1 ဒေါ မုး မာဂျီန် မ့ဘူ ဆီငဲ လှေး၊ ဘေ လုဝ် တး ကာဇု ကြိုပ် ဇဝ်ဖြာ။ ဆီငဲ တီ ဘေ တူ ပွိုန် ဘူင် ဂါန် မာဆေ။ န့ မုး ဆီငဲ လုဝ် ဘုတ် ဘေ ဝဝ်။ 2 ဘေ လုဝ် လှူ ပီ လှူ အီ ဒုဝ့် ဒီ ငဝ် ဒီ ဇဝ်ဖြာ၊ တဲး အုး ငှုန် အန် လဝ့် နဝ်း အန် ဇဝ်။ ဘေ လုဝ် ဒိုဝ်း မက် အာလူင့် အီ ဆီ နှိုမ် အူ ဒုဝ်၊ မာဘူ အာလူင့် အူ ဒုဝ် ဘော ဂွန် မာဘူ အီ ဟဲ့ နုဝ့် အူ ဆီနမ် ဘူ ဒုဝ်။ ဒုဝ် ဂေ တီ ဘော ဒွန် ဒုဝ်၊ ကွဲ့ တဲး ဂေ မိုဝ်း ဒူင် စှေ ဒူင် နဲ။ 3 ဘေ ပီ ဝီ လုဝ် လှူ ဘော ပီ လှူ ဒီဂါဝ် အီ မုး ကာပဲ့ ခဝ်ချုင် အီ ဟဲ့ ကာဝ်ု နာမန်။ ဘေ လုဝ် ဒိုဝ်း ကာပဲ့ ခဝ်ချုင် အာဒါ အူယ် အုဝ်မာ အီ မုး မွက် ဖွုန် ဘ့လဲ ဒီ အူ ခ့ဝါက်၊ ဝီ လှူ ဒူပ် မက် အာလူင့် တွိုန်။ ဘေ လုဝ် ဒိုဝ်း ဘော ခဝ်ချုင် အာဒါ အာ အုဝ်မာ၊ လှူ ဒူပ် မာဘူ အာလူင့်။ 4 ဆေ န့ မုး မာဘူ အာလူင့်၊ ဘေ လုဝ် လှူ ကာပဲ့ အူ အုဝ်မာ အီ မုး မွက် အူ ဘ့လဲ ဒီ အူ ခ့ဝါက်။ တဲး န့ ဒူပ် မာဘူ ဘူ ဒုဝ် တွိုန်၊ တဲး န့ မုး အူ မျုဝ် ဘော ဒွန် ဒုဝ်။ 5 ဘေ ပီ ဝီ လုဝ် လှူ ဘော မာပဲ အာလူင့် အူ ဒုဝ်၊ တဲး န့ ဘဲန် ပီ လှူ အီ ဂဝ်း ဝဲန် မှာပ်၊ တဲး ဘေ ဝီ လာယ် ကာလဝ့် ဒီ ဇဝ်ဖြာ။ 6 ဘေ လုဝ် လှူ ဇိုဝ် တီ ဒဲင် ပီ လှူ ဘေ ဒေါ မုး မာဂျီန် ကာမာယ် ဘော ပီ လှူ ဘေ ဒွန် ဆီငဲ။ န့ ဘော မုး ပီ လှူ အီ ဒုဝ့် ဒီ ငဝ် ဘော ပီ လှူ ဒီဂါဝ် ဘော ပီ လှူ ပီ ဒီ ဒျီင်။ ဆေ ဘေ လှူ တူတ့် ဒွန် မျုဝ် တဲး န့ ဒူပ် ပီ စ်ု အုဝ်၊ အုး ငှုန် အန် ဒီ ဘော လဝ့် နဝ်း အုဝ်။

7 ဒေါ ဇမ် မာဂျီန် မ့ဘူ၊ ဆီငဲ ဂိုဝ်၊ ဘေ လုဝ် တး ကာဇု ကြိုပ် ဇဝ်ဖြာ။ ဘေ ဘော လုဝ် မိုဝ်း နဝ်း ဂူမ် နဝ်း တျီမ် ဘော ယိူန် ပီ ဒီ ဟူမ်။ ဘေ မိူဝ် တူ ပွိုန် ဘူင် ဂါန် မာဆေ ဆီငဲ တီ။ 8 ဘေ လုဝ် လှူ အီ ဒုဝ့် ဒီ ငဝ် အီ အုး ငှုန်၊ တဲး န့ လဝ့် နဝ်း ဇဝ်ဖြာ။ ဘေ လုဝ် ဒိုဝ်း ဂွန် မက် အာလူင့် အီ ဆီ နှိုမ် အူ ဒုဝ် ဘော မာဘူ အာလူင့် အူ ဒုဝ် ဘော ဂွန် မာဘူ အီ ဟဲ့ နုဝ့် အူ ဆီနမ် အီ တူ မိုဝ်း ဒူင် စှေ ဒူင် နဲ ဘူ ဒုဝ်၊ 9 ပီ ဝီ လုဝ် လှူ ဘော ပီ လှူ ဒီဂါဝ်။ ဒိုဝ်း ကာပဲ့ ခဝ်ချုင် အီ ဟဲ့ ကာဝ်ု နာမန် အူယ် အုဝ်မာ အီ မုး မွက် ဖွုန် ဘ့လဲ ဒီ အူ ခ့ဝါက်။ ဘေ လုဝ် လှူ ဇိုဝ် တီ ဒူပ် မက် အာလူင့် အူ ဒုဝ်။ ဘေ လုဝ် ဒိုဝ်း ကာပဲ့ အူယ် အုဝ်မာ အီ မုး မွက် ဖွုန် ဘ့လဲ ဒီ အူ ခ့ဝါက်၊ ဝီ လှူ ဒူပ် မာဘူ အာလူင့် တွိုန်။ 10 အီ မုး ဂွန် မာဘူ ဂေ တွိုန်၊ ဘေ လုဝ် ဒိုဝ်း အူ ဒုဝ် အူ အုဝ်မာ၊ တဲး န့ မုး အူ မျုဝ် ဘော ဒွန် ဒုဝ်။ 11 ဘေ လုဝ် လှူ ဘော မာပဲ အာလူင့် အီ ဘဲန် ပီ လှူ အီ ဂဝ်း ဝဲန် မှာပ်။ ဘေ လုဝ် ဝီ ပွါ ဒုဝ် တီ ဒဲင် ပီ လှူ ဘေ အီ တဲး ဘေ ဝီ လာယ် ကာလဝ့် ဒီ ဇဝ်ဖြာ။ ဘေ လုဝ် လှူ ဇိုဝ် တီ ဘော ဒဲင် ပီ လှူ အီ ဒုဝ့် ဒီ ငဝ် ပီ လုဝ် လှူ ဘေ ဒွန် ဆီငဲ။ န့ ဘော မုး ပီ လုဝ် လှူ ဘေ ဒဲင် ပီ လှူ ဒီဂါဝ် ဘော ပီ လှူ ပီ ဒီ ဒျီင် အီ ဒူပ် ပီ လုဝ် လှူ ဘေ ဒွန် ဆီငဲ တွိုန်။

12 ဟီ ဇမ် မာဂျီန် မ့ဘူ၊ ဆီငဲ ဂိုဝ် ဒီ ဖန်၊ ဘေ လုဝ် တး ကာဇု၊ ကြိုပ် ဇဝ်ဖြာ။ ဘေ မိူဝ် တူ ပွိုန် ဘူင် ဂါန် မာဆေ။ ဘေ လုဝ် ဘူင် ဘ့လွယ် လှုဝ်း ဘေ အာခြာဝ် ဒေါ ကွယ် ဘေ ခဲင် ထိုပ်၊ တဲး န့ ကော နုဝ့် ဘူ ဆီငဲ။ 13 ဆီငဲ ဒေါ ဂုဝ် တွိုန် ဘေ လုဝ် လှူ ပီ လှူ အီ ဒုဝ့် ဒီ ငဝ်၊ တဲး အုး ငှုန် အန် လဝ့် နဝ်း ဇဝ်ဖြာ။ ဘေ လုဝ် ဒိုဝ်း ဂွန် မက် အာလူင့် အီ ဆီ နှိုမ် ဂိုဝ် ဒီ အူယ် ဒုဝ်၊ မာဘူ အာလူင့် အာ ဒုဝ် ဘော ဂွန် မာဘူ အီ ဟဲ့ နုဝ့် အူ ဆီနမ် ဂိုဝ် ဒီ ဖွုန် ဒုဝ်။ ဒုဝ် ဂေ တီ ဘော ဒွန် ဒုဝ်၊ ကွဲ့ တဲး ဂေ မိုဝ်း ဒူင် စှေ ဒူင် နဲ။ 14 ဘေ ပီ ဝီ လုဝ် လှူ ဘော ပီ လှူ ဒီဂါဝ် အီ မုး ကာပဲ့ အီ ဟဲ့ ဟွတ့် ကာဝ်ု နာမန် တွိုန် အာဒါ အူယ် အုဝ်မာ၊ ဝီ လှူ ဒူပ် မက် အာလူင့် အူ ဒုဝ်။ ဘေ လုဝ် ဝီ လှူ ဘော ကာပဲ့ အာဒါ အာ အုဝ်မာ အီ မုး မွက် အူယ် ဘ့လဲ၊ တဲး န့ ဒူပ် မာဘူ အာလူင့် တီ ဒွန် ဒုဝ်။ 15 ကာပဲ့ အူ အုဝ်မာ အီ မုး မွက် အူ ဘ့လဲ ဒီ အူ ခ့ဝါက် လုဝ် ဝီ လှူ ဒူပ် ဂွန် မာဘူ ဒွန် ဒုဝ်။ 16 ဘော မာပဲ အာလူင့် အာဒါ အူ ဒုဝ် ဘေ လုဝ် လှူ၊ တဲး န့ ဘဲန် ပီ လှူ အီ ဂဝ်း ဝဲန် မှာပ်။ ပီ လှူ ဇိုဝ် တီ လုဝ် ဝီ ပွါ ဒဲင် ပီ လှူ အီ ဒုဝ့် ဒီ ငဝ် ဒွန် ဆီငဲ ဘော ဒဲင် ပီ လှူ ဒီဂါဝ် ဘော ပီ လှူ ပီ ဒီ ဒျီင်။

17 ဟီ ဇမ် ဆီငဲ ဟာအာ ဒေါ ဘူင် ဘေ ဘ့လွယ် တီ ဘေ လုဝ် လှူ ဂွန် မက် အီ ဆီ နှိုမ် ဂိုဝ် ဒီ အာ ဒုဝ်၊ မာဘူ အာလူင့် အာ ဒုဝ် ဘော ဂွန် မာဘူ အာဆာက် အီ ဟဲ့ နုဝ့် အူ ဆီနမ် အာဒါ ဂိုဝ် ဒီ ဖွုန် ဒုဝ်။ ဒုဝ် ဂေ တီ ဒွန် ဒုဝ် ကွဲ့ တဲး ဂေ မိုဝ်း ဒူင် စှေ ဒူင် နဲ။ 18 ပီ လှူ ဘေ တီ ဘေ လုဝ် လှူ ဒူပ် ပီ လှူ ဒီဂါဝ် ဘော ပီ လှူ ပီ ဒီ ဒျီင် တွိုန်၊ တဲး န့ ဒူပ် ဒွန် ဒုဝ် ခဲ့ ပီ ဒွိုမ် ကာလာင် အုဝ်။ 19 ဒဲင် တီ၊ ဘေ လုဝ် လှူ ဘော မာပဲ အာလူင့် အူ ဒုဝ်၊ တဲး န့ ဘဲန် ပီ လှူ အီ ဂဝ်း ဝဲန် မှာပ်။ တဲး ဘေ လှူ ပီ လှူ တီ ဒွန် မျုဝ် ဒဲင် ပီ လှူ ဘေ ဒွန် ဆီငဲ အီ မုး ပီ လှူ အီ ဒုဝ့် ဒီ ငဝ် ဘော ပီ လှူ ဒီဂါဝ် ဘော ပီ လှူ ပီ ဒီ ဒျီင်။

20 ဆီငဲ ဟာအူယ်၊ ဘေ လုဝ် လှူ ဂွန် မက် အာလူင့် အီ ဆီ နှိုမ် ဂိုဝ် ဒီ အူ ဒုဝ်၊ မာဘူ အာလူင့် အာ ဒုဝ် ဘော ဂွန် မာဘူ အာဆာက် အီ ဟဲ့ နုဝ့် အူ ဆီနမ် အာဒါ ဂိုဝ် ဒီ ဖွုန် ဒုဝ်။ ဒုဝ် ဂေ တီ ဘော ဒွန် ဒုဝ်၊ ကွဲ့ တဲး ဂေ မိုဝ်း ဒူင် စှေ ဒူင် နဲ။ 21 ပီ လှူ ဘေ တီ ဘေ လုဝ် လှူ ဒူပ် ပီ လှူ ဒီဂါဝ် ဘော ပီ လှူ ပီ ဒီ ဒျီင် တွိုန်၊ တဲး န့ ဒူပ် ဒွန် ဒုဝ်၊ တဲး န့ ပီ ခဲ့ ပီ ဒွိုမ် ကာလာင် အုဝ်။ 22 ဘော မာပဲ အာလူင့် အာဒါ အူ ဒုဝ် ဘေ လုဝ် လှူ၊ တဲး န့ ဘဲန် ပီ လှူ အီ ဂဝ်း ဝဲန် မှာပ်။ ပီ လှူ ဇိုဝ် တီ လုဝ် ဝီ ပွါ ဒဲင် ပီ လှူ အီ ဒုဝ့် ဒီ ငဝ် ဒွန် ဆီငဲ ဘော ဒဲင် ပီ လှူ ဒီဂါဝ် ဘော ပီ လှူ ပီ ဒီ ဒျီင်။

23 ဆီငဲ မ့ဖွုန်၊ ဘေ လုဝ် လှူ ဂွန် မက် အာလူင့် အီ ဆီ နှိုမ် ဂိုဝ် ဒုဝ်၊ မာဘူ အာလူင့် အာ ဒုဝ်၊ ဂွန် မာဘူ အာဆာက် အီ ဟဲ့ နုဝ့် အူ ဆီနမ် ဂိုဝ် ဒီ ဖွုန် ဒုဝ်။ ဒုဝ် ဂေ တီ ဘော ဒွန် ဒုဝ်၊ ကွဲ့ တဲး ဂေ မိုဝ်း ဒူင် စှေ ဒူင် နဲ။ 24 ဘေ လုဝ် လှူ ဘော ပီ လှူ ဒီဂါဝ် ဘော ပီ လှူ ပီ ဒီ ဒျီင် အီ ဒူပ် မက် အာလူင့်၊ မာဘူ အာလူင့် ဘော မာဘူ အီ ဆီ နှိုမ် တွိုန် ဒွန် ဒုဝ်၊ တဲး န့ ပီ ပဲ့ ဟဲ့ ဒွိုမ် ကာလာင် အုဝ်။ 25 ဒဲင် တီ၊ ဘေ လုဝ် လှူ ဘော မာပဲ အာလူင့် အူ ဒုဝ်၊ တဲး န့ ဘဲန် ပီ လှူ အီ ဂဝ်း ဝဲန် မှာပ်။ တဲး ဘေ လှူ ပီ လှူ တီ ဒူပ် ပီ လှူ ဒီဂါဝ် ဘော ပီ လှူ ပီ ဒီ ဒျီင်။

26 ဆီငဲ မ့ဖန် ဘေ လုဝ် လှူ ဂွန် မက် အာလူင့် အီ ဆီ နှိုမ် ဒိမ် ဒုဝ်၊ မာဘူ အာလူင့် အာ ဒုဝ် ဘော ဂွန် မာဘူ အာဆာက် အီ ဟဲ့ နုဝ့် အူ ဆီနမ် ဂိုဝ် ဒီ ဖွုန် ဒုဝ်။ ဒုဝ် ဂေ တီ ဘော ဒွန် ဒုဝ်၊ ကွဲ့ တဲး ဂေ မိုဝ်း ဒူင် စှေ ဒူင် နဲ။ 27 ပီ လှူ ဘေ တီ ဘေ လုဝ် လှူ ဒူပ် ပီ လှူ ဒီဂါဝ် ဘော ပီ လှူ ပီ ဒီ ဒျီင် တွိုန်၊ တဲး န့ ဒူပ် ဒွန် ဒုဝ် ဘော ခဲ့ ပီ ဒွိုမ် ကာလာင် အုဝ်။ 28 ဘော မာပဲ အာလူင့် အာဒါ အူ ဒုဝ် ဘေ လုဝ် လှူ၊ တဲး န့ ဘဲန် ပီ လှူ အီ ဂဝ်း ဝဲန် မှာပ်။ ပီ လှူ ဇိုဝ် တီ လုဝ် ဝီ ပွါ ဒဲင် ပီ လှူ အီ ဒုဝ့် ဒီ ငဝ် ဒွန် ဆီငဲ ဘော ဒဲင် ပီ လှူ ဒီဂါဝ် ဘော ပီ လှူ ပီ ဒီ ဒျီင်။

29 ဆီငဲ န့ဒဝ်၊ ဘေ လုဝ် လှူ ဂွန် မက် အာလူင့် အီ ဆီ နှိုမ် ဒါ ဒုဝ်၊ မာဘူ အာလူင့် အာ ဒုဝ် ဘော ဂွန် မာဘူ အာဆာက် အီ ဟဲ့ နုဝ့် အူ ဆီနမ် အာဒါ ဂိုဝ် ဒီ ဖွုန် ဒုဝ်။ ဒုဝ် ဂေ တီ ဘော ဒွန် ဒုဝ်၊ ကွဲ့ တဲး ဂေ မိုဝ်း ဒူင် စှေ ဒူင် နဲ။ 30 ပီ လှူ ဘေ တီ ဘေ လုဝ် လှူ ဒူပ် ပီ လှူ ဒီဂါဝ် ဘော ပီ လှူ ပီ ဒီ ဒျီင် တွိုန်၊ တဲး န့ ဒူပ် ဒွန် ဒုဝ် ဘော ခဲ့ ပီ ဒွိုမ် ကာလာင် အုဝ်။ 31 ဘော မာပဲ အာလူင့် အာဒါ အူ ဒုဝ် ဘေ လုဝ် လှူ၊ တဲး န့ ဘဲန် ပီ လှူ အီ ဂဝ်း ဝဲန် မှာပ်။ ပီ လှူ ဇိုဝ် တီ ဘေ လုဝ် ဝီ ပွါ ဒဲင် ပီ လှူ အီ ဒုဝ့် ဒီ ငဝ် ဒွန် ဆီငဲ ဘော ဒဲင် ပီ လှူ ဒီဂါဝ် ဘော ပီ လှူ ပီ ဒီ ဒျီင်။

32 ဆီငဲ မ့ဘူ ဘေ လုဝ် လှူ ဂွန် မက် အာလူင့် အီ ဆီ နှိုမ် ဘူ ဒုဝ်၊ မာဘူ အာလူင့် အာ ဒုဝ် ဘော ဂွန် မာဘူ အာဆာက် အီ ဟဲ့ နုဝ့် အူ ဆီနမ် ဂိုဝ် ဒီ ဖွုန် ဒုဝ်။ ဒုဝ် ဂေ တီ ဘော ဒွန် ဒုဝ်၊ ကွဲ့ တဲး ဂေ မိုဝ်း ဒူင် စှေ ဒူင် နဲ။ 33 ပီ လှူ ဘေ တီ ဘေ လုဝ် လှူ ဒူပ် ပီ လှူ ဒီဂါဝ် ဘော ပီ လှူ ပီ ဒီ ဒျီင် တွိုန်၊ တဲး န့ ဒူပ် ဒွန် ဒုဝ် ဘော ခဲ့ ပီ ဒွိုမ် ကာလာင် အုဝ်။ 34 ဘော မာပဲ အာလူင့် အာဒါ အူ ဒုဝ် ဘေ လုဝ် လှူ၊ တဲး န့ ဘဲန် ပီ လှူ အီ ဂဝ်း ဝဲန် မှာပ်။ ပီ လှူ ဇိုဝ် တီ၊ လုဝ် ဝီ ပွါ ဒဲင် ပီ လှူ အီ ဒုဝ့် ဒီ ငဝ် ဒွန် ဆီငဲ ဘော ဒဲင် ပီ လှူ ဒီဂါဝ် ဘော ပီ လှူ ပီ ဒီ ဒျီင်။

35 ဆီငဲ န့ဒါ ဘေ လုဝ် တး ကာဇု ကြိုပ် ဇဝ်ဖြာ။ အာဝ် လုဝ် ဘူင် ဂါန် မာဆေ။ 36 ဘေ ယီ လုဝ် လှူ ပီ လှူ အီ ဒုဝ့် ဒီ ငဝ်၊ တဲး အုး ငှုန် အန် လဝ့် နဝ်း ဇဝ်ဖြာ။ ဘေ လုဝ် ဒိုဝ်း ဂွန် မက် အာလူင့် အီ ဆီ နှိုမ် အူ ဒုဝ် ဘော မာဘူ အာလူင့် အူ ဒုဝ် ဘော ဂွန် မာဘူ အာဆာက် အီ ဟဲ့ နုဝ့် အူ ဆီနမ် ဘူ ဒုဝ်။ ဒုဝ် ဂေ တီ ဘော ဒွန် ဒုဝ်၊ ကွဲ့ တဲး ဂေ မိုဝ်း ဒူင် စှေ ဒူင် နဲ။ 37 ပီ လှူ ဘေ တီ ဘေ လုဝ် လှူ ဒူပ် ပီ လှူ ဒီဂါဝ် ဘော ပီ လှူ ပီ ဒီ ဒျီင် တွိုန်၊ တဲး န့ ဒူပ် ဒွန် ဒုဝ် ဘော ခဲ့ ပီ ဒွိုမ် ကာလာင် အုဝ်။ 38 ဘော မာပဲ အာလူင့် အာဒါ အူ ဒုဝ် ဘေ လုဝ် လှူ၊ တဲး န့ ဘဲန် ပီ လှူ အီ ဂဝ်း ဝဲန် မှာပ်။ ပီ လှူ ဇိုဝ် တီ၊ လုဝ် ဝီ ပွါ ဒဲင် ပီ လှူ အီ ဒုဝ့် ဒီ ငဝ် ဒွန် ဆီငဲ ဘော ဒဲင် ပီ လှူ ဒီဂါဝ် ဘော ပီ လှူ ပီ ဒီ ဒျီင်။

39 ပီ ဒီ လှူ ဇိုဝ် တီ ဘေ လုဝ် လှူ ဒီ ဇဝ်ဖြာ ဒေါ ဟဲ့ ဇမ် အာခြာဝ် ဒီ ဘူင် ဘေ ဘ့လွယ် ဘဲန် မျုဝ် ဘဲန် မျုဝ်။ တဲး ဘေ ဝီ ပွါ ဒဲင် ပဲ့ ဟဲ့ ကာဆဲန့် ဘေ ဒီ လှူ ဘော ဒဲင် ပီ ဆီ လှူ ဘေ ဘော ဒဲင် ပီ လှူ ဘေ အီ ဒုဝ့် ဒီ ငဝ်၊ ပီ လှူ ဒီဂါဝ်၊ ပီ လှူ ပီ ဒီ ဒျီင် ဘော ပီ လှူ အီ ကွယ် ကာဇု ဟူမ် ရိုမ်။”

40 ဇဝ်ဖြာ ဟဲ့ ဟွတ့် ကာလာင် ပါယ် တီ အာမုဝ်ဆဲ ဝီ ကာလာင် ဒီ ဂေ ဒူအီ အီဆာရေလ၊ တဲး န့ ဒူပ် ပီ ကာလာင် ဇဝ်ဖြာ ဒီ အန်။