ခါန် 10
လွင် ခုန်ဒီခမ် အာဆောလူ ယမ်
1 ဒေါ အန် တီ ဂေ ဒူအီ ဖီလီထီ ဟဲ့ တး ကာဂုဝ်း ဒီ ဂေ ဒူအီ အီဆာရေလ ဒီ နွန် ဂီလပေါ။ ဒီ တီ ဂေ ဒူအီ အီဆာရေလ မိူဝ် ဟဲ့ ယမ် ကိူန် ကာဆဝ်။ ဂေ အီ ဆီ ဂိတ် ဆီ ကွယ် ဂေ ဟဲ့ တဝ်။ 2 ဂေ ဒူအီ ဖီလီထီ ဘော ခုင်ခြး ဒူပ် အာဆောလူ ဂေ ဂွန် အန်။ ဂေ ဘော ဟာဝ် ခြပ် ဂေ ဘော ငဝ်း ယမ် အာယုဝ်နာထာန်၊ အာဖီနာဒါပ် ဘော အာမာလခီစှူဝါ။ 3 အာဆောလူ ဟဲ့ ကာဒုး ဒီ ကာဂုဝ်း ကာဆဝ် ဒီ ဂေ။ ဒေါ တး ချြီ့ ဂေ ဒီ အန်၊ ဘ့လာ အ ဂေ ရန်ဆူ အန် ဟဲ့ လဝ့် အန်။
4 အန် ဘော ကာလာင် ဒီ ဒူအီ အီ ဂူင့် ခြိုင် ကာဂုဝ်း အန် တဝ်း၊ “ထွတ် မာပွါ့ လာင် မဲ၊ ဘ့လုး အုဝ်။ ဆေ မဲ တူ ဘ့လုး၊ ဂေ ဒူအီ အီ တူ ဆွာ့ ဝဲန် ဟုန် လခါနာ အီမာယ်၊ ဂေ ဒီ တး ဘ့လုး၊ တဲး အုဝ် စှိုမ် ဆာရေ။” အန် ပီ ဘော ဟဲ့ တဝ်း ပါယ် တီ မိူဝ်၊ ဒူအီ အီ ဂူင့် ခြိုင် ကာဂုဝ်း အန် တွိုန် ယီ တူ ယ ဘူင် မာဆေ။ ခုဝ်၊ အာဆောလူ ဝီ ပီကေး ရာင် အန်၊ ဝီ ထိပ် ဒီ ကာဒဲ့ မာပွါ့ လာင် အန်၊ ဘော ယမ်။
5 ဒူအီ အီ ဂူင့် ခြိုင် ကာဂုဝ်း တွိုန်၊ အန် ဘော ယိုဝ် အာဆောလူ ဟဲ့ ဟွတ့် ယမ်၊ အန် မိူဝ် ဝီ ပီကေး ဘော အန် ဒီ ကာဒဲ့ မာပွါ့ လာင် အန်။ တဲး ဘော အန် ယမ် ဒူပ် အာဆောလူ။ 6 ပါယ် တီ အာဆောလူ ဂေ ဂွန် အီမာယ် အန် အူယ် ဝီ ဟဲ့ ဟွတ့် ယမ်။ ဘော ဂေ အီ ကွယ် ခဲင် န့ဟူမ် အန် ဘော ကာဒုး ဒီ ယမ်။
7 ဂေ ဒူအီ အီဆာရေလ အီ ကွယ် ဒူပ် ဒီလယ့် တွိုန်၊ ဂေ ဝီ ယိုဝ် လွင် ဒါ ဆိုက် ဂေ ဟဲ့ တဝ် ဘော အာဆောလူ ဂေ ဂွန် အီမာယ် အန် အူယ် ဝီ ဟဲ့ ဟွတ့် ယမ်၊ ဂေ မိူဝ် ဝီ တဝ် လေး ဝဲန် ရဝ် ကာင် ဘော မာန် မိူင် ဂေ။ ဒူအီ ဖီလီထီ ဂေ ဘော ဝီ တး ဒိုဝ်း ရဝ် ကာင် ဘော မာန် မိူင် ဂေ တီ။
8 ဘော ဇမ် ပါ ခဲညှာ ဂေ ဒူအီ ဖီလီထီ တး တဝ်း ဒီ ဝီ ဘုတ့် လေး ခြိုင် တာ ဒီ ဒုဝ် ဒူအီ ယမ် ဂေ တွိုန်။ ဂေ ဘော ဟာဝ် ယိုဝ် ဘော ဒုဝ် ယမ် အာဆောလူ ဂေ ဂွန် အီမာယ် အန် ဒီ နွန် ဂီလပေါ တွိုန်။ 9 ဂေ ဘော ဘုတ့် လေး ခြိုင် တာ အန်၊ ဒဲပ် လေး ဘော ဂိန့် အန်၊ ဒိုဝ်း ဘော ခြိုင် ကာဂုဝ်း အန်။ ဟဲ့ ဟွတ့်၊ ဂေ ဝီ တိုယ် ဒါလာမ် ဂေ ဟာဝ် ခဲင် မိူင် ဖီလီထီ ဒွန် နာ ဒွန် ပ့လုဝ့် တဲး ဂေ ပွိုန် ဒီ ကာလာင် လွင် အန် တီ၊ တဲး ဘော အာရိုပ် ဘော ဒူအီ ဘောကာဂ့လျီတ် ကော နပ် လွင် ဟဲ့ အွင် ဟဲ့ ပဲ ဂေ။ 10 ခြိုင် ကာဂုဝ်း အာဆောလူ ဂေ ဘော ဒိုဝ်း အုန် ခဲင် ဟုဝ် ပီ ကြိုပ် ဂေ အာရိုပ်။ ဂိန့် အန် တွိုန် ဂေ ဘော ဟွယ် အုန် ခဲင် ဟုဝ် ဇဝ် ဒါဂူန်။
11 ဒေါ အန် တီ ဂေ ဒူအီ ခဲင် မိူင် ယာဘေတ်ဂီလေအာတ် ဘော ယိုဝ် လွင် ဂေ ဒူအီ ဖီလီထီ ဟဲ့ ဘူင် ပါယ် တီ ဒီ ဒုဝ် အာဆောလူ၊ 12 ဂေ ဘော ဒဲ့ ဒူအီ ဂေ အီ ယ အီ တူ ယုဝ်၊ တဲး ဂေ လေး ဟာဝ် ဒိုဝ်း ဒုဝ် ယမ် အာဆောလူ ဘော ဂွန် အီမာယ် အန်၊ ဝီ တး ဒီ မိူင် ယာဘေတ် ဘော ဝီ ဒိပ် ဂေ ဒင် ဟေ နေဝ်။ ဟဲ့ ဟွတ့်၊ ဂေ ဘော ဝီ ယိူန် ပီ ဒီ ဟူမ် ကော နုဝ့် ဘူ ဆီငဲ။