1 ကာအုန် ကာဒါယ် ပီ လာယ် ကာဆာင် ဂေ ဒီ ဒူအီ အာယူဒါ ဒီ န့ကြိုဝ်း ဂေ ဒွန် န့ကြိုဝ်း န့ ဘော ဇမ် ဒီ ကာအုန် ကာဒါယ် မိူင် အေဒူမ် အီ မုး ပြဲ ကာဟဝ်း စီနာ၊ အီ ကွယ် ဘ့လာက် နာ တေတ့် ဆိူတ်။

2 ကာအုန် ကာဒါယ် ဂေ ဘ့လာက် နာ တေတ့် တီ န့ ဘော စုး ဒီ ဂုဝ့် အိုမ် ဒိုင် ဆယ့် ဆွင့် ဘ့လာက် နာ တေတ့်။ 3 န့ ဘော ဟာဝ် ဘ့လာက် နာ တေတ့် န့တေန့် ကာတဲ နွန် အီ စိူဝ် အာရာဘိမ်၊^a ကော ဝီ ဟာဝ် ဇမ် ခဲင် ပြဲ ကာဟဝ်း အီ စိူဝ် စီနာ။ န့ ဘော ဟာဝ် ဘ့လာက် နာ တေတ့် မိူင် ကာဒေဘာနာ။ န့ ပီ ဝီ ဟာဝ် ဘော ဒီ ဒူင် စိူဝ် ဟေဇာရူန်၊ ပီ ဝီ ဟုဝ့် ဇမ် ဘော ဒီ ဒူင် စိူဝ် အာဒါရာ။ ဟဲ့ ဟွတ့်၊ န့ ဝီ လဲပ် ဟာဝ် ဘော ဒီ ဒူင် စိူဝ် ကာက။ 4 န့ ဘော ဝီ ဟာဝ် ဒူပ် န့တေန့် အီ ဟာဝ် ဒီ ဒူင် စိူဝ် အာစာမူန် ဘော ဟာဝ် ဇမ် ဒီ ဒီလယ့် မိူင် အဲဂိုပ်၊ ဝီ ဟာဝ် ဇမ် ဒီ အိုမ် နမ်မုက်ဆာရာ။ န့ ဘော မုး ကာအုန် ကာဒါယ် ဂေ ဒူအီ အာယူဒါ အီ ကွယ် ဆိူတ် ဘ့လာက် နာ တေတ့်။

5 ကာအုန် ကာဒါယ် အီ ကွယ် ဘ့လာက် နာ လေး ဆီငဲ န့ ဘော ဒူပ် အိုမ် ဒိုင် ဆယ့် ဆွင့်၊ ဘော ဝီ ဟုဝ့် ဇမ် ဒူင် တး လိုပ် အိုမ် ဘ့လဲင် ယောဒါန်။ ကာအုန် ကာဒါယ် ဘ့လာက် နာ ကွာ၊ န့ ဘော စုး ဒီ ဒူင် လိုပ် အိုမ် ဘ့လဲင် ယောဒါန် တီ၊ 6 ဝီ ဟာဝ် ဇမ် ဒီ ဒူင် စိူဝ် ဘေတ်ဟောကာလ၊ ပီ ဝီ ဟုဝ့် ဘ့လာက် နာ ကွာ၊ ဇမ် ဒီ ဒူင် စိူဝ် ဘေတ်အာရာဖ၊ ပီ ဝီ ဟာဝ် ဒူင် ကွယ် မာဝ် အာပေါဟန်။ အာပေါဟန် တီ ဘော မုး ဂွန် အာရူဘေန်။ 7 ကာအုန် တီ ပီ ဝီ လေး ဟာဝ် ဒူပ် ဒီလယ့် အာခေါ၊ ဝီ ဟုဝ့် ဒီ မိူင် ဒေဘီရာ၊ ပီ ဝီ ဝိတ့် ဟုဝ့် ဘ့လာက် နာ ကွာ ဒီ မိူင် ဂီလဂါ အီ လာယ် ကာဆိူဝ် ဒီ န့တေန့် အီ စိူဝ် အာတူမိမ်၊ အီ ကွယ် ဘ့လာက် နာ တေတ့် ဒီလယ့် တီ။ န့ ပီ ဝီ ဟာဝ် ဘော ဒီ တုဝ်း အိုမ် အေနေဆေမေတ်၊ ဘော ဇမ် ဒီ တုဝ်း အိုမ် အီရောကီလာ။ 8 န့ ဘော ဟုဝ့် ဒူပ် ဒီလယ့် ဘေန်ဟီနုမ် အီ ကွယ် ဘ့လာက် နာ ကွာ နွန် ဒူင် ဒဲ ဂေ ဒူအီ ယေဘူဆိတ် မိူင် တာင် အီ မုး မိူင် ယေရူဆာလဲမ် တွိုန်။ ကာအုန် ကာဒါယ် တီ န့ ဘော ဟာဝ် ဒီ ကာဒဲ့ နွန် အီ ကွယ် နာ လေး ဆီငဲ ဒီလယ့် ဘ့လဲင် ဟိန်နုမ် အီ ကွယ် ဘ့လာက် နာ ကွာ ဘ့လဲင် ရေဖိမ်။ 9 န့ ပီ ဝီ စုး ဒီ တီ၊ ဝီ လူင် ဒီ တုဝ်း အိုမ် ဘ့လဲင် နေဖာတော၊ ပီ ဝီ ဟာဝ် ဒီ မိူင် ဂေ အီ ကွယ် ခူပ် နွန် အာဖေရူန်၊ ဝီ လူင် ဇမ် ဒီ မိူင် ဘာအာလာ အီ စိူဝ် ဘော ကီရီယာတ်ယာရိမ်။ 10 ပန် တီ န့ ဘော လဲပ် ဟာဝ် ဘ့လာက် နာ ဂေတ့် ဆီငဲ၊ ကော ဝီ ဟာဝ် ဇမ် ဒီ နွန် ဆေအီ။ ဟဲ့ ဟွတ့်၊ န့ ဘော ဟုဝ့် ဘ့လာက် နာ ကွာ နွန် ယာရိမ် အီ စိူဝ် ဘော နွန် ဒေဆာလူန်။ န့ ဘော ဝီ လူင် ဇမ် ဒီ မိူင် ဘေတ်ဆေမေတ် ဘော ကာလုဝ်း ဒီ မိူင် ထီမာနာ။ 11 ကာအုန် ကာဒါယ် တီ ဘော ဟာဝ် ဒီ နွန် အီ ကွယ် နာ ကွာ မိူင် အေခြူန်၊ ပီ ဝီ ဟာဝ် ဒီ ဒူင် စိူဝ် ဆီခေရူန်။ န့ ဘော ကာလုဝ်း နွန် ဘာအာလာ၊ ဝီ ဟာဝ် ဇမ် မိူင် ယာပါနေလာ။ ဟဲ့ ဟွတ့်၊ န့ ဘော ဟာဝ် ဇမ် ဒီ အိုမ် နမ်မုက်ဆာရာ။

12 ကာအုန် ကာဒါယ် ဘ့လာက် နာ ဂေတ့် ဆီငဲ၊ န့ ဘော ဒူပ် ဘာင် အိုမ် နမ်မုက်ဆာရာ။ အာတီ ဟဲ့ ဘဲန် ကာအုန် ကာဒါယ် ဂေ ခြိုဝ် အာယူဒါ န့ကြိုဝ်း မှဝ် န့ကြိုဝ်း အန်။

13 ဇဝ်ဖြာ ဟဲ့ ဟွတ့် ကာလာင် ဒီ အာယုဝ်ဆူအာ၊ တဲး အန် အာပ် ဒွါ မိူင် ယူဒါ အာဒါ အူ ပွတ် ဒီ အာဂါလိပ် အီ မုး ဂွန် အာယေဖုဝ်နာ ခဲင် ခြိုဝ် အာယူဒါ တွိုန်။ အန် ဟဲ့ ပွိုန် မိူင် ကီရီယာတ်အာဘာ အီ မုး မိူင် ဟေဘြုဝ်။ န့ ဘော မုး ကာဒါယ် ပီ ဒွိုမ် အိုပ် အာဘာ အီ မုး ဂုန့် ဒင် အာနာက် တွိုန်။ 14 အာဂါလိပ် ဘော ဟုဝ် တဝ် လှုက်လှာန် အာနာက် အီ မုး န့ကြိုဝ်း အာဆေမ်ဆေ၊ န့ကြိုဝ်း အာဟီမာန် ဘော န့ကြိုဝ်း အာတာလာမ်၊ တဲး ဂေ လေး ခဲင် မိူင် တီ။ 15 အန် ပီ ဝီ ရဲန် ဆိုက်၊ ဟာဝ် ကာဂုဝ်း ဒီ မိူင် ဒေဘီရာ။ မိူင် တီ ဟဲ့ ဒွိုမ် စိူဝ် မိူင် ကီရီယာတ်ဆောဖာ။ 16 အာဂါလိပ် ဝီ တဝ်း၊ “အာဆေ ဟဲ့ ကာဂုဝ်း ပွိုန် မိူင် ကီရီယာတ်ဆောဖာ တီ၊ အုဝ် ဒီ အာပ် ဂွန် ဒီဘျာ အုဝ် အီ စိူဝ် နာင် အေဆော၊ တဲး အန် ဘဲန် အီဘိုန့် ဝီ တီ။” 17 ပါယ် တီ အာအောဆန်ယေလာ အီ မုး ဂွန် ဝါ အာဂါလိပ် အီ စိူဝ် အာခေနာတ်၊ အန် ဘော ကာဂုဝ်း ဘော ပွိုန် မိူင် တာင် တီ။ အာဂါလိပ် ဘော အာပ် ဒွါ နာင် အေဆော ဒီ အန်။

18 အူ ဆီငဲ၊ ဒေါ တး ကွယ် နာင် အေဆော ဒီ အီမာယ် အန်၊ အန် ဘော ကာဆုး အီမာယ် အန်၊ တဲး အန် မှာန့် ကာဒါယ် ဒီ ဂုန့် အန်။ နာင် အေဆော ဘော ဟာဝ် ဒူင် ကွယ် ဂုန့် အန်။ ဒေါ လူင် အန် ဒီ မာလာ အန်၊ အာဂါလိပ် ဘော ဒီမွှတ် အန် တဝ်း၊ “မာဆေ ပီ လုဝ် မဲ။း”

19 အန် ဝီ တဝ်း၊ “အုဝ် မှာန့်၊ တဲး မဲ ဒွါ ခေါဆွင် ဒီ အုဝ်။ ကာဒါယ် ပဲ့ ဟဲ့ ဒွါ မဲ ဂုန့် ဒီ အုဝ် တွိုန်၊ န့ ကွယ် နာ တေတ့် ဘော မုး ဒူင် ကာဟဝ်း ကာဆဝ်။ အုဝ် မှာန့်၊ တဲး မဲ ဒွါ ဘော ဒူင် မိုဝ်း အိုမ် တုဝ်း ဒီ အုဝ်။” ပါယ် တီ အာဂါလိပ် ဘော ဒွါ ကာဒါယ် အီ မိုဝ်း အိုမ် တုဝ်း ဒီ အန် အီ ကွယ် ဘ့လာက် နာ တေတ့် ဘော ဘ့လာက် နာ ကွာ။

20 အာနီ န့ ဘော မုး ကာဒါယ် ပဲ့ ဟဲ့ ပွိုန် ဂေ ဒူအီ ခဲင် ခြိုဝ် အာယူဒါ ဒွန် န့ကြိုဝ်း၊ ဒွန် န့ဟူမ်၊ တဲး န့ ဘဲန် ခါဂုန် ဒီ ဂေ။

21 မိူင် ပဲ့ ဟဲ့ ပွိုန် ဂေ တီ အီ ကွယ် ဘ့လာက် နာ တေတ့် ဆိူတ် န့ ဘော လာယ် ကာချြီ့ ဒီ ကာအုန် ကာဒါယ် မိူင် အေဒူမ်။ န့ ဘော မုး မိူင် ကာဘာဇေလ၊ မိူင် အေဒေ၊ မိူင် ယာကူရာ၊ 22 မိူင် ကီနာ၊ မိူင် ဒီမောနာ၊ မိူင် အာတတာ၊ 23 မိူင် ကေဒေဆ၊ မိူင် ဟာစော၊ မိူင် အီထာနန်၊ 24 မိူင် စီဖ ဘော မိူင် ကေဒေဆ၊ မိူင် ဘေလုတ်၊ 25 မိူင် ဟာဇောဟာတတ်တာ၊ မိူင် ကီရာအုတ်ဟေဇာရူန် အီ စိူဝ် ဘော မိူင် ဟာစော၊ 26 မိူင် အာမာမ် ဘော မိူင် ဆေမာ၊ မိူင် မောလာဒါ၊ 27 မိူင် ဟာဇောကာတာ၊ မိူင် ဟေစမူန်၊ မိူင် ဘေတ်ဘ့လေိတ်၊ 28 မိူင် ဟာဇာဆူအာန်၊ မိူင် ဘီရာဆေဘာ၊ မိူင် ဘေစာဆာယာ။ 29 မိူင် ဘာအာလာ ဘော မိူင် လိမ်၊ မိူင် အေဇေမ်၊ 30 မိူင် အေလာတောလာတ်၊ မိူင် ခေဆီလာ၊ မိူင် ဟောမ၊ 31 မိူင် ဇီကာလာတ်၊ မိူင် မာတာမဲနာ၊ မိူင် ဆန်ဆာနာ၊ 32 မိူင် ယေပွတ်၊ မိူင် ဆီလာဟိမ်၊ မိူင် အာအိန် ဘော မိူင် ရိမ်မူန်။ မိူင် ဂေ တီ ဘောကာဂ့လျီတ် ဘော ရဝ် အီ ကွယ် နာ ရေတ့် မိူင် တီ၊ ဂေ ကွယ် အာ ဂိုဝ် ဒီ ဒိမ် မိူင်။

33 မိူင် အီ ကွယ် ခဲင် ဂ့လင် အီ ကွယ် နာ ဂေတ့် ဆီငဲ၊ န့ ဘော မုး မိူင် အေဆာတောလာ၊ မိူင် ဇုဝ်ရာ၊ မိူင် အာဆာနာ၊ 34 မိူင် စာနော၊ မိူင် အေန်ကာနိမ်၊ မိူင် ထာဘုဝ်၊ မိူင် အေနမ်၊ 35 မိူင် ယာမူတ်၊ မိူင် အာတူလမ်၊ မိူင် ဆောခေါ၊ မိူင် အာစေကာ၊ 36 မိူင် ဆာရိမ်၊ မိူင် အီတီဆိမ် ဘော မိူင် ကေတီရာ အီ ဘော စိူဝ် မိူင် ကာတဲရာဆိမ်။ မိူင် ဂေ တီ ဘောကာဂ့လျီတ် ဘော ရဝ် ဂေ အီ ကွယ် နာ ရေတ့် မိူင် ဂေ တီ၊ ဂေ ကွယ် ဂိုဝ် ဒီ ဖွုန် မိူင်။

37 ဒဲင် တီ၊ ဘော မုး မိူင် စေရာန်၊ မိူင် ဟာတာဆ၊ မိူင် မိက်တာလာကတ်၊ မိူင် အာဆန်၊ 38 မိူင် တီလာန်၊ မိူင် မီဇာဖာ၊ မိူင် ယူက်ထေလ၊ 39 မိူင် လာခိတ်၊ မိူင် ပေါစာကာတ်၊ မိူင် အေကာလွန်၊ 40 မိူင် ခါဘူန်၊ မိူင် လာမာတ်၊ မိူင် ကီဒိတ်၊ 41 မိူင် ကေတာရုတ်၊ မိူင် ဘေတ်ဒါဂူန်၊ မိူင် နာမာ ဘော မိူင် မီကာတာ။ မိူင် ဂေ တီ ဘောကာဂ့လျီတ် ဘော ရဝ် ဂေ အီ ကွယ် နာ ရေတ့် မိူင် ဂေ တီ၊ ဂေ ကွယ် ဂိုဝ် ဒီ ဒဝ် မိူင်။

42 ဒဲင် တီ န့ ဘော မုး မိူင် လီပါနာ၊ မိူင် အေဆာ၊ မိူင် အာဆာန်၊ 43 မိူင် ယီဖာတ်၊ မိူင် အာဆာနာ၊ မိူင် နေစိပ်၊ 44 မိူင် ဂီလ၊ မိူင် အာခါစိပ် ဘော မိူင် မာရေဆာ။ မိူင် ဂေ တီ ဘောကာဂ့လျီတ် ဘော ရဝ် အီ ကွယ် ရူပ် မိူင် တီ၊ ဂေ ကွယ် ဒိမ် မိူင်။

45 န့ ဘော မုး မိူင် အေခြူန် ဘော ရဝ် အီ ကွယ် ရူပ် မိူင် ဂေ တီ။ 46 စုး ဒီ မိူင် အေခြူန် တီ၊ ကော ဝီ ဟာဝ် ဇမ် ဘ့လာက် နာ ဂေတ့် ဆီငဲ ဒီ အိုမ် နမ်မုက်ဆာရာ ဒူင် ကွယ် ကာချြီ့ ဒီ ထုင် မိူင် အာစုတ်။ 47 ဘော မိူင် အာစုတ် ဘော မိူင် ဂါဆာ ဘော ရဝ် အီ ကွယ် ကာတတ် မိူင် ဂေ တီ ဘောကာဂ့လျီတ်၊ ကော ဝီ ဟာဝ် ဇမ် ဒီ ဒီလယ့် မိူင် အဲဂိုပ် ဘော ဒီ ဘာင် အိုမ် နမ်မုက်ဆာရာ။

48 မိူင် အီ ကွယ် ဒဲင် နွန် မိူဝ်၊ န့ ဘော မုး မိူင် ဆာမီရာ၊ မိူင် ယာတီရာ၊ မိူင် ဆောခေါ၊ 49 မိူင် တာနာ၊ မိူင် ကီရီယာတ်ဆောဖာ အီ စိူဝ် ဘော မိူင် ဒေဘီရာ၊ 50 မိူင် အာနာပ်၊ မိူင် အေတာဆာမော၊ မိူင် အာနိမ်၊ 51 မိူင် ဂုဝ်ဆေန်၊ မိူင် ဟောလူန် ဘော မိူင် ကီလုဝ်။ မိူင် ဂေ တီ ဘောကာဂ့လျီတ် ဘော ရဝ် အီ ကွယ် ရူပ် မိူင် ဂေ တီ၊ ဂေ ကွယ် ဂိုဝ် ဒီ အူ မိူင်။

52 ဒဲင် တီ န့ ဘော မုး ဘော မိူင် အာရာပ်၊ မိူင် ဒူမာ၊ မိူင် အေဆန်၊ 53 မိူင် ယာနိန်၊ မိူင် ဘေတ်ထာဘုဝ်၊ မိူင် အာလူမာဖေတ်၊ 54 မိူင် ဟူမ်တာ၊ မိူင် ကီရီယာတ်အာဘာ အီ စိူဝ် ဘော မိူင် ဟေဘြုဝ် ဘော မိူင် စီအောရာ။ မိူင် ဂေ တီ ဘောကာဂ့လျီတ် ဘော ရဝ် အီ ကွယ် ရူပ် မိူင် ဂေ တီ၊ ဂေ ကွယ် ဒိမ် မိူင်။ 55 ဒဲင် တီ၊ န့ ဘော မိုဝ်း မိူင် မောန၊ မိူင် ဂါမေလ၊ မိူင် စီဖ၊ မိူင် ယူထာ၊ 56 မိူင် ယေစာရေလ၊ မိူင် ယောကာဒမ်၊ မိူင် စာနော၊ 57 မိူင် ကာအီန၊ မိူင် ဂီဘီယာ ဘော မိူင် ထီမာနာ။ မိူင် ဂေ တီ ဘောကာဂ့လျီတ် ဘော ရဝ် အီ ကွယ် ရူပ် မိူင် တီ၊ ဂေ ကွယ် ဂိုဝ် မိူင်။

58 ဒဲင် တီ န့ ဘော မုး မိူင် ဟာလဟူ၊ မိူင် ဘေတ်ဇူရာ၊ မိူင် ကေတော၊ 59 မိူင် မာရာတ်၊ မိူင် ဘေတ်အာနူတ် ဘော မိူင် အေလာခူန်။ မိူင် ဂေ တီ ဘောကာဂ့လျီတ် ဘော ရဝ် အီ ကွယ် ရူပ် မိူင် ဂေ တီ၊ ဂေ ကွယ် ဒဝ် မိူင်။

60 ဒဲင် တီ န့ ဘော မုး မိူင် ကီရီယာတ်ဘာလ အီ စိူဝ် ဘော မိူင် ကီရီယာတ်ယာရိမ် ဘော မိူင် ရာဘာ ဘော ရဝ် အီ ကွယ် ရူပ် မိူင် ဂေ ဘောကာဂ့လျီတ်၊ ဂေ ကွယ် အာ မိူင်။

61 မိူင် အီ ကွယ် ခဲင် ပြဲ ကာဟဝ်း မိူဝ်၊ န့ ဘော မုး မိူင် ဘေတ်အာရာဖ၊ မိူင် မီတိန်၊ မိူင် ဆေကကာ၊ 62 မိူင် နီဆန်၊ မိူင် ဆယ့် ဘော မိူင် အေန်ကေဒီ။ မိူင် ဂေ တီ ဘောကာဂ့လျီတ် ဘော ရဝ် အီ ကွယ် ရူပ် မိူင် ဂေ တီ ဂေ ကွယ် ဒဝ် မိူင်။

63 ပီ ဘော ဟဲ့ ပါယ် တီ မိူဝ်၊ ဂေ ဒူအီ ခြိုဝ် အာယူဒါ ယီ တူ ပွိုန် ဟုဝ် တဝ် ဂေ ဒူအီ ယေဘူဆိတ် အီ ကွယ် ခဲင် မိူင် ယေရူဆာလဲမ် ဒေါ မှဝ်။ ခုဝ် အန် တီ၊ ကော ဇမ် အာတိုဝ် ဂေ ဒူအီ ယေဘူဆိတ် ဘော ပွိုန် ဒီ ကွယ် ကာဆူ ကာဝ်ု ဒူပ် ဂေ ဒူအီ ခြိုဝ် အာယူဒါ။