1 ခဲ့ ကွယ် ဒူအီ အီဆာရေလ ဘောကာဂ့လျီတ်၊ ဟဲ့ ဒဲမ် အုန် စိူဝ် ဂေ ခဲင် ဇာရာင် ဘပ် ဘိူန် ခုန်ဒီခမ် ခဲင် မိူင် အီဆာရေလ။ ကူပ် မှာပ် ပီ ဘူင် ဂေ ဒူအီ အာယူဒါ၊ ဂေ ဟဲ့ ကာဒုး အီ မှေတ့် ဟာဝ် ဘဲန် မှာယ် အီ၊ ကွယ် ခဲင် မိူင် ဘာဘဲ။ 2 ဖိုင် ဂေ ဒူအီ အီဆာရေလ အီ ဟဲ့ ဝီ တး ကွယ် ခဲင် ကာဒါယ် ခဲင် မိူင် ဒူင် ကွယ် ဘြိမ် ဂေ၊ ဂေ စိူဝ် ပါယ် နီ။ ဂေ အီ တး ဒီ အာတ့် အီ တး ကွယ် ခဲင် ရဝ် ခဲင် ကာင် ဂေ၊ ဂေ မုး ဒါ အီ လှူ ဒီ ဇဝ်ဖြာ အီ မုး ဒူအီ ခြိုဝ် အာလေဝီ ဘော ဂေ ဒူအီ အီ ဘူင် ဂါန် ခဲင် ဟုဝ် ဇဝ်ဖြာ။

3 ဂေ ဒူအီ ခြိုဝ် အာယူဒါ၊ ခြိုဝ် အာဘေန်ယာမ်၊ ခြိုဝ် အာအေဖာရိမ် ဘော ခြိုဝ် အာမာနာဆေ အီ ကွယ် ခဲင် မိူင် ယေရူဆာလဲမ်၊ ဂေ စိူဝ် ပါယ် နီ။

4 လှုက်လှာန် အာဖေရေတ် အီ မုး ခြိုဝ် အာယူဒါ ဘော မုး အာအူဆေ အီ မုး ဂွန် အာမီဟုတ်။ အာမီဟုတ် မုး ဂွန် အာအုဝ်မာရီ။ အာအုဝ်မာရီ မုး ဂွန် အာအီမာရီ။ အာအီမာရီ မုး ဂွန် အာဘာနီ။

5 ခဲင် ဒူအီ အာမျုဝ် အာဆီလုဝ်နီ မိုဝ်း ဒူ အီ အီ စိူဝ် အာဆာယာ အီ မုး ဂွန် ဂိန့်။ အန် မိုဝ်း ဘော ဂွန် အီမာယ် မင် အီ။

6 ဂုန့် ဒင် ဂေ ဒူအီ အာမျုဝ် အာဇေန်ရာ မုး အာယေအူလာ။ ဒူအီ အာယူဒါ အီ ကွယ် ခဲင် မိူင် ယေရူဆာလဲမ် တီ၊ ဂေ ကွယ် ဒဝ် မာယဝ်း ဒီ ဒိမ် ဂိုဝ် ဝီ။

7 ခြိုဝ် ဂေ ဒူအီ အာဘေန်ယာမ် အီ ကွယ် ခဲင် မိူင် ယေရူဆာလဲမ် ဘော မုး အာဆာလာအူ အီ မုး ဂွန် အာမေဆူလမ်။ အာမေဆူလမ် ဝီ မုး ဂွန် အာဟုဝ်ဒါဝါ။ အာဟုဝ်ဒါဝါ ဝီ မုး ဂွန် အာဟာဆေနုဝ်။ 8 အာအေနေယာ မုး ဂွန် အာယေရုဝ်ဟမ်။ အာအေလာဟာ အီ မုး ဂွန် အာအောစီ ဘော လှာန် အာမီခါရီ။ န့ ဘော မုး ဘော အာမေဆူလမ် အီ မုး ဂွန် အာဆေဖာဒီ။ အာဆေဖာဒီ ဝီ မုး ဂွန် အာရေအူအေန်။ အာရေအူအေန် ဝီ မုး ဂွန် အာအေဘာနီယာ။ 9 ဂေ ဒူအီ ခြိုဝ် အာဘေန်ယာမ် ဘောကာဂ့လျီတ်၊ ဂေ ကွယ် ဒိမ် မာယဝ်း ဒီ ဖန် ဂိုဝ် ဒီ ဒဝ် ဝီ။ ဂေ အီ ဟဲ့ ဒဲမ် အုန် ခဲင် ဇာရာင်၊ ဂေ ဒွန် အီ မုး ဒါ တာင် အီ ယဲတ့် ခဲင် န့ကြိုဝ်း ဂေ။

10 ဖိုင် ဂေ ဒါ အီ လှူ ဒီ ဇဝ်ဖြာ ဘော မုး အာယီတာယာ၊ အာယေဟုဝ်ယာရိပ်၊ အာယာခိန်

11 ဘော အာဇာရီယာ အီ မုး ဂွန် အာဟီလာခီ။ အာဟီလာခီ မုး ဂွန် အာမေဆူလမ်၊ အာမေဆူလမ် မုး ဂွန် အာဇာဒူက်။ အာဇာဒူက် မုး ဂွန် အာမာရာယုတ်။ အာမာရာယုတ် မုး ဂွန် အာဟီတူပ်။ ဒူအီ ဂေ တီ မုး တူတ့် ဒါ တာင် အီ အိုပ် ဒွန် မျုဝ် ခဲင် ကာင် ဇဝ်ဖြာ။

12 အာတာယာ မုး ဂွန် အာယေရုဝ်ဟမ်။ အာယေရုဝ်ဟမ် မုး ဂွန် အာဘာဆူရာ။ အာဘာဆူရာ မုး ဂွန် အာမာလာခီယာ။ အာမာလာခီယာ မုး ဂွန် အာမာဆာယာ။ အာမာဆာယာ မုး ဂွန် အာဒီအေန်။ အာဒီအေန် ဝီ မုး ဂွန် အာယာဇေရာ။ အာယာဇေရာ ဝီ မုး ဂွန် အာမေဆူလမ်။ အာမေဆူလမ် ဝီ မုး ဂွန် အာမေဆီလာမိတ်။ အာမေဆီလာမိတ် ဝီ မုး ဂွန် အာအီမေရာ။

13 ဒါ အီ လှူ ဒီ ဇဝ်ဖြာ အီ မုး ဂုန့် ဒင် ခဲင် န့ကြိုဝ်း ဂေ တီ၊ ဂေ ကွယ် အူ ဟြဲန့် ဒီ ဘူ မာယဝ်း ဒီ ဒဝ် ဂိုဝ် ဝီ။ ခဲ့ ဘော မိုဝ်း ဂါန် ပီ လုဝ် ဘူင် ခဲင် ကာင် ဇဝ်ဖြာ၊ ဒူအီ ဂေ တီ ဟဲ့ အိုပ် တူတ့်။

14 ဒူအီ အာလေဝီ အီ ကွယ် ခဲင် မိူင် ယေရူဆာလဲမ် ဘော မုး အာဆေမာယာ အီ မုး ဂွန် အာဟာဆူပ်။ အာဟာဆူပ် မုး ဂွန် အာဇာရီကမ်။ အာဇာရီကမ် မုး ဂွန် အာဟာဆာဘီ အီ မုး ဒူအီ အာမျုဝ် အာမေန်ရာရီ။ 15 န့ မုး ဘော အာဘက်ဘာခါ၊ အာဟေရေတ်၊ အာကာလာန် ဘော အာမာထာနီ အီ မုး ဂွန် အာမီဂါ။ အာမီဂါ ဘော မုး ဂွန် အာဇီခါရီ။ အာဇီခါရီ ဘော မုး ဂွန် အာဆာပ်။ 16 န့ မုး ဘော အာအောဘာဒီ အီ မုး ဂွန် အာဆေမာယာ။ အာဆေမာယာ ဘော မုး ဂွန် အာကာလာန်။ အာကာလာန် ဘော မုး ဂွန် အာယေဒူထုန်။ န့ မိုဝ်း ဘော အာဘေရေက် အီ မုး ဂွန် အာဆာ။ အာဆာ ဘော မုး ဂွန် အာအေန်ခါနာ အီ ကွယ် ခဲင် ရဝ် ဂေ ဒူအီ အာမျုဝ် အာနေတောဖာ။

17 ဂေ အီ ဘ်ု မာလုဝ်း ခဲင် ကာင် ဇဝ်ဖြာ ဘော မုး အာဆာလူမ်၊ အာအေခူပ်၊ အာတာလာမူန်၊ အာဟီမာန် ဘော ဘီနွင် ဝေါဝဲ အန် အူ ဖိုင်။ အာဆာလူမ် ဘော ဘဲန် ဒါ ကာညာ အီ အိုပ် ဂေ။ 18 ကော ဇမ် ဒေါ တီ နီ ဂေ လုဝ် ဘ်ု မာလုဝ်း အီ ကွယ် ဘ့လာက် နာ လေး ဆီငဲ အီ မုး မာလုဝ်း ဒူင် လိုပ် ခုန်ဒီခမ် ဂေ။ ဂေ ဒူအီ ခဲင် ဖိုင် အာလေဝီ အီ ကာဒုး ဒီ ဘ်ု မာလုဝ်း တီ ဘော မုး 19 အာဆာလူမ် အီ မုး ဂွန် အာခုဝ်ရေ။ အာခုဝ်ရေ ဝီ မုး ဂွန် အာအေဘာဆာပ်။ အာအေဘာဆာပ် ဝီ မုး ဂွန် အာခုဝ်ရာ။ န့ မုး ဘော ဝေါဝဲ အန် အီ မုး အာမျုဝ် အာခုဝ်ရာတ် တွိုန်။ ဂေ လုဝ် ဘ်ု မာလုဝ်း ခဲင် ထိုပ် ဇဝ်ဖြာ အီ မုး ဒူင် ကွယ် ဇဝ်ဖြာ။ ဂေ လုဝ် ဘ်ု လုဝ် ယွတ် ဒူင် ကွယ် ဇဝ်ဖြာ တီ၊ တဲး န့ ကော ပီ ပဲ့ ဟဲ့ ဒွိုမ် ဘူင် ဒါ ဒါ ဂေ ဒေါ ဘ်ု ဂေ ထိုပ် ဘိက် ဘွတ် တွိုန်။ 20 ဒေါ မွိုန် အာတ့် နီ အာဖီနေဟာတ် အီ မုး ဂွန် အာလေအာဆာ ဟဲ့ ဘဲန် ဒါ တာင် ဂေ ဒူအီ အီ ဘ်ု မာလုဝ်း။ ဇဝ်ဖြာ မိူဝ် ကွယ် ရိုမ် ဒူပ် အန်။ 21 န့ ဘော မုး အာဆာခါရာ အီ မုး ဂွန် အာမာဆေလာမ်၊ အန် ဟဲ့ ဘဲန် ဒူအီ အီ ဘ်ု မာလုဝ်း ခဲင် ထိုပ် ဇဝ်ဖြာ အီ မုး ဒူင် လာယ် ကာတုန့် ဇဝ်ဖြာ ဂေ ဒူအီ။

22 ဂေ ဒူအီ အီ ဘဲန် ဒူအီ အီ ဘ်ု မာလုဝ်း တီ၊ ဂေ ဘောကာဂ့လျီတ် ကွယ် အာ မာယဝ်း ဒီ ဂိုဝ် ဒီ အာ ဝီ။ ဂေ ဘော ဟဲ့ ဒဲမ် အုန် ဇာရာင် ဂေ ခဲင် ရဝ် ခဲင် မိူင် ဒူင် ကွယ် ဂေ။ ခုန်ဒီခမ် အာဒါဝိတ် ဂါယ် အာဆာမူအေန် အီ မုး ဒူအီ အီ နပ် ဒီ ယိုဝ်၊^a ဂါယ် ဟဲ့ ဒါင် တဲး ဂေ ဘူင် ဂါန် တီ။ 23 ကော ဝီ ဇမ် စုဝ် လှုက်လှာန် ဂေ မိူဝ်၊ ဂေ ဘော ဘ်ု မာလုဝ်း ကာင် ဇဝ်ဖြာ ပါယ် တီ။ ကာင် ဇဝ်ဖြာ တီ ဂေ ဘော တဲး အန် စိူဝ် ထိုပ် ဘိက်။ 24 မာလုဝ်း တီ ဘော ကွယ် ဖွုန် ဘ့လာက် အီ မုး ဘ့လာက် နာ ကွာ၊ ဘ့လာက် နာ တေတ့်၊ ဘ့လာက် နာ လေး ဆီငဲ ဘော ဘ့လာက် နာ ဂေတ့် ဆီငဲ။ 25 ဘီနွင် ဂေ အီ ကွယ် ခဲင် ရဝ် ဂေ တီ၊ ဂေ ဘော လုဝ် လာယ် ကာပ့လု တး ဘ်ု ဘဲန် ဇေန့် ဘဲန် ဇေန့်။ အူ ဇေန့် ဂေ လုဝ် ကွယ် ဘ်ု ဘူ ဆီငဲ။ 26 ဂေ ဒါ တာင် ဖွုန် ဝီ အီ ဘ်ု တွိုန်၊ ဂေ မုး ဒူအီ အာမျုဝ် အာလေဝီ။ ဂေ ဘော လုဝ် ဘ်ု၊ လုဝ် ယွတ် မဲန် ဘော ဟူင်၊ ဘော ဟူင် ပီ အုန် ဂေ ခါဂုန် အီ ကွယ် ခဲင် ကာင် ဇဝ်ဖြာ။ 27 ခဲင် မှိုဝ် ဂေ ဘော လုဝ် ကွယ် ခူပ် ဘာင် မာလုဝ်း ကာင် ဇဝ်ဖြာ တီ။ ခုဝ်၊ ဂေ ဘ်ု ဒီ ဝိုဝ်း ခတ်ဆဝ် မာလုဝ်း ဒွန် ညှာ။

28 ဂေ ဒူအီ အာလေဝီ မင် အီ ဂေ ဘဲန် ဒူအီ အီ လုဝ် ယွတ် မဲန် လိုမ်လာ ခြိုင် ပီ တာ ဒေါ ကြိုပ် ဂေ ဇဝ်ဖြာ ခဲင် ကာင် ဇဝ်ဖြာ။ ဒေါ ဒိုဝ်း လိုပ် ဒိုဝ်း လေး ဂေ၊ ဘော ဒေါ ဒိုဝ်း စ်ု ဒိုဝ်း တာ ဂေ၊ ဂေ ဘော လုဝ် တိး ဒီ ယွတ် ဒွန် ဇေန့်။ 29 ဂေ ဒူအီ အာလေဝီ မင် အီ ဘော လုဝ် ယွတ် လိုမ်လာ ကာစှူင့် ဂေ မာတိန့် ဘော ခြိုင် အီ ဆီငါ ဘွတ် ဘော ကာပဲ့ ခဝ်ချုင်၊ အိုမ် မာငုန်၊ နာမန်၊ ဆီနမ် အုး ငှုန် ဘော ဒဝ် အုး ငှုန်။ 30 မာလဲ၊ ဂေ ဒါ အီ လှူ ဒီ ဇဝ်ဖြာ မင် အီ ဂေ လုဝ် ကာဆူ ကာဝ်ု နာမန် ဘော န့ကြိုဝ်း အုး ငှုန်။ 31 ဒူအီ အာမျုဝ် အာလေဝီ အူ ဝီ အီ စိူဝ် အာမာဒီဆီ အီ မုး ဂွန် အာဆာလူမ် ခဲင် အာမျုဝ် အာခုဝ်ရာ၊ အန် ဘော ဘူင် ခါမုန် ပီ ဒီ လှူ ဂေ ဒီ ဇဝ်ဖြာ။ 32 ဂေ ဘီနွင် အီ မုး ဒူအီ အာခုဝ်ဟာတ်၊ ဂေ ဘဲန် ဒူအီ အီ ရဲန် ခါမုန် အီ ဆီငါ ဘွတ် ပီ လာယ် ကာပ့လု ဂေ ဘော ပီ ဘ့လေး ဂေ ဒဲင် ကာစှူင့် ခဲင် ကာင် ဇဝ်ဖြာ ဒေါ မုး ဆီငဲ ဒီလှဝ်။

33 ဂေ ဒူအီ အာမျုဝ် အာလေဝီ မင် အီ ဂေ အီ တဝ်း မှုဝ် ခဲင် ဟုဝ် ဇဝ်ဖြာ၊ ဂေ ဒူအီ အီ မုး ဒါ တာင် အီ အိုပ် အီ ယဲတ့် ဒူအီ ခဲင် ခြိုဝ် ဂေ တီ၊ ဂေ ဘော ကွယ် ခဲင် ဟူင် အိတ် ခဲင် ဟုဝ် ဇဝ်ဖြာ တွိုန်။ ဂေ မိူဝ် တူ လုဝ် ဘူင် ဂါန် မျုဝ် ဟဝ်။ ခုဝ်၊ ဂေ လုဝ် ဘူင် ဂါန် ဂေ ဒွင် ခိူန် ဒွင် ဝန်။

34 ဒူအီ ဂေ တီ၊ ဂေ မုး ဂုန့် ဒင် ဘော ဒါ တာင် ခဲင် ဒူအီ အာမျုဝ် အာလေဝီ။ စိူဝ် ဂေ ဘော ဒူပ် ဇာရာင် ပဲ့ ဟဲ့ ဒဲမ် အုန် ဂေ။ ဂေ မိူဝ် ကွယ် ခဲင် မိူင် ယေရူဆာလဲမ်။

35 အာယေယီလာ အီ မုး ဂုန့် အာကီပွင် ဘော ကွယ် ခဲင် မိူင် ကီပွင်။ အီဘိုန့် အန် ဘော စိူဝ် နာင် မာခါ။ 36 ဂွန် အီမာယ် အီ မုး ဂွန် ဂိန့် အန် ဘော စိူဝ် အာဘာတူန်။ အာယေယီလာ ဘော မိုဝ်း ဂွန် အီမာယ် ပေါ မ့ပွါ၊ ဂေ စိူဝ် အာဇူရာ၊ အာကီဆာ၊ အာဘာလ၊ အာနေရ၊ အာနာဒါပ်၊ 37 အာကေတော၊ အာဟီအော၊ အာဆာခါရာ ဘော အာမီကာလူတ်။ 38 အာမီကာလူတ် ဘော မုး ဂုန့် အာဆီမေအာမ်။ ဘော ဒူအီ ဂေ တီ ကွယ် ခဲင် မိူင် ယေရူဆာလဲမ် ခူပ် ဒူင် ကွယ် ဘီနွင် ဝေါဝဲ ဂေ။

39 အာနေရ ဘော မိုဝ်း ဂွန် အီမာယ် အီ စိူဝ် အာကီဆာ။ အာကီဆာ ဘော မုး ဂုန့် အာဆောလူ။ အာဆောလူ ပီ ဝီ မိုဝ်း ဂွန် အီမာယ် အီ စိူဝ် အာယုဝ်နာထာန်၊ အာမာလခီစှူဝါ၊ အာဖီနာဒါပ် ဘော အာအီဆာဘာလ။

40 အာယုဝ်နာထာန် ပီ ဝီ မိုဝ်း ဂွန် အီမာယ် အီ စိူဝ် အာမေရီဘာလ အီ ဘော မုး ဂုန့် အာမီခါ တွိုန်။

41 အာမီခါ ပီ ဝီ မိုဝ်း ဂွန် အီမာယ် အီ စိူဝ် အာဖီဆူန်၊ အာမေလေက်၊ အာထာရေအာ ဘော အာခါတ်။

42 အာခါတ် ပီ ဝီ မိုဝ်း ဂွန် အီ စိူဝ် အာယာဒါ။ အာယာဒါ ဝီ မိုဝ်း ဂွန် အီမာယ် အီ စိူဝ် အာလာမိတ်၊ အာဇာမာဝိတ် ဘော အာဇီမာရီ။ 43 အာဇီမာရီ တီ ဘော မုး ဂုန့် အာမောဇာ။ အာမောဇာ ဝီ မိုဝ်း ဂွန် အီ စိူဝ် အာဘီနာ။ အာဘီနာ ပီ ဝီ မိုဝ်း ဂွန် အီ စိူဝ် အာရေဖာယာ။ အာရေဖာယာ ပီ ဝီ မိုဝ်း ဂွန် အီမာယ် အီ စိူဝ် အာအေလာဆာ။ အာအေလာဆာ ပီ ဝီ မိုဝ်း ဂွန် အီမာယ် အီ စိူဝ် အာဇီလာ။

44 အာဇီလာ ဝီ မိုဝ်း ဂွန် အီမာယ် ဒဝ် ဝီ။ ဂေ စိူဝ် အာဇာရီကမ်၊ အာဘုဝ်ခေရူ၊ အာဆာမာန်၊ အာဆာရီယာ၊ အာအောဘာဒီ ဘော အာဟာနန်။ ဂေ ဘောကာဂ့လျီတ် မုး ဂွန် အာဇီလာ။