1 ဝါယ် အန် တီ အာယုဝ်ဆူအာ ဟဲ့ ကတ် ကာဆဝ်၊ အာဆာက် အန် မိူဝ် ဟဲ့ ကိူန်။ ဒေါ အန် တီ ဇဝ်ဖြာ ဝီ တဝ်း ဒီ အန်၊ “မဲ ဟဲ့ ဟွတ့် ကတ် ကာဆဝ်။ ဒူင် ဆီ ဒီ လုဝ် ကာဂုဝ်း မိူဝ် န့ ယီ ဆီ ကိူန် ကာဆဝ်။

2 ကာဒါယ် မိူင် အီ ဆီ ဂိတ် ဂေ တီ၊ အီ မုး မိူင် ဒူင် ကွယ် ဂေ ဒူအီ ဖီလီထီ ဘော မိူင် ဒူင် ကွယ် ဂေ ဒူအီ ဂေဆူရာ ဘောကာဂ့လျီတ်။ 3 န့ ဘော စုး ဒီ ဘ့လဲင် အိုမ် ဆီဟုဝ်ရာ အီ ကွယ် နာ လေး ဆီငဲ မိူင် အဲဂိုပ် ကော ဝီ ဟာဝ် ဇမ် ဘော ကာအုန် ကာဒါယ် မိူင် အေခြူန် ဘ့လာက် နာ ကွာ။ န့ ဟဲ့ ဘဲန် တူတ့် ကာဒါယ် မိူင် ကာနန့်။ န့ မုး ဒူင် ကွယ် ဂေ ခုန်ဒီခမ် မိူင် ဖီလီထီ ဖန် ကာဒင် အီ ကွယ် မိူင် ဂါဆာ၊ မိူင် အာစုတ်၊ မိူင် အာဆာခေလူန်၊ မိူင် ဂထ၊ မိူင် အေခြူန် ဘော မိူင် အာဝေမ် အီ ကွယ် ဘ့လာက် နာ တေတ့် ဘောကာဂ့လျီတ်။ 4 န့ ယီ ဆီ မိုဝ်း ဘော မိူင် ဒူအီ ကာနန့် ဘောကာဂ့လျီတ်၊ ဘော မိူင် အာရာဟာ ဒူင် ကွယ် ဂေ ဒူအီ ဆီဒူန် တွိုန် ကော ဝီ ဟာဝ် ဇမ် ဘော မိူင် အေဖဲက် အီ ကွယ် ဒီ ကာအုန် ကာဒါယ် မိူင် ဒူအီ အာမုဝ်ရိတ်။ 5 န့ မုး ဘော မိူင် ဒူအီ ကေပါလာ ဘော မိူင် လေဘာနုန် ဘော မိူင် အီ ကွယ် ဘ့လာက် နာ လေး ဆီငဲ။ န့ ဘော စုး ဒီ မိူင် ဘာလကာတ် အီ ကွယ် နာ တေတ့် နွန် ဟေရာမူန် ကော ဝီ ဟာဝ် ဇမ် ဒီ မိူင် လေဘုဝ်ဟာမာတ်။

6 အီ မုး ဂေ ဒူအီ အာမျုဝ် ဆီဒူန် ဘောကာဂ့လျီတ် အီ ကွယ် ဒဲင် နွန် ဒီ ကာတဲ နွန် လေဘာနုန် ဂါယ် မိူင် မီဆာရာဖောဆာမိန်၊ အုဝ် အီ မုး ဇဝ်ဖြာ ဒီ ဘော ဟုဝ် တဝ် တူတ့် ဒူအီ ဂေ တီ ဒီ အာတ့် ဘေ။ ဘေ ဒီ ဘော ဒိုဝ်း မိူင် ဂေ တီ၊ ကာဆာင် ကာတဲ ဘေ ဒူအီ အီဆာရေလ၊ တဲး န့ ဘဲန် ခါဂုန် ဘေ၊ တဲး န့ ဒူပ် ပီ စ်ု အုဝ် ဘေ ဘူင်။ 7 ပါယ် တီ တဲး ဘေ ကာဆာင် ကာဒါယ် မိူင် ဂေ တီ ဒီ ဒူအီ အာဒါ ဒိမ် ခြိုဝ် ဘော ခြိုဝ် အာမာနာဆေ အူ ကာတဲ။”

8 အီ မုး ခြိုဝ် အာရူဘေန် ခြိုဝ် အာဂတ် ဘော ခြိုဝ် အာမာနာဆေ အာဒါ ပေါ အူ ကာတဲ၊ ဂေ ဟဲ့ ဟွတ့် ပွိုန် ကာဒါယ် အီ ဒီ ဘဲန် ခါဂုန် ဒီ ဂေ။ အာမုဝ်ဆဲ အီ မုး ဒဲစေန့် ဇဝ်ဖြာ ဟဲ့ ကာဆာင် ဒွါ ဒီ ဂေ ကာဒါယ် အီ ကွယ် နာ လေး ဆီငဲ အိုမ် ဘ့လဲင် ယောဒါန် တွိုန်။

9 ကာဒါယ် မိူင် ဂေ တီ န့ စုး ဒီ မိူင် အာရော အီ ကွယ် ခူပ် ဒီလယ့် ဘ့လဲင် အာရာနုန်။ န့ ဘော ဘာ မိူင် အီ ကွယ် ဒီ ကာတဲ ဒီလယ့် တီ။ န့ ဘော ဘာ ဂ့လင် ဒဲင် နွန် အီ စိူဝ် မေဒေဖာ၊ ကော ဝီ ဇမ် ဒီ မိူင် ဒီဖူန်။ 10 န့ ဘော ဘာ မိူင် ဘဲန် မိူင် ဘဲန် မိူင် ပီ အိုပ် ခုန်ဒီခမ် အာဆီဟူန် အီ မုး ဒူအီ အာမုဝ်ရိတ်၊ အီ အိုပ် မိူင် ဟေဆာဖူန် တွိုန်။ န့ ဘော ဇမ် ဒီ ကာအုန် ကာဒါယ် ဂေ ဒူအီ အမ်မူန်။ 11 မိူင် ဂေ တီ ဘော ဘာ မိူင် ဂီလေအာတ် ဘော ဒူင် ကွယ် ဂေ ဒူအီ ဂေဆူရာ ဘော ဒူအီ အာမာခါ၊ နွန် ဟေရာမူန် ဘော နွန်၊ မိူင် ဘာဆန် ဘော မိူင် ကော ဝီ ဟာဝ် ဇမ် ဒီ မိူင် ဆာလာကာ။ 12 န့ ဘော ဘာ ဘော မိူင် ခုန်ဒီခမ် အာအောခ အီ အိုပ် ကာဒါယ် မိူင် ဘာဆန် ဘော မိူင်။ အန် ဘော မုး ဒူအီ ဒီ ကာဒဲ့ ဆိူတ် ကာတဲ ဂေ ဒူအီ ရာဖာတ်။ အန် အိုပ် ဘော မိူင် အာဆာတာရုတ် ဘော မိူင် အေတာရီ။ ဒူအီ ဂေ တီ မုး ဒူအီ ပဲ့ ဟဲ့ ကာဂုဝ်း ဟဲ့ ပဲ အာမုဝ်ဆဲ။ 13 မာလဲ၊ ဂေ ဒူအီ အီဆာရေလ တူ ဟုဝ် တဝ် ဂေ ဒူအီ ဂေဆူရာ ဘော ဂေ ဒူအီ အာမာခါ။ ဂေ ဘော ပွိုန် ဒီ ကွယ် ရိုမ် ဒူပ် ဒူအီ အီဆာရေလ ကော ဇမ် အာတိုဝ် နီ။

14 အီ မုး ဒူအီ ခြိုဝ် အာလေဝီ၊ အာမုဝ်ဆဲ ယီ တူ ဒွါ ကာဒါယ် အီ ဘဲန် ခါဂုန် ဒီ ဂေ။ ခုဝ်၊ ပီ လှူ အီ ဒုဝ့် ဒီ ငဝ် အီ မုး ပီ လှူ ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ ဇိုဝ် တီ ဟဲ့ ဘဲန် ခါဂုန် ဒီ ဂေ။

15 အာမုဝ်ဆဲ ဟဲ့ ဟွတ့် ဒွါ ကာဒါယ် ဒီ ခြိုဝ် အာရူဘေန်၊ တဲး န့ ဘဲန် ခါဂုန် ဒီ ဂေ န့ဟူမ် မှဝ် န့ဟူမ် အန်။

16 ကာဒါယ် ဂေ တီ ဘော စုး ဒီ မိူင် အာရော အီ ကွယ် ဒီ ခူပ် ဒီလယ့် အာရာနုန် ဘော မိူင် အီ ကွယ် ခဲင် ကာတဲ ဒီလယ့် တီ၊ ဘော ဂ့လင် ဒဲင် နွန် အီ ကွယ် ခူပ် မိူင် မေဒေဖာ တွိုန်။ 17 န့ ကော ဇမ် ဒီ မိူင် ဟေဆာဖူန်၊ ဘော မိူင် အီ ကွယ် ဒီ ဂ့လင် ဒဲင် နွန် အီ ဘာ ဘော မိူင် ဒီဖူန်၊ မိူင် ဘာမုတ်ဘာလ၊ မိူင် ဘေတ်ဘာလမွင်။ 18 ဘော မိူင် ယာဟာတ်၊ မိူင် ကေဒါမုတ်၊ မိူင် မေဖာတ်၊ 19 မိူင် ကီရီယာဆိမ်၊ မိူင် ဆီဘာမာ၊ မိူင် ဇေရိတ် ဘော မိူင် ဆာဟာ အီ ကွယ် ဒဲင် နွန် ကာတဲ ဒီလယ့် 20 ဘော မိူင် ဘေတ်ဘေအူရာ ဘော ဘန်ဒါပ် နွန် ပီဆာကာ၊ ဘော မိူင် ဘေတ်ယေဆီမုတ်။ 21 ကာဒါယ် ဂေ တီ လိုပ် ဟာဝ် ဘော ခဲင် မိူင် အီ ကွယ် ခဲင် ဂ့လင် ပီ အိုပ် ခုန်ဒီခမ် အာဆီဟူန် အီ မုး ဒူအီ အာမုဝ်ရိတ် အီ အိုပ် ခဲင် မိူင် ဟေဆာဖူန် တွိုန်။ အာမုဝ်ဆဲ ဟဲ့ ကာဂုဝ်း၊ ဟဲ့ ပဲ အန် ဘော ဂေ ဒါ ကာညာ အီ အိုပ် မိူင် မီဒီအာန်။ ဒါ ကာညာ ဂေ တီ၊ ဂေ စိူဝ် အာအေဝီ၊ အာရေခေမ်၊ အာဇူရာ၊ အာဟူရာ ဘော အာရေဖာ။ ဒါ ကာညာ ဂေ တီ၊ ဂေ ဘော မုး ဂွန် ခုန်ဒီခမ် အီ ဒါမ် ခုန်ဒီခမ် အာဆီဟူန် အီ ကွယ် ခဲင် ကာဒါယ် မိူင် ဂေ တီ။ 22 ခဲင် ဒူအီ ပဲ့ ဟဲ့ ငဝ်း ယမ် ဂေ ဒူအီ အီဆာရေလ ဒေါ လာယ် ကာဂုဝ်း ဂေ၊ ဂေ ငဝ်း ယမ် ဘော အာဘာလာအမ် အီ မုး ဂွန် အာပေါဆော။ ခုဝ်၊ အန် မဲန် ဘေဒါင်။ 23 အိုမ် ဘ့လဲင် ယောဒါန် တွိုန် ဘော ဘဲန် ကာအုန် ကာဒါယ် ခြိုဝ် အာရူဘေန် အီ ကွယ် ဘ့လာက် နာ ဂေတ့် ဆီငဲ။ အာတီ ဟဲ့ ဘဲန် ရဝ် ဘဲန် မိူင် ဂေ ဒူအီ ခြိုဝ် အာရူဘေန်၊ ဟဲ့ ဘဲန် ခါဂုန် ဒီ ဂေ န့ဟူမ် မှဝ် န့ဟူမ် အန်။

24 အာမုဝ်ဆဲ ဟဲ့ ဟွတ့် ဒွါ ကာဒါယ် ဒီ ခြိုဝ် အာဂတ်၊ တဲး န့ ဘဲန် ခါဂုန် ဒီ ဂေ န့ဟူမ် မှဝ် န့ဟူမ် အန်။

25 ကာဒါယ် တီ၊ န့ ဘော စုး ဒီ မိူင် ယာဇေရာ ဘော ဘာ မိူင် ဂီလေအာတ် ဘော မိူင်၊ ဘော မိူင် ဒူအီ အမ်မူန် ကော ဝီ ဟာဝ် ဇမ် ဒီ မိူင် အာရော အီ ကွယ် ကာတတ် မိူင် ရာဘာ။ 26 မိူင် ဂေ တီ ဘော ဘာ မိူင် ဟေဆာဖူန် ကော ဝီ ဟာဝ် ဇမ် ဒီ မိူင် ရာမာတ်မီဇာဖာ ဘော မိူင် ဘေတောနိမ်၊ ပီ ဝီ စုး ဒီ မိူင် မာဟာနာအိမ် ကော ဝီ ဟာဝ် ဇမ် ဒီ ကာဒါယ် မိူင် ဒေဘီရာ။ 27 န့ ဘော ဘာ မိူင် အီ ကွယ် ခဲင် ဒီလယ့် အီ မုး မိူင် ဘေတ်ဟာရမ်၊ မိူင် ဘေတ်နီမာရာ၊ မိူင် ဆူခူတ်၊ မိူင် စာဖူန် ဘော မိူင် အီ ဆီ ဂိတ် ခဲင် ကာဒါယ် မိူင် ခုန်ဒီခမ် အာဆီဟူန် အီ အိုပ် မိူင် ဟေဆာဖူန် တွိုန်။ ကာအုန် ကာဒါယ် မိူင် ဂေ တီ ဘ့လာက် နာ လေး ဆီငဲ၊ န့ ဘော ဒူပ် အိုမ် ဘ့လဲင် ယောဒါန် ကော ဝီ ဇမ် ဒီ အိုမ် ဒိုင် ဂါလီလေ။ ^a 28 အာတီ ဟဲ့ ဘဲန် ရဝ် ဘဲန် မိူင် ဒူအီ ခြိုဝ် အာဂတ်၊ ဟဲ့ ဘဲန် ခါဂုန် ဒီ ဂေ န့ဟူမ် မှဝ် န့ဟူမ် အန်။

29 အာမုဝ်ဆဲ ဟဲ့ ဟွတ့် ဒွါ ကာဒါယ် ဒီ ခြိုဝ် အာမာနာဆေ အာဒါ အူ ကာတဲ၊ တဲး န့ ဘဲန် ခါဂုန် ဒီ ဂေ န့ဟူမ် မှဝ် န့ဟူမ် အန်။

30 ကာဒါယ် ဂေ တီ ဘော ဘာ မိူင် မာဟာနာအိမ် ဘော မိူင် ဘာဆန် ဘော မိူင် အီ မုး မိူင် ပီ အိုပ် ခုန်ဒီခမ် အာအောခ ခဲင် ကာဒါယ် မိူင် ဘာဆန် တွိုန် ဘောကာဂ့လျီတ်။ န့ ဘော ဘာ ဘော ဒူင် ကွယ် ဂေ ဒူအီ အာယာအီရာ အီ ကွယ် ခဲင် ကာဒါယ် မိူင် ဘာဆန် အာဒါ ဒဝ် ဂိုဝ် မိူင်။ 31 န့ ဘော ဘာ ကာဒါယ် မိူင် ဂီလေအာတ် အူ ကာတဲ၊ ဘော မိူင် အာဆာတာရုတ်၊ ဘော မိူင် အေတာရီ အီ မုး မိူင် ပီ အိုပ် ခုန်ဒီခမ် အာအောခ အီ ကွယ် ခဲင် ကာဒါယ် မိူင် ဘာဆန် တွိုန်။ ကာဒါယ် မိူင် ဂေ တီ ဘောကာဂ့လျီတ်၊ အာမုဝ်ဆဲ ဟဲ့ အာပ် ဒွါ ဒီ အာမာခီရာ အီ မုး ဂွန် အာမာနာဆေ၊ တဲး အန် ကာဆာင် ဒီ န့ဟူမ် ဂွန် အန် အာဒါ အူ ကာတဲ တွိုန်။

32 ကာဒါယ် မိူင် ဂေ တီ၊ အာမုဝ်ဆဲ ဟဲ့ ကာဆာင် ဒေါ ကွယ် ဂေ ခဲင် ဂ့လင် မိူင် မုဝ်အာပ် အီ ကွယ် ဘ့လာက် နာ တ အိုမ် ဘ့လဲင် ယောဒါန် အီ ဝီ လာယ် ကာဆိူဝ် ဒီ မိူင် ယေရီခုဝ် ဘ့လာက် နာ လေး ဆီငဲ။ 33 အီ မုး ခြိုဝ် ဒူအီ အာလေဝီ၊ အာမုဝ်ဆဲ ယီ တူ ကာဆာင် ကာဒါယ် ဒီ ဂေ ခေါ အီ စဲက်။ ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဘဲန် ခါဂုန် ဂေ၊ တဲး န့ ဒူပ် ပီ ဒွိုမ် ကာလာင် အန် ဒီ ဂေ။