1 ဇဝ်ဖြာ ဝီ တဝ်း ဒီ အာမုဝ်ဆဲ၊ 2 “တဲး မဲ ကာလာင် ဒီ ဂေ ဒူအီ အီဆာရေလ လွင် လှူ ပီ ဒီ ဟူမ် အီ ဒုဝ့် ဒီ ငဝ်၊ တဲး အုး ငှုန် အန် ဘော လဝ့် နဝ်း အုဝ်၊ တဲး ဂေ ဘော လှူ ဒူပ် အာခြာဝ် အန်။ 3 အာဒါ ပီ ဒီ လုဝ် လှူ အီ ဒုဝ့် ဒီ ငဝ်၊ တဲး ဘေ ဒိုဝ်း ဂွန် မာဘူ၊ အာဆာက် အီ နုဝ့် အူ ဆီနမ်၊ အီ တူ မိုဝ်း ဒူင် စှေ ဒူင် နဲ။ တဲး ဘေ လှူ အူ ဆီငဲ အာ ဒုဝ်။ တဲး ဘေ လှူ ပါယ် တီ ဒွန် ဆီငဲ၊ ကွဲ့ တဲး န့ မိုဝ်း ဒေါ ကာဒတ်။ 4 မာဘူ အာဒါ အူ ဒုဝ်၊ တဲး ဘေ လှူ စေဝ် ညှာ။ အာဒါ ပေါ အူ ဒုဝ်၊ တဲး ဘေ လှူ ဘာ ဒီ အပ်။ 5 ဒွန် ဇေန့် ဘေ ပီ ဝီ လုဝ် ဒိုဝ်း ဘော ကာပဲ့ ခဝ်ချုင် အီ ဟဲ့ ကာမွတ့် ဆီချာ အာဒါ အူ အုဝ်မာ အီ မုး အူ ဘ့လဲ ဒီ အူ ခ့ဝါက်၊ ဝီ ကာဝ်ု ကာဆူ နာမန် အီ ဆီချာ အာဒါ အူ ကာပဝ်၊ တဲး န့ ဘဲန် ပီ ဒီ လှူ ဒီဂါဝ်။ 6 ပါယ် တီ ဘေ လုဝ် လှူ အီ ဒုဝ့် ဒီ ငဝ် ဒွန် ဆီငဲ ဒွန် ဆီငဲ။ န့ မုး ပဲ့ ဟဲ့ ဒမ် အုန် အုဝ် ဇဝ်ဖြာ ဒေါ ကွယ် ဘေ ဒီ နွန် ဆီနာယ် တွိုန်။ အုး ငှုန် အန် တီ ဒီ ဘော လဝ့် နဝ်း အုဝ်။ 7 ပီ လှူ ပီ ဒီ ဒျီင်၊ န့ ဘော မုး အိုမ် မာငုန် အာဒါ အူ ကာပဝ် အီ ဟဲ့ ဟွတ့် မွင် ဘဲန် ပဝ်း။ ဘေ လုဝ် လှူ အာတီ ဒူပ် ဂွန် မာဘူ အာဒါ ဒွန် ဒုဝ်။ ဘေ လုဝ် ဒိုဝ်း အိုမ် မာငုန် တီ၊ ဟုး ဒီ ဒူင် ဆီငါ ဘွတ် ဒီ ထိုပ် ဘိက် ဘွတ်။ 8 ဟီ ဇမ် ဘာ ဒီ အပ်၊ တဲး ဘေ ဝီ လှူ ဂွန် မာဘူ အာဒါ ပေါ အူ ဒုဝ် တွိုန်၊ တဲး န့ ပီ ပဲ့ ဟဲ့ လှူ ဘေ စေဝ် ညှာ အီ ဟဲ့ ဟပ် ဘော ပီ လှူ ဒီဂါဝ် ဘော ပီ လှူ ပီ ဒီ ဒျီင်။ န့ ဘော မုး ပီ ဒီ လှူ အီ ဒုဝ့် ဒီ ငဝ်။ အုး ငှုန် အန် ဒီ ဘော လဝ့် နဝ်း အုဝ် အီ မုး ဇဝ်ဖြာ။ 9 ဟီ ဇမ် ဆီငဲ ဒီလှဝ်၊ ဘေ လုဝ် ဒိုဝ်း ဂွန် မာဘူ အာလူင့် အာ ဒုဝ်၊ အာဆာက် အီ ဟဲ့ နုဝ့် အူ ဆီနမ်၊ အီ တူ မိုဝ်း ဒူင် စှေ ဒူင် နဲ။ ဘေ ဘော လုဝ် လှူ ဘော ကာပဲ့ အီ ဟဲ့ ကာမွတ့် ဆီချာ အာဒါ အာ အုဝ်မာ အီ မုး အူယ် ဘ့လဲ၊ အီ ဟဲ့ ဟွတ့် ကာဝ်ု ကာဆူ နာမန်။ 10 န့ ဘော မုး ပီ ဒီ လှူ အီ ဒုဝ့် ဒီ ငဝ် ဒေါ ဇမ် ဆီငဲ ဒီလှဝ်။ ဘေ လုဝ် လှူ အာ ဒုဝ် တီ ဒဲင် ပီ ဒီ လှူ ဘေ ဒွန် ဆီငဲ အီ မုး ပီ ဒီ လှူ အီ ဒုဝ့် ဒီ ငဝ် ဘော ပီ လှူ ပီ ဒီ ဒျီင်။

11 ဒွန် မာဂျီန် ဒေါ မုး ဆီငဲ လှေး၊ ဘေ လုဝ် ဝီ လှူ ပီ ဒီ လှူ အီ ဒုဝ့် ဒီ ငဝ်။ ဘေ လုဝ် ဒိုဝ်း မက် အာလူင့် အီ ဆီ နှိုမ် အာ ဒုဝ်၊ မာဘူ အာလူင့် အူ ဒုဝ် ဘော ဂွန် မာဘူ အာလူင့် အီ ဟဲ့ နုဝ့် အူ ဆီနမ် အာဒါ ဘူ ဒုဝ်၊ လှူ ဒီ အုဝ်။ ဘေ လုဝ် ယွတ်၊ ကွဲ့ တဲး န့ မိုဝ်း ဒူင် စှေ ဒူင် နဲ။ 12 အီ မုး ပီ ဒီ လှူ ဒီဂါဝ် တွိုန်၊ ဘေ လုဝ် ဒိုဝ်း ကာပဲ့ ခဝ်ချုင် အီ ဟဲ့ ကာဝ်ု ကာဆူ နာမန် အာဒါ အူယ် အုဝ်မာ အီ မုး ဖွုန် ဘ့လဲ ဒီ အူ ခ့ဝါက်။ ဘေ လုဝ် လှူ ဇိုဝ် တီ ဒူပ် မာမက် အူ ဒုဝ်။ အာဒါ မာဘူ အာလူင့် အူ ဒုဝ်၊ ဘေ လုဝ် ဒိုဝ်း ကာပဲ့ အူ အုဝ်မာ။ 13 အီ မုး ဂွန် မာဘူ ဂေ တွိုန်၊ ဘေ လုဝ် ဒိုဝ်း ကာပဲ့ အူ အုဝ်မာ အီ မုး အူ ဘ့လဲ ဒီ အူ ခ့ဝါက် အာဒါ ဒွန် ဒုဝ်။ ခဲင် ကာပဲ့ တီ ဘေ လုဝ် ကာဝ်ု ဘော နာမန်၊ တဲး န့ ဘဲန် တူတ့် ပီ ဒီ လှူ အီ ဒုဝ့် ဒီ ငဝ်၊ တဲး အုး ငှုန် အန် ဘော လဝ့် နဝ်း အုဝ်။ 14 အာဒါ ပီ လှူ ပီ ဒီ ဒျီင်၊ ဘေ လုဝ် ဒိုဝ်း အိုမ် မာငုန် အာ ကာပဝ် အာဒါ မက် အာလူင့် အူ ဒုဝ် ဘော အိုမ် မာငုန် အူ ကာပဝ် ဒီ အူ ကာတဲ အာဒါ မာဘူ အာလူင့် အူ ဒုဝ် ဘော အိုမ် မာငုန် အူ ကာပဝ် အာဒါ ဂွန် မာဘူ ဒွန် ဒုဝ်။ အာနီ န့ မုး ပီ လုဝ် လှူ ဘေ အီ ဒုဝ့် ဒီ ငဝ် ဒေါ ဇမ် မာဂျီန် ကာမာယ်၊ ဆီငဲ လှေး။ ဘေ လုဝ် လှူ ပါယ် တီ ဒွန် မာဂျီန်၊ တဲး န့ ကော လှုး ဆီနမ်။ 15 ဒဲင် ပီ လှူ အီ ဒုဝ့် ဒီ ငဝ် ဘော ပီ လှူ ပီ ဒီ ဒျီင် တီ၊ ဘေ လုဝ် လှူ ဘော ပီ ဒီ လှူ အီ ဂဝ်း ဝဲန် မှာပ်။ ဘေ လုဝ် ဝီ ဒိုဝ်း မာပဲ အာလူင့် အူ ဒုဝ် ဝီ လှူ၊ တဲး န့ ဂဝ်း ဝဲန် မှာပ် ဘေ။

16 ဟီ ဇမ် မာဂျီန် လှေး၊ ဆီငဲ ဂိုဝ် ဒီ မ့ဖွုန်၊ န့ မုး ဆီငဲ လုဝ် ဘူင် ဘေ ဘ့လွယ် လှုဝ်း ဘေ ဇဝ်ဖြာ ဒေါ ကာလုဝ်း အန် ကာင် ဘေ။ 17 ဟီ ဇမ် ဆီငဲ ဂိုဝ် ဒီ မ့ဖန်၊ န့ မုး ဆီငဲ ဒေါ စုး ဘ့လွယ် ပေါ အူ မျုဝ်။ ဘ့လွယ် တီ၊ ဘေ လုဝ် ဟူမ် ခါမုန် အီ တူ ဟပ် ဆီနမ် ဘြး အာဒါ ဘူ ဆီငဲ။ 18 ဆီငဲ ကာစုး ဘေ ဒီ ဘူင် ဘ့လွယ် တီ၊ ဘေ လုဝ် တး ကာဇု၊ ကြိုပ် ဇဝ်ဖြာ။ ဆီငဲ တီ အာဝ် ပွိုန် ဘူင် ဂါန် မာဆေ။ 19 ဘေ လုဝ် လှူ အီ ဒုဝ့် ဒီ ငဝ် ဒီ ဇဝ်ဖြာ။ န့ ဘော မုး မက် အာလူင့် အီ ဆီ နှိုမ် အာ ဒုဝ်၊ မာဘူ အာလူင့် အူ ဒုဝ် ဘော ဂွန် မာဘူ အာလူင့် အီ ဟဲ့ နုဝ့် အူ ဆီနမ်၊ အီ တူ မိုဝ်း ဒူင် စှေ ဒူင် နဲ အာဒါ ဘူ ဒုဝ်။ 20 အီ မုး ပီ ဒီ လှူ ဒီဂါဝ် တွိုန်၊ ဘေ လုဝ် ဒိုဝ်း ကာပဲ့ ခဝ်ချုင် အူယ် အုဝ်မာ အီ မုး ဖွုန် ဘ့လဲ ဒီ အူ ခ့ဝါက် အာဒါ မက် အူ ဒုဝ်။ ဘေ လုဝ် ကာဝ်ု ကာဆူ ဘော နာမန် 21 အာဒါ မာဘူ အာလူင့် တွိုန်၊ ဘေ လုဝ် ဟပ် ကာပဲ့ အာ အုဝ်မာ အီ မုး အူယ် ဘ့လဲ။ အာဒါ ဂွန် မာဘူ ဂေ တွိုန်၊ ဘေ လုဝ် ဟပ် အူ ဒုဝ် ကာပဲ့ အူ အုဝ်မာ အီ မုး အူ ဘ့လဲ ဒီ အူ ခ့ဝါက်။ ဘေ လုဝ် ဘူင် ပါယ် တီ အာဒါ ဒွန် ဒုဝ်။ 22 ဘေ ပီ ဝီ လုဝ် ဒိုဝ်း ဘော မာပဲ အာလူင့် အူ ဒုဝ်၊ လှူ၊ တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ်၊ တဲး ဂေ ဒူအီ ကိူန် ဝီ ကာလဝ့် ဒီ ဇဝ်ဖြာ။ 23 ဘေ လုဝ် လှူ ဇိုဝ် တီ ဒွန် မျုဝ် ဒဲင် ပီ ဒီ လှူ ဘေ အီ ဒုဝ့် ဒီ ငဝ် ဒွန် ဆီငဲ တွိုန်။ 24 ပါယ် တီ န့ ဘဲန် ပီ လှူ အီ ပီ ပီ ဒီ ဟူမ် အုဝ်။ အာဒါ ဘူ ဆီငဲ ဘေ လုဝ် လှူ ပါယ် တီ တဲး အုး ငှုန် အန် ဘော လဝ့် နဝ်း အုဝ်။ ဘေ လုဝ် လှူ ဇိုဝ် တီ ဒဲင် ပီ ဒီ လှူ ဘေ ဒွန် ဆီငဲ အီ မုး ပီ လှူ အီ ဒုဝ့် ဒီ ငဝ် ဘော ပီ လှူ ပီ ဒီ ဒျီင် တွိုန်။ 25 ဒေါ ဟဲ့ နုဝ့် ဘူ ဆီငဲ တွိုန်၊ ဘေ လုဝ် တး ကာဇု၊ ကြိုပ် ဇဝ်ဖြာ။ အာဝ် ပွိုန် ဘူင် ဂါန် မာဆေ ဆီငဲ တီ။

26 ဆေ န့ ဇမ် ဆီငဲ ဘူင် ဘေ ဘ့လွယ် ဆုဝ့် ငှုဝ်၊ ဒေါ လှူ ဘေ ငှုဝ် ပီ ဆုဝ့် ဘေ ဒီ အာတ့်၊ ဘေ လုဝ် တး ကာဇု၊ ကြိုပ် ဇဝ်ဖြာ။ အာဝ် ပွိုန် ဘူင် ဂါန် မာဆေ ဆီငဲ တီ။ 27 တဲး ဘေ လှူ ပီ ဒီ လှူ အီ ဒုဝ့် ဒီ ငဝ်၊ တဲး အုး ငှုန် အန် လဝ့် နဝ်း ဇဝ်ဖြာ။ ဘေ လုဝ် လှူ ဘော မက် အာလူင့် အာ ဒုဝ်၊ မာဘူ အာလူင့် အူ ဒုဝ်၊ ဂွန် မာဘူ အာလူင့် ဘူ ဒုဝ် အီ ဟဲ့ နုဝ့် အူ ဆီနမ်။ 28 န့ ယီ မုး ပီ လှူ ဒီဂါဝ် အီ ဒူပ် ပီ ဒီ လှူ အီ ဒုဝ့် ဒီ ငဝ်။ အာဒါ မက် အာလူင့် အူ ဒုဝ်၊ ဘေ လုဝ် ဒိုဝ်း ကာပဲ့ ခဝ်ချုင် အူယ် အုဝ်မာ အီ မုး ဖွုန် ဘ့လဲ ဒီ အူ ခ့ဝါက်။ အာဒါ ဂွန် မာဘူ အူ ဒုဝ် တွိုန်၊ ဘေ လုဝ် ဒိုဝ်း ကာပဲ့ အာ အုဝ်မာ အီ မုး အူယ် ဘ့လဲ။ ဘေ လုဝ် ကာဝ်ု ဘော နာမန်။ 29 အာဒါ ဂွန် မာဘူ ဘူ ဒုဝ် တွိုန်၊ ဘေ လုဝ် ဒိုဝ်း အူ ဒုဝ် အူ အုဝ်မာ အီ မုး အူ ဘ့လဲ ဒီ အူ ခ့ဝါက်။ ဒွန် ဒုဝ် ဘေ လုဝ် ဘူင် ပါယ် တီ။ 30 ဒဲင် တီ ဘေ ပီ ဝီ လုဝ် ဒိုဝ်း ဘော မာပဲ အာလူင့် အူ ဒုဝ်။ ဘေ လုဝ် လှူ ဒုဝ် တီ၊ တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ်၊ တဲး ဂေ ဒူအီ ကိူန် ဝီ ကာလဝ့် ဒီ ဇဝ်ဖြာ။ 31 ဘေ လုဝ် ဒိုဝ်း ပီ ဒီ လှူ ဂေ တီ ဘော ဟပ် ပီ လှူ ပီ ဒီ ဒျီင် တွိုန်၊ ဝီ လှူ ဒဲင် ပီ လှူ အီ ဒုဝ့် ဒီ ငဝ် ဘော ဒဲင် ပီ လှူ ဒီဂါဝ် အီ မုး ပီ လုဝ် လှူ ဘေ ဆေဆေ ဒွန် ဆီငဲ။ ဒုဝ် ပီ လှူ ဘေ တီ ဒွန် ဒုဝ်၊ ဘေ လုဝ် ဆာဒိက်၊ ကွဲ့ တဲး န့ မိုဝ်း ဒူင် စှေ ဒူင် နဲ။