1-2 ဒေါ အန် တီ ဂေ ဂွန် အီဘိုန့် အာစာလောဖတ် အီ မုး ဂွန် အာဟေဖာ တွိုန် ဘော ဝီ တး ကွယ် နာ အာတ့် အာမုဝ်ဆဲ ဘော နာ အာတ့် ဒါ အီ လှူ ဒီ ဇဝ်ဖြာ အီ မုး အာလေအာဆာ။ ဂေ တး ဘော နာ အာတ့် ဂေ ဒါ တာင် ဘော ဂေ ဒူအီ ကိူန် အီ ကွယ် ခူပ် ဘာင် မာလုဝ်း ထိုပ် ဘိက် ဘွတ် တွိုန်။ အာစာလောဖတ် တီ ဘော မုး ဂွန် အာဂီလေအာတ်၊ အာဂီလေအာတ် ဝီ မုး ဂွန် အာမာခီရာ။ အာမာခီရာ ဝီ မုး ဂွန် အာမာနာဆေ။ အာမာနာဆေ ဝီ မုး ဂွန် အာယုဝ်။ ဂွန် အီဘိုန့် ဂေ တီ ဘော မုး နာင် မာလာ၊ နာင် နောအာ၊ နာင် ဟောကာလာ၊ နာင် မဲက်၊ ဘော နာင် ဒီရာစာ။ 3 ဂေ တဝ်း၊ “ဂုန့် ယေ ဟဲ့ ဟွတ့် ယမ် ခဲင် ပြဲ ကာဟဝ်း တွိုန်။ န့ ယီ တူ မုး ကူပ် ကွယ် ရိုမ် အန် ဒူပ် ဖိုင် အာခုဝ်ရာ အီ လာယ် ကာခဲန့် ဒီ ဇဝ်ဖြာ။ အန် ဟဲ့ ယမ် ကူပ် မှာပ် ပဲ့ ဟဲ့ ဘူင် အန်။ အန် ယီ တူ မိုဝ်း ဂွန် အီမာယ်။ 4 ဘေ ထာင် န့ ဟဲ့ မှာန်၊ ဆေ စိူဝ် ဂုန့် ယေ တီ ဒီ ဘော ဟြာယ် ကာတဲ ဂေ ဒူအီ အီဆာရေလ ကူပ် တူ မိုဝ်း အန် ဂွန် အီမာယ်။း ယေ မိူဝ် မှာန့်၊ တဲး ယေ မိုဝ်း ခါဂုန်၊ မိုဝ်း ကာဒါယ် ဒူပ် အီကတ် ဝါ ဂုန့် ယေ တီ။”

5 အာမုဝ်ဆဲ ဝီ ကာလာင် ဒီ ဇဝ်ဖြာ လွင် ပီ ကာလာင် ဂေ တီ။ 6 ဇဝ်ဖြာ ဝီ တဝ်း ဒီ အာမုဝ်ဆဲ၊ 7 “ဂြုဝ်း ပီ တဝ်း ပီ မှာန့် ဂေ ဂွန် အီဘိုန့် အာစာလောဖတ် တီ ဟဲ့ ကာငျာ၊ ဟဲ့ မုး ဟဲ့ မှာန်။ ဘော ဂေ ဟဲ့ ကာအာပ် မိုဝ်း ကာဒါယ်၊ တဲး န့ ဘဲန် ခါဂုန် ဒီ ဂေ ဒူပ် အီကတ် ဝါ ဂုန့် ဂေ။ မဲ လုဝ် ဒိုဝ်း ခါဂုန် ဂုန့် ဂေ တီ၊ ဝီ ဒွါ ဒီ ဂေ။

8 တဲး မဲ ဝီ ကာလာင် ဘော ဒီ ဂေ ဒူအီ အီဆာရေလ တဝ်း၊ ‘ဆေ န့ မိုဝ်း အီမာယ် အီ ဟဲ့ ယမ်၊ ဆေ အန် ယီ တူ မိုဝ်း ဂွန် အီမာယ်၊ ဘေ လုဝ် ဒွါ ခါဂုန် အန် ဒီ ဂေ ဂွန် အီဘိုန့် အန်။ 9 ဆေ အန် ယီ တူ မိုဝ်း ဂွန် အီဘိုန့်၊ ဘေ လုဝ် ဒွါ ခါဂုန် တီ ဒီ အီကတ် ဝါ အန်။ 10 ဆေ အန် ယီ တူ မိုဝ်း အီကတ် ဝါ၊ တဲး ဘေ ဒွါ ခါဂုန် တီ ဒီ ဘီနွင် ဝေါဝဲ အီ ကာချြီ့ ဒီ အန်။ 11 ဂေ ဒူအီ အီဆာရေလ လုဝ် ဒူပ် ဒါရာ၊ ဒူပ် အာမိင် ပီ ဘ့လေး အုန် အုဝ် ဇဝ်ဖြာ နီ။’”

12 ဝါယ် အန် တီ ဇဝ်ဖြာ ပီ ဝီ တဝ်း ဒီ အာမုဝ်ဆဲ၊ “တဲး မဲ ဟုဝ့် ဒီ နွန် အာဘာရိမ်၊ တဲး မဲ ယိုဝ် မိူင် ပီ ဒီ ဒွါ အုဝ် ဒီ ဂေ ဒူအီ အီဆာရေလ။ 13 ဆေ မဲ ဟဲ့ ဟွတ့် ယိုဝ်၊ မဲ ဒီ ယမ် ပီ အီကတ် မဲ အီ စိူဝ် အာရူန် တွိုန်။ 14 ခုဝ်၊ ဒေါ ကွယ် ဘေ ခဲင် ပြဲ ကာဟဝ်း အီ စိူဝ် စီနာ တွိုန်၊ ဂေ ဒူအီ အီဆာရေလ ဟဲ့ ပိုန့်၊ ဟဲ့ တဝ်း ဂြုဝ်း တူ မွှိုမ် ဒီ အုဝ် ကူပ် တူ မိုဝ်း ဂေ အိုမ်။ ဘာယ် ယီ တူ ဘူင် ပီ စ်ု အုဝ် ဘေ ဘူင်၊ တဲး အာဖုင် ဒင်ခုဝ် အုဝ် လိုဝ်း ဆီချာ ဒီ ဂေ ဒူအီ အီဆာရေလ ဒေါ ကွယ် ဘေ ဒီ ဒူင် တုဝ်း အိုမ် တီ။” ဒူင် လေး အိုမ် ခဲင် ဒါအာင် မာဝ် တီ၊ န့ စိူဝ် မေရီဘာ အီ ကွယ် ဒီ ဒူင် စိူဝ် ဆာဒေတ် ခဲင် ပြဲ ကာဟဝ်း အီ စိူဝ် စီနာ တွိုန်။

15 ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ အာမုဝ်ဆဲ ဘော ဝီ ဆာခိုဝ် ဒီ ဇဝ်ဖြာ တဝ်း၊ 16 “အိုယ် မဲ ဇဝ်ဖြာ၊ မဲ မုး ဇဝ်ဖြာ အီ အိုပ် တူတ့် ဒွန် မျုဝ် ဘော အာဆာက် ဘော နဝ်း ဖွိုမ် ဒူအီ။ အုဝ် မှာန့်၊ တဲး မဲ ဇဝ် ဝီ ရဝ်း အီမာယ် ပေါ အူ ဝီ၊ တဲး အန် ပွိုန် ဒီ ယဲတ့် ဒူအီ ဂေ နီ၊ 17 တဲး အန် ဘဲန် အီ ယဲတ့် ဂေ ဟာဝ် လိုပ် ဟာဝ် လေး ဒူင် ကွယ် ဂေ။ ကွဲ့ တဲး ဒူအီ ပီ အိုပ် မဲ ဇဝ် ပီ မာဘူ အီ တူ မိုဝ်း ဒါ ကာညာ အီ ယွတ် မဲန် ဂေ။”

18 ဇဝ်ဖြာ ဝီ တဝ်း ဒီ အာမုဝ်ဆဲ၊ “တဲး မဲ ဒဲ့ တး အာယုဝ်ဆူအာ အီ မုး ဂွန် အာနုန် တွိုန်။ အန် မုး ဝီ အီ ဟဲ့ ပွိုန် နဝ်း ဖွိုမ် ဇဝ်ဖြာ။ တဲး မဲ ဒါင် ဒဲ မဲ ဒဲင် ဂိန့် အန်။ 19 တဲး အန် တး စွင့် နာ အာတ့် ဒါ အီ လှူ ဒီ ဇဝ်ဖြာ အီ မုး အာလေအာဆာ ဘော နာ အာတ့် ဂေ ဒူအီ ကိူန်၊ တဲး အန် ဘဲန် ဒါ အီ ယဲတ့် ဂေ၊ တဲး ဒူအီ ဘောကာဂ့လျီတ် ကော ယိုဝ်။ 20 တဲး မဲ တဲး ပွုန် မဲ ဒီ အန်၊ တဲး ဂေ ဒူအီ အီဆာရေလ ဘောကာဂ့လျီတ် ဘော ထူမ် ဂြုဝ်း အန်။ 21 အန် ယီ လုဝ် ဘိုင် အာလေအာဆာ အီ မုး ဒါ အီ လှူ ဒီ ဇဝ်ဖြာ။ အာလေအာဆာ လုဝ် စ်ု မာဝ် အူရိမ် အီ တဲး အန် နပ် ပီ အိုင် ဇဝ်ဖြာ။ ပါယ် တီ အာယုဝ်ဆူအာ ဘော ဂေ ဒူအီ အီဆာရေလ လုဝ် ထူမ် ဂြုဝ်း ပီ စ်ု အာလေအာဆာ ဂေ ဘူင်။ ဆေ အန် တဝ်း၊ တဲး ဂေ လေး၊ ဂေ လုဝ် လေး။ ဆေ အန် တဝ်း၊ တဲး ဂေ တး လိုပ်၊ ဂေ ဘော လုဝ် တး လိုပ်။”

22 အာမုဝ်ဆဲ ဘော ဘူင် ဒူပ် ပီ ကာလာင် ဇဝ်ဖြာ တီ ဒီ အန်။ အန် ဘော စ်ု အာယုဝ်ဆူအာ တး ဇမ် နာ အာတ့် အာလေအာဆာ အီ မုး ဒါ အီ လှူ ဒီ ဇဝ်ဖြာ ဘော နာ အာတ့် ဂေ ဒူအီ ကိူန်။ 23 အန် ဘော ဒါင် ဒဲ အန် ဒဲင် ဂိန့် အာယုဝ်ဆူအာ၊ တဲး န့ ဒူပ် ပီ တဝ်း ဇဝ်ဖြာ ဒီ အန်။ ပါယ် တီ အန် ဒါင် အာယုဝ်ဆူအာ ဘဲန် ဒါ အီ ယဲတ့် ဂေ ဒူအီ အီဆာရေလ၊ တဲး အန် ဘဲန် အီ ဝီ ပ့လု အာမုဝ်ဆဲ။