1 ဝါယ် ဟဲ့ ဟွတ့် ခမ် ဂေ ဒုက် တာင် တွိုန်၊ ဇဝ်ဖြာ ဝီ ကာလာင် ဒီ အာမုဝ်ဆဲ ဂါယ် ဒါ အီ လှူ ဒီ ဇဝ်ဖြာ အီ စိူဝ် အာလေအာဆာ အီ မုး ဂွန် အာရူန် တွိုန်။ အန် တဝ်း၊ 2 “တဲး ဘာယ် ဒိုဝ်း ဇာရာင် ဂေ ဒူအီ အီဆာရေလ ခြိုဝ် မှဝ် ခြိုဝ် အန်။ တဲး ဘာယ် ဒဲမ် တူတ့် စိူဝ် ဂေ အာဆာက် အီ ဟဲ့ နုဝ့် အာ ဂိုဝ် ဆီနမ် ဟုဝ့် နာ ဒဲင်၊ ဂေ အီ ဟဲ့ ပွိုန် ကာဂုဝ်း။” 3 အာမုဝ်ဆဲ ဂါယ် ဒါ အီ လှူ ဒီ ဇဝ်ဖြာ အီ စိူဝ် အာလေအာဆာ ဘော ကာလာင် ဒီ ဂေ ဒူအီ ကိူန် ဒေါ ကွယ် ဂေ ခဲင် ဂ့လင် မုဝ်အာပ် အီ ကွယ် ခူပ် ဘ့လဲင် အိုမ် ယောဒါန်၊ အီ ဝီ လာယ် ကာဆိူဝ် ဒီ မိူင် ယေရီခုဝ် တွိုန်။ ဂါယ် တဝ်း၊ 4 “ဘေ လုဝ် ဒိုဝ်း တူတ့် ဇာရာင် ဒူအီ အာဆာက် အီ ဟဲ့ နုဝ့် အာ ဂိုဝ် ဆီနမ် ဟုဝ့် နာ ဒဲင်။ ဇဝ်ဖြာ ဟဲ့ ကာလာင် ဒီ အာမုဝ်ဆဲ ပါယ် တီ။”

အာနီ န့ မုး ဇာရာင် ဂေ ဒူအီ အီဆာရေလ အီ လေး ခဲင် မိူင် အဲဂိုပ် တွိုန်။

5 ခဲင် ခြိုဝ် အာရူဘေန် အီ မုး ဂွန် ဂိန့် အာအီဆာရေလ တွိုန်၊ န့ ဘော မုး ဂေ ဒူအီ အာဟာန်၊ ဒူအီ အာဖာလူ၊

6 ဒူအီ အာဟေဇာရူန် ဘော ဒူအီ အာခါမီ။ ဒူအီ ဂေ တီ ဂေ မုး တူတ့် ခြိုဝ် အာရူဘေန်။

7 ဂေ ဘောကာဂ့လျီတ် ကွယ် ဖွုန် မှိုန့် ဒီ အူယ် ဟြဲန့် ဒီ ဘူ မာယဝ်း ဒီ အူယ် ဂိုဝ် ဝီ။

8 ဂွန် အာဖာလူ ဘော မုး အာအေလီအာပ်။ 9 ဂွန် အာအေလီအာပ် ဘော မုး အာနေမူလာ၊ အာဒါထာန် ဘော အာဖီရမ်။ အာဒါထာန် ဂါယ် အာဖီရမ် ဂါယ် ဘော မုး ဒူအီ ပီ ရဝ်း ဂေ ဒူအီ အီဆာရေလ၊ တဲး ဂေ ဘူင် ကာဘး ဒီ အာမုဝ်ဆဲ ဂါယ် အာရူန် ဒေါ ဘူင် ကာဘး ဒူအီ အာခုဝ်ရာ ဒီ ဇဝ်ဖြာ။ 10 ဒေါ အန် တီ ကာဒါယ် ဘော ဒး ဘော ညွှတ် ဂေ၊ တဲး ဂေ ယမ် ဒူပ် ဖိုင် ဒူအီ အာခုဝ်ရာ တွိုန်။ ဘော ငဝ် ဟဲ့ ကာဆိုမ် ဒူအီ အာ မာယဝ်း ဒီ ဖန် ဂိုဝ် ဝီ။ လွင် အန် တီ န့ ဘဲန် အူဖာမာ ဒီ ဒူအီ ဒွန် အီ။ 11 မာလဲ၊ လှုက်လှာန် အာခုဝ်ရာ တီ ယီ ဆီ မိုဝ်း။

12 ခဲင် ခြိုဝ် အာဆီမေအူန်၊ န့ ဘော မုး ဒူအီ အာနေမူလာ၊ ဒူအီ အာယာမိန်၊ ဒူအီ အာယာခိန်၊

13 ဒူအီ အာဇေန်ရာ ဘော ဒူအီ အာဆာအုန်။

14 ဒူအီ ဂေ တီ၊ ဂေ ဘောကာဂ့လျီတ် ကွယ် အာ မှိုန့် ဒီ အာ ဟြဲန့် ဒီ အာ မာယဝ်း ဝီ။

15 ခဲင် ခြိုဝ် အာဂတ်၊ န့ ဘော မုး ဒူအီ အာနေဖောနီ၊ ဒူအီ အာဟာဂီ၊ ဒူအီ အာဆူနီ၊

16 ဒူအီ အာအောစာနိတ်၊ ဒူအီ အာအေရိတ်၊

17 ဒူအီ အာရုဝ်ဒီ ဘော ဒူအီ အာရေလီ။

18 ဒူအီ ဂေ တီ ဂေ မုး လှုက်လှာန် အာဂတ်။ ဂေ ဘောကာဂ့လျီတ် ကွယ် ဖွုန် မှိုန့် ဒီ ဖန် မာယဝ်း ဝီ။

19 ခဲင် ခြိုဝ် အာယူဒါ န့ မုး ဂွန် အာယူဒါ အာ ဝီ အီ စိူဝ် အာအေရာ ဂါယ် အာအုဝ်နာန်၊ ဂါယ် ဟဲ့ ဟွတ့် ယမ် ဒေါ ဆီ ကွယ် ဂါယ် ခဲင် မိူင် ကာနန့် တွိုန်။

20 ခဲင် ခြိုဝ် အာယူဒါ ဂေ အီ ဆီ ကွယ်၊ န့ ဘော မုး ဒူအီ အာဇေန်ရာ၊ ဒူအီ အာဖေရေတ် ဘော ဒူအီ အာဆေလာ။

21 ဂေ လှုက်လှာန် အာဖေရေတ် ဘော မုး န့ကြိုဝ်း အာဟေဇာရူန် ဂါယ် န့ကြိုဝ်း အာဟာမူလ။

22 ဒူအီ ဂေ တီ အီ မုး အာမျုဝ် အာယူဒါ၊ ဂေ ဘောကာဂ့လျီတ် ကွယ် ဘူ မှိုန့် ဒီ ဒဝ် ဟြဲန့် ဒီ ဖန် မာယဝ်း ဝီ။

23 ခဲင် ခြိုဝ် အာအီဆာခါ၊ န့ ဘော မုး ဒူအီ အာထုဝ်လာ၊ ဒူအီ အာဖူဝါ၊

24 ဒူအီ အာယာဆူပ် ဘော ဒူအီ အာဆီမာရုန်။

25 ဒူအီ ဂေ တီ အီ မုး ခြိုဝ် အာအီဆာခါ၊ ဂေ ဘောကာဂ့လျီတ် ကွယ် ဒဝ် မှိုန့် ဒီ ဖွုန် ဟြဲန့် ဒီ အူယ် မာယဝ်း ဝီ။

26 ခဲင် ခြိုဝ် အာဇေဘူလူန်၊ န့ ဘော မုး ဒူအီ အာဆေရာတီ၊ ဒူအီ အာအေလူန် ဘော ဒူအီ အာယာလေန်။

27 ဒူအီ ဂေ တီ အီ မုး ခြိုဝ် အာဇေဘူလူန် ဂေ ဘောကာဂ့လျီတ် ကွယ် ဒဝ် မှိုန့် ဒီ ဖန် မာယဝ်း ဝီ။

28 ခဲင် ခြိုဝ် အာယုဝ်၊ န့ ဘော မိုဝ်း ဂွန် အီမာယ် အာ ဝီ အီ စိူဝ် အာမာနာဆေ ဂါယ် အာအေဖာရိမ်။

29 ဂေ လှုက်လှာန် အာမာနာဆေ တီ ဘော မုး ဒူအီ အာမာခီရာ။ အာမာခီရာ ဘော မုး ဂုန့် အာဂီလေအာတ် အီ ဟဲ့ ဝီ ဘဲန် ဂုန့် ဒင် ဂေ ဒူအီ အာဂီလေအာတ်။

30 အာဂီလေအာတ် ဘော မုး ဂုန့် ဒင် ဂေ ဒူအီ အာယေစေရီ ဘော ဒူအီ အာဟေလေက်၊

31 ဒူအီ အာဆာရီအေန်၊ ဒူအီ အာဆေခေမ်၊

32 ဒူအီ အာဆာမီဒါ ဘော ဒူအီ အာဟေဖာ။

33 ဂွန် အီမာယ် အာဟေဖာ အီ စိူဝ် အာစာလောဖတ်၊ အန် တူ မိုဝ်း ဂွန် အီမာယ်။ အန် မိုဝ်း မီ ဂွန် အီဘိုန့် ဒီ ဒီလူယ်။ ဂွန် အီဘိုန့် အန် ဂေ စိူဝ် နာင် မာလာ၊ နာင် နောအာ၊ နာင် ဟောကာလာ၊ နာင် မဲက် ဘော နာင် ဒီရာစာ။

34 ဂေ ဒူအီ ခြိုဝ် အာမာနာဆေ ဘောကာဂ့လျီတ် ကွယ် ဖန် မှိုန့် ဒီ အာ ဟြဲန့် ဒီ ဘူ မာယဝ်း ဝီ။

35 ခဲင် ခြိုဝ် အာအေဖာရိမ် န့ မုး ဒူအီ အာဆူထေလာ၊ ဒူအီ အာဘေခါရာ၊ ဒူအီ အာထာဟာန်။

36 ဂွန် အာဆူထေလာ ဘော မုး အာအေရာန်။

37 ဒူအီ ဂေ တီ အီ မုး ခြိုဝ် အာအေဖာရိမ်၊ ဂေ ဘောကာဂ့လျီတ် ကွယ် အူယ် မှိုန့် ဒီ အာ ဟြဲန့် ဒီ ဖန် မာယဝ်း ဝီ။ ဂေ ဒူအီ ခဲင် ခြိုဝ် တီ မုး တူတ့် လှုက်လှာန် အာယုဝ်။

38 ခဲင် ခြိုဝ် အာဘေန်ယာမ် န့ မုး ဒူအီ အာဘေန်လာ၊ ဒူအီ အာစာဘေန်၊ ဒူအီ အာဟီရာမီ၊

39 ဒူအီ အာဆူဖာ ဘော ဒူအီ အာဟူဖာမာ။

40 ဂေ အာနေမာန် ဘော မုး ဒူအီ အာရာအတ် ဂါယ် ဒူအီ အာနာမာန်။

41 ဒူအီ ဂေ တီ အီ မုး ခြိုဝ် အာဘေန်ယာမ်၊ ဂေ ဘောကာဂ့လျီတ် ကွယ် ဖွုန် မှိုန့် ဒီ ဖန် ဟြဲန့် ဒီ ဒဝ် မာယဝ်း ဝီ။

42 ခဲင် ခြိုဝ် အာဒါန် န့ မုး ဒူအီ အာဆူဟာမီ။ 43 ဒူအီ ဂေ တီ အီ မုး အာမျုဝ် အာဆူဟာမီ၊ ဂေ ဘောကာဂ့လျီတ် ကွယ် ဒဝ် မှိုန့် ဒီ ဖွုန် ဟြဲန့် ဒီ ဖွုန် မာယဝ်း ဝီ။

44 ခဲင် ခြိုဝ် အာဆေန် န့ မုး ဒူအီ အာအီမာနာဟာ၊ ဒူအီ အာအီဆာဝီ ဘော ဒူအီ အာဘေရီယာ။

45 ဂေ လှုက်လှာန် အာဘေရီယာ ဘော မုး ဒူအီ အာဟေဘာ ဂါယ် ဒူအီ အာမာလာခီလာ။

46 န့ ယီ မုး အာဆေန် တီ၊ အန် ဘော မိုဝ်း ဂွန် အီဘိုန့် အူ ဝီ အီ စိူဝ် နာင် ဆေရာ။

47 ဒူအီ ဂေ တီ အီ မုး ခြိုဝ် အာဆေန်၊ ဂေ ဘောကာဂ့လျီတ် ကွယ် ဖန် မှိုန့် ဒီ အူယ် ဟြဲန့် ဒီ ဖွုန် မာယဝ်း ဝီ။

48 ခဲင် ခြိုဝ် အာနာပ်ထာလီ၊ န့ ဘော မုး ဒူအီ အာယာဇေအေန်၊ ဒူအီ အာဂူနီ၊

49 ဒူအီ အာယေဇေန် ဘော ဒူအီ အာဆီလေမ်။

50 ဒူအီ ဂေ တီ အီ မုး ခြိုဝ် အာနာပ်ထာလီ၊ ဂေ ဘောကာဂ့လျီတ် ကွယ် ဖွုန် မှိုန့် ဒီ ဖန် ဟြဲန့် ဒီ ဖွုန် မာယဝ်း ဝီ။

51 ဂေ အီမာယ် ဒူအီ အီဆာရေလ ဘောကာဂ့လျီတ်၊ ဂေ ကွယ် ဒဝ် ဆဲန် ဒီ အူ ဟြဲန့် ဒီ ဘူ မာယဝ်း ဒီ အူယ် ဂိုဝ် ဝီ။

52 ဇဝ်ဖြာ ဝီ တဝ်း ဒီ အာမုဝ်ဆဲ၊ 53 “မဲ လုဝ် ကာယဝ်း ကာဒါယ် ခဲင် မိူင် တီ၊ ဒွါ ဒီ ဒူအီ ဂေ တီ၊ တဲး န့ ဒူပ် ပြေတ့် ဒူပ် ကိူန် ဂေ၊ တဲး န့ ဘဲန် ခါဂုန် ဂေ ဆေဆေ။ 54-56 ဒေါ ဒီ ကာယဝ်း မဲ ကာဒါယ် ဒီ ဂေ တီ၊ တဲး ဂေ ကာတာမ်။ ဆေ န့ ဘော မုး ဖိုင် ဒူအီ ကိူန်၊ တဲး မဲ ဘော ကာယဝ်း ကိူန်၊ ဒွါ ဒီ ဂေ။ ဆေ န့ ဘော မုး ဖိုင် ဒူအီ ပြေတ့်၊ တဲး မဲ ဘော ကာယဝ်း ပြေတ့်၊ ဒွါ ဒီ ဂေ။ ခဲ့ ပီ ပွိုန် ဂေ ဒွန် ဖိုင်၊ မဲ လုဝ် တဲး န့ ဒူပ် ခြိုဝ် ဘြိမ် ဂေ။”

57 ခဲင် ခြိုဝ် အာလေဝီ န့ ဘော မုး ဒူအီ အာဂေန်ရာဆူန်၊ ဒူအီ အာခုဝ်ဟာတ် ဘော ဒူအီ အာမေန်ရာရီ။

58 ခဲင် ခြိုဝ် ဂေ တီ၊ န့ ဘော မုး န့ကြိုဝ်း အာလီဘာနီ၊ န့ကြိုဝ်း အာဟေဘြုဝ်၊ န့ကြိုဝ်း အာမာလီ၊ န့ကြိုဝ်း အာမူဆီ၊ ဘော န့ကြိုဝ်း အာခုဝ်ရာ။ အာခုဝ်ဟာတ် ဘော မုး ဂုန့် အာမာရမ်။

59 အာမာရမ် တီ ဘော ခတ် ဒိုဝ်း နာင် ယုဝ်ခေဘေတ် အီ မုး ဂွန် ဒူအီ အာလေဝီ။ အန် ဟဲ့ ဂွိုတ် ခဲင် မိူင် အဲဂိုပ် တွိုန်။ ဂွန် နာင် ယုဝ်ခေဘေတ် တီ ဘော မုး အာရူန်၊ အာမုဝ်ဆဲ ဘော နာင် မီရီယမ် အီ မုး အီကတ် အာရူန် ဂါယ် အာမုဝ်ဆဲ။

60 အာရူန် ပီ ဝီ မိုဝ်း ဂွန် ဖွုန် ဝီ။ န့ ဘော မုး အာနာဒါပ်၊ အာဘီဟူ၊ အာလေအာဆာ ဘော အာအီထာမာ။

61 အာနာဒါပ် ဂါယ် အာဘီဟူ ယီ ဟဲ့ ယမ် ဒေါ လှူ ဂါယ် ဒီ ဇဝ်ဖြာ ပီ တူ ကာအာပ် လှူ ဒေါ ကွယ် ဂေ ခဲင် ပြဲ ကာဟဝ်း ခူပ် နွန် ဆီနာယ် တွိုန်။

62 ဂေ အီမာယ် အီ မုး ဒူအီ အာလေဝီ ပဲ့ ဟဲ့ ဟွတ့် တိး၊ စုး ဆိန့် အာဆာက် အူ မာဂျီန် ဟုဝ့် နာ ဒဲင်၊ ဂေ ကွယ် အာ မှိုန့် ဒီ အူယ် ဟြဲန့် ဝီ။ ဇာရာင် ဂေ တီ အာဝ် ဟပ် ဒူပ် ဇာရာင် ဂေ ဒူအီ အီဆာရေလ။ ခုဝ်၊ ဂေ တူ ပွိုန် ခါဂုန် ပီ ပွိုန် ဂေ ဒူအီ အီဆာရေလ။

63 ခဲ့ ကွယ် ဇာရာင် ဂေ ဒူအီ ဘောကာဂ့လျီတ် တီ၊ အာမုဝ်ဆဲ ဂါယ် အာလေအာဆာ ဟဲ့ ဒဲမ် ဒေါ ကွယ် ဂေ ဒူအီ အီဆာရေလ ဒီ ဂ့လင် မုဝ်အာပ် အီ ကွယ် ခူပ် ဘ့လဲင် အိုမ် ယောဒါန်၊ အီ လာယ် ကာဆိူဝ် ဒီ မိူင် ယေရီခုဝ်။ 64 ခါ အာတ့် အာမုဝ်ဆဲ ဂါယ် အာရူန် အီ မုး ဒါ အီ လှူ ဒီ ဇဝ်ဖြာ၊ ဂါယ် ဟဲ့ ဒွိုမ် ဒဲမ် ဇာရာင် ဂေ ဒူအီ အီဆာရေလ ဒေါ ကွယ် ဂေ ခဲင် ပြဲ ကာဟဝ်း ဒီ နွန် ဆီနာယ် တွိုန်။ စိူဝ် ဂေ ဒူအီ အီ ဟဲ့ ဒဲမ် ခဲင် ဇာရာင် ဖိူန် တီ၊ အာဝ် လိုပ် ခဲင် ဇာရာင် ကာမာယ် နီ ခေါ အူ ဝီ။ 65 ခုဝ်၊ ဇဝ်ဖြာ ဟဲ့ ဒွိုမ် တဝ်း၊ “ဒူအီ ဂေ တီ၊ ဂေ ဒီ ယမ် တူတ့် ခဲင် ပြဲ ကာဟဝ်း။” န့ လွတ် မီ အာဂါလိပ် အီ မုး ဂွန် အာယေဖုဝ်နာ ဘော အာယုဝ်ဆူအာ အီ မုး ဂွန် အာနုန် တွိုန်။ ဒဲင် တီ၊ အူ ဝီ မိူဝ် အာဝ် ဟူ မိုဝ်း။