1 ခဲ့ ကွယ် ဂေ ဒူအီ အီဆာရေလ ဘောကာဂ့လျီတ်၊ ဂေ ဘော ဝီ တး ကာဇု ဒီ မိူင် ဆီလုဝ်။ ဂေ ဘော ဝီ ဆမ် ထိုပ် ဘိက် ဘွတ် ဒီ တီ။ ကာဒါယ် မိူင် ဂေ တီ၊ ဂေ ဟဲ့ ပွိုန် ဒီ အိုပ် တူတ့်။ 2 ဒေါ အန် တီ န့ ယီ ဆီ ကွယ် ဒူအီ အီဆာရေလ အာဒါ ဘူ ခြိုဝ်၊ အီ ညှမ် ပွိုန် ဒီ ကာဆာင် ခါဂုန် ဒီ ဂေ။

3 ခုဝ်၊ အာယုဝ်ဆူအာ ဝီ ဒီမွှတ် ဒီ ဂေ ဒူအီ အီဆာရေလ ဘောကာဂ့လျီတ် တဝ်း၊ “ဘေ ဒီ ဘ်ု လှေန့် ပေါ ခဲ့ မှဝ်၊ တဲး ဘေ ကော ဟာဝ် ဒိုဝ်း ကာဒါယ် ခဲင် မိူင် ပဲ့ ဟဲ့ အာပ် ဒွါ ဇဝ်ဖြာ ဒီ ဘေ အီ မုး ဇဝ်ဖြာ ပီ ကြိုပ် ဂေ ဂုန့် ဒင် ဘေ။း 4 တဲး ဘေ ရဝ်း ဒူအီ ကာတဲ ဘေ၊ အူ ခြိုဝ် အူယ် ဝီ။ အုဝ် ဒီ တဲး ဂေ ဟာဝ် ယွတ် ခဲင် မိူင် တီ၊ တဲး န့ ကော ကာလတ့် တူတ့်။ တဲး ဂေ ဒဲမ် အုန် ပီ ပါယ် အာရိုပ် ကာဒါယ် ခဲင် မာန် မိူင် အီ ဒီ ဘဲန် ခါဂုန် ဒီ ဘေ တီ။ ဟဲ့ ဟွတ့်၊ တဲး ဂေ ဝီ တး ဒွါ ဒီ အုဝ်။ 5 ဂေ လုဝ် ကာယဝ်း ကာဒါယ် တီ၊ တဲး န့ ဘဲန် ဘူ ပွတ်။ အီ မုး ခြိုဝ် ဒူအီ အာယူဒါ၊ တဲး ဂေ ကွယ် ခဲင် မိူင် ဘ့လာက် နာ တေတ့်။ ဂေ ဒူအီ ခြိုဝ် အာယုဝ်၊ တဲး ဂေ ကွယ် ခဲင် မိူင် ဘ့လာက် နာ ကွာ။ 6 ဆေ ဘေ ဟဲ့ ဟွတ့် ဒဲမ် ပီ ပါယ် အာရိုပ် ကာဒါယ် ဘူ ပွတ် တီ၊ တဲး ဘေ ဝီ တး ဒွါ ဒီ အုဝ်။ ပါယ် တီ အုဝ် ဒီ ကာတာမ် ဒါင် ဘေ ဒီ အာတ့် ဇဝ်ဖြာ အီ မုး ဇဝ်ဖြာ ပီ ကြိုပ် အေ။ 7 ဂေ ဒူအီ အာလေဝီ၊ ဂေ ယီ တူ ပွိုန် ခါဂုန် ကာတဲ ဘေ။ ဂါန် လှူ ဂေ ဒီ ဇဝ်ဖြာ ဟဲ့ ဘဲန် ခါဂုန် ဂေ။ အီ မုး ခြိုဝ် အာဂတ်၊ ခြိုဝ် အာရူဘေန် ဘော ခြိုဝ် အာမာနာဆေ အူ ကာတဲ တွိုန်၊ ဂေ ဟဲ့ ပွိုန် ကာဒါယ် အီ ကွယ် ဘ့လာက် နာ လေး ဆီငဲ အိုမ် ဘ့လဲင် ယောဒါန်။ အာမုဝ်ဆဲ အီ မုး ဒဲစေန့် ဇဝ်ဖြာ ဟဲ့ ဟွတ့် ကာဆာင် ဒွါ ဒီ ဂေ။”

8 အာယုဝ်ဆူအာ ဟဲ့ ဟွတ့် ကာလာင် ဒီ ဂေ လွင် အန် တီ၊ ဒူအီ ပီ ရဝ်း ဂေ တွိုန် ဘော ဟာဝ်၊ တဲး ဂေ ပွိုန် ဒီ ဒဲမ် ပီ ပါယ် အာရိုပ် ကာဒါယ် ဂေ တီ။ အာယုဝ်ဆူအာ မိူဝ် ဟဲ့ တဝ်း ဒီ ဂေ၊ “တဲး ဘေ ဟာဝ် ခဲင် မိူင် ဂေ တီ၊ တဲး န့ ကော ကာလတ့်။ တဲး ဘေ ဒဲမ် အုန် ပီ ပါယ် အာရိုပ် ကာဒါယ် ဂေ တီ။ ဟဲ့ ဟွတ့်၊ တဲး ဘေ ဝီ တး ဒွါ ဒီ အုဝ်။ အုဝ် ဒီ ကာတာမ် ဒါင် ဘေ ဒီ အာတ့် ဇဝ်ဖြာ ခဲင် မိူင် ဆီလုဝ် နီ။” 9 ပါယ် တီ ဂေ ဘော ဟာဝ် ခဲင် မိူင် ဂေ တီ၊ တဲး န့ ကော ကာလတ့် တူတ့် ဒွန် ပ့လုဝ့်။ ဂေ ဘော ဒဲမ် ပီ ပါယ် အာရိုပ် ကာဒါယ် တီ၊ ဒဲမ် ဘော စိူဝ် ရဝ် စိူဝ် မိူင်၊ ဘော ကာယဝ်း တဲး န့ ဘဲန် ဘူ ပွတ်။ ဟဲ့ ဟွတ့်၊ ဂေ ဘော ဝီ တး ဒူင် ကွယ် အာယုဝ်ဆူအာ ဒီ မိူင် ဆီလုဝ် တွိုန်။ 10 အာယုဝ်ဆူအာ ဘော ကာတာမ် ဒါင် ဂေ ဒီ အာတ့် ဇဝ်ဖြာ၊ ဘော ကာယဝ်း ဒွါ ဒီ ဂေ ဒူအီ အီဆာရေလ ခြိုဝ် မှဝ် ခြိုဝ် အန်။

11 ပီ ကာတာမ် အာယုဝ်ဆူအာ၊ န့ လေး အာဒါ ဂေ ဒူအီ ခြိုဝ် အာဘေန်ယာမ် ဘဲန် န့ကြိုဝ်း ဘဲန် န့ကြိုဝ်း။ မာန် မိူင် ဂေ တီ၊ န့ ဘော ကွယ် ဒီ ကာတဲ ခြိုဝ် အာယူဒါ ဂါယ် ခြိုဝ် အာယုဝ်။

12 ကာအုန် ကာဒါယ် ဂေ ဘ့လာက် နာ ကွာ၊ န့ ဘော စုး ဒီ အိုမ် ဘ့လဲင် ယောဒါန်၊ ဘော ဝီ ဟုဝ့် ဒီ ဘြုဝ် နွန် ဘ့လာက် နာ ကွာ မိူင် ယေရီခုဝ်၊ ဝီ ဟာဝ် ဘ့လာက် နာ ဂေတ့် ဆီငဲ။ န့ ဘော ဟာဝ် ကာတဲ နွန်၊ ဝီ လေး ခဲင် ပြဲ ကာဟဝ်း အီ စိူဝ် ဘေတ်အာဝေန်။ 13 စုး ဒီ တီ၊ ကာအုန် ကာဒါယ် ဂေ တီ န့ ပီ ဝီ ဟာဝ် ဒူပ် ဘန်ဒါပ် နွန်၊ ဝီ လူင် ဘ့လာက် နာ တေတ့် ဒူင် ကွယ် မိူင် လူဆာ အီ စိူဝ် ဘော မိူင် ဘေဒါအေန်။ န့ ဘော လူင် ဘော ဒီ မိူင် အာဒါရာအာဒါ အီ ကွယ် ခူပ် ဒင် နွန် ဘ့လာက် နာ တေတ့် မိူင် ဘေတ်ဟုဝ်ရုန်။

14 ကာအုန် ကာဒါယ် ဂေ တီ ဘော ဝီ ဝိတ့် ဝိဝ် ဘ့လာက် နာ တေတ့်၊ ဘော ဟာဝ် ဘ့လာက် နာ ဂေတ့် ဆီငဲ၊ ဝီ ဟာဝ် ဆိူတ် ဒီ မိူင် ကီရီယာတ်ဘာလ အီ စိူဝ် ဘော မိူင် ကီရီယာတ်ယာရိမ်၊ အီ မုး ဒူင် ကွယ် ဂေ ဒူအီ အာယူဒါ။ အာတီ န့ ဘော မုး ကာအုန် ကာဒါယ် ဘ့လာက် နာ ဂေတ့် ဆီငဲ။

15 ကာအုန် ကာဒါယ် ဘ့လာက် နာ တေတ့် ဘော စုး ဒီ မိူင် ကီရီယာတ်ယာရိမ် ဘ့လာက် နာ ဂေတ့် ဆီငဲ။ န့ ဘော ဟာဝ် ဇမ် ဒီ တုဝ်း အိုမ် နေဖာတော။ 16 ကာအုန် ကာဒါယ် တီ ဘော ဝီ လူင် ဒီ ဒင် နွန် အီ ကွယ် နာ အာတ့် ဒီလယ့် ဘေန်ဟီနုမ် အီ ကွယ် နာ ကွာ ဒီလယ့် ရေဖိမ်။ န့ ဒူပ် ဒီလယ့် ဘ့လဲင် ဟိန်နုမ် ဘော ဟာဝ် ဘ့လာက် နာ တေတ့် မိူင် ဂေ ဒူအီ ယေဘူဆိတ်။ န့ ဘော ဝီ ဟာဝ် လေး ဒီ ရဝ် အေရုဝ်ကေ။ 17 န့ ပီ ဝီ ဂူင် ဟာဝ် ဘ့လာက် နာ ကွာ၊ ဟာဝ် ဒီ ဒူင် စိူဝ် အေန်ဆေမေတ် ဘော ဒူင် စိူဝ် ဂေလီအူတ် အီ လာယ် ကာဆိူဝ် ဒီ န့တေန့် အီ စိူဝ် အာတူမိမ်။ န့ ဘော ဝီ လူင် ဘော ဒူင် ကွယ် မာဝ် အာပေါဟန်။ အာပေါဟာန် ဘော မုး ဂွန် အာရူဘေန်။ 18 န့ ဘော ဝီ ဟာဝ် ဒူပ် ဆန် နွန် ဘေတ်အာရာဖ ဘော လူင် ဒီ ဂ့လင် အာရာဖ။ 19 န့ ဘော ကာလုဝ်း ဟာဝ် ဘ့လာက် နာ ကွာ နွန် ဘေတ်ဟောကာလ ဘော လေး ဒီ ဂုဝ့် အိုမ် ဆယ့် ဆွင့် ဒူင် တး လိုပ် ဘ့လဲင် ယောဒါန် တွိုန် အီ မုး ကာအုန် ကာဒါယ် ဘ့လာက် နာ တေတ့်။

20 အိုမ် ဘ့လဲင် ယောဒါန် ဟဲ့ ဘဲန် ကာအုန် ဘ့လာက် နာ လေး ဆီငဲ။ ကာအုန် ကာဒါယ် တီ ဟဲ့ လဲပ် ရူပ် ကာဒါယ် ပီ ပွိုန် ဂေ ခြိုဝ် အာဘေန်ယာမ် န့ကြိုဝ်း မှဝ် န့ကြိုဝ်း အန်။

21 မိူင် ပီ အိုပ် ဂေ ခြိုဝ် အာဘေန်ယာမ် တီ၊ န့ ဘော မုး မိူင် ယေရီခုဝ်၊ မိူင် ဘေတ်ဟောကာလ၊ မိူင် အေမေက်ကာစိက်။ 22 မိူင် ဘေတ်အာရာဖ၊ မိူင် စေမာရိမ် ဘော မိူင် ဘေဒါအေန်၊ 23 မိူင် အာဝိန်၊ မိူင် ဖာရာ၊ မိူင် အောဖာရ၊ 24 မိူင် ခေဖာဟာမော၊ မိူင် အောဖာနီ၊ ဘော မိူင် ဂီဘာ။ မိူင် ဂေ တီ မုး ဂိုဝ် ဒီ အာ မိူင် ဘော ရဝ် အီ ကွယ် ရူပ် မိူင် ဂေ တီ။

25 ဘော မိူင် ကီပွင်၊ မိူင် ရာမာ၊ မိူင် ဘေရောဆီ၊ 26 မိူင် မီဇာဖာ၊ မိူင် ခေဖီရာ ဘော မိူင် မောစာ၊ 27 မိူင် ရေခေမ်၊ မိူင် အီဖ့လဝ်၊ မိူင် တာရာလာ၊ 28 မိူင် စေလာ၊ မိူင် အေလာပ်၊ မိူင် ဒူအီ ယေဘူဆိတ် အီ မုး မိူင် ယေရူဆာလဲမ်၊ မိူင် ဂီဘီယာ ဘော မိူင် ကီရီယာတ် အီ မုး မိူင် ဂိုဝ် ဒီ ဖွုန် မိူင် ဘော ရဝ် အီ ကွယ် ရူပ် မိူင် ဂေ တီ။

အာတီ ဘော မုး ကာဒါယ် ခါဂုန် ဂေ ဒူအီ အာဘေန်ယာမ် န့ကြိုဝ်း မှဝ် န့ကြိုဝ်း အန်။