1 ဂေ အီ မုး ဂွန် အာယူဒါ ဂေ စိူဝ် အာဖေရေတ်၊ အာဟေဇာရူန်၊ အာခါမီ၊ အာဟူရာ ဘော အာဆုဝ်ဘာန်။

2 အာဆုဝ်ဘာန် ဝီ မိုဝ်း ဂွန် အီမာယ် အီ စိူဝ် အာရာယာ။ အာရာယာ ဘော မုး ဂုန့် အာယာဟာတ်။ အာယာဟာတ် ဝီ မိုဝ်း ဂွန် အီမာယ် အီ စိူဝ် အာဟူမာယ် ဘော အာလာဟာတ်။ ဒူအီ ဂေ တီ၊ ဂေ ဘဲန် ဂုန့် ဒင် ဂေ ဒူအီ အာမျုဝ် ဇုဝ်ရာ။

3 အာအေထာမ် ဝီ မိုဝ်း ဂွန် အီ စိူဝ် အာယေစာရေလ၊ အာအီထာမာ ဘော အာအီတာဘာတ်။ အန် မိုဝ်း ဘော ဂွန် အီဘိုန့် အူ ဝီ အီ စိူဝ် နာင် ဟာစာရေလပေါနီ။ 4 အာဘေနူအေန် ဘော မုး ဂုန့် အာကေတော။ အာအေဇေန် မုး ဂုန့် အာဟူဆာ။ ဂေ လှုက်လှာန် အာဟူရာ အီ မုး ဂွန် ဂိန့် နာင် အေဖာရာတ်၊ အီ ဟဲ့ ဘဲန် ဂုန့် ဒင် မိူင် ဘေတ်လဲမ်၊ ဂေ စိူဝ် ပါယ် နီ။

5 အာဆူရာ အီ မုး ဂုန့် အာဒေကော တွိုန်၊ အန် မိုဝ်း အီဘိုန့် အာ ဝီ အီ စိူဝ် နာင် ဟေလာ ဘော နာင် နာရာ။

6 နာင် နာရာ တီ ဟဲ့ ဘဲန် မာ ဂေ ဂွန် အီမာယ် အီ စိူဝ် အာဟူဇာမ်၊ အာဟေဖာ၊ အာထေမာနီ ဘော အာဟာဆာတာရီ။ အာဆူရာ ဘော မုး ဂုန့် ဂေ တီ။

7 နာင် ဟေလာ ဝီ မိုဝ်း ဂွန် အီမာယ် ဘော စိူဝ် အာဇေရိတ်၊ အာဇုဝ်ဟာန်၊ အာအေထာနန်၊ အာကောဇာ။ 8 အာကောဇာ ဝီ မိုဝ်း ဂွန် အီမာယ် အီ စိူဝ် အာနူပ် ဘော အာစောဘေဘာ။ အာကောဇာ ဘော မုး ဂုန့် ဒင် ဂေ ဒူအီ အာမျုဝ် အာဟာရေလာ အီ မုး လှုက်လှာန် အာဟာရုမ် တွိုန်။

9 န့ ဘော မိုဝ်း ဒူအီ အူ ဝီ အီ စိူဝ် အာယာဘေဇာ။ အန် မုး ဒူအီ ပီ ရုဝ်ဆေ ဒွန် အီ လွှိုမ် ဂေ ဘီနွင် ဝေါဝဲ အန်။ မာ အန် တဲး အန် စိူဝ် အာယာဘေဆာ။ ခုဝ်၊ မာ အန် တဝ်း၊ “အုဝ် ဟဲ့ ခမ် ဒုက် တာင် ကာဆဝ် ဒေါ ဂွိုတ် အန်။” 10 အာယာဘေဇာ ဘော ဆာခိုဝ် ဒီ ဇဝ်ဖြာ ပီ ကြိုပ် ဂေ ဒူအီ အီဆာရေလ။ အန် တဝ်း၊ “အိုယ် မဲ ဇဝ်ဖြာ၊ အုဝ် မှာန့်၊ တဲး မဲ မွင့်ကာရာ ဒွါ ဒီ အုဝ်၊ တဲး မဲ ပီဝဝ်း ကာဒါယ် ဒူင် ကွယ် ဒူင် ရန့် အုဝ်။ အုဝ် မှာန့်၊ တဲး မဲ ဇဝ် ကွယ် ရိုမ် ဒူပ် အုဝ် ဘော ဂွင့် ရဲ အာဖေ အာရေ အီ ဒီ တဲး အုဝ် ခမ် ဒုက်။” အန် ဟဲ့ ဟွတ့် ဆာခိုဝ် ပါယ် တီ ဇဝ်ဖြာ မိူဝ် ဒွါ ခဲ့ ပီ မှာန့် အန် တီ။

11 အာခေလုပ် အီ မုး ဝါ အာဆူဟာ၊ အန် ဝီ မိုဝ်း ဂွန် အီမာယ် ဘော စိူဝ် အာမာဟီရာ။ အာမာဟီရာ ဘော ဝီ ဘဲန် ဂုန့် အာအေထုန်။ 12 အာအေထုန် ဝီ မိုဝ်း ဂွန် အီမာယ် အီ စိူဝ် အာဘေတ်ရာဖ၊ အာဖာဆေယာ ဘော အာထေဟီနာ။ အာထေဟီနာ ဘော ဘဲန် ဂုန့် အာအီရာနာဟာဆာ။ လှုက်လှာန် ဂေ တီ၊ ဂေ မိူဝ် ကွယ် ဒီ မိူင် ရေခါ။

13 အာခေနာတ် ဝီ မိုဝ်း ဂွန် အီမာယ် အီ စိူဝ် အာအောဆန်ယေလာ ဘော အာဆေရာယာ။ အာအောဆန်ယေလာ ပီ ဝီ မိုဝ်း ဂွန် အီမာယ် အီ စိူဝ် အာဟာဆာတ် ဘော အာမောနောဆေ။ 14 အာမောနောဆေ ဝီ မိုဝ်း ဂွန် အီမာယ် အီ စိူဝ် အာအောဖာရာ။ အာဆေရာယာ ဘော မုး ဂုန့် အာယောဖ ဝီ ဟဲ့ ဘဲန် ဒင် မိူင် ဂေအာရာဆမ် အီ မုး ဒူင် ကွယ် ဂေ ဒူအီ အီ ဘဲန် လက်ဆာမာ။

15 အာဂါလိပ် အီ မုး ဂွန် အာယေဖုဝ်နာ တွိုန်၊ အန် ဝီ မိုဝ်း ဂွန် အီမာယ် အီ စိူဝ် အာအီရူ၊ အာအေလာဟာ ဘော အာနာအမ်။ အာအေလာဟာ ဘော မုး ဂုန့် အာခေနာတ်။

16 အာယေဟာလာလေန် ဘော မိုဝ်း ဂွန် အီမာယ် အီ စိူဝ် အာစီဖ၊ အာဇီဖာဟာ၊ အာတီရီ ဘော အာဆာရေန်။

17 အာအေဆာရာဟာ မိုဝ်း ဂွန် အီမာယ် အီ စိူဝ် အာယေဆာ၊ အာမေရေတ်၊ အာအေဖေန် ဘော အာယာလူန်။ အီဘိုန့် အာမေရေတ် အူ ဝီ မိုဝ်း ဂွန် အီမာယ် အီ စိူဝ် အာမေရီယမ်၊ အာဆေမာ ဘော အာအီဆာဘာ။ အာအီဆာဘာ ဘော မုး ဒင် မိူင် အေဆာတာမော။ ဂေ မုး ဂွန် နာင် ဘီဆီယာ အီ မုး ဂွန် ခုန်ဒီခမ် ခဲင် မိူင် အဲဂိုပ်။ 18 အီဘိုန့် အာမေရေတ် အီ မုး ဒူအီ အာမျုဝ် ယူဒါ၊ အန် ဝီ မိုဝ်း ဂွန် အီမာယ် အီ စိူဝ် အာယေရိတ် အီ ဘဲန် ဒင် မိူင် ကေတော။ အာဟေဘာ ဘဲန် ဒင် မိူင် ဆေခေါ။ အာယေကူဆိန် ဟဲ့ ဘဲန် ဒင် မိူင် စာနော။

19 အာဟုဝ်ခီယာ ဘော ခတ် ဒိုဝ်း ဝါ အာနာဟာမ်။ လှုက်လှာန် ဂါယ် တီ ဘော ဘဲန် ဂုန့် ဒင် ဂေ ဒူအီ ဘောကာဂ့လျီတ် အီ ကွယ် ခဲင် မိူင် ဂီလ၊ အီ မုး ဒူအီ အာမျုဝ် ဂါမိတ်။ န့ မုး ဘော အေဆာတာမော အီ မုး အာမျုဝ် အာမာခါထိတ်။

20 အာဆီမုန် ဝီ မိုဝ်း ဂွန် အီမာယ် အီ စိူဝ် အာမာနုန်၊ အာရီနာ၊ အာဘဲန်ဟာနာ ဘော အာတီလူန်။ အာအီဆီ မိုဝ်း ဂွန် အီမာယ် အီ စိူဝ် အာစောဟေတ် ဘော အာဘေန်စောဟေတ်။

21 အာဆေလာ ဘော မုး ဂွန် အာယူဒါ အူ ဝီ။ ဂေ ဒူအီ အာမျုဝ် အန် ဘော မုး အာအေရာ အီ ဘဲန် ဒင် မိူင် လေကာ၊ အာလာတ ဘော ဘဲန် ဒင် မိူင် မာရေဆာ ဘော ဖိုင် ဂေ အီ နပ် ဒီ ဒဝ့် ဘိက် ကာတမ် လုယ်၊ အီ ကွယ် ခဲင် မိူင် ဘေတ်အာဆာဘာ တွိုန်။ 22 န့ မိုဝ်း ဘော အာယုဝ်ခိမ် ဘော ဒူအီ ခဲင် မိူင် ခေါဇေဖ ဘော အာယုဝ်အာတ် ဘော အာဆာရာပ်၊ ဂေ အီ အိုပ် ဒူအီ မုဝ်အာပ်၊ ဂေ ကွယ် ခဲင် မိူင် ဘေတ်လဲမ်။ လွင် အန် တီ၊ ဟဲ့ ဒဲမ် အုန် ခဲင် ဇာရာင် အူ ဆိန့် ဒေါ မွိုန်။ 23 ဒူအီ ဂေ တီ၊ ဂေ မုး ဒူအီ အီ နပ် ဒီ ဘူင် ကာလုဝ့် ကာဒါယ်၊ ဂေ ဘူင် ဘော ဂါန် ခုန်ဒီခမ် ဘော ကွယ် ခဲင် မိူင် နေတိမ် ဘော ခဲင် မိူင် ကေတီရာ။

24 အာဆီမေအူန် မိုဝ်း ဂွန် အီမာယ် အီ စိူဝ် အာနေမူလာ၊ အာယာမိန်၊ အာယာရိပ်၊ အာဇေန်ရာ ဘော အာဆာအုန်။ 25 အာဆာအုန် ဝီ မိုဝ်း ဂွန် အီမာယ် အီ စိူဝ် အာဆာလူမ်။ အာဆာလူမ် ဝီ မိုဝ်း ဂွန် အီမာယ် အီ စိူဝ် အာမီဘာဆာမ်။ အာမီဘာဆာမ် ဝီ မိုဝ်း ဂွန် အီ စိူဝ် အာမိတ်မာ။

26 ဂေ လှုက်လှာန် အာမိတ်မာ ဘော မုး ဂွန် အန် အီ စိူဝ် အာဟာမုဝ်ယေလာ။ ဂွန် အာဟာမုဝ်ယေလာ ဘော မုး အာဇာကူရာ။ ဂွန် အာဇာကူရာ ဘော မုး အာဆီမီ။

27 အာဆီမီ ဘော ဝီ မိုဝ်း ဂွန် အီမာယ် ဂိုဝ် ဒီ ဒဝ် ဝီ။ အန် မိုဝ်း ဘော ဂွန် အီဘိုန့် ဒဝ် ဝီ။ မာလဲ၊ ခဲင် အာမျုဝ် ဂေ တီ၊ လှုက်လှာန် ဂေ တူ ဘော ကိူန် ခဲ့ မှဝ်။ ခုဝ်၊ န့ဟူမ် ဂေ အာမျုဝ် အာဆီမေအူန် တူ ကိူန် ပီ ဂေ န့ဟူမ် အာယူဒါ။ 28 လှုက်လှာန် အာဆီမီ ဂေ ကွယ် ခဲင် မိူင် ဘီရာဆေဘာ၊ မိူင် မောလာဒါ၊ မိူင် ဟာဇာဆူအာန်၊ 29 မိူင် ဘီလာဟာ၊ မိူင် အေဇေမ်၊ မိူင် တောလာတ်၊ 30 မိူင် အာဘေတ်၊ မိူင် ဟောမ၊ မိူင် ဇီကာလာတ်၊ 31 မိူင် ဘေတ်မာခါဘူတ်၊ မိူင် ဟာဇာဆူဆိမ်၊ မိူင် ဘေတ်ဘီရီ ဘော မိူင် ဆာရိမ်။ ဂေ ကွယ် ခဲင် မိူင် ဂေ တီ၊ တဲး ကော ဇမ် စုဝ် ဘာန် ခုန်ဒီခမ် အာဒါဝိတ်။ 32 ဒဲင် တီ ဂေ ဘော ကွယ် ဘော ခဲင် ရဝ် ခဲင် မိူင် အီ စိူဝ် မိူင် အေထာမ်၊ မိူင် အာအိန်၊ မိူင် ရိမ်မူန်၊ မိူင် တောခေန် ဘော မိူင် အာဆာန်။ န့ မိုဝ်း ပေါ ဖန် မိူင်။ 33 န့ ဘော ဘာ ဘော ရဝ် အီ ကွယ် ကာတတ် မိူင် ဂေ တီ၊ ကော ဝီ ဇမ် မိူင် ဘာလက်။ ပါယ် တီ ဂေ ဟဲ့ ဒဲမ် အုန် လွင် ဒူအီ ဂေ ဘော ဒူင် ကွယ် ဂေ။

34 ဂေ ဒူအီ အီ ဘဲန် ဒါ တာင် ခဲင် ဖိုင် ဂေ တီ ဘော စိူဝ် အာမေဆောဘာပ်၊ အာယာမာလေက်၊ အာယုဝ်ဆာ အီ မုး ဂွန် အာမာဇီယာ၊ 35 အာယုဝ်အေလ ဘော အာယေဟူ အီ မုး ဂွန် အာယောဆီဖီ။ န့ မုး ဘော ဂွန် အာဆေရာယာ ဘော ဂွန် အာဆီအေလာ 36 ဘော အာအေလီအောနေ၊ အာယာခုဝ်ဖာ၊ အာယေဆောဟာယာ၊ အာဆာယာ၊ အာဒီအေန်၊ အာယေဆီမဲန်၊ အာဘီနာယာ 37 ဘော အာဇီဆာ အီ မုး ဂွန် အာဆီဖီ။ န့ မုး ဘော ဂွန် အာလုန်၊ ဂွန် အာယီတာယာ၊ ဂွန် အာဆီမာရီ ဘော ဂွန် အာဆေမာယာ။

38 ဒူအီ ဂေ တီ၊ ဂေ မုး တူတ့် ဒါ တာင် အီ ယဲတ့် ဒူအီ ခဲင် ဖိုင် ဂေ။ န့ဟူမ် ဂေ မိူဝ် ဟဲ့ ဝဲ ဘြဲ ကိူန် ကာပွါ။ 39 ခုဝ်၊ ဂေ ဘော ကာယဝ်း ဟာဝ် ဘ့လာက် နာ လေး ဆီငဲ ကော ဇမ် ရေတ့် မိူင် ကေတော။ ဂေ ဘော ဘ့လေး ဘော ဟျီင် ဖိုင် မာဘူ မာပဲ ဂေ ဘ့လာက် နာ လေး ဆီငဲ ဒီလယ့် ဒူင် ကွယ် ဂေ တီ။ 40 ဒူင် ကွယ် ဂေ တီ၊ န့ ဘော မိုဝ်း ပေတ့် ကိူန်၊ ပေတ့် မိူဝ် ဘွတ်။ န့ ဘော ကာဝဝ်း ဘော ဂတ် ယေန် ဒါခိုယ် ဒွန် ဘ့လာက်။ ဒူအီ အီ ဟဲ့ ဒွိုမ် ကွယ် ဒီ တီ မုး ဒူအီ အာမျုဝ် ဟာမာ မင် အီ။

41 ဒေါ မုး စုဝ် ဘာန် ခုန်ဒီခမ် အာဟေစကီ အီ အိုပ် မိူင် ယူဒါ တွိုန် ဂေ ဒါ တာင် တွိုန် ဟဲ့ ဒွိုမ် ဟာဝ် ကာဂုဝ်း ဒီ ဂေ ဒူအီ ဟာမာ။ ဂေ မိူဝ် ဟဲ့ ပျာတ့် ဝဲန် ထိုပ် ဘိက် ဂေ၊ ပျာတ့် ဝဲန် ဘော ဒူအီ အာမျုဝ် မောနီ ပီ ယိုဝ် ပီ ကာတုန့် ဂေ။ ဂေ ဘော ဝီ ပ့လု ဒူအီ ဂေ တီ ဘော ဝီ ကွယ် ဒီ တီ ဆေဆေ။ ဂေ အိုင် ဒူင် တီ ခုဝ်၊ န့ မိုဝ်း ပေတ့် ကိူန်။ ကာဒါယ် မိူဝ် ဘွတ် ဘော ပွိုန် ဟျီင် ဆီချာ ဖိုင် မာဘူ မာပဲ ဂေ။ 42 အူ ဆီငဲ ဂေ ဒူအီ ဖန် မာယဝ်း ဝီ အီ မုး ဒူအီ ခဲင် ခြိုဝ် အာဆီမေအူန် လေး ဟာဝ် နာ လေး ဆီငဲ ဟုဝ့် ဒီ နွန် ဆေအီ။ ဂေ ဂိန့် ဆိုက် ဘော မုး ဂွန် အီမာယ် အာအီဆီ။ ဂေ စိူဝ် အာဘ့လဝ်ထီယာ၊ အာနာရီ၊ အာရေဖာယာ၊ အာအူဆီအေန်။ 43 ဂေ ဘော ကာဂုဝ်း ဘော ငဝ်း ဝဲန် ဒူအီ အာမာလေက် အီ ဆီ ဂိတ် ဆီ ကွယ်၊ ဂေ အီ ဟဲ့ တဝ် အီ ဟဲ့ လွတ် အာတ့် နီ။ ပန် တီ ဂေ ဘော ဝီ ကွယ် ဒီ တီ ကော ဇမ် ဒေါ တီ နီ။