး မိူင် ကာဘာဇေလ အန် မုး ဒါ ဆိုက် အီ ယ ကာဂုဝ်း။ အန် ဟဲ့ ဒွိုမ် အွင် ဘဲန် ဇေန့် ဘဲန် ဇေန့်။ အန် ဟဲ့ ငဝ်း ဒူအီ အာမုဝ်အာပ် အာ ဝီ၊ အီ ကျ ဒီ ကာဂုဝ်း လွှိုမ် အီ ဟဝ်။ ဒဲင် တီ၊ ဒေါ ဟဲ့ စုဝ်း အိုမ် ဒါတ်၊ အန် ဟဲ့ ဒွိုမ် ဟာဝ် လိုပ် ခဲင် ကာဒဝ် ကာဒါယ် မှေတ့် မာခြင်ဆီ၊ ဝီ ငဝ်း ယမ်။ 23 ဒူအီ အဲဂိုပ် အူ ဝီ အီ တာင် စာ ဖန် ကာနိး မိူဝ်၊ အန် ဟဲ့ ငဝ်း ယမ်။ ဒူအီ အဲဂိုပ် တီ၊ ပီ ဘော ဟဲ့ ဂူင့် ဘ့လာ လျီး အီ တာင် ကာဆဝ် မိူဝ်၊ အီ မုး အာဘီနာယာ၊ အန် ဂူင့် မီ န့ကြွုန်၊ တဝ်း ဒီ ကာဂုဝ်း ဒီ ဒူအီ တီ။ အန် ဘော ဟာဝ် ဖာတ် ဒိုဝ်း ဘ့လာ လျီး ခဲင် ဒဲ ဒူအီ တီ၊ ဝီ ဆတ် ယမ် အန်။ 24 အာဘီနာယာ ဟဲ့ ဟွတ့် ဘူင် ပါယ် တီ ဂေ အိူပ် အန် တဲး န့ ပီ ဂေ ဟဲ့ အိူပ် အူယ် ဝီ အီ ကျ ကာဆဝ်၊ အန် ယီ မိုဝ်း ဆာရေ လွှိုမ် ဂေ။ 25 အန် ပီ ဘော ဟဲ့ မိုဝ်း ဆာရေ တာင် လွှိုမ် ဂေ ခဲင် ဖိုင် အူယ် ဂိုဝ် ဝီ တွိုန် မိူဝ်၊ အန် ယီ တူ ဘာ ခဲင် ဖိုင် ဂေ ဒါ ဘုဝ် အူယ် ဝီ တွိုန်။ အာဒါဝိတ် ဝီ တဲး အန် အိုပ် ဒါ ဆိုက် အီ ဘ်ု အာဆာက် အန်။

26 ဂေ ဒါ ဆိုက် အာဒါဝိတ် အီ ကျ ဒီ ကာဂုဝ်း ဘော မုး အာဆာဟေလ အီ မုး ဝါ အာယောဖ တွိုန်၊ အာအေဟာနန် အီ မုး ဂွန် အာတောတော အီ ကွယ် မိူင် ဘေတ်လဲမ်၊

27 အာဆာမူတ် အီ မုး ဒူအီ အာမျုဝ် ဟာရောရိတ်၊ အာဟေလေတ် အီ မုး ဒူအီ အာမျုဝ် ဘ့လေအနီ၊

28 အာအီရာ အီ မုး ဂွန် အာအီကေဆာ အီ ကွယ် မိူင် ဒေကော၊ အာဘီအေစာ အီ တး မိူင် အာနာထူတ်၊

29 အာဆီဘေခေ အီ မုး ဒူအီ အာမျုဝ် ဟူဆာ၊ အာအီလေ အီ မုး ဒူအီ အာမျုဝ် အာဟုဝ်ဟိတ်၊

30 အာမာဟာရေ အီ တး မိူင် နေတောဖာ၊ အာဟေလိတ် အီ မုး ဂွန် အာဘာအာနာ ဘော တး မိူင် နေတောဖာ၊

31 အာအီဒေ အီ မုး ဂွန် အာရီဘေ အီ တး မိူင် ဂီဘီယာ ခဲင် ကာဒါယ် ဂေ ဒူအီ အာမျုဝ် အာဘေန်ယာမ်၊ အာဘီနာယာ အီ မုး ဒူအီ အာမျုဝ် ဘီရာထူန်၊

32 အာဟူရေ အီ ကွယ် ဒူပ် ဒီလယ့် ဒူပ် ဘ့လဲင် ကာအာတ်၊ အာဘီအေလ အီ မုး ဒူအီ အာမျုဝ် အာဘာ၊

33 အာဇာမာဝိတ် အီ မုး ဒူအီ ဘာဟာရူမိတ်၊ အာအေလီအာဘာ အီ မုး ဒူအီ ဆာလာဘူန်၊

34 ဂေ ဂွန် အာဟာဆိမ် အီ မုး ဒူအီ ဂီဇုန်၊ အာယုဝ်နာထာန် အီ မုး ဂွန် အာဆာဂေ အီ မုး ဒူအီ ဟာရာ၊

35 အာဟီအာမ် အီ မုး ဂွန် အာဆာခါ အီ မုး ဒူအီ အာမျုဝ် ဟာရာ၊ အာအေလီဖာလ အီ မုး ဂွန် အာအူရ၊

36 အာဟေဖာ အီ မုး ဒူအီ အာမျုဝ် မေခီရာ၊ အာဟီယာ အီ မုး ဒူအီ အာမျုဝ် ဘ့လေအနီ၊

37 အာဟေစာရော အီ မုး ဒူအီ အာမျုဝ် ကာမေလ၊ အာနာရေ အီ မုး ဂွန် အာအေဇာဘေ၊

38 အာယုဝ်အေလ အီ မုး ဝါ အာနာထာန်၊ အာမီဘာဟာ အီ မုး ဂွန် အာဟာ​ကေရီ၊

39 အာဇေလိက် အီ မုး ဒူအီ အာမျုဝ် အမ်မူန်၊ အာနာဟာရေ အီ မုး ဒူအီ အာမျုဝ် ဘေရောထိတ် အီ ဂူင့် ခြိုင် ကာဂုဝ်း အာယောဖ အီ မုး ဂွန် နာင် စေရူယာ။

40 န့ မုး ဘော အာအီရာ ဘော အာကောရိပ် အီ မုး အာမျုဝ် အီထာရီ၊

41 အာအူရီယာ အီ မုး ဒူအီ အာမျုဝ် ဟေထိတ်၊ အာဇာဘာတ် အီ မုး ဂွန် အာဘာလေ၊

42 အာတီနာ အီ မုး ဂွန် အာဆီစာ။ ဝီ အီ ဘဲန် ဒါ တာင် အီ အိုပ် ခဲင် ခြိုဝ် အာရူဘေန်၊ အိုပ် ဘော ဒဲင် ဒါ ဆိုက် အန် ဂေ အူယ် ဂိုဝ် ဝီ၊

43 န့ မုး ဘော အာဟာနန် အီ မုး ဂွန် အာမာခါ၊ အာယုဝ်ဆာဖတ် အီ မုး အာမျုဝ် မီထီနိတ်၊

44 အာအူဇီယာ အီ မုး ဒူအီ အာမျုဝ် အာဆာတာရာ၊ အာဟာဆာမာ ဘော အာယေယီလာ အီ မုး ဂွန် အာဟုဝ်ဆာမ် အီ မုး ဒူအီ အာမျုဝ် အာရော။

45 အာယီတာယေန် ဘော အာယောဟာ အီ မုး ဂွန် အာဆီမာရီ ဘော ဒူအီ အာမျုဝ် တီစီ၊

46 အာအေလီအေန် အီ တး မိူင် မာဟာဝါ၊ အာယေရီဘေ ဘော အာယောဆာဝီ အီ မုး ဂွန် အာအေလာအမ်၊ အာအီဒေမာ အီ မုး ဒူအီ အာမျုဝ် မုဝ်အာပ်၊

47 အာအေလီအေန်၊ အာအုဝ်ဘေတ် ဘော အာယာဆေလ အီ မုး ဒူအီ အာမျုဝ် မေစောဘေတ်၊ ဂေ ဘောကာဂ့လျီတ် ဟဲ့ ဘဲန် ဒါ ဆိုက် အာဒါဝိတ် အီ ကျ ဒီ ကာဂုဝ်း။