1 အာနီ မုး ဇာရာင် ဒူအီ ခဲင် ခြိုဝ် အာရူဘေန် အီ မုး ဂွန် ဂိန့် အာအီဆာရေလ တွိုန်။ ကူပ် ဟဲ့ ပြာ အန် ဒီ အိတ် ဒူပ် အီဘိုန့် တျီ့ ဂုန့် အန်၊ ရုး မုး အန် ဂွန် ဂိန့် ဟဲ့ ဝီ အာပ် ဒွါ ဒီ ဂွန် အာယုဝ် အီ မုး ဂွန် အာအီဆာရေလ ပေါ ဝီ။ ခုဝ်၊ ခဲင် ဇာရာင် ဂေ ဂွန် အာအီဆာရေလ ဂေ တူ ဟပ် စိူဝ် အန် ဒေါ ဂုဝ်။ 2 ပါယ် တီ ဘော ခြိုဝ် အာယူဒါ ပီ ဘော ဟဲ့ ဘဲန် ခြိုဝ် အီ တာင် လွှိုမ် အီ ဟဝ်၊ ပီ ဘော မိုဝ်း အူ ဝီ အီ ဒီ ဘဲန် ဒါ ကာညာ အီ အိုပ် ဒူအီ ဟဝ် မိူဝ်၊ ဂွန် အာယုဝ် တွိုန် ယီ ဟဲ့ ပွိုန် ရုး ဒီ ဘဲန် ဂွန် ဂိန့်။ 3 အာရူဘေန် အီ မုး ဂွန် ဂိန့် အာအီဆာရေလ တီ၊ အန် မိုဝ်း ဂွန် အီ စိူဝ် အာဟာန်၊ အာဖာလူ၊ အာဟေဇာရူန် ဘော အာခါမီ။

4 လှုက်လှာန် အာယုဝ်အေလ ဘော စိူဝ် အာဆေမာယာ။ ဂွန် အာဆေမာယာ ပီ ဝီ စိူဝ် အာကုဝ်က။ ဂွန် အာကုဝ်က ပီ ဝီ စိူဝ် အာဆီမီ။ 5 ဂွန် အာဆီမီ ပီ ဝီ စိူဝ် အာမီခါ။ ဂွန် အာမီခါ ပီ ဝီ စိူဝ် အာရာယာ။ ဂွန် အာရာယာ ပီ ဝီ စိူဝ် အာဘာလ။

6 ဂွန် အာဘာလ ပီ ဝီ စိူဝ် အာဘီရာဟ။ ခုန်ဒီခမ် တာင် အီ စိူဝ် အာတီကာလာတ်ဘီလေဆာ အီ အိုပ် ဒူအီ အာမျုဝ် အာဆူရာ ဟဲ့ တး ကာဂုဝ်း ပဲ အာဘီရာဟ အီ မုး ဒါ တာင် ဂေ ဒူအီ ခြိုဝ် အာရူဘေန်။ ခုန်ဒီခမ် တီ ဘော မှေတ့် ဟာဝ် အာဘီရာဟ တီ။

7 ဂေ အီ မုး ဘီနွင် ဝေါဝဲ၊ အီ ဘဲန် အူ န့ကြိုဝ်း အီ ဘဲန် ဂုန့် ဒင် ဂေ၊ ဟဲ့ ဒဲမ် အုန် ခဲင် ဇာရာင် ပါယ် နီ။ 8 ဂေ ဘော မုး အာယေယီလာ အီ မုး ဒါ တာင်၊ အာဆာခါရာ ဘော အာဘေန်လာ အီ မုး ဂွန် အာအတ်ဇာတ် ဘော လှာန် အာဆေမာ အီ မုး ဒူအီ ခဲင် န့ကြိုဝ်း အာယုဝ်အေလ တွိုန်။ ဒူအီ ဂေ တီ၊ ဂေ ဘော ကွယ် စုး ဒီ မိူင် အာရော ကော ဝီ ဇမ် ဒီ မိူင် နေပေါ ဘော မိူင် ဘာလမွင်။ 9 ဖိုင် မာမက် မာဘူ ဂေ ဟဲ့ ဘြဲ ကိူန် ကာဆဝ် ဒေါ ကွယ် ဂေ ခဲင် မိူင် ဂီလေအာတ်။ ခုဝ်၊ ဂေ ဟဲ့ ပွိုန် ကာဒါယ် အီ ကာဝဝ်း ကာဆဝ်။ န့ ဘော စုး ဒီ ပြဲ ကာဟဝ်း ဘ့လာက် နာ လေး ဆီငဲ ကော ဝီ ဇမ် ဒီ ဘ့လဲင် အိုမ် အူဖာရာတ်။

10 ဒေါ မုး စုဝ် ဘာန် ခုန်ဒီခမ် အာဆောလူ တွိုန်၊ ဂေ ဒူအီ အာရူဘေန် ဟဲ့ ကာဂုဝ်း၊ ဟဲ့ ငဝ်း ယမ် ဒူအီ အာဟာကာရာ။ ဂေ ဘော ဝီ ပ့လု ဒူအီ ဂေ တီ၊ ဝီ ကွယ် ဒူင် ကာဂုဝ်း ဂေ တီ ဒွန် နာ ဒွန် ပ့လုဝ့် ကော ဇမ် ဘ့လာက် နာ လေး ဆီငဲ မိူင် ဂီလေအာတ်။

11 ဂေ လှုက်လှာန် အာဂတ် ဘော ကွယ် ခူပ် ဂေ ဒူအီ အာရူဘေန် ဒီ မိူင် ဘာဆန်၊ ကော ဝီ ဇမ် မိူင် ဆာလာကာ။

12 အာယုဝ်အေလ ဘော ဘဲန် ဒါ အီ ယဲတ့် ဂေ။ အာဆာဖာမ် ဘော ဘဲန် ဒူအီ အီ ဒူပ် အန်။ ဝါယ် အန် တီ ဘော မိုဝ်း အာယာနေ ဂါယ် အာဆာဖတ် အီ ကွယ် ခဲင် မိူင် ဘာဆန်။

13 ဘီနွင် ဝေါဝဲ အီ ဒူပ် န့ဟူမ် ဂေ ဘော မုး န့ဟူမ် အာမီခီလာ၊ အာမေဆူလမ်၊ အာဆေဘာ၊ အာယောရေ၊ အာယာခါန်၊ အာဇာယာ ဘော အာအေဘာ။ ဂေ ဘောကာဂ့လျီတ် ကွယ် ဘူ န့ဟူမ်။

14 ဒူအီ ဂေ တီ ဂေ မုး လှုက်လှာန် အာဖီဟေလာ အီ မုး ဂွန် အာဟူရီ။ အာဟူရီ မုး ဂွန် အာယာရော။ အာယာရော ဝီ မုး ဂွန် အာဂီလေအာတ်။ အာဂီလေအာတ် ဝီ မုး ဂွန် အာမီခီလာ။ အာမီခီလာ ဝီ မုး ဂွန် အာယေဆီဆေ။ အာယေဆီဆေ ဝီ မုး ဂွန် အာယာတော။ အာယာတော ဝီ မုး ဂွန် အာဘုတ်။

15 အာဟိန် ဘော မုး ဂွန် အာဘာဒီလာ၊ ဘော မုး လှာန် အာဂူနီ။ အာဟိန် တီ ဘဲန် ဂုန့် ဒင် ဂေ ဒူအီ အာမျုဝ် အန်။

16 ဂေ ဒူအီ အာမျုဝ် အာဂတ် ဟဲ့ ကွယ် ခဲင် ရဝ် ခဲင် မိူင် ဘာဆန် အီ မုး ကာဒါယ် မိူင် ဂီလေအာတ် အီ မိုဝ်း ပေတ့် ကိူန်။ ဂေ ကွယ် ဘော ခဲင် မိူင် ဆာရူန် ဘော မိူင်။

17 ဇာရာင် စိူဝ် ဒူအီ ဂေ တီ၊ န့ ဟဲ့ ဒဲမ် အုန် ဒေါ မုး စုဝ် ဘာန် ခုန်ဒီခမ် အာယုဝ်ထာမ် အီ အိုပ် မိူင် ယူဒါ၊ ဘော စုဝ် ဘာန် ခုန်ဒီခမ် အာယေရုဝ်ဘုဝ် အီ အိုပ် မိူင် အီဆာရေလ။

18 ဂေ ဒူအီ ခြိုဝ် အာရူဘေန်၊ ခြိုဝ် အာဂတ် ဘော ခြိုဝ် အာမာနာဆေ အူ ကာတဲ၊ ဂေ မိုဝ်း ဒါ ဆိုက် ဖွုန် မှိုန့် ဒီ ဖွုန် ဟြဲန့် ဒီ ဘူ မာယဝ်း ဒီ ဒဝ် ဂိုဝ် ဝီ။ ဒူအီ ဂေ တီ၊ ဂေ မုး ဒူအီ အီ ပ့လူမ် ခ။ ဂေ ဟဲ့ ဟွတ့် ဖိုက် ဆီချာ ဆီချာ။ ဂေ ဟဲ့ ပွိုန် ဂူင့် မင် ဂွင့် ဘော မာပွါ့ လာင်၊ ဟဲ့ နပ် ဘော ဒီ ဘန့် အ။ 19 ဂေ ဘော ဟုဝ့် ကာဂုဝ်း ဒီ ဒူအီ အာမျုဝ် အာဟာကာရာ၊ ဒူအီ အာယေထူ၊ ဒူအီ အာနာဖိတ် ဘော ဒူအီ အာမျုဝ် အာနောဒါပ်။ 20 ဂေ မိူဝ် ဘိုင် ဇဝ်ဖြာ ဘော ဆာခိုဝ် မှာန့်၊ တဲး ဇဝ်ဖြာ စွယ် ဂေ။ ဇဝ်ဖြာ မိူဝ် ထူမ် ဂြုဝ်း ပီ ဆာခိုဝ် ဂေ။ ဇဝ်ဖြာ မိူဝ် တဲး ဂေ ကာဂုဝ်း ပဲ ဒူအီ အာဟာကာရာ ဘော ဂေ ဒူအီ အီ စွယ် ဒူအီ အာဟာကာရာ ဂေ တီ။ 21 ဂေ ဘော မှေတ့် ဟာဝ် မင်ပြွင့် ကာဟာတ့် ဖန် မှိုန့် ဒုဝ်၊ မာဘူ အူ ဆဲန် ဒီ ဖန် မှိုန့်၊ မာလာ အာ ဟြဲန့် ဒုဝ် ဘော ဒူအီ အူ ဆဲန် ဝီ။ 22 ဂေ မိူဝ် ဟဲ့ ပွိုန် ဒီ ငဝ်း ယမ် ကိူန် ကာဆဝ် ရန်ဆူ ဂေ။ ခုဝ်၊ ဇဝ်ဖြာ ဟဲ့ စွယ် ဂေ ကာဂုဝ်း။ ဂေ ဘော ဝီ ပွိုန် ဒီ ကွယ် ခဲင် မိူင် တီ ကော ဝီ ဇမ် ပန် ဝီ တး မှေတ့် ဟာဝ် အီ ဟဝ် ဒီ ဂေ။

23 ဂေ ဒူအီ ခြိုဝ် အာမာနာဆေ ဟဲ့ ကိူန် ကာဆဝ်။ ဂေ ကွယ် ဘ့လာက် နာ လေး ဆီငဲ။ ဂေ ဘော ကွယ် ခဲင် မိူင် ဘာဆန်၊ ကွယ် လူင် ကော ဇမ် ဒီ ဘာလဟေရာမူန်။ န့ မုး နွန် ဆေနီရာ အီ ဘော စိူဝ် နွန် ဟေရာမူန်။

24 ဂေ အီ မုး ဂုန့် ဒင် အီ ဘဲန် ဒါ တာင် ခဲင် န့ကြိုဝ်း ဂေ ဘော မုး အာအေဖေန်၊ အာအီဆီ၊ အာအေလီအေန်၊ အာစာရေလ၊ အာယေရေမီ၊ အာဟုဝ်တောဝါ ဘော အာယာဒီလာ။ ဒူအီ ဂေ တီ၊ ဂေ မုး ဒါ ဆိုက် အီ ကျ အီ ဟဲန့် ကာဆဝ်။ ဂေ ဘော ဘဲန် ဒါ တာင် အီ အိုပ် အီ ယဲတ့် ဒူအီ ခဲင် န့ကြိုဝ်း ဂေ။ 25 ပီ ဘော ဟဲ့ ပါယ် တီ ဒူအီ ဂေ တီ ယီ တူ ဘူင် နာ ဆိူဝ် နာ မှာန် ဒီ ဇဝ်ဖြာ ပီ ကြိုပ် ဂုန့် ဒင် ဂေ။ ဂေ ဝီ ဝဲန် ဇဝ်ဖြာ၊ ဝီ ဘိုင် ဇဝ် ပီ ကြိုပ် ဒူအီ အာမျုဝ် ဟဝ် အီ မုး ဒူအီ ပီ ဟုဝ် တဝ် ဇဝ်ဖြာ၊ အီ ကွယ် ခဲင် မိူင် ဂေ တီ။ 26 ပါယ် တီ ဇဝ်ဖြာ မိူဝ် စ်ု ခုန်ဒီခမ် အာဘူလာ အီ အိုပ် မိူင် အာဆူရာ အီ ဘော စိူဝ် ဘော အာတီကာလာတ်ဘီလေဆာ၊ တး ကာဂုဝ်း ပျာတ့် ဝဲန် မိူင် ဂေ။ ခုန်ဒီခမ် တီ ဟဲ့ ဟွတ့် မှေတ့် ဟာဝ် ဒူအီ ခြိုဝ် အာရူဘေန်၊ ခြိုဝ် အာဂတ် ဘော ခြိုဝ် အာမာနာဆေ အူ ကာတဲ။ အန် ဝီ တဲး ဂေ ကွယ် ခဲင် မိူင် ဟာလာ၊ မိူင် ဟာပေါ၊ မိူင် ဟာရာ ဘော ခူပ် ဘ့လဲင် အိုမ် ကောစန်။ ဂေ ဘော ကွယ် ဒီ တီ ကော ဇမ် ဒေါ တီ နီ။