1 ဒေါ ကွယ် ဂေ ဒူအီ အီဆာရေလ ဒီ ဂ့လင် ဆီဒိမ် ဂေ အီမာယ် ဘော ဝီ ဟာဝ် လာယ် လုတ့် လာယ် လာယ် ဒီ အီဘိုန့် ဂေ ဒူအီ မုဝ်အာပ်။ 2 အီဘိုန့် ဂေ တီ ဘော ဒဲ့ ဒူအီ ဂေ တီ ဟာဝ် ကြိုပ် ဇဝ် ပီ ကြိုပ် ဂေ။ ပါယ် တီ ဂေ ဒူအီ အီဆာရေလ ဟဲ့ ကိူန် ဘော ဟူမ် ယင် ပီ လှူ ဂေ ဘော ကြိုပ် ဇဝ် ပီ ကြိုပ် ဂေ။ 3 ဂေ ဒူအီ အီဆာရေလ အာပ် ဒုဝ် ဂေ ဒီ ဇဝ် ဘာလ အီ ကွယ် ခဲင် မိူင် ဘေအောရ။ ပါယ် တီ ဇဝ်ဖြာ ဘော ရူ ကာဆဝ် ဒီ ဂေ ဒူအီ အီဆာရေလ။

4 ဇဝ်ဖြာ ဝီ တဝ်း ဒီ အာမုဝ်ဆဲ၊ “ဂေ အီ မုး ဒါ တာင် အီ ယဲတ့် ဂေ ဒူအီ အီဆာရေလ တွိုန် ဘောကာဂ့လျီတ်၊ မဲ လုဝ် တဲး ဂေ ယမ်၊ ပက် ဟွယ် ဂေ၊ ရာယ် ဂေ ဒီ ဆောဒါတ်။ ဆေ မဲ ဘူင် ပါယ် တီ န့ ဒီ တဲး နဝ်း ရူ အုဝ် ဒီ ဂေ ဒူအီ အီဆာရေလ ကြဲ ဒီ ဝီ ယေန်။”

5 ဟဲ့ ဟွတ့်၊ အာမုဝ်ဆဲ ဝီ ကာလာင် ဒီ ဒါ တာင် အီ ဆုင်ဖျာတ် အာမူ ဂေ ဒူအီ အီဆာရေလ။ အန် တဝ်း၊ “ခဲင် ဒူအီ ပီ အိုပ် ဘေ၊ ဆေ န့ မိုဝ်း ဒူအီ အီ ဟဲ့ ဟာဝ် ကြိုပ် ဇဝ် ဘာလ အီ ကွယ် ခဲင် မိူင် ဘေအောရ၊ ဘေ လုဝ် ငဝ်း ယမ် ဒွန် အီ။”

6 ဒေါ အန် တီ န့ မိုဝ်း ဒူအီ အီဆာရေလ အူ ဝီ၊ အန် ဘော ဒိုဝ်း တး အီဘိုန့် အီ မုး ဒူအီ အာမျုဝ် မီဒီအာန် အူ ဝီ တး လိုပ် ခဲင် ထိုပ် အန်၊ တဲး ဘော အာမုဝ်ဆဲ ဘော ဂေ ဒူအီ ကိူန် ယိုဝ်။ ဂေ ဘောကာဂ့လျီတ် ဆီငျာ က့လိုဝ်၊ ငျာ ယာမ် နာ အာတ့် မာလုဝ်း ထိုပ် ဘိက် ဘွတ် တွိုန်။ 7 န့ ဘော မုး အာဖီနေဟာတ် အီ မုး ဂွန် အာလေအာဆာ ဘော မုး လှာန် အာရူန် အီ မုး ဒါ အီ လှူ ဒီ ဇဝ်ဖြာ တွိုန်။ အန် ဘော ယိုဝ် ဒူအီ ဝီ တီ ဟဲ့ ဘူင် ပါယ် တီ အန် ဘော လေး နာ ရေတ့် ဒူင် ကွယ် ကာဇု ဂေ ဒူအီ ကိူန် 8 ဘော ဒိုဝ်း ဘ့လာ လျီး အန်၊ ဝီ ဒူပ် ဒူအီ ဂါယ် တွိုန်၊ လိုပ် ခဲင် ထိုပ် ဒူင် ကွယ် ဂါယ်။ အန် ဘော ဘ့လုး ဝတ့် ဂါယ်၊ တဲး န့ ကော ကာလှန် ဘော အာ ဝီ။ ကူပ် ပီ ဘူင် အန် တီ၊ အာဖေ အာရေ ပီ လုဝ် ခမ် ဂေ ဒူအီ အီဆာရေလ တွိုန်၊ န့ ဘော ဝီ ယေန်။ 9 မာလဲ၊ ဒူအီ အီ ဟဲ့ ယမ် ဒီ အာဖေ အာရေ တီ၊ ဂေ ဘောကာဂ့လျီတ် ဟဲ့ မုး အာ မှိုန့် ဒီ ဖွုန် ဟြဲန့် ဝီ။

10 ဇဝ်ဖြာ ပီ ဝီ တဝ်း ဒီ အာမုဝ်ဆဲ၊ 11 “ကူပ် ပီ ဘူင် အာဖီနေဟာတ် အီ မုး ဂွန် အာလေအာဆာ၊ အုဝ် အာဝ် ဟူ ဘော ရူ ကာဆဝ် ဒီ ဂေ ဒူအီ အီဆာရေလ။ အန် ဟဲ့ နပ်၊ အုဝ် ဆီ တဲး ဂေ ဒူအီ အီဆာရေလ ရုဝ်ဆေ မီ အုဝ်။ ခုဝ် အန် တီ၊ အန် ဟဲ့ အွန် ဒီ ဝဲန် တူတ့် ဒွန် မျုဝ် အီ တူ ရုဝ်ဆေ မီ အုဝ် အူ ကာဒင်။ ကူပ် န့ ပါယ် တီ အုဝ် အာဝ် ဟူ ရူ ဟူ စာဝ် ဒီ ဂေ။ အုဝ် အာဝ် ဟူ ပျာတ့် ဝဲန် ဂေ။ 12 ခုဝ်၊ တဲး မဲ ကာလာင် ဒီ အန်၊ အုဝ် ဒီ ဒွါ ကာဒိက် ဆတ်ဇာ ဒီ အန်၊ တဲး အန် မိုဝ်း နဝ်း ဂျီတ် ယေန်။ 13 ကာဒိက် ဆတ်ဇာ တီ၊ အုဝ် ဒီ ခမ် ဆေဆေ၊ ဘော စုဝ် အန် ဘော စုဝ် လှုက်လှာန် အန် ဘောကာဂ့လျီတ် ဒွန် စုဝ် ဒွန် ဘာန်။ ဂေ ဒီ ဘဲန် ဒါ အီ လှူ ဒီ ဇဝ်ဖြာ ဆေဆေ။ ကူပ် တူ ခမ် အန် အီ ဘူင် ကာဘး ဒီ အုဝ်၊ အန် ဟဲ့ ဘူင် တဲး ဒူအီ အီဆာရေလ ဝီ ကာလဝ့် ဒီ အုဝ်။”

14 ဒူအီ အီဆာရေလ အီ ဟဲ့ ယမ် ကူပ် ဒိုဝ်း တး အန် အီဘိုန့် ဒူအီ မီဒီအာန် တွိုန်၊ အန် စိူဝ် အာဇီမာရီ။ အန် မုး ဂွန် အာဆာလူ အီ မုး ဒါ တာင် အီ ယဲတ့် ခြိုဝ် အာဆီမေအူန်။ 15 အီဘိုန့် မီဒီအာန် အီ ယမ် တီ၊ အန် စိူဝ် နာင် ကောစာဖီ။ ဂုန့် အန် စိူဝ် အာဇူရာ အီ မုး ဒါ တာင် ခဲင် ဒူအီ အာမျုဝ် မီဒီအာန်။

16 ဇဝ်ဖြာ ပီ ဝီ ကာလာင် ဒီ အာမုဝ်ဆဲ ပေါ န့ ပွါ တဝ်း၊ 17 “တဲး မဲ မာတ် ဂေ ဒူအီ မီဒီအာန် မုး ရန်ဆူ မဲ။ တဲး မဲ ကာဂုဝ်း ပျာတ့် ဝဲန် ဂေ။ 18 ခုဝ်၊ ဂေ ဟဲ့ ကာလုဝ် ဘေ ဘော ပီလွှက့် ဒီ ဘေ၊ တဲး ဘေ ဝီ ကာဒိုက် ကာဒဝ့် ဒီ ဇဝ် ဘာလ အီ ကွယ် ခဲင် မိူင် ဘေအောရ။ ဘော နာင် ကောစာဖီ အီ မုး ဂွန် ဒါ တာင် ဂေ ဟဲ့ ဘူင် နာ တူ မွှိုမ် ဒီ ဘေ ဒေါ ခမ် ဘေ အာဖေ အာရေ တွိုန်။”