1 ကာဒါယ် ပီ လာယ် ကာဆာင် ဂေ အီ မုး လှုက်လှာန် အာယုဝ်၊ န့ ဘော စုး ဒီ ဘ့လဲင် အိုမ် ယောဒါန် အီ ကွယ် ခူပ် မိူင် ယေရီခုဝ် ဒီ တုဝ်း အိုမ် ယေရီခုဝ် အီ ကွယ် ဘ့လာက် နာ လေး ဆီငဲ။ န့ ဘော ဝီ လိုပ် ဟာဝ် ဘော ခဲင် ပြဲ ကာဟဝ်း၊ ဝီ ဟုဝ့် ဇမ် ဒီ မိူင် အီ ကွယ် ဒီ နွန်၊ အီ မုး မိူင် ဘေဒါအေန် အီ စိူဝ် ဘော လူဆာ။ 2 န့ ပီ ဝီ စုး ဒီ တီ ဘော ဟာဝ် ဇမ် ကာဒါယ် ဂေ ဒူအီ အာခိတ် အီ ကွယ် ဒီ မိူင် အာတာရာတ်။ 3 န့ ပီ ဝီ လူင် ဘော ဘ့လာက် နာ ဂေတ့် ဆီငဲ၊ ကော ဝီ ဇမ် ကာဒါယ် ဒူအီ အာမျုဝ် ယာဖာလေထိတ်၊ ကော ဝီ ဟာဝ် ဇမ် ဘော ဒီ မိူင် ဘေတ်ဟုဝ်ရုန်။ ဘ့လာက် နာ တေတ့်၊ န့ ဘော ဟာဝ် ဇမ် ဒီ မိူင် ကေစာ ဘော ဟာဝ် ဆိူတ် ဒီ အိုမ် နမ်မုက်ဆာရာ။

4 ပါယ် တီ ဂေ လှုက်လှာန် အာယုဝ် အီ မုး ခြိုဝ် အာအေဖာရိမ် ဂါယ် ခြိုဝ် အာမာနာဆေ အီ ကွယ် ဘ့လာက် နာ ဂေတ့် ဆီငဲ၊ ဂေ ဟဲ့ ပွိုန် ကာဒါယ် တီ အီ ဘဲန် ခါဂုန် ဒီ ဂေ။

5 ကာအုန် ကာဒါယ် ဂေ ဒူအီ ခြိုဝ် အာအေဖာရိမ် အီ ဒူပ် န့ကြိုဝ်း မှဝ် န့ကြိုဝ်း အန်၊ န့ ဘော စုး ဒီ မိူင် အာဒါရာအာဒါ၊ ဝီ ဟုဝ့် နာ လေး ဆီငဲ၊ ဝီ ဟာဝ် ဇမ် ဒီ မိူင် ဘေတ်ဟုဝ်ရုန် ဘ့လာက် နာ ကွာ။

6 ကာအုန် ကာဒါယ် တီ၊ န့ ဘော ဟာဝ် ဇမ် ဘော ဒီ အိုမ် နမ်မုက်ဆာရာ ဘ့လာက် နာ ကွာ မိူင် မေတ်မေဆာ။ န့ ပီ ဝီ ဂူင် ဟာဝ် နာ လေး ဆီငဲ၊ ကော ဇမ် ဒီ မိူင် တာနိတ်ဆီလုဝ်။ န့ ဘော ကာလုဝ်း ဟာဝ် မိူင် တီ၊ ကော ဝီ ဇမ် ဒီ မိူင် ယာနော အီ ကွယ် ဘ့လာက် နာ လေး ဆီငဲ။ 7 န့ ဝီ လူင် ဇမ် ဒီ မိူင် အာတာရာတ် ဘော ဒီ မိူင် နာရာ၊ ကော ဝီ ဟာဝ် ဇမ် ဒီ မိူင် ယေရီခုဝ်၊ ဝီ ဟာဝ် ဆိူတ် ဒီ အိုမ် ဘ့လဲင် ယောဒါန်။ 8 ကာအုန် ကာဒါယ် ဂေ တီ န့ ဘော စုး ဒီ မိူင် ထာဘုဝ် ဝီ လူင် နာ ဂေတ့် ဆီငဲ၊ ဇမ် ဒီ ရူင် ဘ့လဲင် ကာနာ၊ ဘော ဝီ ဟာဝ် ဆိူတ် ဒီ အိုမ် နမ်မုက်ဆာရာ။ အာနီ န့ ဘော မုး ကာအုန် ကာဒါယ် ဂေ ခြိုဝ် အာအေဖာရိမ် ဒူပ် န့ကြိုဝ်း မှဝ် န့ကြိုဝ်း အန်။ 9 ရဝ် ဂေ ဘော မိူင် ဂေ ဆီ မိုဝ်း အီ ကွယ် ဘော ခဲင် ကာဒါယ် အာမာနာဆေ။ ဂေ ယီ ဟဲ့ အုန် အာဒါ ဂေ ခဲင် ခြိုဝ် အာအေဖာရိမ် တီ။

10 ဂေ ယီ တူ ဟုဝ် တဝ် ဒူအီ ကာနန့် အီ ကွယ် ခဲင် မိူင် ကေစာ။ ဒူအီ အာမျုဝ် တီ၊ ဘော ကွယ် ရိုမ် ဒူပ် ဒူအီ အာအေဖာရိမ် ကော ဇမ် အာတိုဝ် နီ။ ဂေ ဘော ခမ် ဒီ ဘဲန် မှာယ်၊ ခမ် ဒီ ရန့် ဂါန်၊ ဒွါ ဒီ ဒူအီ အာအေဖာရိမ် ဂေ တီ။