1 အာနီ န့ မုး လွင် အာယုဝ်ဆူအာ ဒိုဝ်း ကာဒါယ် မိူင် ကာနန့် အီ ကွယ် ဘ့လာက် နာ ဂေတ့် ဆီငဲ အိုမ် ဘ့လဲင် ယောဒါန်၊ ဝီ ကာဆာင် ဒွါ ဒီ ဂေ ဒူအီ အီဆာရေလ။ ဒါ အီ လှူ ဒီ ဇဝ်ဖြာ အီ စိူဝ် အာလေအာဆာ ဘော အာယုဝ်ဆူအာ အီ မုး ဂွန် အာနုန် ဘော ဂေ အီ မုး ဒါ တာင် အီ အိုပ် ဒူအီ အီဆာရေလ၊ ဂေ ဘော ကာဆာင် ဒွါ ဒီ ဂေ ဒူအီ ဘောကာဂ့လျီတ်။ 2 ဂေ ကာတာမ် တဲး န့ ဒူပ် ပဲ့ ဟဲ့ ဒွိုမ် ကာလာင် ဇဝ်ဖြာ ဒီ အာမုဝ်ဆဲ တွိုန်။ ဂေ မိူဝ် ကာယဝ်း ဒွါ ဒီ ဂေ ဒူအီ အာဒါ ဒိမ် ခြိုဝ် ဒီ အူ ကာတဲ။ 3 ခုဝ်၊ အာမုဝ်ဆဲ ဟဲ့ ဟွတ့် ကာယဝ်း ဒွါ မိူင် အီ ကွယ် ဘ့လာက် နာ လေး ဆီငဲ အိုမ် ဘ့လဲင် ယောဒါန် ဒီ ဂေ ဒူအီ အာဒါ အာ ခြိုဝ် ဒီ အူ ကာတဲ။ အန် ယီ တူ ဒွါ မာဆေ ဒီ ဒူအီ ခြိုဝ် အာလေဝီ။ 4 ခြိုဝ် အာယုဝ် တွိုန် ဟဲ့ ကာယဝ်း ဘဲန် အာ ခြိုဝ်၊ န့ ဘော မုး ခြိုဝ် အာမာနာဆေ ဘော ခြိုဝ် အာအေဖာရိမ်။ အီ မုး ခြိုဝ် အာလေဝီ၊ အာမုဝ်ဆဲ ယီ တူ ဒွါ၊ တူ ကာဆာင် ကာဒါယ် ဒီ ဂေ။ ဂေ ပွိုန် မီ မိူင် ဒူင် ဒီ ကွယ် ဂေ၊ ဘော အူင့် ပေတ့်၊ ဒူင် ဒီ ဟျီင် ဂေ ဖိုင် မာဘူ ဘော ဖိုင် မာမက် ဂေ။ 5 ပါယ် တီ ဂေ ဒူအီ အီဆာရေလ ဘော ကာယဝ်း ကာဒါယ် မာန် မိူင် ဂေ တီ၊ တဲး န့ ဒူပ် ပီ ဒွိုမ် ကာလာင် အုန် ဇဝ်ဖြာ ဒီ အာမုဝ်ဆဲ တွိုန်။

6 အာဒါ အူ ဆီငဲ ဂေ ဒူအီ ခြိုဝ် အာယူဒါ မင် အီ ဘော တး ဒူင် ကွယ် အာယုဝ်ဆူအာ ဒေါ ကွယ် အန် ဒီ ဒူင် စိူဝ် ဂီလဂါ တွိုန်။ ကာတဲ ဂေ တီ မိုဝ်း အာဒါ အူ ဝီ အီ စိူဝ် အာဂါလိပ် အီ မုး ဂွန် အာယေဖုဝ်နာ အီ မုး ဒူအီ အာမျုဝ် ကေနေဆိတ်။ အန် ဘော ကာလာင် ဒီ အာယုဝ်ဆူအာ တဝ်း၊ “မဲ ဟဲ့ ဟွတ့် နပ် ဂြုဝ်း ပီ ဒမ် အုန် ဇဝ်ဖြာ ဒီ အာမုဝ်ဆဲ အီ မုး ဒူအီ ပီ အိုပ် ဇဝ်ဖြာ ဒေါ ကွယ် ဂေ ဒီ ဒူင် စိူဝ် ကာဒေဘာနာ အီ မုး လွင် မဲ ဘော အုဝ် တွိုန်။ 7 အာမုဝ်ဆဲ အီ မုး ဒဲစေန့် ဇဝ်ဖြာ ဟဲ့ ဒွိုမ် စ်ု အုဝ်၊ တဲး အုဝ် လေး ဒီ ဒူင် စိူဝ် ကာဒေဘာနာ ဝီ ဟာဝ် ချွင် ဒီ ယွတ် မိူင် နီ။ ဒေါ အန် တီ အာဆာက် အုဝ် ဟဲ့ ပွိုန် ဖွုန် ဂိုဝ် ဆီနမ်။ အုဝ် ဘော ဝီ တး၊ အုဝ် မိူဝ် ကာလာင် ဂြုဝ်း မုး၊ ဂြုဝ်း မှာန် ဒီ အာမုဝ်ဆဲ။ 8 ဂေ ဒူအီ အီ ဟာဝ် ဒူပ် အုဝ်၊ ဂေ ဟဲ့ ဘူင် တဲး နဝ်း ဒူအီ ယုဝ် ကာဆဝ်။ အုဝ် ယီ ဟဲ့ ဝီ မိုဝ်း နဝ်း ဆိူဝ် နဝ်း မှာန် ဒီ ဒူပ် ဇဝ်ဖြာ ပီ ကြိုပ် အုဝ်။ 9 ပါယ် တီ အာမုဝ်ဆဲ ဟဲ့ ဝီ ကာဆဲန့် ဒီ အုဝ် တဝ်း၊ ‘ကူပ် ဟဲ့ ဒူပ် ဆီချာ မဲ ဇဝ်ဖြာ ပီ ကြိုပ် အုဝ်၊ ကာဒါယ် ဒူင် ဟဲ့ ဟွတ့် ဟာဝ် ညဲတ့် မဲ တီ၊ န့ ဒီ ဘဲန် ခါဂုန် မဲ ဘော ခါဂုန် ဂေ လှုက်လှာန် မဲ ဆေဆေ။’

10 တဲး မဲ ဝီ ယွတ် ဒေါ တီ နီ။ ဆိန့် ကာလာင် ဇဝ်ဖြာ ဒီ အာမုဝ်ဆဲ တီ၊ ဟဲ့ ပွုန် တး ဖွုန် ဂိုဝ် ဒီ ဖန် ဆီနမ်။ ဒေါ အန် တီ ဆီငျာ ဟာဝ် ဂေ ဒူအီ အီဆာရေလ ခဲင် ပြဲ ကာဟဝ်း တွိုန်။ ဇဝ်ဖြာ မိူဝ် ဟဲ့ ဘူင် ဒူပ် ကာဒိက် ဆတ်ဇာ အန်၊ တဲး အုဝ် ဆီ မိုဝ်း အာဆာက်။ ယွတ်၊ အာဆာက် အုဝ် မိူဝ် ကော ဟဲ့ ဝီ ပွိုန် ဒါ ဂိုဝ် ဒီ ဖန် ဆီနမ်။ 11 အုဝ် ယီ ဆီ မိုဝ်း ပ့လူမ် ပီ ဒေါ စ်ု အာမုဝ်ဆဲ တီ ဒီ အုဝ်။ အုဝ် မိူဝ် ဆီ မိုဝ်း ဟဲန့် ပွိုန် ကာဂုဝ်း ဒီ ရန်ဆူ ပီ ဒေါ မွိုန်။ 12 ကူပ် န့ ပါယ် တီ အုဝ် မှာန့်၊ တဲး မဲ အာပ် ဒွါ ကာဒါယ် မိူင် အီ ကွယ် ဒီ နွန် နီ ဒီ အုဝ်၊ န့ ဘော မုး မိူင် ပဲ့ ဟဲ့ ကာဆဲန့် ဇဝ်ဖြာ ဒီ ဒွါ ဒီ အုဝ်။ မဲ မိူဝ် ဟဲ့ ယိုဝ် လွင် ဂေ ဒူအီ ဒုဝ် တာင်၊ ပ့လူမ် တာင် အီ စိူဝ် ဒူအီ အာနာခိမ်၊ အီ ကွယ် ဒီ နွန် တီ ခဲင် မိူင် အီ မိုဝ်း ရဲင် အီ မန် ဆီချာ။ ပါယ် တီ ဆေ ဇဝ်ဖြာ ကွယ် ရိုမ် ဒူပ် အုဝ်၊ အုဝ် ဒီ ဘော ပွိုန် ဟုဝ် တဝ် ဒူအီ ဂေ တီ ပီ ပဲ့ ဟဲ့ ကာလာင် အုန် ဇဝ်ဖြာ ဒေါ အန် တီ။”

13 ဟဲ့ ဟွတ့်၊ အာယုဝ်ဆူအာ ဘော မွင့်ကာရာ ဒွါ ဒီ အာဂါလိပ် အီ မုး ဂွန် အာယေဖုဝ်နာ ဘော အာပ် မိူင် ဟေဘြုဝ် တီ၊ တဲး န့ ဘဲန် ခါဂုန် အန်။ 14 ပါယ် တီ မိူင် ဟေဘြုဝ် ဘော ဘဲန် ကာဒါယ် အာဂါလိပ် အီ မုး ဂွန် အာယေဖုဝ်နာ အီ မုး အာမျုဝ် ကေနေဆိတ် ကော ဇမ် အာတိုဝ် နီ ကူပ် ဟဲ့ ဒူပ် ဆီချာ အန် ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။ 15 အာတ့် အန် တီ မိူင် ဟေဘြုဝ် ဘော စိူဝ် မိူင် ကီရီယာတ်အာဘာ။ ဒါ အာဘာ တီ ဘော မုး ဒူအီ အီ မိုဝ်း ပ့လူမ် တာင် လွှိုမ် အီ ဟဝ် ကာတဲ ဂေ ဒူအီ အာနာခိမ် တွိုန်။ ဝါယ် အန် တီ ဂေ ပွိုန် ကွယ် ဒါခိုယ်။ အာဝ် ဟူ မိုဝ်း ရန်ဆူ အီ ဒီ ကာဂုဝ်း ဒီ ဂေ။