1 အာနီ မုး ကာဒါယ် ပီ လာယ် ကာဆာင် ဂေ ခဲင် ခြိုဝ် အာမာနာဆေ အီ မုး ဂွန် ဂိန့် အာယုဝ် တွိုန်။ ဂွန် ဂိန့် အာမာနာဆေ မုး အာမာခီရာ။ အန် မုး ဂုန့် ဒင် ဂေ ဒူအီ ဂီလေအာတ်။ ဂေ ဒူအီ အာမာခီရာ ဟဲ့ ဘဲန် ဒါ ဆိုက် အီ ကျ ဒီ ကာဂုဝ်း။ ခုဝ်၊ ဂေ ဟဲ့ ပွိုန် မိူင် ဂီလေအာတ် ဘော မိူင် ဘာဆန်။ 2 ကာဒါယ် အီ ကွယ် နာ ဂေတ့် ဆီငဲ အိုမ် ဘ့လဲင် ယောဒါန်၊ ဂေ ဟဲ့ ကာယဝ်း ဒွါ ဒီ ဂေ လှုက်လှာန် အာမာနာဆေ အာဒါ ပေါ အူ ကာတဲ။ ခဲင် ခြိုဝ် ဂေ တီ၊ န့ ဘော မုး န့ကြိုဝ်း အာဘီအေစာ၊ အာဟေလေက်၊ အာဆာရီအေန်၊ အာဆေခေမ်၊ အာဟေဖာ ဘော န့ကြိုဝ်း အာဆာမီဒါ။ န့ကြိုဝ်း ဂေ တီ၊ ဂေ မုး တူတ့် ဂွန် အာမာနာဆေ အီ မုး ဂွန် အာယုဝ် တွိုန်။ ဂေ ဒွန် အီ ဟဲ့ ဘဲန် ဂိန့် န့ကြိုဝ်း မှဝ် န့ကြိုဝ်း အန်။

3 န့ ယီ မုး အာစာလောဖတ် အီ မုး ဂွန် အာဟေဖာ ဘော မုး လှာန် အာဂီလေအာတ်။ အာဂီလေအာတ် တီ ဝီ မုး ဂွန် အာမာခီရာ အီ ဝီ မုး ဂွန် အာမာနာဆေ။ လှုက်လှာန် အာမာနာဆေ အီ စိူဝ် အာစာလောဖတ် တီ၊ အန် ယီ တူ မိုဝ်း ဂွန် အီမာယ် ခေါ အူ ဝီ။ အန် မိုဝ်း မီ ဂွန် အီဘိုန့် ဒီလူယ်။ ဂွန် အန် ဂေ တီ ဘော စိူဝ် နာင် မာလာ၊ နာင် နောအာ၊ နာင် ဟောကာလာ၊ နာင် မဲက်၊ ဘော နာင် ဒီရာစာ။ 4 အီဘိုန့် ဂေ တီ ဘော ဟာဝ် ဒူင် ကွယ် ဒါ အီ လှူ ဒီ ဇဝ်ဖြာ အီ စိူဝ် အာလေအာဆာ၊ ဟာဝ် ဘော ဒီ အာယုဝ်ဆူအာ အီ မုး ဂွန် အာနုန် ဘော ဒီ ဂေ ဒါ တာင် တွိုန်။ ဂေ ဘော တဝ်း၊ “ဇဝ်ဖြာ ဟဲ့ ဟွတ့် ကာလာင် ဒီ အာမုဝ်ဆဲ၊ တဲး အန် ကာဆာင် ကာဒါယ် အီ ဘဲန် ခါဂုန် ဒီ ယေ ဒူပ် ဘီနွင် ဝေါဝဲ ယေ အီ မုး အီမာယ်။” ပါယ် တီ အာယုဝ်ဆူအာ ဘော ကာဆာင် ကာဒါယ် အီ ဘဲန် ခါဂုန် ဒီ ဂေ၊ တဲး န့ ဘော ဒူပ် ခဲ့ ပီ ပွိုန် အူကတ် အူဝါ ဂုန့် ဂေ၊ တဲး န့ ဒူပ် ဘော ပဲ့ ဟဲ့ ကာလာင် အုန် ဇဝ်ဖြာ။ 5 ပါယ် တီ ခြိုဝ် အာမာနာဆေ ဝီ ပွိုန် ကာဒါယ် ဂိုဝ် ဘုန် ဒဲင် မိူင် ဂီလေအာတ် ဂါယ် မိူင် ဘာဆန် အီ ကွယ် နာ ဂေတ့် ဆီငဲ အိုမ် ဘ့လဲင် ယောဒါန် တွိုန်။ 6 ခုဝ်၊ ဂွန် အီဘိုန့် ခဲင် ခြိုဝ် အာမာနာဆေ ဂေ တီ၊ ဂေ ဟဲ့ ပွိုန် ကာဒါယ် ဒူပ် ဝေါဝဲ ဂေ အီ မုး ဂွန် အီမာယ်။ ပါယ် တီ ကာဒါယ် ခဲင် မိူင် ဂီလေအာတ်၊ ဂေ ဟဲ့ ကာဆာင် ဒွါ ဒီ ဂွန် အာမာနာဆေ အီ ဆီ ဂိတ် အီ ညှမ် ပွိုန် ခါဂုန် ဒီ ဂေ။

7 မာန် မိူင် အာမာနာဆေ ဂေ တီ၊ န့ ဘော စုး ဒီ မိူင် အာဆေန် ဟာဝ် ဒီ မိူင် မေတ်မေဆာ အီ ကွယ် ဘ့လာက် နာ လေး ဆီငဲ မိူင် ဆေခေမ်။ ကာအုန် ကာဒါယ် ဂေ တီ ဘော ဟာဝ် ဘ့လာက် နာ တေတ့် ဘော လဲပ် မိူင် ထာဘုဝ် တွိုန်။ 8 ခြိုဝ် အာမာနာဆေ ဟဲ့ အိုပ် ကာဒါယ် အီ ကွယ် ခူပ် မိူင် ထာဘုဝ်။ မာလဲ၊ ဂေ ယီ တူ အိုပ် မိူင် ထာဘုဝ် တီ။ ဂေ ဒူအီ အာအေဖာရိမ် ယီ ဟဲ့ အိုပ်။ 9 ကာအုန် ကာဒါယ် ဂေ တီ ဘော ဝီ လူင် ဒီ ရူင် အိုမ် ကာနာ ဘော ဒီ မိူင် အီ ကွယ် ဘ့လာက် နာ တေတ့် ရူင် တီ။ ဂေ ခြိုဝ် အာအေဖာရိမ် ဟဲ့ ပွိုန် ဒီ အိုပ် မင် ပ့လုဝ့် အီ ကွယ် ကာတဲ မိူင် အာမာနာဆေ တီ။ ကာအုန် ကာဒါယ် အာမာနာဆေ ယီ လူင် နာ ကွာ ရူင် အိုမ် တီ ဘော ဝီ ဟာဝ် ဆိူတ် ဒီ အိုမ် နမ်မုက်ဆာရာ။ 10 ဒူအီ အာအေဖာရိမ် ဟဲ့ အိုပ် ကာဒါယ် ဘ့လာက် နာ တေတ့်။ ဒူအီ အာမာနာဆေ ဘော အိုပ် ကာဒါယ် ဘ့လာက် နာ ကွာ။ အိုမ် နမ်မုက်ဆာရာ ဟဲ့ ဘဲန် ကာအုန် အာမာနာဆေ ကော ဇမ် ဒီ ဒူင် ကွယ် ဒူအီ အာဆေန် ဘ့လာက် နာ ကွာ။ န့ ဘော ဇမ် ဒီ ကာဒါယ် ဒူအီ အာအီဆာခါ ဘ့လာက် နာ တေတ့်။

11 မာန် မိူင် အာမာနာဆေ အီ ကွယ် ဒီ ကာတဲ မိူင် အာအီဆာခါ ဂါယ် မိူင် အာဆေန် တီ ဘော မုး မိူင် ဘေတ်ဆဲအန် ဘော မိူင် အီပါလမ်။ န့ ဘော ဘာ ဂေ ဒူအီ ခဲင် မိူင် ဒေါရာ၊ မိူင် အိန်တောလ၊ မိူင် ထာနက်၊ မိူင် မီကီတော ဘော ရဝ် အီ ကွယ် ရူပ် မိူင် ဂေ တီ။

12 ဒူအီ ခြိုဝ် အာမာနာဆေ တူ ပဲ ဒီ ဟုဝ် တဝ် ဂေ ဒူအီ အီ ကွယ် ခဲင် မိူင် ဂေ တီ။ အီ မုး ဒူအီ အာမျုဝ် ကာနန့်၊ ဂေ တူ လေး ဒူင် ကွယ် ဂေ တီ။

13 မာလဲ၊ ဝါယ် ဟဲ့ ဘြဲ ကိူန် ဂေ ဒူအီ အီဆာရေလ ဘော မိုဝ်း ပ့လူမ် မိုဝ်း ဟဲန့်၊ ဂေ ဘော ခါနှာပ် ဒူအီ ကာနန့် ဂေ တီ၊ တဲး ဂေ ဘဲန် မှာယ် ဂေ၊ ရန့် ဂါန် ဒွါ ဒီ ဂေ။ ဂေ ယီ တူ ဟုဝ် တဝ် ဒူအီ အာမျုဝ် ကာနန့် ဂေ တီ။

14 လှုက်လှာန် ခြိုဝ် အာယုဝ် ဝီ ကာလာင် ဒီ အာယုဝ်ဆူအာ တဝ်း၊ “ယေ ဟဲ့ ဝီ ဘဲန် ဒူအီ ကိူန်။ ခုဝ်၊ ဇဝ်ဖြာ ဟဲ့ မွင့်ကာရာ ဒွါ ဒီ ယေ။ မှဝ် န့ ပါယ် ပီ ဝီ ဒွါ မဲ ကာဒါယ် မီ အူ ဘုန် ဒီ ယေ။း”

15 အာယုဝ်ဆူအာ ဝီ တဝ်း ဒီ ဂေ၊ “ကူပ် ဟဲ့ ဘဲန် ဘေ ဒူအီ ကိူန် ကာဆဝ်၊ န့ ဟဲ့ မှာန်၊ မာန် မိူင် ကာတဲ နွန် အာအေဖာရိမ် မိူဝ် ဟဲ့ ကာချီ့၊ အာဝ် ဟူ ကူပ် ကွယ် ဘေ။ တဲး ဘေ ဝီ ဟုဝ့် ဒုဝ်း ယး ပြဲ အာဒါ ဘေ အီ ကွယ် ခဲင် မိူင် ဒူအီ ဖေရေဆိတ် ဘော ဒူအီ ရာဖာတ် တွိုန်။”

16 ဂေ မိူဝ် ဝီ တဝ်း၊ “နွန် အာအေဖာရိမ် တီ တူ ဂ့လိုမ် အာဒါ ယေ။ ပီ ဘော ပါယ် တီ မိူဝ်၊ ဂေ ဒူအီ ကာနန့် အီ ကွယ် ခဲင် ဂ့လင် ဘော ဂေ အီ ကွယ် ခဲင် မိူင် ဘေတ်ဆဲအန် ဘော ခဲင် ရဝ် အီ ကွယ် ရူပ် မိူင် တီ ဘော ဂေ အီ ကွယ် ဒူပ် ဒီလယ့် ယေစာရေလ၊ ဂေ ဟဲ့ မိုဝ်း လက်လဝ် ဟိန်။”

17 အာယုဝ်ဆူအာ ဝီ ကာလာင် ဒီ ဂေ ခြိုဝ် အာအေဖာရိမ် ဘော ခြိုဝ် အာမာနာဆေ အီ ကွယ် ဘ့လာက် နာ ဂေတ့် ဆီငဲ တီ တဝ်း၊ “ကူပ် ဟဲ့ ဘဲန် ဘေ ဒူအီ ကိူန်၊ ဟဲ့ မိုဝ်း ပ့လူမ် မိုဝ်း ဟဲန့် ပါယ် တီ ဘေ လုဝ် ပွိုန် လွှိုမ် အာဒါ အူ ဘုန်။ 18 ခဲ့ မိုဝ်း ကာဒါယ် အီ ကွယ် ဒီ နွန် ဟဲ့ ဘဲန် တူတ့် မိူင် ဘေ။ န့ ပီ ဘော မုး နင် ပြဲ မိူဝ်၊ တဲး ဘေ ဒုဝ်း ယး စုး ကာတုဝ့် နာ နီ၊ တဲး န့ ကော ဇမ် ကာတုဝ့် နာ ဒွယ်။ ဒူအီ ကာနန့် ဂေ တီ၊ ဂေ ပီ ဘော ဟဲ့ မိုဝ်း လက်လဝ် ဟိန်၊ ဟဲ့ ပွိုန် ကာဂုဝ်း ဘော ဟဲ့ မိုဝ်း ပ့လူမ် မိုဝ်း ဟဲန့် ကိူန် လွှိုမ် ဘေ မိူဝ်၊ ဘေ ယီ ဒီ ပွိုန် ဒီ ဟုဝ် တဝ် ဂေ။”