ဟဲ့ ဟွတ့်၊ အာဒါဝိတ် ဝီ တဝ်း၊ “ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် အေ လုဝ် ကွယ် ဒီ နီ။ ကာစှူင့် ဒူင် လှူ ဂေ ဒူအီ အီဆာရေလ ပီ လှူ အီ ဒုဝ့် ဒီ ငဝ် မိူဝ်၊ လုဝ် ကွယ် ဒီ နီ။”

2 ဒေါ အန် တီ အာဒါဝိတ် မိူဝ် စ်ု ဂေ ဒူအီ အာမျုဝ် ဟဝ် အီ ကွယ် ခဲင် မိူင် အီဆာရေလ တး ကာဇု၊ စ်ု ဂေ ဘူင် ဂါန်။ မင် အီ ဘော လုဝ် ဒဝ်း မာဝ် အာဒါ ဟုဝ် ဇဝ်ဖြာ တီ။ 3 အန် မိူဝ် ဒိုဝ်း ဟိန် ကိူန် ကာဆဝ်၊ တဲး ဂေ ဘူင် မာဟိန် အာဒါ ဘ့လ မာလုဝ်း၊ ဘူင် ဘော မင် ကာကျီပ်။ အန် ဘော ဒိုဝ်း ဘွင့် ဒေန့် အီ ကိူန် ကာဆဝ်။ န့ ကော ဟူ နပ် ဒီ ဆ ခဲ့ ဘော စန်။ 4 ဘော ဟေ အာရိတ် ပီ ဒိုဝ်း တး ဒူအီ မိူင် ထူရုဝ် ဂါယ် မိူင် ဆီဒူန် ဒွါ ဒီ ခုန်ဒီခမ် အာဒါဝိတ်၊ န့ ဟဲ့ ကိူန် ကာဆဝ် ကော ဟူ နပ် ဒီ တိး။ အာဒါဝိတ် မိူဝ် ဒွါ တူတ့် ဒီ ဂေ လက်ဆာမာ။

5 အာဒါဝိတ် ဟဲ့ ကာဖာ ခဲင် နဝ်း အန် တဝ်း၊ “ဟုဝ် ဇဝ်ဖြာ ပီ ဒီ ဘူင် ဂွန် အီမာယ် အုဝ် အီ စိူဝ် အာဆာလုဝ်မုဝ်၊ အန် လုဝ် ဘူင် တဲး န့ မိုဝ်း အာဖုင် ဒင်ခုဝ်၊ မိုဝ်း ဆာရေ တဲး ဒူအီ ဒွန် မာန် ဒွန် မိူင် ကော အာမ်။ မာလဲ၊ အန် ယီ ဆီ တျီ့၊ အန် ညှမ် နပ် ဒီ ဘူင် ဆီချာ။ ခုဝ်၊ အုဝ် လုဝ် ရဲန် အုန် ဘဲန် မျုဝ် ဘဲန် မျုဝ်။” ပါယ် တီ အာဒါဝိတ် ဟဲ့ ရဲန် အုန် ကြုဝ်ကြာမ် ကိူန် ကာဆဝ် အာတ့် ယမ် အန်။

6 ဟဲ့ ဟွတ့်၊ အန် ဝီ ဒဲ့ တး ဂွန် အန် အီ စိူဝ် အာဆာလုဝ်မုဝ်၊ ဝီ ဒမ် အန် ဆမ် ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။

7 အာဒါဝိတ် ဝီ တဝ်း ဒီ အန်၊ “အိုယ် မဲ ဂွန် အုဝ်၊ အုဝ် ဟဲ့ ဆီ ဆမ် ဟုဝ် ဇဝ်ဖြာ အီ ပွုန် တာင်၊ အီ မုး ဇဝ်ဖြာ ပီ ကြိုပ် အုဝ်။ 8 မာလဲ၊ ဇဝ်ဖြာ ယီ ဝီ ကာလာင် ဒီ အုဝ် တဝ်း၊ ‘မဲ ဟဲ့ ငဝ်း ယမ် ဒူအီ ကိူန် ကာဆဝ်။ မဲ မိူဝ် ဟဲ့ ဒွိုမ် ကာဂုဝ်း မိူင် ဘဲန် မိူင် ဘဲန် မိူင်။ ခုဝ်၊ မဲ တူ ပွိုန် ဆမ် ဟုဝ် အုဝ်။ 9 ပီ ဘော ဟဲ့ ပါယ် တီ မိူဝ်၊ မဲ ယီ မိုဝ်း ဂွန် အီမာယ် အူ ဝီ၊ အုဝ် ဒီ တဲး အန် ပွိုန် ဒီ ကွယ် ဒါခိုယ်၊ ကွယ် နှိမ် နှိမ်။ တဲး အန် လွတ် အာဖေ အာရေ ဒီ ရန်ဆူ အန် အီ ကွယ် ရူပ် အန် ဒွန် ဘ့လာက်။ စိူဝ် အန် မုး အာဆာလုဝ်မုဝ်။ ဘော စုဝ် အန်၊ အန် ဒီ ပွိုန် ဒီ အိုပ် မိူင် အီဆာရေလ ဒါခိုယ် ဒါခိုယ်၊ အာဝ် မိုဝ်း အီ လာယ် ကာဂုဝ်း။ 10 အန် တီ အီ ဒီ ဆမ် ဟုဝ် အုဝ်။ အန် ဒီ ဘဲန် ဂွန် အုဝ်၊ အုဝ် မိူဝ် ဒီ ဘဲန် ဂုန့် အန်။ အုဝ် မိူဝ် ဒီ တဲး လှုက်လှာန် အန် အိုပ် ဂေ ဒူအီ အီဆာရေလ ဆေဆေ။’

11 ခုဝ် အန် တီ မဲ ဂွန် အုဝ်၊ တဲး ဇဝ်ဖြာ ကွယ် ရိုမ် ဒူပ် မဲ၊ တဲး မဲ ပွိုန် ဒီ ဘူင် ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် မဲ၊ တဲး န့ ကော ဟွတ့်၊ တဲး န့ ဒူပ် ကာဒိက် ဆတ်ဇာ ပီ ဒွါ ဇဝ်ဖြာ ဒီ မဲ။ 12 ဒဲင် တီ၊ ပန် ဒီ ဒါင် ဇဝ်ဖြာ မဲ ဘဲန် ခုန်ဒီခမ် အီ အိုပ် ဒူအီ အီဆာရေလ၊ တဲး အန် ဒွါ အာငျာန် ဒီ မဲ၊ တဲး မဲ နပ် ပီ ဒီ လုဝ် ဘူင်၊ တဲး မဲ ဒူပ် ဒါရာ ဇဝ်ဖြာ၊ အီ မုး ဇဝ်ဖြာ ပီ ကြိုပ် မဲ။ 13 ဆေ မဲ ကော ဆာဒိက် ဒီ ဘူင် ဒူပ် ဒါရာ ပီ ဒွိုမ် ဒွါ ဇဝ်ဖြာ ဒီ အာမုဝ်ဆဲ အာဒါ ဂေ ဒူအီ အီဆာရေလ၊ မဲ ဒီ ဘော ပွိုန် ဒီ ဘူင် ဒွန် မျုဝ်၊ ခဲ့ ပီ ခြာမ် ပီ မာင် မဲ ဒီ ဘူင်။ တဲး မဲ မိုဝ်း နဝ်း ယ နဝ်း ပ့လူမ်။ ကွဲ့ တဲး မဲ ယုဝ် ဘော ကာလုတ့် နဝ်း။

14 လွင် ဟုဝ် ဇဝ်ဖြာ တီ၊ အုဝ် ဟဲ့ ခတ် နဝ်း ဒီ ဘူင် ပါယ် ခါခ်ု။ အုဝ် ဟဲ့ ရဲန် အုန် ခြိဝ် အူ ဆဲန် ထာလေန်၊ ရွိုန် အူ လာန် ထာလေန်။ န့ ဘော မိုဝ်း ဘော ဘွင့် ဒေန့် ဘော ဟိန် ကိူန် ကာဆဝ် ကော ဟူ ပဲ ဒီ ဆ စန် အန်။ ဟေ ဂေ မာဝ် မိူဝ်၊ အုဝ် ဟဲ့ ရဲန် အုန် ကိူန် ကာဆဝ် အာဒါ ဟုဝ် ဇဝ်ဖြာ တီ။ တဲး မဲ ပီ ဝီ ဟပ် ပေါ န့ ပွါ။ 15 ဒဲင် တီ၊ မဲ ဟဲ့ မိုဝ်း ဒူအီ အီ ဘူင် ဂါန် မဲ အီ ကိူန် ကာဆဝ်။ ဟဲ့ မိုဝ်း အီ နပ် ဒီ ဘ့လုဝ်း မာဝ်၊ အီ နပ် ဒီ ဂုဝ် မာအုတ် ဘော လက်ဆာမာ။ အာဝ် ဝန် မီ ခဲ့ တီ။ ဟဲ့ မိုဝ်း ဘော ဒါ လာက် အီ လှဲဝ် အီ ကျ ဒီ ဘူင် ဘဲန် မျုဝ် ဘဲန် မျုဝ်။ 16 ဂေ နပ် ဒီ စိုမ် ခြိဝ် ဂေ ရွိုန် ဘော ဘွင့် ဂေ ဟိန်။ တဲး မဲ စုး ဒီ ဘူင် ဆိန့် ဒေါ တီ နီ။ တဲး ဇဝ်ဖြာ မိူဝ် ကွယ် ရိုမ် ဒူပ် မဲ။”

17 ဝါယ် အန် တီ အာဒါဝိတ် ဝီ ကာလာင် ဘော ဒီ ဂေ ဒူအီ အီ မုး ဒါ တာင် အီ အိုပ် အီ ယဲတ့် ဂေ ဒူအီ အီဆာရေလ ဒွန် အီ၊ တဲး ဘော ဂေ စွယ် အာဆာလုဝ်မုဝ်။ 18 အန် ကာလာင် ဒီ ဂေ တဝ်း၊ “ဇဝ်ဖြာ ပီ ကြိုပ် ဘေ ဟဲ့ ကွယ် ရိုမ် ဒူပ် ဘေ။ အန် ဇဝ် ဟဲ့ တဲး ဘေ ပွိုန် ဒီ ကွယ် ဒါခိုယ် ဒါခိုယ်၊ တဲး န့ ဘော ယေန် ဒွန် ဘ့လာက်။ အန် ဇဝ် ဟဲ့ ခ့ဝါင် တဲး အုဝ် ပဲ ဂေ ဒူအီ အီ ဒွိုမ် ကွယ် ခဲင် မိူင် နီ ဘောကာဂ့လျီတ်။ ဂေ မိူဝ် ဟဲ့ ကာဒုး ဒီ ဘဲန် မှာယ် ဘေ ဘော ခမ် ဇဝ်ဖြာ အိုပ် ဂေ။ 19 ဒေါ တီ နီ တဲး ဘော နဝ်း ဘော ဖွိုမ် ဘေ ဝီ ဒူပ် ဆီချာ ဇဝ်ဖြာ ပီ ကြိုပ် ဘေ တီ။ တဲး ဘေ ဆမ် ဟုဝ် ဇဝ်ဖြာ၊ တဲး ဘေ ဘော ပွိုန် ဒီ ဒိုဝ်း တး ဇီဒိူက် ဇဝ်ဖြာ၊ ဘော ခြိုင် တာ အီ ဆီငါ ပီ လုဝ် စ်ု လုဝ် တာ ဘေ ဒေါ ဒီ ကြိုပ် ဘေ ဒီ အန် ဇဝ်၊ တဲး ဘေ ဘော ပွိုန် ဒီ ဒိုဝ်း တး အုန် တူတ့် ခဲင် ဟုဝ် ဇဝ်ဖြာ တီ။”